MIDDLE OF NOWHERE

MIDDLE OF NOWHERE (1)
***RENGPUII GUITE***
.
.
'Nu, kan lo chhuak dawn chiah aw..' tiin Sumo-a thu ar ar pah chuan phone call-in ka nu chu ka bia a
'Awle.. chaw in ei hunah signal a awm chuan min lo bia la..'
'Umm.. ka lo bia ang che.. ka dah dawn..'
'Aw, tluang deuhin in rawn kal dawn nia..' tiin phone call chu kan ti tawp ta a.
.
.
Shillong khaw vawt vin tak hnuaiah Aizawl  pan tur Sumo seat a lai pheiah chuan ka thiannu te pahnih nen kan thu a, passenger pawh kan full nghe nghe bawk. Kan tlan tan tihah chuah hostel atanga kan chhuah hma deuh a ka ei Vertigon mum hnih chu a rawn thawk tan ti tih nghal mai a, ka meng tha thei ta thak lo. Ka bul chiaha thu tlangval pakhat lah chuan min be sek bawk a.
.
'Chuan, in vaiin Shillongah lehkha in zir a mi?' ka hne ru ve det! 'Ka tawng bah dan atangin ka mut a chhuak tih a hrethiam ve lo mi le' tih chu ka ngaihtuah a
'Umm ni e..' ka ti a
'Khawi College?'
'Shillong..'
'Shillong ah chuan khawi College?' Zaidam hi a va har thin em!
'Aw.. SHILLONG COLLEGE' ka vin deuh hrak a.. ka thiannu te pahnih chu an lo nui khur char char. Chu tih lai chuan kan thutna seat hnunglama thu chuan ka bula thu chu a rawn kheuh zeuh a..
'A mut a chhuak anih kha..'mipa aw hian a rawn ti a
'Nia, biak harh ka tum a..' ka bula thu in a tih chuan ka nui lui deuh tuar a
'Chutiang zawng zawk chuan maw?' ka'n ti chuai raih a, midang ho pawh chu an nui hak hak hlawm a.
.
'A harh hunah i titipui dawn nia..' nui deuh hek hek pah chuan seat hnunglam a mi chuan a rawn ti leh a, a fel hmel reuh zek.
'Aih, ka harh vekin ka hria..' ka ti a
'Damdawi i ei a mi?' hnunglam atang chuan a rawn ti leh a
'Um mum hnih lai..'
'Motor i rui a mi a?'
'Rui hran lo.. mahse ruih thut ka hlau a..' ka lo ti vat a
'Nih chuan i mut a chhuak leh vat mai ang, mum hnih lai i ei chuan..' a tih chuan ka bula thu ka thiannu chuan min rawn kheuh zeuh a, mitsir in kan thian pathum chuan  kan inmelh a kan nui ho vel sak, kan inman chak hlawm thin teh a!
.
Mut teuh tuma chuang e ti lo chuan ka muhil tha thei thak lo, chu pawh ka bula mi vang bawk.. a khal lian lutuk muhil ve khanglang chuan min delh hlum lo choh a ni. Kawng chanve pawh tlan hma in ka sil chhe vek dawnin ka hria, chaw ei tura din a han inzik mar chu ka chak tawh takzet. A rawn thle deuh bawih thin phei chu kei, pian tirh atanga kg 50 tling ngai reng reng lo tan chuan Pathian hian ruh hi ti khawp a khauh hian siam lo se tliah rawp na tham a tling ang.
.
Motor dingin ka muhil riai riai tur chu min ti harh a, Esi chuan min rawn sawi deuh pah chuan..
'I harh em?' a rawn ti a
'Umm.. chaw kan ei dawn mi?'
'Aw.. chhuak ila' a tih chuan ka chhuk ve mai a. Midang ho chu Sumo dinna zawn hotel-ah an lut sap sap a, keini erawh kan ei thanna Mizo dawr lam kan pan phei a.
.
'Ka na vek mawle.. ka thi thei mai dawn.. tun atangin a muhil nghal ania.. kawng a la thui si..' tap aw tiau chuan ka ti a
'Kan in thut thleng dawn a mi?' Engi'n a tih chuan ka inthlahrung si chu ka hnial ta tho a
.
'I thutna chu a hreawm viau a mi?' hnunglam chu kan hawi rual thap a
'Aaa.. aih..' ka sawi tur zawng zawng a bo vek!
'A lian ve em alawm..' tiin a nui a. A chhelo zek! Chu zawng ai chuan a pa tawp! Ka insum thei lehpek lo chuan Es-i mawng ka va piai zeuh, ani a lo au thawt.. kan in en a kan nui ta vak vak hlawm a..
.
..
'A va za awm ve..' a rawn ti a
'Niaa.. chaw i ei dawn mi?' nuih insum ru tak chuan ka ti a
'Aw.. heta an siam hi tui ka tia..' a tih chuan kan ei na tur chu kan thleng a, kan lut tlang nghal a..
.
'Kan table rawn zawm ve la' Engi'n a tih chuan min chhang lem lo, a tum sa reng a ang zawk mah. Kan chawhmeh duhzawng kan sawi hnu chuan order rawn thlen kan nghak tlang a..
'Shillong ah i awm ve mi?' ka ti a
'Aih.. Guwahati ah.. hetah chhungte ka rawn tlawh kual a..'
'Nih chu.. chhungte tlawh kual hun lai tak..' ka'n ti ve ngawt a.. inlak puitlin tum tak chuan ka han chhang a.
'I thiante hi i awmpui te a mi?'
'Aw.. Esther-i leh Engi an nih hi.. ka hostel mate te an nia.. E i hming pawh min la hrilh lo..' ka ti a
'Hmingmuana.. Muana tihin min ko dawn nia.. nangpawh i thiante hming i sawi a i duhtawk ringawt aa..' a tih chuan ka nui hak a..
'Awi.. ka lo ngaihtuah lo reng reng.. Rengpuii.. 'Rp' tiin min ko' tiin engmah ngaihtuah lem lo chuan ka kut chu ka va pe ringawt a, awmze hriat loh hmel tak chuan mi a en kual a
'Oh.. Chibai!' a rawn ti a, a kut a rawn lek dawn chuan ka kut ka lo dah thla hman chiah.. ka awmdan han laklawh zia chu!
'Aaa.. ngai lo.. Introduction ka pek hian in chibai tur maw ka ti ringawt zel..' bah nuai chuan ka ti a.. ka zak lutuk chu ka sa pup pupin ka hria
'A ho lutuk.. kan la in chibai lo hrim hrim alawm.. khawi in chibai ang u..' tiin a kut min rawn pe leh a ka zak lutuk chu ka zawi vek theiin ka hria.
.
.
Sumo a kan let leh chuan a hnung a thu tur mi pathum chu an lo thu fel at tawh a..
'Nangmah chiah i la lut lo..' tiin chuan ka nuih zeuh a, ka mitah tak min en in a nui ve suk a, 'a van hmeltha tak' han tih vak tur chu a ni lo mahse a hmuhnawm thlawt a ni.
'Khawnge Sena kha?' a ti a
'Tunge chu chu?' ka lo ti vat a
'I bula thu kha.. E saw a lo kal, lut rawh.. i thiante pawh an lut tawh..' tiin ka bula thu lo phei chu a va bia a. An lo phei chuan Sena zawk chu seat hnunglamah a rawn inthawlh that a, mak ti takin kan thianho chuan kan inmelh hrek hrek a.. Driver motor-a a rawn luh rual chiah chuan Muana pawh chu rawn lutin ka bulah a rawn thu that a..
