MAWI CHAPO-I

Ka thianpa nen ka bike a traffic jam kara inzeh phei mawp mawp pah chuan horn chu ka pe phei tuar tuar a, tumah awm ve lo ang mai chuan ring leng lawng takin kan inbe mawlh mawlh bawk a, kan tih dan ve reng a nih avangin zahah pawh kan la lem hlei loa. Kan college kan thlen dawn hnai ah chuan parking lott lam panin ka khalh phei nghal a.. hmeichhe pakhat hun lo taka kawng rawn cross chuan min ti laklawh viau, ka ding chiang hle. A rawn hawi chhuah ngat phei chuan ka lo su lo kha pawi ka ti letling zawk..
.
'Mawl hi a sim theih..' a ti fak a, a la kal nal nal zui
.
'Zawngi saw.. ramhuai anih saw.. hmelchhe ropui si' ka tia ka bike chu ka side ta a. Ka thianpa chu a lo nui tut tut tih ka hre reng, mahse ngai pawimawh awm lo tak chuan ka awm lui a.
.
.
Kei leh Ema hi high school atanga kal dun char char kan ni a, tunah chuan BA (Economics) Hrangbana College ah kum hnihna kan zir duh mek a, engkim kan ti dun a kan inzui chawt thin.. Kan college ah chuan mawl lar in kan lar a.. kan thawven em vang leh kan harh dun em vang a ni mahna. Mi tam tak min sawi ka hriat leh dan chuan 'awm pangngai ve deuh hlek se an luck dun ngawt ang.. an chhelo dun sia' tih te a ni fo.. he ti chung pawh hian duhtu chu kan tawng hnem ve viau mahse ngaihzawng neih hi kan tih chi a ni lo dun ve thlawt a ni.
.
Hmeichhe thutna ken chu sawi loh, an thutna atang a kaih ding lawp a thut that te kha kan in tih theihna ve zawng a ni a.
'Lalramsang mawl viau su.. hmeichhe care na chang te hi hre rawh u..' min ngam zawng ten an han tih ve lah hian
'Hmeichhe ho lah hi intluktlan in duh a, care bik nih in duh tho si..' tih zawng a kan han sawi tak tak hi chu kan thusawi an ngaithla tluan peih lo mai pawh ni lo in an rui ti tih tawh zawk hian a hriat thin.
.
.
Class ah kan lut a a hmasa ber a thu chuan min melh rum ngang mai. Kei a pawh chu ka lo en kher kher chu ka inchhir, tukin zing vang te pawh kha a ni mahna.. a nih loh pawn min haw ve hrim hrim keini thiandun hi. A hming hi pangai taka kan lam rik lohna a rei tawh lutuk a, a sawi pawh hi ka khawr tep 'Zonunmawii.. Mawitei', ka tana thil mawi lo ber a ni hial ang.. 'Mawi chapo-i' tih hi kei chuan a inhmehpui ber in ka hria. A lehkha thiam vang leh a hriatzau em avangin kan college ah chuan a lar hle a, kan professor te thlengin zam map loa 'Gold medalist tur' an tih ngam kha a nia.
.
A hmel leh a pian chu a chhe em em pawh a ni lo. Tin, amahin inchei dan style bik te a nei reuh a.. mi uar ang a uar ve ringawt ngai loa a inchei ang ang hian inringtawk thei lah lah tak a ni.. mahse keini thiandun tan chuan a chhe ngawih ngawih hi a ni mai. A han kal te reng reng hi a dak vah a, kal deuh hah hah bawk a.. khawvel hi ka pu hmuh chhuah, ka pa lalram ti niawm tak hian a ta ah a ngai a. Engkim ah hian a zirtirtu te zawk hian an rawn emaw tih mai tur hian thil an han explain te hian 'A ni em Mawite??' an han tia nga.. sawi belh tur a lo la nei ziah zui.
.
Keini ang lo takin kan classmate te chuan an ngaina em em leh lawi si a chu pawh an hriatthiam loh hrilh a inpeih reng a, a hrilhfiah thiam lutuk te pawh an ti fo. College ah program awm dawn se a inrawlh ve ziah bawk a.. a bikin debate, allocation program tih vel phei hi chu a birthday emaw tih tur khawpin nuam a ti. Mipa thenkhat chuan fel lutuk a an ngaih avangin ngaihzawn en ah an en loa kei chuan he hmeichhe tluk a chapo hi ka hre lo a, kei ang mipa thawveng lutuk pawh hi ka awm a ti nuam lo rak fo mai!
.
.
Mawlmang taka che in hmeichhe care mi nilo viau mahila hmeichhia hetiang taka huat hi ka nei ngai lo.. A chhan pawh chiang takin ka hria a ni. Hei hi a ni a lo intanna chu..
.
High School kan chhuah hnu inla tlangval tawh tak mai a Higher la kal ngai fan kha kan ning thin takzet. A ruk a meizial zuk, duh duh huna class kal loh kha kan thiandun a kan thil chak ber a ni thin. Rilru chak, lehkha zir peih lo inti ru ngawih ngawih chungin Study camp a kan thil zir chuan 1st class a pass turin min pui hlauh mai. Ka rilru tak chuan ka awih lo zawk.. chutiang bawkin ka thianpa pawh chuan ti tha a in ti mah mah in ka hria.
.
Kan chak ber College kal lam kan han buaipui a.. kan thiandun chuan PUC ah aw kan han ti tawp a.. a chhan berah pawh a hmun a nuamin a zau a, class bunk na tur pawh a tam deuh ang kan ti kha a ni a. Mahse, ka pa in HBC a tih deuh tlat avang chuan kan thiandun chuan kan thil tum kan thlak dun leh ta zawk a.
.
Kan class hmasak ber ni chuan ka thiana nen chuan kan phur dun kher mai..
'Yaa.. mawng chu bei khal mai mai..' chu thu chu kan insawi chhawk reng hi a ni mai..
'Saw nu saw a chhe vak lo.. aw saw pawh.. saw nu sakuh an zia saw.. saw nu saw alu a ang.. saw saw zaithiam kha ni em?? ka hmu tawh TV ah..'
.
Kan ni hmasa ber chu chutiang chuan kan hmang ral dun thak.. nuam kan tih thu bak sawi tur kan nei lo. Keini pahnih hiah hmeichhe chhelo chu kan hre ve chiang alawm ngaihzawng pawh kan nei dun ve nual tawh mahse inbiak reng vel hi kan tih chi a ni loa.. chu ai chuan games khelh nuam kan ti a rilru na tak chungin min then leh nge nge zel. Mahse kan chas neih ve te hi kan school emaw kan veng a mi an ni ngai lo, a chhan chu chulai hmunah chuan chhai thluk theih kan nei lo.. min hrechiang em a tin a ni!!
.
Kan chas neih ve te chu veng dang a mi min la hrechiang vak lo te emaw fb vela tanga kan hriat te an ni mai mai mahse ex te ti tam tu ah hmang mai mai ang kan tia min be tha tu chhelo deuh hi chu biak chhiat kan tum ngai lo hrim hrim.
.
'College ah hian chas neih ve a ngai a ni..' Ema chuan an ti ham ham a
'Khal deuh nei la..'
'I duh leh nangman nei la khal deuh chu.. keichu ka duh loa..' a han ti a
'Ka peih ve lo lawm..'
'Ngati??'
'Min duh rei leh dawn chuang loa..'
'An duh rei thei emm che hi tunah pawh an biak vak vak che kha..' Ema chuan a rawn ti a
'E nizanah Chawnpui mi khan a hnute pic min lo thawn a sin..'
