KOŞULSUZ SEVGİ 9

KOŞULSUZ SEVGİ

***RENGPUII GUITE***

CHAPTER -9

RODOSLAV HARALANOV

Thutkhawmna pindan lamah chuan keini unau, Melisa leh Adile te chu kan inzui lut a. Ka nu erawh chuan choka lamah min pheisan nghal a. Melisa leh Adile te chu an mawi takzet a ni!  Ka rin ai tak chuan Melisa pawh  a phur reuh viau bawk a. Ibrahim bula a tal leh chawt ka rin laiin Adile nen kan bulah a rawn thu chat a. A hmel chu naupang thil thar nei nui reng te pawh a ang zawk hle a ni.

Melisa hlim leh phur hmel em em mai ka hmuh chuan ka thil tih lai mek hian ani a ti hlim anih chuan tih sual ka nei dawnin ka hre lo hial a ni. Ka chhungkua leh min hmangaihtu te min ngaihsakna thurawnte kha ka lo ngaipawimawh har mah mah zawk emaw ni aw tiin ka ngaihtuah hial a. Ni e, hlawhtling viau a lang chung hian nun khawharna ka neih te hi anni chuan min hmuhpui hneh em em mai zawng a ni si a. Ka tana tha chauh ngaihtuah tu te lo ngaihthlak mai hi thil dik chu a lo nita ber anih hi.

Melisa leh Adile te chu an vawikhat inhmuhna a ni tih rinhlelhawm khawpin an inpawh em em a, chu chuan min tihlim takzet a ni. Ka naupanlai te sawidunin an nui dun har har a, a khat tawkin keichuan ka lo khap a. Ka naupan laia ka ngen zia a han sawi chiah chuan Adile leh Ibrahim a tinui dun nasa hle a, kei erawh chu ka lo khi ve suk suk ringawt a.

“I nuih kha I insum kher a ngai lo ania..” ka nau te reuh chuan a rawn ti a

“A zat loh miau te chuan” tiin ka lo chhang vat a

“Mipa dik tak ini tih chu kan hre vek tho ania Rodo.. nuih insum phah a ngai lo..” a tih chuan Adile chu a nui nasa kher mai

“Nangni hi ngati nge mawni unau piang hmun ang maiin ka hmu che u..” Adile chuan a rawn ti a

“Chutiang ang deuh chu kan nia lawm.. Rodo nu hi naupang ngaina tak a ni a, an bulah ka tal chawt a ni deuh ber mai” Lisa’n a  tih chuan Adile chuan a lu a lo bu nghauh nghauh a

“Nu ngilnei tak a nih dawn chu..” Adile in a rawn tih chuan ka nau chuan min rawn en zeuh a

“Ni e, i rawn la tlawh ve ngei a ngai ang”

“Aw.. ni e, kha thu kha ngaihtuah chhuak hmasa tur zawk ka ni asin..” Adile chuan a rawn ti vat a

“Ka hrethiam che lawm. I pasal hual inhmuamup lutuk bulah hian thil sawi a har maithei a, ka bulah sawi zel rawh aw..” Lisa’n a tih chuan ka nui chhuak ve huk a

“Awm dun vak chi in ni lo anih hi nangni pahnih hi..” ka ti a

 “Tawngna hun ka chang eih lo . Melisa I phur mah mah lo maw?” Ibrahim chuan a rawn ti a

“Rodo tluka mi vannei  hi an awm angem le?” Lisa'n a tih chuan kan nui dar dar a

“Ibrahim hian vanneih a chak ve a ang riau.. I ti ve em Melisa?” Adile chuan a rawn ti a

“Nia in nupa hi in tangkai ngawt ang chumi kawngah chuan” tiin Melisa  chuan a lo chhang vat a

“A hmu der tawh a ang ka ti..” Adile chuan nui pah chuan a rawn ti a.

