LOVE DO HAPPEN TWICE

Darkar thum chuang zet chu ka hmangaih thlan bulah chuan ka thu a.. eng ti turin nge ka kal a, eng thu nge sawi tur pawh ka hre lo.. ka hriat chin zawng chu ka thutna lei hnuaia chilh hnan ka hmangaih hi ka ngai em a ni. Kum chanve lai chu min kalsan atangin a liam tawh a, mahse khuarei in a hnem an tih hi keimah ah a ni ve lo aniang nge, nge ani hi ka tan a danglam em em a.. hmeichhe thenkhat ang lo taka ka nupui ni hial tur a ka lo suangtuah thin vang zawk.
.
Chhum dum invial khawm mup mup chu ngaihtuah nei lo ang maiin ka thlir a, khawpui ri pawh a hma aia uar zawkin a rawn ring a.. ka ngaihtuahna thinlung ah chuan ka bawihtei aw no tak khan ti hian a rawn ti a
'Jo, haw tawh rawh.. ruah i do chuan i dam lo anga.. duat tur che in ka rawn kal thei tawh dawn si loa..' tiin
.
Ka bana ka sana bun lai chu ka han bih zeuh a tlai dar 4:17 a lo ri der tawh mai. Ka thutna atangin ka tho a.. chu lai thlanmual reh zet, ka bawihte-i taksa an zalhna hmun chu ka kalsan in ka bike hunna lam ka pan ta a. Kawngpui ka pawh dawn tepah chuan ruah chu a rawn tla tan der mai, mahse ka kal chak zawng chu a ngai reng.
.
Khua chu a lang thim ruih a, ruah sur nasa tak karah chuan mipui kawng kal pawh hmuh tur an awm pheuh pheuh choh a ni. 'Engkim mai hian amah min hriatchhuah tir' ka tih fo thin chu tih chianin a rawn awm leh ta, ka kal mek na kawng a kan pahnih class bang ruahin min nan tum chu ka ngaihtuah chhuak a.. a nihliap te tak kan inzawn thli in a len chhe daih a nih kha. A huh belh ka hlauh vangin a chhe chung a khum turin ka ti a.. keimah nen a khum dun loh ai chuan khum loh pawh a duh zawk thu min hrilh laia a lungawi lo hmel te kha, a van duhawm em!!.
.
Nihliap zar pathum tliak kan khum dun a.. ruah leh thli nasa tak karah chuan a innghahna tlak lo hle mai. Ka hmeichhe hriat a zawnga thinchhe ber mai ka bula kal mek ka bawihtei, a dar a a huh belh hlau taka ka kuah mek chuan a dawh rei thei ta ngang lo.. a nihliap chu min phih thlak sak lawp a kawng thlangah a paih ta daih a nih kha. Chiang takin ka melh kawk a, a rawn nui sen sen a.. amah ka ngaihtuah avanga ka thinrimna pawh kha nuimawi tak khan a ti kiam thin reng a ni.
.
.
.
"Ngatinge i din reng?? i huh vek alawm.." tih ri chuan min ti phu zawk a.
.
Chiang takin aw lo chhuahna lam chu ka han melh a..  hmeichhe pakhat ka beng hnuai chen vela sang, ka hriat ngai miah loh hi ka bulah a lo ding a.. ani chuan a nihliap ken lai chu min lo zawn ve a lo ni a..
.
"Ruih i nei a mi??" chhan mai na chang pawh ka hre lo.. ka darah a rawn sawi deuh a
.
"Aih.. ka tha" ka ti chhuak hlawl aa
.
"Khawi vengah nge in awm.. ka lo thlah ang che" a rawn tih chuan ka ngaihtuahna pangai ka hmang thei tawh chuan ka hria. He nu hian a nihliap pakhat hmangin kan in a min thlah thlen a tum chu a nia.. a tlawmngaih vang nge midang ang bawkin hmeltha min tiin min ngaihzawn vang ni ang tih chu ka ngaihtuah a, a bula kal hi ka phur vak lo.. midang bula awm hi ka duh lo a ni ber rih zawk!
.
"Lo va kal rawh.. i hriat ngai pawh ka nih loh hi.. min hlau lo mi??"
.
"Mawl hle mai.." tiin a kal nal nal.. min chhan dan chuan ka nuih a ti za riau..
.
.
Pachhunga University College ah B.A kum thumna ka zir tan chiah a..  College ka zawm tirh phat atangin  basketball team ka zawm a.. ka che tha chho viau. College mai nilo Mizoramah pawh mi hriat kan lo hlawh sa deuh bawk nen ka tan hun tha a inher chho ve zel a. Ka inkhelhna thiamna leh ka pian piah lama ka hmel that thu hmeichhe tam tak sawi chu ngaiah neih chhoh a awl viau, a ninawm lek lek chang lah a tam. Hmeichhe tam tak over na zarah milar pangai ang hial a chei ka ni thin.. chu chuan min theh lar belh phah hle bawk. Ka tan chuan lawmawm lam a ni zel mai bawk a.
.
Ka kum khatna angah te kha chuan ka hmeichhe duhzawng harsa miah loin ka lo thing ve thin a, mahse a lo ho zia chu hmeichhe pakhat, ka hmangaih tih a ka chhal ve theih chhun ka tawn atang chiah khan a ni.
.
"Jo.. mipa tan hian hmelthat leh chhiatloh hi a tul miah lo i ti ve em??.. hmeichhe tan chuan an hmelthatna leh chhiatlohna hmangin mipa tha tak tak.. an mahni chawm zo tu tur an chhai thlu thei a.. mipa tan chuan hmeichhe tha hmu tur pawn hlawhtlin tho a ngai a.." tihin a sawi fo thin. Tuma hriatah hian 'ka hmeltha' tih tawngkam hi ka hmang ngai lo.. ka thinlung hian ka tha tih hre kur mahila.. mahse ani fiam nan chuan ka chhak chhuak ve fo thin..
.
"Ka hmelthat vangin min itsik a ni lomaw.." tih a fiam zui ka hrat em em a.. mahse thiam taka min chhan thin dan chuan min ti hlim fu thin a ni..
"Heng i hmelthatna i mit, i beng, i hmui, i khabe.. te hi ka ta vek an ni tho a.. mahse hnar hi chu ka duh lo a bawng tep lawm.." tiin a nui har har thin.
.
.
"Ngatinge min duh??" min va han zawt zing kher em!!
.
Ni e, keipawn sawi dan mai ka hre lo.. mahse hmeichhe dang lak a a danglam zia chu kei tluk a hmu a hria an awm lo.. hmu a hre ve tur pawn ka duh lo. Hmeichhe pangai ve mai a ni a.. a hmel chu ropui tih thumal tel tur khawp a hmeltha a ni lo nangin.. a mize nu hnap chuan mipa tam takin an chhai thluk chak nungchang a lo nei bawk nen.. ka lu ti hai map khawpin a luck thin a ni.
.
A tir chuan ka ngaihzawng zinga pakhat ve mai a ni a.. mahse belchiang chaktu a ngah zia ka hriat khan ka ta a ni tih hi mi zawng zawng hriattir ka tum ta tlat a.. ka hma sial vang tih chu a chiang reng, ani pawn chutiang chiah chuan a sawi.. Mahse, ani nen kan inngaihzawnna kawng kha a thlamuanthlak a, a hlimawm a, a chhinchhiahtlak deuh vek mai a ni.