'Khawi ka en ve duh..' tiin ka phone chu min rawn chuh a
'Lawk lawk ka zawng dawn alawm..' ka phone chu ka pe a.. 'Don't swipe right or left.. just look..' ka sawi zo hman lo tep.. an swipe phei zeuh.
'Heii Bawiha.. zawnga en suh..' tiin ka va chuh
'Haha.. tu ta nge aa.. ka hmu hman.. va ck nasa awm vee!!'
'Khawii..' tiin kan inchuh tang tang
'Ka enchiang lawk duh lawm..'
'Teuh loee.. khawi tehhh..' a kun a, a pumah nghet takin a chelh tlat bawk si. Tih dan dang ka ngaihtuah chhuak vat.. ka dek a, a thlah dawn tihah chuan lak ka tum a, ka lak thelh hlauh pek, classroom chhuatah chuan a tleng phei ta daih.. Tu emaw ke bulah a va tawp chat!
.
Chu veleh rang mang khengin ka phone chu ka va bawh pawp a.. class room a awm ho chu an lo nui nasa mai.. Ka tho kang a zak map loin kan nui ham ham a. Ka hma a hmeichhe ding ka khabe chen vel erawh chuan ten hmel takin min lo en a.
'Nalh em?? mi bulah sawi loh tur awmmm..' ka tih chuan a hnar an pe vang kher a.. a chhe reuh lutuk..
.
'Kha nu kha kan section a mi a mi??' Ema chuan a rawn ti a
'Ka hre nang.. zawnga nangmah vangin a hmu hman nia..'
'Ho ee.. nge ka lakah i zep ni..'
'Fb a mi nih kha.. a easy rap mai.. mahse fake a lo nia.. chuvang nih kha min nuihzat leh dawn zia chu sawi chiah ila chuan..' ka tih chuan nasa takin min nuih vak vak a..
'Khanu kha tibuai ila' ka ti a
'Tu??'
'Hmu tu kha..' ka han ti a
'Engtin??'
'Star la..'
'Nahh.. thing em mai.. chut hmel ropui'
'College ah ngaihzawng neih ve i duh nilawm ni..' ka han ti a
'A chhe ee..'
'A chhe lo.. khal i duh loh kha.. a zen thlarh alawm..' tih a chu nu chanchin kan sawi lai mek chuan a rawn hawi a..
'Aaa englo kha maw..' tiin Ema chu an han meng kual vel a.. ka nuih za lutuk chu ka hnek deuh chawrh a.
.
.
Honours class kan neih zawh chuan a hma a min hriattir lawk angin kan class pangai ah theuh kan lut sap sap a. Sir chuan eng eng emaw a sawi lai chuan a hmasa ber a thu chu ka thianpa nen chuan kan zuk melh relh relh a... ka thianpa lah chuan a khat tawkin a chal min tih chuar khum reng bawk a..
'Saw a chhuak..' tiin ka va nghawk sawk a
.
'Ka hming chu Zonunmawii a ni a, tunah Khatla ah kan khawsa mek a.. St.Pauls Higher Secondary School atangin Distinction ah ka pass chhuak a ni..'. Ka thianpa chu ka va melh zeuh.. inringtawk tak chuan min lo melh khalh reuh a.. Introduction kan pek zawh vek hnu chuan kan sir chuan Class Representative tur mipa leh hmeichhia thlan a ngaih thu an sawi a.. vote nge volunteer kan duh thu min zawh chuan volunteer duh kan tam zawk avangin in volunteer thei an awm leh awm loh min zawt hlawm a.. a sawi zo fel awrh tih ah Zonunmawii ngei mai chuan a ban an phar nghal arh a. Ka thianpa nen chuan phawk fe hian kan inmelh a..
'Phar ve rawh..' tiin ka nghawk sawk
'Teuh lo..'
'Sir he lamah..' tiin Ema kut chu ka la lawk a ka phar kan tir a
'MAWLA!!' an rawi hawi thup..
.
'Awle.. Emmanuela leh Zonunmawii te hi tun semester chhunga in CR tur te an ni ang.. an awmdan leh an duty an puitlin that dan a zirin next sem thleng pawh an nihna  hi an la chelh thei turah ngai i la.. Emmanuela, in class ho hi an phone no.la la whatsapp group zanin ah siam in tum dawn nia' Sir in a rawn tih chuan Ema chu a hawihai hle a.. ka lo nuih tet tet..
'Aw aw..' a ti ve mai bawk a. A hnu chuan sir chu a chhuak ve nghal a..
.
'Uaiii kan CR hi Emmanuel Lalrinchhana a nia.. hei lo pawh t-shirt dang a la nei..' tiin ka au vak vak a.. kan class a mi te ho chu an nui dar dar hlawm a..
'An phone no. chu engtin vak nge ka lak nga??' Ema chuan a rawn ti a
'Au vak rawh..'
'Au rawh nangmah kha.. i au zawh chiah kha..'
'Aih..'
.
.
'THIANTE U!! LO NGAITHLA LAWK RUU!!' kan thiandun chuan kan va hawi phei.. Lalinringtawk-i chu a lecturn hma a dingin a lo au ve peng peng reuh a. Kan reh tak diak hnu chuan Ema chu chho turin a rawn signal a.. a hawihai leh rap mai, keichuan kan nam kal nghal a..
.
'Aw.. kan CR hian phone no. a la phawt anga.. chumi hnu ah kan haw thei ang..' Zonunmawi'n a tih chuan ka rilru te te in 'inla pawimawh chi maw..' ka ti a..
.
Ka phone no.vel ka pek hnu chuan kal mai ka tum a..
'Heii.. Bawiha..' ka hawi let a
'Min haw san dawn mi a hmela..' Ema chuan a rawn ti a
'Rei ee lawm..' ka han ti lang lang a
'Bengchheng su lehlamah class an la..'.. Ka luak tep.. he nu hi a mi uap a na ngawt ang.. ninawm lamah.. tan ni phat atangin ti hi a ni si a!
'Kan zawh tep hi mawle..' Ema chuan a rawn ti a..
.
.
'Englo a nia.. thil ka sawi ang aw..' Ema chuan nui hau chuan a rawn ti a
'Nge??'
'Hahaaa..'
'Heii nge a??' tiin ka gamepad chu ka dah a
'Lawkk.. min hnek lo la..' tiin a ding uai a.. posi a la nghal bawk a
'Aw sawi rawh..'
'Fake account kha keimahh..haaaa' tiin a tlanchhe nghal.. ka um ve nghal bawk!!
'Zawnga ding rawh ka hnek khawp ang che..' tiin common room lamah ka um phei. Sofa ah chuan ka pawt thu a, a dulah kan hnek siah siah a..
.
'Lalramsang em em a che u.. in bengchheng lutuk.. i nau in lehkha a zir thei hleinem..' ka nu in a lo tih chuan Ema chu a lo au ruai ruai a..
'Nu Ramte min chhan rawhh.. please please please..'
'Thlah rawh Lalramsang.. i pa rawn thawh kher a mi in duh..' ka nu in a rawn tih chuan ka thlah ta a
'Min thah i tum a mi??' tiin a rawn au vak a.. ka nu kal tawh chu a rawn let leh a, rum mang khengin min rawn melh dun hnu chuan kan ngawi dun ta dak a.
.
'Ka tihpalh ka tih kha..' ka beng bulah a au luih vak vak pawh chuan ngaihsak lo ang hmak chuan ka awm a.. 'Heiii..'.. 'Nge mawni lee.. nangpawn min bawl thin khaa'
'Kha te chu Nokia black and white chhuah hunlai nihkha..' ka lo ti vak a
'I thil pic min thawn hman chuan loh kha..'
