KOŞULSUZ SEVGİ 1-8

KOŞULSUZ SEVGİ

***RENGPUII GUITE***

CHAPTER -1

MELISA INCE

Cabin no.31B  atanga chhuah pah chuan nasa takin tap chhuak lo turin ka insum a. Khawnge ka panna tur lam ber pawh ngaihtuah chiang lo chuan ka pen hlawk hlawk a, ka hlau takzet a ni. Ka ngaihbel nge ka hre lo, ka kalna hual vel atang chuan na tuar thawm leh tap thawm chuan min zui tlata hriatna chu ka nei bawk a. Thawk na chang ka hre tawk chauh a ni!

Ni hnih kalta atanga vawiin ni thleng hian Neolife Oncology Centre, Instanbul, Turkey rama Cancer hospital lian ber chuan chanchin lawmawm loh tak a la nei tluang zel a, chu chuan Europe ram pumpui a fang chhuak a ni ber e. He chanchin, midang tana na tak hi tu emaw tan chuan chanchinbu a thu thar langsar tak chhuah nana hun tha niin, TV Station a thawk tana mipui hiptu ber chanchin puanna hun tha ni mahse a tuar mektu tan erawh sawi fiah thiam phak baka na a ni thung.

He Cancer Hospitalah hian Cancer natna in a tlak buak mek avanga inenkawl ngai mi 300 chuang zet awm reng ang an ni a, chung zingah chuan min hringtu, ka nu ngei pawh a awm ve a ni. Thla nga kalta khan ka nu hian Pumpui Cancer a nei tih hriatchhuah a ni a, chu mi rual chuan he damdawiin ah hian kan lut nghal a. Thla khat hnu ah zai niin zai dam mai theih a nih lo tih hriat chhoh zel a ni a. Zai a tawh atanga thla hnih hnuah chemoradiation treatment la chhunzawm turin helai hmunah hian kan awm ta reng rih a ni.

Engvanga ni hnih kalta atanga he damdawiin a awm zinga chemotherapy treatment leh radiation therapy treatment la zinga mite chu zual lam pan vak nge an nih tih chu zawhna tam tak siamtu a ni a. Chu mai nilo in damlo panga meuhin nunna an chan bawk a ni. He damdawiin ah hian thihna hi a mikhual lo hle tih chu mi zawng zawng hriat ni mah se hetiang ang thil thleng erawh hi chuan a tu a te pawh mi a thawng em em vek a. Damdawiin lama thawkte pawn a ngaihna an hre bik loa, dam lo leh dam lo chhungte ngat phei chu min tihrilhhai hle  a ni.

“Melisa, he tah enge I tih?” tih tawng thawm chuan ka ngaihtuahna muk tak atang chuan min kai harh zawk a

“Adem..” sawi mai tur pawh hre lo chuan ka ngawi vang vang a

“Ni hnih kalta atang khan  Pharmacutical Industry lam  atanga damdawi rawn thlen belh an hmang tan chiah a ni awm e..”

“A awmzia chu damdawi siam chhuaktu lam company dik loh vang maw?”

“A ni maithei. Mahse, thil chiang a la awm lo. Tumah engmah lo la hrilh suh, hei chu kan Hospital lam buaina liau liau a nia..” Adema’n a tih chuan a thutak hmel  hle a, a rilru a hah tih pawh a hriat reng a ni. Ani hi he hospital-a intern ti lai mek chauh ni mahse kei leh ka nu tan chuan Doctor leh nurse tam zawk ai pawha mi tangkai tak a ni.

“Ka nu dinhmun saw?” aw lawi lek lek chuan ka han ti chhuak leh a

“Ka sawi thei mai lo Melisa. Dr.Necmi lo thlen velah biak ka lo tum ang, khawngaihin hahdam tum rawh..” tiin min kalsan ta a.

Ka nu awmna Cabin lam panin ka let leh ta hnak hnak a, ka luh chuan a lo muhil a, a bulah ka cousin Natascha chu a lo thu ngui bur reuh a.

“I chau em?” tih pah chuan tui bottle chu banin ka hawng a, tui chu ka lem ri khawlh khawlh a

“Ka tha, nangmah zawk kha..”

“Ka tha alawm.. nachhawkna in a chhawkna a rei tawh em?” ka han ti a

“Aih, la rei chiah lo. Englo Lisa, Rodo hi I nu chanchin I hrilh a ngaiin ka hria..” a tih chuan ka ngawi deuh vang vang phawt a, thawk ka han la vak a..

“Hria pawh ni se a rawn kal loang, ka nu a hua alawm..”

“Mahse a nu a ni ve tho alawm. Tunah phei chuan I pa, an inkar chhiatna chhan ber a awm tawh loa, in inkar siam that hi hun I ti ve lo a mi?” a ti a

“A naupang zawk ka ni a, unaupa ka mamawh zia chu hrethiam tur a ni zawk asin Nat. Mahse, a unaunu hi engmah a hriatpui duh lo alawm..” ka tih chuan ka mittui chu a rawn hnam tiam a, ka insut faih faih a

“Kum 23 I ni ve tawh a, naupangchhia em em I ni tawh miah lo ania..”

“Ka nu vanga ka channa ah hian ka vui lo. I hria em Nat, University ka chawlhsan a ngaih khan Rodo ka ngai takzet! Ani chuan engtin emaw tih dan a hriat ka ring tlat a mahse awmzia a awm lo” tiin ka tah chhunzawm nghal a, ani chuan min rawn kuah vatin duat takin min chul a.

Kum tam tak liam ta kha chuan in pakhatah ka pa, ka nu, ka U Rodo leh kei hlim takin kan cheng ho thin kha a ni a, tu chhungkaw dang mah kan awt ngai bik hauh lo.  Ka pa khan Construction company ah Engineering  hna a thawk thin a, ka nu erawh chuan  Café lian vak lo hawngin a ei siam tui tak tak hmangin a sumdawng thin a ni. Rodo hi kei aiin kum riat teh meuh in a upa a, ka unau neih chhun liau liau a ni a, ka ngaina takzet! Ani erawh kha chuan a tih fuh hunlai te bakin mi a kawm ngeih duh ngai meuh lo. Vawi tam tak min vel tap thin a, ka nu leh pa bula ka zualko chang chuan ka nu chuan hrethiam turin min ti fova, ka pa erawh kha chuan engmah a sawi ngai lo.

Kum 8 mi ka nih chuan Rodo chu rawlthar pangai tak a ni chho tawh a. A rawlthar rilru a ni ang chu, a hma aiin min mil lo lehzual. Vawi tam tak ka nu nen an inhau a, chu chuan min tihlauthawng thin hle a ni. A chang chuan ka pa call mai te chu ka duh rum rum thin a, mahse buaina tam zawk a thlen hlauhna kha ka nei thiam vet lat thin a ni.

Engvanga ka pa leh Rodo kha kei leh ka pa kan infiam anga an infiam ve ngai miah lo tih kha ka nu ka zawt fo thin a, ani chuan engmah a sawi ngai lo. Ka rawn thang lian ve telh telh a, thil ka hrethiam chho ve zel bawk a. Chu tah chuan kan inchhung boruak rip zia chu ka rawn hre chho ve ta a ni.

Ka kum 14 tlinna pianchampha nikhat chiahin min dang tawh tihah chuan ka helhhawlh lutuk chu zanah ka muhil thei loa, ka za cheng mai. Thil pakhat schoola ka thiannu min hrilh, Birthday lo thlen dawn hma zana arsi sawm chhiar a, duhthu samin a tleng dik duh a tih chu ka hrechhuak zawk a. Dar zat ka en chuan dar 11:18 a ri tawh a. Ka chhungten ka thawm an hriat hlau takin ka han tho a, ka room bul balcony ah chhuakin vana arsi pe un zinga sawm chu uluk takin ka chhiar a. Ka chhiar zawh chuan ka mitchhingin ka duhthusam sawi chuan ka phun melh melh a. Chu tih lai tak chuan thlang lama thawm chuan min ti phu chiang hle a, ka meng chuang hle!

Rang takin ka han en  thla a

“Rodo!!”

Hmanhmawh lutuk in inhnuai lam panin ka tlan thla a. Kawngkapui chu hawngin pawna Rodo a bike nen a lo let reng chu ka han pan vat a.

“U! Rodo! I tha em?”

“Umm..” tih chiahin min chhang a, zu rim a nam huam bawk a

“Ka nu leh pa ka ko dawn..” tiin ka tho a

“A ngai lo Melisa”

“I tluk kha..  anih khawi ka kaitho ang che..” tiin tun thawh ka han tum ve bawk a, ka zo lo chiang hle.

“Lut mai teh! Tangkai lo lutuk..” tiin a phun nuah nuah a

“A pa ka ko dawn..”

“I pa kha ka hmu duh lo..” a tan leh dawn ta!

“Tikhan ti ziah suh Rodo..”

Thei leh thei loin a rawn che chhuak a, pai chawn chawn chungin a rawn ding kang ve ak ak a, mahse rei pawh ding loin a thu leh ta hnawk a.

“Melisa ka pa ka ngai..”

“Maw.. lut ang, ka birthday a ni tep tawh ania..” pangchang aw tak chuan ka ti a

“I hlim a mi?” chang fak chuan min ti a

“Aw..”

“I birthday  hi ka tan chuan anchhia..”

Vawi tam tak a rui ka hmu tawh a mahse hetiang hian a la awm ngai lo. Min be lo mai a, awm ve lo ang maiin min ngai thin. A chang chuan a tan hian engmah ka ni lo ve lo a mi le ka ti rilru hial thin. Ka nu nen nasa takin inhau thin mahse ka pa nen erawh an inbiak ve ka hriat chhun pawh a rul tawk te te bak a ni ngai lo. A chhan ka ngaihtuah chuan Rodo hian College a kal tha peih loa, rui chungin a rawn haw bawk thin tih bak puh tur dang ka hre lo a ni.

“Nu.. Rodo uanupa hian ka piancham hi a tan anchhia  a ni a tia..” ka tih chuan ka nu chu a ngawi reng a

“Nu.. Rodo hi ka pa fa a ni ve lo a mi?”

“Lisa bawihte, kum 14 I ni ve tawh a, thil hi I hrethiam tawh viau ti raw..” ka nu chuan nem tak chuan a ti a

“Um.. nula ka ni tep tawh alawm..” tiin ka chhang a

“I pa nen kan innei hma hian Rodo pa nen kan inneih a”

“A awmzia chu ka pa fa a ni ve lo maw?” mak ti tak chuan  ka lo ti a

“Aw ni ve lo. Rodo kum 7 mi anih in a pa chuan min boralsan a, I pian champha leh a thih cham a inang chiah a ni. Mak pawh I ti viau maithei a, I pa leh Rodo pa kha thian tha tak an ni thin a, ani chuan ka dinhmun chu min hrethiamin   kei leh Rodo hi he in nuam taka nuamsa taka cheng turin min hruai lut ta alawm..”

Engmah ka sawi lo mahse  ka rilru ah erawh thil tam tak min ngaihtuah tir  a ni. Rodo dinhmun pawh ka hrethiam tawh takzet! Kha tih hun chhung zawng khan amah te in khawhar takin a lo awm thin a ni maw.. A la naupang viau na in a natna erawh chu a naupan at na in a theihnghilh tir bik hauh si loa.

“Rodo..”

“Ngati nge kawngkhar kik hmasak loha I lo luh a?”

“Ka tihpalh.. englo?” ka ti a

“Enge?”

“Ka hre lo.. ih englo.. thian kan ni thei angem?” bah nuai chuan ka ti a

“I a nih kha melisa.. chhuak rawh”

“Ka a lo.. kawm hlim che ka tum mai a lawm..”

“Enge I hriat a nang hi..”

Vawi tam tak a roomah kik hmasa loin ka lut a, ani chuan min hauh pawh a tum buai peih tawh lo. A hmel ka en chang apiang hian natna hi ka hmu tlat hian ka hre thin. Mahse, a hma zawng ai chuan kan inkawm ngeih tawh viau a ni.

Rodo final exam hun a lo thleng a, tun exam hi a chhuah huanah chuan a graduate tawh dawn a ni. Zanah lehkha a zir rei deuh thin avangin ka nu nen a eitur kan siam sak a, ka nu erawh chuan keima siam anga sawi tur chuan min ti a, arukin kan nui nasa dun hle.

A pindan pawh kik hmasa lo chuan eitur keng chungin ka lut a. Ka thawm a hriat veleh ani chuan a mit a nuai nawk nawk a, a tawp hmel ka vawi khat hmuhna a ni.

“Rodo.. I eitur ka lo ken sak che a..” hre lo der anga awm chuan ka han ti a

“Lisa..”  thawk a han la vak a

“Um.. I thiam tam tawh em?”

“Lisa, ka tel loin I awm thei a ngem?” a tih chuan mak ka ti em  em a

“Enge awmzia?”

“In hi ka chhuahsan dawn Lisa..”

“Enge I sawi awmzia?”

“Helai hmun hi ka awmna tur a ni ve lo Bawihi. He thu hi kan inkar thu ni rawh se aw.. En teh ka vin vak vak thin vang che khan min ngaidam thei em?” nui lui tih hriat tak hmel a pu a. Ka unaupa mah ni se a hmelthat zia chu tuman an hai bik loang, a nuih ngai lohna te nen. Hmeichhe tam tak chuan cool tiin an sawi thin, a nuih mai mai ngai loh avangin! Mahse, keichuan a phen a thil awm hi chiang takin ka hmu a ni.

“I hlim reng dawn chuan. Mahse, pawisa I nei a mi?”

“Um.. ka pa min hrilh angin a thiantha ber ka zawng chhuak tawh alawm. Ani hnenah chuan ka thil tur a awm anih hmel” a ti a

“Rodo, I pa chu a hmel a tha ngawt ang..”

“Nia, a hmel a tha lutuk, pa tha tak a ni bawk..  a rilru hliam a nih hma zawng kha chuan!”

Zawh belha hriat chian ka chak takzet! Mahse hun tha  a niin ka hriat loh mai bakah naupang tawngkam maiin han zawh mai dan ka hre lo a ni. Keichuan a hlimna a nih dawn phawt chuan khawi hmunah pawh awm se pawi ka ti lo, a chhan ber chu ka hre hauh lo mahse a n alai hmuh reng ka duh tawh lo a ni.

“In hi ka chhuahsan dawn..” zanriah kil ho lai chuan Rodo chuan a rawn ti chhuak a

“Rodo, fiamthu na chi ah I ngai a mi?” ka nu chuan a lo ti vat a, ka pa mitmei a veng tih pawh a hmel atangin ka man thiam nghal vek bawk

“Ka fiamthu lo. Ka graduate thlenga min enkawl avangin ka lawm e..” tiin a tho a

“Rodoslav thu rawh!” ka pa chuan chang fakin a rawn ti a

“Naktuk ah ka chhuak ang!” Rodo chuan ngai pawimawh lo tih hrit tak chuan a ti a

“Ince chhungkaw mi leh sa I ni a, I duh duh huna chhuaka lut theiah I inngai a mi?”

“Ka rawn lut tawh loang ka tiam a che u. Chuan Haralanov thisen kai ka ni e, Ince nen inzawmna kan nei tawh lo..” a sawi zawh rual chuan ka nu chu va kal hnaiin Rodo hnaiah chuan a beng a

“Nu..” tiin ka lo te tuar a

“I roomah chho rawh Melisa” ka pa in a tih chuan ka kal a mahse chho lo chuan an inhau thawm chu ka ngaithla lui a..

“He thu hi sawi ka duh lo viau thin. Mahse, ka pa khan in pahniha in chet dan zawng zawng kha a hmu a, a hre vek asin! Zu a in ngai lo, in hria mahse in pahnih chet tenawm lutuk vang leh mahni hmasial vangin ka pa kha ka chan a sin. Engtikah mah in pahnih hian ka ngaidam ngai loang che u” tiin tap aw deuh ruai chuan Rodo chu a au chiam chiam a.

Kum riat liam ta daih a thil thleng daih tawh ni mahse engkim kha ka la hre vek a ni. Kum thum hnu lawk a ka pa, an hotel sak lai atanga an chetsual avanga ka chan tak ten en khan engmah theihnghilh ka nei lo. Ka nun hi mangchhia ang mai a ni. Lehkha ka ti thei viau a, College tha tak atangin grade sang tak nen ka graduate a. Vanneihthlak takin ka University duhna ber ka zawm thei a. ‘Ti hi chuan ka nu hi nuamsa takin ka la dah thei ang’ tiin ka ngaihtuah a mahse engkim a dang vek si. Ka nu natna hriatchhuah a nih hnu chuan hna ka thawh a ngai a. Hmun hrang hrangah lehkha zirtir hna thawkin mut pawh ka mu hman ngai meuh lo. Ka nu leh pate’n Rodo leh a pa chunga an thil tih rah kha ka seng tihna em ni tiin ka inzawh phah hial thin.

“Khung ho motor zozai khu khawi lam atanga rawn kal nge a?” tiin Adem chu ka han zawt a

“Elmas Pharmaceutical Industry atanga rawn kal te an nih khu. Turkey ah chuan anni company hi damdawi siam chhuaktu tha ber an nia. Chuan, helai damdawiin a damdawi tam zawk hi an company siam chhuah ani..”

“Ka hre lo le. Damdawiin dang atang hian thu thar engmah hriat a ni rih si loa..” tiin min chhang a

“Melisa damdawi lei tura ka tih che kha I lei em?” Adema’n a rawn tih chuan ka lu chu ka dawm vang vang a

“Ka tihpalh! Ka lo mangnghilh daih a Doctor..” ka tih chuan a nui vur vur reuh a

“Doctor in a hriat hma in zuk lei vat rawh..” a tih chuan ka wallet la in ka chhuak nghal a.

Pharmacy lam pana ka pen dawn lai tak chuan Doctor  a thu tak tak pawl leh Damdawi siam chhuaktu lam company atanga rawn kal niawm tak chuan min kal pel a, ka mi hmuh chuan min hawt let tir rang hle!

“RODO!”

Lalpa leh kum tam tak hnu ah ka hmuh leh hi ka ring thei lo. A hmel chu a that ngaiin a la tha reng a mahse khabe hmul te a lo zuah buk deuh nuai tawh a. Engmah ka ngaihtuah chang tawh lo, ani chu panin a awmah ka bei thlawp a ka tap nghal char char a..

“Khawngaihin min lo hrethiam lawk ta che u, conference hall ah ka rawn kal ang..” tiin Rodo chuan midang chu a hrilh a, kei erawh chu ka awmdan ngai rengin ka awm a

“Aw.. Lisa” tiin ka sam chu a chul a

“Lo va phei rawh” tia a bula awm a biak lai chuan ka kuahna chu phelhin a bul setah chuan ka ding tha a. A bulah chuan tlangval la thalai tak, hmel fai veng leh sang tha thlerh thlawrh tak mai, Rodo tan pawh a chho en ngai chu thutak hmel fe hian a lo ding a

“Kan kal vat a ngai..” chu pa chuan a rawn ti a

“Ngati nge he tah ka hmuh che?” chu pa thu sawi chu ngaihsak awm pawh a lang lo chuan Rodo chuan min han zawt a

“Ih.. englo, Rodo ka nu” ka sawi zawm thei lawk a, ka chil chu ka lem ri kalh a

“Khawngaihin kan hmanhmawh thei em?” chu tlangval chuan a rawn ti leh a

“Ibrahim, khawngaihin.. hei hi ka hmeichhe hrilh thin che kha anih hi..” Rodo chuan a ti a

“Romantic scene siam nan hun kan nei lo. Kan dam khaw chhuah na tur thil anih hi” chu pa chuan chang fak hian a rawn chhang a. An thusawi chu ka hrethiam lo telh telh mai.

