TWIN FLAME

TWIN FLAME -(MIZO) 

 -Rengpuii Guite 

 (Inspired by true events) 

TWIN FLAME-1

 Tokyo, Japan 

 Embassy of India 

“Thank you, Professor” tiin Dr. Ogawa chu mangtha nan nipah fawmin ka han chibai nawn leh a. 

 “No problem Mr.Ralte..” tih a kan inthlah hnu chuan building atanga chhuahna lam kawng pan tum in ka inher nghal a. 

 Eng thil nge ka hmuh chiah hi?

 “Woooowww…” ti a meng kual luih vak pah chuan a kut chu a awm zawnah a han suih zan a. 

“Mate..” ka aw chu a lawi ruih a, ka chil ka lem kawk a, “Mate…” a aia ring zawk chuan ka han ti leh a. Ani erawh in mak min tih ai mah chuan a dan ngai te bawkin a phur leh hmel har har khawp mai. Henu zet hi chu! 

“Enge he tah i tih?” kut kuangkuah paha dak vah chuan mi han zawt a 

“Nimin ah ka rawn thleng a, India a tihfel hmaih thil ka lo nei a, embassy lam puihna ka rawn ngen tawp a ni..” ka tih zawh chuan ka thaw halh a 

“Iti fel thei em?” 

“Aw, University lam atanga ka hmelhriat pakhat puihna hmangin ..” 

“Embassy-a I thil tih lam nilo in Tokyo ah enge I tih dawn?” ka sawi zawh hma chuan a rawn ti vat a “Research..” 

“Ph. D I zo tawh tiraw..” tih pah chuan ka banah chuan a rawn chelh a, thutna awl lam pan chuan min kai phei a, kan thu dun ta a

 “Aw, zo tawh e, lawmpuina gift pawh min pek kha..” tih pah chuan ka nui suk a 

 “Min hmu hi mak iti em?” nui hak pah chuan a rawn ti a 

 “Aw, kan inhmuh lohna a rei tawh sia..” ka han ti ngawt a. 

 “Nang hi, ka hrechhuak.. I dream min hrilh thin kha! Japan a chen anih kha. Awi U Remruat ka lawmpui lutuk che..” hlim vanga mittui tel hauh loa tap tur hmel a rawn pu a, pakhat pawn a tah a chhuak hauh lo tih chu ka chiang viau lawi si. A naupan laia vawikhat ka hmuh hnu atang khan a tleirawl tirh te atanga a nulat chhoh thleng ka hmelhriat ve anih kha. Pasal neih hun ve zet tawh he hmeichhe thawveng tak hi kum hnih chuang kan inhmuh loh hnu pawn ala inthlak danglam reng reng lo. 

“Chutiang a ni lo Mate..” za vak lo chuan ka han ti a 

“Khawi I phone” a tih chuan ka pe mai a, number pakhat dialin “save rawh aw.. ka number” a ti a 

“Ngatinge?” ka chawl leh dat a, ani chuan min lo melh kar a. 

“Ngatinge ka nu I rawn call loh? vawi hnih ngawt!” zawi sap chuan ka ti a. A hmel leh awmdan pawh chu a inthlak danglam nghal tih ka hmu thei a ni. 

“Englo..” a mit a chhing vang vang a, “thilpek ka lo thawn kha” a rawn ti a. 

 “Kha thil Corporation pakhat hminga lo thleng kha maw?” tiin ka han zawt ha a, a lu chu a bu nghauh a.

 “Japan-a awm ka duh lo iti ve chu” a naupangchhia ka ti leh hnuhnawh hle mai, mahse thu sawi tawh chu lak kir leh rual ani tawh si lo. 

 Hmeichhe pakhat a awm a, a hming chu Lalhruaitluangi a ni. Kan inlaichinna hi ‘laklawh’ tih hian a sawi fiah ber hian ka hria a. Hmun hrang hrangah tum vang emaw tum loh takin kan inhmu fova, hriatrengna hlimawm tak min siampui thei zel thin hi ani min ngainat zual tir tu a ni. Thiamna sang tak neiin fanu duhthusam tih a sawi a ni fova, ka tan erawh ani chu Bar-a min hruai hmasa bertu, punch (alcohol) tui ber ber siam dan min zirtir tu leh min min hmelhriattirtu, hookah zuk dan ka hriat phahna a ni. Kan bultan dan chu engpawh nise inngaizawngte emaw thian an inthen a, theihnghilh an intum leh mai theih ang inlaichinna kan nei ve thei loa, suihzawmtu kan nei tlat a, hmangaih inang kan nei a, ani chuan min intawn tir leh fo thin. 

 Helai hmuna kan intawn leh kher hi chu ka beisei phak lo. Kan inhmuh hnuhnun ber tum khan ka suangtuahna zawng zawng tih chhiatin a awm a, kan inmangtha chiang viau anih kha. Thil kha a ngai anga a kal leh rinna pawh ka nei tawh loa, a lehlam takah chuan ka lawm viau zawk a ni. Beiseina hian min tichak reng bik loa, beidawnna erawh bul thar tan tura chakna min pe tu anih chang lah a awm ve bawk. Chutih rualin khang thil thleng te kha hria awm pawn a awm leh tawh hauh si lo. 

 Unau pathum zinga upa ber niin nau mipa pakhat leh hmeichhia pakhat ka nei a. Chhungkaw hlim thei ve tak kan ni. Ka pa hi School headmaster niin ka nu erawh in lama tangkai tak leh chhungkaw tinuam tu ber a ni. Hausakna hi engtiang chiaha teh tur nge chiang fak bik lo mahila hlimna hmanga teh a nih ve ngai chuan Aizawl khawpuia hausa pawla an chhiar tel tur zinga mi chu kan ni ve thin in ka hria. 

Chutiah lai erawh chuan malsawmna ngawr ngawr kan beisei vang ni hauh loin kan thil hmachhawn thin awlai loh zia chu ka unaunu neih chhun Thartei hmela na tawrhna lo lang thin khan min hrilhfiah fo thin. Vawi tam damdawiin a hruai niin, ‘a dam tawh e’ tih theih ni reng a herchhuak thei lo. La nau viau e tilo khan ka chhang chiah Ruata, Thartei’n a nau tet deuh laia a hming Vanlalruata tih a lam thiam loh avanga Vantatruala lo nita nen chuan theih ang ang in kan duat thiam ve kher mai. Kan phak tawk ang ang khan kan hmangaih ve thin takzet a ni. 

Lalhruaitluangi ah let leh tawh ang. Henu vang hian ka mizia ber pawh ka inhriatthiam loh chang a tam kher mai. A chang chuan ani hi ka nuna lo lut lo turin duhthlanna siam thei ta ila siam chak ngawih ngawih chang ka nei thin. A mize thawveng tak hian a laka ka inpuan ve na te kha nuihzathlak ah a chhuah hmak mai bawk si anih kha. 

Mumbai, Maharastra 

Thlawhna thlawk chhuak tur chu hlau ru viau mahila hlau lo anga lan chu ka tum ve nasa hle a. Ka putea chuan hrethiam tih hriat tak hian ka lu a rawn tuai pah chuan “A hlauhawm lo aw, Rema..” a rawn ti a, kei chuan ka lu ka lu ka lo bu nghat a. 

