TENNESSEE WHISKEY
TENNESSEE WHISKEY
.
.
Ka muhil chu ka han harh a, ka lu chu a hai muai a, ka tui in lah chu a hal huam huam a. Thei leh thei loin ka han inbeng kang a, thim zingah chuan tui intur awmna lam pan chuan ka indap phei a. Ka awmna hmun chu ka in a ni loa, ka pa in lah a ni hek lo.. mahse chu lai hmunah chuan kei aia tal tam leh tlangnel an tam loang tih tur khawp a hun ka hman nasatna hmun a ni. He hmun hian ka tana nachhawkna a pai niin ka hria a, a chhan chu he khawvel a min hmangaihtu leh ka hmangaih awmchhun 'ZU' engtik lai pawn ka hmuh theih thin vang a ni.
.
'Engvanga tun ang huna harh ziah mai nge maw ka nih le..' tiin ka phun sep a
.
A ni lah tak a, zan tam tak he zu dawrah hian ka chatthla fova.. zing lampang dawr an hawn dawnah kaihthawh ka ni leh mai thin. Mahse zan thum vel chu a ni tawh ang, zing khawvar hma si , khawfing chah hunlai vel a ka pentawngin min tih harh tak fo chu. Harh kur chunga mi zu dawra awm reng thu va awm suh, zawi tak a ka haw leh hna hna a ngai fo thin.
.
Ka jacket, ka mutna thutphahsei bula mi chu ka ban a, ka in lam panin ka kal hna hna a. Insawizawi tura chhuak tih loh chu motor tlan bak hmuh tur an awm meuh lo. Muangchangin ka kal a.. kei zu in nasa, ruih loh chhunga pentawnga hun hmang tih takah ka pai leh khut thin. Ka in awmna lam peng pana kawng kawi ka chhuak tep tihah chuan Car sen pakhat hi ka lam panin a rawn tlan a, min hnaih zel a.. min sut tum hrim hrim a rawn tlan a ang zawk ta mah mah.. insaseng ka tum chhungin min su ta der mai!
.
Engtinmah ka awm lo.. Nilo, Ka thi lo ka tihna mai ania!! ka ke hi chu a na ve deuh chu a ni..
.
Car kawngkhar inhawng ri ka hriat rual rual chuan ka inseh ruh..
.
'I va fimkhur lo em em ve!!!..' ka ke dawm pah chuan ka kun ngal a
.
'I tha em?? a pawi ka ti lutuk..' chu aw ka hriat chuan ka hawi chhuak vat a. Mipa leh mipa kan tih mai ka rin vei nen, a aw atang choh pawh a ngaihdam chakawm ngawih ngawih a lo ni thung si. A kut no fahran in ka khup ka dawmna kuta a rawn dawm ngat phei chuan ka hik deuh zawkin ka hria a ni. A mangang hmel chu mangang hmel ka hmuh tawh zawng zawngah a la duhawm ber awm e.. chu chuan tlem chuan min inbengdaih tir ve thei deuh.
.
'Damdawiin ah i kal ang aw..' a rawn ti a
'A ngai lo..' tiin lungawi loh hmel takin ka tho a.. bai chung chuan harsa ti taka kal mai chu ka tum a. Chutah ani chuan rang takin min rawn pawt ding a, damdawiin a min hruai loh pawn pawisa tal min pek a duh thu min hrilh a.. hne tih hriat takin ka heh hnuai lam chu ka pet a, ka kut chuan ka tuai zeuh a. 'Enganga pawisa nei lo pawh ni ila tu hnen atang mahin a thlawnin pawisa ka dawng loang' tih rilru pu chung chuan a carah chuan ka lut ta a.
.
.
Damdawiin atanga kan chhuah chuan ka in a min thlah theih thu a sawi a..
.
'A ngai lo.. ka lawm e' tiin ka chhang a
'Khawngaihin.. kar khat hnu ah chiah ngai i awh thei dawn si a.. chu pawh keimah vang' inthiam loh hmel pu tak chuan a rawn ti leh tan ta. 'Hmeichhe mittui hi tur hlauhawm ber a ni' an tih hi chu nep te.. he nu inthiam loh hmel ringawt pawh hi ka tan chuan a hlauhawm ru lutuk tawh tlat.
.
'Awlee..' ka tih a ngai leh ta tlat mai!
.
'Nizan ah mu mang loin vawiin lama ka nutei fanu te inneih hmanna tur vel kan buaipui a.. an inah ka riak nghal a.." a rawn ti a
'Anih chu.??' tiin ka lo chhang mai a
'Ka mut chuan thawh ka hai ka hlau bawk sia.' tiin min rawn nuih seih a 'khawvar hun ka nghak a, mahse ka lo muthlu tho anih hmel..' a ti a
'Chungte chu sawi tur alawm.. engtinnge i unaunu inneihna lam chu ni ta ang??' ka han ti a
'Keimah vangin hliam i tuar a.. ka kalsan thei ringawt hleinem che..'
'Hetah hian ka chhuk ange..' ka han ti a
'Aih.. a theih lo.. ke in i kal that theih loh kha.. ka chhungte chu thil awmzia ka hrilh mai ang..'
'I insawifiah nachhan kha ka kaltir i phut vang a ni lo mi??' nelawm loh hmel pu tak chuan ka ti a
'Aihh.. a teuh lo..' a nui lui vak vak a, a za lo tih chiang takin ka hria a ni.. za lo takin ka nui ve huk a, kan ngawi dun ta a..
.
.
A hmel a tha in a fel hmel hle a. A kum ala upat hmel loh tak na in awmdan mawi a hre hle in ka hria. Mahse, keimah zawk hi mi tumah nel nei lo leh ka thenawmte takngial pawh hnaih ngai lo ka lo ni bawk nen tu mah hi nel tumna ka nei ngai lo a ni.. nula hmeltha ngat phei chu ka tum lo lehzual! An lakah ka lo hawihawm tawk lo a nih pawhin pawi ka ti lo, a bik takin he nula lakah hian.. ka ne nat vang hian Barah pawisa khel turin kal thei lo ta ila ka thawh chhuah tur pawisa min tum sak dawn teuh si lo.
.
.
'Tah hian ding rawh le..' ka ti a
'Khawi lai takah' tiin a rawn nui seih a
'Tunah!!' thip zet a melh pah chuan ka han ti a.. a ding ve nghal mai
'Ka hming chu Mary a nia' tiin min chibai tumin a kut a rawn lek a.. He nu awmdan te reuh chu a mak ka ti rilru hle
'Jeffrey..' tih pahin ka lo chibai let vat a
'Helai colony ah hian i cheng tak tak maw?? Uncle Jeffrey' min rinhlelh hmel fe chuan a rawn ti a..
'Uncle a??' ka ti ha a.. ani pawh chu a inthiam loh hmel hle a
'Ka tihpalh.. englo, i hmuihmul leh khabe hmul vel kha..' tiin a thusawi chu a zawi telh telh a
'A pawi lo.. ka hria e..' tiin Car kawngka chu ka han hawng a. Ka rilru tak chuan a uncle tur khawp a ka upat loh zia chu ka ngaihtuah a..
'Inenkawl tha ang che aw.. harsatna dang i tawh chuan khawngaihin min hrilh hreh suh aw..' a rawn ti a
Chhan pawh chhang lem lochuan ke bai auh auh chungin ka in lam chu ka pan ta a.
.
.
Ka inchhung thim rip zet ah ka lut a, luah lum loh tih hriat tak rim rawn nam thin te chu ka tan chuan tawrh hreawm an ni tawh lo. Bualin ah ka lut a, shower ka han on a.. darthlalang ah ka in en chuan ka hmuihmul leh khabe hmul buk taka to te chuan ka kum phu loin min ti lang upa hle tih ka hmu a ni.. mahse heng hi ka nun nen a thil inhmeh ber te chu an ni zawk, Bar a chetla nasa smart tak leh fai vang an awm ngai lo. Kei ngei pawh hi kar khat a vawihnih ka inbual hi chuan ka ti tha ve hle ah ka inngai.
.
.
Ka mutna pindan uap zetah chuan tukin lama thil thleng ngaituahin ka khumlaizawlah chuan ka tlu zal ar ar a.. Tukin a ka hmuh nula kum la naupan hmel tak chuan ka ngaihtuahna a rawn luah leh thin. A changin ka thaw chhuak hak a, a chang leh ka nuih a za rum rum.. ka awmdan chu mak ka ti rilru hle a, hmeichhe pakhat vanga hetianga ka nui chhuak leh huk thin te chu keimah leh keimah ka insiam hrilhhai tep zawk a ni.
.
.
Tennesee ram chhung, Rhea bial a thingtlang khaw lian lo tak Graysville ah kum 1989 kum khan ka piang a, helai hmun hi ka seilenna leh engkim ka zir chhuahna hmun a ni. Ka nu leh paten fa dang an neih loh avangin min duat hle a. Ka nu hi kan khua a primary Schoolah zirtirtu a ni a, ka pa erawh Rhea bial chhung a Rescue team pakhat ah telin hmun hrang hrang ah mi chhanchhuah hna an thawk thin a ni.
.
.
Ka pa khan kan inchhung kha luahlum tam lo mahse kei leh ka nu tan chuan kan hero a ni reng thin.. a kalna ah mi tuemaw tanpui a nei tih kan hre reng thin a. Kum 2009 kum khan keipawh kum 21 ka tling va zan tawh a, ka nu duh dan ang thlapin University zawm turin ka inpuahchah mek a ni. Mahse, zan khat hmanhmawh taka ka pa rawn haw chuan ka nun a hun harsa ber ka hmachhawnna tur intanna a rawn keng tel si.
.
.
Clarksville a hmanhmawh taka ani leh a rescue team member te an kal a ngaih thu a rawn sawi a, ka nu chuan a lo insiampui vat a. Chu lai hmunah chuan kum hmasa lam a Nashville a Tornado a thlen ang chiah khan a thleng ve a ni awm e. Hmanhmawh takin TV ka on vat a, thil thleng mek chanchin an rawn tih lan chuan ka thau ah a man chiang hle a ni. Vawi tam tak ka pa hian ti hian min hrilh thin a..
'Bawiha, kan thlahte zingah ah hian University chhuak an la awm ngai loa.. nang hi a pakhatna ni turin ka duh che.. Ni e, a harsa tih ka hria.. helai thingtlang atang chuan mahse engpawh mamawh i nei a nih phawt chuan ka awm ang'
.
.
A thutiam a hlen a ni ka pa khan.. mahse ka bula awm tam tur khan ka phut thin a, ka ngai thin takzet.. chu erawh phuhruk sak ka ni ngai lo. Ka nu nen chuan ani chu kan vai liam a.. ka nu chuan ka awmdan hlauthawng hmel chu a hria a nih hmel.. ka mood thlak tumin thil min zawt chhen a..
.
'Brightwood College ah chuan hmeichhe nalh tak tak an awm lomaw?'
'Nu.. min van zawt zing tak..' nin hmel tak chuan ka lo ti a
'Anih leh Sarah saw a tha ber i tihna em ni??'
'Nu, ka naupan lai thian a nih saw.. nang pawh hi a'
'Naupang lai.. tleirawl lai.. nakinah chuan nula, tlangval' tiin a nui har har a
'Ngaihzawng neih tir min duh anih chuan sawi mai la..' ka ti a
'Sarah a awm reng a.. engvangin nge midang ka duh ang'
'Sarah chu Clinton nen an inngaizawng alawm..' ka tih chuan ka nu chuan min lainat hmel tak chuan min en a.. enge maw a awmzia hi ni
'Anih chuan Nashville ah hmeichhe nalh tak tak hmelhriat i nei ang chu.. Graceville nula ai chuan an hnute pawh a lian daih zawk tih ka hria a nia aw..' a tih chuan phawk hra in ka en a, a mit a lo kan euh a.. ka nui tawi tuk ringawt!
.
.
Ka nu hian Nashville a College tha pawl a ka graduate hi min chhuang tih ka hria, mahse a sawi chhen erawh hi chu ka ning ve thin. Hei hi a hre lo a ni, hmun hrana College kal tur a ka kal kha ka nun a ka hreawm lai ber a ni. Ka nu amah choh a a awm tur ka ngaihtuah a, ka pa in kang a thelh te, accident a thlen te a a nunna thap a mi a tanpui lai te kha ka mitthla ah a lang a, anni hi ka chan mai ka hlau thin. Mi zawng zawngin chut an tih ang mizia kha ka pu a, kan proffesor pakhat phei chuan psychiatrist pan turin min ti hial a ni.
