HARVEST MOONLIGHT OF SORROW
HARVEST MOONLIGHT OF SORROW
-RENGPUII GUITE
Kawngkhar chum dawt dawt ri chuan ka mu tui lai chu min tiharh chiang kher mai. Men pawh meng tha thei lo chuan ka phone chu ka han dap a, mit lemlam chauh meng chung chuan dar zar ka en a, chu tih lai chuan ka nu in ka hminga min ko mawlh mawlh ri chu ka hre bawk a
“Dar 7 pawh a la ri si loa..” ti a phun bul bul chuan ka tho a, kawngka chu ka va hawng ta a.
“Ngati nge I kalh kher?” vin aw lek lek chuan a rawn ti a, a hmel chu a hlauhthawn hmel viau bawk..
“Enge?” tiin ka khumah bawk ka let leh a
“I tha em?” ka room kalh te chu ka zan tin tih dan a ni a, enge maw a hriat ni. Vawi leh khatah min rawn ngaihsak vak ni maiin ka hria
“Aw, enge? Chaw ei khamah I ti a ni lo mi chhuah kha?” tiin ka khuma thu chung chuan ka chhoh en ha a..
“Eng chhuah maw? I damdawiin bill vel kan tifel hman si loa, ka va kal ang ka ti..”
Kei hi ka tho a emaw ni dawn le, nge hei hi ka mumang zawk? Ka chenna thin hmun ngeiah awm in ka khum atang ngeiin zing ka tho a mahse khawvel thar a awm ang maia inhriatna ka nei tlat a ni. Zawhna zawh tuma ka ka ka ang hman awrh tihah chuan ka pa a rawn lut a,
“Bawihi awmpui I ngai lo ang ti raw.. I u a roomah a awm dawn a bakah Awmtei pawh tlai chaw ei loin hunserh inkhawm banah a rawn haw nghal ang. Han awmpui tir che a that viau laiin nang leh I nu in lang thei dawn si loa, I nau tal a tel ve loh chuan” tih pahin a hmai hmih zawh hlim chu a towel ken lai chuan a hru mial mial a. Kei erawh chuan an thu sawi awmzia ka hre hauh lo.
“I tha em?” ka nu chuan a rawn ti leh, a hlauthawng hmel kha a la bo lo tih ka hmuh chuan ka hriatthiam lohna chu hlauhthawnna in a rawn thlak vat a. “I tha em?” tih reng ngai hian ka awm ngai lo tih ka inhre chiang. Keimah ah hian enge maw dik lo tak a awm a ni.
“Pa, khawnge in kal dawn?” ka han ti a
“Vawiin hi U Tetei pasal neih ni, I theihnghilh a mi?” tiin ka bulah a rawn thu a
“An ni chu October ni 7 ah a ni lawm ni?” tiin ka Phone a ka Calendar chu ka han en vat a..
“Ni chiah e…”
“Engtin nge I awm a?” ka nu chuan a rawn ti vat a
“Engmah.. ni ka hai a..” mak ti rilru tak chuan ka ti a
“I dam loh chauh vel vang a nih kha.. awm hah dam la, a hma I ang leh mai ang..” ka pa chuan a rawn ti a
“Anih chuan damdawiin ah chuan kal loh theih a ni si loa, ka rei dawn lo ania, i tha vak loa I inhriat chuan I u hrilh rawh aw.. I nau ei rawng bawl ka'n enpui ange..” ka nu in a tih chuan ka pa rawn luh hma a ka damdawiin bill a sawi chu ka hre chhuak leh zawk a, kei hian damdawiin ah ka awm tih pawh ka inhre reng reng hleinem
"Aw, ka tha alawm, kal ru.." tih pah chuan mu in lemlam hawiin ka inlukhup ta daih a, anni pawh chuan min chhuah san ve nghal a.
Enge ka chungah hian thleng ta? Ka hriat chin zawng chu nizan ah zanriah kan ei laiin ka nu in ka nute fanu U Tetei pasal neihna a a hak tur kawr thui tir a tum a, chung thil vel ti turin leh mamawh dang lam tura bazar kan ngaih thu min hrilh a, dar 7 a thawh tum a ka khum lam pana ka muthilh kha a ni. Zingah bazar inring rilru takin ka tho a, mahse thla khat hnu ah daih ka lo awm thung si. Kha tih chhung zawng khan enge ka chungah thleng? Ngati nge engmah ka hriat chhuah zawh loh? Enge maw hriatchhuah tum chuan ka mit ka chhing char char a, ka thlante chuan min bual hneh hle bawk. Thaw hak pah chuan ka blanket sin lai chu ka han hlim a, ka sir ka melh chuan ka bulah rose sen lawh hlim ang sar a la thar a lo awm a.
Chu rose chu la in a rim hriat tumin ka han hnim a, rose rimtuina piah lamah enge maw tak rim a nam a ni. Chutiang rim chu ka vawikhat hriatna mah ni se ka hriat than em em rim ang mai niin ka hria. Ka hnim a, ka hnim leh thin, keimah ah hian engtin maw tak min fan a ni. A fan dan ka tehkhin thiam dan ber chu hun liam tawh a hriatrengna ngaihawm takin rilru a rawn luah ang mai hi a ni.
"He rose hi khawi tanga rawn kal nge ni?" tih ka sawi lai chuan enge maw tak hian ka taksa chu a rawn trek chhawk a. "Rose.. Rosy.. Rosy chu ka hming.. Rose" Rose tih thumal chuan keimah ah enge maw takin fan a nei a ni. Khang ka hriat loh kar thla ah khan enge thleng? Hei lo hi hriat loh ka la nei a ngem? Ka nu, ka pa, U Mama, ka nau Awmtei ka la hre vek, kei ngei pawh ka inhria. Tunge, Enge hriat loh ka nei tih ngaihtuah chuan ka hun kal tawh ka School kal lai te, ka College kal tan tirh ni te chu ka ngaihtuah lui vak vak a, engkim ka la hriaiin ka hria. Mahse, ka hriat loh miau chuan engtin nge ka hre lo tih ka hriat ang? Ka mittui rawn tla chu hruk pawh tum loin ka melh ngai chu ka melh tlawk tlawk a.
"Bawihte, kan pahnihin chaw ei ang aw" ka nu thawm ka hriat chuan ka mit tui chu hru in ka tho vat a
"I tap elaw?"
"Aih"
Engvanga chaw pek hi ngai nge ka nih? Kei hi mi pangai ka ni lo tak tak em ni?
"I ban kha enge a an?"
"Maw?"
"Khawi maw" tiin ka ban dinglam chu a han chul a.. "E hei a vung pawh a reh tawh khawp alawm.." a ti a
"Nu.."
"Aw.."
"Ngati nge?" sawi zawm har ka ti.. ka hnuk chu a rawn ulh teu a.. "Ngati nge hetia ka awm?" ka ti chhuak thei hram a
"Engmah ni lo bawihte, depression chu tupawn kan nei thei vek alawm. Damdawiin a indah phet kan tum kha kan ti dik lo alawm.." tih pah chuan chaw chu min barh a tum a
"A ni lo" tiin a kut ka dah thla a..
"Enge a nih chuan?"
"Chaw hrai te hi ka ngai lo.." ka ti a
"Aw, i ban ding lam i la hmang thei si lo alawm.. lawk tunah khan i ban ding lamin a mi i rawn vai thlak?" mak ti tak chuan a rawn ti a
"Aw, kawngka rawn hawn nan pawn ka ban ka hmang.." ka lo ti a
"Anih chuan X-ray result kha a dik lo tihna a mi?"
"Nu engvangin nge damdawiin ah khan ka awm ka hre lo tak tak.." tap chung chuan ka han ti a..
"Tak tak a mi? Anih keimah hi min hria ti raw.."
"Nu, ka ko mawlh mawlh che alawm.."
"Ni e, i depression vel vang khan i ngaihtuahna a chau anih kha bawihte.."
Ka nu hi depression ka nei a ni tih ka hre loa, rilru hahna ka nei thin tih pawh ka hre ngai lo tih hrilh ta ila engtin nge a awm ang? Ka hriatna hi a kim loa, thil thleng tam tak hriat loh ka nei a ni tih hrilh ila engtin nge a awm ang?
"He Rose hi khawia mi nge a?"
"Ihh.. ka lawh.."
"Engtik in" nuih tlawn hmel deuh chuan min en a
"Ninawm, dawhkan ka kil dawn, kal ang.." tiin a tray rawn ken chhoh chu ka la kang a, ka khum atanga chuan tho in dining room lam ka pan nghal a.
Ka chhungte chaw ei lai chuan an chaw bar chawl meuh in min lo en thup a, ka ban an melh vek tih ka hre bawk.
"Vawiin lamah result kha va zawh chian a ngai a ni" ka nu chuan ka hnunga min zui pah chuan a rawn ti a
"Kha kan nula chu a va that leh hmel si ve.." ka pa chuan a lo ti vat a, ka lo nuih seng a
"Sangha hi nizan lamah i nau in vawiin chaw pek i ngaih a rin avangin a lo chhum lawk diam a" ka pa chuan kan nufa a dawhkan kan kil lai chuan a lo ti a
"A hang chhum tawp" ka tih chuan ka ngawi ta daih a
"Engmaw?" ka nu chuan a lo ti a
"A tui ka ti.." ka lo ti vat a. Ka sawi tum zawk chua "A hang chhum tawp chu nizan lamah kan hmeh sia" tih a ni, mahse anni zan hmasa leh ka zan hmasa a inang lo tih ka hre chhuak zawk a..
"A hrisel ber alawm dam lo tan chuan" ka nau chuan a lo ti a
"Ka dam alawm, ka dam lo ve ziah lo.." ka lo ti hmuk a
"Chang leh i inti dam lo em em a, i mu tlat a.. a chang leh ban tliak chung pawn ka dam alawm i ti leh tawng tawng a.."
"Ban tliak chaw bar zawt zawt i hre ngai a mi?" tiin ka lo chhang a, ka U chu a lo nui huk a, kan vai nuih ta vek a. Ka chhungkua te an hlim hmel ka hmuh chuan rei tak inhmu loh hnu a hlim taka awm ho ang maiin ka inngai a ni. Hei hi thil dik tak chu a ni mai thei asin. Thla khat teh meuh enge kan chungah hian thleng ka hre ve si loa..
Awmtei inneihna a kal tura a insiam lai chu ka en reng a, ka rilru kap tu chu a ngai reng. He inneihna atan a kan phur zia te ka ngaihtuah a, ngati nge ka chhungte hian kal ve lo tura min dah tlat na chhan hi ka hre thiam lo tak zet.
"U, lo kal ve mai la i dam tawh tho a.." Awmtei chuan ka rilru hre thiam ang mai chuan a rawn ti a
"Anu ten an phal lo ang.." ka lo ti chuai raih a
"Tetei a lo kal ve duh loa, kawm tur ka nei hleinem" a ti a
"Class 12 ve uaih si, kan cousin te ho an tam ang.." ka tih chuan a ner nang a..
"Awmte.."
"Umm.."
"Anu te chu hrilh kher lo la maw?"
"Aw, enge?" tiin ka bulah a rawn thu a
"Ka awmdan ho kha ka hre mumal loa.." ka ti a
"A hma a i awm angin i awm a mi?" ka nau in a tih chuan
"Engtin nge ka awm?" ka lo ti vat a
"I hre lo tak tak a mi?"
"Aw.."
"U, damdawiin ah kal mai ang.."
"Aih.. aih.. Anu te kha an hlauhthawn hmel lutuk.."
"Keipawh ka hlauthawng alawm.." a tap tepin ka hria
"Hlauhthawn tur a awm lo, ka hre ruai ruai a, ka chiang lo ringawt.." tiin ka han hnem ta tawp a..
"Elevator a accident i tawh atang khan i lungphu a khawih an tia.. chuan hlauhthawnna i nei a, i hmuh loh pui hmu ang ten i awm a.. chuan nizan a motor in a sut che pawh kha nangman i su an ti.. chu chu i hre lo maw?" a tih chuan han sawi mai tur ka hre lo. Elevator a accident ka tawh pawh ka hre si loa, ka tawt up up a ni ber.
"Mahse, ngati nge Doctor te khan i taksa chauh vangah an puh tlat kha ka hrethiam lo.." a rawn ti leh a
"Ih maw, anih leh test vel ka ti em?"
"Aw ti vek.. a tha an ti zel a, U i hre lo tak tak a mi?" hlauhthawn hmel deuh chuan a rawn ti a
"Anih thluak lam te an ti vek em?" ka lo ti daih thung a
"Aw.. engkim kha a tha vek an ti.." a tih chuan ka ngaihtuahna chu ka kawm leh ta daih a. Ni e, that lohna ka nei lo, tha lo ni ila tiang ngaihtuahna hi ka nei loang. Ka taksa chauh vang a ni ngei ang.
"Ka hre chhuak ruai ruai.." ka tih chuan ka nau chuan a awih hmel vak loh.
"Nuam deuh khan hmang ru.. thla lo la teuh ula.." tiin ka chhuah san ta a..
Ka phone ka la a, inbiakna hlui awm ang ang ka check vek. Ka tana nimin thleng bak inbiakna hmuh tur a awm lo. Lalpa enge thleng hi? Future a kal nimaiin ka inhria, chu chuan hun a zin lampang a hriat nei ni tlata inngaihna min neih tir lehnghal a. Hetiang hian ka rilru an luah ngai lo, time travel leh alein tih phei hi chu puithuna atthlak takah ka ngai hmiah.
Ka u a roomah awm ve mahse lehkha a zir avangin awm lo ang mai a ni. Ka khumah thu in thil tam tak ka ngaihtuah a, ka dinhmun chu thawnthu phuahchawp nen hian ka tehkhin ber. Ka ngaihbel nge ni rose sen rim chuan ka room chu a nam chhuak vek a, chu chuan enge maw tak hian min zem muau muau a ni. Muhil si lo, harh chiang si lo chuan ka nun ka chhui kir a. Hmeichhe mahni a tlei tak, pawl 7 ka zir atanga tun, BA final year ka zir thleng a Korean atchilh em em ka nih te, an hla leh an lam dan te nen lama ka lo inzir thiam ve vek zel te, khang ang mize pu thin kha ka ang tawh lo hle in ka inhria a ni. Mahni tawkah za ve viau mah ila mipa erawh ka ngaihsak lo, 'hmeichhia chu an luck loh pauh leh Korean an ngaisang' tih an sawi thin te kha kan thianho a infiam nan tak kan hmang a, mahse luck loh kha pawi tihna reng reng kan nei ngai lo.
