LOVE STORY IN HOSPITAL

A ngai te bawkin  damdawiin khumah chuan dah luh ka ni leh ta, tun tum zet zawng a hma ka ang lo hle mai.. keimah ah hian beidawn ruk na riau ka nei a, ka tawrh chhuah theih lo mai hi ka hlau takzet a ni. Ka mutna bula thu reng thin min hmangaih a min enkawl tlat thin tu ka chhungte leh ka pasal tur a ka duh em em thu ka han hmuh chang hian leh lam hawi a a ruk a tah chang ka ngah a ni. Kum khat  kal ta khan hrisel lohna in min tlakbuak nasat em avangin Shillong lamah inentir turin kan chhuk a, enkawlna hrang hrang ka dawn hnu ah ka that chhuah lem loh em a vangin Kolkata lam kan pan leh ta a chu tah chuan  thling cancer ka vei tih hmuh chhuah a ni.

.

.

 “Bawihte.. hei Siamtea  pawh a rawn thleng tawh ania” ka nu tawng ri ka hriat velah chuan thei leh thei loin ka inben kang a, ani chuan min lo nuih suk a… chu tih lai tak chuan nurse rawn lutin min jection na tur chu a buaipui mial mial a, kei chuan huphurh takin ka lo thlir reng a. A inpeih hnu chuan hrilh chawp ngai loin ka bawk a, ka kekor chu ka pawt thla deuh a

“Khawi keiman ka lo ti ang”  Siama chuan a lo ti a, nurse chuan a pe ve mai a

“Ti na suh aw..” ka lo ti a

“Dim thei ang berin” tih pah chuan a rawn vit a, a van na tak em!! ka thling chhung a thil zum tak vih luh ang maiin ka hria, ka mittui a tla leh nge nge.

“Ana viau a mi?? bawihte..”

“Um..”

“Doctor jection hi a na fe zawk thin a lawm..”tih pah chuan nurse chuan min rawn fiam a, nuih pawh ka nuih tha thei lo..

.

.

“Tinge I lo kal ve duh kher le I hna pangngai I tan ve dawn chauh a..” chau tak chuan ka han ti a

“Internship ka tih lai atang khan ka enkawl chak tawh che a, ka theih ve hunlai a nih hi..”

“Min enkawl turin doctor leh nurse bik an awm alawm..”

“Anih I bulah tal ka awm duh…    doctor ang lo in I bialpa angin”

U Siamtea hi kei aia kum nga a upa a ni a, NEIGRIHMS hospital Shillong a enkawl ka nih laiin ani nen hian kan in tawng a,  chu tah chuan Hematologist  Internship a ti mek a ni. Damdawiin ka luh atangin a damlo enkawl lai ni lo mahila min ngaihtuah thei em em a, ka ei chak leh duh zawng te min tih sak a in peih reng thin a ni. Ka lo ngaih ve danah chuan hmeichhe lawm ve tak angin ka lo ngai mai a, a chhan chu ka hmel a chhe lo a mipa duhzawng tak ka ni tih ka in hai lo.. ka bawk sawp tak hma zawng kha chuan. Tin, kei hi Mizoram a Publication Industry lian tak ro chun tu tur ka nih avangin tlangval vengva chin tan chuan hawi san mai mai chi ka lo ni lo bawk nen.

.

.

Kum chanve dawn a liam dawn takah chuan damdawiin ka chhuahsan hlei thei tlat lo. Ka nun kha chhungril mai ni lo in ka landan thleng khan a danglam tial tial a, a hma a vun no hmeltha tak ti a an sawi thin Veronica-I kha a bo tial tial a, ka vun te chu a dang bem a.. ka rihna ka hloh nasa hle bawk  a ni. Mahse, chumi chung pawh chuan U Siama chuan min ngaihtuah em em a.. thla thum chhung nitin min duh thu min hrilh thin, chu chuan ka luhlulna a ti dai telh telh a.. inngaihzawn chu ka rem ti ta a. Tun a ka dinhmun tur hi hre lawk I la chuan ka in hmangaih tir hauh lo ang.

.

.

“Bawihte hei Siamtea nen sawi tur kan nei a” ka nu chuan a rawn ti a, enge maw ti tak a hlauhthawnna hian min man a

“Um enge a..”

“Tun a I dinhmun atang hi chuan Allogenetic bone marrow transplant kan tih mai angai dawn a ni..”  U Siama chuan a rawn ti a..

“Maw.. thling in pek maw?? mahse unau ka nei si loa, ka nu leh ka pa chu a theih loh, a hlauhawm lutuk” ka ti vat  a..

“Bawihte kum21 chiah I ni a, tar chhia pawh kan la nih loh hi.. kum 40 ka pel awrh chauh alawm.. keiman test chu ka ti phawt ang..” ka nu in a sawi lai ka ngaihthlak pah chuan ka na ngawih ngawih

“A pa engtik nge a lo chhuk dawn??”

“I pa chu press lamah an buai lutuk a I nute I leh I pute a te lam pawh test ti turin an lo chhuk dawn a lawm..” ka nu chuan a han ti a

“Ngatinge a pa te lam tuman test an ti ve dawn lo ami..”

“Aw.. hrethiam rawh.. Industry lamah chhung chhungin an buai a, helam chu ka mawhphurhna ah ka dah ve alawm..”

“A pa pek ka duh.. nangma pek ka duh lo nu..” ka mittui chu a luang zawih zawih a

“An pe thei dawn che nge a la hriat hleihnem.. test an ti vek dawn la lawm..” tih pah chuan U Siama chuan ka mittui a lo hru a

“Thei lo ta se..”

“I hre lo a mi ka duat Doctor ka nih hi.. chuan  Social network pawh a awm alawm, kan hmu lutuk ang..” tih pah chuan ka chalah a fawp zeuh a..

.

.

“Lehkhabu dang naktukah ka lo lei mai ang aw.. kan chhiar zo vek tawh a nih hi..” U Siama chuan a ti a

“A pa lehkhabu ziah ka chhiar chak..” tiin ka lo chhang a

“Ka chhiar nawn leh dawn a mi a dang I kawl ho hi..”