“Lisa, hei ka card hi la la, ka number ah hian message ilo hnutchhiah dawn nia, ka hman velah ka lo bia ang che..” tiin a card chu min pe a, ka lu ka lo bu nghauh a. An kal ta a.

“Lawk Rodo..” an pahnih chuan an rawn hawi let a

“Min kalsan tawh suh aw..” ka tih chuan a lu bu nghauh pahin a mit a chhing a, a bula tlangval hmeltha tak lo ding ve erawh chuan nuih sawh ti tih hmel pu in min en thung a.

 

KOŞULSUZ SEVGİ

***RENGPUII GUITE***

CHAPTER -2

RODOSLAV HARALANOV

A vawi hnihna atan  Neolife Oncology Centre lam nena kan meeting  neih  chu kan han tan leh a. Ka taksa chu chu conference hall ah chuan thu ve ran mahse ka rilru erawh minute sawm kalta lawka ka awma thlamuang taka bei, kum kua lai mai ka hmuh tawh loh ka nau Lisa bulah a awm reng thung.  A naupang hmel paih tawhin nula tak tak hmel pu tawh mahse a landan atang kha chuan nantna khirhkhan tak vei ang maiin a dang bel a, ei tha hmuh lo ang maiin a chak lo tih a hriat a ni.

“Ani khan Cancer a vei tihna a mi le?”

Ni lo! Thil theih a ni lo! Chutiang vei tur atan chuan ala naupang lutuk. Chu lo rengah eng ang kumzat pawh ni rawh se, ani khan heng ang natna a neih ve hi ka phal lo a ni.

Lisa! Ani kha ka pa leh Ibrahim tih loah chuan ka mi ngainat ber a ni. Ka ngainatna ka tih lan ngai lohna erawh kha chuan a lakah nasa takin inthiam lohna min siam fo thin. Kha tih hunlaia ka dinhmunah khan midang ding ve ta se Lisa kha an ngainatna an ti lang angem..

A rawn pian tirh kha chuan ka lawmin ka ngaina ve viau a, u ni hliah hliah khan ka inhre thin. Mahse, ka rawn thang lian a. Ka tetlai hunte kha avaiin hre kilh kelh lo mahila ka hriatchhuah chhun tlemte khan amah hringtu a nu leh a pa huatna kha min siam nasa thin em a tin a ni. Kha ka nu leh a bialpa, ka pa awm loh laia kan inchhung ngeia an chet dan thin zawng zawng te kha ka mitin ka hmu reng a, a hunlai khan hrethiam vek lo mahila thil dik lo an ti a ni tih erawh ka thinglung khan a hre chiang thin hle a ni.

Thil ka hriatthiam ve tak tak hnu khan ka pa boral ta dinhmun kha nasa takin ka ngaihtuahpui thin a. A thiantha tak anga a ngaih leh a nupui hmangaih em em te khan a rukin an bum reng a, amah lam reng reng an ngaihtuah pha ngai lo anih kha.

“Pa, a pate Necmi-a  kan inah a rawn kal a, in khumah a nu nen an awm asin” tiin vawi khat chu a bulah ka sawi a

“Kan in pawh I pate-a in ang tho ania lawm Bawiha” tiin ani chuan min hrilh mai a, engkim tha vekah keichuan ka ngai leh mai thin.

Mahse, hun a kal zel a, ka pa thaw ip pik lutuk chuan zu a in tan a, rei lo te ah a ngawl a vei zui nghal a, hna pawh a thawk thei lo thuai a ni. Ka nu ngai thei lo chuan pindan hranah a insawn san a, ka pa erawh chu a pindanah zu a in zawm char char thin. A hunlai khan ka pa ka dem a, a chhan chu zu that lohna chiah ka hria a, a chhan ka ngaihtuah thiam pha tlat lo a ni.

Ka pa zu ruia a chahthlak laite chuan a thian tha tak anga a chhal ‘Pate.. pate’ tih a ka koh thin chu rawn kalin ka nu nen an awmdun fo thin. Ka nu chuan ka pa in a zu rui buaina siam a hlauh avangin ka pate-a chu a ko tiin min hrilh thin a, lo awih ve mai bak tih theih ka nei lo, awih lo pawh ni ila engmah ka ti thei si loa. Mahse, mak tak maiin pate Necmi ka ngainatna kha a bo telh telh a,ani hlatah khan awm ka tum ran thin.

Ka nun kha naupang dang lakah a dang bik em em a, school kal chakna ka nei loa, in a awm chakna ka nei hek lo. A rukin ka tap fova, ka tah chhan pawh ka hre ngai chuang lo. Ka pa ka chan tak hnu ngat phei chuan engmah nei lo ang maiin ka inngai thin. Ka pa a chak loh tak tak hnu chuan a khum bulah ka tal chawt a, ani chuan awm ve tawh lo tur ang mai hian ka awmdan tur min hrilh a, ngaihdam min dil fo thin.

Vawi khat chu a damdawi ei lai bih ngur ngur pah chuan min ko a,

“Bawiha helai hi I chhiar thiam em?” a ti a

“Elmas Pharmaceutical Company” tiin ka lo chhiar vat a

“He damdawi siam chhuahna hmun hi Istanbul ah a awm a, Marmaris atang hian a hla hran lo.  Chu lai hmun hi  ka thiantha ber awmna a nia..” tiin min hrilh a

“Pate Necmi ai pawh a I thian tha a mi?” ka tih chuan a nui huk a

“Pate Necmi chu I nu thian tha ber a ni thin a, I nu vanga inhria alawm kan nih”

“Helai hmunah hian I kal dawn a mi a pa?” tiin ka zawt a

“Dawn loa Bawiha. He damdawi siam chhuahna hmun hming hi hre reng tlat la, nakina ila awmna hmun tur anih hi.” tih chiah chu a sawi a ni.

Ka pa boral atanga thla khat pawh ral loah ka nu chuan nun bul tan that a duh thu sawiin ka pate-a in lamah min luhpui a, an innei tih pawh ka hrethiam lo. Mahse, nitin a hma a ka pa nen an hlimdun thin hunlaia an awmdun ang chiah chuan an infawp a, an inkuah a, an nui dun har har ka hmuh chuan nupa an ang ka ti thin hle a ni.

Nitin chuan ka nun a ruak telh telh a, in leh pawn lamah pawh ka tawng ngai meuh lo. Mi thenkhat phei chuan rilru kim lo angte hialin min sawi a, schoolah te min chhaih nawmnah fo thin. Vawi khat chu kan class a mi pakhatin a bag a min vuak vak vak lai chu kan teacher pakhatin min rawn hmu fuh a, ka chhungte a ko ta a.

Staff roomah chuan ka chhungte lo kal nghakin ka thu ran a, a hnu rei vak loah ka nu leh ka pate Necmi-a an rawn thleng a

“A nu ka nia..” ka nu in a ti a

“Kei hi a pa ka nia” tiin pate Necmi chuan a sawi bawk a

Kan teacher leh ka nu leh patea ho in kan thu a, an ni chuan min tih thin dan zawng zawng min zawt a, engmah ka sawi duh lo, sawi pawh ka tum hran lo. Mahse, pate Necmi chu ka bulah a lo thu a

“Bawiha, engkim sawi vek rawh I pa ka awm alawm.. apa in tumah a hlau lo” a tih chuan Pa ka mamawh zia ka inhrechhuak a ni chek ang, ka tap ta vak mai a. Ka tap chu ani chuan min thlem a, engkim ka sawi chhuak a, ka nu chuan inthiam loh hmel takin ngaihdam min dil mawlh mawlh bawk a.

Kha mi ni atang khan chhungkaw pangai tak angin kan nung chho a, anni chuan a hma aiin min ngaihsak a keipawn nuam ka ti chho viau a ni. Kum khat dawn a ral leh meuh chuan ka pa ngaihna ka nei tawh loa, naupang dang ang maiin ka nun ka hmang chho a. Tin, pate Necmi pawh ‘Pa’ tiin ka ko ve ta hial a ni.

Rei lote hnu ah ka nau Melisa Ince chu a lo piang a, kan lawm chhungkua viau nghe nghe. Ka pa chuan ka bulah chuan ‘Vantirkohin I pa aiah I nau hi a lo tir anih hi, vawiin ang kum hmasa ah khan Pathian in min laksak daih a’ ti a min hrilh chuan chu naute chu ka lawm zual phah hle a, a khat tawkin ka nau hmel en turin a bulah ka kal ziah thin.

“Rodo, heng thlalak ho hi dah bo rawh, I nau hmun tinah a vak kual ve thei tawh si a..” ka nu chuan ka pa thlalak ka rooma awm chu a lo la thla vek chu niin! ‘Enge pawina a neih le?’ tih chu ka ngaihtuahna a ni. A hma te kha chuan a pasal ngei khan frame nalh takah min dah sak thin kha a ni si a, engmah ka hrethiam lo.

Lisa a rawn thang lian telh telh a, ngaihtuahna ka hmang chho ve nasa tulh tulh bawk. Tlem te te chauh ka hriatchhuahna chuan zawhna tak tak ka thinlungah min siam a. Ka pa hriatreng theihna thil zawng zawng chuhsak a hal ral sak ka nih ngat phei kha chuan thil dik lo ti ang maiah ka inngai a ni. Chu chuan nasa takin ka mizia a thlak leh a, Lisa ngei pawh ka hnaih duh lo fova, ka tina dawn ang tlata inngaihna min neih tir a ni.

Vawi tam tak ka nu chu thil awmzia zawh ka tum a mahse tan mai dan ka hre lo. Thil pakhat ka pa min chah hriat chian em em ka nei a, chu chu Elmas Pharmaceutical Company tih chiah a ni. Khawnge a awmna dik tak hmuh chhuah tumin Internet ah ka zawng a, Company lian tak a ni tih hai rual a ni lo. A neitu hming ka en chuan ‘Radoy Elmas’ tih a lo ni a mahse ka pa in a thianpa hming a sawi erawh kha chu ‘Burak Elmas’ a ni thung. Hriat chian ka mamawh hmasa tih chu ka hria a, hriatchian tumin ka bei ve ta ngat ngat a, ka pa thianpa Burak chu Company rochun tu tur a ni tih chu ka hrechhuak a.

Vawi khat chu Company helpline number an tar chhuah ah chuan ka call ta ringawt mai a, hmeichhe pakhatin lo la in ka buaina min zawh chuan Burak Elmas biak ka duh thu leh ka pa hming sawiin a fapa ka nih thu ka sawi a, ani chuan ka uang a nih a ring a ni ngei ang, kan inbiakna chu thu tawp pawh awm lo in a ti tawp ta daih a.

Ka roomah thu in thil tam tak ka ngaihtuah a, chu tih lai chua Lisa pa in inhnuai lam atanga min ko vak ri ka hria a, rang takin ka chhuk thla ve nghal a.

“I phone call..” tiin min hrilh a, hmanhmawh takin ka chhang vat a

“Hello”

“Hello, Burak Elmas ka nia, Mike fapa I ni em?” a rawn tih chuan ka lungphu a rang ngang mai

“Engtin nge tunah khan ka hming I lam?” hlauthawng zet chuan ka ti a

“Rodoslav tiin” a tih chuan ka hahdam huai mai

“Ka hming I hria chu a alawmawm e..” ka ti a

“Bawiha, ka bulah sawi duh I nei a mi?”

“Aw  thil zawh duh che ka nei a.. “

“Eng ber?”

“Ka pa chanchin..” tih chiahin ka sawi a

“Tunah khan Marmaris ah I awm em?”

“Aw awm..”

“I School address min hrilh la, naktuk tuk lehah in school atangin ka rawn hruai dawn che nia..” a ti a

Ka pa thiantha ber nen kan inhmuh dawn zan chuan ka helhhawlh nge ka mu thei hauh alo. Kum 14 ka ni ve tawh a, khatiang ang em em a phur kha ka la nei ngai lo. Naktuk a lo thlen chuan ka ngaihtuahna a zawhna awm te hi chin felin a awm tawh ngei ang.

Kan School atanga min rawn hruai chhuakin hmun pakhatah min hruai a, en mai chuan pa ti hrik hrek hmel a pu a mahse eng amah hma in ka ngaina nghal tawp.

“Min rawn bia chu I ti tha khawp mai, zawn che ka lo tum zawk a” a ti a

“Enga tan?”

“Min zawh duh chu min han zawt phawt teh..”

“Ka nu khan ka pa kha a hmangaih lo a mi? Uncle Nacmi a hmangaih zawk a mi?” chu bak chuan ka sawi thiam lo a ni.

“In inchhung nuam lo I ti a mi?” a ti a

“Aw, a nuam lo..”

“A chhan I sawi thei em?” a tih chuan ka lu ka thing a

“I pa nen khan kan tetlai tak tak atangin College thleng kan inkawm chho a. College kan luh lai atangin I nu nen khan an inngaizawng a, chuan I pate Nacmi kha I nu thiantha ber a ni thin. I nu khan Istanbul  a khawsak a duh loa, Marmaris a an chen loh chuan an inneih theih loh tur thu a sawi a. I pa khan a hmangaih em avangin I nu duh dan chuan a kalpui a, a chhungte zawng zawng thlauhthla in. Khatih lai khan Nacmi khan nupui a nei daih tawh a, mahse fa an nei thei lo thung. Nacmi rilru hah chuan I nu leh pa bulah a harsatna te sawiin a inpaih thawl thin a. Hreawm taka a awm kha I nu khan a hmu thei lo nge, a khawngaihna chu hmangaihna ah chan tirin I pa ngaihtuah chang lek loin an khawsa dun ta a ni.”

Ka ngawi vang vang a, ka tawt up up nimai hian ka hria a ni.

“Rodo Bawiha, hetiang ang hun hi a thleng dawn tih I pa khan a hmu lawk vek alawm. Tunah chuan lehkha zir that chiah tih theih I nei tawh. Kan company neitu zingah I tel a, mahse College  I graduate hma loh chuan lak luh theih I ni lo..” a tih chuan mak ti takin ka en a

“A awmzia chu ka graduate hnu ah chuan saw in saw ka chhuahsan thei maw?” tiin ka zawt a

“Aw, ni e. Mahse he thu hi thuruk a ni tih hria la, min mamawhna I neih chuan min rawn be ngei ngei dawn nia..”

Kha mi ni atang khan ka mizia mai nilo in ka rilru put hmang te nen lam chuan a danglam vek a. Ka pa ka rilru natpui na rilru chuan engtik lai mahin min kiansan ngai lo. Ka nu pasal chu ka zah lo telh telh a, chutiang bawkin ka nu pawh. Ka rilru natna chuan nasa takin inchhung boruak ka ti chhia a, mahse pawi ka ti lem lo. Chu tia suahsual rawng ka bawl reng chung pawh chuan ka nau Lisa erawh chuan min kawm ngeih a tum tang tang thin. Ka vin vak vak te, min be lo tura ka hrilh chang apiang chuan keimah zawk chu ka na a, mahse ka pa min chan tirtu fanu ngei lakah hian ka rilru dik tak ka phawrh thei thin lo a ni.

Kum tam tak a vei a, chau in hah tawngkhawng viau thin mahila chakna thuruk ka pai tlat thin, chu chu he in hi engtik emaw ah ka chhuahsan anga, an rin phak bak aia nasa in ka la hlawhtling ngei ang tih hi. Nasa taka ka beih ve hnu ah ka graduate ve ta, ka nu chuan ka University zawmna tur ah ka rilru pe turin min duh a mahse keichuan an hriat loin ruahmanna ka lo nei diam tawh.

Istanbul ka pan dawn zan chuan nasa takin ka nu leh a pasal te nen kan inhau a, engtikah mah ka ngaihdam theih ngai loh tur thu hrilhin in chu ka chhuahsan a. Mahse, khami zan atang khan Lisa ngaihtuah loh lai ka nei ngai lo. Nau fel leh fing tak a ni a, ani chiah kha min hmangaihtu awmchhun ni ah ka ngai bawk. Ka hmangaih a, a bula hun hman chu ka duh a mahse thil theih a ni si lo.

Istanbul ah  Elmas chhungkaw bulah bul ka tan tha a, Burak uncle chuan fapa kei aia kum li a naupang Ibrahim  a nei a, kan inhmuh tirh phat atangin ani chu ka ngaina a ni. Marmaris a ka hun hman dan min zawt fova, sawi chhuah ka duh loh viau na in thil pakhat erawh ka hrilh fo thin. Chu ka thil hrilh thin chu ka hmeichhe hmangaih tak Melisa tih hmingpu ka kalsan tih hi. Ani chuan ka first love anga a ngai a, min sawipui nuam a ti thin hle. Keichuan zawhna dang a awm ka duh loh avangin ka nau a ni tih ka sawi duh ngai lem chuang loa.

Elmas Pharmaceutical Company a share holder zing mi angin hun ka hmang chho tan a, ka pa boral tana ka tih theih tawk Company tana tha taka hna thawh chu ka chhunzawm ta zel a ni.  Kan company chu a kal tha chho viau a, hmingthatna pawh kan hui hnem hle bawk.

Ibrahim, ka thiantha ber nita  chu a thil zir a zawh hnu chuan Company ah lak luh a ni a, kan pahnih a tang rualin Company chu kan enkawl chho ta a, a pa pawh kan chhawk hneh viau nghe nghe. Mahse, vanduaithlak takin Ibrahim nena Company kan kuta a tlak tak tak thla hnih hnu ah hmingchhiatna nasa tak kan tawng a, chu chu Cancer damdawi kan siam chhuah zingah thil felhlel lo awmin damlo tam tak nunna laksaka an awm mai bakah zual phah pawh an lo tam hle a ni.

Kan company siam chhuah damdawi hi Istanbul hospital zawng zawng deuh thaw a pek chhuah an ni a, chu damdawi dik lo siam chhuah chu Neolife Oncology Centre in an hmanga hmasa ber a, a tuar nasa ber an ni bawk. Kan thil tih dik lo siam that  leh zangnadawmna pek kawngah kei leh Ibrahim chuan mawh kan phurh a ngai ta a. Kei Company lama hriat lo ngah zawk na na na chuan a thu lo zawk ni mahila engkim deuh thaw ka buaipui a ngai ta a ni.

Conference Hall atanga kan chhuah chuan ka Phone ka phawrh nghal a, message pakhat lo awm chu ka hawng vat a

‘Keimah Lisa’

Hmanhmawh takin ka call nghal a, Cabin No.13B lama chho turin min ti a, keimah a chhoh mai ka tum laiin Ibrahim chuan min rawn zui ve bawk a.

“Enge I tih dawn? In awmdun a rem lo a ni lawm ni? Anih chuan hmuh tuma phi buai kha tih tur tha berah I ngai a maw?” Ibramhim chuan elevator a kan chuan lai chuan a ti a

“Min mamawh alawm..”

“Anih chuan Adile nena ininkar hi? Kum 30 I pel tawh a, nupui neih mamawh tak ini ve tawh. Adile tluka I tana hmeichhe tha an awm lo..”

“Ka hria alawm..”

“He thil hi Elmas chhungkaw beng a thlen vaih chuan I ropui ang hian I ropui thei tawh dawn lo tih I hria em?” a thusawi chu ka hrethiam vek. Ibrahim hian a cousin Adile nena min inneih tir hi a tir atanga a tum a ni tih hi.