'Zawnga sawi tawh suh..'
'Yess min ngaidam tihna..'
'Khawi i phone' ka lo ti ram hmak a
'Heii ngatan?? uang suh.. ka peih lo nia.. ka haw dawn ka lo riak lo mai ang..'
'I ngam chuan??'
'Huuuuhhh nge mawni lee??' tiin a au vak a..
'Min pe mai rawh ka ngaihdam i duh chuan..' ka tih chuan min pe ta a..
.
.
Kan class whatsapp group a member awm ho ka en thla zel a.. Asst.Cr tih a insave ah chuan ka tawp chat. Amah ah chuan lutin ka thianpa chu  ka han en a..
'Ti suh.. please...' tiin a lu a lo dawm.. 'awi Lalpa a send chuuuu!!'
'Zanin chu phone inkawl thleng mai ang..' ka ti a
'Ka duh duh ka be ve ang..'
'Pawi ka ti ve si loaa..' ka lo ti a
'Nge i text kherr??'
'Ho ee.. mu tawh em?? tih mai mai..'
'Khaa a ri nia.. en rawh'
'Rawn en suh..' tiin ka kalsan daih a..
.
Message lo thleng chu ka en nghal vat a..
Asst.Cr-Mu lo.. enge thil pawimawh awm mi??
Me- Awm hran loe ka be chak mai mai che..
Asst.Cr-Ngatan??
Me- Ngatan hranpa pawh awm lo ka belchiang chak che a
Asst.Cr- Eng vang ber??
Me- Ahh.. Coz you got a lots of self confident
Asst.Cr- You got a lots of self confidence ti zawk ta la
.
Tunah hian ka zak em ni?? kei hi ka zak ve thei maw?? Ni e, ka zak chem chem.. mahse engvangin nge ka zak tih a hriat kher a ngaih ang.. Hmeichhia leh uite a chul nel peih peih.. Text zawm leh ngat ang..
Me- Oh Miss Brillian
Asst.Cr- Briliant tur.. dictionary bih tam i mamawh nih kha.. (Ka rum nghulh!!!)
.
'Nge aa??' Ema chuan a rawn ti a
'Engmah' ka lo ti hmak
'Zahawm deuhin be rawh aw text tu kha nangmah i ni tih ka sawi i duh loh chuan'
'Kal mai teh..'
.
Me- Text ah shortcut i hmang ve ngai lo mi?? (tim rilru takin)
Asst.Cr- Aw hmang ngai lo.. ka hun a ti hek hran hleinem
Me- I va fel ve.. eng lo ngaihzawng i nei em??
Asst.Cr- Ngatan??
Me- Ka zawt mai mai che
Asst.Cr- Ka personal life hi zawh mai mai a tan ka nunpui hleinem
Me- Oh sorry.. ka hre duh takzet
Asst.Cr- A chhan enge?? (hmelchhiat chhiat nen a induh khanglangg!)
Me- I hriatthiam theih dan tur chuan mi pakhat hian pangpar mawi em em mai hi ral atangin a hmu a.. va pan a va belhchian chu a chak em em a.. mahse chu pangpar to na huan chu neitu nei a lo nih hlauh chuan chupa chu a inrawlh lohna turah a inrawlh a ni dawn si a.. chuvang chuan a hmuhna hmun atang chuan awrawl tawp a au in he thu hi a zawt ta a 'Enkawl tu nei mek em ni i nih?? I nih loh hlauh chuan engtik lai pawh a enkawl che ka chak takzet' tiin (Ka type pah chuan ka nui khur char char.. engtin tak rawn chhang ang maw..)
Asst.Cr- I PHU TAWK HRE RAWH!!
.
Ka beisei piah lam a ni. A eng saw nge chhuan tur a neih lee ka ti.. A zak loin a inringtawk em em tih chu ka hria mahse enge inlak chhan vak tur a neih. Ka bawl chu ni tho mahse ka thinrim tak tak tep a ni.. 'Ka bawl che nih kha..' tih va thawn mai chu ka duh a mahse ka be zui duh ta loa..
.
.
Kha mi tuk atang khan Mawi chapo-i tih hming chu a rawn pu chho tan ta a. Mawi chapo-i chuan amah be tu kha ka thianpa emaw tiin nhgeiawm tak takin a awm khum thin a, keiin Mawi chapo-i chu ka theih ang ang in tihbuai leh tih zah ka tum thin bawk a. Ka thianpa chuan engah vak a ngai loa.. kei erawh chuan ka ngai ve thei lo.. a mi text kha ka ni miau a. Lehkha kan zir chho zel a, Mawi chapo-i thiam zia kan hre chho telh telh a, chu chuan ka awmhmunah min lo ti thinrim ve em em ringawt zel. Ka thianpa nen Class representative an nih avangin an inzui a ngai fo va.. chung ringawt te chuan ka awm a ti nuam lo thin. Ema erawh chuan hmeichhe dang angin a fiam bawrh bawrh a, a haw thin tih ka hre reng mahse chu chuan ka thianpa a tibuai ngai lo thung. Keichuan a awm ve tawh na ah chuan nuam ka ti ngai loa engkimah ka tim vek hi  a ni ringawt zel..
.
Vawikhat chu Ema a dam that loh avangin class a rawn kal thei loa.. College week atan a pawisa khawn a dawn ho chu Asst.Cr hnen a submit turin min thawn a. Class ka thlen chuan hmasa berah a lo meng chapo leh hraww tawh.. pek mai ka tum a ka thei hlawl lo, ka thutna lam chu ka pan ta zawk a. Honours class neih dawnah chuan ama seat dawhkan hnuai ah envelope chu ka dah ringawt a, ka thutna thin a hnungber chu ka pan ta a.
.
Darkar khat hnuah chauh class ka neih leh dawn avangin canteen ah thu in thingpui ka in a.. Mawi chapoi leh a thiannu chu ka lam an rawn pan ka hmuh chuan en pawh en peih loin hmundang ka hawi vat a
.
'Ramsang, Emmanuela'n pawisa a thawn che em??'
'I dawhkan hnuai ah ka dah..' ka lo ti hmuk a
'Engaa?? min hrilh ta che..' tiin hmanhmawh takin ka let nghal a. Nia, ka ngaihtuah chian chuan ka ti awm ang lo ve reng mai.. a lo bo hman vaih chuan ka thiamloh a ni awm si a.
.
Class ah ka chhoh chuan Mawi chapo-i chu a hmasa berah alo thu leh than tawh.. "pawisa chu a hmu angem aw.." ka ti neuh neuh a. A bulah dingin sawi ka han tum a.. ka ang hman zuai
'Aw ka hmu tawh..' a rawn ti a
'That chu..' tiin ka kalsan nghal a 
.
Vawi khat chu kan Sir pakhat hian thinrim takin Ema a ko a, staff room a hmu turin a tih avang chuan Ema pawh chu a chhuak nghal a. A rawn let leh chuan a hmel atangin thil dik lo a awm tih ka hre vat a..
'Ngatinge??'
'Mawi chapo-i vang leh bawk!!' a tih chuan ka lo sa phat
'Enge a tih leh tawh a??"
'CR meeting tur kha nizan ah group ka lo check si loa.. amah chiah asst.Cr kal a lo awm a.. ka chanchin engmah ka sawi loh thu te a lo sawi..' kham hmel zet chuan a ti a
'He nu em em hi chu hmeichhia chu ni lo se a che thei tawh miah lo ang mawle..'