“Umm.. mahse anutei te chah I la..”

“Umm ka call ang a I be peih em??”

“Aw.. be peih e..

.

.

“Te keimah.. Vero-I”

“E enge nita bawihte.. naktuk ah kan rawn chhuk dawn asin keini pawh”

“ Apa library a mi a lehkhbu ziah ho kha min lo ken ka ti duh a..”

“A pa I ngai a ni maw.. eng eng kha nge..i duh??”

“Ka chhiar vek tawh a..mahse kawl loh ka nei a”

“A nih ka lo keng dawn nia aw..”

.

.

Ka nuam tih ber lehkhabu chhiar pawh ti thei loin ka awm a, mahse U Siama emaw ka nu in min chhiar sak thin a, ka pa hi ka thuziakmi ngaihsan ber a ni a.. ani anga thuziakmi hlawhtling tak nih ka tum thin mahse ka thiam ve lo a ni e. I pa chhunna pakhatmah I nei lo min tih fo te hi a dik thlawt a ni.. a hma phei chuan lehkhabu chhiar hi ka duh ngai lo mahse ka pa an ka chak em avangin ka chhiar lui ngat ngat thin a, tunah chuan ka tui chilh ve tawh zawk a ni.

.

.

“A na lutuk.. ka thi dawn aniang..” tah pawh ka tap thei lo ka vial ngawih ngawih..

“Khawilai ber nge duat..”

“Ka khup hi chuan ka chawn.. ana lutuk, a hreawm..”

“A tha dawn alawm Bawihte, I nu in nurse a ko, ka jection che nga.. I muhil siai siau dawn alawm..”

Ka nu te an lo luh chuan U Siama chuan min jection a.. ka tap chhuak ve thei ta, kar loah ka mut a chhuak a.. ka muhil ta a.

.

.

Ka harh ruai ruai.. ka nutei leh ka nu an phun sep sep ri ka hria a..an tawng chu hre tha thei lo mahila ka nu chu a beidawn hmel riauin ka hria.. keipawh hi ka beidawng tak zet a ni. Ka chet deuh hnu chuan min rawn ngaihven vat a, ka pa nen min inbiak tir a ka ngaih zia ka hrilh lai chuan ka tap nasa ngang mai.. Ani chuan kerleh lam a a lo chhuk te tur min hrilh chuan ka hlim leh em em a..

“Ehe.. kha chu a va hlim hmel ve..” U Siama chuan a rawn ti lut a

“A pa nen an inbia a.. a hlim khawp mai hei.. doctor committee ah chuan I tel ve thei ta a mi..??” ka nu chuan a lo chhang vat a..

“Aw.. thei e.. kan zo chiah”

“I  awm lo ang tih hi a hlawhawm em mai..” .. ka nu te I chuan alo ti vat a

“U Siamte.. anutei kha lehkhabu chu  dil rawh..” chau tak chuan ka han ti a

“E.. aw nia kan chhiar vat dawn nia..”

.

.

Parcel atang chuan lehkhabu chu U Siamtea chuan a rawn phawrh zel a.. a thil rawn phawrh zing a pakhat chuan ka mit a la bik tlat.. Ka pa thuziah hi pen leh lehkha puan hmang a ziah hi hmuh tur a vang hle a, a diary a nih ngawt loh chuan. Ka nu hian min hrilh thin a.. “I pa in pen hmang a a ziahna hi chu kan press library ah dah a ni a, pen hmang a a ziah la hmuh tur awm hi chu a tlangzarh loh an ni hlawm mahse chung chu midang chhiar ve  a rem chiah lo a” tiin.

“Hei hi ka duh…mahse kan pahnih chiah a kan awm laiin chhiar rawh..”

“Enge hei hi…”

A phek hmasa ber a han keu chuan lian tak a “1995” tih inziak hi a lo awm a..

“Hei hi chhiar rawh..”

“Aw le..”

.

.

____________________________________________

Ka alarm ri bengchheng tak chuan min ti harh hlawl a, chawl hahdam hman ka nih loh zia ka ngaihtuah a ka tho vat a, ka gas thuk tih fai mamawh zet ah chuan ka thingpui bel chu hungin ka herh nung a, inbual pindan lam ka pan san ta a. Ka chhuah leh chuan ka thingpui chuan chu a lo kang hman ti tih tawh a, a awm ang ang chu chu chini thlumin ka lehkhabu chhiarna pindan zimte chu panin ka thingpui no chu ka chawi lut a, dawhkan a lehkha pawimawh awm ho chu ka thlir kual vel a.. landline a number chu ka han dial a, mahse a ring ral thak thak thung a..

“A la zing em alawm maw le..” tiin ka in ngaihtuah a.. darkar chanve a liam ve hnu ka number hmeh ngai chu ka han hmet leh a a ring ral dawn emaw tih turah chuan an lo chhang ve hram a..

“Hello..”

“Hello.. ka pi, I fapa Rinzauva hi a tho tawh em aw.. Ukil chhuanawma  ka nia” tiin ka han chhang a

“Aw a rawn tho chiah e, han be ta che..

.

.

“Aw.. Hello”

“Rinzau min hria em aw.. Chhuanawma..”

“Aw, hria e.. ka pu.. vawiin kha a ni tak e ti raw..”

“Aw, I la theihngilh loa a lawmawm e.. court ah chuan I rawn in lan ngei kan beisei a nia”

“Ni e.. nizan lamah Dr.Muana khan min rawn bia a, ka rawn kal dawn nia..”

“Aw le.. rawn tlai lo hram ang che aw..”

.

.

Vawiin lam court a ka inlan tur chuan engtin maw ni tak ka rilru a kap a, heng pawngsual thu hla vel hi chu vawi tam tak ka lo din pui ve tawh a, hnehna pawh ka chan pui nual tawh bawk. Mahse, tun tum ka din sak lam te erawh hi chu pawngsualtu a puh lam a ni thung. Ka mimal ngaihdan ah tak pawh ka din sak lam te hi an dik ngeiin ka hria a ni, achhan chu he ka din sak tlangval hi doctor zirlai niin a pa lah Mizoram a specialist ka neih zing a lar ber pawl a ni a.. a fapa hian pawngsual kher lo a han mutpui mai tur nula a hmu hnem lutuk dawn tlat a ni.