“Anih Melisa kha I tha tih zawng a ni em?” tiin ka zawt a

“Eng ang zawhna nge ni ngai? Tak tak ah pawnlam landan maiah kha chuan sawisel tura  awmin ka hre lo”

Kawngkhar ka kik dat dat hnu chuan Lisa’n min rawng hawng a. cabin chhung ka luha ka thil hmuh chuan min thawng kher mai. Kum tam tak liam ta a ka hmuh tawh loh leh ka huat em em thin ka nu chu cher chhe takin natna khumah a lo mu bem reuh a. Engtia awm a enge sawi tur mai pawh ka hre lo, ka tiril te chu a khur ti tih hian ka hria a..

“A tha chho viau na in damdawi vang khan a zual telh telh a ni” tap aw lek lek chuan Lisa chuan a lo ti a.

“A doctor ka hmu duh.. Lisa”

“A chhuak deuh chiah a”

“A contact number min pe rawh..” vin aw lek lek chuan ka ti a

“Enge thil awmzia?” Ibrahim chuan a rawn ti a, tuman chhan kan tum lo. Engkim chu a reh tlawk tlawk mai a ni.

KOŞULSUZ SEVGİ

***RENGPUII GUITE***

CHAPTER -3

MELISA INCE

 Mumang ang mai niin ka hria. Ka beisei loh lutuk thil thleng vang chuan ka hamhaih zo vek a ni ber e. Rodo chuan ka nu doctor chu a call a, ani chu doctor hmu turin  a office lam pan tum chuan a chhuak zui nghal a. Rawn zui ve tu tlangval erawh chu Rodo’n min awmpui tura a ngen avangin amahin thutphah ah chuan a tha khar a.

“Ih.. tui I duh em?” biak loh tawp aiah chuan ka han ti vei rawk a. Dik tak chuan ani hi ka ngaina lo, nichin lawka   nuihsawh hmel taka min  rawn melh lai ka ngaihtuah ngat phei kha chuan hmuh leh chakna ka nei hlawl lo

“Aw, a remchan chuan..” aw pa tak ka hriat ngat phei chuan sual hmel ka ti lehzual!

 “Dam lo saw Rodo nen inzawmna enge an neih?” tui ka pek pah chuan ka mitah tak en in min zawt a,

“A nu” tiin ka chhang thei tawk a ni

“A awmzia chu amah hringtu nu?” thinrim hmel a pu lek lekin ka hria

“Aw” hawi sawn pah chuan  nui deuh hak a, nui lui a ang mah zawk, a awmdan chuan ka awm a ti nuam lo lek lek thei hial a ni.

“Anih nang ve?” thu paha min chung en ha chuan a han ti a

“Helai hmuanah hian interview rawn nei turin a mi I rawn kal a?” a tir atanga min en dan ngaihtuah chuan ka be tha tawh mah mah!

“Chu aia pawimawh chu a ni maithei” tiin a tho nawlh a, kawngka lam panin cabin chu a chhuahsan ta daih a.

A awmdan chu a awmang lo mah mah a ni. Ka bulah hian Adem emaw Natascha awm ngat se chuan ka ang nasa bawrh bawrh leh hle ang. Engvanga mil lo nghal ngawt nge ka nih le? Rodo ka hmuh leh avanga ka lungchhiatna kha min hmusit ni berin ka hria a ni. Mi zawng zawng lak atang hian an thatchhuahna dawn hi ka beisei a ni ngai lo. Mahse, innuih sawh hi ka thil huat ber a ni, ka tana engmah nilo leh inzawmna ka neihpui lo te lakah ngat phei chuan! Chuan, chumi zingah chuan ani kha chiang takin a tel ve a ni.

A landan atang chuan mi hausa tak fapa tih hai rual a ni lo, a che zia atang reng reng pawn a hriat nghal theih mai. Tin, a polite lo viau bawk, nge a inringtawk mah mah zawk! A hmel leh pian atanga teh dawn erawh chuan tlangval sawiselbo tih theih khawp hial a tha  a ni thung. Amah en mai chuan Rodo aiin a naupan hmel a,  a inchei dan en chuan duhthusama pa leh smart a ni leh lawi bawk a. A hmelthatna chu lo dahtha pawh ni ila, a pian  mawlh kha! A san zawng diktak sawi thei lo mah ila ft 6 erawh a hawl pha tih kei ngei pawn ka sawi chiang fak thei ang. Mipa  piana ka duhthusam pian ang mai a nei tih chu pawm duh lo viau mah ila a ni miau si. Ni e, sawi dan awlsam berah  chuan a tha takzet a ni!

IBRAHIM ELMAS

Ka awmdan a mawi vak lo tih chu kei ngei pawn ka pawm thlap. Mahse, Rodo tuar nasat zia ka ngaihtuah chuan a nu kha ka khawngaih hleithei lo a ni ber e. Tin, a hmangaih a neih theih si loh a hmuh leh kha keichuan tulin ka hre lo. Chu mai a ni lo, ani tan  hmeichhe tha tak Adile a awm reng a ni.

 “Ani saw zangnadawmna pek tur zingah khan a tel em?” tiin Rodo chu ka han zawt a

“Aw, chumi piah lamah chuan enkawl tel ka duh bawk” thutak hmel fe chuan min chhang a

“Ka rin ai daihin I rilru a lo tha” ngeiawm zet a nuih pah chuan ka han ti a

“Ka ngaidam tihna a ni lo, Melisa tan vek a ni”

“Huiz.. Melisa, I hmangaih hmasa ber chuan I nu a lo enkawl avangin I lawm ta em em a, I nu tan pawh ni loin Melisa tan I nu enkawl I duh ta a..”

“Ka nu a ni miau alawm..”

“Ka pa in hre ta se?”

“Chairman chuan a hre tur a ni lo..”

“Saw nula saw?”

“Ka nau anih saw..” ka sawi tur ve chu chawp leh chilhin a bo hmak!

“Dawt sawi hunah I ngai a mi a?” ka han ti tawp a. Ka rilru tak chuan awih lo tawp erawh ka ni lo. Engvanga khanu khan enkawl tlat nge anih kha thil mak chu a ni ve chiang alawm.

“Chairman khan ka nu in pasal dang a nei tih chiah a hria a, fa an nei tih a hre lo. Chuan, he thu hi a hria anih chuan keimah vangin ka nu leh a pasal a huatna a nasa ngei anga, ka nu enkawl pawh a phal ka ring lo..”

“Engvang kher in?”

“Enkawltu fa a nei tih tannin a  tang thei alawm, ani hi ka hrechiang ve tawk a ni Ibrahim.. Mahse, ka nau saw en teh, a chau tawngkhawng hmel saw ka hmu thei lo..” a ti a

“I nau saw I hmangaih takzet a ni maw..” ka ti a

“Aw, mi zawng zawngin min hmuhsit a min endawng lai pawha ka kianga awm chhun anih saw..” a tih chuan a hma a a thil min hrilh thin chu ka ngaihtuah chhuak a, ka khawngaih letling viau a ni.

“Anih enge I ruahmanna?”

“Marmaris ah kan company Villa ah enkawl a ni ang. Nurse pahnih, doctor leh ka nau in an awmchilh ang..”

“He thilah hian Chairman I be tawh em?”

“Be lo, mahse a lo pawm ngei ngei angai ang..” a tih chuan a thutak hmel hle a

“I thil tih turah hian I chang maw?”

“Aw, ka hria alawm I ngaihtuahna kha. Ka pa in a pawm lo anih pawn ka tilui tho ang! Elmas chhungkaw zinga mi tih loah chuan share ngah ber ka nih ve na hi hman tangkai hun tak niin ka hria..” a tih thawk ka han la vak a

“Ni e, mahse ka pa chu tibeidawng suh ang che..”

“Chutiang a thleng loang Bawiha, meeting nei turin ka kal ange” nui deuh pah chuan ka office chu a chhuahsan ta a.

Melisa Ince, Rodo hmelma ang hiala sawi theih fa hrin ngei chuan  Rodo te ang ang rilru lian leh nghet lutuk thinlung  a ti tuiral thei chu a ni si a le,  eng ang hmeichhia tak ni ang maw? Nitin maiin mi tam tak hmel ka hmu a, ka titipui fova, tu hmel mah han hriatzui a ngaihtuah zui ka neih awm ka hre ngai lo. Mahse, ni khat kal ta a kha ka hmeichhe hmuh erawh kha chu ka mitthla ah a hmel dang bel kha a cham reng tlat a ni. Rodo hi ka unaupa ang mai anih avanga ka ngaihtuahna lutuk lamah kha nu kha a lang tlat tihna em niang? Thil ni thei chu a ni alawm, kha nu a hnaih kha ka hlau em atin ani.

Ka hna a  rilru pek ka duh viau laiin thil tam tak ka ngaihtuahna ah a lo lut a. Kha nu kha Rodo nau a ni chiah em? nge ni a, Rodo hian ka inrawlh ve a duh loh avangin dawt a sawi mai mai zawk! Engvanga vei em em nge maw ka nih le, ka hrethiam lo takzet!

Coffee rawn dah tura ka assistant ka hrilh zawh rual chuan ka pinadanah chuan Phone ri thawm ka hria a, ka ringtone anih loh avang chuan mak ka ti rilru hle mahse sofa a Rodo phone ka va hmuh chuan a theihnghilh a ni tih ka hrethiam nghal a. Ka thutna atanga tho chuan Rodo phone chu ka va la a, Melisa hnen atang phone call lo kal a ni. Ka lak sak ang nge lak sak loang tih ka ngaihtuah lai chuan call chu a tawp hman a. Mahse, a hnu rei vak loah chuan a rawn call leh a…

“Hello..”

“Rodo..” a tap chhunzawm nghal a

“Englo, tunah hian..”

“Ka nu awmdan hi Rodo, damdawiin ah lo kal rawh” a tap nasa telh telh a, sawi tur a vang duh hle!

Call chu ka hmet tawp a, meeting awm mekna hall lam chu hmanhmawh takin ka pan a, tumah an lo awm tawh lo.

“Meeting awm tur kha” receptionist hnenah chuan ka han ti a

“An zo chiah a Sir”

“Chuan tunah khawnge?”

“Company guest house lam panin an chhuak chiah”

“Hrep tak chuan!”

Ka office a ka let leh chuan Lisa hnen atangin missed call pathum ngawt a lo awm hman a. He thil hi ka tih a ngai tihna em ni? Tu emaw midang dam lo chu nise ka secretary hnenah pangpar thawn turin ka ti mai anga, thil har a ni lo.

Engmah thleng lo anga ngaih tum chuan ka thutthlengah thu in ka hna ka chhunzawm a. A hma aiin thawh a har leh zual zawk emaw tih tur a ni.

“Awle, ka tih a ngai anih hi!” tiin ka tho lawk a, driver call in motor la chhuak turin ka hrilh a Neolife Oncology Centre lam panin kan inkhalh chhuak ta a.

Damdawiin ka thlen chuan let lem mai duhna rilru chu ka la pu reng, heng ang thil tih hi ka inhmeh ve thlawt lo. Rodo anga mi ngilnei tak, a tul huna thutawp siam hreh lo ang ka nih ve loh zia chu ka inhrechhuak hial a ni. Ni e, keichu ka tet te atanga enkawl harsa ngang kha ka ni a. A theih chhung chuan mi hnaih tam loh hi ka duh dan a ni, kha Melisa ngat phei kha chu!

Phur lo tak chung chuan ka hmanhmawh em em lawi si. Cabin no.13 ka thlen chuan kawngkhar ka han kik a, tuman min chhang lo. Receptionist hnena Rodo phone ka lo pe mai chu ka inchhir hnuhnawh viau a ni. Tih tur nei lo ang maiin darkar chanve ngawt he damdawiin ah hian ka awm phah si a.

Office lama let leh mai tumin elevator hman theih hun nghakin ka ding a. Elevator kawngka a inhawng chiah tiha ka mi hmuh chu ka hmuh tum sa reng ni mahse min ti phu dawn lek lek mai.

“Hetah enge I tih?” mak tih hmel zet chuan min en a. A mit chu a tap nasa tih hriat takin a vung deuh bai a, a dang lep bawk a.

“Rodo’n  ka office ah a phone a theihngilh a..”

“Chuan..”

“A phone call dawn kha ka chhan mai a ngaih phah a” 

“Lo kal rawh cabin lamah” tiin Cabin lam pan chuan ngawi rengin kan inzui dun a

“Khawnge Rodo?”

“Guest house lamah kan mikhual te nen zanriah an kil ho dawn a ang..” tiin ka chhang a

“A rawn tir che tihna maw?”  zawhna leh zawhna hlir! Ka hne ve det! Chuan, helai hmunah hian Rodo’n min tirh vanga kal angah min ngai a nih chu!

“A nuihzathlak a mi?” a tih chuan ka nui tih ka inhre ve chauh bawk!

“Aih.. khawnge Rodo nu chu?”

“Ka nu a ni ve tho!” vin tak chuan a rawn ti a, sawi tur min ti hamhaih lek lek alawm mawle

“Ka tihpalh a ni.. helai hmuna rawn kal hi ka ba lo asin mawle chuan vin ka tawk bawk a” ka ngeiawm tih ka hria, ka tum pawh a ni

“Kha I nui hmel ngeiawm zet kha min hmuh loh theih chuan ka lawm ngawt ang..”

“Heng nui hmel vang hian nula engzat nge ka chhai thluk tawh I hre duh em?”

“Nula mawlmang tak tak chanchin ngaihthlak nan hun ka nei lo..”

“Mawlmang a?” ka tih lai chuan a Phone ri chu min chhan san ta a..

“Aw Rodo..” ti a min melhrum vak pah chuan pindan chu a chhuahsan ta a. A tu zawk nge inchhiah kual pawh ka hrethiam nek loe a. Rilru hah tawp khawk lamah chuan hmeichhe tan chuan tu mipa dar pawh tah nan an  hman theih mai ka rin laiin an thinrim hrikthlak nan min hmang zawk emaw tih mai tur a ni.

A rawn luh hnu chuan a nu mutna thin khum chu a thlep mial mial a. Ka awmdan min siam laklawh lutuk chuan min ti thinrim lek lek.  Company lam leh helama ka awmdan ka’n khaikhin rilruk ngat phei chuan  nuihzat lamah a kal thei hial a ni.

Office lama let tur chuan a tlai deuh tawh avangin in lama haw tum chuan ka rilru ka siam a. Melisa hnen atanga thil enge maw hriat chu ka beisei ru viau na in a thil tih lai min tih zawm sak char char avang chuan ka tho ta ringawt a.

“Khawnge kal I tum?” duhthusama chang fak chuan a rawn ti a

“Ngatan nge I tih?” ka ti let ve sak a

“Rodo’n a hrilh lo che mi?”

“Engmaw?”

“A call tur thu che a sawi a..” a tih lai mek chuan Rodo a rawn lut chiah a..

“Ka tlai em?” hmanhmawh tih hriat tak chuan a rawn ti lut a

“Aih.. private jet chu engtin nge?” Melisa chuan a ti a

“Tun atanga darkar hnih hnu ah kan chhuak ang. Ka tihpalh Ibrahim, ka call tlang thei lo che a. Ka nu hi

Marmaris lamah a awm a ngai a ni”

“Ka pa I be taw hem?” ka lo ti a

“Aih. Chumi vang chuan ka mamwh che. Zanin hian nangman I hruai mai a ngai dawn a ni..”

“Enga?” Melisa nen chuan kan ti rual chiah a

“Ibrahim khawngaihin.. ka nau inih na ang talin” Rodo’n a tih chuan sawi mai tur ka hre lo. Company lamah chuan a neitu ber  chan changin mi zawng zawng zah ka hlawh a, mahse Rodo bula ka awm hi chuan ka puitling hlei thei lo ni ber hian ka hria, u nihna a hlen zawh em vang nge ka hre lo.

“Ka pa ka biak phawt a ngai ang..” ka ti a

“Rodo nangmah I lo kal thei dawn emaw ka tia..” tiin Melisa chu a rawn tawng a

“Aw Chairman ka biak fel theih hun hunah Ibrahim  ka rawn thlak ang. Kan pahnih hniha Company a kan awm loh chu a tha lo..” Rodo chuan a ti a.

Dam lohna thil nilo se chuan ka hnial fithla thak ang. Nilo, tupawh lo dam lo rawh se heng ang thil tih hi chu ka thei ngai loang mahse Rodo tan ka tih a ngai si, ani’n ka tana engmah tih hreh a neih ngai lo hang chiah khan.

In lama let loin ka secretary hnenah ka thawmhnaw  leh thil dang vel in lama va la turin ka ti a. Ka nu bia in hna thil a ka chhuah lawk a ngaih thu ka hrilh a ni. Ka nu bula dawt sawi hi ka thil hreh ber ni mahse ka pa in engmah a la hriat loh avangin kan thup rih a ngai si a ni.

Doctor pahnih, nurse pahnih, kei leh Melisa te chu Rodo thian pakhat private jet hmangin Marmaris lam panin kan thlawk chhuak ta a. Hetiang thil ka ti hi kei ngei pawn mak ka ti. Melisa bula han chen chu nikhat lek pawh nise a phurawm teh chiam lo em a ni. Ani pawn ka ngaihdan ang chiah hian a ngai ve tih ka hria.

Marmaris hmun kan thlen chuan Rodo’n a lo ruahman lawk tawh angin ambulance in min lo nghak reng tawh a. Ambulance chuan Elmas Villa lam panin kan tlan ve leh nghal a, buaina em em kan tawk lo chu a lawmawm duh phian. Melisa chu ka bul chiah a thu in a nu muhil lai kut chu a chelh tlat a, a khat tawkin a mit tui a hru zeuh zeuh bawk a. Ka mi ngainat loh tak ni mahse chutia a wm hmuh erawh chu a nuam duh lo kher mai. Engtin mawni tak tawng thlamuan ve ka duh viau na in ka tawng chhuak thei tlat lo. Mahse, tawng pawh ni ila ngeiawm taka min rawn chhan leh vaih chuan mi hmuhah kan insual lo chauh a ni leh anga a lawmawm lam zawk a ni.

Villa kan thlen chuan hnathawk hoin engkim an lo peih fel vek tawh a, keichuan ka pindan lam panin ka kalsan daih thung. Ka inbual zawh chuan mut nghal mai tumin ka inti fel a. Ka mu fel awrh tihah chuan inhnuai lama thawm ring tak rawn ri chuan min inper thawh tir chiang hle a. Rang lutuk in thawmhnaw ka inbel a, inhnuai lam pan chuan ka chhuk nghal a.

“Lalpa leh!! Eng thil nge ni a?” choka lama tui lo chiau pur ka hmuh chuan ka han ti vak a

“Ka tihpalh lutuk.. ih, ka nu tui luma dehna tur tui a herh haw a, ka lo theihnghilh daih a.. hruk faina tur ka zawnna lamah bungbel ka tit la teuh a..” tlai lama a hmel ngeiawm tak nen chuan inang tawh lo tak a ni.

“Chhuat hrukna chhuara zawng ka vawikhat hriatna..” ka ti a

“Chhuar chung khi en ta che” ner nang pah chuan a ti a. Ka en chuan chhuat nawhna thin hlui zet a lo intiang arh chu niin

“Khi khi hman duh tawh loh anih khi. Ina hnathawk ho I ko thei mai lo a mi?” ka han ti ringawt a

“An hnathawh hun chhung chu zing dar 6 atanga zan dar 9 thlen a ni!”

“A tha e.. tikhan ti fai rawh..” tiin kalsan mai chu ka tum a

“Khawnge chhuat nawhna chuu?” thawm dimna nei miah lo chuan a au vak a

“Melisa I a chu a ni em lomaw..”

