I TOO HAD A SAD STORY

I TOO HAD A SAD STORY
***RENGPUII GUITE***
.
.
Harh chiang mang loin ka han meng a, ka tih thin ngai bawka thuchhuak in ka veilam chu ka en vat a. Tuk dang ang bawka hlauhthawnna chuan min rawn man leh, rang takin ka khum atanga chhukin ka khum piah lawk a khum pakhat bulah chuan ka va thu sawp a.
.
'Duat i thaw ti raw..' tiin ka phun sep. A awm, a thawk zawnga che thin che lai hmuh tum chuan ka melh ngar ngar a. A kut chelhin a mar en mai awm hi ka nia, mahse chu chu ani kalsan tih loah chuan ka thil hreh ber a ni. A mar la awm leh awm loh en tumin ka kut hi la ta ila, mithi kut vawt thler khawih ka nih mawlh chu ka thil hlauh ber a ni thin.
.
'Ka la dam' a aw chau tak chuan a mit la chhing chungin a rawn ti chuan a hmui dang bemah chuan ka fawp vawng vawng a.
.
.
'Ka dam chhan' tih hiala ka sawi ngam, ka hmangaih zia ka tlangaupui loh chauh thin kha tunah chuan amah vangin nitin 'Lalpa vawiin tal chu daih tir hram rawh aw' tih a ka tawngtai a ngai ta ziah a. Khawvel hmeichhe awm zawng zawng zinga hmeltha ber chu ka ti ngam hauh lo mahse ka khawvel timawitu ber anih zia erawh phat ruala sawi ngam a ni. A hmeltha tak uanpui tham tling em em mai uanpui loa a thinlung, ka duh ber mai ka lo uanpui thin te kha tun hnu hian ka inchhir lo leh zual, a chhan chu tunah hian ka hmangaih hian hmel han chhuan tlak reng reng a nei tawh si lo.
.
Kum thum erh awrh ani nen hian kan inngaizawng ve hman ang tihah ruh cancer a nei tih hriatchhuah a ni a, a that chhoh mai kan beisei laiin hmasawn lam kan pan thei lo a ni ber e.  College khat atanga hlim taka kan gruaduate dun anga hlawhtlinna nena kan chhuahsan rual lehna tura ka lo beisei University chu a laklawhah a chawlhsan a lo ngai ta a. A hma a khawi ilo ka chhuan dawn apianga ka bike hnungin a chhawm thin chuan natna khumah a hun pum deuh thaw hmangin, keipawh mal takin ka zirlai ka chhunzawm zel a ngai ta si. A kiangah awm reng thei lo mah ila ka thinlungah a thi ngai loa, class ka ban velah pawh kan in lam pan loin damdawiin lam ka pan hmasa ziah thin.
.
Chemotherapy treatment a lakna avangin a sam te chu a tlakawlh vek a, a vun ngo no chek thin te pawh a dang bem zo tawh a, mahse ka mitah erawh a mawi ngaiin a la mawi reng thung. Chau thin viau e ti lo chuan nui hmel put loh a harsat zawk emaw tih mai tur hian a khi sang reng thin a, a bula awm hi a chang chuan a hahdamthlak letling zawk viau thin.
.
Amah vanga ka nun inthlak danglam nasat chhoh zia chu kei min hrechiangtu te mak tih a hlawh thin em em a, keipawh hian mak ka inti lek lek thin. Mak intih pawh chu a awm reng lah taka, rawlthar chhuah hlim hlat atanga hmeichhe chhelo hria tiha hriat lar thin kha ka ni a, ka ngaihzawngte pawh chhelo tih a sawi hat kai an ni deuh zel thin. Dindini nen hian 2nd Year kan zir kumah kan inngaizawng a, hemi kum hian College Miss-ah thlan tlin a ni bawk. College Miss bialpa han nih zet chu aruka inchhuan te kha thil awlai tak a ni a, a nuam hi ka ti veng veng thin. A tir chuan a hmel leh pian vanga ngaizawng kha ka ni bera mahse kan han inzui chhoh zel takah chuan ani'n hlimna leh lungawina min pek te kha tu hnen atang mah hian ka neih theih hi ka ring lo a ni. Mi tam zawk chuan a pawnlam mawina choh an hmu a, kei erawh chuan a thinlung mawina piah lama a hmangaihna ka dawn lehzel te khan mi vannei bik ka nih zia hi min hriatchhuahtir fo thin.
.