.
Kum khat kan inngaizawn tlin kha midang mai nilo in kei ngei pawn mak ka ti.. hetiang ang hian a ni maw ka lo awm ve theih ka ti hial. Khatih hunlai khan BA kum hnihna kan zir dun mek a.. kum chanve vel chu kan kal ve tawh.. kan inhmangaih in kan inthlahlel takzet thin. Kan inkar a mi pawn tihbuai en a an en loh khawpin a nghet tawh a ni.
.
Nupui nei ve tur anga ka suangtuahna hmang ngai miah lo khan ani nen a inneitur angin rilru hial ka pu chho a.. chu chuan min ti hlim takzet, ani hi ka tan a ruat a ni ngei a ni tihin ka sawi thin. Mahse kan inhmangaihna nasa ber pawh in a a hneh loh thihna chu ka bawihtei chungah a thleng ta si. Kha mi ni atang khan ka thil tih engah mah phurna ka nei ta lo. Ka tuina ber basketball khelh pawh ka thlah hmak a.. chhungte rilru hah lutuk loh nan class erawh ka kal ve hram hram a, mahse ban hnu ah thlanmual a thim thleng thleng awm chu ka hrat thin hle a.. tun thleng pawn a la danglam lo.
.
.
.
"Nimin ah i va haw har awm ve Bawiha i chhungten min rawn call a.." Dina chuan ka bula rawn thut pahin a rawn ti a
"Nia.. thlanah ka kal a..."
"Vawiin chu min nghak law law la.. kan khel rei dawn lo,  ka bike saw tawng tawh lutuk a.. damdawiin lamah dah a ngai leh tawh" a ti nui nui a
"Nia.."
"Rawn inkhel ve tawh la.. min nghah chhungin tih tur vak i nei chuang loa.."
"Na.. ka fit lo em mai.. karleh lamah aw.."
"Karleh hi ti ve ziah a.."
.
.
Vawi tam tak Dina inkhel chu ka nghak fo a.. mahse kei erawh chuan ball khawih tumna ka nei tawh lo. Dik tak chuan keimah vang liau liauin ka Bawihte-i pawh khan basketball kha a ngaina chho ve hle  a (ka ngainat luih tir a ni mah zawk), midang bulah a khel ngai lo tak na in kan pahnih ringawt te khan khelh dun kan hrat em em a.. ka tan emaw kan tana ni chhinchhiah thlak bik apiang ah basketball kaihhnawih ball, jersey tih angreng min present ziah bawk thin a, ani kha min ngaihtuah chhuah tir a ni. Mahse, tet te atanga nuam ka tih em em hi chu hmuhnawm ka la ti bang thei lo chu a ni.
.
.
"Reilote hun min pe thei angem??.." tih ri chhuahna lam chu ka va hawi..
.
"Saw nu bawk saw maw!!".. Nimin lama ka hmeichhe hmuh kha a lo ni a.. a chhelo reuh zek mahse ka engah mah a thawk lem lo..
.
"Enge ni ta??" Jerry chuan a ball tih sawt pah chuan a han ti a
.
"Ahh.. Rp ka nia.. BSc 1st semester.. Red Cross team member zingah kan tel a.. englo, May 8 hi World Red Cross day ania.. he mi ni pual bik hian Aizawl a hnuchham in pahnih tal tlawh kan tum a.. donation ang deuh reuhin card hi kan zuar a.." a sawi zawh pah chuan a bul a a thiannu chu a nghawk sawk a!
.
"Engzat man nge??" Dina chuan a rawn ti vat a
.
"Cheng 5 a nia.. mahse nangmahni in inhuam chuan in duh zat zat in inlei thei.."
.
"Ok.. cheng 10 in a pawi ngem?? midang ho khan lo lei sak ve ula.." tiin Dina chuan a ti a, ka thian dangte nen pawh chuan an inlei sak sap sap a.. chu nu lawm hmel chu hmuhnawm ti takin chu ka lo en reng a
.
"Bawiha.. hei lo lei sak ve la" Samua'n a  rawn tih chuan ka va pan ve a..
.
"Ngatinge freshers ho an zawrh tir che u a??" Samua chuan a rawn ti leh a
.
"Senior team member ho chuan naktuk a carnival program kan siam a tan an inbuatsaih a.. e in duh chuan lo kal ve ula.. kan college ground ah tho hian a ni dawn a.." a tih lai chuan pawisa ka va pe a.. "Pakhat a mi??" a tih zawm zat a
.
"Aw.."
.
"Sen.. pawisa nawi kha lo pe la 90.."
.
"A ngai lo.. ti khan a ni mai.."
.
"I ti tak tak a mi??" tiin ka ho chuan min en a.. ka nuih a za ru hle.. "Nimin a mi kha i ni em??" min kawk pah ti tih chuan a rawn ti a
.
"Aw kir a ngai lo.." tih chiahin ka chhang a
.
"Card hi i duh belh em??" a la rawn ti hram.. pakhat pawh hi hmanna tur a awm loh nen
.
"A ngai lo.." ka ti hmuk a
.
"In vannei nih khan tikhan Rp ti raw.." ka thianpa lerh em em mai Dina chuan a rawn ti.. chhelo a tih thu nakinah ka hre leh ngei dawn anih hi
.
"Aw.. nih kan lawm lutuk aw.. naktukah chuan lo kal ve ngei ngei ru aw.." tiin an kal ta a
.
.
"Ngatinge in tawng ve duh loh??" ti a a thiante bula a phun nuah nuah ri ka hriat chuan ka nui suk a
.
.
"A hmeltha hle mai.. mahse a pian pawh a nalh tho a nih saw.." Dina'n a tih chuan an nui dar dar a, kei erawh ka thutna ngaiah ka let leh a
.
.
Ka thiante inkhel ka en mai mai a.. ka rilru ah thlan a kal a lang viau na chungin vawiin chu kal lo mai teh ang tiin ka inngaihtuah a. Kan thlang lampang science block atang chuan min an chhukin an rawn chhoh deuh reng avangin kei tih tur nei lo bawk nen kal va phei a, ka han thlek en a.. ka hmelhriat ka hmu nual. Ka thiante inkhel en tumin ka let leh mai dawn a tu emaw hian min lo ko a..
.
"Jonathan!!.."
.
Ka hawi let vat a.. ka cousin, kan batchmate Ruata a lo ni a.. min lo hui a.. ka zuk chhuk thla ve mai a..
.
"Inkhel i en a mi??"
"Aw.. en deuh mai mai.. enge i tih a??"
"Hei.. naktuk Carnival a mi tur ring kan siam a.. Red Cross member ho in.."
"E.. kha kha maw.." tih chiahin ka chhang a.. ka phone chu pawimawh tih tur awm mang lo chuan ka han khawih mai mai a..
.
.
"Rp.." Ruata'n a tih chuan ka hawi chhuak vat a.. Nichin lawk a tleirawl chhelo zet ka hmuh leh a thiannu te chu an rawn phei a
"U Ruat.. U Nanuni kan hmu loa.. pawisa hi tunge kan pek dawn??" a thiannu chuan a rawn ti a, chu tih lai chuan Rpi nen chuan kan inmelh fuh chiah.. a nui seih a hmun dang ka hawi nghal vat.
"Khawi hetah min pe mai ru.. engzat nge??"
"Card 30 kan la a.. cheng 10 in an lei deuh vek mahse pakhatin 100 in a lei a.." Rpi'n pawisa a pek pah chuan min rawn en zeuh a..