“Ka a lo. Ngatinge rilru hah taka ka awm lai hian ilo lan chhen zel.. ka thi thei mai dawnin ka hria..” tiin chhuat huh chiau purah chuan a thu hnawk a, a ngawi reng a. Awmdan laklawh takin min siam leh ta.  Naupangchhia ang maiin a awm alawm le

“Ka tihpalh..” ka sawi atan pawn ka awih lo hial zawk a ni.

“Um..”

“Mu tawh rawh..” ka ti a

“Mu turin chho tawh rawh.. muttui..” tiin a tho a, a puanchhe ken lai chuan chhuat chu a hruk zawm a.

Tuna ka ngaihtuahna awmdan tak hi ka hrethiam lo. A che vel chu ngawi rengin ka thlir a, a engkim chu a hmuhnawm ngawih ngawih hian ka hria. A ma taksa phu tawk chuan a sangin, a bawp pawh a sei ve arh a. A kawng fek tak chuan a mawng bawr chu a nihna ang aiin a ti lang lian emaw tih mai turin a taksa chu a inphut mawi tawk viau a ni. A mitmeng bial kalh, meng fiah em em mai, mahse a tam zawk mit tui nena inchiah piah te, a biangsum lang lo aia lo lang ve chang chang thin te chuan ani tha ti tu tan chuan duhawm tih ngawig ngawihna tham a ni. Rilru hahna nei miah loa a hlim hmel  awmdan tur engtiang taka tha ni ang maw?

“Ka nu damdawi ei a hun.. khawngaihtakin lo tih zawm mai” tih pah chuan chhuat nawhna puan huh zawr hnawp chu ka awmah tak a rawn dah chuan ka au chiang hle mai

“Eng thil nge I tih?”

“Lo ti rawh, I la mu duh chuang hleinem..” tiin a kal ta daih a.

“He nu mood hi nikhatah hian vawi engzat chiah nge a inthlak thin le..”

KOŞULSUZ SEVGİ

***RENGPUII GUITE***

CHAPTER -4

RODOSLAV HARALANOV

Ka awmdan leh ka rilru inthlak dan chu kei ngei pawn mak ka ti. Dik tak chuan Lisa ka hmuh ni hma zawng kha chuan ka thinglungah hian ka nu ngaihdam tumna a la awm ngai lo. Mahse, ka nau, min ngaina em em thin tu, kum kua lai mai kan inhmuh tawh loh hnu pawha ka laka beiseina la nei tlat ka hmuh khan chawp leh chilhin ka danglam vek a ni. Kha natna khumah khan tupawh lo mu rawh se, Lisa tana mi pawimawh anih phawt chuan tuna ka tih ang hian ka tih tho ka ring a ni.

Marmaris lama va hruai chu ka thil duh ber ni mahse tum lawk lohin thil kan kalpui ta nuai si a. Tlai lama ka nu a zual avang chuan Lisa chu a lo mangang viau a ni awm a. Damdawiin lam thuneitu te ka biak chuan an buai zual hun lai anih avangin tumah special treatment an pek theih rih loh thu min hrilh a. A awm ve reng mai, keini lam Company fimkhur tawk loh vang liau liauin damdawiin lam pawh ti khawp hian an buai a ngai ta si a.

Duh thlan tur dang ka neiin ka hre ta lo. Hmanhmawh taka doctor leh nurse ka nu enkawl theitu zawn mai loh kha chu! Harsa em em loin ka hmu mai a. Kalna lam tur buaipui lehin kan business partner zinga ka kawmngeih tak Mr.Radoy Aliev chuan a private jet min hman tirin ka nau te chu  a tuk lama ka kal tur thu tiam chungin ka vai liam ta  a ni.

Mrs. Elmas, kei leh Chairman ten zanriah kan kil ho a. Mrs. Elmas chuan Ibrahim chu Company thil a a zin thu chu a sawi siam siam a.

“Chairman, zanriah ei khamah biak lawk duhna che ka nei a” ka han ti a

“Inchhung anih hi Company ni loin” min melh lem lo chuan a han ti a

“Oh.. ka tihpalh ka pa..”

“Bawiha, I nau chu khawi hmunah nge a kal I hriatpui em?” Mrs.Elmas chuan a rawn ti a

“Marmaris lamah a nih hmel..” tiin ka lo chhang vat a

“Ka damdawi eitur I nu hnenah la la, chumi min pek pah chuan I rawn kal dawn nia ka office ah..” Chairman chuan a ti a, ka lu ka lo bu nghauh a.

“Eng thu ah nge min biak I duh a?” ka damdawi pek lo lak pah chuan a ti a

“Ka chungah I lungawi lo anih pawn ka pawm thlap”

“Lungawi lohna tur thil chu tih loh mai tur!” a ti ram hmak a

“Ih.. ka nu ka hmu a..”

“Tu I nu maw? Nu te chu he inchhungah chiah hian I nei a ni lawm ni?” ka rin aiin a harsa daih mai..

“Damdawi dik lo hmang zingah khan a tel a, Neolife Oncology Centre lamah enkawl a ni a, a dinhmun a tha lo takzet!” ka han ti aa

“Cancer a vei tihna maw?” a tamit vuah lai chu a phelh zeuh a

“Aw.. chuan ka pa, thil ngen duh che ka nei a ni..”

“Enge?”

“Enkawlna tha zawk pek ka duh a ni”

“Engtin?”

“Hmun hranah doctor leh nurse in awmchilh se ka duh. Mahse, keima pualin eng hmun mah ka nei loa. Dik tak chuan tunah hian Marmaris  a Company Villa lamah nichin tlai khan hruai phei a ni..” ka tih chuan a lungni lo tih a hmel atangin ka man thiam nghal a

“Rodoslav.. ilo puitling ve ta hle mai. Engmah min hrilh loin heng ang ruahmanna lian lutuk ilo kalpui ngam ve tawh a..”

“Ka pa, insenso na ai zawng zawng chu ka hlawh atangin cut mai rawh..”

“Engkim hi pawisa tanga teh theihah I ngai a mi?” a kianga ka chen hnulama a vin ka tawh vawikhatna a ni.

“Nilo ka pa..”

“Khawnge I nau? Marmaris ah chuan I tir a ni ti raw..”

“Aw, duhthlan tur dang ka nei lo a ni.”

“I nu chuan a pasal nen khan enkawltu tur fa an nei lo a mi?” a tih chuan ka awmah hian enge maw hian min hnawh tup tup hian ka hria

“Aw nei lo ka pa”

“A ni tak ang. Kha I nu pasal leh a nupui hmasa inthenna chhan pawh kha fa an neih theih loh vang anih kha mawle..” a ti a

“I phalna lak chiah ka mamawh” ka ti a

“Phal lo pawh ni ila I kal tlangpui tawh sia alawm..”

“Anih I pawmpuina?” ka’n ti leh hram a

“Chhuak rawh.. thil tha zawk tih dan ngaihtuah ang che. Marmaris ai chuan Istanbulah hian engkim thil a awlsam a nia..” a tih chuan ka lawm takzet!  Mahse, pangai takin ka awm a..

“Ka pa ka lawm e, ka ti beidawng ngai loang che..” tiin kawngkhar lam ka pa ta a

“Lawk Rodo!”

“Aw enge ni ka pa” tiin ka hawi let vat a

“Thil tisualtu te hi a tirah an chan tha mahse an chan a tha rei ngai lo. A tuartu zawk I ni chunga tanpuitu ila ni thei hi ka chhuang takzet che”  tiin min hrilh a.

Damdawi siam dik lo chungchang a sawi tel lo chu ka lawm takzet! Hriatchhuah a nih ni atang khan a phur chang changin Ibrahim nen min ko anga, Company atanga theh chhuahah min vo reng bawk anga, rilru hah nen chuan a ang thawm hriat ziah chu a hneawm duh viau thin a ni.

Ka pa thusawi chu ka ngaihtuah let a, a sawi dik chiah a ni. Kum tam tak kalta khan a tuartu ka ni char char a, an tan khan hnawksak mai ka ni. An ni kianga awm kha hreawm ka ti a, mahse ka dinhmunin duhthlang theiin min siam si lo. Tunah chuan Elmas chhungkaw zarah mi pangai tak ka ni chho a, ka hmelma ngei pawh tanpui thei dinhmunah ka ding ta a ni si a. Engkim hi a lo tha vek mai!

Ka mut dawn ah chuan Lisa ka call a, a pick up thei tlat lo, chutiang bawkin Ibrahim pawh. An la buai viau anih ringin muthilh ka han tum a, chutih lai tak chuan call a rawn lut a..

“Aw Bawihi”

“Rodo, I lo call laiin choka ah ka awm daih a..” a rawn ti a

“Ok.. ka nu chu enge a an?”

“Hei nurse leh doctor ten an awmpui chhawk char char a..” a ti a

“Ibrahim a tha em? ka call a chhang thei miah loa..”

“Aw, tunah chuan chhuat a nawt..”

“Engaa?!”

“Aaa.. ka tih awmzia chu a nawt maithei..” nui pah deuh ti tih chuana rawn ti a

“Sawi fiah vat la mawle..”

“Ka nu tui lum tur chhuan ka tum a, tap ka on tih ka theihnghilh a, chhuatah tui a lo tling vek a. Chuan, kha I nau ngeiawm zet kha a rawn kal a, kan inhnial hrep a” a tih chuan tum lawk lem lo chuan ka nui kur kur a

“Lisa Bawihte, ani kha I u ang chiah ve tho anih kha, kawm ngeih lo tum hrm hram rawh. Bakah a hah awm si a, mu turin hrilh tawh rawh.. nangpawh mu tawh la, naktukah hnathawk hoin an lo tifai mai ang..” ka ti a

“Um.. nangpawh mu tawh rawh U, ka hamngaih che..” a rawn ti a

“Keipawn ka hmangaih lutuk che.. muttui le..” tiin kan inbiakna chu kan ti tawp ta a.

MELISA INCE

Choka lama ka let leh chuan engkim chu a ngai ang angin a lo la awm vek a. Kan pu-a chuan engmah a lo ti miah lo tih ka hrethiam nghal a. Keipawh chuan tih fel zui pawh tum lo chuan ka intifai a, ka nu mangtha turin a pindanah ka lut leh a.

A khat tawkin a rawn harh a, mahse engmah a hre mumal lo thung. Ka pa hming leh ka hming a lam chhawk reng a, a chang chuan min ti hlauthawng thin hle a ni. Chiang taka a lo harh hnuhnun ber khan Rodo’n a enkawl thu ka hrilh a, a nui ve vur vur a mahse mak ti hmel a put miah lohna khan a awih lem lo a ang ka ti a ni.

“Nu, ka mutsan ang che aw.. I bulah Doctor leh nurse an awm reng ania aw..” tiin a beng bulah chuan ka phun sep a.. ani chuan thei leh thei loin a kut chuan min rawn dek a

“Naktukah Rodo a rawn kal dawn ania aw.. muttui nu, ka hmangaih che..” tiin ka mangtha ta a..

Ka pindan kawngkhar kik ri chuan min kai harh zawk a. Tho mai lo chuan sana ka han bih a

“Lalpa leh!! Zing dar 10:30 a lo pel daih tawh maw? Ka hah tawngkhawng viau anih hmel..” ti chuan ka phun sep a..

“Kan pitarte chua  va mu tui awm ve..” Rodo chuan rawn luh pah chuan a rawn ti lauh lauh a

“Khatiang anga ka mut tui lohna chin pawh kha ka hre tawh lo” ka mit nuai niah niah pah chuan ka ti a

“I ril a tam em”

“Ka hre lo. Ka nu a tha em?” ka ti a

“Um.. min hre tawh lo in ka hria I nu sawn..” nui pah deuh chuan a ti a

“Ngeiawm suh Rodo, I nu hmasa zawk anih saw..” ka tih chuan a nui hak hak a

“Naktuk zingah ka let leh nghal  a ngai dawn a.. nangmah chiahin I awm hreh em?”

“Khawnge Ibrahim?” Ka sawi rual rual chuan ka inchhir lehnghal . Ka u hian a ngaina emaw a ti ngei ang!

“Istanbul lam panin an thlawk chhuak tawh, ka pa thil hmanhmawhthlak deuhah a puih a ngai a. Keini pawh heath  hian kan awm rei a ngai lo maithei a ni..”

“Ngati?”

“Chairman in Istanbul lama inenkawl dan ngaihtuah turin min ti a..”

“I sawi awmzia chu Ibrahim pa maw?”

“Aw ni e. Mahse Lisa thil pakhat hrilh duh che ka nei a..” ka mitah tak min en pah chuan a ti a

“Aw enge?”

“Chairman hi ka pa thiantha ber a ni tih ka sawi tawh ti raw..”

“Umm.. min hrilh tawh kha..”

“Ka nu hian fa dang a nei tih a hre loa. A hriat chuan ka duh angin ka pui thei dawn si lo che u a, chuvang chuan Istanbula a in inhmu anih pawn ka nu nurse angin I awm thei angem?” a tih chuan ka ngawi reng a

“Ka tihpalh lutuk.. Chairman hi pa khirh tak a ni a.. mahse a rilru a chhe miah lo ania..” a rawn ti leh a. Keichuan a dar nghenin a banah ka chelh a

“Rodo, hetiang hi itih kher a ngai lo tih a sawi ka chak lutuk mahse ka mamawh takzet si che a ni. Ka tan chuan I theihtawp chhuah la a awm lutuk mahse ka nu tan leh zel hetia I ti hi ka tan chuan beisei phak piah lam a ni. Ka lawm lutuk u..”

“Zing thawh vela tah a tha ngai lo.. va intifai la thil ei vat rawh. Chuan, tunah rih chuan kum a laklawh em a, session that atanga class kal zawm turin I rilru I siam dawn nia..”

“Maw.. I ti tak tak em?”

“Ti tak tak lo hmel ka pu mi?” a nui zui deuh bawk a

“Mahse Rodo..”

“Enge?”

“Keimah lam chauh ka lo inngaihtuah a.. nang hian engtikah nge nupui I neih ve dawn a?” ka ti a

“Khatiang chu naupang lo ngaihtuah tur a ni lo..”

Ka inbual lai chuan ka rilru ah Ibrahim a rawn lang a. Nizan lamah a bulah khan ka che mawi lo viau chuan ka hria a. Tukin zingah a let leh nghal dawn tih hria ila ka that ka lo chhuah ve deuh tur a ni. Heta Rodo mai niloa Elmas chhungkua ka han tibuai zo vek mai hi ka rilru tak chuan nuam lo ka ti, mahse keimah mai hi chuan thil tih dan engmah ka hre mai si lo a ni.

Tukthuan ka ei kham chuan ka nu pindanah ka lut a, Rodo’n a ki thutpui a, ani erawh chu an lo chiu muhil a. Zing lamah a pum a lo na vak a ni awm a, ka lo muthilhsan daih chu ka inthiam lo rilru viau mai. Mahse, doctor leh nurse te amah ngar ngarah an bur chawt avangin a hma ai daih chuan engkim chu a awlsam phah hle a ni.

“I chau em?” ka luh velah chuan Rodo chuan a lo ti a

“Aih chau lo, Ibrahim kha a chau ngawt ang, a let leh nghal mai sia..” Ani kha sawi lan phet ka tumna chhan hi keipawn ka inhrethiam lo..

“Nia, nizan a mut that loh phei chuan a chau viau ta ve ang..”

“Rodo, ani kha kei aiin I duat em?” nui pah deuh chuan ka ti a

“I thik tihna maw?”

“Teuh lo.. thik a ni lo..”

“Anih enge?”

“Ka unaupa sa reng inia, thikna chhan tur a awm hleinem. Kan thil neih loh midangin an va neih, neih ve duhna thinlung kan put hi alawm thikna chu. Mahse, I duh chuan mahni thil neih humhim tum tlat ang pawn min sawi thei ang..” nui har har pah chuan ka ti a

“Unaute chu inchhuhsak thei ah I ngai a mi?” a ti a

“Ka hre lo, in inhmangaih hmel bik em alawm..”

“Keini pawh kan inhmangaih tho alawm” a ti a

Rodo kianga ka awm avang hian ti khawp hian ka thlamuang dawn tih hria ila kum kaw kalta khan kan in a chhuahsan loh nan khan engkim ka ti ngei ang. Mahse, ti hian ka ngaihtuah a, ani khan kan in kha chhuahsan lose tun ang dinhmunah hian ka nu tunge min enkawlpui ta ang? Ka nu leh pa vangin a tawrh te khan a viau mahse a tanpuitu zawkah a tang leh a, ani hi ka neih hlut ber a ni.

Inchung verandah lamah chawhnu boruak thiang tak hipin ka thu a. Kan khua a nih vang nge ka rilru chu a hlim veng veng a beiseina sang tak ka nei a ni. Tlak danna kil lam a inlem lian vak lo ka hmuh chuan ka pan ding chat a, a kawngkhar te chu inhawng theiin a lo insiam vel thlap a, ka lawm takzet! Khawih kualin ka nui ver ver a..

“A va hmuhnawm awm ve..” Rodo chuan a rawn ti a

“He thil hi a mawi lutuk..” ka lo ti vat a

“Ibrahim siam anih kha..”

“A va thiam ve..”

“Nia.. Company ah hian a luh kher hi ngai lo se chu artist ropui tak a ni thei ang..” a ti a

“Chuti maw?”

“Um.. an ina ka luh khan kum 18 a ni ve tawh a, Chairman nen khan a art work vang khan vawi tam tak an la inhau fo thin” nui pah deuh chuan a ti a

“Anih chuan tunah kum 27 a ni tihna ni maw? Ka lo ti vat a

“Chhiarkawp ah ila bawn reng anih dawn hi” a ti a

“Rodo, an inah I lut tawp tihna  a mi?” hriat belh chak zet chuan ka lo ti a

“Um.. apartment hran luah ka tum a, Chairman leh a nupui hian an phal tlat loa.. Chuan thla khat ka awm hnu phei chuan Ibrahim pawn min ngaina em em tawh a..”

“Nang hi ngaina lo tu che an awm anih chuan an mahni thiamlo a ni ngei ang ka ti a.

IBRAHIM ELMAS

Ka pa thupek angin Istanbul piah lawka thingtlang khaw pakhatah ani chu ka zui a. Zan hmasa lam mut kham loh nen lu na bur chungin hun ka hmang nileng thak a ni ber e. Hna thawh tur a tam hran loa, awl erawh kan awl viau. Mahse, mak ta em em chu kha Melisa kha ka mitthla atang hian ka paih bo thei lo a ni ber e. Engvang nge ka hre lo. Nalh tak taka inchei, mi lian fanu sexy tak tak ka hma a inlan tam tak an awm nitin a, tuna ka rilru put ang zawng hian ka en ngai lo. Hmeichhe tam tak chu ka lo hmu in riah dun hial pawh kan lo riakdun ve fo tawh alawm, mahse ka rilru ah an awm zui ngai lo. Ani erawh kha chu thawmhnaw inchei lo fahran a inbel bak ka hmu ngai loa, a hmeltha tak tih mawi belh turin makeup a hmang lai lah ka hmu ngai hek lo. Chu chuan em ni ka rilru hian danglam bik riau a a hriat tlat ni.

“I u lo sawipui la, a nu buaina chungchang hi a zualpui a fel hunah nupui nei turin lo inring rawh se” ka pa chuan a ti a

“Inhualna neih tir I tum lo tihna maw?” ka lo ti vat a

“Aw, a ngai hran lo. Vawi leh khata tih pawp loh chuan engtikah mah ani hian nupui a nei loang” ka pa chuan a ti a. Nih pawh a ni reng lah tak a. Vawi tam tal party na ah pawh ka lo hruai ve fova, hmeichhia hi engatan mah a ngai lo a ang ka ti hial thin. Mahse, zan khat a lo in hnem deuh a, thil tam tak min hrilh a, a hringtu nu vanga chhungkaw din a hlauh thu a sawi a ni.