Ka hmangaih chan ka hlauhna chuan a hma aia nasa in Pathian min hnaih zual tir a, amahah bak innghahna a awm lo zia hria in tawngtaina hun ka insiamsak zing sawt hle bawk. A natna a chhuah changa a han vial ngawih ngawih thin te hian mipa hi ka mipa hleithei thin lo, a ruka ka mittui hruk chang ka ngah thin kher mai. A chang chuan a natna hi a zia thei dawn lo anih chuan hreawm tuar tawh lo tura thlah mai duhna te chu ka nei thin a, mahse ka han ngaihtuah chiang a, ani hi a kianga ka awm loh chang pawn khawvelah a la awm a ni tih ka hriatchhuah in ka thla a muang thin kha a ni a, min kalsan tur anga ka ngaihtuah kai chuan awmze nei loin ka awm hi ka tham leh vawng vawng thin.
.
.
'Duat..' aw chau tih hriat tak hian a rawn tawngchhuak a
'Um duat..' tiin a biang chu ka chul a
'Ka bei nasa ti raw..'
'Aw i bei nasa lutuk.. nangchu hmeichhe chak tak i nia lawm..' ka ti a
'Ka thih hunah nangmah chiahin awm miah suh aw..' chu thu chuan ka thinlung hi a vilh nimaiin ka hria
'Ngatinge thih i sawi? I thi dawn hleinem.. kan inneih dawn kha..' ka tih chuan harsa tih hriat takin a rawn nui a
'Nupui lu kawlh i duh mi?'
'Nangmah i nih chuan ka duh vek..'
'I result a chhiat chuan keimah vang a ni dawn si a, engtinnge ka tih ang..' a tap dawn lek lek a
'Ka ti tha lutuk ka tih kha.. University graduate bialpa i nei tep tawh..' ka ti a
'I ti tha tak tak ti raw..'
'Aw tak tak.. a chhe berah 1st class..' ka tih chuan a lu a bu nghauh a..
.
Kar hnih hnu velah Final exam result a chhuak tawh dawn tih ka hrilh atangin kei aiin a rilru a hah a, amah vanga ka zirlaia rilru pe thei loah a inngai tlat thin. Dik tak chuan ka zir thei lo alawm, keimah ngei pawn a hma ka tluk loh zia ka inhria mahse, a khawhar te ka lo hnem ve theih chhung chu heng ka zirlai hian min tibuai pha lo a ni ber.
.
Tlaiah in lama ka haw chuan ka chauh deuh avangin ka muhil sek a, phone call ka dawn ri chuan min ti harh zawk a, Dindini nu a lo ni a, hmanhmawh taka damdawiin lam pan tura min rawn tih chuan ka inperh tho rang hle. Traffic jam nasa tak kara inzep in chak thei ang berin ka tlan a, ka inngaihtuah nasa lutuk chu ka thlan dup thei hial a ni. Damdawiin ka thlen chuan ani chu nachhawkna in an lo chiu muhil a, thlamuang taka a muhil siai hmel ka hmuh chuan ka hahdam hawk thei hial a ni. Chumi ni atang chuan a chau telh telh a, a aw te pawh a zawiin a sin sawt hle bawk. Kei, engtiklai maha beidawnna rilru pu duh ngai lo pawh chuan beiseina ka nei tlem tawh hle a ni.
.
Doctor canbin ah kei leh Dinini nu leh pa kan lut a, a hma lama test dang a tih result chungchang sawiin kan titi ho a. Doctor thusawi chuan min deng na kher mai, a treatment lak te khan engah mah a pui loa, chu mai nilo in a lo tai darh nasa hle bawk a lo ni. Tin, a dam leh a beiseiawm tawh mai nilo in eng hunah pawh ani chu kan chan mai thei a ni tih a sawi bawk.
.
Zah pawh dawn loin a chhungte hnenah chuan zana riah char char chu ka dil ta rawih a, a nu leh pate pawh chuan min hnial chu an hreh hle tih ka hria a, mahse ka chhungte laka a inthlahrunawm thu sawiin an pawm loa. Keichuan ka hmangaih, engtik hunah pawh min kalsan thei mai dinhmuna ding hi kalsan ka tum lo bur a, a tawpah chuan an phal ve hram a.
.
'Ngatinge lo riah i hreh theih tehreng nen..' a tih chuan ka nui a
'Ka hreh ngai loh kha.. ka inthlahrung thin alawm..'
'Anih tunah i inthlahrung lo a mi?' a ti a
'Class ka kal tawh chuang hleinem.. bakah ka ngai che..'
'Lo inngaizawng ngai miah lo ila tiin i ngiahtuah ngai em?'
'Teuh lo.. i ngaihtuah thin a ni maw??' ka ti a
'I tan chuan buaina bak ka nih loh hi..'