.
.
'Heii Mawi chapo' a rawn hawi ve mai
'Ka hming chu Zonunmawii.. chuan ka hnam hming chu Hrahsel.. ka hmingah chapo tih thumal a tel lo aw..' dak vah chuan a rawn ti peng peng a
'I tih tur chiah ti rawh.. hmeichhia i nih hi ka theihnghilh thak i duh loh chuan..' tiin a ban ah ka hmer vak a
'Ka ban kha thlah rawh.. hand sanitizer chiah ka pai ania.. full body sanitizer ka pai hunah i duh chuan ka ban chu i hmer leh dawn nia..' zam map lo chuan a han ti a.. sawi tur ka hre lo, ka nui ringawt.. an ni pawh chu an kal ta a..
.
'Khatiang a hmeichhe chapo kha ka hre ngai lo..' ka han ti a
'Nia.. Mawi chapo-i tih ringawt pawh hian a nihna  a sawifiah zo lo.. a khawngaihthlak zawk!' Ema chuan a lo ti ve bawk a
'Tu emaw in pawngsual tum se engtin nge a awm i rin??' ka lo ti a
'Tuman an pawngsual peih loang..' Ema'n a tih chuan kan nui dun leh chiam a
.
.
Hun a liam zel a College ah pawh kan tlangnel sawtin mi hriat pawh kan ngeh chho ve hle a.. Kan inngaina tlangin kan infiam bawrh bawrh hlawm a mahse Mawi chapoi erawh ka nel ve thei thak lo. Semester dang kan kai chho a Class representative atan midang an thlan tlin ringawt pawh chu ka lawm rilru viau mahse ahma aiin College thil tih neuh neuh ah a la inhmang nasa tho mai. Ani anga inhmang nasa ho zingah erawh a danglam fal nalh, a zirna a tibuai loa.. tan tirh atanga thiam ber a la ni zat zat tho a ni.
.
.
Ema nen in bet in games kan khel a.. enge in chawi tur lamah kan inhnial char char..
'Canteen a kar khat chhung in treat chu nimai..' ka ti a
'A ho kan ti zing em mai..'
'Anih enge??'
'Tha deuh ka hria..' a rawn ti a
'Engmaw??'
'Mawi chapo-i'
'Chu chu engtin??' ka lo ti ha a
'A chak lo zawk zawk in kiss tur..'
'I aa mi?? chutiang a theih loh sa..' ka lo ti vak a
'Nge ho e.. a zak ve maithei a sin..'
'Zak loang a thinrim ang..'
'Thinrimna hian alawm mihring te min ti chak lo ber fo thin..'
'I kiss ngam dawn mi??' ka han ti a
'Ka kiss dawn lo nangman a lawm kiss dawn'
'Huh.. a teuh hian a hnai lo..' ka lo ti a
'Dawn em??' ka ngaihtuah neuh neuh a, tih thinrim a tih zah chu ka chak ber a ni lawm ni.. a tha dawn khawp e
'Deal..' tiin ka kut ka phar a
'Deal..' a lo ti ve nghal a
.
Kan khel tan ta.. ka thianpa hi a ni lawm ni phu lo ngawih ngawih tu a a chhuah kha.. a kiss ngei tur a ni tiin ka tang ulh hle. Chutiang bawkin ka thiana pawh tang tak a ni.. a phur viau bawk. Darkar hnih kan khelh hnu chuan a chak kan hre ta.. thil thleng tur a ka duh chu a thleng chho dawn a ang hle a ni.
.
'Naa.. ka peih lo..'
'Deal chu deal..' ka lo hmak
'Thinrim viau ta se??'
'A tha fe.. min zah loh em hii.. a awmdan a sim maithei sin'
'Keichu ka thinrim leh chuan ka hnek tawh ang..'
'Na tawkin i fawp vak nga a hmui seh thi sak ang che..'
'Ka ten deuh..' a rawn ti a
'Engvangin??'
'A inbual khat a ngem??'
'Nge mawni le.. a taksa i ei dawn pawh nilo..'
.
.
A tukah chuan thil tum ropui tawk nei ang maiin college lam kan pan a.. kawng tluanin a sawi char char..
'A tah pawn kan kalsan daih ang..' a ti a
'Principal hnenah min report angem??' ka lo ti vat a
'Teuh lo kan vau dawn nia' a tih chuan.. "nia.." ka ti sam et a.
.
Class zawh velah chuan Mawi chapo-i chu ka va pan a..
'Mawi chap..'' Ema'n min lo kheuh zawk 'Mawite'
'Nge??' a mitmeng an kan ak a.. chapo hi ka lo ti leh em em ringawt tawp
'Prof in min hmu duh..' kan ti ringawt a
'A hmuh duh che chuan kal la ti nia..' a tia a hawi let hmak
'Nangmah nen..'
'Tu Prof ber??'
'Min lo zui la nimai.. i kal duh lo mi??' ka lo ti ram hmak a
'Ok..' tiin a tho a.. a hma ah chuan kan thiandun chuan in signal char char chungin kan kal dun a.
.
Hmun biru ve lai ber a kan hriat ah chuan kan ding a..
'Enge a.. khawnge sir chu??' a ti a. Chutih lai chuan ka thianpa ka signal zeuh a.. Ani chuan a pawt vak a, a kut chelhin a fawp ta ngawr ngawr..
'Heii tin nge min tih in tum a..' a sen vek! 'I tiranga ei ka ka ah a luh hi..' tiin ten hmel takin a chil a chhak vak vak
'Tiranga a chhuak tawh leuh shikhar a nih kha..' Ema chuan a sawi zawh rual chuan a pawt bet leh pawp.. a hmui ah chuan na thei ang berin a hap ni maiin ka hria. Kha kher kha chu keipawn a mah mah ka lo ti hman..
.
An inthlah hnu chuan chiang takin Mawi chapo-i chuan min rawn en a.. a hmui thi ser ser ka hmuh chuan engtin mawni tak ka tiril a fan.. a mit atanga mittui rawn luang chuan a hma a a hawi larh thinna hmel leh a mitmeng chapo vah chu a paih bo chiang hle
'In thi dawn.. hre ru..' tiin aw khur chungin  arawn tawng chhuak a
.
Ka thianpa nen chuan kan in en a ani pawh kha hai rual loin nuam lo a ti tih ka hre thei a ni. Chutih lai chuan Mawi mittui-i (a chapo rih lo tlat) chuan min kalsan ta a..
'Zui rawh.. Bawiha zui teh!!' Ema chuan a rawn ti a
'Keimah chiahin maw??'
'Aw.. ka kal duh lo.. '
.
Nia, keipawh a dinhmunah hian ding ta ila ka kal hauh loang. Hmanhmawh taka tlanin Mawi mittui-i chu ka zui a..
'Lo ding lawk.. inbe lawk ang..' a dar ah chuan ka va chelh a.. a khur tih ka hre thei vat a. Ani chuan hlauthawng tih hriat takin a ban chu a paih thla vat a
'En teh Mawite.. kan tihpalh.. tih hlauhthawn che kan tum lo..'
'KAL RAWHH' tiin a rawn te chiam a.. Sakei nu thinrim hi ka tehkhin ber
'Min complaint i tum em??'
'Ka lawm e.. idea tha tak a ni' a ti a, a kal sawn ta a..
.
Class ah kan thiandun in kan chhuk a, a hmasa ber seat ka en chuan a bag pawh a lo awm tawh lo..
'Khawnge Mawitei??' a bula thu thin hnenah chuan ka han ti a
'A haw.. a damlo a..' ka thianpa nen chuan kan inmelh zeuh a..