"In va thawk tha ve.. in duh chuan haw tawh mai ru.. naktukah lo tlai lo ula.." Ruata'n a tih chuan an kal ve nghal mai a
.
.
"Naktuk chu lo kal ve ula.. pawisa neih dan a vang sia.. college student ho bak an rawn kal pawh ka ring chiah lo.." Ruata chuan a rawn ti a
"Ka hre lo.. tih tur ka neih loh chuan"
"I rawn kal leh awm lo em mai.. i thiante tal rawn kal tir la.."
"Dina'n a peih ang ka lo hrilh ang.." ka ti a..
.
.
Dina'n min rawn koh chuan kan pahnihin kan inkhawlh haw dun a..
"Naktuk chu i bike ka lo hmang teh ang??"
"Ngatan maw..??"
"Aww.. college ah.. Sawmi ten min sawm nasa sia.." a ti a
"Nia.. ka hre lo le.." ka rilru tak chuan ui rukna riau ka nei.. ngatinge pawh ka hre bik lo
"E.. lo kal ve zawk la.." Min sawm mawi mai mai tih ka hre reng.. mi zinga awm ai chuan keimah a awm nuam ka tih tawh zia hrechiang ber tu a ni miau a
"Ka hre lo le.."
.
.
Dina chu bike atang chuan a chhuk a..
"Naktuk chu ka rawn sawm ang che.. i chas hruai suh aw" ka ti a
"Ehe.. kal ve i tum tihna mi?? hruai chin nang.." tiih a lut nghal a..
.
.
Chaw ei khamah ka inbual a mu turin ka insiam leh nghal mai a.. ka khum a ka jeans kekawr hak chu a piah a thutthleng ah chuan ka han theh phei a.. vawiin lama cheng 100 a ka lei card te chu a jeans ipte tang chuan a rawn tla a, ka chhar vat a.. min zawrhtu hmel chu rilru ah a rawn lang chiang kher mai, a awm veng veng ni zawk hian ka hria a ni. Kha tleirawl kha a hmeltha in a nalh takzet mahse ani aia tha leh lar, mi tam tak atchilh te pawn min rawn be foa mahse engah mah ka ngai ngai lo.. ka bawihtei bak kha ka rilru ah a lang ngai lo kha a ni a mahse tun tum zet chu a kut atanga card ka lak te chu awmze awm lo in ka lo thlek leh vang vang thin.
.
Zingah ka nu in min rawn kaihthawh chuan ka tho thei lawk lo.. a phun nasa kher mai, a nitin tih dan ni mahse ngaia neih a har viau. Ka thawh theih loh a a sawi tam ber chu ka inkhelh nast laia ka taimak thin zia kha a sawi chhuak ziah thin... a chang chuan ka thin a ti rim lek lek dawn thin a, mahse nu te ngaihdan atang chuan thil thlak danglam theih loh pakhat vanga fate indawm kun tlat chu a rilru nat thlak ve duh fu thin ang.
.
Ka nu ang bawrh bawrh lai chuan ka thil tih tum ka hrechhuak ka inperh tho rang hle.. ka inbual laiin Dina'n a lo call a, ka zawh veleh ka va call a.. ka lam phei tep thu ka sawi bawk a. Keimah leh keimah inhrethiam lo rilru takin minhring siam chawp ho ka tih thin em em intih hlimna lem lutuk a kal tur chuan ka inkhalh phei ta a. Dina te in ka thlen chuan mawnga hawlh ang zawk zawk a lo ni tawh.. kha nula kha a hmuh chak vang a ni tih ka hre reng, Dina kal chak nachhan ka ngaihtuah neuh neuh a, ka kal chak chhan erawh ngaihtuah ka tum hauh lo.. ka duh lo bawk!!
.
College kan thlen chuan rin aiin mi an lo tam phian.. an thil tih dan pawh a fel fai angreng hle a ni. Ka thiana chuan Red Cross member ho chu college atang a midang tan a an inpekna a ngaih hlut zia chu a sawi luam a.. ka lo um aw ve hmiah hmiah.. khabe sep thiam tih takah sawi dan lah chu a hre phian, member ten a fakna rawn hria se Branch President ah hial an dah duh ang tih ang vel a ni.
.
Thiante nen kan inhmu nual a, Dina leh kei chiah hi duty ve lo turah chuan a pa hlanga kal kan ni awm mang e aw ka ti. Inngaizawng hmuh tur an tam em em a, thian ho a kal leh naupang hruai pawh an awm ve nual bawk.. Min hmu tu zinga min hrechiangtu te chuan an rilru tak chuan mak an ti ve viau ang.. min biak pah a mak tih hmel taka tawng pawh an awm nual..
.
'Ehe.. enge ilo tih ve aa??' tih zawhna ka dawng nawlh nawlh.. a nuam viau lo!!
.
.
"Ehe U Din in lo kal ve tak tak elaw..??" Rpi thiannu kha a ni.. engtin nge ka thiana nen hian an lo inbiak hman aww
"Aw.. nia.. min sawm der ve sia.. kan rawn kal.."
"In van fel.. a ho in tih pawn heng games ho hi lo khel ve ru aw.." tiin a kawk kual a, kal leh nghal mai a tum a
"Saron!!" ka nui hak.. a hming te a lo hre leh hman tawh.. Saroni chu a rawn hawi let vat a
"Aw.."
"Khawnge i thiannu Rinpuii hi??" ka rin dan chiah
"Rpi maw.. saw saw lai booth no.8 ah sawn a awm.. lo kal ve ru.." a tih chuan kan zui phei a
.
.
Cross Bow Shoot game khelhna bulah chuan Rpi leh hmeichhe pakhat an lo thu a.. chumi khel ho chu an lo vil a.. kan va thlen chuan min lo nuih seih, ka nuih let ve suk.. nimin ai chuan ka huai ta deuhin ka hria. Ka thiana chuan zei takin a be vel chiam chiam a.. kei erawh ka phone khawih ka kun ngul a, an thusawi erawh ka ngaithla kar thung..
.
"Kan college chu nuam i ti em??" Dina chuan a zawt a
"Umm ti rap.. tunlai phei chu a nuam lehzual.."
"Ngati??"
"Red Cross vang hian.."
"Engvangin maw.."
"Diktak chuan BSW lak ka tum a mahse zirna hi Aizawlah a awm si loa.. mahse ka rin loh daihin tiang lam hi kan college ah hian a lo awm reng a.." a ti a
"Midang tan a inpek nuam ti chi i ni maw.."
"Ka hre bik lo" nui chung chuan a ti a.. ka va mit sir zeuh a, ka ngaihbel nge a hawi sawn rang hle
.
.
Dina'n number a dil lai chuan enge maw tak hian ka lo tawt up up.. ngatinge hetia ka awm, ka Bawihtei duh dan a ni lo ang tih ten ka inngaihtuah a mahse keimah ah hian dik lohna a awm. Midangin Rpi chu an rawn thlak avangin chawchhun ei turin kan chhuak a.. an mahni team tho in an siam eitur awmna lam chu kan pan a.. Ruata te an lo awm a, min lo welcome tha khawp mai.. Saron-i chuan Rpi hnenah min thutpui turin a ti a, ani erawh chuan eitur sem ho a pui a.. Dina chuan tawng ve tur a min signal nan min kheuh zeuh zeuh a, ka hre lo awm hmiah hmiah..