'Ti khan sawi ve ziah suh..' tiin ka chalah chuan ka kutzungtang chuan dimtein ka han nawr a
'I van sual tak, damlo ka nih hi..' tih pah chuan a nui a.
.
A mutthilh hnu chuan a khum bul lawka khum ah chuan ka mu a, Dindini nu call in a mutthilh tawh thu ka hrilh zawh hnu chuan mutthilh ka tum ve ta a. Chau viau mah ila ka han muthilh dawn chuan hlauhthawnna hian min kai harh leh zawk thin, ka hlauh ber chu inmangtha-na thu sawi loa min kalsan mawlh chu a ni thin.
.
Chumi zan atang chuan thinthi in ka mu ngai loa, tuktin ka harh velah a kiangah ka va thu vat anga, a chang chuan che lo ang tlat leh thaw lo ang tlata hriatna te chu ka nei thin a..
'Bawihte..' hlauthawng ru tak hian ka han ti anga, ani chuan ka rilru a hrethiam tih hriat tak hian chau aw takin
'Ka la dam..' a rawn ti thin. A chang chuan tuktina chutiang rilru put ngai dinhmuna kan han ding ta mai te chu ka vui lek lek thin mahse Dindini zawk hi vui inthlahrunawm khawp hian a dinhmunah a lungawi em em lawi thin si a.
.
'Ihmaw..'
'Umm..'
'Khawvel hi ka chhuahsan ui lutuk..' a rawn tih chuan chhan ngaihna ka hre lo.. ani chu ka en tlawk tlawk a.. 'Nangchu awm lo la tiang em em hian ka hreh loang..' a ti leh a
'Min kalsan dawn lo..' aw lawi tak chuan ka ti chhuak thei hram a..
'Nangpawn i awih bik loh kha..'
'Engchu?'
'Tuna i thil sawi kha..' a ti a
'Ka ngaihtuahna hi i kalsan dawn hleinem..'
'Ka mumangah ka lo boral a.. chuanhmeichhe hmeltha tak nen in lo intawng a, ani chu damdawiin a hruai ve pawh a ngai loa, keiin nang min duat ang chiahin ani chuan a duat zawk che a.. ilo lungawi lutuk a sin..' a mittui luang chu a hru pah a..
'Mumang anih chu a takah chuan i bulah ka awm zawk a..'
'Aih.. in innei alawm.. mokawr ka hak tur atana ka lo awh ang chiah kha a ha a..ihmaw ka thik lutuk..' tah tak meuhin a tap a
'Heii.. duat, tikhan awm suh.. engvangin nge nang ka hmangaih ber lai che in midang nupuiah ka neih theih ang..' ani kuah chung chuan ka ti a
'I hlim chu ka duh lutuk mahse kei nilo in midangin an tihlim tur che anga ka ngaihtuah hian ka na..'
'Nangmah chiahin min tihlim..' ka hnuk a ulh deuh avang chuan tawng pawh ka tawng tha thei lo a ni ber e..
.
A khuhin min tih harh vang chuan rang takin ka tho a, ani chu saisirin harsa tih hmel takin a lo khuh kheuh kheuh a. Tui la in han in tir ka tum a, in pawh a in tha thei tawh lo.. ka tiril hi a khur a, ka zam takzet a ni.
'Doctor ka ko ang aw..' ka tih chuan a lu a thing a..
'I hlimna chiah ka duh.. tupawn tihlim che se ka pawm vek..' zawi te chuan a rawn ti a..
'I lo la vei reng maw.. ngatinge thil ngaihtuah vak vak suh ka tih thin che kha..' ka ti a
'I hlim ang ti raw..'
'Aw.. ka hlim reng ang..'
'A na lutuk..' tiin min hmer tawng tawng a..'
.
Hmanhmawh taka bell ka hmeh chuan nurse pahnih an lo lut a, an en zawh chuan Doctor an ko a, Doctor pawh chuan damdawi eng eng emaw a pe a.. a office lamah min ko phei ta a.
'Tuna kan nachhawkna hman hi a sang ber a ni tawh a.. chhawk chu a chhawk ngei anga mahse a ngaihtuahna erawh a nghawng deuh ang..'
'Enge awmzia..'
'A rui anga.. a chezia, a thusawi te a pangai lo viau maithei a ni.. chuan in ven ngun viau a ngai bawk ang..'
.
Inah inthlakna la in ka haw zawk a, Dindini erawh a damdawi vangin a mu rei deuh a, a nu te lo thlen thleng pawn a la mu tui berh berh reuh hle. Hmanhmawh takin ka tlan let leh vat a, a chhan chu a harh vela min hmuh loh ka duh lo a ni. Pindana ka luh chuan tlawhtu a lo nei a, a lo thu chhuak ve ka hmuh chuan ka phu zawk hial a ni.