.
Nilengin ka awm a nuam lo.. chutiang bawkin ka thianpa pawh. A hmui kha a seh duh tak tak pawh ka ring loa mahse ka sawi chhuah vangin khatiang kha a thleng ta si. Hmeichhe rilru tih nat chu ka lo nei ve nual tawh a mahse an mittui tla lai erawh ka la hmu ngai lo. Ka thianpa inthiam loh hmel ka hmuh ngat phei chuan keimah zawk chuan nuam lo ka lo ti a.
.
Ka ngaihtuah nasa lutuk chu keipawn mak ka in ti zawk.. ka duh ang, a thinrim.. a tlawm hmel leh a na hmel ka hmu ngei alawm mahse chu chuan min tih hlim phah chuang si loa. In a ka haw te chu ka tawt up up in ka hria, complaint theh lut ta se ka thianpa leh kei hi suspend kan ni ngei ngei dawn bawk anga.. Mawl pawh hian chin tawk a nei an tih hi ka tan a chintawk hi ka lo pel leh nge nge thin a nih hi!!
.
.
A tukah class kan kal chuan Mawitei chu hmuh tur a awm miah lo.. chu chuan ka rilru a ti buai hle bawk. Ema erawh chu engmah hre tawh lo ang maiin a hawi leh vual vual tawh, a awhawm thin mange. Zanah chuan ka awm a nawm theih thawt loh avangin Mawi chapo-i tih a ka save chu whatsaap ah text tumin ka han en a.. a last seen a rei tawh  viau, nimin zingkar lam daih kha a ni tawh.. Pawilo, call hi a tha ber ang.. 'kum 19 ka ni ve tawh zah a tul lo' tih chuan ka infuih nasa mai a..
.
'Hello..' a aw a ni lo tih ka hre nghal
'Mawi chap.. oh Mawitei awm em?? ka va be duh ve..'ka han ti a
'Tunah chuan a dam tha vak loa.. a muhil a nakin ah lo call leh mai ta che..'
'Awle.. ka lawm e'
.
'Nimin vang khan a damlo tihna mi lee??' tiin ka inngaihtuah a.. an in a va kal mai chu ka duh rum rum a mahse Ema ka sawm ve angem?? a theih loang a mah a hmuh ngat phei chuan a chi loh.. keimah a ka kal mai a ngai dawn a ni. Nasa tak a inngaihtuah chungin an in lam chu ka pan a kawng chanve vel ka thlen chuan ka ding thut a.. kan in lam kawng zawhin ka let leh hna hna a.
.
.
Zirtawpni a ni a, Mawi chapo-i chuan ni thum lai class a chawlhsan tawh.. engvang nge ni ang?? 'Khami ni a thil thleng vang kha a mi le' tih ngawt chuan ka rilru a ti buai a. Ema hnenah ka sawi chuan thawveng takin min chhang mahse ani pawh a rilru a buai tih ka man thiam reng tho a ni.
'Monday a a lo la kal loh chuan kan pahnihin kan kal dawn nia aninah..' Ema chuan a ti a
'A khur vek mawle hmanni khan..'
'Khur ve bawk ang chu.. kan hlauhawm e lawm...' tih pah chuan a nui vak vak a.. Nidang chu nise keipawh ka nui nasa viau ang mahse ka nui hleithei tlat lo.
.
Kartawp chawlh ka hman a zawng a hreawm ber a ni hial ang. Ka rilru ah engtiklai pawn Mawi chapo-i chu a awm a.. chu chu ka duh lo. A khawngaih veng nge ka huat vang a ni ngawtin ka hre lo bawk! Monday ah chuan rawn kal hram se, engkim hi thleng dik ve se ani hian ka rilru tibuai lo se chu chu ka duh ber a ni.
.
Kan tih thin dan bawkin ka bike in Ema nen College lam panin kan inphur phei a.Ka bike ka park hnu chuan College building kan lut tep tihah Ema chuan min rawn pawt ding a..
'Saw Mawi Chapo-i' ka hawi rang kher mai.. Car Silver rawng atanga a chhuak chu ka en reng a.. 'Saw pa sawn hmanni tlai pawn a rawn hruai..' Ema'n a tih chuan eng a sawina chu ka hre chiang lo mahse keimahah dik lo a awm nghal..
'Lut ang..' ka ti a, kan in zui chho ta a..
.
Class ah ka luh chuan a thutna a a thu chu ka va en zeuh a a phone khawihin a bih char char a. Ka thutna tur lam ka pan ve nghal a. Class tan a hun tep tawh tih ah chuan Mawi chapo-i chu a tho nawlh a kawngkhar lam a pan a.. Chutah chuan kan zirtirtunu lo lut tur nen an intawk chiah
'Khawnge kal i tum Mawii'
'Principal hmuh ngei ngei ka ngai a..' chu thu a sawi chiah chuan Ema nen phawk fe in kan in en a
'This is Nooo' tiin Ema chu a lo phun sep a.. Chutah ka tho nawlh a kawngkhar lam ka pan  ve nghal..
'Nang a pawh chu khawnge i kal dawn??'
'Ma'am Principal hmuh ngei ngei ka ngai..' tiin ka tlan chhuak a.. Mawi chapo-i chu ka um zui ta a..
.
.
'Heyyy enge tih i tum a??' tiin a bulah chuan ka va ding a.. Ani chuan min chhang loin a letter ken lai chu min pe a.. 'Complaint letter against Lalramsanga and Emmanuel Lalrinchhana..'
'Enge ti turin min duh??' ka han ti ringawt a
'I hre mai ang..' tiin a kal char char a
'Ka thianpa hmingin ka tihpalh.. ka plan vek anih kha.. ti suh'
'Hei hi a serious zia i hria em??'
'Tehreng mai.. chu vang alawm khawngaih ka dil che.. please..'
.
Ka thusawi chu hria ang pawh a awm lo chuan a kal char char.. Principal room kan thleng tep tih chuan ka beidawng chu ka ding tawp. Ani chu kal zelin Principal pindan a thlen chuan a hmel chapo arh chuan min rawn en a.. bang chu nghengin hnuai lam ka bih char char.. minute nga pawh a tling loang tih ah chuan pen thawm ka hria a.. ka hawi chhuak vat. A letter ziah chuan ka hmai ah a rawn vawm a..
'Last warning..'  a ti ram hmak bawk aa.. kei erawh chuan ka lo nuih pangngai mai a
'Ka lawm takzet!!..' tiin hmanhmawh takin class lam panin ka tlansan ta a..
.
.
Class a zawh chuan an chhuak sap sap a, a hmasa ber a mi erawh a thu tlat..
'Lo zuk kal rawh..' tiin Ema chu ka han hrilh a.. a kal ve mai a. Ka copy chu la in thutna hmasa ber lam chu ka pan a.. a dawhkan ah chuan ka lehkhabu chu ka theh thla a, ani chuan min lo en vat a. Ka ngaihbel nge ahma anga min tham lo tak mitmeng kha a awm tawh miah lo..
'Hei hi ka hrethiam lo.. min en sak lawk mai..' ka ti a
'Ka thiam lo..' tiin thawh a tum a, ka nem thu hmak.. 'En rawh'
'Ngatinge min tihbuai tlat a??'
'Ka hre duh lawm.. midang pawh i hrilh kha..' ka ti a
'I thiam lo tak tak a mi??' tiin ka mit a chiang taka min en chung chuan a ti a
'Aw..'.. Ni e, dawt ka sawi lo.. engmah thiam ka nei lo kan zirlai hi, mahse a bula hun hman chakna ka neih piah lamah kan tihsual siam that theih tawh loh khuh bo nan enge maw tak a ni tan a tih chu ka duh a ni. Ani chuan ka copy chu a en vang vang a..