Nidang zawng nise hlauhthawnna nena ka tum ram pan tur ni ila ka tlan dawr dawr ngei ang, mahse thlawhna ah chuan awmzia a awm lo kher mai. High School rapin kum 14 hial tling ve tawhin , inla pa ve thawkhat viau mahila vansang hlauhna chuan ka lo inlak pa ve na chu a hneh thlu ngang mai. Thil dang ngaihtuah luih tum chu tha bera hria in ka mit ka han chhing a, Airport lam pana ka pa min hruai lai te chu ka han ngaihtuah let a. 

 Thli thaw kara thlasik rim rawn nam chek chek chu darkar reilo te hnu ah hriat tur ka nei tawh dawn lo tih inhre ve niawm hrim khan ka hip kak kak anih kha, ka nau Tat-a tap ri feih feih bak motor chhungah khan ri dang hriat tur reng a awm lo. Ka pa chuan a aw a han thian kharh a, 

 “Inah kan pahnihin I nu leh I unaute hriat lohin thil tui deuh deuh kan ei dawn alawm” tiin ka putea’n a seat hmalam a a pawm ka nau, min ngen avanga tap mek chu ka pa chuan motor khalh pahin chuan a bawp chu ava hmer zeuh a. 

 “Tatte fel deuhin lo awm rawh aw, kan lo haw lehnghal dawn alawm, checkup lehah I kal ve thung tawh ang” ka nu chuan a han ti ve leh a. Ka nu chu ka han en a, hreawm a ti tih chu ka hrethiam ve hle a..

 “Ruata thil ka lo hawn ang che, video games cassette tam tawk..” ka lo ti ve vat a 

 Check-in tura kan inthen lai mawlh kha, ka nau leh ka pa hmel ka en a, kan tello a an khawhar dan tur zia ka ngaihtuah khan ka khawngaih takzet a ni. Kal ve loin ka pa leh ka nau chu ka awmpui mai zawk lo a ni, tia ka ngaihtuahna chu ka nau dawldang zet hmel ka en chuan ka rilru ka thlak leh chiang khawp mai. Tih theih nei tlem viau mahila upa ber ka nihna avanga mawhphurhna ka ngah bik zia erawh ka hre ve a, eng ber nge ka mawhphurhna hre lo mahila ka unaute min mamawhna kawng zawn zela pen kha ka tih tur ber niin ka hre rih si a ni. 

 “Chhatrapati Shivaji Maharaj” tia ka putea min hrilh chu lam nawn chhenin ka nau Thartei nen chuan Chhatrapati Shivaji Maharaj International Airport atanga Mumbai Mizoram House kan panna kawngah chuan kan nui phei nasa mai a. Hnamdang hming kan la hmelhriat tlem vang ani ngei ang kan tana fiamthu a chan mai. Kan thlen hun chu zan dar 8 pelh tawh hnu lam ni mahse khawpui erawh a la buai mup mup reng tho a. Engtiang taka ropui nge ka hmuh phak piah lamah hian la awm ang le tih chu ka ngaihtuah ve rauh rauh a. 

 Kan thlen chuan house a thawk te chuan min lo buaipui nghal vat vat a, kumtin deuh thaw checkup a kal ka nu leh ka nau chu an mikhual lo hle tih an chetdan atangin a hriat a. Ka tan erawh thil thar vek a ni thung. Kan room tura kan indah a, kan intih fai hnu chuan chaw ei turin inhnuai lam kan pana. Hetah hian a ni a vawikhat na atana Lalhruaitluangi, ka dinhmun a laklawh thei ang bera dah thiam em em reng thintu, beisei nei loa beidawnga min siamtu, a hlimna min pek erawh tu hlimna min pek nen mah a ka tehkhin phal ngai loh chu ka hmuh ni. 

 Ka nau nena inrual tur awm ang tak hmeichhe naupang pakhat hian thil alo ei mek a, a bula a nu niawm tak chuan,

 “Chaw pangai a ei lohna a rei tawh lutuk a..” tiin a bula mi chu a lo be bawrh bawrh a 

 “Chaw tha a ei tho hi, Mizo chaw kher a duhlo nimai lawm tiraw Tluangi..” tiin a bula nu pakhat chuan han tih pah chuan a rawn hawi chhuak a, 

 “E kha in rawn inpeih fel tawh maw.. khawnge Lalmapuia kha a awm in chaw ei kan siam tir ange” a tih zawm zat a. Chaw kan han ei chu ka nau chuan a ei hleithei loa, rilru a hreawm ru duh ngei mai. Ka nu chuan a ei duh te a han zawh ngial pawhin engmah a duh si lo. Chutah House enkawltu nu ni awm tak min lo chhawntu chuan 

 “Thartei chuan engmah a ei duh nange?” a rawn ti a “Aw, a flight rawn chuanna a niang, a awm a nuam chiah loa..” ka nu chuan a lo ti vat a 

 “Anih chu, mamawh in neih chuan Lalmapuia hi in ko mai dawn nia aw.. saw lai guest room saw a room ania.. tiraw Mapui” a han ti lang lang a 

 “Engmaw..” tiin a mi koh ber lah chu hmaia sahbawn phuan kai luk chuak a rawn chhuak a 

 “Awi lut teh, lut teh..” tiin an invin deuh ti tih a, midang erawh kan nui hak hak hlawm a. 

 “Naute khan cereal hi a duh ve angem? Hei no-I pawh hian chaw pangai a duh lo tlat a, a ei duh phian ania, chocolate flavor anih hi..” tiin kan piah a mi chuan dawhkan a cereal bawm chu a han en kual vel a

 “Bawihte I duh em?” tiin Thartei chu ka nu chuan a han zawt a, ka beisei loh deuhin Thartei chuan a lu a bu nghauh a, ka lawm rilru ngei mai. 

 “Ee ni tak, ani hi Nutei te nufa an nih hi, sumdawnna thil a lo zin, a fanu hi Tluangsiali, Aizawl khua tho. Chuan anni hi Pi. Zuali te nufa za, kum khatah vawi khat tal kan inhmuh loh chuan a kim thei lo tiraw Tharte” House enkawltu ni a ka rin khan nui har har pah hian a rawn ti a. Chutih pah chuan Nu Nutei chuan ka nau chu cereal bawnghnutea chiah hi a rawn chhawp sak a, 

 “I thiannu Tluangi bulah sawn va ei daih la, amahin thil a ei sia, a khuahar a..” a rawn ti pah a 

 “Nia va ei ve la..” ka nu chuan a lo ti ve vat a, ka nau chuan a duh tak tak pawh ka rin loh laiin a chair atanga chhuk chuan kan piah dawhkan chu a pan a, 

 “I bowl chu ka lo keng mai ang Tharte” tiin Nu Nutei chuan a zui a, 

“An inrual hmel phian sia” a ti zui nuah nuah a, 

 “Kum 9 a pum hlum ve tawh..” ka nu chuan a chaw ei pawh ngaihsak tha thei lo tih hriat tak a an thutna lam en ha pah chuan a han ti a 

 “Eee an inrual chiah anih chu. Awi, in chaw kha ei teh u, ka lo buaipui mai ang naute pahnih hi chu” Nu Nutei’n a rawn tih takah chuan kham lam hnaih tawh ah rilru pe thar lehin chaw chu kan ei chhunzawm leh a. 