.
'Ehe.. tinge ka lo thlen hma a ilo harh a?' nui chung chuan ka ti a
'Ka thiante an lo leng a.. enteh hei hi Mimi hian a lei thar a.. hawh ka dil a min chhiar sak rawh aw..' zangkhai vah chuan a rawn ti reuh a..
'Eng maw?' tiin lehkhabu chu ka la a..'I Too Had a Love Story- Ravinder Singh englam nge a Mimi??'
'Ka la hre bik lo.. ka la chhiar bik loa..'
.
A nachhawkna vang chuan a chang leh a tawng char char a, chhuah te a ngen thul mahse kan in dang thei hram zel a. A awmdan chuan ka tah a ti chhuak takzet a ni! He nachhawkna hnathawh hi zo se engtiang taka na nge a tawrh leh ang?.. A awmdan chu rui loa a awmdan tak tak nise ka nuihpui nasa viau maithei e mahse a ni teuh si lo.
.
Darthlalang leh makeup min dil chuan ka pe ve mai a. Darthlalanga a in en chuan mak a inti tih ka hrethiam mai, mahse ka en reng tih  hriat chuan a rawn nui a..
'Ka hmai ki dan hi Angelina Jolie ka ang ti raw..' a rawn ti a
'Umm.. i hmeltha lutuk..' tiin lehlam ka hawi a, ka mittui tling puam chu khap bo ka tum a ni.
'Mamche, eng ber hi nge nalh lipstick ah hian?' 'Mamche!' tih hian a uan a chhuah hian min ko fo thin a, ka duh lo viau thin bawk.. chu chu a lawm thin em em a mahse min koh lohna chin pawh ka hre tawh lo..
'Khawi dah rawh.. lehkhabu hi chhiar ang' tiin novel a hma a a thiannu lo kensak chu ka chhiar la a
'Naa.. ka inchei chak a sin..'
'Tihian i hmeltha zawk.. makeup tel loin..'
.
Lehkhabu chu kan inchhiar sak a, ani chuan ngaihnawm ti takin a ngaithla a. Chawhnu pum ang deuh thaw chu kan inchhiar sak a, khaw thim dawn hnaih lam chuan a mutthilh avangin kan dah ta a. Zanah chuan a nu in min awmpui tel bawk a, ka hlauh ruk ang ngeiin a na a chhuak leh a, hreh viau mahila duhthlan tur a awm si loha vangin nachhawkna chu an han pe leh a.. Ka Bawihtei hi ka van khawngaih em!
.
A harh that chuan ka thawnthu chhiar lai chu ka chhiar zawm sak leh a, ka rin ai daihin a ngaithla tui a. A mutthilh lai leh a na a chhuah lai tih loah chuan kan chhiar zel a, a ngaihnawm kan ti dun khawp mai. Mahse, a tawp thleng ka chhiarpui thei ta tlat lo, ka hlauthawng a ni! Ka chauh thu chhuamlamin mut ka rawt a.. lehlam hawiin ka ngaihtuahna chu ka vah tir vel a. Ka muhil thei lo, novel chu la in washroom ah ka luhpui a, ka va chhiar ta a.. khatiang khawp a ka tah nasat kha ka la hre ngai lo. A thawnthu a khan min vel em em pawh a ni lo, kan pahnih chana ka dahin awmngaihna ka hre lo a ni ber.
.
'Tinge i mit kha..' thu kang deuh chung chuan a ti a..
'I muhil emaw ka tia..' ka ti a
'I thawh khan ka harh alawm.. i rei lutuk a..'
'Ka pum a dik loa..' tih pah chuan mut mai chu ka tum a
'Lehkhabu kha i chhiar mi?'
'Aa.. aw'
'Khusi kha a dam chhuak em?' a tih chuan chhan mai nachang ka hre lo.. 'A thi nimaw..' a ti chuai raih a
'Aih.. a dam a, an innei..' ka van a tak.. engvanga novel pakhat vanga ka hmangaih hi dawt hrilh mai nge ka nih le
'Tak tak maw?? ka van lawmpui tak..' a ti a
'Mu rawh dar 3 a ri tawh..'
'M.. ka zun a chhuak' a rawn ti a
'Diaper i hren kha.. i zung hreh mi..' tiin ka va kal a
'Umm.. min pawm tho la, toiletah ka zung duh alawm..' a tih chuan ka pawm kang ta a. A rihna a tlakhniam zia ka hrechhuak chiang hle a ni..