.

.

Court rorelna tan a ni a, ka khingpui lam chuan sawrkar ukil an hmang tih ka hriat ngat phei hi chuan ka zam lo leh zual. Thu hretu ka hank oh chuan ka beisei tlangval Rinzauva chu thuhretu dinna lamah a rawn ding chhuak a. Chu tih lai tak chuan rorelna rawn chhim zing a mi mak ti hmel leh a thawng hmel ka  va hmuh chuan ka nuih a za lek lek, chu mi chu tu dang ni lo in pawngsual tawk tu chu ani.

“Tlangval Rinzauva. Thla khat liam ta March 15 zan khan tu bulah nge hun I hman min hrilh thei em??”

“Aw khami zan khan  ka thiannu Nutei bulah hian ka awm..”

“Nutei I tih awmzia chu??”

“Aw.. pawngsual tawk tu ang a in sawi Lalnuntluangi hi”

.

.

Rorelna a zova, min lawmpui turin an rawn kal sap sap hlawm a.. keichuan in chhuang rilru fe in chung ho chu ka lo chhawn a. In lam a let mai loin ka ofiice lian vak loah chuan ka let leh a, ka hnuai a hna thawk tlem te ho cuan lawmpuina min rawn hlan sup sup hlawm a. Ka hming ka chher leh ta sawt e.. hei hi a ni, ka pa chanchinbu “Lenlaini” nitin chhuak .. a sumdawnna a puih ka duh loh chhan chu.. keimah a din chhuah hi ka tum ber chu  ni. Tin, private lawyer mizo  tlemte zing a pakhat ka ni ve reng reng a.

.

.

Zan lamah chuan ka hna ka thawk leh mial mial a, mahse enge maw tak hian min mawlh. Vawiin a pawngsual tawk nula hmel te kha ka mitthla ah a cham reng a. Ni e, a hmel kha chu a tha ngei mai.. mahse khangtiang ang hmeichhe duk dak loh hmel tak kum sawmthum ral kai tawh lam a ngaihtuah chu nuih a za rum rum a lawm mawle. Nge ni aa.. ka rilru hian enge maw tak hriat a nei zawk.. chu chuan ka ngaihtuahna hi a ti buai tak zet.

.

.

Thla tam avei leh ta, ka chhung te pawh kar tawp ah lo chuan ka tlawh hman ngai meuh lo. October thla tawp lamah chuan ka nau chiah nupuiin naute a nei tih min rawn nhrilh chuan a ni hnih tuk ni 26 ah chuan Civil Hospital lam ka va pan ve hnak hnak a. Naute chu a hmeltha nge tha lo ka hre chiah lo, naute hian min neih khalh zun g zung mai anih hi. Zunram thiar tur a ka tho chu vawiin a naute nei pakhat chu ward pangngai a an lo nawr phei lai ka hmu a, chu nu hmel ka hmuh chuan ka phu zawk.. ka sa nghal pup pup.. ka han thlek leh ka hre chiang fu mai si.

.

.

“Kawlte.. saw lai nu saw..” tiin ka han kawk zeuh a

“U chuan I hre ngai ami..”

“Aw ka nhre tep..”

“A khawngaihthlak tak tak ania aw.. pawngsual a tawk a.. a rai ta sia.. ti sawn a pawm tawp mai dawn anih saw..”

"Kan birthday a in ang” tiin ka phun sep a. U Siama pawh chuan a ngaihtuah chhuak thut a nih hmel.. mak ti takin kan in en dun tlawk tlawk. Chu tih lai tak chuan ka nu a rawn lut, lehkhapuan chu U Siama’n a thukru vat a..

.

.

Ka nu chuan U Siamtea chu Doctor in a biak duh thu a rawn sawi chuan ani chuan min chhuah san ta a. Ka nu hmel chu ka en a, eng thil emaw tak hian min mawh tlat.. ka pa thawnthu ziah a pawngsual tawk tu kha a ni thei mai angem?? A theih lo ang.. ka pa hian thawnthu tam tak a phuah tawh a a dik vek kher lo tih pawh ka hria.. mahse hei hi ka in zawt a, ngatinge hei hi tlangzarh a nih ve loh??

.

.

“Nu…”

“Umm enge Bawihte..”

“Ngatinge nau ka neih ve loh?? Nau chu nei I la ka nau in thling min pe mai tur ania..”

“Bawite nau pawh nei la a la naupang dawn lutuk asin, a pe thei chuang lo ang che…”

“A pa a awm alawm ti raw..” ka tih chuan min chhang lawk lo..

“Aa.. a mil te chuan a pe em em ang che Bawihte.. in mil lo pawh ni se nangmah pe thei tur che a milpui chu I nei ngei ngei ang..” a rawn ti chuai raih a

“Ka pa ania.. engvangin nge kan in mil lo ang a.. “

“Thil awm thei ve tho ania lawm..”

Chu tih lai tak chuan U Siamtea a rawn lut a

“Eng lo a nia.. Nu Vante, nangmahni lam chuan in pek theih loh hmel a.. Pa.Zuala a rawn chhuk mai a ngaih hmel a”

Chu thu a sawi zawh chiah chuan ka nu chuan min lo en a, keichuan ka lo en let reng a..

“Bawihte hlauthawng suh aw.. I pa kan be nghal a nge..

.

.

Ka nu chhuah velah chuan..

“He tah riak rawh zanin chu aw..” U Siamtea chu ka lo ti vat

“I nu ngaihdan a ni lo palh ang duat..”

“Thuziah kha chhiar vat vat ka duh alawm.. khawngaihtakin..” a ban a chelh chuan khawngaih thla la thei tur ang berin ka ti a

“Anih engtin nge I nu bulah kan sawi ang..”

“Ka hre lo mahse thuziah lam kha chu sawi lang lo la..”

“Ngatinge sawi lan I hlauh em em a duat??”

“A danglam bik tih ka hre thei a lawm..”