 Ka nau nui hawr hawr ri kan hriat chuan ka nu te nen chuan kan inen leh thin. A thiannu zawk Tluangi chu tawngtu zawkah tang char char mahse, ka nau chuan a hlimpui zia chu hai rual a ni lo. 

 Kan chaw ei kham fel hnu pindam lam pan mai kan tum lai chuan ka nau chuan a duh ta tlat lo, 

 “Tluangi bulah ka leng duh” 

 Tette atanga lung tha lo nei, thian kawm ve tur pawh a fit lo ka nau hian thian a lo va mamawh em! Thlasik eng anga khawvawt ah pawh a thlan a chhuah leh chhuah loh kan indap chhawk reng thin, “Ana..” tih tawngkam a hman ve pawh a, kan kutin a awm a thlen vat thin danah a chak loh zia chu sawifiah kher a ngai loang. A thlalak zing a damdawiin suit hakna thlalak a tam ber te hian ngaihtuah chian chuan rilru a na ngawih ngawih thin. 

“Common roomah ka lo awmpui rih ange, ipa ka phone zawhah kan lo chho dawn nia. I putea han awmpui rawh” ka nu in min tih takah chuan inchung lam pan chuan ka chho a. Ka nau chanchin a sawi sep sep chu ka chhoh pah chuan ka hre phak riai riai a. 

 Doctor hmuh phawt hnu ah chauh kan awmdan tur a hriat avangin ka nu leh ka putea chuan ka nau chu damdawiin lamah chuan an hruai a, kei erawh house lamah ka lo awm dawn thung. Ka nu leh Nu Nutei chu an inkawm ngeih phian a, tukthuan kan ei lai chuan an awmdan tur te chu an inhrilh sep sep a, an thusawi erawh ka lo bengkhawn lem loh avangin ka hre ve loa. 

“Bawiha hi a awm dawn tho a, I rawn let leh hma dawn tho chuan lo awmpui lawk se animai lawm” ka nu in a rawn tih chuan ka hawi chhuak zawk a, 

 “Engmaw?” ka han ti ha a 

 “Heii, thil tih lam lawk ngai ka nei a lehkha pawimawh, ka va lam zuai dawn mawni ka tia. I peih chuan No-I hi lo awmpui lawk la” 

 “Umm” ka lo ti mai a 

 “Pawn velah hian a tei rek rek zel a, a kalna chin en kha nimai..” a tih chuan ka lo bu ngut a 

 Ka nu te an chhuah hnu lawk chuan Nu Nutei min ko ri lang lang hria in room atang chuan ka chhuak a, 

“Hei common roomah a barbie kawr vel a thui a” a lo ti a 

 “E aww, ka lo chhuk nghal” tiin common room lam chu ka pan nghal a. 

 Tluangi leh a nu inmangtha lai chuan banga an thil tar vel chu ka lo en kual a, a nu chhuah hnu rei vak loah chuan Tluangi chuan pawn lam panin a nu chu a ko vak a, ka phu chiang kher mai. 

 “Hei khawnge I kal dawn?” tiin ka han um a, a nu a hrilhru lai chu ka va hmu a. A nu chu a rawn nui chhuak hak a, 

 “Hei, koh dan tur che a hre lo anih hi..” a rawn tih chuan ka nui tawi tuk ringawt a, 

 “U Remruata nih hi, Class 8 a zir mek..” a nu chuan a ti a 

 “A van pawl sang em em” tiin a nui suk a. Naupang hawihhai lo tak zawng a ni hauh loang tih ka chiang a ni. 

 Ka awmpui chhung zawng amahin a titi char char a, a changin thil mak tak tak min rawn zawt leh zeuh thin. Ka nau Thartei nen an inan loh em avangin han chhawn dan tur vak ka hre lo na a khua chu a har hman meuh lo. Thartei hi hrisel tha tak ni ve tase hetiang anga naupang harhvang tak hi a ni ve angem le, tiin ka ngaihtuah neuh neuh a. 

 Doctori’n damdawiin lama inenkawl tura min tih avangin ka nu leh ka nau bik chu damdawiin lama awm phei turin an inruahman a, kan insiam lai chuan Thartei te nufa chu an rawn leng a. 

 “U Remruata heta a awm dawn tho chuan in awm thleng daih ula” Tluangi’n a tih chuan kan nui hlawm hak hak a. 

 “Kan haw hma in kan lo kan dawn che nia aw ti zawk ta che..” Tluangi nu chuan a rawn ti a 

 “Barbie kawr chu min lo thui kep ngei ngei rawh aw..” ka nau in a tih chuan ka khawngaih reuh takzet. Anni thian dun hi an inhmu leh kher angem a hriat si loa. Vawi khat tal chu inhmu leh ngei turin ka duhsak takzet a ni.

TWIN FLAME-2 

Apollo Hospital lam panin kei, Tluangi leh nu Nutei te chu Cab ah kan chuang a. An han haw mai tur chu engemaw ti zawng tak hian ka lo huphurh ve em em a. Ka nau thian neih chhun anih vang a ni chek ang, la cham tura beisei rukna chu ka nei tlat pek anih chu! 

 “Nu, Thartei te chu engtikah nge an lo haw ang?” Tluangi chuan a rawn ti a 

 “Ee, a dam velah an lo haw nghal ang..” Nu Nutei chuan a lo ti vat a 

 “U Remruat, khawnge Thartei School a kal?” Tluangi’n a rawn tih chuan ka hamhaih ti tih a.. 

 “Aaa.. englo, ani chu a dam lo a, school pawh a kal tha vak thei loa..” ka han ti bah nuai a. 

Admission lak hun anih hi chuan phur takin kan han lakpui ve thin bawk a, kar khat a vawi thum a kal tling tum chuan kan lawm viau thin anih kha. Eng ang pawn Tluangi hi hrilhfiah dawn ila ani ang naupang chhe ve leh chhawng rilru chuan a hrethiam dawn der si lo. Hringnun the hrep hi chu aw!! 

 Hospitalah chuan inhmu lohna rei tawh ang mai chuan an inngai dun reuh a, an titi ve nasa reuh hle a ni. Inthlah nan tiin thil pek te an inpe dun a, an hmuhnawm takzet. Tichuan, Aizawl a inkawm leh tumin an inmangtha ta a. 

 Aizawl, Mizoram 

 Hun leh ni a liam a, harsatna tam tak karah tlu hlen bik em loin kan nung ve zel a. Ka nau hriselna chu a pan tial tial a, hmuh a hreawm thin khawp mai. A na a chhuah zual lai phei chuan kar hnih khat lek damdawiin a riah chu thil nih dan tur pangai ang mai ah kan ngai tawh. Mumbai a a thian chhar thar Tluangi te chhungkua erawh remchan zawkna avangin Mumbai atanga an haw hnu lawk thla thum velah Lunglei lamah an pem a. A phei tirh chuan phone in an han be ve thin tak na a, a lo rei deuh hnu chuan inhmu ngai ta mang lo chu an inbe tawh ngai meuh lo. 