Chhungkaw ropui tak atanga seilian ni lo mah ila kan chhungkua hian kan tlei ve em em a, tu kan awm bik lo. Ka u leh ka nau hian lehkha zir an ngaihsak in an thiam thei em em a, kei erawh kum tina average student zinga tel ziah ka ni a, ka chhungte pawn ka laka an beisei hi chu ka unau te aiin a dang deuh. Kan chhungkua hian kan inpawh tlang em em a, chawlhni inkhawm na ah pawh kal hrang loa thu ho ziah thin kan ni. Pathian malsawmna zarah kan awh zawng zawng nei lo mah ila kan mamawh erawh tlakchham kan nei ngai lo.
Ka awmdan hi ka nu ka hrilh a ngem? Ka ti hlauthawng mai mai awm si a, chutiang vel ngaihtuah chuan ka rilru ka seng nasa hle, tih mai dan tur ka hre lo a ni.Ka duh ber chu vawi leh khatah ni dawn lo mahse ka awmdan hriat chhoh bek bek chu a ni. Chu chu a thleng ngei dawn tih hria ila chu ka chhungte pawh hrilh mai tumna rilru ka pu hauh loang.
Ka nu a rawn haw a, zan hmasa lama CT Scan leh eng eng emaw test kan tih thar ho result a rawn hawn bawka, mak tak maiin ka taksa ah hian dik lo a awm lo, ka ban ruh tliak tih chuah lo kha chu. Mahse, chu pawh na pakhat mah a awm tawh si lo. Ka nu hlim zia ka hmuh khan kei erawh ka rilru a nguai telh telh thung. Hrilh ila hlauhthawnna in a khat leh ngei awm si a. Rei lo te ka nghah chu thil tha ber niin ka hria a ni.
Ka chhungte duh danin kar hnih vel College kal rih loh chu ka rilruk a, keimah a In awm tlet tlet bak tih tur ka nei rih lo. Ka thiante min tlawh tura sawm tur ten ka nute chuan min ti fova, mahse ka chet buai ka hlauh vangin tumah ka hnaih ngam lo. Pawn lamah pawh ka hmelhriat ka tawh reng rengin min biak rei hma in ka kalsan vat thin, ka hriat loh karah khan kan pahnih a kan hriat thil thleng lo awm ta se chu chu rawn sawi chhuaka ta se mi ang lo ang maia min en chu ka hlau takzet a ni. "I dang sawt e" tih tawngkam ka dawng fova, ka hriat loh lai atang khan a mi ka lo danglam tan le, nge tun hnai atanga chuahin tih chu ka inzawt ve fo thin.
Ka harh chhuah ni atangin ni thum lai chu a liam ve ta reng mai. Mak deuh mai chu ka room a rose sen chuan chuai lam a pan eih lo, a thar ngaiin a thar sar a, ka room tirimtui tu ber a la ni reng bawk. Ka ngaihtuahna ang hi ngaihtuah zawm atan duh ila chuan ka pindan chhungah hian thil pangai mai nilo inphumru ang tlata ngaihna ka nei, mahse tawngtaina thil tih theih zia ka pa min hrilh ngaihtuah reng chungin chutiang anga ka ngaihtuah dawn apiang chuan ka tawngtai ziah thin.
Kar khat a liam meuh chuan ka awmdan thin chu ka hne ve tawh viau a ni. Ka nu in a hna a a kal hma in ka awmdan a nin chuan pindan chhung vel chu tifai turin min ti a. Ni e, hnathawh hi khawhar ti bo tu ber a ni tih keipawn ka hria a ni.
Tih tum em em nei lo chuan ka khumah ka mu a, ka nu thusawi chu hre chhuak zawkin awm mai mai aiah ka pindan chu tih fel ka rilruk a. Ka pheikhawk dahna ka tih fel hnu chuan ka lehkhabu dahna ka rem fel a, ka lehkhabu dah that zingah chuan ka la hmuh ngai hauh lo note bu chhah ve tak, a kawm dum, a chhan a rose sen lem chuang a lo awm a. Chu rose sen lem chu khawihin ka rose sen khawi pakhat te, glass a lo par mawi ve em em mai chu ka va en a, an inang chiah chiah!
Chu lehkhabu chu ka han keu zuai zuai a, ka kutziak vek a ni. A thu ka chhiar kual chuan ka zirlai pawh a ni lo. Diary a ang ber.
"Diary ka ziak ngai lo.." tiin ka phun sep a. Ka lehkhabu lak thlak dang ho chu ka dah sawk sawk sawk a, chu note bu chu la in ka khum lam panin ka chhiar tan ta a.
Lehkhabu puana tawp mai atana uiawm he hmangaihna zinkawng hi tahpui tur chauh pawh a ka hritrengna kalsan tir loh hi ka duhthusam a ni asin. Jeff, Ka hmangaih che, nang ka tawng che hi inchhirna ka nei lo. Ka duhthusam chu i hnen a kir leh a ni Jeff.
Zingkar hma takah ka nu in min kaih thawh avangin ka mood chu a fuh lo kher mai. Thla leh lama ka cousin te inneihna a ka nu hak tur kawr thuipui turin kan nufa in ka pa in a Car hlui ve lam tawh takin min hruai a. K-POP video ho ka en rei em avangin mut ka kham lo hle, mahse ka nu hnialna chi a ni si loa. Kan tih tur kan zawh chuan ka nu chuan ka pa hnenah MC ah tih tur a neih thu a hrilh chuan min chhohpui nghal a, Car a lo awm daih chu ka chak takzet. Kan pathum chuan floor chung ber lam kan pan ding nghal a, kei chuan a khat tawkin ka lu ka dawn vang vang thin.
"A na viau a mi a?" ka pa chuan a lo ti a
"Umm.." ka lo ti mai a
"Laptop kawl tawh lo la a tha ang, i men rei phah ziah" ka nu chuan a ti a
"Mi nat lai laiin" tiin ka lo ner khum nang a.
Minute nga vel a liam hnu chuan ka nu chuan min khawngaih ve ta deuh aniang, "Car ah lo zuk awm mai rawh" min tih chuan ka phur kher mai, ka pa chahbi ken la chu phih lawpin elevator lam ka pan ta a. Keimah chiahin elevator ah chuan lutin basement lama thleng tur chuan ka han hmet a. Ka chhuk thla tial tial a. Chutia ka thlen dawn hnai lamah chuan vawi leh khatah ka elevator chuanna chu a ding pawp a, a sir ah chuan current tek ang mai hian a de zuai zuai bawk. A thim em vang chuan basement ah ka lut thla tawh in ka hria. Ka hlau lutuk chu ka che ngam lo, ka khur chhuak vek a, mi hlauthawng au ri te chuan min ti chiai lehzual bawk. Chhuak turin ka elevator chuanna chu a inhawng thei si lo. Ka chung atang chuan lei nawi te chu a rawn tla nuai nuai a, ka ngaihtuahna ah chuan he building hian min chilh hlum ngei dawn anih hi tih chiah a awm tawh.
"Rose.." tap chung chuan ka bul vel ka hawi kual vat
"Rose ka kut la rawh.." ka bul chiah a ding chuan a kut min pe a. Khawvela ka mihring hmuh tawh zawng zawngah a la hmeltha ber hial awm e. Che chang hauh lo chuan ka en reng a. Thisen nei lo ang maiin a dang var vek a, mitmeng rawng danglam tak a nei bawk. A hmel chuan khawvel a tiding ni berin ka hria a ni.
"Rose hun a awm tawh lo a nia.." a tih chuan ka harh chhuak zawk. Eng tawng nge a hman ka hre lo, mahse ka hrethiam tho si, chu chuan ka mak tihna a tizual..
"Mak tihna hun a awm lo.. ka kut hi i duh thu a i chelh anih loh chuan ka tanpui thei lo che.." a tih chuan a mitah tak ka en a. Ka kut chu kan in a kut vawt thlerah chuan ka va chelh a. Ani chuan min kuah betin a lungphu ri danglam tak ka hre thei a ni. Chutah chuan ka hriatna ka hloh telh telh a, ka muhil zui nghal bawk a.
Ka harh chuan ka chhungte chuan min lo hual thup a, ka nu chuan min lo nuih seih a..
"I harh tha em bawihte?" ka nu chuan a lo ti vat a
"Aw, khawnge ka awm?"
"Damdawiin ah.."
"Bawihte, mi tam takin engtin nge i dam chhuah theih zawk tiin mak an tih thu min rawn hrilh mawlh mawlh asin.. Pathian hi chu a tha teh e" ka pa in a tih chuan accident thlen lai chu ka hrechhuak thut
"Pa, khawnge ka thianpa kha" ka ti a
"Tumaw?" an lo tirual thap a
"Min chhuahchhuak alawm.." ka tih chuan an inen hrek hrek a..
"Kan hmuh che chuan elevator chhungah nikhaw hre loin ilo awm alawm.." ka nu chuan a lo ti vat a
"A ni lo. Amah kha khawnge?" tiin tap tuau in ka sawi a, chutih lai chuan nurse a rawn lut a, ka nu in kai hrangin a lo be vat a.
"Hahdam i mamawh a, ka jection che nga i muhil dawn nia aw" nurse in a lo tih chuan hria ang pawh a awm lo chuan ka lo melh ngar ngar a. Ka chhungte puihna in ka khelah min jection thei ta hram a. A hnu rei vak loah chuan ka meng thei mang ta hauh lo mai, ka muhil ruai ruai a ka mit ka chhing fel chiah maw tihah chuan ka harh kawk a, mahse khawvel dang daih a harh ang mai ka ni.
Ka mit taka nui sunga min en reng tu ka hmuh chuan ka nghahhlelh ber hmu ang maiin ka lo nui saih a.
"Khawnge i awm daih a?" ka han ti ngawt a,
"I bulah" tiin ka kut a chelh a
"Ka tawng hi i hrethiam a mi?" ka tih chuan a nui hak a
"Nangpawn ka tawng i hrethiam alawm.." a ti a
"Ka lawm e.. min chhanchhuak a.."
"Engmah a ni lo.. Rose"
"Ka hming chu Rosy lawm" a huat hlau tak chuan ka han ti a
"Rose tih i inhmeh alawm.." tiin ka sam chu ka bengah a zep a
"Nang enge i hming?" ka ti a
"Hming kan nei ve lo.. mahse i duh duhin min ko thei ang.." a tih chuan a fiamthu ah ngaiin ka nui a
"Khawnge ka chhungte?"
"Zanin chu i bulah ka awm dawn alawm.." a tih chuan duhthusam thleng dik ang maiin ka hlim a..
"Anih chuan ka muhil miah loang.." ka ti a
"I muhil daih tawh alawm, ka bula i awm chuan thinthiin i muhil tihna a ni ang.." a ti a
Zankhua in a bulah ka awm a, chu chuan thlamuanna leh hlimna min pe tih kei ngei pawn ka inhria. Tunge anih ka hre lo, hming pawh a nei loa, a lo kalna lah ka hre hek lo. A mitmeng ringawt pawh hian min bual a vek a, ka duhthusam ka hriat loh chu ani hian a nei vek a ni. Ka ngaihtuahna fim hmang thei loin min siam a mahse chu pawh chu ka duhthusam zingah a tel ve a ni mahna.
Ka mutna khum te takah chuan a ban khamin ka mu a, engmah sawi lo mahse a khat tawk a ka hmui a rawn fawh zeuh te, ka biang a chul thin te chuan lungawi hliah hliahna min pe a ni.
"Ka bulah i awm reng duh em?" a rawn ti a
"Aw.." tiin ka lo chhang vat a
"Keipawn ka bula awm tir reng che hi ka duhthusam alawm.. mahse kan nghah deuh ala ngai ang"
"Eng chen?"
"A rei loang. Chutih hunah chuan ka lalram ah ka hruai ang che anga kan pahnihin lal nihna hlan kan ni ang.." a ti a
"I kianga awm turin lal nih kher ka mamawh lo.."
"Ka lalnu bulah lo ka tan hun hman ve a thiang lo alawm. I mit chhung rawh le.. i khawvela i kir leh a hun tawh ania.." tiin ka mit chu a kut in min rawn chhing tir a..
Ka harh chuan damdawiin khumah bawk ka lo la mu a, ka ngaihtuahna ah chuan zan hmasa lama thil thleng bawk chu a rawn lut nghal..
"Ka mumang a ni maw.." tiin ka inngaihtuah a, mahse a tak ang vekin ka tem ngei si. Kha pa kha tunge anih? Mihring a ni chiah em? nge ramhuai zawk? Ka tiril chu a khur vek. Ani khan ngati nge kei kher min rawn hnaih?
"Nizan i mu tui em?" doctor chuan a ti a
"Aw mu tui lutuk.."
"I taksa pawn lam chu a tha vek a, mahse i hlauhthawnna kha a la reh lo mai thei a, inenkawl tha viau ang che aw" a tih chuan kha ka mi hmuh pa kha ka ngaihtuahna vak vel vang ni a ngaihdan chu ka nei a. Mahse, ka kianga rei tak awm ang maiin keimah ah hian a rim te chu ka hria a ni.
Tha viau mah ila zan khat tal damdawiin a riak leh tur a min tih avangin kan riak leh a. Kha pa thusawi "Ka bula i awm anih chuan thinthiin i muhil tihna a ni ang" tih chu ka hre kar a, muthilh hlan chu nghahhlelhna riau ka nei tlat a ni. Zan tir atanga muthilh ka tum a, mahse ka thei tlat lo. Zan rei thleng pawn ka mu meng kara, ka nu leh ka nau min awmpuitu te chuan chhuah ka helhhawlh vangah ngaiin mi an fiam an fiam a, muthilh ka chak zia hi an hrethiam lo a ni.
Damdawiin atangin kan han chhuak a, khawharna leh lunglenna chuan namen loin min zem a ni. Ka ngaihtuahna chu kha min chhanchhuaktu pa khan a kalsan ngai lo. Eng ka tih mah ka phur tawh loa, engtik lai pawn ka muthilh tumin ka khum ka bel ta reng thin. Ka chhungte hnenah chuan ka chauh chhuanlamin ka pindanah ka inkharkhum a, muthilh ka tum tang tang thin. Thinthiin ka mu lo nge a bulah khan ka kal thei tawh ngai lo, nge ani khan damchhunga a lalnu tur midang a tawng zawk? Chutiang ngaihtuah ringawt pawn ka mittui hial a ko chhuak thei hial thin.