.
.
A tuk zing ka tho chu thutkhawmna pindan lama ka nu thu ngui bur chu ka hmu a..
.
'School i kal dawn lo em ni??' ka ti a
'Aw.. Jeff Bawiha' tiin tap chungin min kuah a,thil chu ka hrethiam lo takzet
'Nu enge awmzia??'
'I pa Bawiha..' a sawi zawm thei lo
'Nu enge ka pa chu..' ka thin chu hnawh tup tupin a awm a ni ber
'Bawiha an accident.. Clarksville ah..'
.
Ka thu hnawk! Sawi tur ka hre lo.. ka khawvel.. ka suangtuahna, ka pa suangtuahna kha!! University atanga ka graduate kha a duhthusam a ni lawm ni??.. Ka hlauhthawn thin em em chu tunah a rawn thleng ta si amaw..!!
.
.
Chhungkaw kim a hun hman hun kha chhiar tham lek khawp a khat ni thin mahse, he khawvel khawi laiah emaw ka pa a awm a.. mi a tanpui mek a ni tih ka hriat khan ka thla a muang a, infuih nan ka la hmang thin. Mahse, tunah zawng khawiah mah a awm tawh lo.. he khawvelah hian a awm tawh lo a ni. Nitin in chhiat lam ka pan telh telh a, lehkha zir lam a lang lo. Ka nu erawh a tuar tih hre mahila a chak that hmel em em reng a, min hnem in min awmpui reng bawk, amah vang choh pawh a chak turin min fuih thin.
.
.
Vawikhat chu public library a ka awm laiin ka nu in min rawn call a, in a haw tur a min hrilh chuan hrilhhai rilru tak chungin ka haw vat a..
.
'Bawiha California a nun bul tan i duh em??' a rawn ti a
'Maw.. enge i sawi awmzia??' tiin ka chhang a
'Stanford University ah kal thei dawn ta la..'
'Enga?? i fiamthu a mi?? Nu sawi chiang teh..' phur rilru tak leh hlauthawng chung si chuan ka han ti a
'He lehkha hi han en la..' tiin min pe a, ka chhiar nghal vat..
'Nu, official letter a ni.. Stanford University ah ka kal thei dawn.' tiin ka nu chu ka han kuah a
'Ka lawmpui lutuk che Bawiha..'
'Mahse Nu..'
'Enge??'
'Ngatinge pem kher.. keimah pawn ka inenkawl thei alawm..' ka ti a
'Ka ngai dawn lutuk che a..' tiin a mittui chu a hru zeuh a.. tun tum chu ka nu hi ka fuih a ngai dawn a ni maw ka ti rilru a
'Nu.. a rei dawn hleinem.. kum hnih hnu ah ka rawn let leh dawn a lawm..' ka ti a
'Enga?? hetah enge i tih anga.. he laiah Stanford University atanga zir chhuakin tih tur i nei dawn em ni??' tah nuih pah ti tih chuan a rawn ti a
'Aw nu.. ka zir chhuak anga.. hna ka hmuh na hmun hmun ah kan pahnihin nun bul kan tan ang.." ka ti a
'Bawiha mamawh i neih apiangin min hrilh zel rawh aw..'
'Tehreng mai nu.. bakah harsatna a awm dawn lo scholarship student ka nih hi ka mamawh chu University in min tum leh dawn alawm' tiin a chalah ka fawp zeuh a
'Nang ang fapa hi khawvel fapa zawng zawng ni se tumah an lungai ngai loang..' ka nu in a tih chuan ka nui huk a
'Nang ang nu leh ka pa ang kha nei vek se kei ang chu khawi hmunah pawh an awm ang nu' ka ti a
.
.
California lam pan turin ka inbuatsaih a.. ka rilru ah Sarah-i a awm reng mai. Ka tet te atanga ka thian a ni a.. Nashville a college kal tur a kan khua ka chhuahsan dawn khan ani ka duh a ni tih hrilh ka tum ve bawk a mahse ka huaisenna khan a tlin thlawt loa, chu mai bakah hlawhtling tak a Graceville ka pan anih ngat chuan ani chuan min en dan pawh a lo sangin ka inringtawk zual theih ngei kha ka ring a ni. Mahse, kum thum hnu a ka let leh chuan ani chu kan khaw mi awm thei tak fapa Clinton nen an lo inngaizawng tih ka hre leh si a ni.
.
.
Nashville atanga flight tur ka nih avangin ka nu chuan Nashville thleng min thlah a.. amah choh a ka han hnutchhiah tur chu ka huphurh ngei mai.. mahse ka pa suangtuahna ka tih hlawhtlinna kawng a ni bawk si. Ani nen chuan Univertsity ka chhuahsan hnu a inhmu leh tur chuan kan inmangtha ta a.
.
.
California ram nuam leh mawi em em ka thleng a, keipawh ka thar sarhin ka hria a ni. Ka nu nen chuan zantin video call in kan inbe ziah a, school lam a a hnathawh chu ka hrilh thin ang bawkin chalwhsan tuirin ka ti a mahse ani chuan a khawhar hnemtu a nih zia sawiin tan a han khawh tlat hi chuan a tlawm zawkah ka tang leh nge nge thin.
.
.
Class kan kal tan a, ka vanneihna kal tluangin Professor ho hriat ka hlawh chho viau a, an ni chuan ka tumruhna an thlirin nasa takin min fuih thin.. chu chu ka nu fuihna tluk hial a ka tan a hlu a ni. Ka nu in min hrilh fo thin bialnu nei tur a min tih chu zawm chhoh ka tum viau na in hmeichhia zawng zawng deuh thaw hian 'chut' hriatin min hre tlat si.. chutah a zei lo chi ka la ni zui.
.
.
Vawikhat class project atan ka team member pui te nen Culculus kan chawh ho lai chuan kan team member pakaht Clarka'n zan hmasa lama club a a chetnat pui nula zei zia a rawn belh zeuh.. midang ho chuan phur fahranin an rawn tui hnih hlak bawk.. an sawi nuam tih ber chu ka hrethiam ta chiahin ka hria. Kei chuan ka lo nuih pui mai mai.. mahse zawhna min zat chiah chu ka ngawi chiang viau!!
.
'Jeff hmeichhe engzat nge i mutpui tawh??'
.
Dawt sawi hi ka huat ber a ni a.. mahse tun tum zet chu dawt sawi thiam tak nih ka chak hle..
'lim (x+4)3/2+ex-9
_____________
x->0 x
he mi i chawh chhuah zat hi a ni mai..' ka han tih chuan kan thiante chu an nui hak a.. chawh nghal mai a tum a
.
'L Hopitals rule i hmang thei lo' ka ti a
'Hmela.. min chhaih kual a ni lomaw.. he rules bak hi ka thiam lo tih i hriat kha..' a rawn ti a
'A dang i zirna chance ka siam sak che anih hi..' ka ti a.. ka rilru tak chuan a nuih a za hle..
.
.
Kum khat dawn a vei leh ta reng mai.. ka nu nen pawn kan la inbe reng thin a.. ani pawh a dam chuan ka hria a ni. Zantin ka tan a tih ang bawk keipawn a tan ka tawngtai sak thin a.. hlim taka kan inhmuh dun leh chu ka duh ber a ni.
.
.
Hun a liam zel a, graduate turin thla thum chiah ka mamawh tawh tih ka hriat chuan ka rilru ah Graysville a ka nu mawlh chu a awm reng.. Sarah pawh a chang zeuh zeuhin. Zan khat chu ka nu in mail min rawn thawn a, a web cam a chhiat avangin mail bakin kan inbiak theih loh tur thu a sawi a, keichuan siam tir emaw thlak mai tur a ka hrilh chuan min hnial nasa hle a.. call a kan inbiak theih tho tur thu te ka han hrilh a.. a tonsil na a chhuah thu leh doctorin tawngtam lo tur a tih thu sawiin chhuanlam a siam leh zel a, ka ngaihdanah chuan min biak a a tah fo thin hi hreawm ka tih phah a hlau niin alang ani.
.
.
Zan lamah chuan ka nu nen mail kan inthawn ta tlut tlut mai.. a lehlamah chuan a nuihzathlak duh viau, thian thenkhat ten an ngaihzawng an biak laiin ka nu nen kan inbe char char chu a ni si a.. Sarah chanchin sawi a hrat viau a, a bialpa nen an inthen thu te.. ka rilru tak chuan ka lawm mahse ka thil tum dan erawh ka sawi hran lo a ni.
.
.
Ka nu aw ka hriat lohna a rei tak em avang chuan vawikhat chu ka call a.. mahse min chhangtu erawh a dang daih thung..
.
'Hello..'
'Hello.. Sarah nangmaw..'
'Aw.. Hii. Jeff.. i tha em??' zangkhai vah chuan a ti a
'Aw tha.. khawnge ka nu..'
'I nu maw.. class a la a..'
'Engtin nge a bulah i awm theih??'
'Aaa.. school ah ka pui a tunlai chu..' a tih chuan ka lo awih ve mai a..
'Ka nu chu a tonsil chu a dam tawh em ni??'
'Aih.. chuvang chuan a nia hetah i nu ka puih mahse a ni chu a harh lutuk.. mail a rawn thawn vat dawn che nia..'
'Awle.. ka hria e..'
.
.
Ka nu aw hre loin ka awm rei em vang te pawh a ni ang ka nun chu a nguai bur mai.. thla leh lawk a kan khua a ka haw theih dawn vang erawh chuan ka phur ru viau tho. Ka nu nen mail a kan inbiak chuan a that thu chu a sawi chamchi a, ka ringhlel hial zawk a ni mahse amah ka hmuh vat theih dawn avang erawh chuan ka in hnem chawp a.
.
.
Zanah chuan a tuk lama Tennesee ka pan dawn avangin phur takin ka insiam a. Ka nu chu ka biak chak em avangin ka call a, a ngai te bawkin Sarah chuan a lo pick up leh, ani hnenah chuan ka nu surprise ka tum thu leh engmah hrilh lo tur a ka tih chuan a lo 'aw' ve mai a.. Tichuan hlim taka kan inhmuhkhawm hun tur suangtuahin ka muhil ta a.
.
.
Graysville ka thlen chuan dam sawng sawngin ka inhria. In a ka luh chuan ka nu ka han ko vak a tuman min chhang lo.. schoolah a awm anih ringin ka han call a, mikhual pindan atanga Sarah lo chhuak ka hmuh chuan ka hlim hle a, a hmelthat ngaiin a lo la hmeltha reng a ni.
.
'Sarah khawnge ka nu??'
'Ah.. Jeff.. englo..' asawi thei lo.. a mittui a rawn luang nghal a.. chu chuan min ti nghing dawt thei
'Sarah enge awmzia.. khawngaihin??'
'I nu chu damdawiinah a awm.. Nashville ah' ti pah chuan ka awm a beiin min rawn kuah a
'A vaiin min hrilh rawh.. tunah' vin aw lek lek chuan ka han ti a
.
'Tukin ah mail ka rawn thawn che.. Graysville a lo tlang lo turin leh Nashville a damdawiin a i nu awmpui nghal turin ka rawn hrilh che a, in lo thlawk chhuak hman tawh si a ni'
'Chutiang ka ngaithla duh lo.. ka nu dinhmun dik tak ka hre duh'
.
.
.
Ka zawi vek.. engtia awm tur nge ka hre lo. A hma zawnga mail a ka biak char char kha ka nu ni lo in Sarah zawk a lo ni. Ka nu chuan chaw kawng cancer veiin, doctor te pawh an beidawn tawh thu ka hre ta si. Chu tih rual chuan ka nu leh Sarah chungah ka thinrim, ka rilru a na a.. ka ngaidam thei ngai loang. Sarah chuan ngaihdam min dil nasa teh mahse ka thiantha ber a nih thinna avang chuan dawt pawi lutuk min hrilh hi ka pawm thiam thei lo a ni.
.
.
Ka nu hmel ka hmuh chuan thawk pawh ka la thei lo hial a ni. A vun chu a chuar em em a, a ruh khuhtu awmchhun chu chung vun pante, chuar tak choh chu an ni tawh. A sam te chu a tla kawlh vek deuh thaw a.. a mit a khur duk a, a biangki te chu a hmel a langsar ber an ni zo tawh.. a tawng chhuak thei tawh loa, engmah a ei thei tawh lo bawk. Ka inthiam loh rual rualin min mamawh laia min hre duh lo chuan ka rilru a ti na tlat thung si
.