 Ka nau check-up pui tur pawn vawi hnih lai chu ka zui ve leh tawh a, ka kal hmasak ber tuma kan mi tawn Nu Nutei te nufa chu thlen thlak meuh hriat chhuah loh an har ve thin khawp mai. Tunah chuan Tluangi, Thartei thiannu pawn tleirawl a hre chho ve tawh ngei ang. 

 Technology rawn thang chho chu ka nau tan bik liau liau hian a va hlu em! In a tawm mawl tawp, a chang zeuh a Computer games khelh bak tih tur nei lo khan Facebook a han khawih chho ve anih kha. Wireless Dongle hmang in facebook thian pawh a chhar nual tawh thu a sawi chuan kan lawmpui chang kher mai. Mi fate angin bur chawt tura chakna nei lo mahse a phak tawkah chuan atchilh ve tak chu a ni. 

 Vawi khat chu Thartei room atanga lo chhuak chuan a room lam panin min rawn kai nawk nawk a. Facebook-a thlalak pakhat chu kawh pahin 

 “Tluangi a ni tiraw..” a rawn ti chhuak a. Kei chuan ka han en vang vang a, a naupan laia a hmel ka hriat dan te chu ka han ngaihruat chhin a, an hmai fangah chuan inanna an ngah hle mai, mahse a hmel chu tha ta mah mahin ka hria.. 

 “An chu an inan hi..” ka ti ringawt a 

 “A van hmeltha” ka nau chuan a rawn ti sep a 

 “A edit aniang, an in edit nasat theih em kha” ka han ti ngawt a

 “Min lo biak sak..” 

 “Enga??” 

 “Amah alo nih loh tak khan ka zak a..” a rawn tih chuan ho ka ti rilru hle 

 “Va bia la, nangmah khan..” 

 “Min lo hriat tawh loh tak khan ka zak a” tih pah chuan a nui vel hak a. 

 “Khatiang khan nui tawh suh, lerh hmel lutuk” ka tih chuan a nui lui leh kher a 

 “Kum 15 ka tling ve tep tawh alawm le, nih chuan U Ruata ka biak tir mai ang” 

 “Ngai lo..” ka lo ti vat a. Tleirawl hre tan chho mek Tluangi chu biak ka chak ta tlat anih chu! 

 “Khawi kal rawh, keima account ka lo login ang” ka tih chuan min lo kian vat a. 

Ka nau chuan a hming indah dan “Tluangi Hrahsel” chu a rawn lam nawn chhen bawk a. Ka account atang chuan a hming chu ka han zawng a, a lo lang zinga pakhat ah chuan lutin message ka va thawn ta a..  

“Tluangi, Thartei thiannu kha I ni em aw? Mumbai ah in inhriat kha..” ka va ti a Ka nau chuan a khawih zawm duh lem lo avangin Tluangi message nghak chuan kan thu dun khar a. 

 “U, mi min kanna ho hi ka khawl anga Idea net setter ka lei dawn, mi pawn a chak lutuk an tia..” 

“Chandigarh a ka chhuk hunah a tha leh man tlawm ka lo en sak dawn zawk che mi?” ka lo ti vat a 

“College ah I tlin leh tlin loh pawh ila hriat loh kha..” a rawn tih chuan dik ka ti ru viau 

 “Ka tlin a ngai nimai..” ka tih chuan Computer ri tleng ri chuan min hawi rual tir vat a. Fb message thar lo thleng chu ka han en a.

 “Ehe.. U Remruat, nangmah maw? Aw ni e keimah Tluangi. Thartei a dam em?” ka nau in a han chhiar chu a hlim tih hriat tak hian a nui ver ver a. 

 “Aw dam e, I account hi a hmu a, a lo be zak che a..” ka han ti a 

 “Khawi a number min lo pe la, ka lo text ang” tih ka chhiar chuan Thartei chuan 

 “U, I no. pe mai rawh..” a rawn ti vat a 

 “Aman phone a la nei loa, ka no.ah hian inbe mai ru aw..” tiin ka number chu ka va thawn a. 

 A thiannu nen an han inbe leh thei chu ka phone ka chang ngai ta meuh lo a ni e. A chang phei chuan ka nu no.atang ten an inbe thul. Eng tak chu sawi ve thin ang maw, heti tak maia inkawm ngeih chu kan ti fo reng a ni. 

 Chandigarh, Punjab 

 Pathian zarah BSc (Botany) zir turin Chandigarh University hnuai ah ka tling va hlauh a. Zirna sang zawk bel tur chuan ka kal ve ta vang vang mai le. Ka awm tirh a insiamrem har ka tih viau laiin thla khat a liam meuh chuan nuam ka ti chho viau mai. Ka chhungte nen kan inbe awl loa, ka ngai thin ngawt mai, a bikin ka nu mawlh mai chu ka ngaihtuah thin. 

 Vawikhat zanriah eikham kan inbiak chuan Thartei chanchin deuh ngawt chu kan titi pui a, 

 “Vawiin chu ka nuih a za reuh tak tak, Thartei sofa a nguai bura a lo thu kha, khilai veng chhak pitar inkhawm peih deuh kha rawn lutin Thartei chu khawngaih hmel deuh hian a lo en ngawih ngawih a.. 

 “Ka va lainat tak che aw” a rawn ti a, a chhuak leh mai a. A chhuah hnu chuan Thartei chuan lawm loh hmel zet hian 

 “Ninawm lutuk, chutiang a khawngaih ngaia damlo em em pawh ka ni tawp si loa..” a ti ve bal bal a” a rawn tih chuan kan nui dun hak hak a. 

 “Enge a School kal dan vel chu a an?” ka han ti a 

 “A ngai te bawk, bag ah sak a duh loa, hruai nih anga lan a duh si loa, a thiante kan tawh dawnin ka biru leh zak zak zel mawle” ka nu chuan alo ti vat a. A hahthlak thin the e, a rawn nula chho ve zel anga, a tan rualpawl a har zia a hre chho telh telh dawn si a. 

 Vawi khat chu SMS ka dawng a, ka beisei loh deuhin Tluangi Lunglei tih a ka save a lo ni a.. 

 “U Remruat min hria em?” a rawn ti a 

 “Aw, I number ka save alawm..” ka lo ti vat a 

 “Thartei birthday a hnai tawh sia, enge ka pek ang ka hrethiam loa..” 

 “Ka van hre bik mai love, gift te chu hmeichhia in inhre zawk ang chu..” ka lo ti vat a 

 “Nia ni ve tho. A nuam em I awmna chu?” 

 “Aw nuam a ni ve mai..” ti a ka chhan chu min rawn chhang let tawh lem loa. 