Sociology class boring takah chuan class lecture ngaihsak miah loin dawhkan ka bawh a, ka lo muhil hman sek a. Ka mumangah chuan khapa kha a hnung zawng a kuah hian
"I hming tur chu maw Jeff" tiin ka lo hrilh a, ka lam a lo haw dawn chiah tihah chuan dar ri in min tiharh zawk a.
"Jeff" tiin ka phun sep a..
Ka lunglenna chu a ni telin a zual telh telh a, chaw ka ei thei loa, ka mu nghet thei loa, eng ka tih mah ka phur tawh lo. A chang leh ka tap a, ka hnena rei lo te tal inlar turin Jeff chu ka ngen thin. Ka ngaihtuahna ah chuan eng eng emaw thil hlauhawm tak tak hmu in ka phu leh dawrh a, ka au leh vak thin. Chu chuan ka chhungte mang a ti ang em em a, inentir hial ka ngaih phah ta a ni.
Doctor te chuan ka rilru lam anih thu sawiin ka accident tawh vang khan depression ka nei an ti bawk. Keimah ngeia ka sual chhuah a ngaih zia min hrilh mawlh mawlh a. Keichuan chakna ka nei lo, Jeff ka hmuh phawt a ngai a ni.
"Din, sleeping pills min lo ken teh naktukah in dawr a mi?" tiin ka thiannu chu ka va text a
"Ila muhil thei chuang nange?" a rawn ti a
"Aw, ka chau tawh lutuk.." tiin dawt ka sawi a
"Anu a chak ber ka zawt anga, ka rawn ken ang che.."
"Aih, kan pahnih chiah hriat turin.. please.."
Ka thiannu chuan a hreh ruk hmel hle a, mahse ka nawr lui ta tang tang a, kan inhmin thei hram a ni. Ka tum ber chu thinthi a mut a Jeff hnena kal a ni. Damdawiin a ka riah zan khan muthilh theihna a min jection khan ani kha ka bulah a rawn awm vat tih kha ka hre reng tlat a ni. Zanah chuan ka hmuh huna a bula ka awmdan tur te ka suangtuah a, a hming hrilh hlan ka nghakhlel tawh takzet.
Vawikhatah chuan mum li tawpin ka ei a kar loah ka muhil nghal a.
"Kha damdawi i ei avang khan ka rilru iti na takzet!" Jeff aw ngei mai chu ka hria a
"Khawnge ka awm?" tiin ka han hawi kual a, ramhnuai hnawng em em mai, dai tlak cherh cherna hmunah ka lo mu reng a
"Khatia muthilh reng kha i duh a mi?" a thinrim hmel chu a hlauhawm takzet
"Ka ngai lutuk che" tiin ka han kuah a. Ani chu a che eih lo
"Ka tihpalh.. mahse duhthlan tur dang min siam tal ta che.." tiin a hmuiah chuan fawh ka tum a, ani chuan min lo dang vat a..
"Ka khawvel ah lo, khawvel dang i mihring khawvel pawh i hmuh tawh ngai lohna ramah i kal thei asin.." vin lek lek chuan a ti a
"Mahse i kiangah ka lo kal hi.."
"Theih tawp ka chhuah reng alawm.." a ti a
"Ka tihpalh.."
"I ti nawn tawh loang tih min tiam la.." ka mitah tak en pah chuan a ti a
"Mahse engtin nge ka rawn kal tawh anga.."
"Lal thlah piang tawh zawng zawng zinga thlan bikin a lalnu nena lal nihna hlan anih hunah.. Chutih hunah chuan ka khawvel hian eng a pek thin let tam tak a pe chhuak ang, nang leh kei pualin" a tih chuan hriat chian belh chak takin ani chu ka en reng a..
"In tan chuan harvest moon" a rawn ti sepa..
"Jeff.. Nang hi Thla ah i cheng maw?" ka ti chuan a nui hak a
"Thla tih chu mihringho phuah ve mai alawm.."
"Jeff ka tih che khan a awmzia min zawh pawh i tum miah lo a mi a?" ka han ti daih a
"Ka hming thar tur i phuah.."
"Engtin nge i hriat?"
"I awmdan zawng zawng ka hmu a, ka hre vek. I kiangah ka awm reng alawm.." tiin min din hnaih sauh a, ani chu ka chung en ha a. Ka hmai a chul kualna vel chu nuam tiin ka mit ka lo chhing a..
"Nangmah vanga ka tawrhna hmu reng siin.." ka tih lai chuan min pawm kang lawp a
"Sawi tawh suh.." tiin min fawp vawng vawng a.
"Kan khawvel piah lamah hian khawvel dang a awm hi ka ring ngai lo.." Jeff ngheng chung chuan ka ti a, ani chu a lo nui huk a
"Galaxy tluklehdingawn za chuang te hian arsi tluklehdingawn za chuang theuh an nei a. I chenna khawvel chu chung Galaxy tluklehdingawn za chuang chhunga arsi tluklehdingawn za chuang zinga tel ve arsi pakhat 'Ni' tih a insawi hel kualtu planet zinga pakhat ve mai alawm, an awm loh ring suh.." a rawn ti a
"Ngati nge kei kher? Jeff"
"I duh lo a mi?"
"Aih.. duhthlang thei pawn min siam tawh loh hi.. mahse ka duhthusam ka hriat ngai loh neiin ka inhria a ni.
"Ka hmangaih che Rose.."
"Keipawn ka hmangaih che Jeff.. Ngati nge hming in neih loh a?"
"Inkoh dan bik chu kan nei ve alawm.. mahse chu chu lalchhungkaw hming a ni a, lalchhungkaw zinga i tel hma loh chuan min koh ve a thiang lo"
"Anih chuan i mite'n engtin nge an koh ang che.."
"Lalber" tih pah chuan a rawn nui zeuh a, a hmelthatna hi ka la luanliampui zel tur anih si chuan kei tluka luangliam nasa tur hi an awm ngai loang.
"Tihian i hnenah ka awm reng tawh ang ti raw?"
"Aih, keiman ka rawn hruai ang che.. chutih hun chuan chhel takin i awm thei ang ti raw.." a tih chuan huphurh viau mah ila ka nghah a ngai si.
Hun chhiar dan enge ka hre lo, mahse kan hun hman dan zawng zawng chu nuam leh hlimawm tak a ni. Ani bula ka awm chuan ka mihring ram ka ngai loa, kir leh chakna ka nei hek lo. Eng tur nge ka lakah a hman ka hre lo, mahse tur a zawnga dawn nuam ber a ni hial ang.
A bula hun tlemte ka hmanna pawn hlimna sawi sen phak loh min pe a, a kianga ka awm reng hunah phei chuan engtiang taka nasa in nunhlim nei ang imaw. Hmun hrang hrangah min kalpui a, hmun tam tak kan tlawh a, mahse ka hah ngai eih lo.
"Hei hi i khawvel a mi?" ka va han zawt zing tak! Mahse nui hmel bakin min chhang ngai lo
"I hre duh takzet a mi?"
"AW.."
"Ni lo.." a tih chuan ka lo ner nang a..
"Thla a in cheng anih chuan thla ruangam ka hriat dan nen engtin nge in nun thin?" ka lo ti a
"Nang hi enthlatu ang mai ini.."
"Ka khawvel thar tur chu anih dan tlem tal hriat ve ka phu alawm.." nui chung chuan ka lo ti a
"Kum zabi tam tak liam ta ah kha chuan kan khawvel chu in khawvel ai pawh a mawi a ni thin. Khawvel mihring awh thin em em lunghlu te chu kan leilung a ni bawk. Mahse in kum chhiar dana kum 1969 kum khan thil duhawm loh tak mai a thleng a, chu chu in khawvel miten kan leilung rawn rahna tur spaceship Apollo 11 tiha an vuah chu enthlakna hmangin an siam tih kan hria a, chutah chuan ralkhel dar vua in kan leilung chu venhimna hnuai a kan kalpui a lo ngai ta a ni. A nih dan dik tak chu kan leilung fate chuah hmuh theih tura venhim a ni a.. a chhan chu in leilungin a zawn nasat em em thil tam zawk chu kan leilungah hmuh tur a awm si a ni.."
"An ni chuan in leilunga an ram chhinchhiahna flag rawn dah chauh a lawm an tum Jeff" ka lo ti vat a
"A chhan chu an hmu lo miau alawm, i hmuh phawt loh chuan eng ang rilru nge i put dawn tih tunge hria?"
"Anih chuan chung ang chu ka tan hmuh ve a thiang lo a ni maw?" ka ti a
"Hmu tur chuan ka thisen i in a ngai ang.." a tih chuan ka hrethiam lo tih a hria a ni ngei ang..
"A mawina leh hlutna i hmuh hun chuan i inchhir hauh loang.." a rawn ti a
"Chung hunlai chuan i awm ve a mi?"
"Min ngai upa hle mai. Ni loe, kan dam hun chhung hi kum 100 chuang chu a ni ngei a mahse khang thil thleng kha kan mite kan inzirtir chhoh zel a ni a, kan nun a thil pawimawh ber a ni bawk.."
"Mahse ngati nge kei kher?"
"I hmelma leilung fa zinga pasal neih chu thil awm lo pawh a ni hleinem.. I mit chhing rawh le Ross, i harh leh hunah chuan i mihring ramah i awm tawh dawn ania.." a ti a
"Jeff ka hmuh chak hun che apiangin ka ko thei che angem?"
"Chu chu i tan leh ka tan a rem lo.."
"Mahse.."
"Ni thum hnu ah ka hnena hun hmang turin ka hruai ang che.."
"Mahse rawn kal lo ta la.." ka han ti a
"Ka rawn kal ngei ang" a tih chuan ka mit chu ka chhing a.
Tui taka ka muthilh lai chuan ka nu aw hian hla tak atanga min ko ri ka hria a, harh tum chuan ka han che dawn a, ka che thei hauh lo mai. Ka rilru erawh a harh vek a, ka nu, ka pa leh ka unau te min ko ri chu chiang takin ka hria a ni. Ka meng dawn a men takngial pawh ka thei lo. Jeffa'n min tih muthilh dawna a thusawi, "Naktukah chuan i khawvelah i kirin i harh tawh ang" tih chu ka hrechhuak zawk a. Ka nu leh ka pa koh ka tum a ka aw pawh ka chhuah thei lo, enge maw hian nghet takin min vet kual vek nimaiin ka hria a ni. Aw khawk rum rum chuan ka vel chu a hual vek a, a chang leh Jeff tawng ri phun mur murte..
"I huaisen viau emaw ka tia.." tih tawngri aw vin tak te chu ka bengah a khawk rum rum a, ka thlante chuan ka taksa chu a bual huh vek tih ka hria, mahse engmah ka ti thei si lo.
"A duhthlanna lo chuan helai hmunah hian ka hruai thei lo.." Jeff tawng ri ngei a ni
"Heti khawp hian a thlahlel che a ni lawm ni?"
"Ka thil tih theihna hi hmang lo ila hetiang hi a ni loang" Jeff aw bawk chuan a ti a, anni chu ka kiangah an awm tih ka hre thei a ni. Mahse ka nu te min koh thawn nen an thawm chu ka hriat chhawk reng a.
"Mihring i hmangaih thei loang, anni hi rawn kalin kan chenna hmun nuam tak ni thin kha venhimna puan a kan khawvel kan tuam chhuah a ngai a, an ram chhinchhiahna eng eng emaw kan khawvelah rawn dahin chu chu ropuina ah an ngai asin.." chu pa awki chuan ka lungphu chu a ti chhuak lo chauh..
"Bawihte.. bawihte.. a u.."
"Ngati nge hetia ka awm? Harh ka duh" tiin keimah leh keimah chu ka inbe mawlh mawlh a, Jeff hian min tanpui thei lo a mi? Ka mihringpuite khawvelah pawh nise hetia awm ai chuan let leh ka duh a ni. Che hauh lo chuan harh ka tumna lamah ka chau thei hial a ni. Ka tha ka thlah telh telh a, ka ri hriatte chu ka hlat telh telh a, ka lungphu chu a tawp dawn tih keipawn ka inhria. Jeff sawi, ama khawvel pawh nilo, ka khawvel pawh nilo ah chuan ka kal tawh dawn anih hi tiha ngaihtuah chuang ka muhil ta siai siai a.
Vawi leh khatah ka thaw kawk a, ka meng chiang hle. Ka bul velin phawk hra in ka han en kual a, doctor leh nurse te chuan che chang hauh loin min lo en thup a, mak an tih hmel hle bawk. Doctor pakhat chuan ka hmai zawnah a kut chu a han vai a..
"Rosy, hei hi i hmu thei em?"
"Aw.." ka aw zangkhai dan em em kha keipawn mak ka ti
"Tunah khan second sawmriat chhung teh meuh i thaw tawh miah lo asin.. a nu leh a pa kha va ko rawh, midang tello in" Doctor chuan a tih zawm zat a
"Ngati nge hetah ka awm?" tia ka han zawt chu tuman min chhang lo..
"Bawihte, ka van lawm em, Pathian thil tih theihna liau liau a ni.." tiin ka nu chu a rawn tap lut a
"Nu, ngati nge hetah ka awm?"
"Kan kaitho zo lo che a.. ni li teh meuh i harh tawh lo asin" a tih chuan Jeff nena kan awmdun hun chhung kha ni li lai a lo ni tih ka hrechhuak thuai a. Ka nute hi kalsan tak tak ta ila an tawrh an tur ka ngaihtuah chuan ka na let zawk em em a, mahse Jeff tel lo chuan ka awm thei si lo. Helai hmunah hian ka damdawi ei vang khan ka awm tih ka hria, mahse Jeff khan theihtawp chhuahin min chhanchhuak a ni.
In lama inenkawl turin kan inhruai haw a, ka nun danglam chak zia ka ngaihtuah chuan mumang ang mai niin ka hria a ni. Ka chhungte bula awm nuam ka tihna chu engtik atang khan nge a bo ka hre lo, mahse anni chu ka mihran telh telh a ni ber. Ni hnih hnu mai ah Jeff bulah ka kal dawn tih ka ngaihtuah apiangin he ka khawvel hneawm lutuk chhuahsan chu ka nghakhlel em em a, ani baka thlakhlelh thil dang ka nei lo. A ni tur a lo thleng ta, a tan awmzia teh chiam awm lo mahse nalh thei ang berin ka inchei a ka khumah chuan nalh in ti takin min hruai hun nghakin ka mut te chu ka tichhuak lui a mahse zanlai pelh thlengin ani chun min rawn hruai miah lo. A thu tiam a bawhchhia a ni.