.
Ka hna thar tur pawh zawm thei loin ka nu ka enkawl chawt a.. Sarah erawh kei emaw kanu hmu tur a lo kal tawh lo turin ka hrilh a ni. Doctor te beisei ang aiin ka nu chuan min dam rei pui viau a. Mahse a tha chho ve zel tur a ka beisei a ka ngaih laiin min boralsan ve ta si. Ka khawvel, ka neih zawng zawng ka chan a ni.
.
.
Nun thar bultan tumin ka nu leh pate nena kan chenna ka in neih chhun chu chhuahsanin Nashville ah hna ka zawng a.. thiamna lamah phak mahila ngaihtuahna a kal ngil thei tawh lo thung. Zu ah ka tuan a.. ka nachhawkna neih chhun a ni miau si. A hma zawnga hmeichhia hnaih pawh ngam lo khan ka thawhchhuah sa seng meuhin hmeichhia ka dawr ta thin a ni. Kum hnih tal tawp chutiang a ka nun hnu chuan Company pathum atanga ban ka ni a.. khawiah mah ka thiamna phu tawk ang hna hi tuman min pe thei loang tiin min banna hnuhnungber Company manager chuan a ti hial a ni.
.
.
Duhthlan tur ka nei ta lo.. Ka neihchhun chu ka nu leh pa min hnutchhiah kan in choh kha a nih tawh si avangin Graysville lamah ka let leh ta. Ka inthlak danglamna nasa tak rah chhuah ka hmel pawr chhap leh zu rim ka nam reng na chuan a tha lo lam zawngin mi mit fukna ber ah min siam chho a. Ka thiantha ber a ka ngaih, a ruk a ka ngaihzawn hial Sarah tang pawn mit sir a melh zeuh zeuh bak hlawhchhuah ka nei ta lo. Nitin zantin pawisa khelin barah hun ka hmang a.. ka in chu ka thawmhnaw thlak nan choh ka hmang hi a ni ber. Ka thian neih ve chhun tih a ka chhal te pawh keimah anga zu duh vek an ni bawk.
.
.
.
.
Ka hna a ka neih ber zu in leh pawisa khelh nan hian ka ke hi ka mamawh em em in ka hre ngai loa mahse duh anga kal theih loh chuan kha nula kha dem a awl thin hle a ni. Nilengin inah ka tawm a ngai miau a.. zan lamah lah chuti bawk. Mahse, ka hmangaih zu erawh ka tawpsan hauh chuang lo thung. Chutia ni thum vel lai Barah ka lan loh hnu chuan ke bai auh auh in ka thleng phei ve leh thei ta. Ka nundan ngai te bawkin pawisa khelin zan rei tak tak thleng ka meng a, ka chauh tawpah Bar thutphah seiah ka muhil leh mai thin.
.
.
Zing dar riat velah ke bai auh auh chungin ka in lam ka pan a.. ka inkawt a ka thil hmuh chuan min ti tawp chiang hle a ni. Ani chuan min hmuh veleh min rawn pan hnai vat a..
.
'Hii Jeffrey.. tuk chhuah nuam' a rawn ti a
'Helai hmunah hian enge i lo tih dawn??'
'Doctorin ni nga hnuah lo kal leh turin a tih che kha..' a ti a
'Ka tha tawh lawm.. haw rawh' tiin ka inchhung lam ka pansan ta a..
.
.
Kawngka ka hawn rual chuan luh ve tumin a rawn inzep a..
.
'Eng thil nge i tih??' ka vin tuar a
'Ka lo nghak ang che.. doctor appointment kha dar kua a nia..' a ti a
'Checkup ka ngai lo.. ka lawm lutuk.. haw rawh.. mi tumah su tawh lo turin fimkhur la chu chu a tawk a ni mai' ka tih chuan min en reng a, a mittui chu a rawn hnam nghal ringawt.. tap belh ka ti rilru hle mai.. 'Khawngaihin tap suh.. mi ka thlem thiam lo' ka ti ringawt a. Ani chuan a mittui hru pah chuan a inher a kal ta a.. A car a thlen dawn tep chuan enge ka tih tak mai pawh ka hre lo..
.
'Mary'.. a rawn hawi vat a
'Pawnah min lo nghak rawh' ka tih chuan a lu a bu nghauh a
.
.
'Ka inbual ni a lo a sin mawle' ti a phun chungin bualin lam ka pan a.. shower a ka inphuh tir lai chuan a mittui hnam hmel chu ka han ngaihtuah a ka nui tet tet a.. Ni e, a duhawm thlawt a ni. Tin, hmeichhe danglam tak a ni tih ka hria, kei ang bal tawp lutuk pawh min tanpui hreh lo tu hi. Bualin ka chhuah dawn pah chuan sink bula ka razor chu ka en zeuh a, ka ding leh te te a. Hmanni khan ka khabe hmul leh ka hmuihmul vangin 'Uncle' min ti kha a nia.. a danglamna ka hmuh chak tlat a nih chu.
.
.
Uluk tak leh hmanhmawh ru tak chungin ka hmuihmul leh khabe hmul buk chhur chu ka han ziat a, hetiang a ka inziah fai lohna chin rei tawh zia chu Mary ngei pawh khan a hmuthiam ngei ang..
.
'Hello..' tih ri ka hriat chuan ka zawi hnawkin ka hria.. chu nau te chu a rawn lut hram a ni maww..
'Pawnah awm rawh ka tih che kha..' tiin ka vin vak a, min chhang lem lo.
.
.
Ka insiam zawh chuan ka inchhungah a lo awm tawh loa.. pawn ah ka va chhuak a.. a car bulah a lo ding a. Min hmu chu a mengphawk hleee a ni.. a rawn kal hnai a..
.
'Uncle tih chi i ni lo a nih hi.. kan inrual vel ang ti raw..' a rawn ti a. a thusawi pawh chhang lo chuan carah chuan ka lut a
.
'Kum engzat nge i nih??' a rawn ti chhuak leh phawng..
'Ngatan??'
'Ka hre chak mai mai.. 22 ve tho a mi??' a tih chuan ka ner nang a
'Ni lo.. 27' thawk ka han la hak a
'Ka ring dik chiah..' tiin a rawn nui a.. 'Englo, i hmul kha engtin nge i tih??' a rawn tih chuan ka ngai thei lo tep
'Engtia ti turin nge min lo ngaih a??'
'Nilo e.. "uncle" tih a ka koh vang che kha a ni chuan ka tihpalh' a rawn ti a.. a ruk tak chuan a chhan dik tak a nih zia thu chu sawi ka chak hle a ni.
.
.
Doctor kan hmu a.. ani chuan ka kal nasat avanga ka that loh thu min hrilh lai chuan Mary chuan min lo en reng a..
.
'Vawikhat mah chhuak tawh reng reng suh.. i mamawh chu ka lo pe mai ang che..' ti chuan a ang bawrh bawrh a
'Engaa?? nang hian engmah tih tur i nei lo em ni a?' ka ti a
'Nei ee.. ka ngah takzet.. chuvang chuan ka hun hlu tak hi min zah sak hram la.. i ke hi lo hmang rim tawh suh'
'I lawmawm reuh berh berh hle mai..' ka han ti ringawt a
'Chuan i inah ka lo leng thei angem??'
'Aih..'
'Mawh.. khawngaihtakin'
'I a em ni??'
'Aw a nimai..'
'Ngatinge min zui tlat a??' ka ti a
'Thian nih ka duh' a tih chuan a thutak hmel fu mai
'Ngatinge??' ka ti a
'I khawhar hmel alawm..bakah i in kha ka ngaina'
'Enga??'
'Ramhuai film ka ngaina alawm.. ramhuai film channa ang mai a ni..'a tih chuan ka zak ru ve reng
'Tih tur i neih loh chuan lehkha te zir la..'
'Ka nu in lehkha zir ka mamawh loh thu a sawi a..' min hnial thei zel dawn a ka hriat avang chuan ka ngawi rih ta a.
.
.
In thleng min thlah a.. a number min pek chuan cellphone ka neih loh thu ka hrilh a.. nui hmel pu sangin kawl ve hrim hrim turin min ti ta a. Tlai ni tlak dawn lamah chuan ka chin dan thanin Bar lam la pan leh ta.. ka lut chiah chu ramhuai hmu ang maiin an meng phawk hlawm ngang a ni!! Ni e, an tan chuan sahbawn rim ka nam ringawt pawh mak tih a hlawh dawn nakalaiin hmai fai vangin ka la lut zui..
.
.
'Jeffrey Bawiha, i hmeltha takzet thin an tih hi dawt a ni lo a nih hi' a tih chuan ka nuih a za hle a. Zan lamah ngat phei chuan zan danga pawisa chawia ka mutpui thin nula khal zet zet ho chuan min rawn pan zawk tlat ta mai.. Mary chungah lawmthu awm teh se, ka vanneihna a ni ringawt..
.
.
Hun leh ni aliam ve zel a.. mak tak maiin kha nula naupangte khan rilru hi a luah veng veng thin. A chang phei chuan ka hmeichhe mutpui thinah te chuan ka chan ta thin a, inthiamlo rilru hle mahila nawmna nasa tak min siamin ka hre thin. A hma a ka tawngkam nat vang khan min hmu duh tawh lo emaw chu aw ka tih laiin ka thian nih a duh tak tak lo aniang e tih ten rilru ka pu a. Ni e, kei ang thian nih chu atan mualphona mai mai a ni dawn tih hi hriatreng ka lo theihngilh thin a ni.
.
.
Ka in kawngkhar chum ri dawt dawt ri chuan min ti harh zawk a.. thinrim ru takin ka tho a.
'A tu piangsen nge mawni dawn ni' ti rilru pu in ka han hawng thuai a..
.
'Nangmaw??'
'Aw.. chawchhun ei a hun tep tawh hi..i la tho lomaw' a ti a. Ka inchhung lam chu a melh tawk tawk a.. luh tir lo thei dinhmunah ka ding ta lo, ka ko lut ta a.
'Vawiin enge i tih dawn??' a rawn ti a
'Barah.. a ngai'
'Enge a ngai??' ka ho chuan a ti a
'I hriat reng kha.. mi zawt belh duh suh'
'Min pui thei angem?? vawiin chiah' a ti a
'Engah??'
'I in hi ti fai ang..'
'Enga??' mak tih hmel tak chuan ka en a
'Uncle Jeffrey.. khawngaihin..' a tih chuan a tukhumah ka nawr zeuh a, a nui har har a
'I ngaina nilawm ni??' ka ti a
'Aw tehreng mai.. ka duh ang taka ka chei hunah'
.
.
Hmeichhe danglam tak a nih zia min hriat nawn tir mawlh mawlh chu a ni si a.. nge hmeichhe dang ka hriat ve chhun chu Sarah choh kha anih vang zawk. Engang pawn midang chu lo danglam bik pawh nise he nu ang em em a duhawm hi chu an awm ngai loang.
.
.
Kan pahnihin chhuat kan nawt a, bungbel kan nawt fai a, bang kan ti fai bawk a. Zu ei nasat tawh ka nih avangin ka hah hma thin hle a mahse tun tum chu hah ka hre hauh lo. Bang nghengin kan pahnih in sandwich leh coffee kan in dun a.. a hmel chu ka lo en leh reng thin. Ani chuan a hrethiam aniang chu a lai ve deuh in ka hria..
.
'Naktukah min pui leh thei angem??' a rawn ti chhuak a
'Ka inah maw??'
'Ngatinge hetiang hi i tih Mary??'
'Ka hre lo.. ka ngainat vang che aniang..' tiin min chhang a
.
.
Tlai lamah chuan zanriah min buatsaih sak a tum a, mahse ka taksa in zu a mamawhna a nasat em avang chuan haw turin ka ti a.. ka tlawngaih vanga a la ngai cheu emaw ni min hnial char char..
.
'Ka fiamthu lo.. khawngaihin haw rawh..' ka ti a
'I tih duh chu ti mai rawh.. chaw pangai ei turin ka duh che alawm' a ti a
'Anih chuan min tibuai suh ang che..' tiin ka pindan lam ka pan a.. zu chu ka in leh tan ta..
.