 Ka nau piancham rawn thleng chuan lung a tileng thar hle a ni. Kum dang chu nise pui taka lawmna tur nei lo mahila chhungkua in cake kan ei leh ngei ang. A birthday apiangin a kum leh birthday thlenga la dam a wish thin a, a dinhmuh nena thlir chuan rilru hi a na vawng vawng thin. Ka nau nen kan inbiak zawh chuan ka nau chu phone pe turin ka han hrilh a, 

 “A nuam em I birthday chu? Tluangi’n enge a lo thawn?” ka han ti a 

 “Nimin khan alo thleng a, Slam book ama sign sa ania. Mahse a phone a chhia a, vawiinah pawh a nu phone atangin facebook ah min lo bia a, phone a nei rih dawn loa” a tih chuan ka khawngih reuh hle a 

“Thian dang I chhar teuh tho alawm tiraw..” ka lo ti a 

 “Nia, mahse Tluangi ang vek an ni si loa, hei Slam book chu a nu te ho ka sign tir a” a tih chuan ka lai a na kher mai. Mite chuan schoolah kengin an thiante an sign tir thin a ni si a. 

 “School I kal theih velah schoolah I sign tir bawk anga..” 

 “Nia karleh chu hemi sign tir tur hrim hrima dam ka tum ang, e tak a doctor thar alo awm a, Dr. Loncy ania, a thiam lutuk an tia kan kal ve dawn a..” phur hmel fe hian a rawn ti a 

 “Ee.. a va lawmawm ve, ani chuan a enkawl dam dawn che a hriatna ka nei” ka tih chuan a nui hak hak a. 

Final exam kan neih tep tawh avangin theih ang angina ka inbuatsaih ve a, exam chawlh rei vak lo nei tur mah niila ka chhungte rem tih puina hmangin haw hram chu ka tum a ni. A chhan pawh ka nau chuan chauh lam a pan nasa hle a, damdawiin an lut chhuak zing hle tih ka hre lehzel bawk nen. Ka nu chuan ka hlauhthawn hlauiin a sawi tha duh lo tih hre mahila thiante ka zawh ve tang tang avang chuan anni pawn an zep duh bik loa, engtik lai pawhin oxygen bur hman mai tura inchhawp reng a mamawh tih te min hrilh takah chuan ka hlauthawng ve hle a ni. 

 Exam kan han tan a, subject hnih kan zo tawh tihah chuan ka nau chu damdawiin luhpui a ni leh tih chu ka hre vat a, ka nu erawh chuan Lengpuia min lo hmuak tura inenkawl fit se a duh vang niin a sawi. Keipawh chu thil tha lo em em a thleng tura beisei loin ka phur ru phian reuh a. 

 Chandigarh International Airport lam pan tur in ka thiante pahnih nen chuan cab rawn thlen veleh chuan kan thu lut nghal a. Zanlai pawh sawi loa tlawmngaia min rawn thlahtu ka hnampui te thawm pawh chu kan hlat ve tial tial a. Ka thiante min biak mawlh mawlh na thawm chu hria ang pawn ka lang lo, anni pawh chuan min biak tawng kher an tum bik lem lo. 

Zan boruak thlifim rawn thaw heuh heuh chuan ka rilru delh na em em tu thu chu ka beng bulah a rawn sawi nawn leh ni mai hian ka hria a. 

 “Mate.” tiin ka hriat tawk chuan ka phun sep a, ka van na tak em! 

 Darkar sawm liam ta khan enge ka tih a, enge ka ngaihtuah ber pawh hre loin ka phi buai anih kha. Ka thinlung rum ri erawh chunglam khian ka tawngtaina a a pawm ngei ka ring tlat a ni. Sawi duh leh dil duh pakhat chiah nei chung khan “Lalpa” tih bak ka lam thei si lo. Zan hmasa lama ka nu nen call a kan inbiak dan te ka han ngaihtuah a, hlauhthawn tur engmah a awm lo asin le. 

 “Hei damdawiin luh a duh chiah loa, mahse in exam zawha lo hmuak tur che in Lengpuia a kal ve duh chuan damdawiin a in enkawl fit a ngai bawk sia..” nithum lek liam ta a ka nu aw zangkhai takin a rawn sawi te chu ka ngaihtuah a. Kei min hmuah theih nan damdawiin ah a lut a mahse a hun hma in ka nau chuan min kalsan leh si. 

 “Tharte, Mate.. ka nau duat min lo nghak lawk thei hram lawmni..” tiin ka rilru chu ka be mawlh mawlh a, a va han hreawm tehreng em! Tat-a nen kan titi ve fona a ka nau kan enkawl dun dan tur te, ka nu leh pate tello pawh a hlim taka siam kan tum dan te chu ka thinlungah a khawk rum rum hian ka hria a. Aw, hmangaihna hian chelh ding thei hlauh se zawng ka dam ve chhung chu a liam bik lo tur. 

 Thlawhna ah kan han lut a, thil tam tak ka hriat tawh pawh a ka lo ruat loh te chuan min zem a lo chauh a ni e. Kum tam tak liam ta a a in check-up tur ka kalpui tum te kha aw, khang hun kha harsa viau mahse kan zingah a ni ala cheng a, min kalsan tur pawn kan ruat phal ngai lo anih kha. Tunah zawng thihna rapthlak chu hneh zo loin min kalsan ta si, min mangtha na takngial pawh a sawi si lo. 

 Mizoram kan thleng a, ka nau hmel dang bel mai, chak lo tih hriat tak ka han hmu chu au chhuah hial ka van chak em!! 

 “Rema nau kan nei tawh lo..” a rawn tih chuan min va tihrilhhai leh zual em! Ka nu leh ka pa hmel ka hmu a, an hmela hriatthiam lohna awm chu kei an fapa upa ber pawn chhanna ka pe thei si lo. Thihna, mi ta tur chauha kan lo dah thin chu kan hmangaih e mem, kan naute chungah a thleng ta si a. 

 Ka nu chuan exam ka zawh loh vanga pawi a tih thu chu a sawi a sawi a, ka rilru ah erawh ka tun hun emaw ka hmalam hun tur ngaihtuah theihna tura fimna reng ka nei lo. Ka nau Tat-a chuan chaw a ei thei loa, a mu tha thei hek lo. Chak lo viau mahila ka nau leh ka nu leh pate tan ka intih pachan chawp a ngai si. Ka mittui far khat pawh a tla loa, ka nat thu lah ka sawi chhuak hek lo. Mahse, ka na a ni. Ka nau ka ngai em em a, ka chhungte rilru na hmel lah in engkim a ti hrawm zual vek zawk hian ka hria a ni. 

 Kar khat hial liam tawh mahse thenrual tlemin min la riahpui a, zan ka muthilh lai chuan ka thaw tha thei lo chuan min tiharh hlawl a, theih tawp chhuah a boruak hip ka tum takngial pawh chuan ka chakna in a tlin si lo. Ka ke hmawr leh ka kut hmawr atang chuan a rawn mur tan a, ka khawng titih ta mai, ka thi ngei dawn anih hi tih ka ngaihtuah lai mek chuan ka piah lawk a mu ka thianpa chuan ka ngik ri hria in min rawn ngaihven vat a, damdawiin lam min hruai lai te chu hriat mumal pawh ka nei tawh lo. 

 Ka chhungte sawi danah a hun takah damdawiin kan thlen thu an sawi a, minute tlemte pawn lo tlai ila min chhan hman kher loang, tih te chu an sawi a. Thu lawmawm nge lawmawm loh lam ka hre ve hauh lo, dam chakna ka nei loa, thih lah hreh na chhan tur reng ka neih ka hre lo. Mahse, a ruala ka nuten fa pahnih an chan tur erawh chung Pathian khian a phal lo a ni ngei ang, min hmangaihtute tana vanneihna a chhiar niin an zingah minung niin ka la cheng ve reng si a. 