Khami ni atang khan ka awmdan te chu nasa takin ka hloh a, chiri ang mai hian ka taksa te chu za in ka khur nasa thei hle a ni. Ka ngaihtuahna a kal bing apiang chuan ka bul hnai a awm awm ka paih pawp pawp a, ka chhungte pawh ka timangang hnen viau nghe nghe.Ani chuan ka thlir reng che tih a min hrilh chu ka hre reng a, ka bula awm ang maiin ka bia a, ka phun leh bulh bulh thin. Ka chhungte'n damdawiin lama min hruai an tum pawn ka duh loa, Doctor erawh min koh sak cham chi thung. Test hrang hrang tihluihna hmangin min tih tir a, engmah keimahah tha lo a awm lo. Chu chuan tute mai pawh chu a tibeidawng a, mi ang zan lo ang maia treat chhoh ka lo ni ta a. Rilru lam doctor pakhat chuan note bu chhah tak, a kawm dum hi ka rilru a tawt apianga ka ngaihtuahna ziah chhuah na tur min pe a mahse ka ngaihtuahna hi ziah chhuah thiam theih mai mai a ni si lo.
Kar khat chuang meuh chutia ka awm hnu chuan ka Jeff chuan min hruai tumna a nei miah lo.
"I bula lo kal chu a har viau a mi?" tiin ka tap a ka na takzet! Mihring chuahin mi an bum thin emaw ka tih laiin thla leilung a mi te pawn sualna in lo nei ve tho a ni maw. Ngati nge hetiang tur si ka nunah i lo luh. Ani koh kir chu ka thil tum ber a ni, theihnghil tum tih lam a lang miah lo. A hnena a sawi kha a hlen ngei ngaiin ka hre tlat si a.
October ni 5 zing kar a rawn inher chhuak leh ta, ka hnena a tiam Harvest moon pawh naktuk a ni mai tawh, enge ani hian a hriat le. Nidang zawng aiin ka buai nasa a ni. Mahse tumah hmu duh loin ka pindanah ak inkalh khum tlat a. Ka ngaihtuahna ah chuan ka thil tih duh loh em em mai a rawn lang a, chu chu sleeping pills ka ei bang ka dah that ei leh mai chu a ni.
"Nilengin ka buai a, ka hah takzet! Vawi engzat fakau nge ka inbual pawh ka hre lo.. ka khur nasa in ka taksa te chu puak darh dawn mai hian ka hria a ni. Tlai khaw thim lam a ni a, thla pawh a eng tha hle a ni. A tuk mai kum khata thla eng ni ber chu kum dang ang bawkin mi ho chuan an nghakhlel leh viau ang tih ka hria, mahse ka tan chuan a ni ve si lo. Duhthlan tur ka nei lo, ka damdawi dahna lam chu ka hai rawk rawk a..
"Jeff, i hnena lo kal hi a har viau a ni ti raw.. He thil ka tih avang hian min ngaidam ang che aw. Min hmu reng, nangman i sawi kha min lo dang rawh" tap a khur hlawk hlawk chung chuang tui bottle chu ka hawng a, ka in dawn chiah tih chuan ka bottle chu phih thla hlawk tu an awm a..
"Ka tihpalh" tiin nghet takin ani chuan min kuah nghal a, ka thaw te chu a chham awn hialin ka hria a ni
"Ngatinge hetianga awm tur hian min kalsan?"
"Ihmaw Rose.." ka lu ka lo bu nghauh a
"Ka tihpalh.. dawi thila infiampui atan chuan i hlu mah mah a ni, i phu lo.." a ti a
"Enge awmzia?"
"Nang hi ka bulah i awm reng thei loang.."
"Maw?"
"Kan leilung danah chuan lalthlah zinga ropui ber tur ka ni tih hrilhlawktu ten an sawi a, chu hrilhlawkna chuan kan hmelma leilung mi ngei nupui atan ka neih a ngai thu an sawi bawk" a tih chuan ka chil ka lo lem ri kalh a..
"I thuthlanna lo chuan ka hruai thei lo che.."
"Ka duh alawm Jeff, i tello chuan ka thi ang.." tiin ka lo chhang a
"Nangmah ah ka thiltih theihna dawi ka hmang alawm, min hmangaih a, min thlakhleh reng nan.."
"Sut pawh nila a danglam loang.." tap chungin ka lo ti a
"Ngati nge hetiang em em a rilru no leh rilru thianghlim kher ilo nih?" tiin ka mittui chu a rawn hru a
"Aih.. a ni lo.. ka ta tur ini alawm.."
"Anih ka dawi hi sut i inhuam em?"
"Aw, ka rilru chu ka hria.." ka ti a
"Anih chuan naktuk i mu i rawn harh hunah kei min hriatrengna a bo anih chuan dawi vangin min hmangaih tihna a ni ang.." a tih chuan ani chu ka kuah a
"Anih chuan ti suh, ka duh lo.." ka ti a
"Ka hmangaih tak tak che hi ka ring ngai lo Rose.."
"Anih chuan engin nge dang che?" ka ti a
"I chhungkua te hian kei aiin an lo hmangaih hmasa zawk che tih i hria ti raw.."
"Aw, mahse tu emaw hnen a min thlah ala ngai dawn tho asin.."
"Mahse nangchu lei hnuai a i mihring taksa zalhin an thlah che a ngai dawn asin, keimah vangin.."
"Mahse kan inhmangaih alawm.." ka tih chuan min fawp a..
Kan pahnih a ka kum ngei a kan mut dun hi ka ring ngai lo. Nasa takin min titap a amhse a lo thlen chuan engkim mai chu a mawi leh em em vek thin si a. A rim, a nui hmel, a engkim mai chuan hlimna min siam a ni. Ka chhungte hial ka kalsan duhna chhan hi engtiang taka belhchian dawl nge maw ni ang le, ka hma hun tur atan keizawng ka phur takzet a ni.
Zing ah chuan zangkhai vahin ka tho a, choka lam ka pan nghal a. Ka nu leh ka nau te chuan mak tih hmel takin en a..
"Enge?" ka han ti hu a
"I va dam tawh hmel ve.."
"Nia, ka hritlang nasa viau dawn emaw ka tia.. a reh leh daih nih chu.." nui pah chuan ka ti a
"Nia kha i rawn tho harh peih a.."
"Zing vawihnih vawithum hriltlang dawmdawi vangin ka tho thei loa, tho ngai lo angin min han treat kher a" tiin ka ngaihtuah a, ka lung chua awi vak lo.
Class kal turin ka insiam a, friay anih vangin ka phur kher mai, a chhan chu weekend a ni dawn tlat a. Class ah chuan ka thiante ka that tawh hmel thu min lo hrilh chuan tlang hrileng mai maia nih thu ka sawi a, thawveng min ti em em na chhan chu ka hrethiam lo.
"Zanin chu thla eng lawm ila.." Zuala chuan ring leng lawng takin a rawn ti a
"Tunlaiah tuman thla eng an lawm tawh ngai lo.." ka lo ti vat a
"Nizan thla kha i hmu em? a han en mawi dawn kha.. Zanin phei chu a van mawi dawn em" a han tiluam a, ten hmel tak chuan ka han melh a. Hepa hi chu a over ve hrim hrim.
Dar 4 thleng class kan neih avangin kan ban meuh chuan a tlai ruih tawh, lungleng mi ka ni lo na in boruak chuan engtin mawni tak min zem chiai a, ka lung a leng a ni tih chu phat duh viau mah ila ka inhre kur si. Ni tla tur kawl eng sen phut te chuan Pathian kutchhuak ropui zia chu min hriat nawn tir leh a. Boruak chu a nuam veng vang a ni.
Zanriah eikham ah chuan ka pindanah lutin pawn boruak hip tumin tukverhah ka han dak a, thla en zan ber an tih ang ngeiin thla chu a eng kher mai. Mahse, thla atang chuan ka mit ka la sawn thei tlat lo. Rei tak ka thlir nghawih ngawih a. Vawilehkhatah ka ngaihtuahna rawn inthlakin ka thil hriat loh tam tak a rawn lut zawt zawt mai. Ka tajsa chu a khur chhuak vek a, ka mit te chua vai ruai mai.
"Jeff"
Enge ka tih ka hre lo hmanhmawh takin in atang chuan ka tlan chhuak ta ringawt a, thla chuan ka kal na kawng min kawh hmuh nimaiin ka hria. Ngaihtuahna fim pu thei lo chuan ka pen hlawk hlawk a, vawileh khatah thil eng tak leh ri ring tak hian min rawn hnaih thut a, lei charah chuan ka tlu ta a.
"Jeff.. Jeff" tiin chu ramhnuaiah chuan ka au vak vak a.. Ka tap nasa hle bawk.
"Jeff ka hamngaih che asin" aw rawl tawp chuan ka au a, amhse tumah an rawn kal lo. Lung lu kut nghahchhanah hmangin ka tap ka tap a, ani kha ka chan thei lo asin. HUn rei tak ka nghah hnu pawn ani chu a rawn lang thei si lo. Ka beidawng takzet a ni.
"Rose.." ka phu chiang kher mai..
"Jeff"
"Helai hmunah hian mangtha ti turin ka rawn kal a ni.."
"Aih a theih loh.." tap chung chuan ka ti a
"In khawvel mai nilo, khawvel tuamtu leh chhung zingah hian enge ropui ber i hria em?" tiin ka dar chu a rawn chelh a
"Enge?"
"Hmangaihna.. chu chu nangmah atangin ka zir chhuak a ni. Kei chuan vertherna nen ka thanga awh tir che ka tum a, ni tlemte liamta atang chauh khan ka hria che a ni. Elevator a accident atang a ka hnena ramhnuai a ilo kal thleng khan ruahman lawk diam a ni. Ka tum ber chu a khawp a min hmangaih tir che a ni a, ka hlawhtling hle bawk. Nangin min hmangaihna aia ropui hi a awm lo emaw ka tih laiin chu aia ropui chu a lo awm si, chu chu i chhungkua in a hmangaihna che. Mi a anga i awm pawn an hmangaih che a, che thei loa i awm pawn an hmangaih che a, mihlim tak i nih pawn an hmangaih che. He hmangaihna ah hian hnehna ka chang tih ka inhria, i laka ka dawi ka sut hnu pawh a ka hnen a rawn kal thei tluk a min hmangaihtu an awm loang mahse chu chu ka phu loa, mahse i chhungkua te chuan an phu an ni. Ka lalram ah chuan ka thinlung a ka lalnu awm reng chung siin hmangaihna nen ro ka rel ang, ka theihnghilh tawh ngai loang che Rose.."
"Jeff ka hmangaih che.." tiin ani chu ka kuah a
"Keipawn ka hmangaih che Rose.."
"Ka thi thei ang.." tiin ka phun sep a
"Ni loe, ni a chhuah rual rualin keimah min hriatrengna zawng zawng a bo anga, i nundan pangai i zawh leh ang. Mahse, i kiangah ka awm reng anga,hlauhawm ah i awm ngai loang.."
"Ka thinlunga i thih ka phal lo.."
"I dam khaw chhuah nan ka tih a ngai si alawm.. Rose, i mit chhing rawh le, ka kal a hun tawh.. i kiangah ka awm reng ang.." tiin a kut chuan ka mit chu a rawn tuai a..
"Ka duh lo.. aih Jeff"
"Jeff.." ka tho chiang hle a ni, damdawiin ah bawk ka awm tih hrilh ngai loin ka hria..
"Nu dar engzat nge?" ka tih zawm zat a
"Dar 11 a ri tep.. i tha em?" mak tih hmel deuh chuan min en a
"Haw ang, ka haw ngei ngei a nga.." tih a thawh mai ka tum, ka ban chu a rawn na vak a.. ka au thawt nghe nghe
"I ban kha dim rawh.. i awrh a ngai a nia.." tiin min lo awrh tir vat a
"Nu haw ang, khawngaih takin.. tap chung chuan ka han ngen a.."
Ka nu ka tih mangan em avang chuan ka inthiam lo takzet mahse ka rilru chuan thil tum ran ka nei a. Ka nu chuan doctor te chu a ngen tak meuhin a ngen a, a zan a zanin in lam panin kan haw ta. Ka room ah chuan ka nu leh ka pa in min rawn zui lut a, an ni hnen ah chuan ka that thu leh mut ka duh thu ka hrilh a, kawngka kalh lo tura min hrilh chung chuan min chhuansan ta a. An kal velah rang takin kawngka ka va kalh nghal a.
Ka ban hman thiam lam ka hman theih loh avang chuan ka thil tih tum atthlak zia ka hrechhuak a. Ka lehkhabu dahna lam panin Doctor in a hma a note bu min pek chu ka phawrh a, ka van beidawng tak em!
"Jeff tun chiah min tanpui rawh. Ka bulah i awm reng kha.. ka hriatrengna a ta bo dawn mah la he lehkhabu ah tal hi chuan chuandun ka duh a ni" tap chung a ka tih velah ka ban na chu ka hre ta hauh lo. Hmanhmawh takin pen ka hum a, ka ziak tan dawn a ziah dan mai ka hre lo.. ka thaw te su a so bulh bulhin ka hria. Kan intawn dan ka ngaihtuah a, chutia ka ngaihtuah lai chuan ka ngiahtuahna te chu ka ziah chawp ngai miah loin ka lut chuan a ziak ta par par a. Zingkhawvar dawn thleng kan chanchin chu chu lehkhabu ah chuan ka ziak a ni.
Jeff, ka hmangaih che, ka hmangaih reng ang che.................
Chu diary chu khup in ka thaw chhuak hak a, ka hawi chhuah chuan khua a lo thim tan der tawh. Khang thil thleng kha engmah hriat chhuah zawh ka nei loa mahse keimah ah hriatrengna inphumru a awm a ni. Ka khum bula rose ka hmuh ni atanga vawiin ni thlenga la nung sarh chu ka en a, ka nui a. Tukverh lam pan vatin thla ka zawng nghal a, thla mawi ti ngai reng reng lo khan ka lung a ti leng thar em em a.
"Jeff, khawi hmunah pawh awm la.. hlim taka i awm theih nan ka tawngtai zel ang.." tiin ka phun sep a.