Vawi tam tak Adile chungchang ka sawipui a, zanriah ei pawn an chhuak dun ve fo bawk. Mi fing tak a nih avangin mawi lo takin a che ngai dawn lo tih chu thil chiang sa ni mahse keichuan duh angin thil a kal loh ka hlau ber a ni. Tin, Adile hi nupuia a nei lo anih chuan ka pa sawi ang deuhin engtikah mah nupui a nei loang.

Kan in kan thlen chuan ka chau zawr hnawp a ni ber e. Shower a tui ka inphuh tir seng seng pah chuan zan hmasa lama Marmaris a kan Villa a thil thleng chu ka ngaihtuah a, mi a ang maiin ka nui ka nui mai. Ni e, a atthlak takzet a ni! Hmeichhe pakhat che sang lo zet mai ka tawng a, a awmdan mawlmang tak tak vangin ka nui ka nui mai chu a ni sia. Khawnge Ibrahim, che fel lo tak haw em em thin kha a awm tak daih le. Min zah loh dan em em mawlh mai kha! Midangah lem, khawi hmunah pawh kali la Company lian tak CEO ni mai tur ka ni tih an hre ran a ni ang chu, min biak that loh hlau in an phi buai chuk a, ani ve kha zawng min mamawh tu zawk a ni chung pawn that chhuah kha a hreh em em bawk si a. Ani nge kei hi atthlak taka che zawk pawh ka hrethiam nek loe!

KOŞULSUZ SEVGİ

***RENGPUII GUITE***

CHAPTER -5

RODOSLAV HARALANOV

“I hman tawh em?” kawngka kik vak vak pah chuan Lisa chuan a rawn ti a

“Aw hman..” tiin kawngka chu ka hawng a, mi a lo nuih sen sen a

“Kan pahniha kan chhuah hi a tha ka va ti loe Bawihi” ka sana bun pah chuan ka han ti a

“A rei dawn lo. Chuan, Car ka khalh thei angem?”

“Enge I hriat a nang hi?”

“I hre mai dawn alawm.. lo kal rawh” a ti a, kan inzui chhuak ta a..

“Rodo, kan in awmna ila hria em?” Car khalh pah chuan a rawn ti zawi sep a

“Hria ang chu..” zangkhai vah chuan ka lo ti a

“Marmaris ah hian ka thinlung hi a bet tlat keichu..”

“A ni thin alawm..”

“Nang I ni ve em?” tiin min zawt a

“Aw, ka pa awmna a ni miau alawm..” tiin ka chhang a

“I pa hmu turin kan kal dawn tunah hian” a tih chuan ka lo ka ho a. Ka nau hian hetiang a tih hi ka ring thei lo zawk a ni.

“I pa hnenah lawmthu sawi ka duh a” a rawn ti leh a

“Aw.. Lisa, I puitling ve tak tak tawh anih hi..” ka tih chuan a nui seih a

“Ka lawm e..”

“Dik tak chuan kum nga lai ka tlawh tawh miah lo asin.. hmalam pan ka duh vangin..” ka lo ti a

“Hmalam pan tur hian ka hun kal tawh kan kalsan a ngai fo thin alawm. Mahse, hriatrengna atangin kan paih thei ngai dawn chuang loa chuvang chuan  a hreawm emaw a hlimawm pawh nise a aia tha beiseina nen naktuk hun kan thlir a ngai zawk fo thin ania..”

“Engtin nge ka paltlang kha ka hre lo zawk a ni..” tiin thawk ka han la vak a

“I hriat kher a ngai hleinem.. tuna I dinhmun I hriatchian chhung chuan..”

“Chibai  Mr. Haralanov, Melisa Ince ka nia.. I fapa duhtak nau, ka hmu che chu ka lawm takzet” tiin a pangpar ken lai chu ka pa thlanah a dah a.

“Chibai ka pa” tiin chibai ka lo buk ve bawk a

“Rodo hi a lo upa ve tawh I ti viau lo maw.. khabe hmul leh hmuihmul te a nei ve tawh a nia. Mahse, a awm lo miah lo, kum 30 a pel ve tawh a. Tuna I beisei chu ka hria lawm, a nupui leh a fate nena hmuh I beisei a ni tiraw. Keichu a nupui ka ni miah lo a nia, I beisei ang I hmuh loh vangin ngaihdam ka dil sak e” a tih chuan nui lo thei loin min siam a ni.

“Ka pa chu tlawhtu fel tak a neih avangin a hlim ngawt ang..” ka lo ti a

“Mr. Haralanov, Rodo anga mi tha U min pek avangin ka lawm e. Tunah hian hmuh thei che ila chuan ka lawm em avangin ka kuah ngei ang che. Ani hi min venhim sak zel ang che aw, a chhan chu a tel lo chuan engmah ka ti thei si loa..” tiin a tawng leh mawlh mawlh a, keichuan a darah ka lo kuah a

“Ka pa, he nula hi ka tan chuan naupang tawng birh berh tak a la ni reng anih hi, ala danglam thlawt lo..” a tih chuan kan nui dun ar ar a.

Thlan tlawhtu nei lo hmun chu a hnawkin hmuh a hreawm lek lek a ni. Lisa chuan a bul vel chu tifaiin lei te chu hreh miah loin a khawih bawrh bawrh a. Keichuan ka lo thlir reng a.

“I bal vek dawn ania, duhtawk rawh. A tifai tur kan ko mai dawn nia..” ka lo ti a

“I tih peih loh pawn a tifai peih chu lo sawisel kher lo la..”

“Peih loa?” tiin a thil khawih lai chu ka zuk khawihpui a

“Lo ti ve suh, suit I hak kha!”

“A ho ee..” tiin ka khawih lui tho a, ka pa thlan vawi tam tak ka kal tum a ka mittui a tlak miah loh awmchhun a ni. Mittui tlak a hnekin ka nui ka nui mai.

Kan haw lam chuan khua a thim lek lek a, Car khalhtu zawkah ka tang ve thung a. Kan pahnih chuan kan tetlai hun sawiin kan hlim duh hle a..

“Ka cake siam sak che I ei duh loa, a hnu a I eiruk leh kha ka hmu reng che a sin” nui ar ar pah chuan a ti a

“Engtik in maw? Ka hre ve miah lo” tiin ka lo chhang a

“I hrechiang lutuk aw! Choka ah ka rawn lut a, fridge hawngin hmanhmawh zetin ilo keih mail mial a” nui vak vak pah chuan a ti a, chutih lai chuan Ibrahim call ka dawn chu ka chhang a, Lisa erawh chu za mang khengin a lo la nui chiam chiam a..

“Ilo nui lo lawk thei a ngem call ka chhan hi..” ka han ti a

“Tuna I awmdan kha hmana I sual vak lai kha a ang lutuk” tiin a nuih zawm leh vak vak a..

IBRAHIM ELMAS

Ka pa thu min hrilh ho hrilh chhawng tumin Rodo ka call a. A bula awm hmeichhe nui ri har har chuan engtin mawni tak ka rilru chu a tibuai a ni.

“Tunge I bula nui vak vak kha?” hre reng chung chuan Rodo chu ka han zawt lui kher a

“Lisa mawle, ruih nei a ang khawp mai a nui tawp hlei thei lo..” Rodo chuan a rawn ti a

“Awle..” sawi mai tur ka hre lo, Lisa hmel nen ka hmeh bel a, a inhmeh lo thlawt a ni.

“Enge thu pawimawh a awm a mi?”

“Ah..aw thil dang daih..”

“Minute sawm hnu velah min lo call ta che. Hei kan thleng tep tawh, motor ka khawlh laklawh lutuk a” a rawn ti a

“Awle..” tiin kan inbiakna chu kan titawp zui ta a..

Engvanga kha nu nui ri kha ka benga cham tlat nge anih ka hrethiam lo. Hlim taka a nui ve kha mak ka ti nge chu chuan ka ngaihtuahna atangin min paih tir thei lo zawk! MIhring a ni a, hun hreawm tak tawng mek mahse hlim takin a nui ve theih lo tihna em ni? Ni e, a dik chiah alawm.. hlim taka nuih chu tupawn kan phu vek reng a ni.

Hun dang ang lo takin minute sawm liam chu ka  nghakhlel em em a, a nuihzathlak lam zawk hial a ni. Enge ni vak Rodo ka call anga, ka pa in a thu min hrilh chhawn hrilh leh mai bak tih tur ka nei lo. Chu tih rual chuan ka rilru ah erawh ka thil tih tur chu dang riauin alang bawk si. Rodo bulah Lisa a awm vang a ni ngei ang.

Rodo call tumin ka cellphone chu ka han la a, ngaihtuahna dang daih ka rilru ah a rawn lang a. Lisa biak ka chak tih chu phat rual a ni lo. Atthlak ti rilru hle chungin Lisa number chu ka save chu ka han hmet chhuak a, ka awmdan vanga insit ru tak chungin ka han call a, ka lungphu te chu a rang lek lekin ka hria a ni.

“Hello..”

“Lisa”

“Aw, Ibrahim enge ni ta?” aw zang vah hian a rawn ti a

“Villa in thleng tawh em?”

“Aw, hei ka roomah ka lut fel chiah..”

“Rodo kha ka call tlang thei miah loa..”

“Anih chuan ka’n pe dawn a mi?”

“Aw, I tan a buaithlak loh chuan..”

“A harsa hleinem..” a ti a

“I nu a tha em?” ka han ti vei rawk a

“Aw tha e..”

“A that chuan a lawmawm e. Zingah khan kan in mangtha hman ta si loa..” ka ti a

“Nang hi ruih I nei a ni lo maw.. I va polite ve..” he nu tak hi chu, chimawmna hian a kalsan hleithei lo a ang..

“Enga??”

“Aw, hei inbe ru..” a rawn ti a

“Ibrahim Elmas, tuna ka ngaihtuahna hi a dik em?” Rodo chuan a rawn ti a, he pa hian min hrechiang mah mah a ni.

“I ngaihtuahna chu min hrilh thei angem?” ka lo ti let vat a

“Anih loh hram beisei phawt ang!”

“I phone ah ka call tlang thei lo alawm thiana..” ka han ti a

“Aw, a nih ka ring. Hmeichhe dang chunga I chet ang khan ka nau chungah chuan I ti thei dawn miah lo ania..” a rawn ti a

“Hrep tak chuan! Mi tih zah bak thiam ai nei lo a mi? I bulah khan a awm lo ti raw..” ka han ti a.

“Haha.. awm lo, awm lo. Engvangin nge I zah ngawt anga?”

“Chu chu keipawn ka lo ngaihtuah mek a..”

“Tan rawh le..”

“I nupui neih turah ka lawmpui a che!..” nuih sawh deuh ti tih chuan ka han ti lang lang a

“Enga!?”

“Ka sawi nawn thei loang..”

“Enge ka pa in a sawi a?”

“Adile nen inhualna awm loin in innei dawn anih hmel a”

“Chutiang chuan ka pa chuan a ti amaw?”

“Aw..”

“Company buaina piah lama ka mimal buaina hi a hre lo chu a ni em lomaw?” a tih chuan ka nui lek lek a

“Hre loa aniang. I hrilh tha dawn em niang?”

“Fiamthu chhen teh suh..”

“Tak takah I mimal buaina zualpui a zawh hunah Adile nen in innei dawn a ti”

“Chu chu engtik laiin nge a sawi?”

“A sawi hun lehzel chu enga tan nge I tih a?”

“Official takin a mi ka tihna nih chu..”

“Ni lo, ka bulah a sawi..” ka ti a

“I van hahthlak tak! Chutiang te chu naktuk lama ka lo let hunah I sawi thei mai lo a mi?”

“Ka phur em a ni..”

“Lo phur vak duh suh.. Chhungkaw din chungchangah chuan ka duh dan bakin ka kal dawn lo..” a ti ram hmak a

“Ka hria alawm.. I nu enge a an?” ka ti a

“A tha lutuk. Lisa pawh a tha ania, lo ngaihtuah duh suh..”

“A tha e, ka Bawihtei leh a nu chu lo enkawltha viau ang che aw..”

“Bawiha, huangtau vak duh suh aw..” a rawn tih chuan ngeiawm zetin ka lo nui lui a..

Engvanga hlim ru riaua inhria nge ka nih ka hre lo. Rodo hian a nau hi ka hnaih a hlau hle tih chu a hriat reng mai, keipawh Rodo dinhmun angah hian ding ila ka ni ve tho ang. Ka thinlung chuan Rodo nau anih vang hrim hrim pawha hnaih loh chu tha ka ti mahse ka la tem miah loh hmeichhe danglam tak hian luh thuk tir min ti chak zual sauh sauh zawk niin ka hria.

Min en mai tu chuan ka danglamna an hre hauh loang. Mahse, keimah hian ka inhria a ni. Thinlung taka vei hi engmah ka nei ngai lo, Company chen hian. Mahse, heng hi chu ka koa a tlak tak tak hnu chuan ka danglam chhoh ngei ka ring a ni, ka pa leh Rodo sawi ang chaihin.

Office ka thlen chuan Rodo chu a lo thleng fel diam tawh a, ka rin lawk ang chiahin.

“Vawiin lamah I let thei dawn em?” tia ka lo zawh vat chu ak inthiam lo hnu hnawh. Rilru a vei thup chi ka ni lo tih ka inhrechhuak  bawk a

“Thei lo, ka pa nen thil kan sawi dun a ngai a..” a ti a

“Ka pa in Istanbul lama insawn turin a duh che u kha..”

“Ni e, kha mi chungchang kha a nia kan sawi dun dawn..”

“Vawiin chu board member thenkhat nen damdawiin tlawh kan ti a, chumi hnu chuan hna ka nei tawh loa. I duh phawt chuan..”

“Nang hi?” khun khan taka min melh pah chuan a kutzungtang chuan min kawk zeuh a

“Aw, inbengdai rawh! I chhungkua te an nia, puih che ka tum mai alawm..” tiin a kut chu ka dah thlak sak a

“I ti takzet em?”

“Kal chak viau turah min ngai a mi? Company thil nen I hah em em a, ka khawngaih che a lawm..”

“Awle, lawmthu chu nakin lamah aw..” tiin min kalsan ta a. A la thutak lutuk chuan ka nuih a ti za lek lek a ni.

Ti fuh inti zetin nileng hun ka hmang a, ka hna thawk te reng reng chu ka phur sarh mai, Melisa Ince chunga lawmthu sawi hial a ni ka duh ni! Ani laka ka rilru putdan hi a tun hun ngawih ngawih a ni ber e. Hma lak tumna rilru em em ka pu loa, ani ka hmuh huna ka awmdan tur lah ka suangtuah thiam hek lo. Thil anih dan anga awm tir duhna rilru ka put vawikhatna a ni hial ang.

Airport ah Marmaris lama ka thian hnai takin min lo hmuak a, Villa lam panin kan tlan ta a. Villa kan thlen chuan tlai lam dar 4 a ri tep tawh a, boruak pawh a nuam tawk viau a ni. Car atanga ka chhuk chuan inchhunga lut nghal mai loin ka han zi mar te te a, inchung verandah lama ka thil hmuh chuan min ti phur zual sauh mai. Melisa chuan kum tam tak liam ta a ka inlem siam chu uluk taka en in a lo khawih mial mial a.

Inchhung ka luh chuan ka pindan lam pawh pan hmasa loin Melisa awmna lam chu ka pan ding nghal a. Ani chuan a thil tih ngai chu a lo la ti reng a. Chu zawng ai mah chuan a inchei dan mawlh chu! Kekawr bul tawi tha tiu teu tak mai leh kawr dar bak satin puan sen duk te mai chu a ha a, a sexy takzet!

“Chibai Melisa..”

“Awi! Min tiphu lawm..” tiin a rawn hawi chhuak a, nelawm tum tak chuan ka lo nuih a

“Ka tihpalh..”

“Enge I rawn tih dawn?”

“I u a rawn let hman dawn si loa.. zanin nen zan thum chu ka awmpui thei ang che u..” ka ti a

“Kan van tibuai tak che u, nang leh zel chu!”

“A ho lutuk.. ka hman lai tak in nang a ni mai a..” kan inbiak dan dang ta lutuk chuan min tibuai lek lek

“Ka lawm takzet aw..”

“A ho lutuk. I nu a tha em?”

“Nichin khan a pum na a ti leh vak a, ka mangan hman a nia aw.. Rodo rawn biak mai ka tum a, nangmah zawk I lo kal thei pawh hi ka lawm lutuk..” lungngai tih hriat tak chuan a ti a

“Puih theihna ang angah kan inpui dawn nia..” ka ti a

“Inhnuai lamah I chhuk ang, I inthlak duh ang nangpawh. Coffee ka lo siam dawn che nia..” tiin kan inzui thla ta a..

Ka ngaihtuahna hi Rodo’n hria se dimna tel miah loin min khawih duh ngei ang. Chutiang hun a thleng anih  chuan a nau hian eng nge maw takin ka ngaihtuah a siam tih hi ka hrilh duh maithei a ni. Ka hmeichhe chhuahpui thin te ang lo takin ani chuan min pek tur engmah a nei loa, engmah ka phut lo bawk. Hmeichhe khawngaihthlak tak a ni tih ka hria, mahse ka khawngaih lo. Mi tu emaw ka hriat chian loh ka khawngaih mai mai ngai lo. Mahse, ani hi ka hrechiang chak takzet  a ni.

“Rodo nen kan inbe zo chiah a, I lo kal tak tak pawh a rin loh thu a sawi a..” tiin coffee chu min rawn pe a

“Zingah kan sawi dun hman zuai chauh a ni..” tiin coffee chu ka han in a

“Ah.. coffee vang hian ka lawm e, ka lei a ti kang deuh tih mai loh chu!” ka tih chuan a nui a, a nui hmel hmuh ka chak tih ka hrechhuak zawk mai

“I in nghal ringawt anih kha.. chhem phawt tur alawm..”

“Ka dang a ro deuh a ni ngei ang..” ka lo ti vat a

“Anih chuan in teuh rawh. I duh chuan a dang pawh ka la siam peih ania..” a lo ti vat a

“Ni hnih pum hlum hun ka la nei alawm. I siam tui lutuk tlat..”

“Ka nu ka chhunna ve na anih kha!”

“I nu in coffee siam a thiam viau aniang maw?”

“Um, dawr a nei thin a, cake leh coffee a siam thin alawm..” phur tih hriat zet chuan a ti a

“Anih chuan thla leh ka pianchamah cake I siam ngei a ngai ang..”

“Oh.. chu ti maw? I kum engzatna tur nge?” ka lo ti vat a

“27..” tiin coffee chu ka lem leh khalh a

“Hun in rem a tih phawt chuan theih tawp ka lo chhuah ang..” a ti a

Zanriah ei khamah chuan ka pindan lamah ka awm a, Lisa erawh a nu bulah hun a hmang thung a. Rodo nen reilo te kan inbia a, a nu chungchang kan sawi dun a. Sawi nuam tak chu a ni lo na in a nu ah hian hmasawnna pakhatmah hmuh tur a awm lo a ni. Doctor te chuan damdawi dik lo hmanga enkawlna a dawn kha a taksa ina  ngeih lo zual em em a, chu chuan nasa takin a cancer mai piah lamah a taksa dang pawh a nghawng niin an sawi a ni.