 Nithum damdawiin a ka awm hnu ah ka nau chu a chauh em avangin an rawn dahlut vel eh a, kan va chhangchhe em! Mate I mi min kalsan nghawng nasat zia tur hi hre lawk la I kal bik miah lo tur tiraw.. tiin ka rilru chuan ka sawi ka sawi thin. 

 A tuk leh maia chhuak tawh tur ka nih avangin ka harh tha viau a, Psychiatrist atang meuha thu tha tak tak ka dawn meuh chuan rilru pawn fim lam a pan chho bek bek a ni. Thian tam takin min rawn kan in, chhungte lah an rawn kal awl loa, tiang em em a hmangaihna leh lainatna nasa hi ka dawn turah pawh ka lo ruat ngai hauh si loa. 

 Thla hnih a liam ve ta reng mai, kan inchhung chuan ngai awh thei tawh lo mahse intih hlim tawn chu kan la tum hram hram a, thil pawi tak erawh chu ka nau nena zu in kan chin thar chhoh chu a ni. Ka nu leh pate rilru nat zia hre mahila kan khawvel nungrawng tak atanga kan chhauah theihna awmchhun chu zu chu ni rih tlatin kan hria a ni. 

 Back paper nei teuh a college kal ai chuan session thara Mizoram lama tan mai ka rilruk avang chuan Chandigarh lam chhuk leh rilrukna pawh chu ka nei tawh loa. Inah a tul tulah ka nu chu ka pui mai thin. Tlai khat ka nu eirawng ka bawlpui lai chuan text message pakhat hi alo thleng a, number save loh atangin a lo ni a.. 

 “U Remruat, Tluangi ka nia, ka phone chhiat char char hnu khan hostel ah min dah daih a, vawiin ah ka chhuah chiah a, phone number a bo teuh a Thartei biak theihna number min lo pe mai.. Ka ngai tawh lutukk..” ka sa phut a,

Ka huat ber pawh hre lo chuan “Mawli” tih chu ka han type ngawt a.

TWIN FLAME-3 

 “Enge nita? khatia inseh ruh ti tiha I phone I bih ngar ngar” ka nu in a rawn tih takah chuan ka harh chhuak zawk a 

 “Engmah nilo..” tiin ka type ang ang chuan ka dah ta a. 

 Zanriah kan peih tep tihah chuan ka nu phone chu a rawn ri ral ral a, ani’n a han chhang chu a hmel rawn danglam nghal chu ka hmu thei a.. 

 “Awi, Tluangte..” tiin pindan lam chu a pan ta daih a. Chunu teh hrep chuan engvanga ka nu rawn be leh kher nge maw anih le. A lunglenna leh hreawmna a rawn belh chhah mai chauh a ni. 

 Ka nu ngaihtuah ru viau chung chuan ka salad siam lai chu ka chhunzawm a, ka lo ngaihven lutuk vang nge a rawn chhuak har viau chuan ka hria a, ka rilru chu a lo hmanhmawh ve em em ringawt bawk a. Ka nu mit sen rama a rawn chhuak ka hmuh chuan ka lainat ru ngei mai, mahse thil thleng hre lo anga awm chuan ka lo be bawrh bawrh thung a. Nu ber, hun harsat em em lai pawh a boruak siam tum tlat thin berin ngawi renga chaw a ei takah chuan keini a fate leh a pasal te tan chuan sawi tur a vang duh kher aniang chu ngawi thap chuan chaw chu kan ei mawp mawp hlawm a.

Chaw eikham ah chuan ka nu pawh chu a rawn pangai chho viau a, thei te siamin kan ei ho a.. 

 “Tluangi, Thartei thiannu khan min lo bia a, an exam zo chiah a, hostel a a awm vangin engmah a lo hre ve lo anih chu” ka nu chuan a rawn ti a 

 “A va hrillhhai duh dawn ve le.. inkawm leh beiseiin a rawn be ve ngei awm si a..” ka pa chuan a rawn ti ve vat a 

 “Tluangi te hi chu a sial reuh em a ni. Thartei khan a ngainat piah lamah khan a ngaisang tel a. A fel e mem reuh lehnghal a..” tiin ka nu chu a nui hak hak a 

 “Tunah class engzah nge a zir ve tawh a?” Ruata chuan a rawn ti a 

 “Ka chiang lo, high scool a kal tih bak” ka nu chuan a lo ti a 

 “Remchangah lo zin se, thlanah te kan la hruai dawn nia” tiin ka nau chuan a lo ti ve leh vat a. 

 Mu tura ka insiam lai chuan ka phone message tone a rawn ri ral a 

 “U Remruat, tihpalh lutuk aw.. Tlaiah khan I nu ka bia a, chanchin min lo hrilh a, min thawng in pawi ka ti lutuk, kan pahnih a tih dun tur kan la ngah tehreng nen..” a rawn ti deuh duah a. 

Ka ngei laklawh vang nge chhan en pawh a en lo chuan ka phone chu ka dah a, ka muhil zui nghal a. 

 Hun leh ni a liam a, lusun khawharna pawn zia lam a pan chho zel a, kan hmangaihna lo san zia erawh kan hre chiang telh telh thung. Keipawn zirna chhunzawm lehin Pachhunga University College ah ka kal chhunzawm a, phai lama ai chuan mahni ram ngeia zir chu a lo nuam zawk daih mai. Lerh tiha sawi tur ni hran lo mahila khawhar hnem tawk tu vel chu ka thing ve thei reuh phian a, thinlung taka ngaihzawn erawh an la awm thei meuh lo a ni e. 

 Ka nau thih cham lo thleng tur chu kan huphurh tlang ngei mai, mahse pangai tak thil kalpui tumin kan inbuatsaih nasa ve hle a. Chhungkhat laina hnai te rawn kal khawmin zanriah kan kil ho a, Thartei sulhnu thlir theih ang ang te chu video a en in titi thupui berah chuan kan hmang tlang hlawm a. 

 Kan rik nuai nuai vang chuan pawn lamah phone call lo kal chu ka han chhang a, 

 “Hello..” “Hello U Remruat..” a aw chu ka hriat than nilo mahse tunge anih ka hre nghal chat a 

 “Aw, nge nita?” ka han ti a 

 “Tluangi ka nia..” “Umm..” 

 “I nu ka call a, a chhang thei loa..” 

 “Nia inleng kan nei nual a, a phone a bulah a dah lo aniang” ka han ti a 

 “Umm, anih chuan ka lo call tih min lo hrilh sak rawh aw, sawi tur dang vak ka hre lo..” tiin a nui tawi tup a 

 “Inu te an dam em?’ ka han ti a 

 “Aw dam e, hmanni pawn inu nen an inbia a..”  