-RENGPUII GUITE
Kawngkhar chum dawt dawt ri chuan ka mu tui lai chu min tiharh chiang kher mai. Men pawh meng tha thei lo chuan ka phone chu ka han dap a, mit lemlam chauh meng chung chuan dar zar ka en a, chu tih lai chuan ka nu in ka hminga min ko mawlh mawlh ri chu ka hre bawk a
“Dar 7 pawh a la ri si loa..” ti a phun bul bul chuan ka tho a, kawngka chu ka va hawng ta a.
“Ngati nge I kalh kher?” vin aw lek lek chuan a rawn ti a, a hmel chu a hlauhthawn hmel viau bawk..
“Enge?” tiin ka khumah bawk ka let leh a
“I tha em?” ka room kalh te chu ka zan tin tih dan a ni a, enge maw a hriat ni. Vawi leh khatah min rawn ngaihsak vak ni maiin ka hria
“Aw, enge? Chaw ei khamah I ti a ni lo mi chhuah kha?” tiin ka khuma thu chung chuan ka chhoh en ha a..
“Eng chhuah maw? I damdawiin bill vel kan tifel hman si loa, ka va kal ang ka ti..”
Kei hi ka tho a emaw ni dawn le, nge hei hi ka mumang zawk? Ka chenna thin hmun ngeiah awm in ka khum atang ngeiin zing ka tho a mahse khawvel thar a awm ang maia inhriatna ka nei tlat a ni. Zawhna zawh tuma ka ka ka ang hman awrh tihah chuan ka pa a rawn lut a,
“Bawihi awmpui I ngai lo ang ti raw.. I u a roomah a awm dawn a bakah Awmtei pawh tlai chaw ei loin hunserh inkhawm banah a rawn haw nghal ang. Han awmpui tir che a that viau laiin nang leh I nu in lang thei dawn si loa, I nau tal a tel ve loh chuan” tih pahin a hmai hmih zawh hlim chu a towel ken lai chuan a hru mial mial a. Kei erawh chuan an thu sawi awmzia ka hre hauh lo.
“I tha em?” ka nu chuan a rawn ti leh, a hlauthawng hmel kha a la bo lo tih ka hmuh chuan ka hriatthiam lohna chu hlauhthawnna in a rawn thlak vat a. “I tha em?” tih reng ngai hian ka awm ngai lo tih ka inhre chiang. Keimah ah hian enge maw dik lo tak a awm a ni.
“Pa, khawnge in kal dawn?” ka han ti a
“Vawiin hi U Tetei pasal neih ni, I theihnghilh a mi?” tiin ka bulah a rawn thu a
“An ni chu October ni 7 ah a ni lawm ni?” tiin ka Phone a ka Calendar chu ka han en vat a..
“Ni chiah e…”
“Engtin nge I awm a?” ka nu chuan a rawn ti vat a
“Engmah.. ni ka hai a..” mak ti rilru tak chuan ka ti a
“I dam loh chauh vel vang a nih kha.. awm hah dam la, a hma I ang leh mai ang..” ka pa chuan a rawn ti a
“Anih chuan damdawiin ah chuan kal loh theih a ni si loa, ka rei dawn lo ania, i tha vak loa I inhriat chuan I u hrilh rawh aw.. I nau ei rawng bawl ka'n enpui ange..” ka nu in a tih chuan ka pa rawn luh hma a ka damdawiin bill a sawi chu ka hre chhuak leh zawk a, kei hian damdawiin ah ka awm tih pawh ka inhre reng reng hleinem
"Aw, ka tha alawm, kal ru.." tih pah chuan mu in lemlam hawiin ka inlukhup ta daih a, anni pawh chuan min chhuah san ve nghal a.
Enge ka chungah hian thleng ta? Ka hriat chin zawng chu nizan ah zanriah kan ei laiin ka nu in ka nute fanu U Tetei pasal neihna a a hak tur kawr thui tir a tum a, chung thil vel ti turin leh mamawh dang lam tura bazar kan ngaih thu min hrilh a, dar 7 a thawh tum a ka khum lam pana ka muthilh kha a ni. Zingah bazar inring rilru takin ka tho a, mahse thla khat hnu ah daih ka lo awm thung si. Kha tih chhung zawng khan enge ka chungah thleng? Ngati nge engmah ka hriat chhuah zawh loh? Enge maw hriatchhuah tum chuan ka mit ka chhing char char a, ka thlante chuan min bual hneh hle bawk. Thaw hak pah chuan ka blanket sin lai chu ka han hlim a, ka sir ka melh chuan ka bulah rose sen lawh hlim ang sar a la thar a lo awm a.
Chu rose chu la in a rim hriat tumin ka han hnim a, rose rimtuina piah lamah enge maw tak rim a nam a ni. Chutiang rim chu ka vawikhat hriatna mah ni se ka hriat than em em rim ang mai niin ka hria. Ka hnim a, ka hnim leh thin, keimah ah hian engtin maw tak min fan a ni. A fan dan ka tehkhin thiam dan ber chu hun liam tawh a hriatrengna ngaihawm takin rilru a rawn luah ang mai hi a ni.
"He rose hi khawi tanga rawn kal nge ni?" tih ka sawi lai chuan enge maw tak hian ka taksa chu a rawn trek chhawk a. "Rose.. Rosy.. Rosy chu ka hming.. Rose" Rose tih thumal chuan keimah ah enge maw takin fan a nei a ni. Khang ka hriat loh kar thla ah khan enge thleng? Hei lo hi hriat loh ka la nei a ngem? Ka nu, ka pa, U Mama, ka nau Awmtei ka la hre vek, kei ngei pawh ka inhria. Tunge, Enge hriat loh ka nei tih ngaihtuah chuan ka hun kal tawh ka School kal lai te, ka College kal tan tirh ni te chu ka ngaihtuah lui vak vak a, engkim ka la hriaiin ka hria. Mahse, ka hriat loh miau chuan engtin nge ka hre lo tih ka hriat ang? Ka mittui rawn tla chu hruk pawh tum loin ka melh ngai chu ka melh tlawk tlawk a.
"Bawihte, kan pahnihin chaw ei ang aw" ka nu thawm ka hriat chuan ka mit tui chu hru in ka tho vat a
"I tap elaw?"
"Aih"
Engvanga chaw pek hi ngai nge ka nih? Kei hi mi pangai ka ni lo tak tak em ni?
"I ban kha enge a an?"
"Maw?"
"Khawi maw" tiin ka ban dinglam chu a han chul a.. "E hei a vung pawh a reh tawh khawp alawm.." a ti a
"Nu.."
"Aw.."
"Ngati nge?" sawi zawm har ka ti.. ka hnuk chu a rawn ulh teu a.. "Ngati nge hetia ka awm?" ka ti chhuak thei hram a
"Engmah ni lo bawihte, depression chu tupawn kan nei thei vek alawm. Damdawiin a indah phet kan tum kha kan ti dik lo alawm.." tih pah chuan chaw chu min barh a tum a
"A ni lo" tiin a kut ka dah thla a..
"Enge a nih chuan?"
"Chaw hrai te hi ka ngai lo.." ka ti a
"Aw, i ban ding lam i la hmang thei si lo alawm.. lawk tunah khan i ban ding lamin a mi i rawn vai thlak?" mak ti tak chuan a rawn ti a
"Aw, kawngka rawn hawn nan pawn ka ban ka hmang.." ka lo ti a
"Anih chuan X-ray result kha a dik lo tihna a mi?"
"Nu engvangin nge damdawiin ah khan ka awm ka hre lo tak tak.." tap chung chuan ka han ti a..
"Tak tak a mi? Anih keimah hi min hria ti raw.."
"Nu, ka ko mawlh mawlh che alawm.."
"Ni e, i depression vel vang khan i ngaihtuahna a chau anih kha bawihte.."
Ka nu hi depression ka nei a ni tih ka hre loa, rilru hahna ka nei thin tih pawh ka hre ngai lo tih hrilh ta ila engtin nge a awm ang? Ka hriatna hi a kim loa, thil thleng tam tak hriat loh ka nei a ni tih hrilh ila engtin nge a awm ang?
"He Rose hi khawia mi nge a?"
"Ihh.. ka lawh.."
"Engtik in" nuih tlawn hmel deuh chuan min en a
"Ninawm, dawhkan ka kil dawn, kal ang.." tiin a tray rawn ken chhoh chu ka la kang a, ka khum atanga chuan tho in dining room lam ka pan nghal a.
Ka chhungte chaw ei lai chuan an chaw bar chawl meuh in min lo en thup a, ka ban an melh vek tih ka hre bawk.
"Vawiin lamah result kha va zawh chian a ngai a ni" ka nu chuan ka hnunga min zui pah chuan a rawn ti a
"Kha kan nula chu a va that leh hmel si ve.." ka pa chuan a lo ti vat a, ka lo nuih seng a
"Sangha hi nizan lamah i nau in vawiin chaw pek i ngaih a rin avangin a lo chhum lawk diam a" ka pa chuan kan nufa a dawhkan kan kil lai chuan a lo ti a
"A hang chhum tawp" ka tih chuan ka ngawi ta daih a
"Engmaw?" ka nu chuan a lo ti a
"A tui ka ti.." ka lo ti vat a. Ka sawi tum zawk chua "A hang chhum tawp chu nizan lamah kan hmeh sia" tih a ni, mahse anni zan hmasa leh ka zan hmasa a inang lo tih ka hre chhuak zawk a..
"A hrisel ber alawm dam lo tan chuan" ka nau chuan a lo ti a
"Ka dam alawm, ka dam lo ve ziah lo.." ka lo ti hmuk a
"Chang leh i inti dam lo em em a, i mu tlat a.. a chang leh ban tliak chung pawn ka dam alawm i ti leh tawng tawng a.."
"Ban tliak chaw bar zawt zawt i hre ngai a mi?" tiin ka lo chhang a, ka U chu a lo nui huk a, kan vai nuih ta vek a. Ka chhungkua te an hlim hmel ka hmuh chuan rei tak inhmu loh hnu a hlim taka awm ho ang maiin ka inngai a ni. Hei hi thil dik tak chu a ni mai thei asin. Thla khat teh meuh enge kan chungah hian thleng ka hre ve si loa..
Awmtei inneihna a kal tura a insiam lai chu ka en reng a, ka rilru kap tu chu a ngai reng. He inneihna atan a kan phur zia te ka ngaihtuah a, ngati nge ka chhungte hian kal ve lo tura min dah tlat na chhan hi ka hre thiam lo tak zet.
"U, lo kal ve mai la i dam tawh tho a.." Awmtei chuan ka rilru hre thiam ang mai chuan a rawn ti a
"Anu ten an phal lo ang.." ka lo ti chuai raih a
"Tetei a lo kal ve duh loa, kawm tur ka nei hleinem" a ti a
"Class 12 ve uaih si, kan cousin te ho an tam ang.." ka tih chuan a ner nang a..
"Awmte.."
"Umm.."
"Anu te chu hrilh kher lo la maw?"
"Aw, enge?" tiin ka bulah a rawn thu a
"Ka awmdan ho kha ka hre mumal loa.." ka ti a
"A hma a i awm angin i awm a mi?" ka nau in a tih chuan
"Engtin nge ka awm?" ka lo ti vat a
"I hre lo tak tak a mi?"
"Aw.."
"U, damdawiin ah kal mai ang.."
"Aih.. aih.. Anu te kha an hlauhthawn hmel lutuk.."
"Keipawh ka hlauthawng alawm.." a tap tepin ka hria
"Hlauhthawn tur a awm lo, ka hre ruai ruai a, ka chiang lo ringawt.." tiin ka han hnem ta tawp a..
"Elevator a accident i tawh atang khan i lungphu a khawih an tia.. chuan hlauhthawnna i nei a, i hmuh loh pui hmu ang ten i awm a.. chuan nizan a motor in a sut che pawh kha nangman i su an ti.. chu chu i hre lo maw?" a tih chuan han sawi mai tur ka hre lo. Elevator a accident ka tawh pawh ka hre si loa, ka tawt up up a ni ber.
"Mahse, ngati nge Doctor te khan i taksa chauh vangah an puh tlat kha ka hrethiam lo.." a rawn ti leh a
"Ih maw, anih leh test vel ka ti em?"
"Aw ti vek.. a tha an ti zel a, U i hre lo tak tak a mi?" hlauhthawn hmel deuh chuan a rawn ti a
"Anih thluak lam te an ti vek em?" ka lo ti daih thung a
"Aw.. engkim kha a tha vek an ti.." a tih chuan ka ngaihtuahna chu ka kawm leh ta daih a. Ni e, that lohna ka nei lo, tha lo ni ila tiang ngaihtuahna hi ka nei loang. Ka taksa chauh vang a ni ngei ang.
"Ka hre chhuak ruai ruai.." ka tih chuan ka nau chuan a awih hmel vak loh.
"Nuam deuh khan hmang ru.. thla lo la teuh ula.." tiin ka chhuah san ta a..
Ka phone ka la a, inbiakna hlui awm ang ang ka check vek. Ka tana nimin thleng bak inbiakna hmuh tur a awm lo. Lalpa enge thleng hi? Future a kal nimaiin ka inhria, chu chuan hun a zin lampang a hriat nei ni tlata inngaihna min neih tir lehnghal a. Hetiang hian ka rilru an luah ngai lo, time travel leh alein tih phei hi chu puithuna atthlak takah ka ngai hmiah.
Ka u a roomah awm ve mahse lehkha a zir avangin awm lo ang mai a ni. Ka khumah thu in thil tam tak ka ngaihtuah a, ka dinhmun chu thawnthu phuahchawp nen hian ka tehkhin ber. Ka ngaihbel nge ni rose sen rim chuan ka room chu a nam chhuak vek a, chu chuan enge maw tak hian min zem muau muau a ni. Muhil si lo, harh chiang si lo chuan ka nun ka chhui kir a. Hmeichhe mahni a tlei tak, pawl 7 ka zir atanga tun, BA final year ka zir thleng a Korean atchilh em em ka nih te, an hla leh an lam dan te nen lama ka lo inzir thiam ve vek zel te, khang ang mize pu thin kha ka ang tawh lo hle in ka inhria a ni. Mahni tawkah za ve viau mah ila mipa erawh ka ngaihsak lo, 'hmeichhia chu an luck loh pauh leh Korean an ngaisang' tih an sawi thin te kha kan thianho a infiam nan tak kan hmang a, mahse luck loh kha pawi tihna reng reng kan nei ngai lo.