'Hreawm em tikhan?' min nui zeuh pah chuan a ti a
'Aih.. i thianpa khian a duh mi?' inthlahrung tak chuan ka ti a
'Aw anih khi.. a harsa hleinem..' a ti a
'A ho lutuk Mami.. helama kan thiante hi kan delh ve tawh nge.' hnunglam atanga a rawn tih chuan kan nui nasa hlawm hle a.
.
A hma ai thlawt chuan a nuam chiang teh e! Mahse, chet fuh loh hlau a ka inveng reng erawh chuan nuam takin min chuan tir thei lo. Ka muhil turin ka lo nghen deuh chuan ka harh velah ka han thu ngil leh awt thin a..
'A pawi lo.. a pawi lo' ti mahse ka nghen inthlahrung tho tho..
'A hreawm em?'
'I muhil tha thei em?' a khat tawkin min zawt reng a, ka thiante pahnih lah chuan min rawn signal reng bawk a.. nuam ru reuh phian.
.
.
Kan thianho chuan kan muhil a, Muana erawh driver nen an titi char char a. Ka harh chang chuan meng lem loin an thusawi chu ka ngaithla a,  a hmel leh pian velah chuan kan inrual reng anga mahse a kum phu loin a puitlin hmel zek. Hmeichhe ngaihtuahna thui lem lo ka ni chung hian hetiang ang mipa hian ka mit an la ber zel thung a. 'Ka phone no.min dil angem le?' tih ngawt ah ka rilru a lo buai, mahse ka ring chiah si lo.. engvangin nge vawikhat a sumo chuanpui mai mai number a dil ngawt ang ni, mipa pangai tih a tan chuan a mawi vak bik lo alawm.
.
.
Mizoram kan luh hnu chuan ka muhil ta bik loa, kan titi chho deuh mial mial a. Thingpui in turin midang ho chu an chhuak a, kei, Muana leh kan hma a thu pakhat erawh kan chhuk ve peih loa..
'Khawi vengah nge in awm?' Muana chuan a ti a
'Chanmari ah.. nang?'
'Kulikawn ah.. lo la leng ta che u..'
'Nia, Krismas hmang turin a mi i haw dawn a? ka ti a
'Aw.. nangpawh i ni ve tho ang ti raw..'
'Umm ni e.. enge i zir a?'
'BSW 6th sem.. nang?'
'BBA 6th sem.. i van fel mipa BSW zir an tam loh nen' ka ti a
'Ka tana tha ber tur ania..'
'Nimaw.. i tuina mi?'
'Aw ni e.. bakah keimah ang ho tana ka la tangkai ve theihna tur ania..' a ti a
'Enge nangmah ang?'
'Fahrah enkawlna tangin lawm ka seilen..' a tih chuan sawi tur ber pawh ka hre lo.
'I van fel..' ka ti ta ringawt a
'Felna awm lo..'
'Chuan tunah tu bulah nge i awm?' inthlahrung tak chuan ka'n zawt ringawt a
'Kan Home enkawltu te inah.. Home ah chuan ka awm tawh loa'
'An van fel em em.. ihh i no.min lo pe' zak thei lo chu ka in ti ve reng mahse min dil loh ka hlau em a ni.
.
.
'A no. ka nei..' kan thiante bulah chuan ka ti a
'Che rang ve.. Eddiea'n a hria nge..'
'Ho ee.. kan inthen tawh a, a thu thu a ka awmna chhan tur ka hre lo..
'An tiah.. rawn bia che se i chhang tha leh duai tho ang..'
'Ngaihzawng ka neih loh vang mai mai lawm..' ka ti a
'I bem ngam dawn a mi.. a hmeichhe mi loh hmel ropui si..'
'Ka inbem tir ang..'
'I thei leh mai ang.. i duhna ah chuan i zei haw hawr e!!..' sawi dik ka ti lutuk chu ka nuih vak vak a.
.
Midang hmuh a lerh hmel tak anga ka lang hi a awm lo hran lo. Ngaihzawng ka neih loh lai hi chuan mi tam thei ang ber hi ka bia anga mahse ka nei ve anih chuan ka rilru zawng zawng ka pe a, ka serious hle bawk thin. Eddie tih loh hi high school ka kal laiin pakhat ka nei ve a, a awmze hriat hma tak tak anih avangin ka duh em em ka hre lo nangin kum hnih chu kan ni tling ve der a ni. Sawma nen kan inthen hnu ah kum khat chuang nei loin ka awm char char a, lerh erawh ka lerh hle thung. Eddie nen kan inngaihzawn hnu chuan midang tumah ka be ngai loa amah ah ka bur chawt thin. Mahse, hmun hrana awm ve ve kan nih vang leh lerh chi a lo ni bawk nen kan inngaidam zing malh malh hle a, a tawpah chuan ka thei ta ngang loa ka then ta a ni.
.
.
'Nu Kulikawnah fahrah awmna In a awm a mi?' chaw ei mial mial pah chuan ka ti a
'Ngatan?' ka pa chuan a ti a
'Thian ka nei a..'
'Engtin nge chu lai a mi daih daih thian i neih theih a?'
'Sumo ah kan lo chuang ho a.. Krismas present ah enge maw pe ve ila tha in ti lo a mi?'
'Nia.. a tha khawp ang.. kan ngaihtuah dawn nia..' ka nu in a tih chuan ka nui vur vur a.
.
Hmanhmawh tawkin room ah ka lut a.. text na chhan tur tha lutuk ka nei chu ka hlim thlawt! Ka nu te chuan engmah la sawi chiang lo mahse kei, an fa neihchhunin ka tih luih phawt chuan kan ti ngei dawn tih ka hriat avangin ka phone ka la a.. ka text tur ringawt te chu za tak ka ni!
.
'Kan chhungkua in lo tlawh che u kan tum a..' tih ka va thawn a..
'Tunge aw?' a rawn ti a. Ka van a tak, ka no. a la nei lo tih ka lo hre chang lehpek lo
'Rpi..'
'Ehe.. Rp, i tha maw?'
'Umm tha e.. nang zawk?'
'Aw.. ka tha lawm.. naupang ho nen kawt vel kan tifai a..' a rawn ti a
'Nuam aawm.. i buai a mi?'
'Aih buai lo.. ka enpui a hei..' tiin thlalak a rawn thawn a. A thlalak rawn thawn te chu ka zoom kual nasa mai a
'Ka van kal ve chak..' ka va ti a
'Lo kal ve ta che..'
'Min lo hruai la..'
'Ka rawn hruai tak tak dawn che mawni..'
.
.
Nitin, zantin ka intext ta char char a.. ka ngaina telh telh bawk. Ka beisei ang chiahin belhchian a dawl a, hai rual loin rilru tha tak a nei tih a hriat bawk. A chang chuan ka ti mah mah em aw tiin ka inngaihtuah thin a, mahse keimah zawkin hetia ka biak loh chuan engtik ah mah bul a tan dawn lo tih ka hrechiang ve thawkhat in ka hria. Ka beisei san ngam loh vang nge kan kal chak mah mah ten ka hria a, ka bialpa ang mai ten ka hre thin. Mahse, inbe tam viau e ti lo chuan hmuh erawh kan la inhmu leh ta miah loa, chhuahpui chu ka chak thin mahse a dinhmun ka enpuiin ka sawm ngam thin tlat lo a ni.
.
'Khawilai ah tak nge in awm?' a tih a message ka dawn chu rang takin ka chhang a
'Tinge? i lo leng dawn a mi?'
'Zawhna min zawt leh hlauh zel suh..' tih a chhanna ka hmuh chuan ka nui hak a. Kan awmna chiang takin ka hrilh a, ani chuan chawhnu lama a lo kal tur thu min hrilh ta a.
.