'Kan inah pawh ka pa ten an in a kei ngei pawn wine ka in a, beer pawh ka in thin alawm.. ngatinge ka haw kher i duh a??' kawngkhar a ding chung chuan a rawn ti a
'I ngaih anga awlsam kha a ni lo.. i hrethiam ngai loang' ka ti ban chuap a
'Hrethiam turin ka pui thei che..'
'A teuh lo mai.. ka nun hi tuma hriatthiam chi a ni lo.. i bula ka awm chhung kha harhfim a hun ka hman ve lai a nih kha..' ka ti a
'I zanriah tur ka siamzo tawh.. khawngaihin ei rawh aw..' tiin a chhuak ta a
.
.
Engvangin he nau hian min zui tlat ka hrethiam lo. Ka hmangaih mai dawnin ka hria a ni mahse ka hmangaih a rem ngai dawn si lo. Tu pa in nge a fanu rangkachak kei ang zu ngawlvei tan pe duh tehlul ang ni. Mahse, ani khan ka rilru ngaihtuahna zawng zawng hi a luah khat vek a ni ber mai.
.
.
A tukah chuan a intiam ang chiahin a rawn thleng a. A sam chu a bawk chho vek a.. a t.shirt pawl chu a inhmeh hle a.. a kekawr bu teu chuan a ti lang sexy takzet a ni. Ani chuan energy drinks min rawn lei sak chu min pe vat a.. thil min hrilh duh a neih thu a sawi a..
.
.
'Jeff.. unau pahnih kan ni a.. ka u zawk hi mipa a ni a, kan inhmangaih thin takzet. Mahse, vanduaithlak takin ka nu chu a boral a.. kan unau chuan kan tuar na em em a. Ka u chu ka pa sumdawnna enkawltu a lo ni chho a, tlin pawh a tlin chho viau dawn a kan ngaih laiin ka pa in nupui dang a nei a. Chu chuan kan chhungkua min ti chhe vek a, ka u chanpual chu ka pa nupui chuan a chuh lehzel nen ka pa nen an inhau ta fova. Ka u chuan kan in a chhuahsan ta a. Khami ni atang khan zu leh damdawi ah a tlan nasa hle a, tanpui ka duh thin a.. mahse ka la naupangin tih theih ka nei bawk si lo.. ka chan ta nge nge a ni. Ka pa inthiamlo chuan kei min duat phah ta em em a, mahse ka u kha chu chuan a ko kir thei si lo. Ka sut ni che a i hmel ka hmu te, i zu rim nam leh inbual mamawh tak rim te khan ka u min hriatchhuah tir a chuvang alawm ka zui che a, tanpui che ka duh..' a mittui luang zawih zawih chu ka kutin ka hruk sak a.. Ka thil duh loh leh tum ngai miah loh ka nunhlui chanchin chu ka hrilh ve ta a.
.
.
Chiang takin ani hi ngaihzawn chi a nih loh zia ka hria a ni, a u ka hriatchhuah tir a nih si chuan ka farnu anga ka en a ngai tih ka hre bawk. A haw dawnah chuan cell phone min pe a..
'Hei hi hmang rawh.. min mamawh hun apiang ah min lo be thin dawn nia..' a ti a
'Hei chu a mah mah a ni..'
'Ka u tan chuan engkim tih ka huam' a tih chuan ka awmah nghet takin ka kuah a.. ka kuah dan erawh unuapa in unaunu a kuah ang chu a ni thei zan lo a ni
'Sarah kha i la duh em??' a rawn ti chhuak a
'Aih.. hmeichhia ka mamawh hleinem.. nau ka neih che hi' tiin a car kawngka chu ka hawn sak a, ka vai liam ta a
.
.
Engtik lai pawn min rawn text a.. ka thil tih min zawt reng bawk. Ka ning ru viau dawn na a, ka farnu anga ka ngaihtuah chuan ka neihchhun ang ngawih ngawih ah ka ngai thung. Zan khat chu ka pawisa khelhna ah ka cha vek tlat pek. Pek mai tur ka neih loh avang chuan Mary min lei sak cell phone chu inthiamlo ru takin ka dahkham ta ringawt a, rulh leh vat chu ka tum ruh ve hle a ni.
.
.
Zingah chuan Bar thutphahsei a ka mu lai chu min sawi harh nawk nawktu an awm a.. phak takin ka meng a.. ka phu chiang hle..
.
'Ka zawng nasa lutuk che.. nizanah khawnge i riah' tap aw tiau chuan a ti a
'Pawnah inbia ang' tiin ka kai chhuak a.. 'Hetah tinge i lo kal a.. a hlauhawm zia i hria nilawm ni??' ka ti a
'Khawnge phone kha?? miin min lo chhang a.. an man che a an ru bo che emaw ka ti lawm..' tap pur chuan a ti a
'Ka tihpalh Mary.. ka nei let vat ang..' ka tih chuan ka meng dur hle a. Barah chuan a lut a
'Tunge Jeffrey cell phone kawl..' tiin a au lang lang a, Bar a chatthla dang ho chu an rawn zi hlawm tiah tiah a, an phun bul bul hlawm a
'Hetah a awm lo Bawihi.. kal ang' tiin pawh chhuah ka tum a
'Tunge in sawi ru' tiin a au chiam chiam a.. ka thin thawk chuan ka thing nawk nawk
'Bengchheng suh Mary..' a tawp chiang hle.. a mittui dir zawih zawih chu hmuh harsa ka ti hle
'Ka u i ni thei lo..' tiin a tlan ta daih a, ka koh vak vak pawn a lo hawi let tawh lo
.
.
Rilru chhungril rum vawng vawngin hun ka hmang a.. ka nun chu ak hne takzet, cellphone ka lak let leh theih hnu chuan Mary te in lam ka pan a, ani chu ka call a.. ka vin hrep hnu a kan inbiak leh vawikhatna a ni.
'In inkawtah ka awm.. lo chhuak lawk rawh' ka ti a. Ani pawh a hnu rei vak loah a rawn kal a
.
.
'Engkim avang khan ka lawm a chuan ka tih beidawn che avangin ka tihpalh takzet.. tunah chuan keimah vangin i buai tawh loang' tiin phone chu ka pe a
'Jeff..'
'Umm'
'I tan enge ka nih??' a rawn ti a
'Ka neihchhun ini thin mahse ka chan leh tak si..'
'Min chan loh nan tih tur awm miah loin i hria em ni??' a ti a
'I unaupa hmun ka luah zo dawn lo..'
'Unaupa hmun chiah luah thei turin a mi i inbeisei??' ka mit a chiang tak a min en pah chuan a rawn ti a
'A bak chu ka beisei ngam lo..' ka tih chuan a lu a bi nghauh a, inher letin an in lam a pan ta a
.
.
'Mary' a rawn hawi let a, a lam ka va pan a
'I unaupa in a hmangaih ang che chuan ka hmangaih thei ngai loang che mahse chance vawikhat chiah min pe leh rawh..' ka ti a
'Jeff.. ka unaupa ang chiah a ka enkawl theih dawn che chuan' a ti a.. ka lu ka lo bu nghauh a
.
.
Min fuihna angin ka nun ka hmang chho a, zu in tlem turin min duh angin ka in tlem sawt hle a.. kan pahnih in nitin ka inah hun hmangin lehkhabu kan chhiar dun thin a. Mathematics ka atchih thin zia a hria a ang khawp mai.. chutiang ang lam bu chu min rawn lei nasat sak hle a. A hma a ka zir chhuah tam tak nen a inzulzui chu min enpui ber thin. Kei aiin a zir hniam a, a hre tlem a mahse kei aiin a fing tlat si. Ka zu in chak lutuk awmngaihna hre lo chu min buaipui chang a tam a, a chang leh aman min leisak zawk fo thin.
.
.
Nitin ka inbualin thawmhnaw fai ka ha ziah a, khabe hmul leh hmuihmul ka hmaia a to chu phal loh a ni bur, ka in leh a vel a faiin boruak thianghlim hlir ka hip tawh a. Ka tan a thil phal loh bur chu bara kal a ni. Zu ka in duh a, ka chiri dawn anih chuan aman a lei ami thin.. ka tan a inpekna hlu lutuk hi mumang a ang hial zawk ani. Mahse, hun a liam zel a.. zu pawh ka thlah hlek hlek a, chu chuan a ti lawm hle a ni.
.
.
Exam bei turin ka inpuahchah a, a tan unaupa ang ni amhila ka nu ang mai niin ka hre thin. Tlai a an in pana a haw te chu ka ngai ru em em thin a, mahse ka unaunu a ni duh zawk tih chu ka in hrilh fo thin. He thil hi ka tan har viau mahse alaka ka bat te rulh nan a unaupa ka nih hi a tawk tih hi ka theihnghilh ka hlau thin a ni
.
.
Thla li lai a liam hnu chuan mi pangai tak ka ni chho ta.. kan pahnih chuan kan hlim a, ka duhthusamah chuan ka nupui ni se ka ti thin. Mahse, chu erawh ka tan thil theih loh a ni si..
.
'Jeff.. Sarah hi i duh tawh lo tak tak a mi?? be leh rawh'
'Duh lo.. ka harsat lai bera min puitu hi alawm hlu ber..'
'Inu nen a puih che u kha..' a ti a
'Dawt inhrilh ka duh lo..'
'Anih eng ang hmeichhia nge i duh??' a ti a
'Nangmah ang..'
'Maw??'
'Nangmah ang ka tih chu..' ka tih chuan a ngawi vang vang a..
.
'Jeff.. unau ni tawh loang..' a rawn ti chhuak a
'Engmaw..' ka lo ti ha a
'Unau nih ka duh tawh lo.. khawngaihtakin min propose rawh..' he nu tak hi chu aw.. a van danglam tak
'Anih leh.. Pretty Mary.. ka bialnu i ni duh angem??'
'Aw ka duh.. tinge ahma khan i sawi loh' tiin pangchang takin min rawn kuah a..
'Ka sawi chakna a rei tawh a sin Bawihte..' tiin duhthawh zetin kan infawp a..
.
.
Ka hun hman zawng zawng chu nuam lo awm lo ang mai a ni tawh. Hmana keimah chu bo in Jeffrey mithar a rawn lang a, ka bialnu hmeltha, fel leh duhawmna hian hmangaihna khurah min tluk luh thuk pui hle a.. chu chuan hlawhtlinna nasa tak min thlen thung.
.
.
Mathematics lecturer ni tura exam ka pek ka pass a ni tih kan hriat zan chuan Mary nen ka inah Champaign nen kan lawm a.. nui ri bak hriattur a awm lo a ni ber e..
.
'Jeff zu hi i duh viau a ni thin ti raw..'
'Aw.. ka hmangaih awmchhun a ni thin' tiin nui chungin ka chhang a
'Anih chuan zu aiin min hmangaih nge..' a rawn ti a
'Ka hmangaih zawk che.. mahse a hunlai na na na kha chuan zu aia hmangaih kha ka nei lo alawm..'
'Han sawi fiah teh.. chiang takin ka hre duh..
.
'Ka zan hun zawng zawng deuh thaw zu dawrah nuamchenin hun ka hmang a.. Hmangaihna awmzia ka hriat chhun chu zu ka hmangaihna leh zu chiahin min hnem thinna chu a ni thin. Mahse, nang ka nunah ilo luh khan, ka chan tur a inhung, a chhe ber ka panna kawngah chuan nang ilo ding a.. thui tak kawng dik lo ka zawh tawhna ah chuan hruai let ka ni ta zawk a.
.
Tennessee Whiskey ang maiin i nem a, Strawberry wine ang maia thlum tui chu i ni.. No a Brandy tlak pap zawh a lumna nuam dangdai tak, taksa in a tem thin hi nangin lumna min thlen thin ai hian a ropui bik chuang hauh lo. Chuan maw duhtak, i hmangaihna khurah hian lung ang mai a chechang thei miah loa hun ka hman tak hi.
.
Ka hun liam ta ah khan hmangaihna chu ka lo zawng thin ngei alawm.. mahse ka hmuh chhuah chhun erawh zu um a zu awmte a zawh ruala dai leh mai thin an ni. Mahse, nangin i thinlung thatna a min enkawl ni atang khan hmangaihna hi alo thlawnin a luan ka phal ngai lo. A chhan chu maw.. i hmangaihna aia ruih nuam hi khawvel ah hian a awm si loa..'
.
.
'I tennessee zu tha mi ka ni kumkhua ang duhtak..' tiin min rawn kuah a lungchim takin kan in fawp vawng vawng a.
.
.