“A ni maw”.. tiin ka khabe ah a piai zeuh a, a nui deuh suk a. A van hmeltha tak em.. A chang chuan keimah ah hian enge maw duh chhan tur a hmuh le tih ka ngaihtuah hial thin. A la naupangin a hlawhtling em em a, kei ve graduate pawh graduate loin natna khumah hun ka hmang reng chu a ni sia. Tun a ka beisei awm chhun chu ka pa in thling min pek theih leh theih loh chiah a ni tawh a ni. A chang chuan min kalsan tur a hrilh mai te hi ka duh thin mahse chutiang lam hawi zawng sawi dawn I la a thinrim nghal zel si, a lungawi lohna hi min ti na ber tu a ni leh bawk  thin si a.

.

.

U Siamtea’n ka nu hnenah chuan a chhawk ve tur thu sawiin eng eng emaw chhuanlam a siam chuan ka nu chuan a hreh viau a mahse kei pawn pawi ka tih loh thu ka hrilh chuan kan flat luah lam a riak turin ka nutei nen an haw dun  a. U Siamtea chuan chu lehkha puan ka pa kutziak ngei a ziah chu min chhiar chhunzawm sak leh ta a.

.

.

                                         ****** *******         

   Damdawiin atang a ka haw hnu chuan ka rilru ah kha nu, naute hring hlim chau hmel kha a awm reng a. Enge thil awmzia kha nita ang le?? thla sarih kal ta khan court ah a khingpui pa din sakin hnehna ka chan sak a, ka hriat zawng chu pawngsual ni lo a sex hmang pangngai an ni tih kha a ni. Mahse, vawiin lam a ka thil hmuh erawh kha chu pawngsualtu pa a a puh fa a hrin sak ani. Thil awmzia hriat chu ka tih mak mawh ni lo mah se hriat ka duh takzet a ni.

.

.

A tukah chuan ka hna pawh ngaipawimawh zo lo in damdawiin lam chu ka va pan leh ta a. Kan monu chuan amah kan tur a ka kal ang ah ngaiin nihlawh a lo in ti fu mai mahse ka rilru diktak erawh a khum piah piah leh a nu pakhat la naupan hmel tak chu a ni. Ka va kal ni chuan a nu ni awm tak hian a lo awmpui a, keimah ah chuan Ukil ka nih hnu a ka neih lem loh chu nu lainatna chuan ka khat a mahse ka pan ringawt I la ani sawn min lo be tha kher a ngem?? Kei val senior a hian ka hnai ngam lo chu a ni ber e.

.

.

Ka va kal leh ni chuan kan monu te chu an lo chhuak fel diam tawh a, nurse ho chuan an chhuak tawh tih ka hre lo emaw tiin min lo fiam bawrh bawrh a, ka hre reng a.. ka hre lo der zawk a ni!! Ka huaisenna zawng zawng sawm khawmin ka rilru a awm reng lam chu k pan a..

“Ehe.. nang chu??” inben kan tum chuan min rawn kawk deuh ti tih a

“Tho duh suh.. khawingaihin biak lawk che ka duh..” tiin ka chhang vat a

“Thu rawh” tiin a mu leh mai a

“Tuman an awmpui lo che mi??” tiin ka zawt a

“Ka nu in min awmpui.. vawiin ah kan chhuak dawn a bill a ti fel a..”

“Min hria ang chu ti raw..??” tiin ka han zawt tawp a

“Aw.. ka theihngilh ngai lo che..”

“Eng lo ania.. thil awmzia hriat chu ka ba lo tak na in.. min hrilh theih chuan ka lawm ngawt ang..” ka ti thawr ringawt a

“I hmuh ang hian..” a tih lai mek chuan a nu a rawn thleng a..

“Mate.. ka ti fel tawh e.. motor ka zung chang a nga.. lo in siam la..”

“Ka pi in chhuak dawn em ni..??” tiin ding uai in ka lo zawt a

“Aw.. hei kan chhuak mai aniang chu.. a in hliam nasa fu a, mahse khum in daih loh vangin enkawlna kan dawng rei thei lo a..” tiin min chhang vat a

“Gypsy ka rawn keng a.. ka han thlah ang che u.. midang rawn hruai tur an awm lo em ni??” tiin ka lo chhang a..

“A ngai lo..” chau tak chuan a rawn ti a.. A nu chuan min lo chhang nghal vat avangin a ngawi ta a

“Aw.. a u te pahnih hi nitih inhlawh an nia.. an tul em a duh ang pawn kan in buaipui thei lo a..”

“Ka lo thlah ang che u.. ka motor a awm reng alawm” ti a ka chhan chuan, chu nula I ti tawh mai teh ang, a hmel khan nu tih a inhmeh lo em ani.. chuan a hreh hmel hle mai mahse, a landan ah chuan chhungkaw harsa tak an nih hmel a an tan motor hman pawh a har tih ahriat mai.

.

.

In kan thlen chuan khum lamah an nufa chuan an mu a, keichu a nu nen kan titi thung a, chhungkaw pa berin a boral san tawh thu te a han sawi chuan ka khawngaih ang reng hle a. Kei chuan inthlahrung takin court lam a an beihpui pa din sak tu ka ni tih ka sawi chuan chu nutling kum upat hmel lamtawh chuan mittui tling puamin an chhungkaw harsatna te chu min hrilh a.. Ka hna avanga ka inchhir vawikhatna a ni hial ang chu!! Kei chuan kawng ka dap pui theih thu leh a mipa lam atang a naute enkawl na an dawn theih nan hma ka lak pui theih thu te ka hrilh chuan beidawng takin an enkawl ve theih tur thu min hrilh a.. ni e.. dinhmun in kar hlatna atang a thlir chuan he chhungkaw nu ber tan hi chuan a zuam awm mawlh lo  ani.

.

.