Ka nu leh pate an chhuah avangin keimah chiahin inah ka awm a. Nidanga in hnawk ngaithei em em khan fai thei ang bera chhuah tumin ka phi deuh sek a, a khat tawkin darthlalangah ka va in en leh rih thin. Ka awmdan chu Muana ngei pawn rawn hmu se 'em em a' a tih hial ka ring a ni.
.
A hmel ka hmuh loh rei tawh vang nge ka hmu tha lutuk tlat. A sam, kan haw zana a siam lem loh te chu uluk takin a ti phir tawh a, a lang pa lehzual! A jumper dum fai tak hnuaia a T-Shirt var hak te, a jeans kekawr hak leh a sneaker bun te chu ani ang ft.6 hawl pha thuak, mipa cher lam ka duhzawng a nihna zawng zawng nen chuan a inhmeh vel vek. Nui sangin ka lo chhawn a, ani pawn min hmu chua  lawm hmel ve viau chuan ka hria..
.
'I cher deuhin ka hria..' a ti a
'Awihawm loh.. kar hnih pawh a la tling lo' nui pah chuan ka ti a
'A ni lawm..'
'Khami zan kha chuan a vawt lutuk kha ka inhak thuah teuh a..haha'
'A ni maithei ni.. khawnge i nu leh i pa te?'
'An bazar a..'
'Keipawh ka pa hruai a ngai a haw pahin ka rei hman lo..' a ti a
'Hm.. khawnge i pa a kal?'
'Saw tah.. i hre loang.. khi khi i tetlai a mi' tiin banga kan tar ka kum khat tlin champha a ka thlalak frame a kan tar chu a kawk a..
'Aw.. ka chum i ti em?' ka ti a
'Um chum buan buan khawp mai.. engtik nge i birthday?'
'September 10, 1995..'
'Tak tak maw?' mak tih hmel zet chuan a ti a
'Um ni e.. ngatinge?'
'A inang chian chiah.. birthday, month, year..' a tih chuan ka phur ngang mai..
'Na.. a awihawm loh..' ka'n ti hram a
'A ni.. hei en la..' tiin a driving lisence leh a voters ID te chu min hmuh a..
'Haha.. i hmel hii, ro rip rep tawp' tiin a thlalak chu ka kawk a, ka nuih vak vak a..
'Rawn la rawh..' tiin a la ta daih a, keichuan ka lo chuh tawk tawk a.. Ani chuan ka dar lehlam lehlam ah nghet zetin a rawn chelh thut a, ka mitah tak min en a, ka lungphu a rawn rang nghal..
.
'Enge?' ka ti a
'Ngaihzawng i nei lo tak tak em?'
'Um.. ka sawi zin em kha..'
'I lerh tih ka hre thei i awmdan atang hian..' a tih chuan ka ngawi kar a, min en reng vang chuan chunglam ka melh ran a..
'Ka lerh lo..' ka ti a
'I chiang em?'
'Umm..' ka lungphu hian min nghawr dawt dawt hi a ni ber! Chuan, a chezia vang chuan ka a lo chauh bawk.
.
.
Min chelhna chu thlah in min nuih suk a ka lo ner khum nawng chuan nuihzat hmel takin hmun dang a hawi daih a..
'Engtik nge i chhuk leh dawn?' ka zahzel chuan ka ti a
'Chhuk hma a ngai dawn a.. nang?'
'Keichu february ah daih niang..'ka ti a
'Chhuk rual ka chak nen..'
'Keipawh.. i bulah ka chhuk thei dawn si loa.. apa in min hruai loh chuan flight in ka chhuk daih ang..' ka ti a
'Chuan?' hriatthiam hmel zet hian min en a
'Enge?' ka ti ha a
'I lo peng anga..'
'Shillong thleng min thlah dawn loh chuan ka duh lo..' ka ti a
'I lo pen phawt chuan..'
'Naa.. ka duh leh lo..' ka ti a
'Enge?'
'Chutiang hmeichhia ka ni lo..' nui pah deuh chuan ka ti a
'Enga? i van ngai dam awm em em..' a ti a
'Nilo.. mahni bialpa pawh nilo vanga cham kual thin hmeichhia ka nilo ka tihna lawm..' ka ti a
'Huh.. ka bialnu i ni lo mi?' amah en thei tur chuan min kuai her a
'Engtikah?'
'Tunah pawh..'
'Van a tak..' tih in ka chhang a
'Engtin nge ka tih dawn sawi la'
'Teuh loee mipa i nih kha..'
'Umm nih Rp..'
'Umm sawi rawh..'
'Tikhan lo ti lo laa..'
'Engee?'
'Sawi rawh i ti kher a' a tih chuan ka nuih vak vak a
'Aw nih a bul tangin'
'Rp'
'Umm' ka nui chhuak leh vak a
'I duh lo nih kha..' tiin a tho nawlh a.. a banah ka chelh vat a
'I thinchhe lutuk thu rawh..'tih pahin ka pawt thu a..
'Min tinui zel a..'
'Ka tinui tawh loang che.. thingpui ka'n siam ang aw..' tiin ka tho ta a
.
.
Khi vur vur chungin thingpui chu ka chawk a, ka awmdan chu a lungawithlak hliah hliah hian ka hria a ni. Tray ah thingpui dah a chawi ka tum lai tak chuan ka hnung atangin ka darah chelhtu an awm tih ka hre vat a, nui seih chungin ka hawi let a.
'Rp.. i bialpa nih ka duh..'
'Phal a ni e..' nui hak pah chuan ka ti a
'Pangai rawh.. Min duh em?' chhang lo chuan amah chu ka en reng a.. 'Hey..'
'Aw ka duh..' ka ti a
'Thingpui kha dah phawt teh..' a tih chuan ka nui hak a, ka han dah leh te te phawt a. A hma a ding chuan ka chhoh en vah a, a nui hmel han that zia chu sawifiah ngaihna  a awmin ka hre lo hial zawk a ni. Ani chuan min kuah a, a hahdamthlak piah lam a ni!
.
.
Kan chhungkua a hnuchham In tlawh kan tum ni a lo thlen chuan ka phur ngang mai. Kan thil ken sak tur ho chu ka siam fel sawk sawk a, ka pa Car te nen lam ka hru fai vek bawk a. Ka helhhawlh lutuk vangin chaw ei te chu ka siam thlap a, chaw ei ka siam lai chuan ka nu chu pindan atangin a rawn chhuak a..
'Bawihte kan theihnghilh daih..'
'Engmaw?'
'I pa checkup ni alawm..' a ti a
'Naa.. Muana ka hrilh vek tawh asin..' tap aw tuau chuan ka ti a
'I U Sangtea ka call anga, in pahnihin kal mai ula a tha angem?'
'Kan chhungkua a kal ka duh a sin nu..'
'Nidang kan nghah a ngai dawn a..'
'Hun hmanpui ka intiam tawh a.. naupangho bulah nilengin kan awm thei ang ka lo tia..' ka ti a
'Anih chuan in kal ngei ngei a ngai anih chu.. I U Sangtea kan call ange..' tiin an pindan lam a pan a.
.
Ka pa Carin ka cousin U Sangtea nen kan kal a, Muana an inah amah kan lam phawt a, an in atanga hla lo te a hnuchham In lam kan pan ho leh a. Mimal din ah chuan ka rin ai daihin a phuisuiin a hmun pawh a nuam reuh hle.
.
'Ngatinge i ngui hmel e..'Muana chuan a ti a
'Anu te an lo tel ve thei ang ka ti sia..'
'A ho lutuk.. nuam i tih loh chuan a nuam miah lo nia..'
'Nuam ka ti lutuk.. i nu leh pate an fakawm e..' ka ti a
'Nia an fel ti raw.. nakinah chuan heng hi keima kut vek a la ni dawn a..' a ti a
'I huphurh em?'