.
.
"Engmah in khel ve bawk si loa.. enge in lo tih ber a??" Rpi chuan a rawn ti a
"Kan lo kal ve chak a.." Dina chuan a ti a, ka lo nuihpui a
"Kan tan a hlawk awm lo.. in khelh khan pawisa in pe a, kha kha donation a tan kan duh lawm.." a ti a
"Nih chuan thingpui in zawhah kan khel vek ang.."
"Hehe.. chas in zawn pah dun vang nimaw.." a tih pah chuan min lo en a.. ka lo nuih leh ringawt..
"Teuh lo.. zawn pawh ngai tawh chuang mi... i bula kan awm thei a.." Dina'n a ti chuan a nui vei kar kar a..
"Haha.. anih i thianpa tan hian a mi??" a rawn ti leh hram.. he nau te hi a tawng duh phian
"Jonathana nih hi... a lar rap i hre ngai em??"
"Van tul loe aw.." ka ti a, kan nui ho dar dar
"Chuan chas i zawnpui a mi??" a rawn ti leh
"Ani chu zawnpui a ngai tawh hleinem.. a thinlung hi seal a char hnan a ni tawh a.." chu thu a rawn sawi rual chuan ka hnual rawih. Chutiang chuan keimah min beisei tu ho hnenah Dina hian a sawi fo a, sawi thiam ka tiin ka lo tan thei viau. Mahse, tun tum zet chu ka lawm lo ru hle.. a chhan erawh ka sawi thiam bik lo.
.
.
Games enge maw khelh ho an sawi a.. kei erawh chuan boruak hip turin ka awm khaw thawn rih tur thu ka saw a.. a sir a thutna ah chuan ka thu a.. keimah hi ka ngawng huu in ka hria.. ka inhrethiam lo, ka kal kher kher chu ka inchhir a ni!!
.
Minute sawmhnih vel ka thut hnu chuan ka ngaihtuahna a kal vung kher mai.. Ka tho thut a.. ka kekawr ipte a ka bike chahbi chu ka phawrh a Dina chu ka ko a..
.
"Lo khalh haw mai rawh.. ka kal dawn.." tih pah chuan chahbi chu ka va theh a, ka kal nghal a.. min ko zui nasa hle mahse ka hawi let lo!!
.
.
Taxi remchang ka hmuh hmasak ber chuan ka chuang a a, ka rilru tawt apiang a ka kalna hmun lam ka pan leh ta.. helai hmun ka pan avang hian ka rilru a hahdam phah ka hre ngai loa, dam ta huai a inhriatna pawh ka nei ngai lo.. mahse, tih theih dang ka nei lo.. Taxi tanga ka chhuk hnu chuan tlanmual lam chu ka pan zel a. Thlanmual thlen dawn hnaiha peng lo awm ka kal pel tur chu ka ding leh.. ka ngaihtuahna chu ka duh lo hle a ni.. ruih ka chak tlat!! Ka Bawihtei khan zu in kha a duh lo mai ni loin a huatin a haw thin.. khami vang khan ani nen kan inngaihzawn nghet atang khan in tum chhinna ka nei ngai lo.. ani ka chan hnu pawn ka la chhawm nung reng.. mahse vawiin hi ka inhrethiam bik lo.
.
.
Wine shope lam chu ka pan nge nge.. Whiskey a enga pawh min pe turin ka han ti ringawt a.. Mc. Dowells half bur khat min pe a, ka lo la vat a.. a thlanga dawr te ah dispo cup leh mineral water ka lei a.. thlanmual lam ka pan ta a. Thlanmual chhak a chawlh in ah chuan keimahin ka thu a.. inthiamlo rilru tak si in ka thli ta karh karh, keimah kha ang lo ka in ti hial zawk. A chanve pawh ka in loang tihah chuan ka thei tawh ngang lo, a bang chu ka bagpack ah ka dah ta tawp a.
.
.
Bawihtei thlan ka thleng.. ka in hnem hranpa loh avangin ka ruih em em pawh ka hre lo. Ka han thu hnawk a, a hming 'ZOSANGPUII' tih inziak kalh chu ka en reng a..
.
"Ka rilru hi i hmu tlang ti raw.. Bawihte.." tiin ka phun sep a.. ka ngawi leh vang vang a
.
"A hmeltha i ti ve em?? ti suh aw.. a hmeltha lo.. khawvelah nang chiah i hmeltha.. midang hmeltha an awm lo.. ka rilru a awm tur chu nangmah chiah ti raw.. ka dinhmunah hian awm in i dunhmunah awm ta ila ka na viau ang ti raw.. i rilru ah midang an awm tih ka hriat chuan ka na ang ka hria lawm.." enge ka sawi tum ber pawh ka hre lo.. ka phun nasa hle tih chu ka hria a ni..
.
.
"Heii Jona.. Jona.. Jonathan.. Bawiha.." chiang lo ruaiin ka harh a.. lei dai raih ah ka mu tih ka inhre vat a.. khua pawn thim lam a lo pan tawh hle a.. zawi takin ka han inbeng kai a
.
"Ngatinge zu i in a Bawiha.." Dina chuan min beng fai pahin a  rawn ti a
"Tlem bak ka in lo.."
"I awmdan hi midangin hria se an hmuhsit dan tur che i hria em Sangpuii chu a thi tawh.. chu chu pawm rawh.!!"
"Ka chhungten an rawn bia che mi??" ka ti daih a
"Be lo.. kan ban hnu ah i haw tawh leh tawh loh hriat tumin ka lo call che a i la thei loa hetah ka rawn kal.."
"That chu an hriat loh chuan.." ka ti a.. kan inzui chho ta a
.
.
Kawngpui kan chhuak a.. bike hunna lam kan pan a..
"Lawkk Bawiha.. ka luak dawnin ka hria.." ka ti a
"Tah khan luak tawp rawh mi an lo kal loang khua thim tep lawm.." a lo ti vat a.. ka luak nghal chu a ni mai..
.
"I lu la hai viau mi??" chhan pawh ka chhang lo.. ka luak tha hlei thei lo nen..
"Jonathan.. hei chicks an lo kal luak tawh rih suh.. Jonathann!!!"
"Lawk.. ka pum a inpump nasa.." luak lehnghal bawkk!!
.
.
"Ehe.. tinge a??" chu aw zet chu.. ka harh kawkin ka hria
"Nangni maw Rp.." Dina'n a tih chuan ka ding ngil nghal awt.. mahse ka pai ta chawn chawn..
"Fimkhur rawh.." tiin chu nula chuan ka banah a lo chelh a
"Ka tha.." ka thu ka la sawi ngam pawh kha zakthei lo ka inti rilru hle..
.
.
"Rp khawi vengah nge in awm a??"
"Heii hetah Vaivakawnah hian.. saw lai lawkah sawn.. ngatinge a i thianpa hi.. hmanni pawn helaiah hian ka hmu tawh.." a tih chuan ka zak ru chem chem..
"Nia.. a nau thlanah a kal a.." Dina chuan a lo ti ve hmiah
"Khawi vengah nge in awm??"
"Jo hi chu Ramhlunah kei chu Chanmari.. tinge i va haw tlai ve.." Dina chuan a ti a
"Nia. . kan hnatlang  lehnghal a" a ti a
"Anih chu..a tlai tawh sia in thleng vat rawh.. ka lo bia ang che".. ka thin a lo khei zakin ka hria
"Awle.. anih u aw.." tiin an kal ta a
.