“Adile, Melisa ang hmeichhia chu kuah chawt chi an nia, chutiang mi ka ni lo tih I hriat kha..” Ibrahima’n a rawn tih chuan dik ti takin ka lo nui huk a

“Melisa, tikhan a ti a ti anga in pahnih chiah a in awm hunah a dan a dang ngawt ang aw..”

“Inhnial reng teh suh u, unau la ni mai tur in nih kha.. unau ni sat ho mah ula” Lisa chuan a rawn ti leh zeuh a

“I hria em Adile? Rodo nen a in pahnih chungchangah hian ani tluka phur kha an awm loang..” Ibrahim chuan a lo ti vat a

“Unaupa te tan chuan.. aah ka sawi awmzia chu ka thiantha ber, ka unaupa ni bawk..”

Engvanga ka lungphu chu rawn rang vak nge maw anih kher le? Tuman a thusawi hi an uksak awm der si loa.

“Bawihi Chairman in a hmu duh che a, a office ah.. kan hank al dawn em niang?” ka nu  chuan a rawn ti a

“Ka nu zanriah kan kil ho dawn tho alawm..”  ka lo ti vat a

“Chairman maw? Ani nen a titi chu ka chak lutuk alawm” thil dang ka sawi leh hma chuan Lisa chuan a lo chhang vat a

“A tha e, min lo zui ta che..”

“Umm.. kal ila” tiin ka nu chu a zui chho ta a. Ka rilru tak chuan hlauhthawnna in ka khat a ni. Enge maw a sawi theih mai loh zawhna lo zawt ta se engtin nge a tih ang?

MELISA INCE

“Chibai Chairman, ka hmu che chu ka lawm hle mai..” zam ru tak chung chuan ka han ti a

“Chibai Ms. Melisa Deniz, thu ta che..” dam thluam chuan min lo chhang a

“In tur I lam duh em?”

“Ka lo in tawh a, ka lawm e..”

“I chanchin ka lo hria a, mi ngilnei tak I ni..”

“Ni loe, ka tih theih phak ang ka ti mai alawm chairman..”

“Rodo nu ilo enkawl sak a, tunah lah a nupui neihna tur kawngah I tangkai leh em em bawk a, I lakah bat tam tak kan nei a ni”

“Ni loe, Rodo nu hi ka nu ang chiah a ni a, min enkawl sak lo ula keimah mai chuan ka beidawng tawh ngei ang.” Ka lo ti a

“Min mamawhna emaw puih theihna che ka nei anih phawt chuan min rawn hmu hreh loang che aw..”

“Awle, ka lawm takzet..” tiin kan han titi luam hnu chuan pindan chu ka chhuahsan vat a.

Rodo leh Adile ka hmuh dun chuan min tihlim takzet a ni. Adile chuan a kai deuh chawt a, Rodo erawh chuan engtin vak a ti lo mahse chu chuan anni pahnih chu a ti hmuhnawm zual. Movies vela kan hmuh thin a changtupa pa tak leh a changtunu hmeltha tak te hi an ang berin ka hria a ni.

Zanriah kan kil ho a. Nuam ti viau mah ila inven  ruk reng ngai ang rilru ka put tlatna chuan ka awm a ti nuam lo lek lek thin. Keimah vanga midang in nuam loh an tih ka hlauh em avang chuan phur sarh hmel chu ka pu hram hram a. Ka awmdan laklawh tak kara Ibrahim, min ngaihtuah hmel em em mitmeng chuan engtin mawni tak min siam a. Nge ani ngaihsakna dawn ka duh vang mai sawn ka ngaihbel zawk pawh ka hre lo. Ani saw a hawihhawm in mipa chet dan dik takin a che a ni.

“Melisa Istanbul lamah engtik thleng nge I awm ang?” Mrs. Elmas chuan a rawn ti a

“Aaa.. ka chiang chiah lo. Ka nu dinhmun a zir aniang chu.. “

“I tih awmzia chu Rodo nu?”