Chhungkaw ropui tak atanga seilian ni lo mah ila kan chhungkua hian kan tlei ve em em a, tu kan awm bik lo. Ka u leh ka nau hian lehkha zir an ngaihsak in an thiam thei em em a, kei erawh kum tina average student zinga tel ziah ka ni a, ka chhungte pawn ka laka an beisei hi chu ka unau te aiin a dang deuh. Kan chhungkua hian kan inpawh tlang em em a, chawlhni inkhawm na ah pawh kal hrang loa thu ho ziah thin kan ni. Pathian malsawmna zarah kan awh zawng zawng nei lo mah ila kan mamawh erawh tlakchham kan nei ngai lo.
Ka awmdan hi ka nu ka hrilh a ngem? Ka ti hlauthawng mai mai awm si a, chutiang vel ngaihtuah chuan ka rilru ka seng nasa hle, tih mai dan tur ka hre lo a ni.Ka duh ber chu vawi leh khatah ni dawn lo mahse ka awmdan hriat chhoh bek bek chu a ni. Chu chu a thleng ngei dawn tih hria ila chu ka chhungte pawh hrilh mai tumna rilru ka pu hauh loang.
Ka nu a rawn haw a, zan hmasa lama CT Scan leh eng eng emaw test kan tih thar ho result a rawn hawn bawka, mak tak maiin ka taksa ah hian dik lo a awm lo, ka ban ruh tliak tih chuah lo kha chu. Mahse, chu pawh na pakhat mah a awm tawh si lo. Ka nu hlim zia ka hmuh khan kei erawh ka rilru a nguai telh telh thung. Hrilh ila hlauhthawnna in a khat leh ngei awm si a. Rei lo te ka nghah chu thil tha ber niin ka hria a ni.
Ka chhungte duh danin kar hnih vel College kal rih loh chu ka rilruk a, keimah a In awm tlet tlet bak tih tur ka nei rih lo. Ka thiante min tlawh tura sawm tur ten ka nute chuan min ti fova, mahse ka chet buai ka hlauh vangin tumah ka hnaih ngam lo. Pawn lamah pawh ka hmelhriat ka tawh reng rengin min biak rei hma in ka kalsan vat thin, ka hriat loh karah khan kan pahnih a kan hriat thil thleng lo awm ta se chu chu rawn sawi chhuaka ta se mi ang lo ang maia min en chu ka hlau takzet a ni. "I dang sawt e" tih tawngkam ka dawng fova, ka hriat loh lai atang khan a mi ka lo danglam tan le, nge tun hnai atanga chuahin tih chu ka inzawt ve fo thin.
Ka harh chhuah ni atangin ni thum lai chu a liam ve ta reng mai. Mak deuh mai chu ka room a rose sen chuan chuai lam a pan eih lo, a thar ngaiin a thar sar a, ka room tirimtui tu ber a la ni reng bawk. Ka ngaihtuahna ang hi ngaihtuah zawm atan duh ila chuan ka pindan chhungah hian thil pangai mai nilo inphumru ang tlata ngaihna ka nei, mahse tawngtaina thil tih theih zia ka pa min hrilh ngaihtuah reng chungin chutiang anga ka ngaihtuah dawn apiang chuan ka tawngtai ziah thin.
Kar khat a liam meuh chuan ka awmdan thin chu ka hne ve tawh viau a ni. Ka nu in a hna a a kal hma in ka awmdan a nin chuan pindan chhung vel chu tifai turin min ti a. Ni e, hnathawh hi khawhar ti bo tu ber a ni tih keipawn ka hria a ni.
Tih tum em em nei lo chuan ka khumah ka mu a, ka nu thusawi chu hre chhuak zawkin awm mai mai aiah ka pindan chu tih fel ka rilruk a. Ka pheikhawk dahna ka tih fel hnu chuan ka lehkhabu dahna ka rem fel a, ka lehkhabu dah that zingah chuan ka la hmuh ngai hauh lo note bu chhah ve tak, a kawm dum, a chhan a rose sen lem chuang a lo awm a. Chu rose sen lem chu khawihin ka rose sen khawi pakhat te, glass a lo par mawi ve em em mai chu ka va en a, an inang chiah chiah!
Chu lehkhabu chu ka han keu zuai zuai a, ka kutziak vek a ni. A thu ka chhiar kual chuan ka zirlai pawh a ni lo. Diary a ang ber.
"Diary ka ziak ngai lo.." tiin ka phun sep a. Ka lehkhabu lak thlak dang ho chu ka dah sawk sawk sawk a, chu note bu chu la in ka khum lam panin ka chhiar tan ta a.
Lehkhabu puana tawp mai atana uiawm he hmangaihna zinkawng hi tahpui tur chauh pawh a ka hritrengna kalsan tir loh hi ka duhthusam a ni asin. Jeff, Ka hmangaih che, nang ka tawng che hi inchhirna ka nei lo. Ka duhthusam chu i hnen a kir leh a ni Jeff.
Zingkar hma takah ka nu in min kaih thawh avangin ka mood chu a fuh lo kher mai. Thla leh lama ka cousin te inneihna a ka nu hak tur kawr thuipui turin kan nufa in ka pa in a Car hlui ve lam tawh takin min hruai a. K-POP video ho ka en rei em avangin mut ka kham lo hle, mahse ka nu hnialna chi a ni si loa. Kan tih tur kan zawh chuan ka nu chuan ka pa hnenah MC ah tih tur a neih thu a hrilh chuan min chhohpui nghal a, Car a lo awm daih chu ka chak takzet. Kan pathum chuan floor chung ber lam kan pan ding nghal a, kei chuan a khat tawkin ka lu ka dawn vang vang thin.
"A na viau a mi a?" ka pa chuan a lo ti a
"Umm.." ka lo ti mai a
"Laptop kawl tawh lo la a tha ang, i men rei phah ziah" ka nu chuan a ti a
"Mi nat lai laiin" tiin ka lo ner khum nang a.
Minute nga vel a liam hnu chuan ka nu chuan min khawngaih ve ta deuh aniang, "Car ah lo zuk awm mai rawh" min tih chuan ka phur kher mai, ka pa chahbi ken la chu phih lawpin elevator lam ka pan ta a. Keimah chiahin elevator ah chuan lutin basement lama thleng tur chuan ka han hmet a. Ka chhuk thla tial tial a. Chutia ka thlen dawn hnai lamah chuan vawi leh khatah ka elevator chuanna chu a ding pawp a, a sir ah chuan current tek ang mai hian a de zuai zuai bawk. A thim em vang chuan basement ah ka lut thla tawh in ka hria. Ka hlau lutuk chu ka che ngam lo, ka khur chhuak vek a, mi hlauthawng au ri te chuan min ti chiai lehzual bawk. Chhuak turin ka elevator chuanna chu a inhawng thei si lo. Ka chung atang chuan lei nawi te chu a rawn tla nuai nuai a, ka ngaihtuahna ah chuan he building hian min chilh hlum ngei dawn anih hi tih chiah a awm tawh.
"Rose.." tap chung chuan ka bul vel ka hawi kual vat
"Rose ka kut la rawh.." ka bul chiah a ding chuan a kut min pe a. Khawvela ka mihring hmuh tawh zawng zawngah a la hmeltha ber hial awm e. Che chang hauh lo chuan ka en reng a. Thisen nei lo ang maiin a dang var vek a, mitmeng rawng danglam tak a nei bawk. A hmel chuan khawvel a tiding ni berin ka hria a ni.
"Rose hun a awm tawh lo a nia.." a tih chuan ka harh chhuak zawk. Eng tawng nge a hman ka hre lo, mahse ka hrethiam tho si, chu chuan ka mak tihna a tizual..
"Mak tihna hun a awm lo.. ka kut hi i duh thu a i chelh anih loh chuan ka tanpui thei lo che.." a tih chuan a mitah tak ka en a. Ka kut chu kan in a kut vawt thlerah chuan ka va chelh a. Ani chuan min kuah betin a lungphu ri danglam tak ka hre thei a ni. Chutah chuan ka hriatna ka hloh telh telh a, ka muhil zui nghal bawk a.
Ka harh chuan ka chhungte chuan min lo hual thup a, ka nu chuan min lo nuih seih a..
"I harh tha em bawihte?" ka nu chuan a lo ti vat a
"Aw, khawnge ka awm?"
"Damdawiin ah.."
"Bawihte, mi tam takin engtin nge i dam chhuah theih zawk tiin mak an tih thu min rawn hrilh mawlh mawlh asin.. Pathian hi chu a tha teh e" ka pa in a tih chuan accident thlen lai chu ka hrechhuak thut
"Pa, khawnge ka thianpa kha" ka ti a
"Tumaw?" an lo tirual thap a
"Min chhuahchhuak alawm.." ka tih chuan an inen hrek hrek a..
"Kan hmuh che chuan elevator chhungah nikhaw hre loin ilo awm alawm.." ka nu chuan a lo ti vat a
"A ni lo. Amah kha khawnge?" tiin tap tuau in ka sawi a, chutih lai chuan nurse a rawn lut a, ka nu in kai hrangin a lo be vat a.
"Hahdam i mamawh a, ka jection che nga i muhil dawn nia aw" nurse in a lo tih chuan hria ang pawh a awm lo chuan ka lo melh ngar ngar a. Ka chhungte puihna in ka khelah min jection thei ta hram a. A hnu rei vak loah chuan ka meng thei mang ta hauh lo mai, ka muhil ruai ruai a ka mit ka chhing fel chiah maw tihah chuan ka harh kawk a, mahse khawvel dang daih a harh ang mai ka ni.
Ka mit taka nui sunga min en reng tu ka hmuh chuan ka nghahhlelh ber hmu ang maiin ka lo nui saih a.
"Khawnge i awm daih a?" ka han ti ngawt a,
"I bulah" tiin ka kut a chelh a
"Ka tawng hi i hrethiam a mi?" ka tih chuan a nui hak a
"Nangpawn ka tawng i hrethiam alawm.." a ti a
"Ka lawm e.. min chhanchhuak a.."
"Engmah a ni lo.. Rose"
"Ka hming chu Rosy lawm" a huat hlau tak chuan ka han ti a
"Rose tih i inhmeh alawm.." tiin ka sam chu ka bengah a zep a
"Nang enge i hming?" ka ti a
"Hming kan nei ve lo.. mahse i duh duhin min ko thei ang.." a tih chuan a fiamthu ah ngaiin ka nui a
"Khawnge ka chhungte?"
"Zanin chu i bulah ka awm dawn alawm.." a tih chuan duhthusam thleng dik ang maiin ka hlim a..
"Anih chuan ka muhil miah loang.." ka ti a
"I muhil daih tawh alawm, ka bula i awm chuan thinthiin i muhil tihna a ni ang.." a ti a
Zankhua in a bulah ka awm a, chu chuan thlamuanna leh hlimna min pe tih kei ngei pawn ka inhria. Tunge anih ka hre lo, hming pawh a nei loa, a lo kalna lah ka hre hek lo. A mitmeng ringawt pawh hian min bual a vek a, ka duhthusam ka hriat loh chu ani hian a nei vek a ni. Ka ngaihtuahna fim hmang thei loin min siam a mahse chu pawh chu ka duhthusam zingah a tel ve a ni mahna.
Ka mutna khum te takah chuan a ban khamin ka mu a, engmah sawi lo mahse a khat tawk a ka hmui a rawn fawh zeuh te, ka biang a chul thin te chuan lungawi hliah hliahna min pe a ni.
"Ka bulah i awm reng duh em?" a rawn ti a
"Aw.." tiin ka lo chhang vat a
"Keipawn ka bula awm tir reng che hi ka duhthusam alawm.. mahse kan nghah deuh ala ngai ang"
"Eng chen?"
"A rei loang. Chutih hunah chuan ka lalram ah ka hruai ang che anga kan pahnihin lal nihna hlan kan ni ang.." a ti a
"I kianga awm turin lal nih kher ka mamawh lo.."
"Ka lalnu bulah lo ka tan hun hman ve a thiang lo alawm. I mit chhung rawh le.. i khawvela i kir leh a hun tawh ania.." tiin ka mit chu a kut in min rawn chhing tir a..
Ka harh chuan damdawiin khumah bawk ka lo la mu a, ka ngaihtuahna ah chuan zan hmasa lama thil thleng bawk chu a rawn lut nghal..
"Ka mumang a ni maw.." tiin ka inngaihtuah a, mahse a tak ang vekin ka tem ngei si. Kha pa kha tunge anih? Mihring a ni chiah em? nge ramhuai zawk? Ka tiril chu a khur vek. Ani khan ngati nge kei kher min rawn hnaih?
"Nizan i mu tui em?" doctor chuan a ti a
"Aw mu tui lutuk.."
"I taksa pawn lam chu a tha vek a, mahse i hlauhthawnna kha a la reh lo mai thei a, inenkawl tha viau ang che aw" a tih chuan kha ka mi hmuh pa kha ka ngaihtuahna vak vel vang ni a ngaihdan chu ka nei a. Mahse, ka kianga rei tak awm ang maiin keimah ah hian a rim te chu ka hria a ni.
Tha viau mah ila zan khat tal damdawiin a riak leh tur a min tih avangin kan riak leh a. Kha pa thusawi "Ka bula i awm anih chuan thinthiin i muhil tihna a ni ang" tih chu ka hre kar a, muthilh hlan chu nghahhlelhna riau ka nei tlat a ni. Zan tir atanga muthilh ka tum a, mahse ka thei tlat lo. Zan rei thleng pawn ka mu meng kara, ka nu leh ka nau min awmpuitu te chuan chhuah ka helhhawlh vangah ngaiin mi an fiam an fiam a, muthilh ka chak zia hi an hrethiam lo a ni.
Damdawiin atangin kan han chhuak a, khawharna leh lunglenna chuan namen loin min zem a ni. Ka ngaihtuahna chu kha min chhanchhuaktu pa khan a kalsan ngai lo. Eng ka tih mah ka phur tawh loa, engtik lai pawn ka muthilh tumin ka khum ka bel ta reng thin. Ka chhungte hnenah chuan ka chauh chhuanlamin ka pindanah ka inkharkhum a, muthilh ka tum tang tang thin. Thinthiin ka mu lo nge a bulah khan ka kal thei tawh ngai lo, nge ani khan damchhunga a lalnu tur midang a tawng zawk? Chutiang ngaihtuah ringawt pawn ka mittui hial a ko chhuak thei hial thin.