“A ni maw..” sawi zawm tur pawh ka hre tawh chuang lo 

 “Anih U Remruat dah mai ang aw, lo inenkawl tha ula” tiin kan inmangtha ta a 

 Tluangi nen chuan inbe chhunzawm lo mahila eng eng emaw postin ka nau a tag fo avangin ka hmu fova, a profile check ka hrat sawt viau, a hmeltha in a zeihawi ngang mai. A nulat tak tak hun chu aw tiin ka lo ngaihtuah ve rauh rauh thin. Chutih laiin ka nau Ruata leh ka nu in a chanchin an sawi ka hre zeuh zeuh a, Ruata nen pawn an lo innel viau anih hmel, ani thian kawm thiam loa ka tluk ngai loh a ni bawk nen a tha viau zel e. 

 Hun leh ni a liam ve zel a ka zirlai pawh final year ka thleng ve leh dawn ta reng mai. Zanlaia ka tap inhnit faih faih ri pawh Pathian zarah hriat a khat ve ta hle mai, enge maw nikhua ah zawng insumna tel hauh lo tah chang erawh ala nei fova. Thartei thih cham apiang chuan Tluangi pawh chuan ka nu chu a rawn be ziah a, a chang phei chuan ka nu hi khap zawk a ngai hial thin, a tui thin lutuk kan lo inthlahrunpui na lamah hian. 

 Vawi khat chu ka nu in Tluangi alo zin thu sawiin a phur ngang mai, zanriah ei tura sawm a tha a tih leh tih loh chu ka pa a han rawn a, ka pa pawh chuan ka nu mi ngaihpawimawh em em leh a fanu thiannu chu hmuh alo chak ngei mai, a mah chuan ava hmuak hial anih kha. 

 Ka room atangin a rawn lut thawm leh an inbiakna te chu ka hre ruai ruai a, ka lo rin lawk ang ngeiin ka nau Tat-a nen chuan a inkawm ngeih nghal viau, amah Tluangi hmeichhe zakzum tak a lo nilo nen. Ka nu chuan min rawn koh ve chuan eng ka hria nimaw ka lai deuh rut a.. 

 “Hei I u Remruata.. ila hria em? Ka nu chuan ka chhuah velah a lo ti a 

 “Aww, mahse hmana kan inhmuh ang a hmel kha ka hrechhuak zo tawh lo” min chibai chuan a nui har har a 

 “Enteh saw Bawiha paangpar chi thum pot te ah min rawn ken a, a ngaihna te hi a hre zawk ka ti em mai” ka nu in a tih duah lai chuan a lo nui hak hak a, hmuhnawm lo chu a ni bik hauh lo. 

 “A van mawi hlawm ve..” tiin roomah ka luhsan a, Tata leh ka nu te nen an inkawm hlawm a, an tawng hriat tum chuan ka beng ka chhi pah kar bawk a.. 

 “Fb tanga kan inchhar leh hnu khan thil hi min hrilh nasa thei lutuk a. Kum 10 bak a tam berah a tam a rin loh thu te kha min hrilh a..” a tih zawh chuan a reh diak a, ka nau khan hun tam a nei tawh lo tih kha zep tlat mahila alo inhre ve reng tih ka han hre chiah chu ka nghing lawih thei hial a ni. 

 “Englo ania Dr.Loncy kan rawn khan ani pawh khan pawi a ti lutuk a, a hma zawnga a treatment lo lak kha tullo a tiin lo kal hma hlek ila hmasawn theih dan kawng a awm nen a ti ve a” ka na chuan a lo ti a 

“Imm vanram chanchin te kha a sawi nasa thei lutuk a, ka kal ve loh mawlh kha a hlau a, fel deuhin lo awm la vanramah kan inkawm leh dawn nia te a ti fova..” Tluangi chuan a rawn ti chuai raih a 

 “A dam theih hun chhung te kha amah te khan a lo chhut reuh reuh chu a ni awm si a, nia hun kha a nei rei tawh loa, kum 10 em em chu a nilo a, mahse a hriatah tiang lam hawi zawng hi kan sawi duh ngai lo hrim hrim a..” ka nu in a rawn ti a 

 “Tluangte chaw ei ve rawh aw, kha album te kha va enpui la Nu-i.. A tetlai thlalak pawh kan kal tak kha..” ka pa tih ri chu ka hria a 

 “Anih chuan anute-I ka hrilh loh chuan bakah min lo hruai hun tur hrilh a ngai a..” 

 “I u te I inthlah tir dawn nia, Ruata leh Remruata an awm alawm..” ka nu chuan a ti a 

 “U tata’n min thlah mai rawh se..” a tih ri ka hriat chuan ka rum deuh ngut a. 

 “Nia.. E thlanah pawh chuan kal I duh leh duh loh animai” Ruata chuan a ti a 

 “Min hruai tho a ngai dawn a, in tan a buaithlak leh buaithlak loh animai..” 

 “Buaithlak nang aw, vawiin chu kan chhungkua in I tan alawm inah kan lo awm le” ka pa in alo tih chuan an nui ham ham hlawm a. 

 Thlan kal tura min lo sawm ve ka phut ru viau nain engmah rawn sawi lem lo chuan ka nau leh Tluangi chu an kal ta a. Tleirawl hmeltha tak a ni. Mahse eng vang nge ka hre chiah lo pawh khawrna lai ka nei tlat a, ka nau min hriatchhuah tir vang nge hmeichhia anihna anga ka zah vang zawk, alakah ka tim tlat a ni. Ka hmuh hnuhnun ber chuan naupang barbie kawr thui nuam ti rual lek ala ni kha a ni a, tunah erawh kum a vei leh meuh chuan college kal rual a ni ve mai dawn chu a ni si a. 

 La naupang viau e tilo chuan puitling kawm dan a thiam reuh hle a, thusawi awm leh awm lo a thliar thiamin ka nu sawi nuam tih tur lah a hai lo kher mai. A naupang laia ka lo rin dan fing chho viau tura ka lo beisei ve tawp chu a thleng dik chho viau niin a lang. Chaw ei na ah te chuan ka nu chawhmeh leh ka pa chawhmeh siam te chu a han fak mawi thiam em em a, mi tih lawmah chuan a duai lo kher ang chu.. 

 “I sawi danah I nu chawhmeh siam chu a va tui hmel zawk hmel ve…” ka pa chuan nui hauh hauh pahin a ti a 

 “Nu te chawhmeh chu ‘made with love’ anih vang aniang a tui thin bik em em..” a han tih keuh chuan ka nu hmelah chuan thinlung takin a lawm tih a chhiar theih tlat a ni. “

Helama ilo phei pawn pan hmasak berah min rawn nei hreh lola, I in anga ngaiin I u te pawh I unau diktak angin theih tawp chhuahin en tlat la. Thartei hmun ruak chu luah zawh rual nilo mahse ilo awm ve hian thil I ti phuisui em em a, hetiang a chhungkua a nuih ho dar dart e hi kan nei khat ania..” ka nu in a tih chuan a lu buk pahina a nui sen sen a, a zawn chiah a thu keiin ka lo endan kha min hmutu awm se unau anga inen tawn chu a theih dawn lo tih an hriatthiam ngei ka ring. 