Chu mi ni atang chuan an in lam ah chuan ka kal ta fova.. Nutei chuan naute awmpuiin in a nghak thin a, a nu in lo lam a a hna tul te a kalsan theih loh avangin an nufa te chuan an lo in awm tlei ve thin a ni. Kei chuan Nutei lak a ka inthiam loh em  avang chuan a thian tha tak leh a thlamuanna nih ve chu ka tum bur  ani. Hmeichhia leh uite, a chul nel peih peih an tih kha maw.. thla khat a liam meuh chuan a khawhar hnemtu ber ka ni chho ta a, zan khat ka leng chu a nun a a thuruk tumah a hrilh ngai loh chu min hrilh ta a..

“Tetea nen khan kan tleirawl chhuah tirh atang a inngaizawng kan ni a, ani chu sikul tha takin a kal chho a, kei erawh chhungkaw harsatna vangin Middle chiah ka kal thei a. An chhungkua hi an awm thei em em a, zep thu cheng suh.. a nu hi a chapo in min duh lo em em a. Enge maw ti lai phei kha chuan kan inah rawn kalin ka nu hnenah min veng tha turin a rawn hrilh hial a.. ka rilru a na thei em em a, Tetea pawh khan then hial ka tum thin mahse ani khan a duh ngai lo  a ni. Chu tia kum thum  chuang kan in zui takah chuan kan chesual ta nge nge a, vawi khat tih sualin a hnu leh zel a hring tih hi a dik ngawt mai.. a hnu ah phei chuan a tur ve reng ah kan ngai chho a kan chesual ta fo va. Kuum chanve vel chu tia kan awm hnu chuan nau ka pai ni a inrinhlelhna ka nei chho a, ka chaw ei a tui loin ka uak deuh chhen a.. ka nu ka hrilh tawp a ani chuan kan veng a health worker awm pakhat hnenah min hruai ta a. Thla hnih dawn thi ka neih loh thu ka hrilh chuan ka rai tih ka hre chho a.. kha tih hun lai a ka rilru buai a hah zia kha aw.. inthah hial ka ngaihtuah thleng thin mahse ka thiannu ve ber ka han hrilh chuan Tetea chu hrilh turin min ti a, ka ngam loh thu ka hrilh chuan a chhungte pawn tu hmel an hmuh chuan an danglam tur thu min hrilh chuan Tetea chu ka hrilh ta tawp a.

.

.

Ka beisei ang chu a ni lo chiang hle mai.. Tetea chuan a chhungte a hrilh hnu ah min rawn then ta mai a, a nu kan inah rawn kalin a tu pa a nih loh thu te, khawtual tlangval ho an inrinhlelh thum a rin thu te a rawn sawi piap piap mai a.. ka chan han chhiat zia em em chu aw.. chunglam khi dam a awl fu thin mai!!

Kei chuan tih theih dang ka nei lo.. ka thian hnai deuhte ka rawn tawp mai a, an ni chuan pawngsual anga case file turin min ti ta a, kei chuan Tetea ka ngaihtuah chuan ka ngam hlawl lo, mahse ka han ngaihtuah chiang a, an fa ang pawn an pawm duh lo anih chuan tih theih dang ka nei lo.. ka mualpho ta sa sa tiin kha thil kha ka ti ta ngawt a ni..”

.

.

A thu min hrilh ka ngaihtuah chian poh leh ka inthiam lo nasa, khatiang em a nula hmeltha leh nunnem chuan kha tlangval aia  tha kha a phu a sin maw le.. Ka rilru ah hian Nutei chu a cham reng thin a, ka ngaihtuah veng veng thin a ni mai ang chu. Khawngaihna l;eh lainatna mai a ni lo, ani kha ka duh a ni.. mahse kei Mizoram a Lawyer hlawhtling tak zing a mi hian pawngsual tawk tawh hi ka duh tih na maw.. rilru hi pawm theih loh chuang a tam an tih thin hi ka hrethiam ve chiah a ni..

                          *************                  

.

.

“Duat engtin nge I awm a.. I tha em??” U Siamte a thusawi chu chiang takin ka hria a ka chhang thei mai lo, ka ruh nat dan chu a na ngawih ngawih..

“Ka khup..” ka ti thei hramm

 Ani chuan ka khum chung a bell chu a hmet vak vak a, nurse duty ho chu an rawn lut a, ka awmna hmun chu ka hlat riai riau a.. engmah ka hre zui thei ta lo.

 

.

Ka harh leh chuan ka bulah ka chhungte leh U Siamtea chu an chau tih hriat takin an lo thu nguai bur a, midang tibuaitu ka ni bang dawn lo a nih hi, tiang ang ngawt a nun hman zawng a van beidawnthlak em!! Ka nu chuan a tih thin ngai bawkin  min lo nuih suk a, ka nu nui hmel ka hmuh chuan ni khaw hre lo a ka awm lai a ka mumang chu ka hrechhuak zawk a.. sawi mai ka tum a mahse a rem lo tih ka hrechhuak leh nghal a.

.

.

“U siamte, kha thawnthu kha ka mumang ah ka hmu a sin..” tiin  kan pahnih chiah a kan awm lai chuan ka han hrilh a

“I vei leh lutuk a nge.. engmah han danglam vak a awm loh kha duat..”

“A awm ka hria lawm.. ka mumang ah chuan pawngsual tawk tu nu kha a nu hi a lo nia..”

“Mumang a nih chuu.. a tak nen ngaih pawlh tlat tum suh.. khatiang ang kha chu a tak ah a awm loa ang duat..”

“Awm  lo se ka ti.. a awm anih chuan apa fa ka ni dawn si lo a, nakinah min chhiar sak leh rawh aw..”

“Um.. kan chhiar zo vat vat dawn nia..chuan thawnthu a ni tih pawm tum rawh, hetiang a I ngaihbel zel chuan tha dawn lo sin..”

.

.

“Bawihte.. naktukah I pa a rawn chhuk mai dawn sia, in ka va ti fel  anga zanah riahpui tur che in ka rawn kal dawn nia aw.. chuan emergency a awm chuan min rawn hrilh nghal ru aw”

“Aw le nu..”

                         ***********                

.