.
Ka pawm pah chuan ka biang chu dimte in a chul a..
'I hmeltha bik e..' a rawn ti a
'Min tih laih tum suh aw..'
'I hmeltha lawm..'
'I thu thei angem?' tiin nghah ka tum a
'Min lo thli.. tun bak hi min thli thei tawh lo maithei a sin' nui chungin a ti a.. keichu nui tur pawh ka awm ve lo.. ka hlauthawng takzet a ni.
.
'Ka bulah riak rawh..'
'A tawt lutuk.. duh anga i chet theih loh chuan i buai dawn asin..' ka ti a
'Ka ngai che lawm..'
'I bula mu ang alawm ka nih dawn duat..'
'Mahse ka bulah i mu hleinem..'
'Anih leh..' tiin ka a khumah chuan a mutthilh a insawn leh mai tumin ka mutpui ta a.. Ka ban lukhamin a mu a, a ban tha nei tlem tak chuan a theih anga nghetin min kuah ve reuh a. A damdawi vanga che mak deuh a ni tih hre mah ila a awmdan chuan min ti ngaihtha lo lek lek a ni, nge ka novel chhiar vang zawk pawh ka inhrethiam chiah lo.
.
Ka harh chuan ka ban lukhamin a lo la mu reng a.. a thaw ri sek sek ri hriat nawm zia chu ka sawi thiam lo hial zawk a ni. A hmuiah fawpin khum atangin ka chhuk a, puan ka sin that tir bawk a. A hmel chu ka en reng a, kan intawn tirha a hmel nen chuan tehkhin chi pawh a ni lo, ka dang var vek a.. a mit khur a tla duk a, a hmel atang chuan nula a ni tih pawh a rinhlelhawm zawk hial ang.
.
Beisei aia a harh that avangin ka lawm hlawm hle a, amah rawn kantu te ho pawh a lo chhawn ve thei reuh a. A damdawi lei turin dawmdawi dawr lam ka pan chuan ka thianpa call ka dawng a, ka result min rawn zawh chuan a chhuak tih pawh ka hriat loh thu ka lo hrilh a. Call chu ti tawpin ka han check a, vawiin ni zet chu beisei aiin engkim a kal tluang anih hi.. ka percentage tam lo mahse 1st class chu ka lo pha hram e. Ka damdawi lei tur poawh hre chang tawh lo chuan hmanhmawh takin ka tlan let vang vang a.. Dindini hrilh chu ka nghahhlelh ber a ni.
.
Pindan ka luh pah chuan..
'First ah..' ka sawi zawm thei tawh lo..
'Bawihi.. bawihte.. Dindin..' ka bengah chuan a ri mur mur a
'Ngatinge? nichin mai kha chuan a tha sia..' tiin ka hriat tawk lekin ka phun a. Ventilator Screen lam ka en a, a thaw a la tawp vek lo tih ka hriat chuan rang takin ka va inzep a..
.
'Bawihte.. Bawihte..' tiin ka kut ka chelh a, min chhang lo.. Ka khawvel chu a thim mup mai hian ka hria a ni.. Rawn meng tawh lo chuan a lu a bu nghauh a, chu chu min thlahna a ni ngei ang.. thawk la leh tur a awm ta lo. Ka hmangaih, ka enkawl kham ngai loh chuan min kalsan ta.
.
.
.
Lehkhabu dawrah lutin I Too Had a Love Story, Ravinder Singh ziah chu ka lei a. Chhiar leh chu ka zuam tawh lo mahse hepa dinhmun hi ka hriatthiampui a chutiang bawkin ani hian min hrethiam berin ka ngai ve tawp a ni. Kan inhmangaihna thawnthu, intawn chhoh dan leh inthen chhante inang lo mahse thihna kutvawtin kan hmangaihte ve ve min laksak si a. Lungleng taka engmah ti loa awm char char chuan chu lehkhabu chu ka keu leh thin, ka chhiar ngam ve chin zawng chu a thuhma nalh taka a ziah chu a ni a, chung thu hmang chuan ka awmdan diktak ani hian min phawrh sak chiang hle in ka hre bawk.
.
~Days pass by somhow
But night are a wagon of pain
Injuries may heal with time
But marks are always remain
Restless on my comfort bed
I toss and turn and try to sleep
But thought are bulking my head
And have formed a huge heap
The past is flashing its scortching lights beams
Tearing me apart, breaking me at the seams
The darkness of my life is more visible in the dark
And now I am trying to give it a voice, trying to speak my heart..~
.
>>>THE END<<<