'Sir zawt mai rawh..'
'Enga?? i thiam reng..'
'Library ah free period ah ka hrilh ang che..' tiin min thawh san a
.
Canteen ah chhukin eitur ka lam a..
'Library ah lehkha min zirpui dawn a..' ka han ti a
'Tu in??'
'Mawitei..' tim deuh tak chuan ka han ti a
'Mawi chapo-i i ti ngem aw.. tih ka lo ngaihtuah mek a..' Ema'n a tih chuan kan nui dun huk a
'Khapa kha tunge i hria em??' ka ti a
'Tu maw??'
'Zing rawn thlah tu kha..'
'Heii nang hi..'
'Engee??'
'Engmah.. ka hrethiam alawm..' a ti a
'Ka zawhna chu??'
'Aw.. gym ah a lo kal ve zeuh zeuh.. a car tangin ka hria lawm..'
'Gym ah i kal ngai mi??'
'Aw ka kal ve zeuh zeuh..' a ti a
'I kal zeuh zeuh chuan.. a lo kal ve zeuh zeuh ziah tihna mi??'
'Awww.. nge maw ni le...'
'Chuti chu amah nilo in nangmah nih chu kal zeuh zeuh zawk..'
'Ni ee.. tinge?? i hnek chak a mi??'
'Teuh lo.. tunlai ah ar pawh an insual duh tawh lo.. eng natna nge an vei tih pawh hriat loh..' ka lo ti hmak a
'Ar in natna hrik an inkai chhawng ve dawn mi??' nui vak vak pah chuan a rawn ti a
'Ka thusawi awmzia i hre reng..' tiin ka awki chu ka tum miah loin ka san vak a.. Ema chuan mak tih hmel takin min en reng..
'Bawiha i duh nih kha..'
'Teuh lo..' tiin ka nui lui hak
.
.
Phur ru tak leh zam ru tak siin library lam chu ka pan a.. Ema ka sawm ve a, inla zei takin min kalpui duh lo ngei bawk a. Ka thlen hnu rei lo te ah Mawitei chu a rawn thleng a.. ka thiam loh ka zawh chu min hrilh a.. ka bo telh telh..
'A hma mi ho hi i hrethiam lo mi??'a ti a
'Aw.. engmah ka hre lo..' ka ti a
'Nih chuan a hmasa ber atanga zir a ngai nih chu.. i peih loang ti raw..' a ti a
'Ka peih ka peih..' ka lo ti vat a
'Vawikhatah kan zir zo hman dawn lo..'
'Nitin i hman chuan..' ka lo ti a
'Tuition la law law rawh..' a ti hmak a.. mahse min haw hlur ang hmel kha chu a pu tawh lo
'Nia nangma hnenah..' ka lo ti vat
'Ka hman lo.. zanah high school naupang ho tuition ka pe a..' a ti a
'Pakhat chiah te chu i la belh thei mai lo a mi??'
'Engee.. tun a tak a ka bula zir phet pawh chu i duh le..' ner nang pah chuan a ti a
'A hma chuan min hua a..'
'Tunah pawh..'
'Teuh lo.. min haw lo..' ka lo ti vat a..
'Library ah hian heng lehkhabu hi hawh la chhiar rawh.. tuition chu a nu ka lo zawt phawt ang..' tiin paper them ah chuan thil a ziak mial mial a.. min pek hnu chuan kal mai a tum a
'Lawk!!'
'Enge??' tiin a lo hawi let vat a
'Zinga lo hruai tu che kha i bialpa mi??' ka tih chuan kal pahin ' Aw..' tiin min chhang a..
.
.
Khami ni atang khan Mawitei chu ka hnaih tial tial a a mizia ang a ka lo ngaih ang ringawt zawng a ni lo tawp mai. Chu chuan hriatchian zual tir min chak a.. kar khat chhung a rawn kal apiangin a bula lehkha ka zir theih leh theih loh tur thu ka zawh hnu chuan ani chuan zirtawp zan leh inrinni zan apianga a theih thu min hrilh a..
'E chuan zan dar engzat thleng nge kan zir theih ang??' ka han ti a
'Dar 10 thleng a niang chu ka ti mai.. dar 9 hnu lamah chuan nangmah pawn i in en thei nga..'
'Ngatinge??'
'U Nunpuia a lo kal thin a..' ka zawi hnawkin ka hria..
.
.
College ka thlen chuan Ema hnenah chuan ka lehkhabu hawh chu library a min dah pui lawk turin ka sawm a..
'Hmanni a i hawh chiah nilawm ni??'
'Aw mahse ka zir peih lo..' ka lo ti vat a
'Aman chhiar turin a tih che kha..'
'A bulah lehkha ka zir dawn lo.. ho mai mai.. ka zir tha thei dawn chuang lo..' ka lo ti a
'A bialpa neih vang mi??'
'Nang pa hi??'
'Enge?? ka man thiam ve vek lawm..' a rawn tih chuan ka nui ringawt..
'Chuan??' ka han ti a
'Sava thlawk lai nge a fu lai kah thlak awlsam ang??' inla zei tak chuan a han ti a
'A fu lai..' tiin ka lo chhang vat a
'Kha kha nimai lawm.. saw a lo kal..' a tih chuan ka hawi phei vat a
.
A sam sang tak a a tawn chuan a ti lang dang hle a.. a inhmeh hlee!! A Tshirt var thianghlim tak chuan a ti lang eng leh zual a.. a kekawr, a mawi tawk a tight en chuan 'he ti khawp hian a ti maw a lo itawm thei..' ka ti vawng vawng thei dawnin ka hria..
'Zanah 7:30 ah i lo kal dawn nia.. tlai loh tur..' a rawn ti a.. inringtawk takin min kal pel lah lah nghal bawk a..
.
'Zei buai kha tum duh lo la.. a chhan chu engti kawng zawng pawn i zei lo.. amah hrethiam la, zawldawh zawkah tang la nimai..' Ema chuan a rawn ti a
'Ani ang hmeichhia sawn kei ang mipa hi engti kawng zawng mahin min en chung thei lo hrim hrim..' ka thianpa nen chuan kan in en a.. kan ner nang a..
.
.
An in a ka luh chuan Mawitei nu chuan tha deuhin min lo welcome a.. a zirlaipui ka awm chuan Mawitei pawn hma a sawn phah a rin thu te a lo sawi luam a.. nuam ve reuh mai mai tak a ni. Mi mah inlak tlangval nak alaiin high school naupang ho nen kan han thu kuk chu a nia.. a hit vak lo!! Mahse, amah Mawitei pawn inzir tel ve a duh avangin kan thu dun a.. ani chuan min hrilhfiah pah a.. a thusawi ai mah chuan amah chu ka ngaihtuah zawk tlat.
.
Dar 9 a ri a, a nuapang tuition pek ho chu an haw dial a.. kei erawh ka la awm a. Dar 9 a la pel tam loang tihah a bialpa a rawn lut tlat mai.. ani chuan keimah a lo en mai tur chuan min ti a.. thutkhawmna pindan lamah an phei a.
'Hriatchian loh i neih chuan min lo ko mai rawh aw..' a tih chu ka hre kar a.. minute sawm danah velah ka ko ta chhen mai. A hnu phei chuan a bialpa chuan min ning ve ta viau aniang, a rawn phei ve ta ringawt a.
.
Mawitei'n thingpui a lum lai chuan min rawn thut hnaih a..