Thla thum dawn a liam tak ah chuan Nutei nen chuan thian mai ni lo in inngaihzawng ang chuan kan awm tan ta a, ani chuan a pawm duh lawk lo a mahse kei nula chhai pawh thiam lo hian ka zar dan a ninawm viau a niang chu nin hnu a min pawm te pawh a ang zawk mah a, chu chuan ka buaina a thlen lem lo a chhan chu ka luhlulin duh tawh chu duh bur chi ka ni miau a ni. Zei erawh ka zei lo na rawh e, mahse duat thiam dan ang ang kha chuan ka duat ve bawk chuan ka hria.

.

.

Kum chanve dawn hun kan hmang ral ve leh ta, Nutei nen pawn puitling takin kan inngaizawng chho a, ani ang hi hmeichhia zawng zawng nita se khawvel mipa awm ho zingah hian piang inchhir an awm awm lo ve aw.. te ka ti rum rum thin. Tin, kha a fa hrin sak pa pawh khan a theihnghilh hi ka ring ngai lo keipawh a zunah ka uai deuh bur chu a ni tawh mai si a nih hi. Naute pawn thla sawmna a hmang mek a, a pa tih ngat a in koh tir ka tum tlat pek bawk a chu chuan Nutei te chhungkua a ti lawm phian mai.

.

.

Naute in kum khat a tlin dawn hnaih chuan ka lak a Nutei beiseina hi sawi ni lo mah se ka hre ve kar a, a fanu hian pa a mamawh a ni tih hi. Kei hian engkim huamin ka ngaizawng a ni a, tleirawl ngaihzawng ka neih ve zuai hnu a ka neih leh choh a ni, mi tenkhat phei chuan val senior te min ti hial tawh. Ni e, kei val senior hian he nuthlawi ngaihnobei zet hi nupui a tan ka iai lo a, chawi belh pawn neih mai ka thlang fan ang.

.

.

Ka nunah hian ka chhungte hi an inrawlh lo na chung hian inneih thu hla ah chuan ka biak ve ngei ngei a ngaih avangin ka han rawn ve hlawm a, an lawm dawn lo tih ka hre reng, mahse an thu hla chuan ka thil tum a thlak tir dawn lo tih pawh an hre chiang ve hle a ni. Ka nu rilru chu a na ve ngang mai, a fapa rangkachakin nuthlawi ka han nei mai tur chu mahse hmangaihna a ni miau alawm le. Ti chuan naute in kum 1 a tlin atang a thla khat hnu a inneih tur chuan kan inbuatsaih chho ta a.

.

.

Ka nu te lamah kan awm rih a, ka nu chuan Nutei chu a ngai thei vak lo tih ka hre reng mai, mahse Nutei hian awmdan tawk a thiamin a fel em em a, chhungkaw enkawl lamah chuan pianpui B.A nei an tih ang hloh!! Fapa rangkachak tan a nupui rangkachak chu a va ni chiang em.. Naute pawh ka fanu ang chiahin ka en a, a nu ka hmangaihna chuan ani chu eng ang pawn min pawm tir miau si alawm le.

.

.

Kum khat chuang kan inneih hnu ah chuan kan nupa inkar ah eng buaina mah a awm ngai loa, kan hlim reng mai a ni mahse ka nu te beisei lam kan phak thei lo, Nutei chuan nau a pai leh mai kan rin laiin a pai thei mang tlat lo. Kan doctor hriat zing a tha ber a kan ngaih kan pan chuan kan nu chu a that vek thu an sawi a, kei chu inentir turin min ti vat a a.. ka nuih a za zawk hle mai, kan thlahte zingah fa nei thei lo an awm lo chu ka tan chhan ve tlat a mahse Nutei’n min nawr nasat em avang chuan keimah ngei chu inentir turin ka han kal a, chu tah chiah chuan a ni Nutei fanu hi ka fanu mal tih a ka lam lo ngaih ve tak chu.. kei hi ka ching a ni, ka rilru nat zia chu thlah nei loin maw chhungkua ka din a.. harsa tak a lehkha ka zir a, hlawhtlinna pawh ka hmuh ve mahse fa ka nei ngai dawn lo chu a ni si.

.

.

Ka pa chuan ka awmdan chu hrethiam in ka hna chawl rih a, a sumdawnna lam a pui turin min sawm a keipawn chu chu tha berin ka hre rih ta a. Ka pa hna a ka puih chuan ka tette atang a nuam ka tih em em thuziah lam chu ka tuichilh thar leh a, ka article ziah sa tam tak chu chhuah leh hnuhnawh a ni a.. vawi leh khatah thuziakmi hlawhtling tak ka lo ni chho ta a. Ka chhungkua chuan ka beisei loh lam atangin beiseina eng min pe leh a, ka fanu pawh a rawn leikang chho a.. khawvel a a ngaihsan ber kan zawh hian “A pa” a ti ngat zel a, midang ho pawn ka fanu ang tak tak a en in duat rawn a hlawh chho em em a tunah zawng a tel lo hian ka awm thei tawh lo ani.

.

.

Ka pa hna hahthlak zia ka hriatpui hnu chuan ani tar lam pan tawh tan a a hahthlak zual zia ngaihtuahpuiin Lawyer ka nihna chu bansan in ka pa hna lam chu ka enkawl chho ta a. Press mai ni thin kha Publication Industry changtlung tak a lo ni chho ta a, ka fanu hian min ti hlim a.. midang hian an tih nat hi ka hlauh ber a ni.. a nu, natna an thlen ang kha chu ka thlen tir ve ngai lo ang..

.

     ******************

“A fanu kha keimah..” ka ti thawp sap a

“A ni lo duat.. I pa hian a ziah zawm peih tawh lo anih hmel.. thawnthu hi a ziak ve ik a nga .. a chhan chu tlangzarh tur khawp a tam a ziak hleinem..”

“A ni lo.. ngatinge tiang hian I tih tlat a..??”

“I pa hi Lawyer a ni thin em??”

“Aih.. mahse a ni mai thei asin, kum hnih ka nih hnu a a hna a bansan chuan thil hriat mang ka nei tawh dawn loh chu..”

“Hehe.. ngatinge kha thawnthu leh I nun kha I ngaihbel tlat le..” a thinrim aw ki san deuh chuan min ti hrilh hai ngei mai..