Sociology class boring takah chuan class lecture ngaihsak miah loin dawhkan ka bawh a, ka lo muhil hman sek a. Ka mumangah chuan khapa kha a hnung zawng a kuah hian
"I hming tur chu maw Jeff" tiin ka lo hrilh a, ka lam a lo haw dawn chiah tihah chuan dar ri in min tiharh zawk a.
"Jeff" tiin ka phun sep a..
Ka lunglenna chu a ni telin a zual telh telh a, chaw ka ei thei loa, ka mu nghet thei loa, eng ka tih mah ka phur tawh lo. A chang leh ka tap a, ka hnena rei lo te tal inlar turin Jeff chu ka ngen thin. Ka ngaihtuahna ah chuan eng eng emaw thil hlauhawm tak tak hmu in ka phu leh dawrh a, ka au leh vak thin. Chu chuan ka chhungte mang a ti ang em em a, inentir hial ka ngaih phah ta a ni.
Doctor te chuan ka rilru lam anih thu sawiin ka accident tawh vang khan depression ka nei an ti bawk. Keimah ngeia ka sual chhuah a ngaih zia min hrilh mawlh mawlh a. Keichuan chakna ka nei lo, Jeff ka hmuh phawt a ngai a ni.
"Din, sleeping pills min lo ken teh naktukah in dawr a mi?" tiin ka thiannu chu ka va text a
"Ila muhil thei chuang nange?" a rawn ti a
"Aw, ka chau tawh lutuk.." tiin dawt ka sawi a
"Anu a chak ber ka zawt anga, ka rawn ken ang che.."
"Aih, kan pahnih chiah hriat turin.. please.."
Ka thiannu chuan a hreh ruk hmel hle a, mahse ka nawr lui ta tang tang a, kan inhmin thei hram a ni. Ka tum ber chu thinthi a mut a Jeff hnena kal a ni. Damdawiin a ka riah zan khan muthilh theihna a min jection khan ani kha ka bulah a rawn awm vat tih kha ka hre reng tlat a ni. Zanah chuan ka hmuh huna a bula ka awmdan tur te ka suangtuah a, a hming hrilh hlan ka nghakhlel tawh takzet.
Vawikhatah chuan mum li tawpin ka ei a kar loah ka muhil nghal a.
"Kha damdawi i ei avang khan ka rilru iti na takzet!" Jeff aw ngei mai chu ka hria a
"Khawnge ka awm?" tiin ka han hawi kual a, ramhnuai hnawng em em mai, dai tlak cherh cherna hmunah ka lo mu reng a
"Khatia muthilh reng kha i duh a mi?" a thinrim hmel chu a hlauhawm takzet
"Ka ngai lutuk che" tiin ka han kuah a. Ani chu a che eih lo
"Ka tihpalh.. mahse duhthlan tur dang min siam tal ta che.." tiin a hmuiah chuan fawh ka tum a, ani chuan min lo dang vat a..
"Ka khawvel ah lo, khawvel dang i mihring khawvel pawh i hmuh tawh ngai lohna ramah i kal thei asin.." vin lek lek chuan a ti a
"Mahse i kiangah ka lo kal hi.."
"Theih tawp ka chhuah reng alawm.." a ti a
"Ka tihpalh.."
"I ti nawn tawh loang tih min tiam la.." ka mitah tak en pah chuan a ti a
"Mahse engtin nge ka rawn kal tawh anga.."
"Lal thlah piang tawh zawng zawng zinga thlan bikin a lalnu nena lal nihna hlan anih hunah.. Chutih hunah chuan ka khawvel hian eng a pek thin let tam tak a pe chhuak ang, nang leh kei pualin" a tih chuan hriat chian belh chak takin ani chu ka en reng a..
"In tan chuan harvest moon" a rawn ti sepa..
"Jeff.. Nang hi Thla ah i cheng maw?" ka ti chuan a nui hak a
"Thla tih chu mihringho phuah ve mai alawm.."
"Jeff ka tih che khan a awmzia min zawh pawh i tum miah lo a mi a?" ka han ti daih a
"Ka hming thar tur i phuah.."
"Engtin nge i hriat?"
"I awmdan zawng zawng ka hmu a, ka hre vek. I kiangah ka awm reng alawm.." tiin min din hnaih sauh a, ani chu ka chung en ha a. Ka hmai a chul kualna vel chu nuam tiin ka mit ka lo chhing a..
"Nangmah vanga ka tawrhna hmu reng siin.." ka tih lai chuan min pawm kang lawp a
"Sawi tawh suh.." tiin min fawp vawng vawng a.
"Kan khawvel piah lamah hian khawvel dang a awm hi ka ring ngai lo.." Jeff ngheng chung chuan ka ti a, ani chu a lo nui huk a
"Galaxy tluklehdingawn za chuang te hian arsi tluklehdingawn za chuang theuh an nei a. I chenna khawvel chu chung Galaxy tluklehdingawn za chuang chhunga arsi tluklehdingawn za chuang zinga tel ve arsi pakhat 'Ni' tih a insawi hel kualtu planet zinga pakhat ve mai alawm, an awm loh ring suh.." a rawn ti a
"Ngati nge kei kher? Jeff"
"I duh lo a mi?"
"Aih.. duhthlang thei pawn min siam tawh loh hi.. mahse ka duhthusam ka hriat ngai loh neiin ka inhria a ni.
"Ka hmangaih che Rose.."
"Keipawn ka hmangaih che Jeff.. Ngati nge hming in neih loh a?"
"Inkoh dan bik chu kan nei ve alawm.. mahse chu chu lalchhungkaw hming a ni a, lalchhungkaw zinga i tel hma loh chuan min koh ve a thiang lo"
"Anih chuan i mite'n engtin nge an koh ang che.."
"Lalber" tih pah chuan a rawn nui zeuh a, a hmelthatna hi ka la luanliampui zel tur anih si chuan kei tluka luangliam nasa tur hi an awm ngai loang.
"Tihian i hnenah ka awm reng tawh ang ti raw?"
"Aih, keiman ka rawn hruai ang che.. chutih hun chuan chhel takin i awm thei ang ti raw.." a tih chuan huphurh viau mah ila ka nghah a ngai si.
Hun chhiar dan enge ka hre lo, mahse kan hun hman dan zawng zawng chu nuam leh hlimawm tak a ni. Ani bula ka awm chuan ka mihring ram ka ngai loa, kir leh chakna ka nei hek lo. Eng tur nge ka lakah a hman ka hre lo, mahse tur a zawnga dawn nuam ber a ni hial ang.
A bula hun tlemte ka hmanna pawn hlimna sawi sen phak loh min pe a, a kianga ka awm reng hunah phei chuan engtiang taka nasa in nunhlim nei ang imaw. Hmun hrang hrangah min kalpui a, hmun tam tak kan tlawh a, mahse ka hah ngai eih lo.
"Hei hi i khawvel a mi?" ka va han zawt zing tak! Mahse nui hmel bakin min chhang ngai lo
"I hre duh takzet a mi?"
"AW.."
"Ni lo.." a tih chuan ka lo ner nang a..
"Thla a in cheng anih chuan thla ruangam ka hriat dan nen engtin nge in nun thin?" ka lo ti a
"Nang hi enthlatu ang mai ini.."
"Ka khawvel thar tur chu anih dan tlem tal hriat ve ka phu alawm.." nui chung chuan ka lo ti a
"Kum zabi tam tak liam ta ah kha chuan kan khawvel chu in khawvel ai pawh a mawi a ni thin. Khawvel mihring awh thin em em lunghlu te chu kan leilung a ni bawk. Mahse in kum chhiar dana kum 1969 kum khan thil duhawm loh tak mai a thleng a, chu chu in khawvel miten kan leilung rawn rahna tur spaceship Apollo 11 tiha an vuah chu enthlakna hmangin an siam tih kan hria a, chutah chuan ralkhel dar vua in kan leilung chu venhimna hnuai a kan kalpui a lo ngai ta a ni. A nih dan dik tak chu kan leilung fate chuah hmuh theih tura venhim a ni a.. a chhan chu in leilungin a zawn nasat em em thil tam zawk chu kan leilungah hmuh tur a awm si a ni.."
"An ni chuan in leilunga an ram chhinchhiahna flag rawn dah chauh a lawm an tum Jeff" ka lo ti vat a
"A chhan chu an hmu lo miau alawm, i hmuh phawt loh chuan eng ang rilru nge i put dawn tih tunge hria?"
"Anih chuan chung ang chu ka tan hmuh ve a thiang lo a ni maw?" ka ti a
"Hmu tur chuan ka thisen i in a ngai ang.." a tih chuan ka hrethiam lo tih a hria a ni ngei ang..
"A mawina leh hlutna i hmuh hun chuan i inchhir hauh loang.." a rawn ti a
"Chung hunlai chuan i awm ve a mi?"
"Min ngai upa hle mai. Ni loe, kan dam hun chhung hi kum 100 chuang chu a ni ngei a mahse khang thil thleng kha kan mite kan inzirtir chhoh zel a ni a, kan nun a thil pawimawh ber a ni bawk.."
"Mahse ngati nge kei kher?"
"I hmelma leilung fa zinga pasal neih chu thil awm lo pawh a ni hleinem.. I mit chhing rawh le Ross, i harh leh hunah chuan i mihring ramah i awm tawh dawn ania.." a ti a
"Jeff ka hmuh chak hun che apiangin ka ko thei che angem?"
"Chu chu i tan leh ka tan a rem lo.."
"Mahse.."
"Ni thum hnu ah ka hnena hun hmang turin ka hruai ang che.."
"Mahse rawn kal lo ta la.." ka han ti a
"Ka rawn kal ngei ang" a tih chuan ka mit chu ka chhing a.
Tui taka ka muthilh lai chuan ka nu aw hian hla tak atanga min ko ri ka hria a, harh tum chuan ka han che dawn a, ka che thei hauh lo mai. Ka rilru erawh a harh vek a, ka nu, ka pa leh ka unau te min ko ri chu chiang takin ka hria a ni. Ka meng dawn a men takngial pawh ka thei lo. Jeffa'n min tih muthilh dawna a thusawi, "Naktukah chuan i khawvelah i kirin i harh tawh ang" tih chu ka hrechhuak zawk a. Ka nu leh ka pa koh ka tum a ka aw pawh ka chhuah thei lo, enge maw hian nghet takin min vet kual vek nimaiin ka hria a ni. Aw khawk rum rum chuan ka vel chu a hual vek a, a chang leh Jeff tawng ri phun mur murte..
"I huaisen viau emaw ka tia.." tih tawngri aw vin tak te chu ka bengah a khawk rum rum a, ka thlante chuan ka taksa chu a bual huh vek tih ka hria, mahse engmah ka ti thei si lo.
"A duhthlanna lo chuan helai hmunah hian ka hruai thei lo.." Jeff tawng ri ngei a ni
"Heti khawp hian a thlahlel che a ni lawm ni?"
"Ka thil tih theihna hi hmang lo ila hetiang hi a ni loang" Jeff aw bawk chuan a ti a, anni chu ka kiangah an awm tih ka hre thei a ni. Mahse ka nu te min koh thawn nen an thawm chu ka hriat chhawk reng a.
"Mihring i hmangaih thei loang, anni hi rawn kalin kan chenna hmun nuam tak ni thin kha venhimna puan a kan khawvel kan tuam chhuah a ngai a, an ram chhinchhiahna eng eng emaw kan khawvelah rawn dahin chu chu ropuina ah an ngai asin.." chu pa awki chuan ka lungphu chu a ti chhuak lo chauh..
"Bawihte.. bawihte.. a u.."
"Ngati nge hetia ka awm? Harh ka duh" tiin keimah leh keimah chu ka inbe mawlh mawlh a, Jeff hian min tanpui thei lo a mi? Ka mihringpuite khawvelah pawh nise hetia awm ai chuan let leh ka duh a ni. Che hauh lo chuan harh ka tumna lamah ka chau thei hial a ni. Ka tha ka thlah telh telh a, ka ri hriatte chu ka hlat telh telh a, ka lungphu chu a tawp dawn tih keipawn ka inhria. Jeff sawi, ama khawvel pawh nilo, ka khawvel pawh nilo ah chuan ka kal tawh dawn anih hi tiha ngaihtuah chuang ka muhil ta siai siai a.
Vawi leh khatah ka thaw kawk a, ka meng chiang hle. Ka bul velin phawk hra in ka han en kual a, doctor leh nurse te chuan che chang hauh loin min lo en thup a, mak an tih hmel hle bawk. Doctor pakhat chuan ka hmai zawnah a kut chu a han vai a..
"Rosy, hei hi i hmu thei em?"
"Aw.." ka aw zangkhai dan em em kha keipawn mak ka ti
"Tunah khan second sawmriat chhung teh meuh i thaw tawh miah lo asin.. a nu leh a pa kha va ko rawh, midang tello in" Doctor chuan a tih zawm zat a
"Ngati nge hetah ka awm?" tia ka han zawt chu tuman min chhang lo..
"Bawihte, ka van lawm em, Pathian thil tih theihna liau liau a ni.." tiin ka nu chu a rawn tap lut a
"Nu, ngati nge hetah ka awm?"
"Kan kaitho zo lo che a.. ni li teh meuh i harh tawh lo asin" a tih chuan Jeff nena kan awmdun hun chhung kha ni li lai a lo ni tih ka hrechhuak thuai a. Ka nute hi kalsan tak tak ta ila an tawrh an tur ka ngaihtuah chuan ka na let zawk em em a, mahse Jeff tel lo chuan ka awm thei si lo. Helai hmunah hian ka damdawi ei vang khan ka awm tih ka hria, mahse Jeff khan theihtawp chhuahin min chhanchhuak a ni.
In lama inenkawl turin kan inhruai haw a, ka nun danglam chak zia ka ngaihtuah chuan mumang ang mai niin ka hria a ni. Ka chhungte bula awm nuam ka tihna chu engtik atang khan nge a bo ka hre lo, mahse anni chu ka mihran telh telh a ni ber. Ni hnih hnu mai ah Jeff bulah ka kal dawn tih ka ngaihtuah apiangin he ka khawvel hneawm lutuk chhuahsan chu ka nghakhlel em em a, ani baka thlakhlelh thil dang ka nei lo. A ni tur a lo thleng ta, a tan awmzia teh chiam awm lo mahse nalh thei ang berin ka inchei a ka khumah chuan nalh in ti takin min hruai hun nghakin ka mut te chu ka tichhuak lui a mahse zanlai pelh thlengin ani chun min rawn hruai miah lo. A thu tiam a bawhchhia a ni.