.
Dina chuan inah chaw ka ei ngam a ring lo aniang chu an in a ei turin min sawm a.. ni e ka nu leh pate tiang chuan ka hmachhawn ngam ka ring chiah lo a ni. Rawlthar nun zawh chhoh lai kha chuan an hriatah vawihnih khat chu ka rui ve tawh, zilh pawh min zilh nasa hle thin a nih kha. Mahse, kan han upa ve telh telh a infiamna lama kal duh chuan ruihhlo thlah chhoh a lo ngai a chu mai bakah ka nun a hlu chung chuang em em khan zu ka in te ruihtheih thil dang ka tih kha a phal lo bur thin a ni si a.
.
.
A chhungte chaw eikhamah kan kil ve choh a, ka ei tha thei mang lo.. haw a ka khum a tluk zal ka chak ber a ni. Kan ei kham hnu ah Dina roomah thu in guitar ka perh mai mai.. ka rilru ah kha nu hmel kha a lo lang leh thin.. ka lu chu ka han thing vak ringawt thin a.. ka inhrethiam lo kher mai.. Sangpuii'n min thih san atang khan tu hmeichhia mah hian ka rilru an la la loa ka mit ti tlai tu pawh ka tawng ngai lo.. kha ka hmangaih, ka bawihtei kha ka ngaihtuah chhuak fo zawk thin. Rpi kha a nalhin a chhelo em em a, a hmel pawh tha tak a ni.. a mitmeng chiang leh lian kalh te kha nalh ti lo tu an awm ka ring lo mahse ani tluk a khum zo hialtu thlenga mitmei hmuhtu ka tawng ve nasa hle a.. ka engah mah an thawk ngai lo.. khanu kher kher kha chu ngatinge he rilru ah hian a cham reng ka hre lo a ni.. nge ni a, thamral leh vat tur zawk.. a cham rei ka ring loa ka duh lo bawk.. niminah pawh ka hmu a enga tan mah ka ngai lo a ni lawm ni.. ka Bawihtei rilru hi a nat eng dang mah a ka hlauh thinna hian ani ka ngaihtuahna hi ti bo thei se ka ti hle a ni.
.
.
Ka bag a ka zu in bang chu ka paih chiang kher mai.. vawikhat mah in leh tawh lo turin ka intiam bawk.. Red Cross card te tak te ka lei chu ka pawt chhia a paih bawk a. Ka thinlungah hian Pathian leh ka chhungte tih loah chuan ka Bawihte i bak lang turin ka duh lo.. tunah ngat phei chuan ka chhungte pawh ka dah hnuhnun zawk chang a tam ta hle a ni. Khatiang hmelhriat pangai pawh nilo in min tibuai thei loang tih ka ngaihtuah lui tlat a.. mahse ka Bawihtei nen kan hlimlai ngaihtuah a ani ngaih ka tum poh leh kha tleirawl hmeltha veng bawk kha a lo lang leh thin.
.
.
Thawhtan lama class kal chu ka phur teh chiam lo.. ka thianpa zei leh chhelo em em an a nula chhai mek Rpi chanchin min hrilh ngei awm si a.. chung thu ngaihthlak chu ka peihlo lawk hle a ni. Mahse class kan han kal chu a sawi miah lo, mak ka ti rilru hle.. zawh mai te chu ka chak a mahse ka insum hram hram a.
.
.
Ka class kal reng reng te chu tu emaw zawn ruk nei tlat hian ka inhre thin.. ka inthiam lo ru hle a mahse he thinlung hi ka duh dana control thei ni ila hmana hmanah hmalam ka pan ngei tawh awm si a. Nilaini ah canteen ah Dina nen kan awm laiin Rpi te thiandun an rawn lut hlawl.. ka thiana nen chuan an inbiak ka rin tehreng nen an Rpi chuan a rawn nuih seih ringawt.. nge keimah zawk min rawn nuih pawh ka hre lo e a.. chu chu remchangah la in ka han zawt a..
.
"In inbia maw ka tia.."
"Rpi maw??"
"Umm.."
"A induh thiam zekk.. hmanni te kha chuan kan pawisa an mamawh vang mai maiin nih kha min biak huam huam.." a rawn ti a
"Huam huam em em pawh ka lo hre loa.." ka lo ti zeuh
"A chhiatloh a hre ve aniang.."
"Hnawltu che ila tawn ngai loh kha.."
"Chu reng.. a harsa zek.." a rawn tih chuan ka nui huk
"Thil neih har deuh chu an hlu nge nge.." ka ti leh hram..
.
.
Ka thianpa hlimna hi ka hlimna a ni thin a, a lawm lohna ah ka lawm ngai lo bawk.. mahse tun tum zet chu ka hlim ru riauin ka hria.. enge ka awmzia hi ka hrethiam lo, ani hian ngaihzawng chu nei lose Rpi nen inngaizawng mahse pawi ka ti lo a chhan chu ka tan chuan eng kawng mah a kaw ngai dawn loa, ka rilru a awm hi sawi chhuah a nih loh chhung chuan a tha a nimai mahse ngaihzawng a nei a, pakhat zawk chu a then ngei dawn tih ka hria..mi kawp mi a ni lo miau a. Mahse, nakin ah Rpi aia tha hi hmu se..a  chin dan ngai hi a sim theih loh zia hrechiangber tu ka ni maiu a.. a tih nat ve ka hlau a ni.. engvanga lo hlau nge ka nih chiah hi ka hrethiam bik lo le.
.
.
Tlai lamah chuan thlanmual lam ka pan leh a, ka rin loh deuhin Sangpuii nau Nonoi a lo awm a.. ani chuan a u thlan chu a lo ti fai mek a..
"Ehe U Jo.. ilo kal ve ka ring reng a.."
"Nia.. duh aiin ka lo thleng hma thei loa, i nu te an dam em??"
"Um dam e.. hmanni ah i rui a mi a??"
"Maw.. tinge i hriat??" mak ti tak chuan ka han ti a
"Cindy'n a sawi a.. hmanni ah i u bialpa kha thlanmual chhakah a rui a, a luak a tia.." a tih chuan ka inthiam lo ru hle a
"Tunge Cindy chu min hria mi??"
"Aw.. in college ah a kal tan ve chiah lawm.." a tih chuan Rpi bula kal kha a ni chiang ang tih ka ring nghal a. Ka ngaihtuah zui zel.. 'Rpi thiannu khan Sangpuii bialpa ka ni tih a hriat chuan ka chanchin pawh hi a hre ngei ang'.. tih te chu ka ngaihtuah zel a.. A va han atthlak em!! ka Bawihte hmu turin ka kal a, engvanga kha nau kha ngaihtuah nge maw ka nih le..
.
"U Jo.. ngaihzawng i nei duh tawh lo mi??" Nonoi chuan a rawn ti a
"Aih.. i u lo chu ka hmangaih theih ka ring lo.."
"Tu emaw ila hmangaih maithei a sin.. a u chu a thi tawh lawm.. kinah chuan nupui ila nei ve duh anga tianga i awm reng chuan tuman an nei pei loang che.. chas te ex an duh tawh miah loh thik pawh a na nia.." a ti nui nui a
"Chutiang i u hriat laiin sawi suh.." ka ti a
"A u pawn midang nei turin ka duh che.. ka hria lawm.." a tih chuan ka nui ringawt..