'Teuh lo lutuk.. a ropui ka ti..' a nui suk a
'Nia.. nangpawh i ropui..'
'Ti ve ziah..'
'Nge ania lawmm..'
'In ti lawmawm e.. hengte in rawn keng teuh a..' a ti a
'Na.. engmah a nih loh hi.. Chuan maw, heng naupangte hi engtin nge an awm zel dawn?'
'Kum 15 an tlin thleng ang hi an awm tlangpui a.. chumi hnu a an awm chhoh zel dan tur chu ka pa in a ngaihtuah fel pui vek thin.. Heta an awm chhung hian lehkha an zir a, thil hrang hrang an zir bawk a.' a ti a
'Nang ve?'
'Midang ho hi chuan chhungte an la nei a, an retheih vang te emaw a rawn awm an ni a.. he ta tanga an chhuah hian mi inah emaw an inhlawh a.. keichu ka chhungte takngial pawh ka hre loa. Chhungte hnena let tawh lo tur ang hi chu mite pawn fa a tan an rawn la thin a, kei kha chu tuman min duh lo aniang.. chuan ka pa hian min khawngaih a.. fa an nei thei lo bawk nen min la ta tawp a..'
'I tap thin em?' ka ti sep a
'Mipa ka nih hi..' tiin ka darah chuan a rawn kuah a
'I hlawhtling ngei ngei ang..'
'Haw lamah rawn peng ula.. ka pa in a hmu ve duh che a..' a ti a
'Mahse ka zak..'
'I zak hlawl lo..' a tih chuan ka nui hak a..
.
.
'Nu.. Pa hei Rengpuii.. chuan ka nu leh ka pa..' Muana'n a tih chuan kan in chibai a..
'I van hmeltha ve a Rengpui..' Muana nu in a tih chuan ka lai ti tih deuh a chhan mai na chang pawh ka hre lo..
'Nu an awm rei hman loa.. pawnah a u in motorah a nghak a..'
'Awi Bawiha.. lo hawi rual teh u..' a tih chuan Muana nen chuan mak ti hmel takin kan in en a, a nu chu kan en ve leh a
'Enge Nu..' Muana chuan a ti a
'I hmaifang a va han inang em em ve..' a nu chuan a ti a
'Maw?' tiin Muana nen chuan kan in en a
'Mama Pa.. en teh..'
'Ka hmuh tirh phat khan inang ka ti nghal alawm..' Muana Pa chuan a lo ti ve leh a, keini ho chu kan nui kan nui hlawm a..
.
.
Darthlalangah ka in en a ka sam chu ka tawn pial vek a.. an sawi kha a dik chiah, kan hmaifang a inang lutuk tlat.. ka ngaihtuah a ka nui ka nui mai. Ka thiante hnenah kan inang leh an loh ka zawt deuh chhen hlawm a, thenin ang min ti a thenkhat erawh chuan 'awihawm loh lutuk..' tih ten min chhang hlawm a.. mahse Muana nu leh Pa berin ang min ti tho alawm le ti a inngaihtuahin ka hlimpui em em a ni.

MIDDLE OF NOWHERE (2)
***RENGPUII GUITE***.
.
.
Krismas hun kan hmang chho a, kei hman em em mah ila Muana erawh chu a buai thei hle thung. A chhuk hma a ka nu leh pa hmuh tir ve hrim hrim ka duh nen rawn len pawh a hman meuh lo. Pangai taka sawm ka duh laiin kan inngaihzawnna a la rei loh em avang chuan tul viau in ka hre chuang loa, a bulah pawh ka sawi duh ta chuang lem lo a.
.
Eddie pawh Krismas hmang turin a rawn haw ve tho a, kan in lamah rawn tal a tum leh viau. Keichuan inbiak tawh lo ka duh thu ka hrilh a, mahse ngatan mah a ngai lo.. ani nen kan inthen hnu a ngaihzawng ka nei leh tak loh avang hian a duh duh hunah hian a ta angah min ngai a, han hnial vak ngaihna ka lo hre lo bawk nen ngaiah a nei ni ber in ka hria.
.
'Bialpa ka nei tawh..' tiin message ka thawn a
'Dawt min hrilh chu tum buai duh lo mai teh..'
'Dawt ka sawi lo hmela..'
'Ti khan min ko lo mai teh aw..' inla pa ve sia a
'Enge?'
'A no.min lo pe teh anih chuan..' a van zam lo ham ham tak..
'Nangmah ang a ni lo.. hetiang ang buaina ah a inrawlh peih lo..' ka va tih chuan a thinrim hle aniang a rawn call nghal a, mahse ka chhang duh lo thung.
.
December ni 30 ah chuan Muana nen kan chhuak dun ve a, a jacket tur enpuiin MC ah kan bazar a..
.
'Kum tharah Sihphirah kan chho maithei..' a rawn ti a
'Ngatan?'
'Inpui ber ania.. ka pu in ka chhuk hma awm chho turin min duh a..'
'I pa pa maw?'
'Aw nie..'
'Nih chuan kan inah chaw vawikhat tal lo ei la..' ka ti a
'Hun a awm tawh awm loe mate.. kumhlui ni leh kumthar ni chu chhungkaw kima chaw ei ngei ngei a ngai dawn aa'
'Vawiin ah.. a nu leh a pa pawh i la hmu lo..'
'A inthlahrunawm alawm sawi lawk loh te chu..'
'Ngai lo.. anu ka call dawn..' tiin ka phone chu ka phawrh a, anu chu call tumin ka phone chu ka hmet a
'Ngai lo tak tak.. ka nu te pawh ka la dil loh hi..'
'Tikhan lo sawi ve mai rawh..' tiin anu chu ka biak san ta a..
.
Hi Five ah thil ei turin kan phei a, order siam tumin menu chu ka en a..
'Enge i ei ang.. drinks i duh phawt em?' a ti a
'Aw.. mahse caffein tel lo aw..' ka ti a
'Ngatinge?'
'Ka allergy..'
'Keipawh..'a rawn tih chuan ka nui vur vur a
'Engtin nge i awm thin i allergy chuan' ka ti a
'Ka tha zawi vek zel..' nui chungin a ti a
'Keipawh.. mahse in tur vang thei tuk a.. lassi hi in mai ang..'
'Chuan.. i ei tur?'
'Chow egg toping.. nang?'
'Chicken noodle soup..' a ti a
.
Eitur a lo thlen chuan kan ei tan nghal a.. ka artui ei tur chuan ka thian melh melh a..
'Enge khatia i khalh vak vak a.. ei ta che' a ti a
'A chhungmu ka duh lo.. i duh em?' ka ti a
'Aih... ka ei ngai lo..'
'Naa.. tinge kan inan em em a?' ka ti a
'Phir kan ni niang..'
'Haha.. dik chiah.. i nu te pawn inang min tih kha..' ka ti a
'Kan birthday a inang bawk a..'
'Kan duh leh duh loh zawng pawh..'
'Soul mates..' tiin a rawn phun sep a..
.
A jacket hual zinga a duh ve ber awmna dawrah kan lut leh a, a han ha chhin leh te te a..
'Hei ngei hei hi..' tiin jacket pahnih chu a rawn pharh a
'Ka hre lo.. i duh zawk zawk nimai..'
'Na.. rawn tlak loh ve a..
'I inhmeh lawm.. i hmeltha a, i pian a nalh bawk a.. i inhmeh vel vek' ka tih chuan dawr neitu te chu an nui hak hak a..
'Min tih laih a tum ve khanglang..' a tih chuan ka nuih vak vak a
'Hei hi ka duh zawk..' tiin pakhat chu ka la a
'Nih chuan min lo pack aw..' tiin dawr neitu te hnenah chuan a pe a..
.