Kan inbiak hnu rei vak loah Rodo call ka dawng leh a, ani chuan hlauhthawn hmel takin inhnuaia a nu en turin min rawn hrilh a, keipawh chu hmanhmawh zetin ka chhuk a. Mrs. Ince pindan ka hawn chuan Doctor leh nurse ho chuan an lo buaipui laih laih a, an sirah Melisa chu mittui tla chungin a lo ding a. A tap hmel ka hmuh chuan enge ka hriat ka hre lo, a bulah va dingin nghet takin ka va kuah a..

“A tha vek dawn alawm..” tiin ka awmah ka bei tir a

“A vein an hmuh ngei ngei a ngai. Jection saw a lak loh chuan a thih mai ang..” a ti tham tiak a

“Theih tawp an chhuah a lawm Lisa..”

“Sir, pawnah I lo va chhuahpui thei angem? Lisa a dik chho dawn ania, pawn lamah lo va nghak lawk mai t ache u” Doctor in a rawn tih chuan a mittui tling puam chung chuan min rawn chhoh en a..

“Kal ang aw..” ka lo ti vat a, a lu a bu nghauh a, pindan atang chuan kan chhuak dun ta a..

KOŞULSUZ SEVGİ

***RENGPUII GUITE***

CHAPTER -6

MELISA INCE

Hlauthawng reng renga hun hman hi ngaia neih a lo har teh zawng anih hi! Hlim takin nui ve hak hak thin mah ila rilru ah ka nu engtik hun pawha min kalsan thei a awm tih hriat reng chuan thla  a muang  tluan tling thei lo. Ka bulah Rodo a awm lo tih ka hriat ngat phei chuan ka hlauhthawnna hi a zual thin. 

Zan hnih lai chu nasa taka a buai thin ang khan a buai lo ve a, kan unau pawn kan lawm viau nghe nghe. Zanin pawn  tha pangai taka zan kan hman mai ka ring a, chu chu ka duh dan a ni. A chhan chu ka bulah Rodo a awm loa, Ibrahim awm mahse Rodo ang tak takin ka pawh ve si loa keimah zawk hi ka hlauhthawn luatah ka chet buai leh mai ka hlau a ni.

Hun tha zawk a thlen chhoh zel beisei laiin kan duh loh leh ka hlauhthawn em em  thil a rawn thleng ta si, ka nu chu a hma zawng aiin a buai a ni. A thawk a hah a, oxygen pek a ngaih mai bakah jection pek na turin Doctor te chuan a vein an hmu hleithei tlat lo.  A tirah chuan a dik chhoh mai beiseiin hlauhthawnna em em ka nei lo mahse  a rei telh telh a, a na tuar thawm nen chuan min ti mangang takzet! Ka bul maia awm Ibrahim lam ka ngaihtuah hman tawh lo, ka u chu hmanhmawh taka callin thil awmdan nasa taka tap chungin ka hrilh ta a.

Ibrahim chu pundan lamah rawn lut vatin min rawn buaipui vat a, in pawn lamah boruak hip turin min hruai chhuak a. A awm nghengin ka thu a, tha reng reng nei lo ang maiin ka inhria a ni. Ani chuan ka awmdan hrethiam tih hriat takin ka samah a chul a, Rodo’n a tih thin dan ang chiahin!

“Heta ka awm ve chhung chuan Rodo ko buai tawh suh aw..” a rawn ti a

“Ka hamhaih vek a” aw khur lek lek chuan ka lo chhang a

“Ka thiam loh a ni. In nufa awmpui turin ka lo kal a, ka pindan a tawm reng tur ka ni lo hrim hrim” a tih chuan thei leh thei loin ka lo nui a

“I tha deuh tawh em?” a rawn tih chuan ka hnaih rei mah mah a ti ang tih hlauhthawnna chu ka nei a

“Aw..” tiin thut kan ka tum a, ani chuan min rawn kuah nghet sauh a

“A pawi lo.. I hlauhthawnna a reh hma chu tikhan awm reng reng rawh” a tih chuan a hmel enin ka han dak chho a

“I thlamuan phah a nih ve hlauh chuan!” min lo nuih zeuh pah chuan a rawn ti a..

Lalpa leh! Enge ka ngaihtuahna chu ka hrethiam lo. A hmeltha tih chu hai rual a ni lo. Mahse, zanin a awmdan te nen zawng zawng hian engtin mawni tak keimah ah hian a fan a ni. Ka hmuh tir lama chimawm leh ngeiawm tak taka a awmdan thin ang kha tuna a awmdan nena tehkhin chuan a inhmeh lo zawk hial a ni. Ni e, hetia duat taka min chul leh a tawngkam zei taka min hnem hi a awmdan ka hmuh ve tawha a inhmeh ber a ni hial ang.

Thu tha thei tur chuan chakna chu ka nei tawh ngei alawm. Mahse, a awm a bei a, thlamuang taka a tawng ri ngaihthla leh tur hian ka tan hun a inher leh chiah angem ka hre si lo, chuvang chuan ka taksa chu a nihna aiin ka dah zawi a, ka mitchhingin a tawng ri pa tak chu ka ngaithla ta reng a. Engvanga nuam ti em em nge maw ka nih le? Chu chhanna chu keipawn ka nei lo mahse chiang takin he thil hi ka sawi ngam a ni. Keiin nuam ka tih ang hian khawvel hmeichhe tam zawk hian he Ibrahim awma thlamuanga taka bei hi nuam an ti ve ngei ang.

“Rodo hi hmuh leh I inbeisei em?”

“Um… nitin ka beisei a, zantin tawngtaina ah ka dil ziah thin” tiin ka chhang a

“I tawngtaina chu chhanin a awm anih chu”

“Nia, chhan loh a tan chuan ka dil zing em a ni” ka tih chuan a nui hak ri ka hria a

“I chanchin a sawi nasa thin lutuk alawm. Ani chuan I huat tur thu a sawi thin a. Unau inni tih a sawi tel ngai si loa, a first love torah ka lo ngai tawp zel a..” a tih chuan ka nui huk a

“Nia, a chang chuan ka haw thin. University ka zawm theih loh ngat phei kha chuan ka haw lehzual. Engtin nge khatiang anga nasa a tawrhna paltlang tur khan keimah chiaha min dah thei nge a nih tih zawhna hi ka inzawt fo thin a” ka tih chuan ka mittui a lo tling leh hman a. Ka mittui tla hma thin lutuk hi chu aw… Ka insut deuh fek atang chuan Ibrahim chuan a hrethiam a ni ngei ang..

“Khawimaw” tiin ka lu chu a lam her  turin a han kuai deuh a

“Aih ka tha, ka tha” tiin ka lo tang a

“Anih leh le.. I duh chen chen tikhan I awm thei ania..”

“I lungphu ri ka hre thei..” ka tih chuan a nui hak a

“A rang em?” a rawn ti a

“Um, a pangai ai chuan a rangin ka hria..” ka tih chuan a nui uar sauh a, ka lu chu kanin ani chu en ha pahin

“Enge  I nuih vak a?”

“Enge lungphu pangai chu ka hre chak deuh a, mipa lungphu I vawikhat hriatna a mi?” min fiam tih hriat tak chuan a rawn ti a, a nui mawi takzet!

“Aw, tiang anga hnaiha ka mipa awmpui chu Rodo leh ka pa chiah..” ka ti a

“Chuan tunah chuan keimah ka tel a..” a va han zei tak!

“Um..” tih mai bak sawi tur ka hre lo. Ani chuan min ka dara min rawn kuahin ka lu ah chuan a fawp zeuh a,

“I duhawm takzet Melisa..”  

“Lisa I nu chu a muhil tan mek e..” hnunglam atanga tawng thawm  ka hriat chuan khawvel dang daih a cham ta veng veng ah ka inngai mek tih ka hrechhuak zawk a

“Kal ang Ibrahim” tiin ka tho nawlh a, ka nu pindan lam ka pan phei ta a.

Pindan chhunga ka luh chuan ka nu chu a lo muhil a, a thlamuan hmel takzet! Mahse a taksa inthlak danglam chak zia chu hai rual a ni lo. A hma a nulian tak ni thin kha Cancer natna in a han sawp meuh chuan a vun pante, zur hniai te chu ruh khuhtu atan a awm ve chang chang ang chauh a nih tawhin ka hria a ni.

“Han chawl hahdam la, zanin chu I nu hian awmpui a mamawh ang” Ibrahim chuan rawn luh pah chuan a rawn ti a

“A ngai lo. Keimah pawh ka awm alawm..” tiin ka lo chhang vat a

“Tunah rih chuan ka kalsan thei lo che u, Rodo ka hmachhawn duh miah lo a nia..”

“Chawlh I neih hunlai hi remchangah la la mu hahdam zawk rawh Ibrahim”

“Ka thei lo ka ti tawh..” a nui suk a

“Awle, a nih kan pahnihin kan awmpui dawn nia.. I duh chuan sofa ah pawh sawn I mu their eng ania..” ka ti a

“Min ngai nep viau teh suh. Luhlul chhuah lo phei la chuan I pindanah I mu than anga, keiin I nu ka lo awmpui ang, ka mu miah dawn lo ania..” a tih chuan ka nui a

“Anih leh le.. Inhnial tawh loang..”

“Tihian Doctor leh nurse te hian an menpui reng tihna a mi?”

“Aw, pakhat v eve in an en chhawk char char thin a..” tiin ka lo chhang vat a

“A that chu. Istanbul lama insawn a rem anih phei chuan engkim a awlsam zawk ngei ang..”

“Elmas chhungkua kan ti buai nasa hle a ni”

“Chutiang sawi suh. Rodo chhungkua chu kan chhungkua an ni ve tho alawm..” a ti a

“Rodo hian kan chungchang engmah a sawi ngai lo a mi?”

“Ngai e..”

“Ka nu leh pa vanga a tawrhna te?”

“Aw, mahse amah berin a ngaihdam chuan keini’n kan lo ngaihdam ve nan kan chungah engmah an ti ve hleinem..”

“A tir kha chuan min haw deuh chuan ka hria..” ka han ti a

“Ah.. nia. Dik tak chuan a first love emaw ka ti che ka tih kha. Rodo tan hmeichhe tha tak ka hual sak a..”

“Chuti maw? Engati nge chu chu ka hriat ve loh?” ka han ti hluai a, dam lo bulah ka awm tih ka hrechhuak zawk a.. “Awi, sorry.. ka lo phur  leh hluai zel..”

“Ka pa hian innei turin a duh tawh a..”

“Engtikah? An inhaul mek tihna maw?”

“Ni loe. Inhualna awm loin inneih tir an tum a ni awm e. I nu hi Istanbul lamah kan sawn phei hnu ah an tih mai ka ring..”

“Lalpa leh.. Rodo hian engmah min hrilh loa..” ka lo ti a

“Lungngai suh. Kan la nawr lui dawn chauh! E thil pakhat!”

“Enge?” ka lo ti ha a

“Buaina neuh neuh vel vang hian ka pa in I nihna dik tak a hre lo ti raw..” a ti a

“Aw, Rodo chuan min rawn tlawh thut a nih chuan a nurse anga awm turin min hrilh a..”

“Chu aia tha zawk chu ka hre maithei..” thu tak hmel fe chuan a ti a

“Engmaw?”

“Rodo thiantha ber angin I awm anga? A nu enkawl sak tu ah.. ka pa pawn a ngaina ngei ang che..” a ti a

“Chu chu enga tan nge ka tih kher a ngaih?”

“Rodo nupui neihna kawngah..”

“Oh.. tih theih ka nei dawn a mi?”

“Um.. I u hian I thu chu a ngai pawimawh ber ngei ang..” a ti a

IBRAHIM ELMAS

Hun hlimawm tak hmang chu ka ni lo mahse engkim mai chu a danglam ngawih ngawih a ni. Ka awmdan, ka ke pen tinreng mai chu tihsual hlau takin ka fimkhur em em a, kei hi ka zam tihna em ni le tiin ka inzawt a, a ni theiin ka hre bik si lo. Ka awm nghengin ka hnai setah a thu a, a tha khur a reh telh telh tih ka hriat te khan ka thlamuan ve thei ni a inngaiin ka inchhuang rilru ve hle a ni.

A nundan a hun kal tawh tlema zawng min hrilh a, keimah anga Lal In ang maia ropui a cheng a ni ve lo nangin lal fanu ang maia rilru thianghlim pu a ni thung. A nu leh pate chu Rodo nu leh pa an nih chhung chuan an fanu hi lal fanu enkawl dan dik taka an enkawl theih ka ring ngai lo anga mahse amah ah lal fanu nihna ang maia duhawmna a pai tlat thung.

A hlauhthawnna avanga a awmdan hamhaih tak te chu hmuh nuam tak ni lo mahse ka tan chuan hmuhnawm em em a, ka awm ngeng a tha zawi tih hriat taka a kun ngiai te chuan  ani duat taka enkawl leh zual thei tura dinhmun chelh chu min ti chak rum rum a ni. Mahse, ani hi Ince thisen kai anih chhung chuan chutianga ka awm chu a rem lo. Chu vang chu a ni ngei ang tun hun chiah thlir tura ka infuih ve tang tang ni.

A nu dam lo awmpuiin kan pahnihin tlaivar kan tum a. Dik tak chuan a taksa chuah hi ka lo hlau ve em em a, chuvang chuan chawl hahdam turin ka hrilh ve bawk a, mahse ka hlawhchham chiang viau a ni. Rodo chungchang kan sawi a, a nupui neih dan tur kan sawi kai chuan Rodo nupui neih ni a nalh taka a inchei tur hmel ka lo ngaihtuah thleng leh diam tawh, chu chuan Elmas chhungkua hnaih tir dan min ngaihtuah tir leh a. Engtiang taka atthlak in nge ka ngaihtuahna hi ka sen zo zai pawh ka hre seng loe!

Zanlai dar 1 a pel tawh a, Lisa chuan Ipad ah movie en in sofa ah chuan a thu thluang dar a. Keichuan a coffe siam tui tak flask-a a dah chu Laptop khawih pahin a khat tawkin ka in deuh reng a. A rawn hawi phei zeuh chang hian ka lo melh hman ziah thin

“I mut a chhuak em?” tiin a headphone vuah lai chua  phawi ziah anga

“Chhuak lo e..” tiin ka lo chhang mai thin a. Kan thil tih lai ve ve chu kan intih san leh mai thin bawk a.

Nakin lama ka hna atana ka tih chu hunin remchang min siamsak zawk vangin ka ti zo der mai. Ka piah a Lisa, sofa a thu ka va en chuan a lo muthlu berh berh tawh a. Sana ka en vat a, zing lam dar 3 a lo ri tep a. Ka thutna atang chuan tho in ka mut that tir a, puan ka sin that tir bawk a, tui taka a muhil lai chu hmuh a nuam takzet. A biangah chuan dimte in ka chul a, a hmui ka khawih thlen chuan ka ngaihtuah lo tur ka ngaihtuah a ni tih inhrechhuakin ka ding a, thawk ka la vak a. He Melisa vang hian ka inthunun theihna hi ka la hloh ngei ang le..

RODOSLAV HARALANOV

Ka tum lawk angin thil kal chiah lo mahse Ibrahim min puihna zarah thaw a veng huai mai. Ka pa nen vawiin lamah kan titi dun theih ka rin laiin ka tan hun a insiam leh thei si loa, vei ruk nei ranin hun ka hmang char char mai a ni. Zan lamah ka nu a tha lo tih ka hriat ngat phei chuan rilru a buai duh hle a ni. Mahse, Ibrahim a awm hlauh a, ka hlauhthawn ang em em chuan engmah a thleng lo.

Chairman nen ka nu Istanbul lama sawn chungchang sawiin kan titi a, ka rin ai daihin ka pa hian ka nu damna tur hian tih hreh a lo nei lo hle a ni. A khat tawkin min chhuan zia a sawi chhen a, a tul ka ti viau lo na in thil hriat nuam tak a ni. Ka pa chanchin ah kan lut leh a, hai rual loin Chairman hian ka pa kha a lo ngai takzet thin tih ka hriat belh leh a, kei ngei pawh hian ka ngai takzet a ni.

Kan titi tawpna lamah chuan Adile hming a ri leh tlat mai. Adile hi ka haw loa, ka ngaina takzet  mahse chhungkaw din tur hian huaisenna ka nei lo a ni. Tu emaw chungah rinna ka nghat thei lo nge keimah hi ka inringtawk lo pawh ka hrethiam bik chiah lo.

“Kartawp chawlhah I thiannu chu kan in a chaw ei turin I rawn sawm dawn nia..” Chairman in a tih chuan hriatthiam loh hmel takin ka melh a

“I thiantha ber chu mawle?” a rawn ti leh a

“Enge awmzia ka pa?”

“Ince chhungkaw lakah ka rilru hi a tha vak lo tih chu ka hria a, mahse I nu lo enkawl sak tang tangtu che chu ka hmu ve duh alawm..” a tih chuan thil ka man chho thei deuh a

“Tunge hrilh che?”

“Ibrahima’n tukin khan min rawn call a, ‘Marmaris a a thiantha ber nula fel takin a enkawl sak char char a’ a rawn tih luam kha” Ka sa phat mai! Ani hi a inrawlh lohna turah a inrawlh mah mah a ni

“A khat tawkin a rawn lang mai a ni ka pa”

“Chu pawh nise, Kartawpah hian Adile nen inhmelhriatna te nei se..” a tih leh ngat phei chuan an thil tum chu chiang takin ka hria a ni. Ni e, Ibramhim hian ka nau thusawi chu ka awih zel dawn tih a hria a, Adile ngainat tir a, a bula nei mai tura min ngen tir a tum a ni. Hrep tak chuan!

“Ka pa nuam a ti loang.  Bakah ka nu awmpuia  ngai alawm..”

“Chuvang tak reng chuan alawm naktuk lama I nu sawn chhuah nan ruahmanna ka siam..” a ti sam et a

“Istabul lama sawn anih chuan Marmaris lamah a awm ka ring a..”

“A theih loh, I rawn hruai ngei a ngai ang.. ngenna a ni lo thupek a nih chu!”

“I a ta a mi Ibrahim? Ka nau kha theitawpa venhim ka tum zia pawh I hria!!”

“Inbengdai rawh Rodo. I nau hi biru reng turin I duh a mi? a rawn ti a

“I lo puitling ve viau ah ka ngai a, engkim ka hrilh che a.. ka tih loh tawp tur ka ti a ni”

“Lisa phur zia I hre lo anih kha Rodo..  I pa chu hmuh ve a phu I ti lo a mi?”

“Heng thil hi Adile vang chauh a ti I ni tih ka hria alawm..”

“I ngaihdan dan le.. mahse chutiang atan chuah chuan ka ti hauh lo!”

“Anih engvang nge? I ngaizawng chu a ni em lomaw?”

“Enga?”

“Ti miah suh.. engmah a kal fuh dawn lo ania. A tan natna bak a ni dawn lo..” aw chuai raih chuan ka ti a

“Engtikah mah ka tina ngai loang, nangmah ka tih nat ngai loh tur ang chiah hian. Pangai takin lak tum rawh nupui I neih loh chuan kei hian ka nei thei dawn lo asin. Ngatinge I hriatthiam theih loh? Ka nu leh pate rilru buai zia hi I hrethiam lo anih kha Rodo..” a tih chuan sawi tur ka hre lo, call chu ka ti tawp ta ringawt a.

Pakhata buaina pawh hi a tawk viau asin le. Engvanga  buiana dang rawn awm belh leh zel nge anih ka hrethiam lo. Vawi khat chaw ei ho na ah Lisa an hmelhriatna hi tawp mai dawn se keichuan pawi ka ti miah lo, mahse a hnu lehah a nihna dik tak hi hriat ni ta se, ka venghim zo loang tih hi ka thil hlauh ber a ni.