.
An in thleng ka va thlah a.. lut turin min ko a mahse hmanni ka ruih thu vel an hria tih ka hriat avang chuan a chhungte ka hmu ngam loa, ak inkhawlh haw ta zawk a.
.
.
NBA 2K16 games ka download thar chu ka khel a.. ka phone whatsapp message tone a ri deuh chhen.. ka ngaihsak lem lo, hriat ngai loh leh thiante bak an ni leh dawn lo tih hi ka chiang. Ka khelh tui lai chuan call ka dawng a, ka thianpa a lo ni a kan inbiak zawh chuan whatsapp message ho chu ka han check a.. number save loh min rawn text tu zinga pakhat chuan ka rilru a la peng fal bik tlat..
.
'U Jonathan.. U Dina hian chas a nei lo tak tak a mi???'
.
Hmm.. hepa teh hrep chu!!Kimkimi kha a then nge then lo tih ka hriat si loh avang chuan ka zawh sak mai ngaiin ka hre ta a.. ka va text.. min reply rang hle!!
.
'Bawiha Kimkimi i then mi??'
'Teuh lo mai.. a rawn bia che mi?? kan inhau a.. min ringhlel leh tawh.. lo sawi fel teh' ka thianpa amh nise ka haw ru tlat
'Rpi nih ka ring hemi no.hian min rawn zawt a..'
'E.. aw anih kha.. a nei lo lo ti teh Bawiha'
'A teuh loe.. pakhat chiah thlang rawh' tiin ka va reply
'Heii.. fiamthuna chi a ni lo..' a rawn la ti zui..
'Rpi saw ti na suh!'
.
Khatia ka va ti mai kha ka thinrim vang nge ka hma ka sial vang pawh ka hre lo.. Dina chuan 'I duh a mi Bawiha??' tih a rawn thawn chu reply en ah pawh ka en lo.. ka phone chu ka dah a, Rpi pawh reply lem lo chuan ka mutsan ta daih a.
.
.
College a Dina nen kan inhmuh chuan engmah thleng lo ang maiin kan awmdun a, a rilru tak chuan a hriat ruk ve kur chu ka ring. Tlaiah chuan inkhel turin court lam ka pan a, ka thiante ho chuan mak min tih hmel hlawm em em a.. keichuan stretching tih pah chuan 'Enge' ti ni awm takin Jerry chuka mit ka kan khum euh a..
.
"I tha em??" a rawn ti a
"Tha chuan ka hria" ka lo ti vat a
"Rilru hahna i nei mi??" Zorina'n a rawn ti bawk
"Nge mawni le.. inkhel turin ka sawm ziah tih chu inhriat kha.. Bawiha shot chhin la.." tiin Dina chuan ball min rawn pass a lo.. ka nui suk a..
.
A tlak hniam zia chu sawi ngai loin tupawn kan hria.. hah takin thutna lam ka pan a.. ka thaw hlawi hlawi mai. Dina chuan min rawn zui a, tui bottle min rawn pe a..
.
"I duh ti raw.." hah aw tak chuan a rawn ti a.. ka ngawi reng.. "A bula i awm khan i danglam lutuk.."
"Chu chu ngatan??"
"Nei rawh.."
"Huh.." a duh duh a a pek kual theihah a ngai maw ni aw tih ka ngaihtuah hman..
"Ka ti tak tak.. hmalam i pan a ngai a nia Bawiha.."
"Nia.. mahse ka theih ka ring lo.." tiin ka bottle a tui chu ka in kharh a
"Tum rawh.. mahse thil pakhat??"
"Enge??"
"I nunhlui nen a hmalam pan i tum chhung chuan midang tan buaina bak i thlen loang.."
"I sawi awmzia??" tiin ka han en a
"I bem dawn anih pawn i nunhlui sawi lang suh.. i tawrh nat thin zia sawi lang suh.. a bik takin Rpi.. no.1 a nih theih lohna thinlung kik kik mi a ni lo mai a ni lo, pakhatna  anih theih lohna tur mi a be vak loang.."
.
Ka thiana sawi chu a dik dawn awm mange aw ka ti rilru neuh neuh.. thil dang min hrilh leh biak dan tur a sawi atangin a hriat chian hmel viau.. mahse chutiang lamah chuan ani hi ka ring ber a ni, hmeichhe lem a zei em bawk a.
.
.
Tlaiah Ka Bawihtei thlanah ka kal a.. enge maw tak a hmachhawp hlimawm riau neiin ka inhre tlat pek.. ani pawn thik ai chuan min lawmpui ka ngaihtuah thei ringawt te chu mak ka inti. Zanah chuan Nonoi call in Rpi chanchin chu ka hrilh a, a lo phur em em mai lehnghal.. High school an kal ho thu leh a fel zia chu a sawi liam a.. a luck leh luck loh ka zawh chuan 'a luck ang hu in a lerh lo' tihin min chhang a ka lawm ru veng veng..
.
.
Conversation list ka en thla a.. number save loh pakhatah ka tawp chat!! hun rei tak hnu ah hmeichhia ka be hmasa ve dawn chu a nia..
.
'A nei a mahse keiman ka nei lo :)' tiin ka va chhang.. a hnu rei vak loah typing tih ka hmu.. kan out ringawt a!! Ka awmdan mai mai chu ava naupangchhiatthlak ve..
'Reply har em em.. ka hre tawh lawm aman min hrilh a :D' a rawn ti
'I la na em??'
'NO' min chhan dan mai mai chuh nuih a ti za riau
'Chhang tawi ve..' ka va ti a
'Sawifiah thiam phak baka a 'NO' vang nih kha..hehe' a van lawmawm reuh tak em
'Kinda cute.. :)'
'Wow.. thanks to you.. vawiin khan i van khel thiam' a rawn tih chuan ka zak ru chem chem.. ka che tha em em si loa..
.
.
Chumi zan chuan zanlai thleng kan intext a biak a nuam reuh phian.. a nelawm a, a zahawm ru phian si.. a frank a, mahse ngeiawm hauh si loin!! Chumi zan atang chuan kan intext deuh reng hi a ni mai. Ka hmanhmawh lem loh avangin inhriatchian phawt ka duh a.. bem lam hawi zawng chuan engmah thu ka la sawi rih lo, a duhawm zia erawh sawi hmaih a har thin.
.
.
College ah chuan department khata awm lo ta chu inhmuh a har em em a.. kan inhmuh ve chhunah lah in nuih zeuh leh 'class a mi??' tih bak kan sawi ngai lo. Dina lah chuan nep min tih zia a sawi cham chi.. amah anga zei teh hawrh nih hi ka hlauh zawng tak tih a hre der si loa..
.
.
Ka thiante ruala ka inkhel leh ta zeuh zeuh chu ka chhungte lawmah a tla a min duat zual sawtin ka hria.. hmalam pan hi a lo va inchhirawm loh tehlul em tih min ngaihtuah chhuah tir fo thin. Mahse a hma ang em em a regular chuan ka inkhel bik lo.. kar khatah vawi hnih tal Sangpuii thlan tlawh ziah ka duh thin si a (Ka Bawihtei tih a rem tawh chiah lo in ka hria.. mahse ka tan a hlutna a danglam phah chuang lo).
.
.
Thla khat dawn kan inbe ve ta reng mai.. tlaiah chuan ka haw veleh Rpi chu ka va text a..
.