A banah chelhin pawn lam kan pan a, a bula kal chu ka inchhuang ru veng veng mai. Ka hmuh tira hmeltha lem lo pa taka ka hriat na ringawt te chu bo in hmeltha, pian nalh leh pa tiin ka vei veng veng hi a ni tawp tawh. Kal na tur dang kan neih tawh loh avangin a bike parkna lamah kan phei a, chutih lai chuan hnung lam atanga min lo ko tu an awm vangin kan hawi let a..
.
Eddie! Kan lam a rawn pan zel a, ani hmuh hi ka peih loh nen engvang kher kher a min lo hmu hman nge maw a nih le..
'Hei hi mi i sawi chu?' a tih chuan ka lu ka bu nghauh a
'Tha maw thianpa Eddie ka nia..' tiin Muana chu chibai tumin a kut a pe a
'Um tha lawm.. i tha zawk maw?'
'Aw.. hmanzan ah ka va biakin chas ka nei a tia.. ka lo awih sak loa..' nui chung chuan a tia, ka lo ngei ru lutuk ringawt
'Kan kal mai ang Eddie.. kan hmanhmawh a..' ka ti a, Muana chu ka kai hrang ta a.
.
'Tunge a?' a ti a
'Ka thianpa..'
'A ni lo..'
'Hmm.. enge?'
'Thudik sawi mai la..' thutak tih hriat tak chuan a ti a
'Ka ex..'
'Khatia sawi kha a har a mi? thil ho te ah pawh dawt min hrilh i hreh loh te chuan engtin nge ka rin theih ang che..' a tih chuan chhan pawh ka chhang lo, a bike hnugah chuan ka lawn kai a.. kan in lam panin kan phei ta a..
.
Kan inphurh chhung zawng chuan kan la inbe miah lo. Kha Eddiea hre hraw ka huat zia kha!!
'I thinrim elaw..' kan in kan thlen dawn tepah chuan a rawn ti a
'Aih.. rimna chhan tur awm lo..'
'Nge vei veng veng i nei zawk a mi?' ngeiawm deuh hian a rawn ti a
'Tunge vei se min tih?'
'Ka hre nang.. i vei leh zel turah thu na ka nei a mi?'
'I tawngthei zit zet e a..' tiin bike atang chuan ka chhuk a.. ka pen hlawk hlawk bawk a
.
'Min luh san dawn maw? ka haw lehnghal dawn ania..' a rawn tih chuan chaw a lo ei dawn tih ka hrechhuak chiah.. Hreh tak chungin ka va let leh hna hna a
'Lo lut rawh..' ka ti a
'Nui phawt la..' ka mita min en kalh pah chuan a ti a
'A tul kher lo..'
'I nuih loh chuan ka lo lut dawn lo..'
'Nih heiiiii..' tiin ka nui lui sunngg a
'I chhe lutuk tikhan nui tawh suh..' tih pah chuan ka kawngah a rawn kuah a kan lut ta a..
.
.
Ka nu leh pate nen an titi lai chuan choka lamah kan awmpui U Bawihi ka pui a..
'In inang e.. inang in in ti ve em?' U Bawihi chuan a ti a
'A chang chuan darthlalanga ka in en te hian a hmel hi ka hmu leh thut zelin ka hria mahse ti mai hi chuan kan inan em em na ka hre lo..' ka ti a
'A chhelo tho lawm..' a tih chuan kan nui dun hak a
'Nia.. a tha thlawt..hihi'
'Kha thingpui hi va pe rawh' a tih chuan common room lamah ka chawi phei a
.
.
'Ka pu hian a enkawl tan a.. ka pi a boral hnu hian ka pa kutah hian hlan a ni a.. an bulah tak hi chuan kum li bak ka la awm lo. Ka pu hian mi hi a duhsak a, a bulah ka tal chawt zawk a.. mahse ka nu leh pate'n fa an neih theih tak loah chuan inpui ah ka patea ten ka pu an enkawltu tho sia ka pa te bulah hian ka awm thla ta a..' Muana chuan a lo ti mek a
'Chuan hnuchham In saw i kutah a awm dawn tihna a mi?' ka nu chuan a ti a
'Aw.. mahse hei ka zirlai nen a inkaih hnawih bawk nen mimal ang ngawr ngawr chuan ka kalpui loang.. tun ai chuan tanpuina sum pawh kan hai luh tam theih ka ring deuh a..'
'Mamte kum inang theuh theuh ah thluak a va inan loh theih ve ti raw..' ka pa chuan nui hauh hauh chuan a ti a, keichu ka lo ner nawng a
'A fel lutuk alawm ani pawh a thinchhe deuh tih mai loh chu..' Muana chuan a lo ti a
'Nu kan birthday a inang a sin..' ka lo ti vat a
'A ni maw..' ka nu chuan a ti a
'Birthday tih ah.. hnuchham In a naupang te hi kan pianni dik tak hre lo kan tam a.. kan luh ni kha kan pianni atan te min vuah sak a, keichu ka pian hlim ang deuh thaw ah dah luh ka ni tih chiah ka hria..' Muana chuan a rawn ti a
'Naa thi dang sawi ru..' ka lo ti a
'Nia.. kan lo sawipui deuh duah che a.. anih pianpui unau i nei em?' ka nu chuan a rawn ti a
'Nu thil dang sawi kan tum kha..'
'A pawi lo.. ka luh ni khan nausen pathum kan lut tih an sawi chiah ka hria.. pahnih chu an chhungte in an la nge an adopt ka va hriatpui tawh chiah lo..' a tih chuan ka khawngaih hle a..
'Ka room i hmu duh em?' boruak thlak tum chuan ka han ti a
'Aw pawi lo..' a lo ti vat a
'Nie a room kha a chei ve nasa nia va enpui rawh..' ka pa chuan a lo ti a
.
.
'Hei hi khuta tanga ka hawn ania.. nalh em?' tiin ka thil chei chu ka kawk kual a, ani chuan min chhang miah lo. Ka hnung lam atanga a rawn kuah chuan a kutah ka lo chelh vat a..
'Ka ngai che..' a ti a
'Ka awm reng hi..'
'Mahse ka ngai che lawm..'
'Tihpalh aw.. ka nu te khan sawi awm leh awm loh pawh an hre loa..' ka tih chuan a lam hawi turin min kuai her a
'Aih.. thinlung taka min welcome ve tu te bula ka awm vang hian ka awmdan hi a dang vekin ka hria..' a ti a
'Nia.. i ngaihtuah let chuan a na ngawt ang..'
'Kum naupang te ka ni a.. mi chu an chhungte emaw an mahni enkawl thei tu ten an rawn hruaichhuak fova.. khang ang ka hmuh te khan ka khumah mu in ka tap ve fo thin..' a tih chuan ka hnuk a lo ulh ti tih a
'Mahse i pu leh i pate vangin chhungkaw nuamsa tak bulah i chen theih phah alawm..' ka ti a
'Nia.. ti raw.. fa an neih theih tawh loh te hi an tan chuan natna ni mahse ka tan chuan malsawmna a ni ringawt..'
'Keipawh unau neih ka chak ve lutuk..' ka ti a
'I nu in a nei thei tawh lomi?'
'Um.. keimah chiah min nei thei tih an sawi a.. keipawh kum sawm an inneih hnuah chiah lawm min neih' ka ti a
'Sawi tawh loang i tap dawn.. nui rawh le...'
'Hihiiii..' tiin a duh loh ang deuh chuan ka nuih khum a..
'I van chhe tak..' a tih chuan kan nui dun vak vak a..
.
.