“A pa a lo kal ang a, test kan ti ang a.. a hriat mai ang..”

Ka sawi zawh rual chuan chhan pawh min chhang loin a chhuak ta daih a. Engtinnge heng thil hi ka hriat chhuah tak ang?? Tinge U Siama hian ka ngaihtuahna hi a hriatthiam theih miah loh le..

.

.

“Pa….” min rawn kuah nghal a

“Ka bawihte min lo ngai tawh em?? Ehee I hmel te chu a va han tha em em ve a, helai damdawiin ah hian vantirkoh angin ami I awm” ka nui vak vak a, a tih dan ve thin reng a ni, ka pa tluk a hmeltha min ti tu hi an vang ngawt ang.

“Tinge I lo kal har em em aaa?? .” pangchang tak chuan ka han ti a

“Kan buai em alawm mawle.. ka tihpalh.. “

“Pa engkim I hre vek em??”

“I pa in hriat loh ka nei lo..” a nui suk a

“Ka dam hunah chuan lehkha ka zir ve ang ti raw..”

“Umm dawn chiang e, enge I zir duh a Bawihte..”

“LLB!!”

“Maw.. ngati nge chungte..??”

“Misual ho ka hrem tir thei dawn alawm dan hmangin..” ka han ti a

“Bawihte misual hrem ai chuan mifel hrem hi a awl fo thin ania..”

“I hrem tawh a mi??”

“Hrem a mahse kha chu ka tan a ruatah ka ngai, ka vanneihna a ni miau a..”

“Pa, I hma I van sial..”

“Hmasial deuh mai asin ka nih” tiin min rawn dek, ka nui leh uar uar a.

.

.

Ka pa in test a tih ve hnu chuan ka beiseina  tawp ber chuan engtak rawn hring chhuak ang maw.. Test chhuah hun a ni tawh a, tumah ka bulah an awm lo, thil dik lo a awma mi aw.. tih ka ngaihtuah lai takin U Siamtea a rawn lut..

“I pa nen in inmil lo Vero.. kha thawnthu a mi kha kan zawn angai..” chu thu chu ka nun a ka thil hriat a min thawng ber tu a ni hial ang..

“Maw.. ngatinge??”

“I chhungte sawn online a nangmah pe thei tu tur zawn an tum a, I pa diktak chu an biak duh loh hmel..”

“A pa saw ka pa a ni lo tak tak maw..”

“Duat.. dam tur chuan I in tih pachan a ngai a nia..”

Ka tah nasat em avang chuan ka awmdan a dik thei lo, ka na chu a rawn chhuak leh mai dawn a ka hriat avang chuan min jection muhil ta a.

.

.

“Nu Aizawl a haw ka duh..”

“Ngatimaw..” ka nu chuan mak titakin min zawt a

“Mawh.. ni hnih chiah Aizawl a awm ka duh..”

“  A pawi rih miah lo ang.. in tih harh hi a mamawh ve deuh a ni.. kan zawn chhung tak chu khi lam ah chhoh pui tha in ka hria” U Siamtea”n a rawn tih chuan chhungkaw ho an in rawn khawm a.. haw chu tha an ti tlang ta a.

.

.

U Siama chuan ka pa thawnthu zul zuiin kum 1995 hun lai vel a Mizo specialist awm chu hriat kim tumin a han bei a, a fapa pawh doctor ve tho ni tawh tur a ni. Tin, a lawyer hriatte atangin ka pa hi Lawyer ni thin ani tih a hriat rualin doctor fapa case a sual sak te chu a hrechhuak thei ta a. Ka pa chu Dr.Humhima a ni a, Mizoram a private hospital hmasa ber, Faith Hospital dintu a ni.. He pa hi ka pa maw.. ka ring thei lo, a hming hi ka hre fo tawh a, ka pa a ni tih ka lo hre ngai miah lo maw.. mahse ani hian min duh lo.

.

.

Chau takin chu Damdawiin ah chuan ka lut a, min hmu tu apiang te enzui ka hlawh a, ka vun dang var vek leh ka hmui dang tak te khan mihring pangngai min ti ang lo em alawm mawle. Nurse pakhat tawkin damdawiin neitu pa office awmna ka zawt a min hrilh hnu chuan ka kal ta a, ka tan pen thum pen pawh a har laiin step chu ka tha tawp nen a beiin ka zawh zel a, ka luhna tur kawngka ka han kik a.. lut tur a hrilh ka nih chhanna ka dawn rualin kawngka chu ka han hawng a. Chu patling la upat hmel loh tak, tlangval lai pawh a hmeltha a ni tih hriat mai chuan a suit man to hmel tak  nen a inthuam chuan a lehkha bih lai chu a la bih zawm char char a, keiin a hmel ka lo en reng a, a reh tak tlawk tlawk hnu chuan a rawn hawi chho ta a, chu vel eh a ke bulah ka thingthi hnawk a..

“Pa khawngaihtakin I thling min pe rawh.. khawngaihtakin.. chuan I hma ah hian ka rawn in lan leh tawh ngai lo ang..” nasa takin ka tap chhunzawm a, naupang nuar ang mai ka ni.

.

.

Kawngka in hawng thuai ri ka hria, tu emaw hian min rawn pawn tho a..

“Doctor kan tihpalh lutuk..” U Siamtea aw a ni

“Enge thil awmzia..” tiin a rawn zawt a

“Ani hian damdawi a mamawh vat dawn, a chau telh telh dawn.. khawngaihin..” hlauhthawnna aw ki sang tak nen a U Siamtea tawng chu ka hre ruai ruai a

“Lo nghak rawh” ka pa, a fa a min pawm duh lo tu chuan a tih chu ka hriat thei tawp ber a ni.

.

.

Ka harh chuan a thim ruih a, ICU ah ka awm tih ka hre thei mai a.. thil thleng ka ngaihtuah let a kha pa khan a thling chu min pe phal a ngem le..?? Kar loah nurse te rawn lutin Private room lamah min sawn tur thu min hrilh chuan ka awmna hospital ka han zawt a

“Faith Hospital..”