KOŞULSUZ SEVGİ

***RENGPUII GUITE***

CHAPTER -7

MELISA INCE

Nilengin ka nu bulah ka tih thin ngai ang bawkin ka tal leh chawt a, Ibrahim erawh zan hmasa lama a men tlang vangin a pindan lamah a hahchawl a. Vawiin ni zet chu ka mood a fuhin, ka awm a nuam kher mai.  Zan hmasa lamah tlaivar tum ruh viau mah ila ka lo muhil daih a, rin chhan tur dang ka neih vang pawh a ni mahna.

Min tihlim em em tu ni a ka hriat chu chiang mang loa ka han harh a ka piah lawka nui hmel pu sanga min lo thlir reng tu kha niin ka hria. Ka lo muthilh palh avangin thupha ka han chawi a, ani chuan zan hmasa lama ka coffee siam sa flask a ka dah sak chu no ah thli in min rawn pe vat a. Vawi engzat nge a chet dan kha ka ngaihtuah nawn pawh ka hre lo, ka hlimpui takzet a ni.

Number save loh atangin call ka dawng a. Ka chhan chuan Elmas company chairman a lo ni a, a tir chuan min ti hlau lek lek a ni. Mahse, kan han inbiak zel chuan a lo nelawm phian mai. Ani chuan kartawp lama an chhungkaw zinga zanriah kil ve turin min sawm a, zan hmasa lama Ibrahim thusawi chu ka hrechhuak zawk mai. Ani hian a tih tak tak ka ring miah lo. Rodo thian tha ber ka nih vanga min kawm a chak thu te chu  sawi a. He thil hi Rodo’n a hre tawh a ngem le? Hria se engtin nge a ngaih chiah ang?

“I pa hnen atangin call ka dawng a..” Ibrahim nena zanriah kan kil dun lai chuan ka sawi a

“Ni e, ka pa nen kan inbiakin ka sawi a..” a ti a

“Hei hi Rodo’n a hria em?”

“Hria anih tawh hmel, nichin lawk khan kan inbia a..”

“Engtin nge a tih?” hriat chak hmel zet chuan ka lo ti a

“A lungawi dawn lo tih ka hria alawm..”

“Rodo lungawi lohna engmah ka ti loang..” ka lo ti vat a

“I lungawi lohna tur pawh ani’n a ti ngai loang. Nupui nei turin I duhsak lo a mi?”

“Chu chu enge I pa dawt hrilh nen hian inzawmna an neih?”

“A chhan chu nang hian Rodo leh Adile inkar nasa takin I siam tha thei a ni..”

“I pa hian a thian tha ber hmelma fanu ka ni tih hrechhuak ta se..”

“Chutiang a thleng loang. I nu pawh a enkawl duh anih chuan a pawi sawi lo zawk chungah engmah a ti loang..”

“Naktukah ka nu sawn chhuah a ni dawn tih kha I hria em?” ka tit a daih a

“Aw, ka pa in engkim buaipui turin min tia lawm. Naktuk tuk lehah kan bazaar dawn nia..”

“Engvang chuan maw?”

“A tuk leh lama I thawmhnaw hak tur en kan mamawh alawm..” a ti a

“Thawmhnaw thar ka mamawh lo. Thawmhnaw lo pawisa inhmanna tur danga  tam lutuk Ibrahim”

“Chu chu kan chhungkaw lam atanga thil pek a ni dawn alawm..”

“Elmas chhungkua chuan mikhual in neih dawn apiangin an thawmhnaw hak tur in lei sak ziah maw?” lungawi lo tih hriat tak chuan ka lo ti a

“Ni loe, ka chapona ah I ngai em ni a?”

“Tunah khan I chapo ka tia mi?”

“Enga? I tawng dan zawng chu a mak hle mai..”

“Mipa ve si, rilru te!” ka lo ti hmak a

“I bulah chuan pangai takin a awm hleih theih loh a nih hi..”

“Lalpa leh! Min ti hah takzet!”

“Kei hian maw?”

“Ni lo..”

“Ka bula bazaar tur chuan lo inring ang che..” a ti hmak a

“I thu hmel hle mai..”

“Ka thu na ah te chuan..”

“Engvanga ka chunga thu nei ve ngawt nge I nih?”

“Ka partner tur I nia lawm..”

“Enga!?”

“Partner ka tih khan inngaihzawnna lamah ilo ngai anih chuan ka insawi fiah a ngai ang..”

“Ka ngai lo..” ka lo ti ram hmak a, dawnkan chu ka thawhsan ta a..

“Ibrahima’n enge maw a rawn sawi em?” Rodo nen phone a kan inbiak chuan a rawn ti a

“Um, Mr.Elmas pawn min rawn bia a”

“Thil tul lo tak a ni ti raw..”

“Ni loe, ka phur tawh lutuk..” ka lo ti a

“Maw? I lo hnial ka ring asin..”

“I nupui hual hmuh theihna chance ka bawhpel duh I ring a mi?” nui pah deuh chuan ka ti a

“Ka nupui hual a ni lo..”

“Rodo luhlul chhuahna chi ah I ngai a mi? Hetiang ang aia chhungkaw tha hi piang nawn leh pawh nila I hmu tawh kher loang. A ni em?”

“Nih chu ni e..”

“I hna ringawt I rilru ah dah lo la. Chhungkaw din chu I tan a hun ve tawh takzet a ni..” ka tih chuan thawk a lak vak ri chu ka hria a

“Rodo, ka nu leh pa tih sual vang khan I hlauhthawnna in a kiansan thei lo che tih ka hria lawm mahse khatia awm tawp tur kha chuan ka duh miah lo che nia..” ka han ti leh a

“Ka tha lawm Bawihi. Ka la inpeih lo deuh mai ania..”

“Thil reng reng chu duan lawk vak ai chuan chawpchilh taka tih hian a thleng dikin a fuh zawk phian zel ania..” ka tih chuan a nui huk a.

Rodo dinhmun hi ka hriatthiampui takzet. Ka nu leh tih sual vang liau liauin a nun chu hlauhthawn rukna in a hman chhoh a ngai a. En maia pa chak tak anga lang si hi a thinlung erawh a no em em thung si. Adile hian heng ang a mize tak tak hi a hre chiah angem tih chu ka rilru tibuaitu ber a ni. Hmeichhe tha tak anih ka beisei a chu chu ka tawngtaina pawh a ni. Ani kawm chian a, Rodo Tanami tha a ni chiah angem tih hriat chu ka thil chak ber a ni a, a tul anih chuan Rodo enkawl dan tur hrilh pawh ka inhuam ngei ang.

Istanbul khawpui atanga hmun hla lutuk loah ka nu chu sawn a ni a. A hmun chu sawi fiah thiam phak baka nuam leh hahdamthlak tak a ni. Compound zau takah in pathum vel lian lem lo mahse nuam em em mai a awm a, chu chu Elmas chhungkaw ta tho a ni awm e.

Ka nu chu chung In pathum zinga pakhatah chuan dah a ni a, chutah chuan kei , doctor leh nurse te pawh kan cheng ve nghal dawn a ni. Marmaris ngai viau mah ila ka beisei aia nuam a kan awm avangin ka lawm rilru hle a ni. Ti hi chuan Rodo pawn min riahpui thin mahse he ta tangin Company lam a pan thei tawh anga, chu chu ka thil duh ber pawh a ni.

Ka thlen hmasa ber zanah chuan Rodo rawn kalin min riahpuia  tum nghal a, Ibrahim erawh a haw ve thung a. Dik tak chuan ani a lo awm ve khan nuam ka tiin ka khawhar pawh a reh sawt em em a, a awm loh meuh chuan ka lung a ti leng rum rum mai.

Zanah chuan ka nu a rawn tho kang ve thei a mahse Rodo a hmuh a piangin a tap dawn ti tih zel a, kan boruak a rit hle a ni. Ka nu dinhmunah hian ding ni ila keipawn inthiam loh vang leh lawm luat avangin ka tap ve ngei anga, ngaihdam ka dil hial ang. Chung em ka nu chuan a ti loa mahse a awmdan atangin ka hrethiam vek a,  an nufa inkar khi nasa lutuk hian kei ngei pawh hi min ti na a ni.

“Nangmahin I awmpui duh em?” pawn a Rodo amah chiah a lo awm ka hmuh chuan ka va ti vat a

“A ngai lo. Min hre ve chauh tihna mi le..” a rawn ti a

“Nimin khan a rawn harh tha lutuk a, thil kal dan vel ka hrilh nual a. Ibrahim nen pawn an inkawm nasa lawm..”

“Enga ti nge chu chu nizan khan min hrilh loa?”

“Hmu ve phawt la ka duh alawm. I hlim em?” ka ti a

“Aw, I hlim nana ka tih vek ania. I hlim chuan ka hlim a nimai..”

“Ka nu tan I ti nasa zawk..” tiin a ban chu ka chelha, amah ngheng chuan ka mit ka chhing a

“I chau viau a ang..”

“Nilo, hetia awm hi nuam ka tia lawm..”

“Chu ti maw? I duh duh hunah I awm thei alawm..”

“Office I kal lai pawn maw?” ka tih chuan a nui huk a

“I zah loh te chuan..”

“Ka zak lo, ka bula I awm chhung chuan mahse Adile khan ngaih loh lamah a ngai pal hang..” nui har har pah chuan ka lo ti a

“Chimawm hi tu zirtir che nge?”

“Ele nangmah! I chimawm thei zia kha ila hria em?” ka ti ha a

“Ka chimawm zia hre tur chuan I nau mah mah a ni. Engmah I hre tawh mang loang..”

“Engkim ka la hria. Min kalsan lai pawh ka la hria..” ka ti zawi sep a

“A tan leh dawn ta..”

“Ka ngai thin lutuk che Rodo..”

“Keipawn ka ngai thin che lawm..”

“I ti tak tak em?” tap aw tiau chuan ka ti a

“Aw, tunah chuan naupang chhia I ni tawh loa. Puitling taka awm tawh tur I ni tih hre reng rawh aw..” tiin ka biang lehlam lehlam chu a chul a

“Awm lo la chuan ka nu ka chan anga, ka khawvel a thim vek ang..”

“Nilo, a hun takah I bulah ka rawn thlen hi..” tiin ka chal chu a fawp zeuh a..

“Natascha a rawn kal ve thei tawh dawn a”

“Chuti maw? A lawmawm hlauh chu..” Rodo chuan a lo ti vat a

“Nia, nangpawh ilo riah kher a ngai tawh loang..”

“Ni e, ka ring tawk che u lawm..”

“Chuan maw Rodo..”

“Um”

“Zanriah kilna ah chuan ka kal angem?”

“Kal turin ruahmanna I siam vek tawh emaw ka tia..” a ti a

“I phalna la la lo chuan ka kal thei lo..”

“Ibrahim nen naktuk lamah in bazaar dawn a ni lawm ni?” a tih chuan ka zak lutuk chu ka sa pup pupin  ka hria

“Ah.. kal kher a ngai mi kha kha..”

“Aw ngai e. Kal pui che ka duh viau na in hun ka nei si loa..” a tih chuan ka nui tawi tuk ringawt a

“Naktuk chawhma dar 11:30 ah ka rawn lam ang che, ilo inpeih dawn nia” tih message ka dawn chu ka chhiar zawh chuan ka ner nang a. Filma a changtupa ang maia chet a tum ni ber hian ka hria.

Natascha a rawn thlen tawh avangin Rodo pawh an in lamah a phei a. Keini pahnih chuan ka nu awmpuiin Rodo chungchang kan sawi a, a lo danglam tawh zia leh puitlin tawh zia chu mak kan tih thu sawiin kan titi siam siam a. A khat tawkin ka nu chu a rawn nui leh suk thin, kan titi a lo hre ve a ni ngei ang.  Natascha nen chuan inen in kan nui leh ringawt thin a.

Sawi loh ka tum viau na in sawi chhuah ka chak tlat. Natascha bulah chuan Ibrahim chungchang chu ka sawi chhuak ta nge nge a. Engvang nge chu ka hre lo, ka sawi ka sawi takah chuan ani ka ngai veng veng mai.

“I duh a ni ti raw..” Natascha chuan a mit ko san aka k pah chuan a rawn ti a

“Teuh lo. A bula awm a nuam ka ti mai alawm..”

“A ni lo, ka hria alawm..”

“Nang nu hi?”

“Enge? A chanchin I sawi zawng ringawt pawn ti kha inia, a bula I awmdan ka hmu chak ngawt mai”

“Chutiang chuan ilo ngai a maw? Kei ngei pawn ka hre lo ania” ti el deuh tak chuan ka han ti a

“Aw.. ka hrechiang lutuk tlat che!”

Natascha sawi chu a dik chiah a ni. Engti atanga intan nge tih lam chu ka sawi mai thei lo. Mahse, enge maw ti lai atang khan a bula awm nuam ka ti em em a, keimah a a thawh dan chu dang tak a ni. Kan bula ni rei lote a lo chen chhung te khan a hma a ka awm lo ang takin ka awmhmunah khan lan nalh lohna ruk ka nei tlat a, a bulah khan ka chet chhiat ka hlau takzet a ni. Ngaihzawng anga ngaihtuah ngam thei ka ni lo tih chu ka inhrechiang teh meuh mai mahse he ka thinlung hi ka duh duh dana ka control theih a ni si loa.

Ka zan mu te reng reng chu ka helhhawlh emaw tih mai tur hian a tuka Ibrahim ka chhuahpui hun tur mawlh chu ka ngaihtuah a. Enge ka hak ang? Engtin nge ka sam ka tih ang? Hetiang ang ngiahtuahna hi hmeichhia ten date an neih dawn a an ngaihtuah nasat thin zia chu ka hriatthiampui ve chiah a ni. Kan indate dawn lo ka hria. Mahse, ka tan chuan keini pahnih chhuak dun tur chu a danglam tlat a ni.

Chawhma dar 11 a rik chuan ka inpeih diam tawh. Ka mawipui bera ka rin ka thawmhnaw ka inbel ve a, chuan makeup tlem ka hmang bawk. Makeup hmang ngai lo tawp chu ka nilo a, mahse ka hman lohna erawh rei tawh tak a ni. Kha mihringpa vang liau liau khan ka han hmang leh chu a nia. Mawi a ti loang tih mawlh a ni ka hlauh ni.

Common roomah Ibrahim  nghakin ka thu ran tawh a. Dar 11:20 velah pawn lama motor ri ka hriat chuan ka lungphu chu nasa takin a rawn rang a. Ka zam chhe mai tihna em ni? A ni thei loang! Amah hmuak turin kawngkapui lam ka pan vat a, nui sangin ani chuan min rawn pan a, a hmeltha takzet a ni!

“I lang dang kher mai” a rawn ti a

“A danglam vak pawn ka  lo hre loa” ka aw chu a khur ti tih hian ka hria a, ka han thian lui kharh a

“I nu ka hmu zuai anga.. kan kal dawn nia” tiin kan inzui lut a

Ka nu pindana kan luh chuan Natascha leh nurse pakhat nen an lo awm a.

“Natascha, ka cousin anih hi.. Istanbulah hian a cheng a..” ka tih chuan Natascha chu a lo tho vat a

“Chibai Ibrahim aniang ti raw..” Nat chuan a lo ti vat a

“Aw ni e, ka hmu che chu ka lawm khawp mai” tiin an inchibai a

“Lisa I sawi dik chiah, I la sawi uar lo mah mah” Nataschan in a rawn tih chuan ka sa chhuak vek a. Ibrahim chuan zawhna mitmeng nena min rawn en chuan

“Engmaw?” a rawn ti ha a

“Engmah.. Kal ang Ibrahim” tih pah chuan ka va kai a, ka chhuahpui ta a..

“Engmaw engmah ni lo chu” Car kawngka min hawn sak pah chuan a rawn ti a

“Engmah  ni na na na” tiin tum barin ka thu a

“Mawh” tiin min hnaih setah a rawn tawng a, ka mur chhuak vek thei hialin ka hria

“Ibrahim..”

“Um” a mit ko san ak ak pah chuan ka mitah tak min en a

“Car kha khalh rawh..” ka tih chuan a nui suk a, thu tha in car chu a start ta a..

 “Tunah hian ka ngaihtuahna I hria em?” a rawn ti chhuak a

“I ngaihtuahna ka hriat I ring a?” nui deuh hak pah chuan ka ti a

“I inhmeh awm ang thawmhnaw ka ngaihtuah mek a, I inhmeh hlawm takzet!”

“Chutiang lehzel min ngiahtuah sak avangin ka lawm e”

“Hm..  I lawmthu sawina chu pawm a ni e..”

“Tiang hian em ni hmeichhia I chhai thin a?”

“Huh.. tunah hian chhai angah che min ngai a maw?” a tih chuan ka zak leh hnuhnawh a

“Ni loe, thawmhnaw inbel tih vel kha a nia ka tih. Hmeichhe lung tih awi nan a tha phian a..” bah nuai chuan ka ti a

“Chuan I lung a lo awi ta em em a”

“Ni mai teh se Mr. Elmas”

Dawr changkang zetah min luhpui a, ka inhmeh tur awm ang kawr la chhuak turin a hlirh a. Kawr hanger a inkhai sawm chuang zet chu an rawn la chhuak a, a mal te te in ka ha chhin ta zel a. High School leh College ka kal lai kha chuan kum khatah vawi hnih vawi khat vel chu ka ha ve tawh ngei a, lal fanu ang maiin ka inhre thin. Ka nu damlo ka buaipui tak hnu hian hetiang ang lam hawi ngaihtuah hman pawh ka nit a meuh loa. Tuna kawr manto leh nalh tak tak ka han ha chhin leh zel hi mumang a ang rum rumin ka hria a ni.

Ka thawmhanw hak chhin apiang chu inhmeh ka inti rilru hle a. Ka ngaih bel nge Ibrahim chuan hmuhnawm ti takin min lo thlir reng ni hian ka hria a, chu chuan min ti zam lek lek dawnin ka hre hial a ni. Ani chuan ka duh thlang turin min hrilh a, duh thlan tur ka hre thlawt lo, ani pawh chuan beidawng tih hriat takin a nui tawp a kawrfual pakhat ka khup chen vela fual nalh zet mai, maroon rawng chu min thlan chhuak sak ta a.

“ I bialpa chuan I inhmeh tur zawng a hre hle mai” dawra thawk ten an lo tih chuan Ibrahim nen chuan kan inen a, kan nui ringawt a.

“In thar lawm nan zanriah kil turin min sawm dawn tlata hriatna ka nei..” Car khalh chung chuan a rawn ti a

“Keimah maw?” ka lo ti a

“Nangmah lo biak tur dang an awm a mi?”

“Ahh.. englo  ania Ibrahim..  In a hnathawk tur an awm tawh si loa..”

“Chuan??” min rawn melh zeuh pah chuan a ti a

“In a hnathawk ka phut lam a ni lo a nia, Natascha a awm tawh a..” bah nuai chuan ka ti a

“I sawi tum chu han sawi vat teh” nui hak hak pah chuan a ti a

“I chawhmeh duh zawng ka hre lo..” ka han ti tawp a

“Aw.. chu chu maw I buaina?”

“Um.. nimai, bakah bazaar te a ngai a..”

“Anih zanriah rawn ei tur chuan min duh em? Aw nge aih?”

He pa tak hi chu aw.. min ti a thei takngial dawn!

“Aw..”