'In ka thleng chiah..'
'Inkhel leh a mi??'
'Nope..'
'Thlanah i kal a mi??' a rawn tih chuan nuamlo ka ti ru riau
'Umm' tih chiahin ka chhang a
'A vannei e :)'
'Chutia mi.. kei hi lawm vannei..' tih ka type a, dikin ka hre si lo.. ' kei hi lawm vannei tih chu ka clear leh ta zawk a..
'Aw.. tehreng mai.. nang ang hmangaihtu a nei a..' a rawn tih chuan chhan dan a vang angreng.. sawi tur dang ak dap ta zawk a..
'Naktuakah i hman angem??'
'Engmaw??'
'Ka treat ang che.. dar engzah ah nge i free??' ka va ti a
'11:30 to 1 chu ka free ang..'
'Nih chuan chhuak chho lawk ila dawrah thil kan ei dawn nia..'
'Canteen ah nimai se.. a ho e..'
'Hehe.. Ok i tih dan dan'
.
.
Ka zam ru viau na in ka phur viau bawk.. a class neih zawh dawn awmah an class bulah ka nghak a.. class atanga a rawn chhuah chuan min rawn nuih seih. A sam dum hlap a awm chen vel a sei ngil siau chu a inhmeh em em a.. a mit tlem a a dum chuan a to lang sexy hle bawk.. a hmui hnawih vun rawng lam lek lek chuan hmeichhe nazawng inhmehpui theih loh a inhmeh bik zia a ti lang chiang hle bawk. T.Shirt var plain tlem a thawl deuh a hak chuan a ti lang fresh em em a..a jeans kekawr hak rawng da lampang leh sneakers bun te chu a inrem vel vek.. Hmana Dina'n 'A hmel chu a tha viau a.. a pian pawh analh tho a nih saw' a tih chu min hriatchhuahtir rum rum a.. chu mai a ni lo inchei pawh a thiam hle a ni!
.
.
Thil kan ei lai chuan eng enge maw kan sawi a.. a tawng duh reuh berh berh hle.. min hmu chu a laih ve deuh ka ring ania, a lai hlek lo.. mahse a che over hauh lo bawk!
"Tinge ka koh dawn che.. U JOnathan maw??" ner pah deuh chuan a rawn ti a
"Min u suh.." ka lo ti vat a
"Nih Jonathan maw.. nge Muanpui.. chal amh mah em??haa'
"Jo tih mai rawh" ka tih chuan a nui seih a.. a van tha chiangkuang emm!!
.
.
Vawiin a kan inhmuh vang nge a hma aia nasa in ka vei.. bem chu ka duh deuh ta rum rum mahse ka hreh ve deuh si.. mahse ka tih loh chuan kei chiah mipa ka awm si loa tih ka ngaihtuah chuan ka tih ngei ngei chu ngaiin ka hre si a..
.
'Rp..'
'Umm..'
'Hmangaih hi pahnih a neih theih i ring em??' ka va ti a
'Can love happen twice?? i tihna maw..??"
'Umm'
'Ehh.. a bu i chhiar mek nimaw..'
'Engaa?? a bu in a awm tih pawh ka hre lo' ka va ti a..
'Ravinder Singh ziah Can love happen twice tih kha i hre lomaw..??' a rawn ti a
'Aw.. hre lo..'
'A ngaihnawm lutuk chhiar ve rawh..' a rawn ti a
'A tawp dan min hrilh phawt la.. hmangaihna chu tum hnih a thleng thei reng em??' ka va ti a
'Chhiar ve mai rawh.. :P' a rawn tih chuan a nuih a za ru hle
'Anih leh maw..'
'Umm'
'Bul min tan pui duh angem??' ka va ti thawr
'I sawi awmzia chu??'
'Min duh em.. bul tanpui a tan min duh em??' ka va ti leh a
'Nitin keichu bul thar ka tan ziah alawm.. nangmah zawk kha a nia..' a rawn ti a
'Nangmah nen chuan ka thei ang..'
'Nakin a buaina awm leh tur ai chuan bul tan loh law law k duh..' Dina sawi ang chiah.. no.1 a nih theih lohna ah rilru pek a tum lo bur!!
'Ka tumna tal i en duh lo a mi??'
'Thei tura i inrin chiah i ti thei ang..'
'Thei tura rinna nghet tak lo nei ila..'
'Ila tih chu ka nei tihna a ni lo..'
'Thei tur inrintawkna nasa tak ka nei a ni..' Huizz.. ani ang em em a harsa hi ka la hre ngai lo..
'I inrintawkna ah ka lawmpui a che..'
'Chuan chhanna??'
'Ngatinge min zawh han sawi phawt teh??' a la rawn ti hram.. min fiam kual a ang mah tawh zawk.. mahse he chance hi ka bawhpelh anih chuan a har tawh viau ang tih ka hre si
'Ka chetzia ah te ka ngaihsakna che leh ka biak danah te i hre mai lo a mi??' ka va ti a
'Chungte chu"min duh aniang a.." tih rilru put nan choh hmeichhia chuan kan hmang..'
'Hmeichhia ngaihtuahna chu a mak thin bawk em a..' ka ning ve ta deuh a ni
'Nia.. kan over hmeichhia chu.. kan fall hma lutuk.. kan insecure hma bawk.. min be ngun em em mahla min biak loh chhung lek pawn enge min ngaihdan niang le.. tih ngaihtuahin kan rilru hi vawi tam tak a inlumlet hman thin :).. i awih em??'.. A sawi a sawi hi chuan a awihawm zo leh vek zel
'Tawngkam a sawi aiin chetzia a tih lan in duh zek emaw ka tia..hehe' ka va ti a
'A ni ringawt lo.. confess kan duh.. in inpuan kan duh thin.. chumi hnu ah chetzia in in tilang zawk dawn nia.. chetzia a tih lan vak a.. sawi si loh hian hmeichhe rilru in tibuai.. haha'
'I van hre reuh..' ka va ti a
'Ka thiante ah hetiang buaina tawk hi an tam lutuk a..haha'
'I tawk ve lo a mi??'
'Ka hre lo.. hihi'
'Anih min zilh hnem tawh bawk a ka hre reng ang.. Rp ka duh che.. min duh em??'
'I hriat reng hi ka ring tlat a ni.. keipawn ak duh che.. ;)'
.
Ka hlawhtling ta.. mipa tam tak hian khatiang a mi bem kha an peih ka ring lo a ni.. mahse ka dawhtheihna zar ka ti lo thei lo.. ka lawmman dawn hi mi tam tak neih theih loh a ni si a.
.
.
Nitin college kan kal dun a, haw lam erawh ka inkhelh thin avangin a haw hmasa thin.. a changin thlanah ka kal ve thin bawk a, ama hriatpuina thlapin.. 'I biak seat hnunglam khan Rpi a chhawm a mi??' tih fiamna dawn zeuh zeuh chu a nuam ka ti riau thin. Sangpuii nen inanna an nei tlem em em a, amhse tehkhin erawh ka tum lo bur.. pakhat ka hmangaih hmasa ber a ni a, pakhat erawh ka hmangaih hnuhnung ber turah ka ruat thung.. inanna inang lo tak an nei a.. chu chu an dangdai dun em em a.. an dangdai dan erawh a inang lo hle..
.
.