Khami ni atang khan ka awmdan te chu nasa takin ka hloh a, chiri ang mai hian ka taksa te chu za in ka khur nasa thei hle a ni. Ka ngaihtuahna a kal bing apiang chuan ka bul hnai a awm awm ka paih pawp pawp a, ka chhungte pawh ka timangang hnen viau nghe nghe.Ani chuan ka thlir reng che tih a min hrilh chu ka hre reng a, ka bula awm ang maiin ka bia a, ka phun leh bulh bulh thin. Ka chhungte'n damdawiin lama min hruai an tum pawn ka duh loa, Doctor erawh min koh sak cham chi thung. Test hrang hrang tihluihna hmangin min tih tir a, engmah keimahah tha lo a awm lo. Chu chuan tute mai pawh chu a tibeidawng a, mi ang zan lo ang maia treat chhoh ka lo ni ta a. Rilru lam doctor pakhat chuan note bu chhah tak, a kawm dum hi ka rilru a tawt apianga ka ngaihtuahna ziah chhuah na tur min pe a mahse ka ngaihtuahna hi ziah chhuah thiam theih mai mai a ni si lo.
Kar khat chuang meuh chutia ka awm hnu chuan ka Jeff chuan min hruai tumna a nei miah lo.
"I bula lo kal chu a har viau a mi?" tiin ka tap a ka na takzet! Mihring chuahin mi an bum thin emaw ka tih laiin thla leilung a mi te pawn sualna in lo nei ve tho a ni maw. Ngati nge hetiang tur si ka nunah i lo luh. Ani koh kir chu ka thil tum ber a ni, theihnghil tum tih lam a lang miah lo. A hnena a sawi kha a hlen ngei ngaiin ka hre tlat si a.
October ni 5 zing kar a rawn inher chhuak leh ta, ka hnena a tiam Harvest moon pawh naktuk a ni mai tawh, enge ani hian a hriat le. Nidang zawng aiin ka buai nasa a ni. Mahse tumah hmu duh loin ka pindanah ak inkalh khum tlat a. Ka ngaihtuahna ah chuan ka thil tih duh loh em em mai a rawn lang a, chu chu sleeping pills ka ei bang ka dah that ei leh mai chu a ni.
"Nilengin ka buai a, ka hah takzet! Vawi engzat fakau nge ka inbual pawh ka hre lo.. ka khur nasa in ka taksa te chu puak darh dawn mai hian ka hria a ni. Tlai khaw thim lam a ni a, thla pawh a eng tha hle a ni. A tuk mai kum khata thla eng ni ber chu kum dang ang bawkin mi ho chuan an nghakhlel leh viau ang tih ka hria, mahse ka tan chuan a ni ve si lo. Duhthlan tur ka nei lo, ka damdawi dahna lam chu ka hai rawk rawk a..
"Jeff, i hnena lo kal hi a har viau a ni ti raw.. He thil ka tih avang hian min ngaidam ang che aw. Min hmu reng, nangman i sawi kha min lo dang rawh" tap a khur hlawk hlawk chung chuang tui bottle chu ka hawng a, ka in dawn chiah tih chuan ka bottle chu phih thla hlawk tu an awm a..
"Ka tihpalh" tiin nghet takin ani chuan min kuah nghal a, ka thaw te chu a chham awn hialin ka hria a ni
"Ngatinge hetianga awm tur hian min kalsan?"
"Ihmaw Rose.." ka lu ka lo bu nghauh a
"Ka tihpalh.. dawi thila infiampui atan chuan i hlu mah mah a ni, i phu lo.." a ti a
"Enge awmzia?"
"Nang hi ka bulah i awm reng thei loang.."
"Maw?"
"Kan leilung danah chuan lalthlah zinga ropui ber tur ka ni tih hrilhlawktu ten an sawi a, chu hrilhlawkna chuan kan hmelma leilung mi ngei nupui atan ka neih a ngai thu an sawi bawk" a tih chuan ka chil ka lo lem ri kalh a..
"I thuthlanna lo chuan ka hruai thei lo che.."
"Ka duh alawm Jeff, i tello chuan ka thi ang.." tiin ka lo chhang a
"Nangmah ah ka thiltih theihna dawi ka hmang alawm, min hmangaih a, min thlakhleh reng nan.."
"Sut pawh nila a danglam loang.." tap chungin ka lo ti a
"Ngati nge hetiang em em a rilru no leh rilru thianghlim kher ilo nih?" tiin ka mittui chu a rawn hru a
"Aih.. a ni lo.. ka ta tur ini alawm.."
"Anih ka dawi hi sut i inhuam em?"
"Aw, ka rilru chu ka hria.." ka ti a
"Anih chuan naktuk i mu i rawn harh hunah kei min hriatrengna a bo anih chuan dawi vangin min hmangaih tihna a ni ang.." a tih chuan ani chu ka kuah a
"Anih chuan ti suh, ka duh lo.." ka ti a
"Ka hmangaih tak tak che hi ka ring ngai lo Rose.."
"Anih chuan engin nge dang che?" ka ti a
"I chhungkua te hian kei aiin an lo hmangaih hmasa zawk che tih i hria ti raw.."
"Aw, mahse tu emaw hnen a min thlah ala ngai dawn tho asin.."
"Mahse nangchu lei hnuai a i mihring taksa zalhin an thlah che a ngai dawn asin, keimah vangin.."
"Mahse kan inhmangaih alawm.." ka tih chuan min fawp a..
Kan pahnih a ka kum ngei a kan mut dun hi ka ring ngai lo. Nasa takin min titap a amhse a lo thlen chuan engkim mai chu a mawi leh em em vek thin si a. A rim, a nui hmel, a engkim mai chuan hlimna min siam a ni. Ka chhungte hial ka kalsan duhna chhan hi engtiang taka belhchian dawl nge maw ni ang le, ka hma hun tur atan keizawng ka phur takzet a ni.
Zing ah chuan zangkhai vahin ka tho a, choka lam ka pan nghal a. Ka nu leh ka nau te chuan mak tih hmel takin en a..
"Enge?" ka han ti hu a
"I va dam tawh hmel ve.."
"Nia, ka hritlang nasa viau dawn emaw ka tia.. a reh leh daih nih chu.." nui pah chuan ka ti a
"Nia kha i rawn tho harh peih a.."
"Zing vawihnih vawithum hriltlang dawmdawi vangin ka tho thei loa, tho ngai lo angin min han treat kher a" tiin ka ngaihtuah a, ka lung chua awi vak lo.
Class kal turin ka insiam a, friay anih vangin ka phur kher mai, a chhan chu weekend a ni dawn tlat a. Class ah chuan ka thiante ka that tawh hmel thu min lo hrilh chuan tlang hrileng mai maia nih thu ka sawi a, thawveng min ti em em na chhan chu ka hrethiam lo.
"Zanin chu thla eng lawm ila.." Zuala chuan ring leng lawng takin a rawn ti a
"Tunlaiah tuman thla eng an lawm tawh ngai lo.." ka lo ti vat a
"Nizan thla kha i hmu em? a han en mawi dawn kha.. Zanin phei chu a van mawi dawn em" a han tiluam a, ten hmel tak chuan ka han melh a. Hepa hi chu a over ve hrim hrim.
Dar 4 thleng class kan neih avangin kan ban meuh chuan a tlai ruih tawh, lungleng mi ka ni lo na in boruak chuan engtin mawni tak min zem chiai a, ka lung a leng a ni tih chu phat duh viau mah ila ka inhre kur si. Ni tla tur kawl eng sen phut te chuan Pathian kutchhuak ropui zia chu min hriat nawn tir leh a. Boruak chu a nuam veng vang a ni.
Zanriah eikham ah chuan ka pindanah lutin pawn boruak hip tumin tukverhah ka han dak a, thla en zan ber an tih ang ngeiin thla chu a eng kher mai. Mahse, thla atang chuan ka mit ka la sawn thei tlat lo. Rei tak ka thlir nghawih ngawih a. Vawilehkhatah ka ngaihtuahna rawn inthlakin ka thil hriat loh tam tak a rawn lut zawt zawt mai. Ka tajsa chu a khur chhuak vek a, ka mit te chua vai ruai mai.
"Jeff"
Enge ka tih ka hre lo hmanhmawh takin in atang chuan ka tlan chhuak ta ringawt a, thla chuan ka kal na kawng min kawh hmuh nimaiin ka hria. Ngaihtuahna fim pu thei lo chuan ka pen hlawk hlawk a, vawileh khatah thil eng tak leh ri ring tak hian min rawn hnaih thut a, lei charah chuan ka tlu ta a.
"Jeff.. Jeff" tiin chu ramhnuaiah chuan ka au vak vak a.. Ka tap nasa hle bawk.
"Jeff ka hamngaih che asin" aw rawl tawp chuan ka au a, amhse tumah an rawn kal lo. Lung lu kut nghahchhanah hmangin ka tap ka tap a, ani kha ka chan thei lo asin. HUn rei tak ka nghah hnu pawn ani chu a rawn lang thei si lo. Ka beidawng takzet a ni.
"Rose.." ka phu chiang kher mai..
"Jeff"
"Helai hmunah hian mangtha ti turin ka rawn kal a ni.."
"Aih a theih loh.." tap chung chuan ka ti a
"In khawvel mai nilo, khawvel tuamtu leh chhung zingah hian enge ropui ber i hria em?" tiin ka dar chu a rawn chelh a
"Enge?"
"Hmangaihna.. chu chu nangmah atangin ka zir chhuak a ni. Kei chuan vertherna nen ka thanga awh tir che ka tum a, ni tlemte liamta atang chauh khan ka hria che a ni. Elevator a accident atang a ka hnena ramhnuai a ilo kal thleng khan ruahman lawk diam a ni. Ka tum ber chu a khawp a min hmangaih tir che a ni a, ka hlawhtling hle bawk. Nangin min hmangaihna aia ropui hi a awm lo emaw ka tih laiin chu aia ropui chu a lo awm si, chu chu i chhungkua in a hmangaihna che. Mi a anga i awm pawn an hmangaih che a, che thei loa i awm pawn an hmangaih che a, mihlim tak i nih pawn an hmangaih che. He hmangaihna ah hian hnehna ka chang tih ka inhria, i laka ka dawi ka sut hnu pawh a ka hnen a rawn kal thei tluk a min hmangaihtu an awm loang mahse chu chu ka phu loa, mahse i chhungkua te chuan an phu an ni. Ka lalram ah chuan ka thinlung a ka lalnu awm reng chung siin hmangaihna nen ro ka rel ang, ka theihnghilh tawh ngai loang che Rose.."
"Jeff ka hmangaih che.." tiin ani chu ka kuah a
"Keipawn ka hmangaih che Rose.."
"Ka thi thei ang.." tiin ka phun sep a
"Ni loe, ni a chhuah rual rualin keimah min hriatrengna zawng zawng a bo anga, i nundan pangai i zawh leh ang. Mahse, i kiangah ka awm reng anga,hlauhawm ah i awm ngai loang.."
"Ka thinlunga i thih ka phal lo.."
"I dam khaw chhuah nan ka tih a ngai si alawm.. Rose, i mit chhing rawh le, ka kal a hun tawh.. i kiangah ka awm reng ang.." tiin a kut chuan ka mit chu a rawn tuai a..
"Ka duh lo.. aih Jeff"
"Jeff.." ka tho chiang hle a ni, damdawiin ah bawk ka awm tih hrilh ngai loin ka hria..
"Nu dar engzat nge?" ka tih zawm zat a
"Dar 11 a ri tep.. i tha em?" mak tih hmel deuh chuan min en a
"Haw ang, ka haw ngei ngei a nga.." tih a thawh mai ka tum, ka ban chu a rawn na vak a.. ka au thawt nghe nghe
"I ban kha dim rawh.. i awrh a ngai a nia.." tiin min lo awrh tir vat a
"Nu haw ang, khawngaih takin.. tap chung chuan ka han ngen a.."
Ka nu ka tih mangan em avang chuan ka inthiam lo takzet mahse ka rilru chuan thil tum ran ka nei a. Ka nu chuan doctor te chu a ngen tak meuhin a ngen a, a zan a zanin in lam panin kan haw ta. Ka room ah chuan ka nu leh ka pa in min rawn zui lut a, an ni hnen ah chuan ka that thu leh mut ka duh thu ka hrilh a, kawngka kalh lo tura min hrilh chung chuan min chhuansan ta a. An kal velah rang takin kawngka ka va kalh nghal a.
Ka ban hman thiam lam ka hman theih loh avang chuan ka thil tih tum atthlak zia ka hrechhuak a. Ka lehkhabu dahna lam panin Doctor in a hma a note bu min pek chu ka phawrh a, ka van beidawng tak em!
"Jeff tun chiah min tanpui rawh. Ka bulah i awm reng kha.. ka hriatrengna a ta bo dawn mah la he lehkhabu ah tal hi chuan chuandun ka duh a ni" tap chung a ka tih velah ka ban na chu ka hre ta hauh lo. Hmanhmawh takin pen ka hum a, ka ziak tan dawn a ziah dan mai ka hre lo.. ka thaw te su a so bulh bulhin ka hria. Kan intawn dan ka ngaihtuah a, chutia ka ngaihtuah lai chuan ka ngiahtuahna te chu ka ziah chawp ngai miah loin ka lut chuan a ziak ta par par a. Zingkhawvar dawn thleng kan chanchin chu chu lehkhabu ah chuan ka ziak a ni.
Jeff, ka hmangaih che, ka hmangaih reng ang che.................
Chu diary chu khup in ka thaw chhuak hak a, ka hawi chhuah chuan khua a lo thim tan der tawh. Khang thil thleng kha engmah hriat chhuah zawh ka nei loa mahse keimah ah hriatrengna inphumru a awm a ni. Ka khum bula rose ka hmuh ni atanga vawiin ni thlenga la nung sarh chu ka en a, ka nui a. Tukverh lam pan vatin thla ka zawng nghal a, thla mawi ti ngai reng reng lo khan ka lung a ti leng thar em em a.
"Jeff, khawi hmunah pawh awm la.. hlim taka i awm theih nan ka tawngtai zel ang.." tiin ka phun sep a.
Oii..a na����������
ReplyDelete