Muana haw hnu chuan ka nu te room hnawk zual ka tih fai sak a, ka ngaihbel nge mawni an awmdan a danglam tlat a hriatna ka nei.. thu dun reng si leh kei ka awm ve hi chuan kan ri hlut zel thin ani sia tun tum erawh an ngawi dun kar a.. Ka tih fai zawh chuan pindan chu chhuahsan mai ka tum a mahse ka pa in min ko let a..
.
'Bawihi lo thu lawk teh..' a tih chuan ka va thu ve mai a
'Enge a?'
'Naupang chhia in ni tawh loa.. i rualpui te phei chu puitling tak tak an tam a.. nang hi i naute rei em em zawk a..' ka pa chuan a han ti leh tan a
'Point ah lut..'
'Tikhan i pa lo ti ziah suh..' ka nu chuan a lo ti a
'Aw anih a point ah kan lut nghal ang..' ka pa chuan a ti a
'Umm..' nui vur vur chuan ka lo ti a
'Muana nen hian inzui tam lo ula ka duh..' mak ka ti lutuk chu ka pa chu phawk takin ka en reng a
'Ni e.. i theih anga rangin tawpsan tum rawh..' ka nu chuan a ti a
'A chhan enge?' ka ti a
'Inzui tawh lo ula nimai..' ka nu chuan a ti a
'Nu.. engtin nge tikhan i tih theih zawk..'
'I tana tha tur chu kan hria..'
'A chhan enge? a future vang maw?' ka ti tuar a
'Nang pawn chu i hmu thiam mai alawm..'
'Eddiea mi hausa fapa duat sual future bright lo lutuk pawh in sawisel ngai lo..' ka ti a
'Ani ah khan i nghet ngai hleinem..'
'Chutia future buaipui turin kan innei ngei dawn tih na pawh nilo..' tiin ka tho a chhuah pah chuan kawngka chu ka khar ri sawk a..
.
Ka pindanah ka lut a ka tawt vekin ka hria. Ka nu leh pate hi hetiang mi hi an ni lo asin, ka thiante ah pawh engang mize pu pawh lo lawm thei zel an ni a.. chu tih laiin Muana, mi puitling tur tih hriat tak.. fel em em an ngeih lo chu mak ka ti a, chu chuan min ti na hle bawk..
'Chhan a awm ngei ngei ang..' tiin ka inngaihtuah a mahse chhan awm tur ka hre miah lo. Tuna ka ngaihtuah danah chuan Muana hi engti kawng zawng pawn thlah ka tum lo bur! Ka thlah ngai bawk hek loang.
.
.
Ni 31 zingah chuan tukthuan ei tur pawn ka tho chhuak duh loa, ka nu leh ka pate chu ka pindanah an rawn in luh chhawk chhen bawk a..
.
'Tho chhuak rawh.. i pi te an rawn phei dawn ania..' ka pa in a rawn ti a.. chhan pawh tum loin ka la mu char char a
'Anih leh Hmingmuana no. min rawn pa teh..' a tih chuan ka inperh tho chiang hle
'I ti mah mah pa..'
'Enge ka tih tum pawh i hre ngawt a mi?'
'Enge?'
'Hetah chaw lo ei phei leh rawh se..' a ti a
'Chuan nizan a min hrilh ang kha i sawi anga..'
'Ni loe.. i puitling chho anga i hrethiam mai ang..' a ti a
'Tikhan min ti ve ziah suh..'
'Tho rawh..'
'Aih..'
'Khawi i phone lo la teh..' tih pah chuan ka phone chu a la a, a pheipui ta daih a.
.
Ka rilru na lutuk chu ka tap char char.. Ka chhungte hian min duat sual tih chu kei min hrechiangtu apiang chuan an hria a, ka duh apiang min pe thin tih phei chu kei hian ka hre chiang hle a ni. Mahse, ngatinge ani hi min duhpui tlat loh ka hrethiam lo takzet a ni. Thian ang chiah a inkawm ngeih kan ni a, engmah kan inkarah han thup kan nei ngaiin ka hre lo mahse tuna an awmdan hi chu mihrang kan ang tlat a hriatna ka nei a ni.
.
.
Tlai thleng ka mu char char a, ka chhungte an chhuak tih U Bawihi'n min rawn hrilh chuan ka tho a ka inbual nghal a. Ka phone awmna a hriat leh hriat loh ka zawh chuan a hriat loh thu min hrilh a, chu chuan ka thin a ti rim zual. Ka inbual zawh velah chuan engmah pawh ei lem lo chuan ka mu leh ta daih a.
.
Pindanah api leh apu an lo lut a, engmah pawh sawi thei loin ka'n lo tah khum nghal hrep a, chaw ei turin min ti a mahse ka ei duh chuang loa. Chaw ei kham hnu awm ang velah chuan ka pindan a mi lo lut thawm ka hria a, apu anih ka ring a.. en pawh ka lo tum lem loa..
.
'Hey tho rawh..' ka phu zawk hial a ni.. 'Ngati nge i mit lek luk chu?' min rawn bih hnai pah chuan a rawn ti a
'Ngatinge i lo kal?'
'Min hmu duh lo a mi?'
'Duh.. hetah chaw i ei maw?' ka ti a
'Aih.. ni loe.. chaw eikham velah ka lo phei..'
'A pa'n a lo call che mi?' ka ti a
'Aw.. tiang hian i chhungte rilru ti hah thin lo la.. ngatinge in inhauh reng reng a..'
'Ka sawi peih lo..'
'Sawi hram la..' tiin a rawn kun hniam a, ka lo kuah vat a. Ka nghawngah a rawn thaw lum ham ham a..
'Heii.. a za' nui har har pah chuan ka ti a.
.
Ka biang lehlam lehlam a a kut a dawm pah chuan ka mitah tak min en a..
'I mit a bui vek..' a ti sep a
'Ka tap lawm..' ka ti a
'Tap tawh suh aw..' tiin ka hmui ah a rawn fawp a.. keichuan ka lo chhanglet vat a, a kut chuan ka kawr chhung a rawn zen a, a za ka ti takzet. Min fawp uar zel a, kipawn tawp tir ka tum chuang lo.. ka hnute hmur a kut a hrual pah chuan a lei chuan ka ka chhung chu a hawl kual nawk nawk a.. ka thaw  achham lo chuah! A che zel dawna ka ngaih lai chuan a in la hrang ta daih a..
.
'Tho rawh.. i nu ten an ngaihtuah em che saw..' a rawn ti a
'Umm..'

MIDDLE OF NOWHERE(3)
***RENGPUII GUITE***
(Hmanhmawh tawkkin ka type a, a phuailuai deuh maithei.. a lo fel fai vak lo a nih pawn min hrethiam dawn nia. Chuan in ten thu sawi tur ringawtin min lo inbox tawh su.. a taka thilthleng pawh a nih loh hi.. grin emoticon:D )
.
.
Ka tho chhuak a, Muana pawh chu kan inah a awm ve reng a. Dar 9 velah chuan ka pa carin Muana nen a pi leh a pute kan thlah a. An inah rei lo te kan thu a, kan in lam panin kan inkhalh haw ve leh nghal a..
.
'Anu ten enge an sawi?' ka ti a
'Eng maw?' hriatthiam loh hmel tak chuan a ti a
'Hre lo der suh..'
'A mak thei e.. ka hriatthiam theih turin sawi tal la..'
'Anih chuan a that chu..'
'Keimah vangin an hau che mi?' a rawn ti a
'Teuh lo..' rang zetin ka lo chhang a
'Sawi hreh suh aw an hau che anih pawn.. ka hrethiam lutuk ania..'
'Min hau lo..' amah en chung chuan ka ti a
'Anih ngatinge i tah.. i mit kha a vun vek kha..'
'Thil dang vangin min hau a..' ka ti ta ringawt a
.