>>>>>THE END<<<<<<<<
.
.
Ka muhil chu ka han harh a, ka lu chu a hai muai a, ka tui in lah chu a hal huam huam a. Thei leh thei loin ka han inbeng kang a, thim zingah chuan tui intur awmna lam pan chuan ka indap phei a. Ka awmna hmun chu ka in a ni loa, ka pa in lah a ni hek lo.. mahse chu lai hmunah chuan kei aia tal tam leh tlangnel an tam loang tih tur khawp a hun ka hman nasatna hmun a ni. He hmun hian ka tana nachhawkna a pai niin ka hria a, a chhan chu he khawvel a min hmangaihtu leh ka hmangaih awmchhun 'ZU' engtik lai pawn ka hmuh theih thin vang a ni.
.
'Engvanga tun ang huna harh ziah mai nge maw ka nih le..' tiin ka phun sep a
.
A ni lah tak a, zan tam tak he zu dawrah hian ka chatthla fova.. zing lampang dawr an hawn dawnah kaihthawh ka ni leh mai thin. Mahse zan thum vel chu a ni tawh ang, zing khawvar hma si , khawfing chah hunlai vel a ka pentawngin min tih harh tak fo chu. Harh kur chunga mi zu dawra awm reng thu va awm suh, zawi tak a ka haw leh hna hna a ngai fo thin.
.
Ka jacket, ka mutna thutphahsei bula mi chu ka ban a, ka in lam panin ka kal hna hna a. Insawizawi tura chhuak tih loh chu motor tlan bak hmuh tur an awm meuh lo. Muangchangin ka kal a.. kei zu in nasa, ruih loh chhunga pentawnga hun hmang tih takah ka pai leh khut thin. Ka in awmna lam peng pana kawng kawi ka chhuak tep tihah chuan Car sen pakhat hi ka lam panin a rawn tlan a, min hnaih zel a.. min sut tum hrim hrim a rawn tlan a ang zawk ta mah mah.. insaseng ka tum chhungin min su ta der mai!
.
Engtinmah ka awm lo.. Nilo, Ka thi lo ka tihna mai ania!! ka ke hi chu a na ve deuh chu a ni..
.
Car kawngkhar inhawng ri ka hriat rual rual chuan ka inseh ruh..
.
'I va fimkhur lo em em ve!!!..' ka ke dawm pah chuan ka kun ngal a
.
'I tha em?? a pawi ka ti lutuk..' chu aw ka hriat chuan ka hawi chhuak vat a. Mipa leh mipa kan tih mai ka rin vei nen, a aw atang choh pawh a ngaihdam chakawm ngawih ngawih a lo ni thung si. A kut no fahran in ka khup ka dawmna kuta a rawn dawm ngat phei chuan ka hik deuh zawkin ka hria a ni. A mangang hmel chu mangang hmel ka hmuh tawh zawng zawngah a la duhawm ber awm e.. chu chuan tlem chuan min inbengdaih tir ve thei deuh.
.
'Damdawiin ah i kal ang aw..' a rawn ti a
'A ngai lo..' tiin lungawi loh hmel takin ka tho a.. bai chung chuan harsa ti taka kal mai chu ka tum a. Chutah ani chuan rang takin min rawn pawt ding a, damdawiin a min hruai loh pawn pawisa tal min pek a duh thu min hrilh a.. hne tih hriat takin ka heh hnuai lam chu ka pet a, ka kut chuan ka tuai zeuh a. 'Enganga pawisa nei lo pawh ni ila tu hnen atang mahin a thlawnin pawisa ka dawng loang' tih rilru pu chung chuan a carah chuan ka lut ta a.
.
.
Damdawiin atanga kan chhuah chuan ka in a min thlah theih thu a sawi a..
.
'A ngai lo.. ka lawm e' tiin ka chhang a
'Khawngaihin.. kar khat hnu ah chiah ngai i awh thei dawn si a.. chu pawh keimah vang' inthiam loh hmel pu tak chuan a rawn ti leh tan ta. 'Hmeichhe mittui hi tur hlauhawm ber a ni' an tih hi chu nep te.. he nu inthiam loh hmel ringawt pawh hi ka tan chuan a hlauhawm ru lutuk tawh tlat.
.
'Awlee..' ka tih a ngai leh ta tlat mai!
.
'Nizan ah mu mang loin vawiin lama ka nutei fanu te inneih hmanna tur vel kan buaipui a.. an inah ka riak nghal a.." a rawn ti a
'Anih chu.??' tiin ka lo chhang mai a
'Ka mut chuan thawh ka hai ka hlau bawk sia.' tiin min rawn nuih seih a 'khawvar hun ka nghak a, mahse ka lo muthlu tho anih hmel..' a ti a
'Chungte chu sawi tur alawm.. engtinnge i unaunu inneihna lam chu ni ta ang??' ka han ti a
'Keimah vangin hliam i tuar a.. ka kalsan thei ringawt hleinem che..'
'Hetah hian ka chhuk ange..' ka han ti a
'Aih.. a theih lo.. ke in i kal that theih loh kha.. ka chhungte chu thil awmzia ka hrilh mai ang..'
'I insawifiah nachhan kha ka kaltir i phut vang a ni lo mi??' nelawm loh hmel pu tak chuan ka ti a
'Aihh.. a teuh lo..' a nui lui vak vak a, a za lo tih chiang takin ka hria a ni.. za lo takin ka nui ve huk a, kan ngawi dun ta a..
.
.
A hmel a tha in a fel hmel hle a. A kum ala upat hmel loh tak na in awmdan mawi a hre hle in ka hria. Mahse, keimah zawk hi mi tumah nel nei lo leh ka thenawmte takngial pawh hnaih ngai lo ka lo ni bawk nen tu mah hi nel tumna ka nei ngai lo a ni.. nula hmeltha ngat phei chu ka tum lo lehzual! An lakah ka lo hawihawm tawk lo a nih pawhin pawi ka ti lo, a bik takin he nula lakah hian.. ka ne nat vang hian Barah pawisa khel turin kal thei lo ta ila ka thawh chhuah tur pawisa min tum sak dawn teuh si lo.
.
.
'Tah hian ding rawh le..' ka ti a
'Khawi lai takah' tiin a rawn nui seih a
'Tunah!!' thip zet a melh pah chuan ka han ti a.. a ding ve nghal mai
'Ka hming chu Mary a nia' tiin min chibai tumin a kut a rawn lek a.. He nu awmdan te reuh chu a mak ka ti rilru hle
'Jeffrey..' tih pahin ka lo chibai let vat a
'Helai colony ah hian i cheng tak tak maw?? Uncle Jeffrey' min rinhlelh hmel fe chuan a rawn ti a..
'Uncle a??' ka ti ha a.. ani pawh chu a inthiam loh hmel hle a
'Ka tihpalh.. englo, i hmuihmul leh khabe hmul vel kha..' tiin a thusawi chu a zawi telh telh a
'A pawi lo.. ka hria e..' tiin Car kawngka chu ka han hawng a. Ka rilru tak chuan a uncle tur khawp a ka upat loh zia chu ka ngaihtuah a..
'Inenkawl tha ang che aw.. harsatna dang i tawh chuan khawngaihin min hrilh hreh suh aw..' a rawn ti a
Chhan pawh chhang lem lochuan ke bai auh auh chungin ka in lam chu ka pan ta a.
.
.
Ka inchhung thim rip zet ah ka lut a, luah lum loh tih hriat tak rim rawn nam thin te chu ka tan chuan tawrh hreawm an ni tawh lo. Bualin ah ka lut a, shower ka han on a.. darthlalang ah ka in en chuan ka hmuihmul leh khabe hmul buk taka to te chuan ka kum phu loin min ti lang upa hle tih ka hmu a ni.. mahse heng hi ka nun nen a thil inhmeh ber te chu an ni zawk, Bar a chetla nasa smart tak leh fai vang an awm ngai lo. Kei ngei pawh hi kar khat a vawihnih ka inbual hi chuan ka ti tha ve hle ah ka inngai.
.
.
Ka mutna pindan uap zetah chuan tukin lama thil thleng ngaituahin ka khumlaizawlah chuan ka tlu zal ar ar a.. Tukin a ka hmuh nula kum la naupan hmel tak chuan ka ngaihtuahna a rawn luah leh thin. A changin ka thaw chhuak hak a, a chang leh ka nuih a za rum rum.. ka awmdan chu mak ka ti rilru hle a, hmeichhe pakhat vanga hetianga ka nui chhuak leh huk thin te chu keimah leh keimah ka insiam hrilhhai tep zawk a ni.
.
.
Tennesee ram chhung, Rhea bial a thingtlang khaw lian lo tak Graysville ah kum 1989 kum khan ka piang a, helai hmun hi ka seilenna leh engkim ka zir chhuahna hmun a ni. Ka nu leh paten fa dang an neih loh avangin min duat hle a. Ka nu hi kan khua a primary Schoolah zirtirtu a ni a, ka pa erawh Rhea bial chhung a Rescue team pakhat ah telin hmun hrang hrang ah mi chhanchhuah hna an thawk thin a ni.
.
.
Ka pa khan kan inchhung kha luahlum tam lo mahse kei leh ka nu tan chuan kan hero a ni reng thin.. a kalna ah mi tuemaw tanpui a nei tih kan hre reng thin a. Kum 2009 kum khan keipawh kum 21 ka tling va zan tawh a, ka nu duh dan ang thlapin University zawm turin ka inpuahchah mek a ni. Mahse, zan khat hmanhmawh taka ka pa rawn haw chuan ka nun a hun harsa ber ka hmachhawnna tur intanna a rawn keng tel si.
.
.
Clarksville a hmanhmawh taka ani leh a rescue team member te an kal a ngaih thu a rawn sawi a, ka nu chuan a lo insiampui vat a. Chu lai hmunah chuan kum hmasa lam a Nashville a Tornado a thlen ang chiah khan a thleng ve a ni awm e. Hmanhmawh takin TV ka on vat a, thil thleng mek chanchin an rawn tih lan chuan ka thau ah a man chiang hle a ni. Vawi tam tak ka pa hian ti hian min hrilh thin a..
'Bawiha, kan thlahte zingah ah hian University chhuak an la awm ngai loa.. nang hi a pakhatna ni turin ka duh che.. Ni e, a harsa tih ka hria.. helai thingtlang atang chuan mahse engpawh mamawh i nei a nih phawt chuan ka awm ang'
.
.
A thutiam a hlen a ni ka pa khan.. mahse ka bula awm tam tur khan ka phut thin a, ka ngai thin takzet.. chu erawh phuhruk sak ka ni ngai lo. Ka nu nen chuan ani chu kan vai liam a.. ka nu chuan ka awmdan hlauthawng hmel chu a hria a nih hmel.. ka mood thlak tumin thil min zawt chhen a..
.
'Brightwood College ah chuan hmeichhe nalh tak tak an awm lomaw?'
'Nu.. min van zawt zing tak..' nin hmel tak chuan ka lo ti a
'Anih leh Sarah saw a tha ber i tihna em ni??'
'Nu, ka naupan lai thian a nih saw.. nang pawh hi a'
'Naupang lai.. tleirawl lai.. nakinah chuan nula, tlangval' tiin a nui har har a
'Ngaihzawng neih tir min duh anih chuan sawi mai la..' ka ti a
'Sarah a awm reng a.. engvangin nge midang ka duh ang'
'Sarah chu Clinton nen an inngaizawng alawm..' ka tih chuan ka nu chuan min lainat hmel tak chuan min en a.. enge maw a awmzia hi ni
'Anih chuan Nashville ah hmeichhe nalh tak tak hmelhriat i nei ang chu.. Graceville nula ai chuan an hnute pawh a lian daih zawk tih ka hria a nia aw..' a tih chuan phawk hra in ka en a, a mit a lo kan euh a.. ka nui tawi tuk ringawt!
.
.
Ka nu hian Nashville a College tha pawl a ka graduate hi min chhuang tih ka hria, mahse a sawi chhen erawh hi chu ka ning ve thin. Hei hi a hre lo a ni, hmun hrana College kal tur a ka kal kha ka nun a ka hreawm lai ber a ni. Ka nu amah choh a a awm tur ka ngaihtuah a, ka pa in kang a thelh te, accident a thlen te a a nunna thap a mi a tanpui lai te kha ka mitthla ah a lang a, anni hi ka chan mai ka hlau thin. Mi zawng zawngin chut an tih ang mizia kha ka pu a, kan proffesor pakhat phei chuan psychiatrist pan turin min ti hial a ni.