“Aw, ni e.. ka nu tiin ka ko mai thin a” ka pum chuan ka sa chhuak vekin ka hria

“I fel hle mai. Rodo hian I lakah bat tam tak a nei a ni..”

“Ni loe.. ka tih theih ve tawk alawm..” aw khur lek lek chuan ka ti a. Rodo chuan min lo en reng a, min khawngaih tih chu a hmel atangin hai rual a ni lo.

“Ni e, ani hian a mimal thil chungchangah kan puih mamawh se ka ti ngawt asin..” Rodo chuan min en reng pah chuan a rawn ti a

“Ni loe.. ka tha alawm.. In kianga chaw ei ringawt pawh hi ka tan chuan a hlu lutuk” tiin ka lo chhang vat a

“Hman remchan velah Rodo nu chu chairman nen kan rawn tlawh ve ngei ang” a  tih chuan ka lo bu nghauh a,.

“Hreawm taka I awm hi ka duh ngai lo.. keimah vanga dawt sawi tur dinhmuna I awm tur ngat phei chu ngaihtuah pawh ka ngaihtuah ngai lo” Rodo chuan pawnlam verandah ka din lai chuan a rawn ti a

“Nangmah chiah I inngaihtuah leh ta. Keimah vanga I dawt sawi te hi hrethiam lo khawpa la a ah min ngai a mi U”

“Ni loe.. Ka en reng che alawm. Bakah zanin te chu Ibraham nen awmdun ula I tan a tha zawk asin..” 

“A bulah pawh ka awm alawm.. min ngaihtuah leh lutuk anih kha..”

“Nuam lo itih chuan I duh duh hunah Villa lam kan pan dawn nia..” a ti a

“Teuh lo. I in ropui takah hian la awm ka la duh. Kal rawh Adile bulah..” tiin ka han nawr a

“Hey I duh duh na hmunah min kal tir thei loang aw” tiin ka kut chu a chelh a kan nui dun uar uar a. Nghet takin a kawngah chuan ka han kuah

“Awii, thlamuanthlak lutuk..” khi vur vur chung chuan ka han ti a

“Naupangchhia ang mai” nui chung chuan a rawn ti a

“Rodo..” Adile aw ka hriat velah chuan rang magkhengin ka U chu ka thlak a, ka tawlh hnung dawr a

“Adile.. ih englo..”

“Ibrahima’n a zawng che a..” a hmel chu a lungawi loh hmel riau a hriatna ka nei a

“Ka kal ange..” tiin inchhung lam chu hmanhmawh takin ka luhsan ta a.

“Ibrahim a pawi lutuk!!!”

“Enge thleng a?” ani chuan a lo ti vat a

“Eng lo.. pawnah.. Rodo ka kuah a..”

“Aww,, Melisa ! Ka bulah awm reng ta che. Adile in thil sawi a nei em?”

“Nei lo. Mahse a ngaihdan chu a ni lo tawp ang. A nau ka ni tih a hre si loa..” hlauthawng tak chuan ka han ti a

I rilru ti hreawm duh suh. Engkim a tha vek mai ang..”

Ibrahim chuan ka rilru tih thawven tumin eng eng emaw min sawipui mahse  a hma a thil thleng vang chuan ka rilru a nuam thei chuang lo. Kei hi ka u te an inpawh theih nana hmanraw pakhat ka ni ve a, ka tih chhiat leh si chuan keimah leh keimah hi ka inngaidam thei ngai loang, Adile in unau kan ni tih hria se chuan buaina engmah a awm lo tur mahse ka nu kan chhanhim theih nan chuan he thu hi kan zep a ngai si a ni.

“Ka pindan I en duh em?” Ibrahima’n a tih chuan ka lu ka bu nghauh a

“Kal ila” tiin kan inzui chho ta a

“Ka u te khan enge an tih a?”

“Ka pa te nen an titi ho aniang. Inhual loa inneih tir mai an duh a. Chumi chungchang chu an sawi ho a ni mahna..” Ibrahim chuan a ti a

“Ka u te hi an inneih chuan ka tibuai thei tawh awm si loa..”