Ka pa hospital ah maw.. wheel chair a min nawr lai chuan a hma lawk a ka hmuh ka pa dik tak chu a rawn kal a, aman a nawr tur thu nurse a hrilh chuan enge maw tak hlimna hian min rawn thuam a..

“Special roomah I awm ang a.. I nu leh pa te pawh an rawn thleng tep ang, chuan I fit hunah  BLK Centre, Delhi ah in zai turin kan chhuk nghal ang, khu lam pawh ka be vek tawh a nia..”

A aw chu a van pa tak em, a zun a uai han nat dan tur chu ka hrethiam a ni. Chuan a thusawi te kha!! Ka mumang a ni hial zawk lo maw, min duh lo tu ka pa hian beiseina sang tak min pe a ni.

.

.

Room zau leh nuam takah min nawr lut a, tah chuan naupang pahnih, mipa leh hmeichhia hi an lo awm a..

“Hei hi I naute an nih hi.. a upa zawk hi Dindini nia a nau zawk hi Hruaitea.. chuan hei hi a u Veronicai a nih hi aw..” ka pa chuan a han ti a

“A pa a dam lo ami, a hmui kha a var vek..” dindini chuan a lo ti a

“Aw.. mahse, a dam vat ang.. apa hian a ti dam dawn a lawm..”

Hlim vang a nuih ai chuan tah lam a pawt deuh tlat zawk a ni. Hetiang khawp hian a ni maw pa ka lo neih hmelthat a a fel em em.. khawvel a mi vannei ber ka ni zawk mai lo maw, miin pa pakhat pawh an neih loh laiin pahnih, hmeltha tak leh fel em em ka nei a ni sia.

.

.

Ka nu te an rawn thlen chuan ka nu hmel ka en a, a tap nasa tih hriat takin a mit a bui vek a.. ni e min zawnna lamah an tap nasa a ni ngei ang. Ka pa te pahnih chu an in chibai a, puitling takin an titi dun ka hmuh chuan ka hlim ngawih ngawih. Mahse ka pa diktak saw a naupan hmel bik lutuk tlat, ni tak a pa leh a nu an inneih khan apa hi tlangval senior a ni tak e. U Siama a rawn lut a Delhi a in zai chungchang chu an sawi ho a..

“Sir, khawngaihin zaina ah ka awm ve duh, hematologist an awm ngei ngei a ngai tho a.. min puih theih chuan..” U Siama chuan a han ti a

“Ngawi teh Dr.Cs I la junior si a, an rem tih ka va ring lo em..”

“Awm ka duh ..”

“Ni e ka han bia nga.. rem tih tir hram dank an ngaihtuah dawn nia..”

“Nia Sir, I sawi chuan an rem tih ngei ka ring..”

.

.

Ka pa chuan test zawng zawng a paltlang hnu chuan min pe thei tih kan hre chho a, ani chuan tih vat vat a duh avangin an zai ta a. Ka pa an zai chhung zawngin tawngtai na ka lo nei char char a.. hlauhthawnna leh beiseina in ka khat a ni. Vanneihthlak takin engkim a kal tluang a, ni reilo te hnu ah ka pa thling chuan ka thling chhe tawh chu a rawn thlak dawn a ni.

.

.

Ka zam lutuk chu awm ngaihna pawh ka hre lo.. ka pa diktak chhungte nen lam an rawn kal hlawm a hlau lo turin min rawn hnem sap sap a.. U Siamtea pawh ka pa in a ngen sak angin min zaina hmunah a awm ve dawn ani. Inzaina pindan lam ah min nawr phei a, a lo thim ruih a.. U Siamtea chuan ka kutah chelhin ka biangah a rawn fawp zeuh a, hnimhlum hna thawh chuan ka hriatna atan min hlat tir ruai ruai a, engmah ka hre ta lo a.

.

.

Mut kham lutuk a harh ni maiin ka in hria.. mahse ka che tha thei lo, min zaina vang a ni mahna..

“Duat.. a hlawhtling, in zai kha a hlawhtling..”

“Maww..” ka hlim lutuk.. “Lalpa ka lawm e, ka lawm takzet..”

“A harh tawh..” tiin an rawn lut sap sap a, ka pa dik tak chhungte, ka nu chhungte lam te, ka pa ni mek chhungte nen min din hual thup chu a ni sia, hei bak bak a hlimna leh lungawina hi a awm thei dawn chuang em ni.. Ka nun pangngai ah ka let leh thei dawn ta..

.

.

“A pa hi a hmeltha ti raw..” U Simatea bulah chuan ka han ti a

“Tu zawk??” a rawn la nui heu zui

“An pahnih in..”

“Nia.. chu vang alawm I hmelthat em em..” tiin ka khabe ah a piai zeuh a

“I tan ka hmeltha leh vat ang..” ka nui suk a

“Ti hian I tha ka ti ber, a hma ang a I vul leh chuk ten ka chang lo mai ang che nga..”

“Haha.. nangmah zawk nih kha aw..”

“Duat dam vat vat la.. innei vat ang aw..”

“Aih.. writer ka ni phawt ang..apa angin”

“Kan inneih pawn I nipah thei tho lawm..”

“ Kum 21 chiah ka nih hi.. lehkha pawh ka zir ve duh tho lawm..”

Chu tih lai tak chuan ka pa dik tak a rawn lut a,

“Bawihi damdawiin lamah kan buai sia, ka chhoh mai a ngai dawn a..”

“Umm.. pa ka lawm lutuk aw..”

“Pa te bulah lawmthu an sawi ngai lo..”

“Pa thla la ang..”ka ti a

“A ni tak maw.. khawi la ila..”

.

.

A hma a min duh lo a min thlauhthla tu chuan nunna thar min pe leh a, ka hmangaih U Siamtea leh ka chhungkua ka tan a nung reng te tan a nun ve theih nan kawng min hawn sak leh a.. hringnun hian natna min pe mah se ka chakna chu keimah ah bawk hian a lo awm thin a ni.. chu tih lai mek chuan ka beiseina min tih nun sak reng thin ka kiang a awm te hi min vengtu vantirkoh te an va ni chiang em…