.
.
A tuk zing ka tho chu thutkhawmna pindan lama ka nu thu ngui bur chu ka hmu a..
.
'School i kal dawn lo em ni??' ka ti a
'Aw.. Jeff Bawiha' tiin tap chungin min kuah a,thil chu ka hrethiam lo takzet
'Nu enge awmzia??'
'I pa Bawiha..' a sawi zawm thei lo
'Nu enge ka pa chu..' ka thin chu hnawh tup tupin a awm a ni ber
'Bawiha an accident.. Clarksville ah..'
.
Ka thu hnawk! Sawi tur ka hre lo.. ka khawvel.. ka suangtuahna, ka pa suangtuahna kha!! University atanga ka graduate kha a duhthusam a ni lawm ni??.. Ka hlauhthawn thin em em chu tunah a rawn thleng ta si amaw..!!
.
.
Chhungkaw kim a hun hman hun kha chhiar tham lek khawp a khat ni thin mahse, he khawvel khawi laiah emaw ka pa a awm a.. mi a tanpui mek a ni tih ka hriat khan ka thla a muang a, infuih nan ka la hmang thin. Mahse, tunah zawng khawiah mah a awm tawh lo.. he khawvelah hian a awm tawh lo a ni. Nitin in chhiat lam ka pan telh telh a, lehkha zir lam a lang lo. Ka nu erawh a tuar tih hre mahila a chak that hmel em em reng a, min hnem in min awmpui reng bawk, amah vang choh pawh a chak turin min fuih thin.
.
.
Vawikhat chu public library a ka awm laiin ka nu in min rawn call a, in a haw tur a min hrilh chuan hrilhhai rilru tak chungin ka haw vat a..
.
'Bawiha California a nun bul tan i duh em??' a rawn ti a
'Maw.. enge i sawi awmzia??' tiin ka chhang a
'Stanford University ah kal thei dawn ta la..'
'Enga?? i fiamthu a mi?? Nu sawi chiang teh..' phur rilru tak leh hlauthawng chung si chuan ka han ti a
'He lehkha hi han en la..' tiin min pe a, ka chhiar nghal vat..
'Nu, official letter a ni.. Stanford University ah ka kal thei dawn.' tiin ka nu chu ka han kuah a
'Ka lawmpui lutuk che Bawiha..'
'Mahse Nu..'
'Enge??'
'Ngatinge pem kher.. keimah pawn ka inenkawl thei alawm..' ka ti a
'Ka ngai dawn lutuk che a..' tiin a mittui chu a hru zeuh a.. tun tum chu ka nu hi ka fuih a ngai dawn a ni maw ka ti rilru a
'Nu.. a rei dawn hleinem.. kum hnih hnu ah ka rawn let leh dawn a lawm..' ka ti a
'Enga?? hetah enge i tih anga.. he laiah Stanford University atanga zir chhuakin tih tur i nei dawn em ni??' tah nuih pah ti tih chuan a rawn ti a
'Aw nu.. ka zir chhuak anga.. hna ka hmuh na hmun hmun ah kan pahnihin nun bul kan tan ang.." ka ti a
'Bawiha mamawh i neih apiangin min hrilh zel rawh aw..'
'Tehreng mai nu.. bakah harsatna a awm dawn lo scholarship student ka nih hi ka mamawh chu University in min tum leh dawn alawm' tiin a chalah ka fawp zeuh a
'Nang ang fapa hi khawvel fapa zawng zawng ni se tumah an lungai ngai loang..' ka nu in a tih chuan ka nui huk a
'Nang ang nu leh ka pa ang kha nei vek se kei ang chu khawi hmunah pawh an awm ang nu' ka ti a
.
.
California lam pan turin ka inbuatsaih a.. ka rilru ah Sarah-i a awm reng mai. Ka tet te atanga ka thian a ni a.. Nashville a college kal tur a kan khua ka chhuahsan dawn khan ani ka duh a ni tih hrilh ka tum ve bawk a mahse ka huaisenna khan a tlin thlawt loa, chu mai bakah hlawhtling tak a Graceville ka pan anih ngat chuan ani chuan min en dan pawh a lo sangin ka inringtawk zual theih ngei kha ka ring a ni. Mahse, kum thum hnu a ka let leh chuan ani chu kan khaw mi awm thei tak fapa Clinton nen an lo inngaizawng tih ka hre leh si a ni.
.
.
Nashville atanga flight tur ka nih avangin ka nu chuan Nashville thleng min thlah a.. amah choh a ka han hnutchhiah tur chu ka huphurh ngei mai.. mahse ka pa suangtuahna ka tih hlawhtlinna kawng a ni bawk si. Ani nen chuan Univertsity ka chhuahsan hnu a inhmu leh tur chuan kan inmangtha ta a.
.
.
California ram nuam leh mawi em em ka thleng a, keipawh ka thar sarhin ka hria a ni. Ka nu nen chuan zantin video call in kan inbe ziah a, school lam a a hnathawh chu ka hrilh thin ang bawkin chalwhsan tuirin ka ti a mahse ani chuan a khawhar hnemtu a nih zia sawiin tan a han khawh tlat hi chuan a tlawm zawkah ka tang leh nge nge thin.
.
.
Class kan kal tan a, ka vanneihna kal tluangin Professor ho hriat ka hlawh chho viau a, an ni chuan ka tumruhna an thlirin nasa takin min fuih thin.. chu chu ka nu fuihna tluk hial a ka tan a hlu a ni. Ka nu in min hrilh fo thin bialnu nei tur a min tih chu zawm chhoh ka tum viau na in hmeichhia zawng zawng deuh thaw hian 'chut' hriatin min hre tlat si.. chutah a zei lo chi ka la ni zui.
.
.
Vawikhat class project atan ka team member pui te nen Culculus kan chawh ho lai chuan kan team member pakaht Clarka'n zan hmasa lama club a a chetnat pui nula zei zia a rawn belh zeuh.. midang ho chuan phur fahranin an rawn tui hnih hlak bawk.. an sawi nuam tih ber chu ka hrethiam ta chiahin ka hria. Kei chuan ka lo nuih pui mai mai.. mahse zawhna min zat chiah chu ka ngawi chiang viau!!
.
'Jeff hmeichhe engzat nge i mutpui tawh??'
.
Dawt sawi hi ka huat ber a ni a.. mahse tun tum zet chu dawt sawi thiam tak nih ka chak hle..
'lim (x+4)3/2+ex-9
_____________
x->0 x
he mi i chawh chhuah zat hi a ni mai..' ka han tih chuan kan thiante chu an nui hak a.. chawh nghal mai a tum a
.
'L Hopitals rule i hmang thei lo' ka ti a
'Hmela.. min chhaih kual a ni lomaw.. he rules bak hi ka thiam lo tih i hriat kha..' a rawn ti a
'A dang i zirna chance ka siam sak che anih hi..' ka ti a.. ka rilru tak chuan a nuih a za hle..
.
.
Kum khat dawn a vei leh ta reng mai.. ka nu nen pawn kan la inbe reng thin a.. ani pawh a dam chuan ka hria a ni. Zantin ka tan a tih ang bawk keipawn a tan ka tawngtai sak thin a.. hlim taka kan inhmuh dun leh chu ka duh ber a ni.
.
.
Hun a liam zel a, graduate turin thla thum chiah ka mamawh tawh tih ka hriat chuan ka rilru ah Graysville a ka nu mawlh chu a awm reng.. Sarah pawh a chang zeuh zeuhin. Zan khat chu ka nu in mail min rawn thawn a, a web cam a chhiat avangin mail bakin kan inbiak theih loh tur thu a sawi a, keichuan siam tir emaw thlak mai tur a ka hrilh chuan min hnial nasa hle a.. call a kan inbiak theih tho tur thu te ka han hrilh a.. a tonsil na a chhuah thu leh doctorin tawngtam lo tur a tih thu sawiin chhuanlam a siam leh zel a, ka ngaihdanah chuan min biak a a tah fo thin hi hreawm ka tih phah a hlau niin alang ani.
.
.
Zan lamah chuan ka nu nen mail kan inthawn ta tlut tlut mai.. a lehlamah chuan a nuihzathlak duh viau, thian thenkhat ten an ngaihzawng an biak laiin ka nu nen kan inbe char char chu a ni si a.. Sarah chanchin sawi a hrat viau a, a bialpa nen an inthen thu te.. ka rilru tak chuan ka lawm mahse ka thil tum dan erawh ka sawi hran lo a ni.
.
.
Ka nu aw ka hriat lohna a rei tak em avang chuan vawikhat chu ka call a.. mahse min chhangtu erawh a dang daih thung..
.
'Hello..'
'Hello.. Sarah nangmaw..'
'Aw.. Hii. Jeff.. i tha em??' zangkhai vah chuan a ti a
'Aw tha.. khawnge ka nu..'
'I nu maw.. class a la a..'
'Engtin nge a bulah i awm theih??'
'Aaa.. school ah ka pui a tunlai chu..' a tih chuan ka lo awih ve mai a..
'Ka nu chu a tonsil chu a dam tawh em ni??'
'Aih.. chuvang chuan a nia hetah i nu ka puih mahse a ni chu a harh lutuk.. mail a rawn thawn vat dawn che nia..'
'Awle.. ka hria e..'
.
.
Ka nu aw hre loin ka awm rei em vang te pawh a ni ang ka nun chu a nguai bur mai.. thla leh lawk a kan khua a ka haw theih dawn vang erawh chuan ka phur ru viau tho. Ka nu nen mail a kan inbiak chuan a that thu chu a sawi chamchi a, ka ringhlel hial zawk a ni mahse amah ka hmuh vat theih dawn avang erawh chuan ka in hnem chawp a.
.
.
Zanah chuan a tuk lama Tennesee ka pan dawn avangin phur takin ka insiam a. Ka nu chu ka biak chak em avangin ka call a, a ngai te bawkin Sarah chuan a lo pick up leh, ani hnenah chuan ka nu surprise ka tum thu leh engmah hrilh lo tur a ka tih chuan a lo 'aw' ve mai a.. Tichuan hlim taka kan inhmuhkhawm hun tur suangtuahin ka muhil ta a.
.
.
Graysville ka thlen chuan dam sawng sawngin ka inhria. In a ka luh chuan ka nu ka han ko vak a tuman min chhang lo.. schoolah a awm anih ringin ka han call a, mikhual pindan atanga Sarah lo chhuak ka hmuh chuan ka hlim hle a, a hmelthat ngaiin a lo la hmeltha reng a ni.
.
'Sarah khawnge ka nu??'
'Ah.. Jeff.. englo..' asawi thei lo.. a mittui a rawn luang nghal a.. chu chuan min ti nghing dawt thei
'Sarah enge awmzia.. khawngaihin??'
'I nu chu damdawiinah a awm.. Nashville ah' ti pah chuan ka awm a beiin min rawn kuah a
'A vaiin min hrilh rawh.. tunah' vin aw lek lek chuan ka han ti a
.
'Tukin ah mail ka rawn thawn che.. Graysville a lo tlang lo turin leh Nashville a damdawiin a i nu awmpui nghal turin ka rawn hrilh che a, in lo thlawk chhuak hman tawh si a ni'
'Chutiang ka ngaithla duh lo.. ka nu dinhmun dik tak ka hre duh'
.
.
.
Ka zawi vek.. engtia awm tur nge ka hre lo. A hma zawnga mail a ka biak char char kha ka nu ni lo in Sarah zawk a lo ni. Ka nu chuan chaw kawng cancer veiin, doctor te pawh an beidawn tawh thu ka hre ta si. Chu tih rual chuan ka nu leh Sarah chungah ka thinrim, ka rilru a na a.. ka ngaidam thei ngai loang. Sarah chuan ngaihdam min dil nasa teh mahse ka thiantha ber a nih thinna avang chuan dawt pawi lutuk min hrilh hi ka pawm thiam thei lo a ni.
.
.
Ka nu hmel ka hmuh chuan thawk pawh ka la thei lo hial a ni. A vun chu a chuar em em a, a ruh khuhtu awmchhun chu chung vun pante, chuar tak choh chu an ni tawh. A sam te chu a tla kawlh vek deuh thaw a.. a mit a khur duk a, a biangki te chu a hmel a langsar ber an ni zo tawh.. a tawng chhuak thei tawh loa, engmah a ei thei tawh lo bawk. Ka inthiam loh rual rualin min mamawh laia min hre duh lo chuan ka rilru a ti na tlat thung si
.