“Enge awmzia?”

“Nupui nei a ni tawh anga, chhungkaw hran a din ve tawh anga..”

“Nangin I tibuai hleinem a ma nu ngei tan alawm. Nu te chu engtik lai pawh a kan puih tur zawk an nia lawm..”

“Ni e.. I room chu a nuam takzet!” ka han ti a

“I rilru tak tak I sawi pawn a ang lo..” min melh zeuh pah chuan a rawn ti a

“Tun ang ka rilru hah laiin tha ka tih loh pui tha tiin ka sawi peih dawn em ni?” ner nang chuan ka ti a

“Anih leh le.. Miss Melisa, I mi fakna ah lawmthu ka sawi e..”

“Haw mai ka duh..” ka tih chuan chiang kek kawkin min rawn en a

“I dam lo a mi?”

“Aih.. ka nu ka ngaihtuah deuh a..”

“Ka thlah ang che..”

“Ni lo, Rodo’n ka duh hun hun a kan haw theih thu a sawi alawm..” ka ti a

“Ni lo Melisa zanin ah chuan ni lo e. Adile rinhlelhna iti pung thei asin..” a tih chuan sawi dik ka ti hle a

“Mahse ka nu bulah kan haw ve ve dawn tih a hre si a

“Nia, mahse keini hi inpawh thei ang bera kan awm chuan a ngaihdan a thlak thei alawm”

“I sawi awmzia chu inhnai..” ka sawi zawm thei mai lo

“Ka hrethiam. A thleng dawn chuang lo. Mahse Ka u tan ania..” Ibrahim chuan a rawn ti a

“Ka u alawm..”

“Ni rawh se” nuih za hmelpu tak chuan a rawn ti a.

“Ka nu, ka pa.. Melisa hian a nu a ngaihtuah deuh a, ka va thlah ange..” Ibrahima’n a tih chuan Rodo chu a lo tho vat a

“Rodo’n Adile thlah te a ngai sia, kan tlai tlan loh nan..” Rodo tawng hma chuan ka lo ti vat a

“Miss. Deniz I tan kan inhawng reng ania aw..” Chairman chuan dingin a rawn ti a. Anni lam chu panin inmangtha nan chibai ka va buk hlawm a. Adile bul ka thlen chuan ani chuan min lo nuih seih a..

“Rodo nu chu ilo enkawl tha dawn nia aw..” a rawn ti a

“Awle, nangni pawh in haw kawngah fimkhur ula. Chuan, Elmas chhungkaw lakah ka lawm takzet!..” 

“Fimkhur ru aw. Inah kan inhmu dawn nia..” Rodo chuan ka hnung a rawn ben thek pah chuan a rawn ti a. Chung ringawt te chu Adile ngaih a tih that loh mawlh chu ka hlau a ni.

IBRAHIM ELMAS

A hmel ngui bur ka hmuh chuan ka khawngaih takzet! Hei aia tha a enkawl theitu dinhmun a din min ti chak zing hle ta mai. A hmel pawisawi lo tak chu inthiam lohna in a khat tih ka hria, a thiam loh lah a ni der si lo.  A hmel atang chuan a chau ve thawkhat tih a hriat a, mut a mamawh zia chu a mitmeng hah tih hriat taka meng ve hram hram te chuan a ti lang chiang hle.

Nghenchhan ngheng ar arc hung chuan a mit chua  chhing a. Ka Car khalh pah chuan ka va melh leh zeuh thin. Vawiin ni zet chu ka thlir ning lo nileng a ni e. Nidang ang lo takin a rawn inchei ve a, min tibuai hneh angreng viau. A landan pawn min tibuai thawkhat viau laiin a awmdan duhawm tak, nui ar ar leh a fiamthu thawh bula awm meuh chuan tawngna chang ka hre lo zawk hial a ni.