'In class a inang ti raw..' a rawn ti a
'Aw..' tih chiahin ka chhang..
'Classmate te zirpui ngai khawpin hriat i nei lem lo a ni maw..'
'Mawitei hrilhfiahna chiah hi ka hrethiam a..'ka lo ti ve ngat. Ani chuan za lo tih hriat fahran hian min nuih a.. ka lo nuih let ve mai..
.
.
Kan thian dun chuan Mawitei hnaih chu kan tum nghet bur hi a ni mai. Keichu min be thei mai a, Ema erawh a mil vak lo tih a mitmei atangin a hriat mai.. ngaihtuah chian chuan a awm lutuk tlat.. text tu kha amah emaw a tih piah lamah a hmui seh thi saktu kha a ni miau a. Mahse, ka thianpa dangdai em em sial ve na chu mi zawng zawngin an ngainat theih thin hi a ni.. Mawitei pawn a ngaina vat ang tih hi ka ring tlat..
.
'I bialpa khan enge a thawh a??' Mawitei bula thu pah chuan Ema chuan a ti a
'SBI ah Manager hna a thawk tan chiah..'
'A va upa tawh awm ve..'
'Hmeichhe tan chuan a pawi hleinem mahni aia naupang neih chu..' tiin alo chhang sam et a
'Dikchiah keipawh ni ila ka duh chi.. ti raw Vala..' tiin Ema chuan min lo kheuh zeuh a ka lo ner khum nang a
'Eng ang mipa nge i duh a??" Mawitei bulah chuan a tih zawm zat a..
'Puitling..'
'Nangmah care tu che??'
'Aih.. care ka mawmawh hran lo.. amah tal in enkawl zo se.. zahawm se.. fel se..'
'I tla chiang tawp..' tihin Ema chuan min lo hrilhru zeuh a.. ka nam sawn dawrh!
'Nge aa??' Mawitei chuan a ti a
'Engmah..' kan lo ti rual chiah a
.
.
Zan dar 9:30 a rik chuan ani nen Marginal Propensity to consume tih kan zir mek tih chu ka hriat tawk a ni. Thil dang aia ka rilru tibuaitu a awm tlat, inrinni vawi thum kan zir dunna a ni a, a bialpa a rawn lang miah lo.. Amah chu a ngui riau in ka hre bawk a..
'Tinge i bialpa??' ka han ti a
'Ka hre bik lo..' tih chiahin min chhang a..
'In inhau a mi??' ka han ti leh a
'Aih.. a reh ve tawp..' a thaw hak a
'Pawn varandah ah thu i la.. i peih em??' ka tih chuan a lu a bu nghauh a.. Ka rilru tak chuan che puitling ka in ti ve rap mai..
.
Thli fim thaw heuh heuh chuan min chhem a.. a nuam dangdai ngei mai..
'I la hria em?? kha ka thianpa phone atang a ka lo text che kha..' ka han ti a
'Engtikah??'
'1st sem kan nih kum khan.. kha ka grammar min correct sak vak zan kha..' nui rauh rauh chung chuan ka han ti a
'Kha kha nangmah maw??'
'Aw.. ka thianpa laka phuba lak nan ka ti nih kha..' ka ti a
'I van ti ang lo em em.. i thianpa kha ka haw so bawrh bawrh zel..' a ti a
'Keimah min haw zawk rawh.. a thiam loh engmah awm lo..' ka tih chuan a ngawi reng a. A phone chu a khat tawkin a en a en bawk a..
.
'A lo biak che i nghak a mi??' ka han ti rawih a
'Aw..' za lo tih hriat tak chuan a nui a.. 'Ka tang laklawk in ka hria..'
'Engah maw??'
'A bul atangin i ngaithla duh em??'
'Aw..'
'Ka pian hma in ka nu leh pa an inthen a.. ka nu in theih tawp chhuahin min enkawl chho a. Ka naupan lai chuan hmuhsit ka tawk ve thin.. mahse ka lo thang lian chho a.. hei hi ka hrechhuak a 'Nangmah i indah zahawm a, nangmah leh nangmah i inhmangaih chhung chuan tuman an ti chhe thei lo che..' tih hi. Unau leh chhungkaw pangai ka neih lohna chuan nasa takin khawharna min siam thin a, mahse hun a liam zel chuan khawharna ngei chu ka thian a ni chho a.. lehkha zir hi ka khawhar hnemtu berah ka hmang thin. Inngaihzawnna leh hmangaihna tih vel hi ka ring loa, ka nu kha kalsan a ni miau a.. amah ang nih ve ka duh lo a ni. Mahse, he pa hi ka nunah a lo lut a.. ka thutak theih zia chu i hriat kha, ani chuan fiamthu a thawh reng a.. ka nuihna min siam reng a.. amah hi a hlim reng niin ka hre thin.. Kan mizia a inang lo dun em em a.. ani chu chhungkaw tha tak atanga chawr chhuak tih hriat takin a tlawmngai a, a thiante a ngaipawimawh thiam em em a.. kei erawh chuan keimah ka indah pawimawh ber thin a chhan chu ka tan tuman an hmangaihna dik tak min pek ka ring ngai lo a ni. Mahse, hun enge maw ti lai atang khan a rawn danglam chho a.. engkim a hne thu a sawi a.. keichuan kal tir bak tih theih ka nei lo..' a mittui luang tur chu khap bo tumin a khap fak fak a..
.
.
'Ka tihpalh' tiin ka phun sep a..
'Ngati..??'
'Ema nen khan kan lo ti hreawm thin dawn che em a..' ka ti a
'A pawi lo.. a lem a min ngaihsak tu ai chuan in tha tho tho.. in duhawm ka ti thei lutuk..' tah nui pah deuh chuan a ti a
'Duhawm a??'
'Aw. naupang mawl deuh pahnih inkawm hi in ang thei em alawm..' a tih chuan ka chal dawmin ka kun ngaih aa.. 'He nu hi chu a thlawk emaw.. a fu emaw ka tan chuan kah tlak theih loh hul hual a ni' tiin ka inngaihtuah a..
'Enge nih i tum??' ka han ti ringawt a
'Ahh.. IES nih ka tum.. nang??'
'Pasal tha deuh..' ka tih chuan za takin a rawn nui a.. Mawi Chapo-i a ni thin tih ka lo theinghilh hman tep alawm le..
.
Chu mi zan ka haw chuan ka va call  a.. a that leh that loh thu ka zawh chuan a tha vak lo a nih hmel
'Ka hre lo..' tih chiahin min chhang a..
'Ka zai sak ang che i duh em??' ka ti chuan a nui hak a
'I zai ngai mi??'
'Aih.. mipui hma a zai tlak ka nih loh vang ania nangma bulah zai ka duh..' ka ti a
'Umm zai rawh le..' a rawn ti a.. Ka thiam ang angin melt the snow ka zai sak a.. ka zai sak chhan hrethiam tak ang maw..
.
Khami kartawp kha chu kan kan inbe deuh char char a, ani pawn min ngaina ve hle in ka hria.. chu chuan tlemin inrintawkna min pe ve deuh. Ka ngaihtuah hian engtin nge ka duh tan ngawt le ka ti thin.. mahse tunah rih chuan amah ah hmun ka chan ka inring hlawl lo a ni.
.
.