.
Ka hna thar tur pawh zawm thei loin ka nu ka enkawl chawt a.. Sarah erawh kei emaw kanu hmu tur a lo kal tawh lo turin ka hrilh a ni. Doctor te beisei ang aiin ka nu chuan min dam rei pui viau a. Mahse a tha chho ve zel tur a ka beisei a ka ngaih laiin min boralsan ve ta si. Ka khawvel, ka neih zawng zawng ka chan a ni.
.
.
Nun thar bultan tumin ka nu leh pate nena kan chenna ka in neih chhun chu chhuahsanin Nashville ah hna ka zawng a.. thiamna lamah phak mahila ngaihtuahna a kal ngil thei tawh lo thung. Zu ah ka tuan a.. ka nachhawkna neih chhun a ni miau si. A hma zawnga hmeichhia hnaih pawh ngam lo khan ka thawhchhuah sa seng meuhin hmeichhia ka dawr ta thin a ni. Kum hnih tal tawp chutiang a ka nun hnu chuan Company pathum atanga ban ka ni a.. khawiah mah ka thiamna phu tawk ang hna hi tuman min pe thei loang tiin min banna hnuhnungber Company manager chuan a ti hial a ni.
.
.
Duhthlan tur ka nei ta lo.. Ka neihchhun chu ka nu leh pa min hnutchhiah kan in choh kha a nih tawh si avangin Graysville lamah ka let leh ta. Ka inthlak danglamna nasa tak rah chhuah ka hmel pawr chhap leh zu rim ka nam reng na chuan a tha lo lam zawngin mi mit fukna ber ah min siam chho a. Ka thiantha ber a ka ngaih, a ruk a ka ngaihzawn hial Sarah tang pawn mit sir a melh zeuh zeuh bak hlawhchhuah ka nei ta lo. Nitin zantin pawisa khelin barah hun ka hmang a.. ka in chu ka thawmhnaw thlak nan choh ka hmang hi a ni ber. Ka thian neih ve chhun tih a ka chhal te pawh keimah anga zu duh vek an ni bawk.
.
.
.
.
Ka hna a ka neih ber zu in leh pawisa khelh nan hian ka ke hi ka mamawh em em in ka hre ngai loa mahse duh anga kal theih loh chuan kha nula kha dem a awl thin hle a ni. Nilengin inah ka tawm a ngai miau a.. zan lamah lah chuti bawk. Mahse, ka hmangaih zu erawh ka tawpsan hauh chuang lo thung. Chutia ni thum vel lai Barah ka lan loh hnu chuan ke bai auh auh in ka thleng phei ve leh thei ta. Ka nundan ngai te bawkin pawisa khelin zan rei tak tak thleng ka meng a, ka chauh tawpah Bar thutphah seiah ka muhil leh mai thin.
.
.
Zing dar riat velah ke bai auh auh chungin ka in lam ka pan a.. ka inkawt a ka thil hmuh chuan min ti tawp chiang hle a ni. Ani chuan min hmuh veleh min rawn pan hnai vat a..
.
'Hii Jeffrey.. tuk chhuah nuam' a rawn ti a
'Helai hmunah hian enge i lo tih dawn??'
'Doctorin ni nga hnuah lo kal leh turin a tih che kha..' a ti a
'Ka tha tawh lawm.. haw rawh' tiin ka inchhung lam ka pansan ta a..
.
.
Kawngka ka hawn rual chuan luh ve tumin a rawn inzep a..
.
'Eng thil nge i tih??' ka vin tuar a
'Ka lo nghak ang che.. doctor appointment kha dar kua a nia..' a ti a
'Checkup ka ngai lo.. ka lawm lutuk.. haw rawh.. mi tumah su tawh lo turin fimkhur la chu chu a tawk a ni mai' ka tih chuan min en reng a, a mittui chu a rawn hnam nghal ringawt.. tap belh ka ti rilru hle mai.. 'Khawngaihin tap suh.. mi ka thlem thiam lo' ka ti ringawt a. Ani chuan a mittui hru pah chuan a inher a kal ta a.. A car a thlen dawn tep chuan enge ka tih tak mai pawh ka hre lo..
.
'Mary'.. a rawn hawi vat a
'Pawnah min lo nghak rawh' ka tih chuan a lu a bu nghauh a
.
.
'Ka inbual ni a lo a sin mawle' ti a phun chungin bualin lam ka pan a.. shower a ka inphuh tir lai chuan a mittui hnam hmel chu ka han ngaihtuah a ka nui tet tet a.. Ni e, a duhawm thlawt a ni. Tin, hmeichhe danglam tak a ni tih ka hria, kei ang bal tawp lutuk pawh min tanpui hreh lo tu hi. Bualin ka chhuah dawn pah chuan sink bula ka razor chu ka en zeuh a, ka ding leh te te a. Hmanni khan ka khabe hmul leh ka hmuihmul vangin 'Uncle' min ti kha a nia.. a danglamna ka hmuh chak tlat a nih chu.
.
.
Uluk tak leh hmanhmawh ru tak chungin ka hmuihmul leh khabe hmul buk chhur chu ka han ziat a, hetiang a ka inziah fai lohna chin rei tawh zia chu Mary ngei pawh khan a hmuthiam ngei ang..
.
'Hello..' tih ri ka hriat chuan ka zawi hnawkin ka hria.. chu nau te chu a rawn lut hram a ni maww..
'Pawnah awm rawh ka tih che kha..' tiin ka vin vak a, min chhang lem lo.
.
.
Ka insiam zawh chuan ka inchhungah a lo awm tawh loa.. pawn ah ka va chhuak a.. a car bulah a lo ding a. Min hmu chu a mengphawk hleee a ni.. a rawn kal hnai a..
.
'Uncle tih chi i ni lo a nih hi.. kan inrual vel ang ti raw..' a rawn ti a. a thusawi pawh chhang lo chuan carah chuan ka lut a
.
'Kum engzat nge i nih??' a rawn ti chhuak leh phawng..
'Ngatan??'
'Ka hre chak mai mai.. 22 ve tho a mi??' a tih chuan ka ner nang a
'Ni lo.. 27' thawk ka han la hak a
'Ka ring dik chiah..' tiin a rawn nui a.. 'Englo, i hmul kha engtin nge i tih??' a rawn tih chuan ka ngai thei lo tep
'Engtia ti turin nge min lo ngaih a??'
'Nilo e.. "uncle" tih a ka koh vang che kha a ni chuan ka tihpalh' a rawn ti a.. a ruk tak chuan a chhan dik tak a nih zia thu chu sawi ka chak hle a ni.
.
.
Doctor kan hmu a.. ani chuan ka kal nasat avanga ka that loh thu min hrilh lai chuan Mary chuan min lo en reng a..
.
'Vawikhat mah chhuak tawh reng reng suh.. i mamawh chu ka lo pe mai ang che..' ti chuan a ang bawrh bawrh a
'Engaa?? nang hian engmah tih tur i nei lo em ni a?' ka ti a
'Nei ee.. ka ngah takzet.. chuvang chuan ka hun hlu tak hi min zah sak hram la.. i ke hi lo hmang rim tawh suh'
'I lawmawm reuh berh berh hle mai..' ka han ti ringawt a
'Chuan i inah ka lo leng thei angem??'
'Aih..'
'Mawh.. khawngaihtakin'
'I a em ni??'
'Aw a nimai..'
'Ngatinge min zui tlat a??' ka ti a
'Thian nih ka duh' a tih chuan a thutak hmel fu mai
'Ngatinge??' ka ti a
'I khawhar hmel alawm..bakah i in kha ka ngaina'
'Enga??'
'Ramhuai film ka ngaina alawm.. ramhuai film channa ang mai a ni..'a tih chuan ka zak ru ve reng
'Tih tur i neih loh chuan lehkha te zir la..'
'Ka nu in lehkha zir ka mamawh loh thu a sawi a..' min hnial thei zel dawn a ka hriat avang chuan ka ngawi rih ta a.
.
.
In thleng min thlah a.. a number min pek chuan cellphone ka neih loh thu ka hrilh a.. nui hmel pu sangin kawl ve hrim hrim turin min ti ta a. Tlai ni tlak dawn lamah chuan ka chin dan thanin Bar lam la pan leh ta.. ka lut chiah chu ramhuai hmu ang maiin an meng phawk hlawm ngang a ni!! Ni e, an tan chuan sahbawn rim ka nam ringawt pawh mak tih a hlawh dawn nakalaiin hmai fai vangin ka la lut zui..
.
.
'Jeffrey Bawiha, i hmeltha takzet thin an tih hi dawt a ni lo a nih hi' a tih chuan ka nuih a za hle a. Zan lamah ngat phei chuan zan danga pawisa chawia ka mutpui thin nula khal zet zet ho chuan min rawn pan zawk tlat ta mai.. Mary chungah lawmthu awm teh se, ka vanneihna a ni ringawt..
.
.
Hun leh ni aliam ve zel a.. mak tak maiin kha nula naupangte khan rilru hi a luah veng veng thin. A chang phei chuan ka hmeichhe mutpui thinah te chuan ka chan ta thin a, inthiamlo rilru hle mahila nawmna nasa tak min siamin ka hre thin. A hma a ka tawngkam nat vang khan min hmu duh tawh lo emaw chu aw ka tih laiin ka thian nih a duh tak tak lo aniang e tih ten rilru ka pu a. Ni e, kei ang thian nih chu atan mualphona mai mai a ni dawn tih hi hriatreng ka lo theihngilh thin a ni.
.
.
Ka in kawngkhar chum ri dawt dawt ri chuan min ti harh zawk a.. thinrim ru takin ka tho a.
'A tu piangsen nge mawni dawn ni' ti rilru pu in ka han hawng thuai a..
.
'Nangmaw??'
'Aw.. chawchhun ei a hun tep tawh hi..i la tho lomaw' a ti a. Ka inchhung lam chu a melh tawk tawk a.. luh tir lo thei dinhmunah ka ding ta lo, ka ko lut ta a.
'Vawiin enge i tih dawn??' a rawn ti a
'Barah.. a ngai'
'Enge a ngai??' ka ho chuan a ti a
'I hriat reng kha.. mi zawt belh duh suh'
'Min pui thei angem?? vawiin chiah' a ti a
'Engah??'
'I in hi ti fai ang..'
'Enga??' mak tih hmel tak chuan ka en a
'Uncle Jeffrey.. khawngaihin..' a tih chuan a tukhumah ka nawr zeuh a, a nui har har a
'I ngaina nilawm ni??' ka ti a
'Aw tehreng mai.. ka duh ang taka ka chei hunah'
.
.
Hmeichhe danglam tak a nih zia min hriat nawn tir mawlh mawlh chu a ni si a.. nge hmeichhe dang ka hriat ve chhun chu Sarah choh kha anih vang zawk. Engang pawn midang chu lo danglam bik pawh nise he nu ang em em a duhawm hi chu an awm ngai loang.
.
.
Kan pahnihin chhuat kan nawt a, bungbel kan nawt fai a, bang kan ti fai bawk a. Zu ei nasat tawh ka nih avangin ka hah hma thin hle a mahse tun tum chu hah ka hre hauh lo. Bang nghengin kan pahnih in sandwich leh coffee kan in dun a.. a hmel chu ka lo en leh reng thin. Ani chuan a hrethiam aniang chu a lai ve deuh in ka hria..
.
'Naktukah min pui leh thei angem??' a rawn ti chhuak a
'Ka inah maw??'
'Ngatinge hetiang hi i tih Mary??'
'Ka hre lo.. ka ngainat vang che aniang..' tiin min chhang a
.
.
Tlai lamah chuan zanriah min buatsaih sak a tum a, mahse ka taksa in zu a mamawhna a nasat em avang chuan haw turin ka ti a.. ka tlawngaih vanga a la ngai cheu emaw ni min hnial char char..
.
'Ka fiamthu lo.. khawngaihin haw rawh..' ka ti a
'I tih duh chu ti mai rawh.. chaw pangai ei turin ka duh che alawm' a ti a
'Anih chuan min tibuai suh ang che..' tiin ka pindan lam ka pan a.. zu chu ka in leh tan ta..
.
'Kan inah pawh ka pa ten an in a kei ngei pawn wine ka in a, beer pawh ka in thin alawm.. ngatinge ka haw kher i duh a??' kawngkhar a ding chung chuan a rawn ti a
'I ngaih anga awlsam kha a ni lo.. i hrethiam ngai loang' ka ti ban chuap a
'Hrethiam turin ka pui thei che..'