Nitin a danglam zia ka hre telh telh a.. chu chuan min ti hlim hle thin! A harh reuh em em a, tawng duh reuh berh berh hle bawk.. a thil hrat em em mai pakhat chu Mizo film pakhat 'Zodinpuii' a an tih dan chu voice record a zir hian min rawn thawn nasa thei hle a..
.
'Jo.. tinge Catherin-i khan Remsang tih a a koh che a..' tih hi a hrat em em a.. Vawikhat zai turin ka ti lui tlat pek a, a hreh ngang mai mahse a hnu chuan a rawn zai a.. ka ngaihthlak chuan ka van nui nasa em!! Mimi Renthlei sak hla pakhat chu a hlathu a rawn thlak kual pek a..
~~Hmangaih Lalmuanpui.. ka ngai a che,, ka ngai ber che.. tawng leh ka mawi lo nang ang lungdumtu~~ tih a a zai record a rawn thawn anih chu!!
.
Keipawh zai turin min ti fova pangai tak hian ka zai sak mai thin.. a lawm thei hle.. zan khat chu hla thar a neih thu min hrilh a min thawn tur in ka ti a.. ka han ngaihthlak chuan Taylor Swift hla pakhat a rawn kaihlek leh hram..
~~Some day i'll be Jonathan Lalmuanpuia nupui.. and all you're ever gonna be is mean~~.. ka nui nasa hle a.. ka nu hial ka ngaihthalk tir va zan kha..
.
.
Sangpuii thihcham anih avangin an inlam ah ka leng phei a, Rpi chuan ka haw huna text mai tur a min hrilh avang chuan nilengin ka be loa. Sangpuii chhungte chuan Rpi tana theihtawp chhuah tur a min fuih nasat em avangin keipawn bialpa tha nih ka tum ve hle bawk! Ka haw chuan a tlai tawh viau a.. Rpi chu ka call a,  amut a chhuah tawh thu min hrilh avang chuan muhil turin ka mangtha ta a.
.
.
A tuk chawlhni ah chuan kan inbe mang lo.. kan tih dan a ni ve reng a.. kohran program a kan kal ve ve thin avangin inbiakna hun kan nei ngai meuh lo a ni. Zanah chuan ka call a.. a chhang lo.. ka text a, a reply bawk si lo chu ka rilru a nuam lo hle a.. inkhawm ban velah an in lam panin ka inkhalh phei ta a. An in ka thlen chuan inleng an lo tam hle a.. Thalai pawl ho an lo leng khawm a lo ni a.. Rpi chu a buai em avangin min ngaihsak hman lo bawk nen haw leh mai chu ka tum a, ani pawn 'ka lo thlah ang che' a lo ti sam et.. ka lung chu a awi zan lo, a tuk mai chu MSL a kan club khelh hun a ni bawk nen thin a rim tung mai.
.
.
Zingah chuan good luck wish min rawn thawn a.. chu chuan a lak a ka thinrimna a ti nep lo hle.. chutah ka inkhel chu en a tum loh hmel hle bawk! Inkhel kan tan atanga
reilote ah kan tumpui te zinga mi vangin ka ke ka ti na leh tlat pek.. chetchhiatna hlirin min zuiin ka hria. Mahse, ka ke chu a lo na vak lem lo tih ka hriat chuan lawm viau mahila ka lungawi thei lo.. thinrim takin inkhel chu ka en a, kan la chak lo zui ka rilru in Lalrinpuii ka puh hmiah.. inkhelh zawh lamah kan haw dawn tepah hmanhmawh tawkin a rawn kal a..
.
.
Tinge a nih theih a??' a rawn ti vak.. rum tawkin ka lo melh.. midang ho chu haw mai turin ka hrilh a.. Dina hnenah chuan taxi ka lak mai tur thu ka hrilh chuan ka thiante zinga mi chuan ka bike chu an khalh haw ta a.. Ngawi rengin kan thu dun reng..
.
'I awmdan hi i hrechiang em??' ka ti a
'Engmaw??'
'Ani kha hetiang hi a ni ngai lo a sin' ka tih pah chuan ka na zawk.. amah ka tih nat vang a ni ngei ang
'Ka hria lawm..' a rawn ti sam et
'Engkimah min support a.. ka inkhel apiang a en a.. an in a ka kalin min ngaipawimawh ber zel a sin..' vin aw lek lek chuan ka ti a..
'Umm a dik alawm..' a lu bu ngauh ngauh pah chuan a ti a.. ka bialnu chu nilo se ka beng duh hial ang
'Ka tan a nat zia i hria em??'
'Nia a na ngawt ang..'
'MAWLI' ka sawi tum ni miah lo ka sawi chhuak!!
.
A kun a.. a ngawi reng.. keipawn sawi tur ka hre lo.. khatia ti tur kha ka ni lo tih ka inhria.. ka vin avang hian ka dam phah lo, ka nat phah zawk!! Mit sen ram in min rawn en a nui hmel tih luih hriat takin a pu a..
.
"U Sangpuii kha engah mah ka tluk pha ngai lo tih hi i sawi kher ngai loin ka hria asin.. ka hriat piah lamah nitin college ah ansawi ziah lawm.." a mittui luang chu hruk pahin a nui seih a.. "Pathian hian i bialnu tur hi min lo thlang fuh ka ti.. a chhan chu ka hmunglama min sawi zuitu te thusawi hrelo der a.. ka hma lam a min sawi chhe tu pawh engah mah ngai duh lo min nei a.. i thlan kalte, an in a i kalte.. a nu leh pa thei i pek te.. a thlan a pangpar i dah te.. makpa chet a an in a i chet te hi ka hre vek a chhan chu nangman min hrilh miau a.. mahse min hrilh lo mahla nitin a sawi peih tu hi an awm asin.. kan college mai nilo kan vengah leh biakin ah te thleng.." a thaw hak a "Khang mi te khan nang hi eng dawi hmangin nge ka chhai thluk theih che le tih an inrinsiak luai luai hi i hre lo tak tak nge i hre lo der zawk??" vin takin a ti a.. kal mai tum chuan a inher a..
.
.
Chutah hmanhmawh takin ke bai chungin ka zui a nghet takin a hnunglam atangin ka kuah a..
"Ka tihpalh Bawihte" tiin ka phun sep a.. ka thinlung hi inchhir avangin a na vawng vawng a ni..
"A pawi lo.." tiin ka kut a rawn hum a.. min hmachhawn zawngin ka kawi herh a
"Thlanah ka kal tawh ngai lo anga.. a chhungte pawh ka hmu tawh ngai loang.." tiin a biang a mittui luang chu ka hru a
"Aih.. kan pahnihin kal zawk ang.." nui seih pah chuan a rawn ti a.. zuk kun hniam in a hmui vawt thler ah chuan ka fawp vawng vawng a, ka uar telh telh a.. ka ke rin ngam loh lam reng loin amah ka lo ring zawk alo ni a.. min nawr sawn a tum a a ban a rawn kan deuh chu kan balance kan hloh dun a basketball court ah chuan kan thal dun chiang hle..
.
Hmanhmawh takin a rawn tho a..
"I tha em??" a rawn ti a.. ka nui suk a..
"Tha mah mah" tih pah chuan ka bula mu tur chuan ka pawt mu ve leh a.. Chutah chuan inkhelhna a kan chak loh vanga rilru natna bo vekin leh ke bai chunga la haw tur ka ni tih lungkham hauh loin ka bialnu chu uar takin ka fawp a.."
.
.
>>>>>THE END<<<<<