Kar thar a rawn in her chhuak a, class pawh kan tan ve leh tawh a.  A ruk hian Mawitei hi ka ngaihtuah thei em em a.. hmai chhana han inzawh tawp erawh ka hreh thin. Kartawp ni vat vat se, a bulah lehkha zirin kan pahnih chiah in awm ila ka theih ang ang a hnem chu ka thil duh ber a ni. Zanah chuan text ka tum thin a, a last seen a rei tawh em avangin ka thulh ziah bawk a.. call chi zia zangah ka hre bawk si lo..
.
Nilai thawhtan zan a ni a, inbual zawh a Ema te in a games khelh ka rilruk a.. ka inbual lai chuan ka rilru ah Mawitei bak a awm lo.. ka inbual laklawh lai chuan ka harh chhuak phut towel veng chuan ka pindan lam ka pan a..
'Enga ti leu luau nge.. i lu a la phawn vek kha??' ka nu in a rawn tih chuan ka lu ka khawih a.. shampoo a ka chiah ka la tleuh lo tih ka hrechhuak chiah..  ka nu thleng silna ah chuan ka lu chu ka zuk rawlh a.. 'Lawk rei loang' ka han ti a
'A va han tul lo tak.. bathroom ah va ti mai ta che.. khung khu ei tur suahna nih khu..i luphut nawi te kha ei leh i duh mi??' ka nu in a tih pawh chu ngaipawimawh loin ka sam su ka nuai char char a.. A fai awm tawk vel a ka hriat ah chuan ka kal ta a.
.
Ka phone chu ka la a.. Mawi chapo-i tih a ka save chu ka han call a.. vawikhat na ah chuan a pick up lo.. ka dial leh.. a la thei hram
'Hello..' a aw atang chuan tap a ang ka ti..
'Ngatinge??'
'Enge??'
'I tap a mi??'
'Teuuuhhhh lo..' a tap tih ka hrethiam nghal..
'Ka lo kal dawn..' tiin ka han dah hmak a.
.
Ka chhuak chiah.. ka helmet la in ka let leh.. Ka awmdan chu ka over mah mah em aw tih ka ngaihtuah.. An in ka thlen chuan ka han in sawi pawr ve tehreng nen ka zum daww mai. Ka luh chuan an nufa in TV an lo en a..
'Ehe.. i lo kal tak tak elaw??' Mawitei'n a tih chuan a pik hmel hle a..
'Aww.. i dam lo mi??' tih pahin ka han thu a
'Nimin tang khan ka pik deuh a..' a tih chuan ka zak lutuk chu awm ngaihna ka hre lo.. a tap emaw tiin ka va tlan ve vang vang a ni sia..
'Damdawi i ei em??'
'Aih ei lo..'
.
Sawi tur ka hriat tawh thlawt loh avang chuan ka ngawi ta ringawt a. A hnu rei vak loah a nu chu mu turin pindan lam a kal a..
'Ngatinge college a min hmuh hian i men zawk zawk zel aa??' a rawn tih chuan ka phu deuh zawk
'Awihawm loh lutuk' ka lo ti vak a
'A nih kha.. min be dawn maw ka tih te hian i kal daih zel..' a tih chuan ka nui ringawt
'I tap emaw ka tia..' ka ti a
'Engvang ngawt in??'
'I bialpa in a duh tawh bawk si lo che a..' ka tih chuan a nui hak a
'Min duh tawh loh ber te chuan tahna chhan tur awm mi??'
'Nia tap tawh miah suh..' ka ti ve ngawt a
.
Thingpui siam tura choka lam a pan lai chuan hnunglam varandah ah chuan ka lo awm a.. ani chu rawn chhuak ve in thingpui min rawn pe a..
'He lai hi nuam i ti tlatin ka hria..' a rawn ti a
'Khawi lai maw??'
'Hei balcony hi'
'Nangmah nen zel a kan awmdun vang aniang..' aw ka zei ve dawn tanin ka hria
'Hehe.. awm ang ve thei..' tih a a phun sep ri chuan min ti zak hle..
'Thil ka zawt ang che aw..'
'Um..'
'Keimah chiah mipa khawvelah awm i la min duh angem??' ka tih chuan a hriatthiam loh hmel hle a
'Ngati maw??'
'A chhan chu i mipa duhzawng ang mizia pakhat mah ka nei si loa..' ka tih chuan min en reng a
'Mahse nangmah chiah i awm si loa..' a rawn ti a
'Nia ti raw..' ka ti ringawt.. he sava dangdai tak hi ka perh thlak theih ka ring ngai lo reng a ni
'Ka duhzawng thlak turin min duh tihna a mi??' a rawn ti a
'Duh pawh ni ila i ti dawn si loa..' ka ti a
'Val..'
'Umm'
'Ka lawm e..'
'Ngatimaw??'
'Mi dik tak ka tawng che a.. thian tha tak i ni..' a tih chuan ka nuih zeuh a
'Thian chauh lo pawh i tan chuan ka ni thei tih i hria ti raw..' ka ti a
'Engtinnge i thianpa hmangin min bawl leh lo a ni tih ka hriat theih ang??
'Aww.. hre rei hle mai.. keimah Lalramsanga ngei ka ni..' tiin ka chalah ka va tauh zeuh a.. a lo nui seih a..
'Anih chuan tum la..'
.
.
Ka awmdan danglam chak zia chu keimah ngei pawn ka hria.. tun thla chu a bialpa ka nih theih leh theih loh interview ka nei char char a ka fel ber thla a ni hial ang. Ema lah chuan a hmui vawikhat a lo tem tawh avangin kiss dan tur te min hrilh khanglang.. kha mi tum a ka lo chak kha ka inchhir rum rum thin, ka thiantha berin ka hmeichhe duh ber kei aiin a fawp hmasa tlat a..
.
'Hett Lalramsanga no cell phone during study hours' kawngka a lut pah chuan a rawn ti a, School naupang ho chuan min han nuih ve khanglang hlawm bawk a
'Ka dah.. ka dah..' tih pah chuan ka han dah a.. Chu veleh ani chuan rang fahranin a rawn la a
'Hett Zonunmawii a neitu phalna lo in mi phone khawih loh tur..' ka lo ti vat a
'Bleeehh..' kan nui ho dar dar a..
.
Naupang ho an haw hnu chuan pawn ah kan pahnihin kan thu dun leh a.. a hmel ka en a, a hlim tih ka hriat hian keipawh thinlung takin ka hlim a ni.
'Mawi chapo..'
'Heyy tikhan min ti ve ziah suh..'
'I han sual theih zia kha..' ka han ti a
'Ka laka sual te chungah bak ka sual ngai lo..' tih pah chuan min rawn nuih seih a
'Mawl hi a sim theih i tih kha i la hria em??'
'Tehreng mai..'
'Ka simin i hria em??'
'Sim em hi ka bulah i awm tam a.. Ema pawh hi keimah ang zawnpui tur a ni..' a tih chuan kan nui dun nasa hle a.. A nuih laklawh lai chuan a biangah dimte in ka chul a,  amah chu ka va thut hnaih te te a.. 'Ka mawi duhawm hmeltha te..' ka tih chuan a nui hak a.. Ka hmui chuan a hmui no tak chu ka va chuktuah a, duhthawh leh uar zet in  thlifim thaw heuh heuh karah chuan kan infawp vawng vawng aa..
.
.
Hmeichhe mizia a awm thei pawh a ka rin loh hmeichhe chapo leh inringtawk lah mai, huat namen loa ka huat chu ka tum ang ngeiin a chak lohna ka hmu chiang hle a ni. Mahse, a chak lohna chuan ka thinlung a hmin hneh em em thung a.. Tichuan, Mawi chapo-i chu Ka Mawi duhawm hmeltha-i a lo ni ta a..
.
>>>>A TAWP TAAAA<<<<<