'A teuh lo mai.. ka nun hi tuma hriatthiam chi a ni lo.. i bula ka awm chhung kha harhfim a hun ka hman ve lai a nih kha..' ka ti a
'I zanriah tur ka siamzo tawh.. khawngaihin ei rawh aw..' tiin a chhuak ta a
.
.
Engvangin he nau hian min zui tlat ka hrethiam lo. Ka hmangaih mai dawnin ka hria a ni mahse ka hmangaih a rem ngai dawn si lo. Tu pa in nge a fanu rangkachak kei ang zu ngawlvei tan pe duh tehlul ang ni. Mahse, ani khan ka rilru ngaihtuahna zawng zawng hi a luah khat vek a ni ber mai.
.
.
A tukah chuan a intiam ang chiahin a rawn thleng a. A sam chu a bawk chho vek a.. a t.shirt pawl chu a inhmeh hle a.. a kekawr bu teu chuan a ti lang sexy takzet a ni. Ani chuan energy drinks min rawn lei sak chu min pe vat a.. thil min hrilh duh a neih thu a sawi a..
.
.
'Jeff.. unau pahnih kan ni a.. ka u zawk hi mipa a ni a, kan inhmangaih thin takzet. Mahse, vanduaithlak takin ka nu chu a boral a.. kan unau chuan kan tuar na em em a. Ka u chu ka pa sumdawnna enkawltu a lo ni chho a, tlin pawh a tlin chho viau dawn a kan ngaih laiin ka pa in nupui dang a nei a. Chu chuan kan chhungkua min ti chhe vek a, ka u chanpual chu ka pa nupui chuan a chuh lehzel nen ka pa nen an inhau ta fova. Ka u chuan kan in a chhuahsan ta a. Khami ni atang khan zu leh damdawi ah a tlan nasa hle a, tanpui ka duh thin a.. mahse ka la naupangin tih theih ka nei bawk si lo.. ka chan ta nge nge a ni. Ka pa inthiamlo chuan kei min duat phah ta em em a, mahse ka u kha chu chuan a ko kir thei si lo. Ka sut ni che a i hmel ka hmu te, i zu rim nam leh inbual mamawh tak rim te khan ka u min hriatchhuah tir a chuvang alawm ka zui che a, tanpui che ka duh..' a mittui luang zawih zawih chu ka kutin ka hruk sak a.. Ka thil duh loh leh tum ngai miah loh ka nunhlui chanchin chu ka hrilh ve ta a.
.
.
Chiang takin ani hi ngaihzawn chi a nih loh zia ka hria a ni, a u ka hriatchhuah tir a nih si chuan ka farnu anga ka en a ngai tih ka hre bawk. A haw dawnah chuan cell phone min pe a..
'Hei hi hmang rawh.. min mamawh hun apiang ah min lo be thin dawn nia..' a ti a
'Hei chu a mah mah a ni..'
'Ka u tan chuan engkim tih ka huam' a tih chuan ka awmah nghet takin ka kuah a.. ka kuah dan erawh unuapa in unaunu a kuah ang chu a ni thei zan lo a ni
'Sarah kha i la duh em??' a rawn ti chhuak a
'Aih.. hmeichhia ka mamawh hleinem.. nau ka neih che hi' tiin a car kawngka chu ka hawn sak a, ka vai liam ta a
.
.
Engtik lai pawn min rawn text a.. ka thil tih min zawt reng bawk. Ka ning ru viau dawn na a, ka farnu anga ka ngaihtuah chuan ka neihchhun ang ngawih ngawih ah ka ngai thung. Zan khat chu ka pawisa khelhna ah ka cha vek tlat pek. Pek mai tur ka neih loh avang chuan Mary min lei sak cell phone chu inthiamlo ru takin ka dahkham ta ringawt a, rulh leh vat chu ka tum ruh ve hle a ni.
.
.
Zingah chuan Bar thutphahsei a ka mu lai chu min sawi harh nawk nawktu an awm a.. phak takin ka meng a.. ka phu chiang hle..
.
'Ka zawng nasa lutuk che.. nizanah khawnge i riah' tap aw tiau chuan a ti a
'Pawnah inbia ang' tiin ka kai chhuak a.. 'Hetah tinge i lo kal a.. a hlauhawm zia i hria nilawm ni??' ka ti a
'Khawnge phone kha?? miin min lo chhang a.. an man che a an ru bo che emaw ka ti lawm..' tap pur chuan a ti a
'Ka tihpalh Mary.. ka nei let vat ang..' ka tih chuan ka meng dur hle a. Barah chuan a lut a
'Tunge Jeffrey cell phone kawl..' tiin a au lang lang a, Bar a chatthla dang ho chu an rawn zi hlawm tiah tiah a, an phun bul bul hlawm a
'Hetah a awm lo Bawihi.. kal ang' tiin pawh chhuah ka tum a
'Tunge in sawi ru' tiin a au chiam chiam a.. ka thin thawk chuan ka thing nawk nawk
'Bengchheng suh Mary..' a tawp chiang hle.. a mittui dir zawih zawih chu hmuh harsa ka ti hle
'Ka u i ni thei lo..' tiin a tlan ta daih a, ka koh vak vak pawn a lo hawi let tawh lo
.
.
Rilru chhungril rum vawng vawngin hun ka hmang a.. ka nun chu ak hne takzet, cellphone ka lak let leh theih hnu chuan Mary te in lam ka pan a, ani chu ka call a.. ka vin hrep hnu a kan inbiak leh vawikhatna a ni.
'In inkawtah ka awm.. lo chhuak lawk rawh' ka ti a. Ani pawh a hnu rei vak loah a rawn kal a
.
.
'Engkim avang khan ka lawm a chuan ka tih beidawn che avangin ka tihpalh takzet.. tunah chuan keimah vangin i buai tawh loang' tiin phone chu ka pe a
'Jeff..'
'Umm'
'I tan enge ka nih??' a rawn ti a
'Ka neihchhun ini thin mahse ka chan leh tak si..'
'Min chan loh nan tih tur awm miah loin i hria em ni??' a ti a
'I unaupa hmun ka luah zo dawn lo..'
'Unaupa hmun chiah luah thei turin a mi i inbeisei??' ka mit a chiang tak a min en pah chuan a rawn ti a
'A bak chu ka beisei ngam lo..' ka tih chuan a lu a bi nghauh a, inher letin an in lam a pan ta a
.
.
'Mary' a rawn hawi let a, a lam ka va pan a
'I unaupa in a hmangaih ang che chuan ka hmangaih thei ngai loang che mahse chance vawikhat chiah min pe leh rawh..' ka ti a
'Jeff.. ka unaupa ang chiah a ka enkawl theih dawn che chuan' a ti a.. ka lu ka lo bu nghauh a
.
.
Min fuihna angin ka nun ka hmang chho a, zu in tlem turin min duh angin ka in tlem sawt hle a.. kan pahnih in nitin ka inah hun hmangin lehkhabu kan chhiar dun thin a. Mathematics ka atchih thin zia a hria a ang khawp mai.. chutiang ang lam bu chu min rawn lei nasat sak hle a. A hma a ka zir chhuah tam tak nen a inzulzui chu min enpui ber thin. Kei aiin a zir hniam a, a hre tlem a mahse kei aiin a fing tlat si. Ka zu in chak lutuk awmngaihna hre lo chu min buaipui chang a tam a, a chang leh aman min leisak zawk fo thin.
.
.
Nitin ka inbualin thawmhnaw fai ka ha ziah a, khabe hmul leh hmuihmul ka hmaia a to chu phal loh a ni bur, ka in leh a vel a faiin boruak thianghlim hlir ka hip tawh a. Ka tan a thil phal loh bur chu bara kal a ni. Zu ka in duh a, ka chiri dawn anih chuan aman a lei ami thin.. ka tan a inpekna hlu lutuk hi mumang a ang hial zawk ani. Mahse, hun a liam zel a.. zu pawh ka thlah hlek hlek a, chu chuan a ti lawm hle a ni.
.
.
Exam bei turin ka inpuahchah a, a tan unaupa ang ni amhila ka nu ang mai niin ka hre thin. Tlai a an in pana a haw te chu ka ngai ru em em thin a, mahse ka unaunu a ni duh zawk tih chu ka in hrilh fo thin. He thil hi ka tan har viau mahse alaka ka bat te rulh nan a unaupa ka nih hi a tawk tih hi ka theihnghilh ka hlau thin a ni
.
.
Thla li lai a liam hnu chuan mi pangai tak ka ni chho ta.. kan pahnih chuan kan hlim a, ka duhthusamah chuan ka nupui ni se ka ti thin. Mahse, chu erawh ka tan thil theih loh a ni si..
.
'Jeff.. Sarah hi i duh tawh lo tak tak a mi?? be leh rawh'
'Duh lo.. ka harsat lai bera min puitu hi alawm hlu ber..'
'Inu nen a puih che u kha..' a ti a
'Dawt inhrilh ka duh lo..'
'Anih eng ang hmeichhia nge i duh??' a ti a
'Nangmah ang..'
'Maw??'
'Nangmah ang ka tih chu..' ka tih chuan a ngawi vang vang a..
.
'Jeff.. unau ni tawh loang..' a rawn ti chhuak a
'Engmaw..' ka lo ti ha a
'Unau nih ka duh tawh lo.. khawngaihtakin min propose rawh..' he nu tak hi chu aw.. a van danglam tak
'Anih leh.. Pretty Mary.. ka bialnu i ni duh angem??'
'Aw ka duh.. tinge ahma khan i sawi loh' tiin pangchang takin min rawn kuah a..
'Ka sawi chakna a rei tawh a sin Bawihte..' tiin duhthawh zetin kan infawp a..
.
.
Ka hun hman zawng zawng chu nuam lo awm lo ang mai a ni tawh. Hmana keimah chu bo in Jeffrey mithar a rawn lang a, ka bialnu hmeltha, fel leh duhawmna hian hmangaihna khurah min tluk luh thuk pui hle a.. chu chuan hlawhtlinna nasa tak min thlen thung.
.
.
Mathematics lecturer ni tura exam ka pek ka pass a ni tih kan hriat zan chuan Mary nen ka inah Champaign nen kan lawm a.. nui ri bak hriattur a awm lo a ni ber e..
.
'Jeff zu hi i duh viau a ni thin ti raw..'
'Aw.. ka hmangaih awmchhun a ni thin' tiin nui chungin ka chhang a
'Anih chuan zu aiin min hmangaih nge..' a rawn ti a
'Ka hmangaih zawk che.. mahse a hunlai na na na kha chuan zu aia hmangaih kha ka nei lo alawm..'
'Han sawi fiah teh.. chiang takin ka hre duh..
.
'Ka zan hun zawng zawng deuh thaw zu dawrah nuamchenin hun ka hmang a.. Hmangaihna awmzia ka hriat chhun chu zu ka hmangaihna leh zu chiahin min hnem thinna chu a ni thin. Mahse, nang ka nunah ilo luh khan, ka chan tur a inhung, a chhe ber ka panna kawngah chuan nang ilo ding a.. thui tak kawng dik lo ka zawh tawhna ah chuan hruai let ka ni ta zawk a.
.
Tennessee Whiskey ang maiin i nem a, Strawberry wine ang maia thlum tui chu i ni.. No a Brandy tlak pap zawh a lumna nuam dangdai tak, taksa in a tem thin hi nangin lumna min thlen thin ai hian a ropui bik chuang hauh lo. Chuan maw duhtak, i hmangaihna khurah hian lung ang mai a chechang thei miah loa hun ka hman tak hi.
.
Ka hun liam ta ah khan hmangaihna chu ka lo zawng thin ngei alawm.. mahse ka hmuh chhuah chhun erawh zu um a zu awmte a zawh ruala dai leh mai thin an ni. Mahse, nangin i thinlung thatna a min enkawl ni atang khan hmangaihna hi alo thlawnin a luan ka phal ngai lo. A chhan chu maw.. i hmangaihna aia ruih nuam hi khawvel ah hian a awm si loa..'
.
.
'I tennessee zu tha mi ka ni kumkhua ang duhtak..' tiin min rawn kuah a lungchim takin kan in fawp vawng vawng a.
.
.
>>>>>THE END<<<<<<<<
Comments
Post a Comment