 Hun chu liam ve zelin Pathian khawngaihna a zarah BSc ka zo ve tawh a, Mizoram University lamah Master ka beih chhunzawm ve leh a ni. Technology thang chho zelah Whatsapp Messenger kan hmang thei ta. Mak tak maiin Tluangi chuan min be ta ngai meuh loa, ka nu leh ka nau te nen erawh a khat tawka inbiak an la ching fova. A number ka la save reng avangin a DP leh Status chu han check ka hrat thin hle a. Hmeichhe tunlai tum ve tak ni a ka hriat vang nge a social media vel atang chuan hre hneh ve viau hian ka inhre ringawt thin a. 

 NET/JRF exam pek theihna center Mizoram lama ala awm loh avang chuan ka rilru a buai ru hle a, thla khat chuangin min la dang mahse form fill up huna center thlan dan turin rilru a ti buai hle mai. A hnai leh zia ber tura ka rin Guwahati chu ka han thlang phawt a. Chutih rualin Guwahati hnaih em em Shillong a awm Tluangi chu ka hrechhuak zawk a, exam paha ni hnih khat tal chama va tlawh chu tha in ka hre ta a. Mahse, han biak tan dan tur mai chu ka hre lo hle mai.. 

 “Tluangi tiraw..” a va zei loh thlak tak 

 “Aw U Remruat , I dam maw?” a rawn ti a 

 “Aw, dam e. June thla ah ka lo zin maithei a..” ka han ti ngawt a 

“Nimaw.. enge ilo tih dawn??” 

 “GHY ah exam pek tur ka nei a..”

 “Yess.. han mikhual thei che ila that dawn nen hostelah ka awm sia..” 

 “A ngai lo ka thlenna tur min tih fel pui leh min guide kha a tawk mai..” tiin ka chhang a. 

 Tluangi nen chuan kan inbe zing telh telh a, ka ngaina telh telh bawk. Mihlim thei tak a ni tih chu hre sa mahila a hlimna ka lo nuihpui ve thei zelna hian a ti ngainatawm zual tir em em bawk a. A hmeltha tih a inhre ve a ni chek ang chu insiam chhiat a mi reply a hratin a thlalak ka kawl hnem ta hle mai. Engkim hi a nuihzathlak zawnga lak a thiam vek a, chapo hauh si loin a inringtawk hle bawk. A landan ah ngaihzawng nei ai mah chuan biak kual a ngah viau in ka hria, a inhmeh ka ti phian mai. 

 Shillong, Meghalaya 

 Shillong lam pana kawng tha nuam zetah kan tlan vuk vuk chu a phurawm ngang mai. Dar hnih vela ka thlen a rin thu Tluangi’n a sawi a, keimah vang liau liau in a chawhnu class a skip bawk a. A takah la inhmu lo ni miah si lo chuan innel taka kan inkawm hnu a ka vawikhat inhmuhna tur anih vang nge ka aw,dan vel tur chuan rilru a kap trung a. Mahse, lo ruahman lawk vak pawh ni ila boruak a zira ka chet a ngai dawn thot ho tih chu ka chiang viau bawk si. 

 Kan intext pah char char a, Shillong kan luh chuan driver chu bia in dinna lai tur chu a han hrilh a, ani chuan ka thlenna tur hotel bulah min lo chang thung dawn a ni. Hotel Yalana kawtah chuan Cab chu dingin Tluangi chuan min lo nuih ver ver a, hmuh a nuam kher mai. Tih fel ngai ang ang kan tih fel hnu chuan ka pindan lam chu kan pan a. Engvang nge pawh ka hre lo a hminga koh hi ka tim tlat a, chuvanga text ah pawh Mate ti a ko mai thin ka ni a, Mate tih hian ka nau Thartei bak kha ka ko ngai meuh lo a ni. 

“I exam tee enge I an?” zangkhai vah chuan a han ti a  

“Ka hrethiam bik lole..” tih pah chuan ka nui hak a 

 “I ril tam em?” “Tam chiah lo..” 

 “Tam bawk si loh chuan enge kan tih ang aw..” tiin ka hotel rooma eng eng emaw chu a en kual a 

 “Ka hre bik miah lo..” ka ti a 

 “Chandigarh ah khan club ah emaw barah I kal thin em?” 

 “Teuh lo, tiangah hian vawikhat mah ka la kal lo..” ka tih chuan a phone phawrhin tuemaw chu a han bia a, table pakhat lo reserve turin a ti main ka hria.

 “Insiam rawh..” 

 “Khawnge kan kal dawn?”

 “Barah Ila kal loh kha?” 

 “Tunge I biak a tunah khan?” 

 “Ka bouncer hmelhriat anih kha” a ti sam et a . Kei Mizoram pel mang loa lehkha zir hian he hmeichhe mizia hi hriatthiam har ka ti telh telh mai, a ngam huai hmel fu reuh bawk a. 

 Bar-a kan luh dawn chuan pawn lama nghaktu an lo awm nual a, ani chuan a hma a a call niawm tak chu callin ani chu a rawn chhuak a. Chutih lai chuan a hmelhriat ni awm tak hmeichhe pahnih hian kan lam an lo pan a.. 

 “Awi Laltluang” tiin an han khek hlawm leh rih 

 “Table in chang nange..” nui put put chuan Tluangi chuan a lo ti a. Inman tih hriat zet hian an nui hlawm ta vak vak a.. 

 “Lo kal ru, ka hauh tawh..” tiin kan inzui lut a. 

 A boruak chu a nuam dangdai takzet, beer leh finger chips an chah nghal a, ani chuan a thiante nen min inhmrlhriattir a 

 “Hei hi ka u anih hi..” a tih chuan awih lo tih hriat zet hian a thiante lah chu an nui hlawm a 

 “Chuan hei hi Ruatruati leh Lianmawii mahse a stage name Gabby” a han tih leh ngat phei chuan a thutak nge fiamthu a hriat hran tawh lo. Henu hi a lova che nasa awm reuh e, ka ti rilru hial a. 

 A thiante chuan nuam lo ka tih hlau in min be ve bawrh bawrh a, an fel reuh ka ti takzet. Chuan, an pathum chuan an in thei reuh hle bawk. An thusawi reng reng anmahni ber pawh chuan nuih ah an inchang niawm tak hian an nui reng hlawm a. Tu tu emaw min kalpek tute comments lo pek dan lah an hnehsawh lutuk tlat. An mihuat nih chu ka hlauh zawng tak a ni. 

 Mate-I chungah hian ka lawm takzet. A lehlam zawng taka ngaihtuah chuan ka nau chanchin sawiin kan ngui dun viau ka ring a, mahse heti zawng hian thil a han her danglam dawrh chu a ni si a. A death line a hnaih tawh avangin bar atanga chhuakin ka hotel awmna lam chu kan pan dun a, an hostel ka thleng ka thlah zawk tur thu ka sawi pawn a duh tlat lo. A in hnem viaua ka hriat laiin rui ang pawn a awm hran lo, a khi vur vur reng tih mai loh chu. Ka room kawngka bul thleng min thlah a, 

 “Chaw tui deuhin ei la naktuka ka hruaina hmun tur che ka haw velah ka lo ngaihtuah ang” meng si sep, nui sen sen chunga a han ti chu kei, lo kai ve deuh chuan vantirhkoh hmuh a ka hmuh hial dawn chu!