Ka nu leh pate chu mu turin an phei a, zanlai tawngtaina hun hmang tura kaitho turin min ti bawk a..
.
'Keipawh tawngtai ka nan hman a ngai dawn a..'
'Dar 11:59 ah i haw dawn nia..' nui chung chuan ka ti a
'Minute 1 chhunga thleng turin min duh nimaw?'
'I thei ngem?'
'Phit fuaa nimai..' nui chung chuan a ti a
'Naa.. i accident ang asin..'
'Chu reng..'
'Anih 11:58..' nui hak pah chuan ka ti leh a
'11:45 ah aw..' a dar min nghen tir pah chuan a ti a
'Umm nimai..' ka ti a
.
.
A bula ka awm chuan engmah ka hre chang lo ni berin ka hria. Inngaihzawn tirh chuan hetiang anga luangliam hi chu dan pakhat chu a ni ve ngei a lawm mahse keimah ah hian a danglam tlat a ni. Ani hi fahrah a ni a, keichu ka pian tirh atanga nu leh pa tha lutuk nei.. an duat sual hial kha ka ni ve a mahse ani chuan hmangaih tak tak a enkawltu a nei mang loa, chuti chung chuan a tumruh a, heng ang dinhmun hi a thleng thei a.. malsawmna dawng lo chi rual a ni lo a ni. Heng ang a dinhmun kara a nuna ka lut ve hi nuam ka ti a, ka hlim a ni. He kan inngaihzawnna hi a nundan a inthlak hlawk anih loh chuan a tawp ka phal ngai loang.
.
'Nu leh pa inrawlh buaina angah hian inngaihzawnna hi a nghet duh fe zawk ka ring..' ka ti sep a
'Ngating chungte i ngaihtuah a..'
'Ka ngaihtuah mai mai..'
'I nu leh pate vang maw?' a tih chuan min kuahna chu la thla in amah chu ka en a
'Chutiang buaina a awm a mi?' ka ti a
'A ang em alawm..'
'A awm lo..' tiin a biangah ka han fawp zeuh a
'Nia.. a nghet duh lutuk..' a rawn ti a
'I hria mi?'
'Umm.. ka tawng tawh alawm.. rilru naupan at vang pawh a ni thei tho bawk..' a ti a
'I bialnu hlui ah maw?'
'Um..1st sem ka zir kumah a nia.. kan College a kal ve tho..' a ti a
'Sawi chiang teh..'
'Tul lo..'
'Mawh..'
'Thinrim nan i hmang leh nga ka peih lo..' a tih chuan ka nui hak a
'I nunhlui ah ka buai peih lo..' ka ti a
'A hmeltha lutuk chuan a fel em em bawk a.. an chhungkua pawh an awm thei lutuk mahse thla nga vel kan inngaihzawn hnu ah a nu leh pain thlah turin min rawn ti a.. ka zak lutuk a biak ka tum tawh lo mahse amah kha a nghet telh telh zawk in ka hria. A hma aia nasa in min duhna a ti lang a, keipawn kan dinhmun ka en a ka inkhawngaih vang nge thlah kha ka tum ngai lo..' a ti a
'Tinge in inthen?'
'Hmun dangah an dah a.. a tuar thei ta bik lo aniang min rawn then a.. mahse ka hrethiam lutuk..' a ti a
.
A haw hnu chuan a thusawi chu ka ngaihtuah a, a bialnu hlui chhungten an tih ang khan ka chhungte hian lo ti ve se engtiang chiahin nge a nat ang le? A vawihnih nan a chungtiang a tawn chu ka phal loa.. chuan khawiah pawh awm ila keichuan then  ka duh lo a ni, ka duh lo takzet!
.
Tawngtaina hun hmang turin ka nu leh ka pate ka ko a, kan tawngtai zawh chuan kumthar chibai inbuk tawnin kan mu ta hlawm a. Muana pawh a thil tih apiang a rawn inreport ve zel a, kumthar inkhawm ban hnu ah reilo te min rawn hmuh a tum thu a rawn sawi a, chumi hnu chuan a pu te in lamah a chho dawn a ni.
.
.
Kan inkhawm ban chuan kan inkawtah a bike bulah a lo ding vang tawh a..
.
'Inkhawm i tlanbo a ni maw?' ka ti vat a
'A laklawhah ka chhuak daih lawm..' nui chung chuan a ti a
'I van inhmeh lo chutianga awm..' ka tih chuan a nui huk a
'Lo chho ve daih la..' sofa a thut pah chuan a ti a
'I duh tak tak loh kha..'
'Ka duh chiang e..'
'Chuan khi ta tangin i chhuk dawn tihna mi?' ka ti a
'Umm..'
'I chiang tawh mi?
'Ni 9 ah ka tih tawh kha..' a tih chuan ka ner nang a
'Hma dawn ee..'
'I lo peng ang ti raw..' a ti a
'Ka hre lo..'
'Mawhh..' tih pahin ka banah chuan min chelh a
'Naupangchhia..' nui pah chuan ka ti a
'Kan inhmu tawh dawn lo asin..'
'Nia.. a pa ka lo dil ang..' ka tih chuan lawm tih hriat takin a nui vun vun a, a tha chiang alawm!
.
.
Dar 3 velah hreh tak chungin kan inthlah a, inhmu zing em em lo mah ila a hma aia min hlata a awm tur chu ka lung a ti leng lawk ngei mai.. chu mai ni loin ni rei lo te hnuah min chhuk san dawn bawk nen ka ngaihtuah nasat pauh leh ka huphurh ngawih ngawih.
.
Ka nu leh pate chuan kan inngaihzawnna chungchang engmah an sawi tawh loa mahse anmahni ah hian danglamna awm anga hriatna ka nei tlat thung. Ka hriatpui vek lo nangin an ni pahnih pawh hi ka hmuh thin anga an infiam zawr zawr thin te kha ka hmu leh ta mang loa, nge ka ngaihbel zawk pawh ka hrethiam lo. Ka ngaihbel anga han kal tir ka duh viau na hian an pindan atanga awki vina an inhauh thawm te chu ka hre ta fova, keimah vang nge thildang vang ni ang le tih chuan ka rilru a ti buai takzet a ni. Hun dang chu nise an inhauh chhan te chu ka zawt leh mai anga mahse keimah vang anih hlauhna ka neih tlat chuan min hriat loh der tir luih tir zel zawng a ni e.
.
January ni 8 a ni a, naktuk mai ah Muana pawh a chhuk tawh dawn a ni. Sihphira a chhoh hnu ah vawikhat chiah kan la inhmu a, ka ngai thei lutuk hi tul loah hian thinrimna ka zawng leh vak thin. A hma zan lamah thil ho te avangin ka thinrim leh ringawt a, zana kan inbiak bak min lo la be leh ta miah loa.. ka rilru chu a tawt up up thei hial a ni. Min be dawn lo a mi le tih ngawt chuan ka rilru a ti buai a, ka eng tih mah a tui thei lo..
.
Chawhnu dar 1 a pel tawh a, ka inbual zawh chuan ka rilru buai nen ka mu leh ta tawp a.. ka inngaihtuah ka inngaihtuah a ka mittui a rawn hnam leh ringawt tawh. A chhuk hma in kan inhmu dawn lo a nih hi tiin ka ngaihtuah rauh rauh a. Mittui tla chunga thil ka ngaihtuah vak vak lai chuan U Bawihi ka pindanah a rawn lut a, inleng ka nei tih a rawn sawi chuan ka lungphu a rawn rang nghal dawt thei hial a ni..
.
'Hey.. rawn chhuak ta che..' ka inhak lai chuan kawngkhar bulah a rawn tawng a
'Rawn lut suh aw ka inthlak ania..' ka ti a
.