“Kan thleng tawh a mi?” thu tha chung chuan a rawn ti a

“Aihh..” nui chung chuan ka lo ti vat a

“Ka mumang a ni maw?”

“Mumang I nei hman a?”

“Aw.. nei hman e.. Kan lo thleng tawh a, ka muhil lai min lo sawi nawk nawk a..” a tih chuan ka lo nui hak hak a

“Mi mu tui lai sawi harh tur khawpin ka nunrawng lo aw..”

“Enga ti nge nangmah leh nangmah insawi mawina remchang I zawn reng a?” a ti niah niah a

“Chutiang chuan maw ka lo awm? Ka duh loh ang mizia ka lo pu reng anih chu..” ka han ti a

“Ni lo.. I duhawm alawm..” a tih chuan ka va en zeuh a, a thusawi chu a ngaipawimawh loh hmel hle mai. Nge kei hian ngaih pawimawh phet ka lo tum zawk. Atthlak takzet a ni!

Car chu ka han tiding riai riai a, a mit a chhing a, a muhil lo tih erawh ka hria. A beisei loh dan deuh a awm chu ka chak teh tlat a. A beng bul setah chuan awm hnaiin..

“Lisa bawihte.. kan thle..”

“Awi Lalpa..” tiin a rawn au chiam.. Ka coat nghawng chu hlauh avangin a tham nasa mai

“I tha em?” tiin ka han kuah a

“Ibrahim Elmas, min tihlau lutuk..” a tha khur pawh chu ka hre thei hial a ni

“Hahdam rawh.. Ka tihpalh anih kha,, ka tihpalh..”

“Lalpaa.. Engtin nge tiang khan I tih theih zawk?” min kuah reng chung chuan a rawn ti a

“Ka tihpalh.. I duh duh danin hremna min pe dawn nia..”

“Huiiii. Ka tha tawh e..” tiin a thu tha a..

“Melisa ka tihpalh takzet!”

“Hremna I hmachhawn tho ang..” a tih chuan ka bu nghauh a. Min tihlauthawng takzet a ni!

A nu pindan lam panin kan inzui lut a, Natascha leh nurse pakhat an lo awm a..

“Enge a lo an?” Lisa chuan a ti a

“Zia lam kan pan zel e. Khawnge Rodo?” Natascha chuan a ti a

“A rawn tlai deuh dawn a.. Ibrahim Coffee?”

“Aa.. awle.. I inthlak phawt duh em?” ka han ti a

“A ngai loe, I tlai lutuk ang..” tiin Choka lamah kan inzui phei ta a.

“Nichin kha..” ka han ti leh hram a

“A ho lutuk Ibrahim. Thli rawn thaw nen zawng zawng khan ka chiai thut a..”

“I mumang khan idea min rawn pe mawle..” ka tih chuan a nui hak hak a

“Mumang hrilh chi pawh I ni lo..”

“A thleng nawn tawh loang.. min tihlauthawng takzet alawm”

“Hmm.. I hlau ve thei tih ka hre chiah..” tih pah chuan coffee chu ka hma ah a rawn dah a

“Nia, ka tih nat che ka hlau a lawm..” ka tih chuan a nui ringawt a, ngawi rengin coffee chu kan in dun ta a.

Ka Car awmna thleng min thlah a, a bula awm hi kham tik ni a awm ngai dawn lo anih hi..

“Melisa..” Cara ka luh dawn chuan ka han ti a

“Um..”

“Vawiin kha I nalh takzet!”

“Ka lawm e, nangmah vang chauh a ni..” a tih chuan han sawi leh mai tur ka van hle mai..

“I tan engtik lai pawn ka awm tih theihnghilh suh aw..  mumang hlauhawm deuh  I man chuan min lo call dawn nia..” tiin Carah ka lut a, ka thusawi chu kei ngei pawn thing ka ti, a la nui hak hak zui reuh a..

“Mangtha le Ibrahim, fimkhur la..”