“Kha kha nimai lawm.. chawhmeh tur leiin kan kual nghal dawn nia..” a tih chuan ka lo bu nghauh a.

 KOŞULSUZ SEVGİ

***RENGPUII GUITE***

CHAPTER -8

IBRAHIM ELMAS

Hun hlimawm leh chhinchhiah thlak tiha sawi theih chu ngah ve viau mahila tun hun tluka hilimawm hi ka la tawng pawn ka hre lo, nge a hlimawm dan a dangdai vang zawng  ka hre lo le.

“Dereotlu pancar salatasi” ner deuh nang a min en pah chuan a rawn ti a

“Enge?”

“Ka la siam ngai miah lo, chu lo duh I nei lo mi?” a tih chuan ka han nui hak a

“I thiam ngei a ngai ang..”

“Chu ti maw? Mahse Ibrahim..”

“ Bulbawk, Dill thar lam tak, Pardi, Walnut, Olive Oil, Lemon juice, Vinegar leh Chi a awm chuan a tawk mai..” ka han ti a

“Nang hi..”

“Enge? Mak I va tih hmel ve..”

 “Eirawng bawl I thiam tih ka hre miah loa..” Kha a mak ti hmel mawlh mai kha! Motor khalh lo ila thlir reng atana duhthusam a ni.

“Ka thiam hran lo mahse ka ngainat zawng chu ka hriat ve a ngai alawm.”

“Okay.. ka hre thiam e, I zarah chawhmeh siam ka thiam thar dawn anih chu..” a ti a

Chawhmeh leh thil tul dang vel lei kan lei zawh chuan Villa lam panin kan inkhalh chhuak leh nghal a. He nula kianga ka awm hian engmah kan ti hran loa, ti tur pawh kan ni hek lo. Mahse, hmeichhe tam tak ka lo kawp ve tawh ho a, zawn en a ka en ngai loh chu hmu tlata inhriatna ka nei  a, chu chuan engtin mawni taka thlamuanna min pe  a ni.

“Zanriah chu ka lo ei ngei ngei a ngai a mi Ibrahim?” chawhmeh tur sil fai mawlh mawlh pah chuan a ti a

“I hreh viau  a mi?” tiin ka en a, kan va inmelh chiang kher em!

“Rodo lakah ka inthiam lo..”

“Ni lo, chutiangin a ngai loang. Nupui  a neih theih nan I pui mai dawn chauh alawm..” ka lo ti vat a

“A pawm vak hmelin a lang lo..”

“Chuvang tak reng chuan alawm kan mamawh che..”

“Mahse Elmas chhungkua nena inhnaih kher hi tulin ka hre lo.. ka sawi awmzia chu nangmah ka hnaih duh loh lam che ni lo in, ka pa vanga Rodo hreawmna hre reng chung chuan..”  atih lai chuan a bul hnaih setah ka va ding a, ka kut pahnih chuan a dar lehlam lehlam chu ka vuan a,

“Inthiam lohna rilru chu paih bo a hun tawh tiin nasa takin hrilh che mahila I tan paih bo mai a harsa ang tih ka hria lawm, mahse heng thil hi Rodo tana I thil tih that ber pawh a ni maithei a sin. Hmana ta tawh a khawhar rukna paih bo turin ani chuan inrintawkna mai nilo in midang rinna pawh a nei zo loa, mahse enge a hmalama hmuak tu a hre lo tih kan hriat kha” ka tih chuan a lu a bu nghauh a

“Ni e, ka tih ve theih chhun ania lawm..” a ti a

Dam lo enkawlna In a ni tih theihnghilh thakin kan eirawng bawl dun chu kan hlim hle a ni ang, kan nui ring lutuk chu kan han inkhap tawn chhen a. Thinlung taka a hlim hmel hmuh ka chak na te kha vawiin hian hmuh tir ni tlata inngaihna ka nei a ni. Chu ai maha min tihlim tu chuan hlim taka  a nuih lai hian a bulah kei chauh ka awm a ni tih ka hriat hi.Chu chuan amah tihlim thei tua inngaihna min pe  a ni.

Kei, Lisa leh Natascha ten zanriah kan kil ho a, anni thiandun chuan ka chawhmeh siam vang chuan uchuak takin min han fak a, an nui dun har har reuh a. An awmdan chuan kei leh kei lo angin min siam lai tep a ni. Ni e, he  Melisa bula ka awm hian Company lian tak pakhat rochun tu tur ka ni tih hi ka intheihnghilh hmin thak thin reng a ni. 

Ka Car lam panin zan khaw thiang nuam takah chuan kan kal dun a..

“Ka lawm e Ibrahim..” a rawn ti chhuak deuh hlawl a

“Engah chuan maw?” ka lo ti vat a

“Zanriah tui tak avang khan. Anihna takah chuan siam sak tur zawk che ka nia” inthiam lo deuh nui hmel pu sang si chuan a rawn ti a

“Chutianga I ngai anih chuan bat I nei tihna anih chu..” ka han ti a

“Ni e.. hun in remchanna min siam sak phawt chuan. Lut tawh rawh, fimkhur deuhin I inkhalh thleng dawn nia..”

“A remchanna chu a leia lei hial pawh ngai mahse ka inpeih reng ania..” tiin Car ah chuan ka luhsan ta a.

Ka car side glass in a hmuh theih phak chin chu ka melh ngar ngar a, a kianga awm ka la kham lo takzet! A hlim hmel leh lungkham nei lo ang maia a che vel te chu ka ngaihtuah a, khatiang ang taka hmuhnawm tih kha ka la nei ngai pawn ka hre lo hial a ni.

MELISA INCE

Kei hian eng thil nge maw ka tih le? Chhia leh tha ka hriat ve bek bek atanga keimah leh keimaha inthununna leh huang chin ka lo insiam ve te chu pel tlata inhriatna ka nei a. Hetiang ang ngaihtuahna hi thil tha lo lam ka tih apiangin ka nei thin. Mahse, inthiam lohna tur khawp thil sual ka tih sawi tur awmin ka hre si lo. Nge ni a, he thinlung hian a hnaih loh tawp tur lam panin a kal mek zawk?

“Lisa!” ka hnung lam atanga min ko ri ka hriat chuan ka ngaihtuahna atang chuan ka harh zawk a

“Aw Natascha..” bah deuh nuai a chhang pah chuan a lam ka han pan a

“A tlan liamna a rei tawh nen..” nui tut tut chuan min lo kuah a

“Enge I ngaihtuah? Lut ang” ka hre lo der lui a ni tih chu ka hmela a lan mawlh chu ka hlau

“Khatiang anga hlim hmel I put lohna chin kha a rei tawh zia I hria em?”

“Ka bulah I awm chuan ka thlamuan zia I hriat kha”

“Ni lo Lisa, I hlim takzet a ni” thutak hmel fe chuan min en a

“Rodo hriat laiin kha thu kha sawi hlek suh..” uang pah deuh chuan ka ti a, ka nu mutna pindan lam ka pansan ta a.

Ka nu bulah thu in a kut zur em em mai chu ka chelh a, a kut phah tihuh vek khawpa nasa a ka tah thin lai te chu ka hrechhuak a. ‘Rodo hi hmu lo ila engtin nge ka awm ang le?’ tih te chu ka ngaihtuah a. Ka naupan laia a tawrhna hreawm ka lo tihpui ve em em te kha tunah chuan min puitu zawkah a tang ta si a.  Mahse, puitu niin hlawhtlinna chang mahse hlimna a zawnga teh chuan a khua a la har reng tih ka hria a ni. Mi tu emaw chuan hringnun hlawhtlinna chu a lei a lei theih thil hlu ah a teh mai thei e, mahse kan mi hmangaih tak tak te tana hlawhtlinna kan chhiar sak ve dan erawh a hlimpui em? tih a ni thin si a, chu chuan nasa takin Rodo hi puih ka duh a ni.

“Lisa bawhi, ka rawn tlai deuh dawn a min lo nghak suh aw. I pindanah lo mu ang che, ka nu pindan ah ka lo mu mai ang” tih message ka dawn chuan ka ner nang a.

“I pindanah mu rawh I chau awm si.. he tah ka mu ang. Rawn fimkhur rawh aw U, ka hmangaih che”

Message ah hnial lo mah ila mut mai chu ka tum bik hauh lo. Ka rilru tak phei chuan titipui a lungdam taka Elmas chhungkua ten a tana ruahmanna an siam sak hi pawm tura hrilh ka duh a ni. Ani hi chhungkaw pa tha tak a ni thei dawn a ni tih ka hria a, chhungkaw ropui tak a din thei ang tih pawh hi ka ring tlat a ni. Mahse, chung chu a rilru taka amah ngeiin a pawm phawt loh chuan tih puitlin theih a ni dawn si lo.

“Lisa..” ka mit chu ka han nuai niah niah a

“Ngati nge lo mu mai turin ka hrilh che kha..” ka u chuan a han tih zawm zat a

“Ka mit ka chhing lawk mai alawm..” tiin ka han chhang a

“I pindanah va mu rawh, hei nurse an awm reng a, tlaivar kher a ngaih loh hi.. Keipawh a bul lawkah ka mu dawn a lawm..” a ti a

“U..”

“Um..”

“Thi sawipui duh che ka nei a..”

“Naktuk lamah kan sawi dawn nia.. a tha em?” a tih chuan ka lu ka lo thing vat a

“Aih.. kartawp a ni tawh dawn a, naktuk thawh hma a I hna a kal I ngai dawn chuang lo..” ka lo ti a

“Keichu ka kal a ngai thin tho alawm..”

“U, I hlim em?”

“Enge I sawi awmzia? Nang ka hmu leh che a, ka kiangah I awm a.. hei baka ka tana thil hlimawm a awm chuang hleinem..” a ti a

“Ni lo.. Tunah chuan I tan ka awm a, ka tan I awm bawk a mahse hmalam hun kan nei ve zel anih chuan kan kawng bik zawhin kan kal ve ve a ngai anga, khawhar taka I awm ka duh lo..”

“Kei chuan nang leh ka nu hi ka lungawipui viau asin, I ni ve lo a mi?” nui chung chuan a ti a

“Thil engpawh hi thinlung taka kan pawm a, phurna nen kan tih chuan kawng hi a awlsam bik thin ania..”

“Enge sawi I tum?”

“Kha nula.. Lalpa leh engtin nge ka theihnghilh theih?” tiin ka lu ka dawm vang vang a

“Adile..” nui pah chuan a rawn ti a

“Awww.. nula hmeltha leh fing tak a ni an tia..”

“An sawi dik chiah anih chu..” Rodo’n a tih chuan ka lo nui ver ver a

“Anih chuan Elmas chhungkaw ho ruahmanna chu pawm mai la.. bakah naktuk lamah kan inhmu dawn lehnghal”

“Nang hi chu aw.. heng min sawipui I duh vang hian a mi ilo la men tang tang a?”

“Ni chiah ee..”

“I zahawm hle mai..” elhsen deuh pah chuan a rawn ti a

“Ti khan awm suh.. I tana hlawkna engmah tih sak theih che ka nei ngai loa, chuvang chuan I tana tha tur ka sawi hi pawm mai rawh Rodo..”

“Aw, ka hria e.. mu tawh rawh”

“Naktuk lamah tha deuhin I awm ang tih min tiam la, ka pindanah ka mu ang..”

“Huiiz.. awle ka tiam a che. Ka nu lo ngaihtuah duh suh, kal rawh le..” tiin ka chalah a rawn fawp zeuh a.

Mut hmunah chuan a tuk lama thil thlen dan tur suangtuah chuan ka inlet ka inlet a. Chairman hian a thiantha ber hmelma  fanu ka ni tih hria se engtin nge thil a thlen ang le? Rodo hian a tuar ngei ang. Chu chu ka thil duh loh ber a ni. Chuan, kha Ibrahim kha.. Ka rilru tibuaitu zinga mi chu a ni ve chiang alawm. A thawmhnaw min lei sak ha in an inah zanriah ka kil ve dawn chu a ni si a, ka huphurh nge ka helhhawlh pawh ka hrethiam lo. Rodo nau ang nilo in a thian tha ber angin ka kal dawn leh zel nen, tum anga thil a kal loh mawh chu ka hlau a ni.

Kawngka kik ri chuan min tiharh zawk a. Thawh pah chuan ka han zi mar tial tial a, ka va hawn sak a..

“Ka tihpalh ka tih harh che avangin. Ka kal a ngai tawh sia” Rodo chuan a rawn ti a

“A lo tlai tawh em anih hi..”

“Mut hahdam I mamawh zia ka hria alawm. Mahse, in lama phei a midang puih ka ngaih bakah Adile va hruai ka ngai a” a tih chuan ka lo nui sung a

“A tha alawm. Kan intiamna kha aw..”

“Ka hria e, Chawhnu lamah kei emaw Ibrahim kan rawn hruai ang che..”

“Hruai ka ngai lo.. Adile chiah ngaihtuah rawh”

“Aw ni tak! Ibrahima’n in inpartner tur thu a sawi tak e..” min melh zeuh pah chuan a ti a. Ka lo sa deuh pup pup a.

“A tu a mai pawh hian remchangah min la anih hi..” nui lui pah chuan ka han ti a

“I unaupa te pahnih tan hian I inpe zo ngawt mai” a tih chuan ka thaw hak a.

Rodo sawi kha a dik chiah a ni. Ibrahim hi Rodo nau anih chuan ka unaupa tur a ni. Chuti si ngati nge hetiang ang rilru hi ka put? Ibrahim hian amah vangin ti hian ka awm tih hria sea nuih ka ti za hialin a nia ka rin ni. Ani pawh Ince chhungkaw mi ka nih piah lamah  Adile anga chhungkaw lian taka tang seilian nula hmeltha leh fing an neih tir ve ngei anga, kei an hmelma fanu an puihna tel loa engmah ti thei lo erawh ka chuang vang vang thung dawn si a.

Rin ai takin ka nu pawh a tha sawt khawp mai. A khat tawkin a rawn harh a rawn harh a, tawng pawh hrethiam ve ang nimai in kan biak chang hian a lu a rawn bu ve nghauh nghauh thin a. Natascha chuan insiam tan tawh tura min nawr reng avang chuan ka pindan lam chu ka pansan ta a.

Ka inbual lai chuan ka awmdan tur ngaihtuah char charin ka thaw leh hak thin. Ka chetchhiat mawlh ka hlau a ni. A hnai telh telh a ka huphurh telh telh bawk! Mahse tuna taka huphurh vak in awmzia a nei tawh der si lo.

Ibrahim kawr min leisak chu kengin darthlang hma ah chuan ka han in thlek kual vel a..

“He thil hi ka hak a ngai chu a ni si a” tiin ka phun sep a. Dik tak chuan a mawi takzet! Hetiang ang kawr man to hi ka piana hnu lamah ka la ha chhin ngai lo. Vawiin ah erawh ka pa haw ngawih ngawihtu chhungkaw hma ah ka inbel dawn chu a ni si a. Rodo tana ka tih theih awmchhun anih vang erawh chuan theih tawp chhuah ka ngaih zia ka inhria a ni.

“Lo lut rawh” tiin ka pindan kawngka kik chu ka chhawn vat a

“Lalpa leh Ibrahim!  Natascha turah ka ngai che a, min tiphu alawm” ka bengbeh beh mawlh mawlh pah chuan ka ti a, a ruk tak chuan ka tiril a khur a ni.

“I mawi lutuk Lisa..” ka mitah tak min en chung chuan a han ti a

“Enga ti nge I rawn luh?” ka han ti tawp a

“Ka rawn kik kha” nui pah chuan a ti a

“Nangmah I ni tih hria ila chu I rawn lut miah loang”

“Enge? Ruakin I awm pawh anih loh kha.. I insiam fel vek tawh tho a..”

“Chu pawh nise..”

“Anih anih, ka chhuak ange..” tiin a inher a

“Ngai lo..” rang fahran chuan ka lo ti vat a.. “Lo thu rawh, ka bag ah ka mamawh ka khung anga kan kal thei nghal ang..” ka ti  chuan a thu ve mai a.

Ka insiam lai chuan ka che khawr vek, ani chuan min en renga hriatna ka neih vang pawh a ni mahna.

“Melisa..”

“Um..” amah en lem lo chuan ka han ti a

“Nuam lo tih phahna chhan tur chu a awm loa..”

“Enge?” tiin ka va kal hnaih a

“Englo, I title hi..”

“E.. aw ka hria alawm. Ince chhungkaw zinga mi ka ni tih ka sawi loang..”

“Ni e..”

“Chibai young master, Melisa Deniz ka nia..” nui har har pah chuan chibai tumin ka kut chu ka han pe a. Ani chu lo ding vatin ka kut chu a rawn chelh a. Thutak hmel fe chuan ka mitah tak min en a, ka kut chu a hmer na telh telh bawk a.

“Ibrahim..” tiin ka phun sep a

“Um.. Melisa”

“Kal ang..”

“Aa.. awle” tiin a kal nghal a, kawngka chu hawngin min kal hmasak tir a, ka hnungah chuan ,in rawn zui vat a.

Ngawi rengin kan inkhal chhuak dun a, a awmdan chuan min tihrilhhai lek lek a ni. A hma ang lo takin a thutak hmel run a, enge maw ngaihtuah muk tak hmel a pu a ni.

“I nu chu enge a an?” a tih chuan a rawn tawng chhuak chu mak ka ti lek lek zawk

“A tha lutuk.. In puihna zar vek a ni..” tiin ka lo chhang a

“Kei ka tel hleinem. Ka pa leh Rodo vang chauh alawm..”

“Teuh lo Elmas chhungkaw lakah hian lawmthu sawi sen loh kan ba a ni..”

“Ni loe. I nihna dik tak hretu tan chuan chhungkaw pakhat vanga I hming I thlak I ngaih hi misual tak pawh kan ang alawm..” a ti a

“Chutiang zawngin ka ngaihtuah lo. Engkim hi duhthusam ania lawm…” ka ti chuai raih a. Ka thusawi chu ani pawn a awih lem lo tih a hmel atangin a hriat. Keima lam ngar ngar en phei chuan duhthusam letling thawk a ni. Mahse, ka tana hlu ber ka nu tan erawh malsawmna tam tak a ni thung.

Car a din riai riai ah chuan car tukverh lam chu ka han dak chhuak a. Lalpa leh!! Elmas chhungkua hi an hausa tih chu ka hre ngei a mahse hetiang em em hi anih ka ring phak thiam lo. Compound zau tak chanve chu In var lian tak hian a luah khat vek a. Ka hmuh theih chin pawh ropui ka ti ania, In hnung lampang ah engtak awm ang maw?

“Kan thleng e..”

“Ka zam..” tiin thawk ka han la khalh a

“Ka bulah I awm dawn alawm..” tiin a kut min pek chu ka lo vuan vat a.

“Chibai Bawihi hmuh I nuam takzet..” tiin nu pakhat hmeltha em em mai hian min lo chhawn vat a

“Lisa, hei hi ka nu ania. Ka nu ani hi Melisa Deniz, Rodo thian tha ber anih hi..” Ibrahim chuan a lo ti vat a

“Chibai Mrs. Elmas, ka hmu che chu ka lawm hle mai..” tia kan inchibai lai chuan Rodo leh nula pakhat sang tha veh vawh, hmeltha tak mai te chu kan lam panin an rawn kal a. Adile a ni tih ka hai lo.

“I tha em Lisa? Ani hi..”

“Adile..” Rodo tawng laklawh lai chuan ka lo ti vat a. An nui dar dar a

“Ka hmu che chu ka lawm hle mai..” Adile chuan min rawn chibai vat a. Thutkhawmna pindan lam kan pan ho ta a.