Ka hmel ka en chuan ka mit la sen ram chu ka duh lo takzet.. tih reh tumin eye brow ka hnawih a, awmzia a nei em em pawn ka hre lo.
'Ngatinge i mit kha?'
'Ka mitah hian thil a lut a..' ka mit nuai neuh neuh pah chuan ka ti a
'I kutin tikhan ti suh..' ka kut lak thlak pah chuan a ti a
'Ngatinge?'
'Engmaw?
'I sual..' ka hnuk a rawn ulh leh teu tawh
'Min lo be suh i ti nih kha..' nui pah deuh chuan a ti a, keichuan ka va kuah a.
.
Ngawi rengin a tu amah mah tawng lo chuan kan inkuah reng a, ka huphurh lutuk hi tah vak mai ka chak a ni.
'Tikhan awm lo la.. hreawm ka ti ve lutuk tho ania..' a ti a
'Awihawm loh em mai.. nuam i ti ngawt ang..' ka ti nui nui a
'Engvang ngawtin?
'Ka hre lo..'
'Pangchang vel mi?' nui pah chuan a ti a
'Teuh lo..'
'Khawnge i nu leh i pate? zanriah ei chhuah an phal angem?' a tih chuan ka thu ngil awt a
'Tak tak em?' phur hmel fe in ka lo ti vat a
'Aww.. mahse dil phawt la..'
'Phal lo ta se..'
'Huh.. phal turin dil la..'
.
Phur takin ka nu ka call a, a phone a lak theih loh avangin dawr phone ah ka call a ka pa zawkin min lo chhang vat a. Ka pa ka dil chuan a tawng dan atangin a phal vak lo tih ka hrethiam mai, mahse haider luiin ngen tak meuha ka ngen chuan a 'aw' ve thei ta hram a. Keipawh an lo haw hma ngei ngei a chhuah chu tha a ka hriat avang chuan hmanhmawh takin ka insiam nghal a.
.
Kan chaw ei hun a la hlat deuh avangin kawn chei min en kualpui a, a bula ka awm chung pawn ka ngai veng veng tho in ka hria. Hlim deuhin inkai chungin thla te kan la a, ka rin ai daihin nuam kan ti dun a, a hlim hmel ka hmuh chuan keipawh ka hlim ve takzet!
.
A chhuk hnu pawn kan hman chang apiangin voice call in emaw video call in kan inbe reng a, a tan ka rilru puthmang hi a danglam dawn lo ni te hian ka hre thin. Thla dawn a vei leh meuh chuan keipawh ka chhuk a hun leh tep tawh a, ka pa bulah chuan flight a chhuk ka duh thu sawi chu ka inthlahrung ru hle a ni.. a chhan chu hun dang zawngah pawh flight a kal ai chuan sumo a chuan tlaivar thak pawh ka duh thin kha a nia.. Muana Guwahati ah a awm tih an hre ve kar nen.. ka hrilh ngam chiah lo a ni.
.
'Tun tum chu flight in chhuk tawh rawh aw.. inngaihtuah a na duh em mai..' chaw ei lai chuan ka nu in a rawn ti a.. chhan ka tum lai chuan ka pa in min lo chhang khalh a
'A tul lo.. sumo a chhuk i peih loh pawn kan motorin ka hruai mai ang che'
'Dawrah kan buai em hi..' ka nu chuan a lo ti a
'Chung ang hunte vangin kan chan tam phah loang..'
'Ngatinge enge maw hlekah in inhnial zel a?' thinrim awki lek lek chuan ka ti a.. tuman min chhang lo.
.
Engtik atanga intan nge chu ka chiang loa mahse ka nu leh ka pate hi an inngeih hlawl lo a ni, hetiang hi an ni ngai lo asin mawle. Enge maw buaina a awm anga ngaihna hial min neih tir a.. ka rilru a buai ru thin hle  a ni. Ka nu duh dan ka pawmpui avang chuan flight ticket chu kan book fel a, Muana hnena Guwahati lam atanga ka kal tur thu ka hrilh chuan a lawm em em a, keipawh ka lawm lutuk tlat, ka mi ngaih em em ka hmu thei dawn si a.
.
A tuk mai ka kal hun a nih tawh avangin ka insiam a, zan dang nise anu chuan min insiampui leh ngei anga mahse zanin chu lan pawh a rawn lang lo. An inhau anih leh ringin an pindan lam chu ka pan a, ka nu awki vin tak ka hre bawk mahse enge a thil sawi ka hre tha thei lo. Dim thei ang berin kawngka ka hawng deuh a.. kawngkhar bulah chuan ka thu a..
.
'Mawh i phur ang i hria em? i duh chuan ti rawh..' ka nu chuan thinrim leh tah aw chuan a lo ti a
'Tunah hre lo se nakinah chuan a tlai dawn a sin..' ka pa chuan a lo ti ve bawk a
'Ka nunna a nih hi.. an inngaizawng reng dawn lo.. an inthen hunah a dik vek mai ang..' ka nu chuan a ti leh a
'An inthen dawn tih i chiang a mi?'
'Pathian hnenah ka dil ang.. ka fanu rilru tih nat ka duh lo.. a na hi ka hmu duh lo'
'Anih chuan a theih chin chin kan ngawi a niang chu..'
.
.
Enge an thil sawi chu ka hrethiam lo takzet! Mahse mak tak maiin thil awm ang lo tak ngaihtuahna ka nei a ni. Chu ka ngaihtuahna chu kei ngei pawn ka hlau a, ka duh lo, ka tha hial a ti khur thei a ni. Ka ngaihtuahna ang hi thudik lo ni ta ang se ka nu ang chiah a hriat loh der chu ka duh zawk hial ang. Ni lo, thudik a ni thei lo ang.. ka tet te atanga ka thlalak ka nausen tet nen thleng kan chhungkaw thlalak hmuh tur a awm alawm!
.
'Bawihi enge i tih?' ka phu zawk a, ka ding chhuak vat a
'Nu..'
'Aw enge?'
'Fa lak ka ni lo ti raw..' ka nu chelh pah chuan ka ti a
'Teuh lo lutuk.. engtin nge chutiang i sawi theih..' aw khur lek lek chuan a ti a
'Anih enge in thil sawi lai mek kha?'
'Enge kan sawi?'
'Nu.. sawi rawh..'
'Muana hi i ngaihzawng ni tur chuan a hniam deuh e kan tihna mai alawm.. kei chuan ka pawmpui vek che mahse i pa hian a ngaihtuah vang che  ania..' ka nu chuan a ti a.
.
.
Ka mut hmunah ka inngaihtuah a, ka nu khan khatiang khan thil sawi mahse dik lo a awm tih ka hria a ni. Enge an thil thup ber hi ni le? Engvanga tun tum ka haw hi danglam em em an nih ka hrethiam lo a ni. Ka muhil thei lo chu ka let let a, ka phone chu ka han ban leh rih a. Whatsapp ah Muana last seen check tumin ka lut a, a lo la online kar a.
'Hey min wishna a rei tawh tehreng nen..' ka va ti a
'Nia ka thianpa nen kan inbe lawk a..'
'A va pawimawh awm ve..'
'Pawimawh ang reng.. Mate wifi a hman theih loh a, net pack ka nei si loa.. ka thianpa hi lo va be lawk ta che..' tiin contact no.min lo thawn a
'Engtin?'
'Hmingmuana thiannu ka nia va ti rawh.. kan sawi lai mek che a ni tho.. data ka off aw balance a zo mai dawn..'
'I van a tak.. convert mai ta che..'ka message a indeliver thei ta lo.. A thianpa 'Sangtea Delhi' tih a a save chu kan save te te a, whatsapp atang chuan ka va text a..
.
.
'Nge ni ta Muana thiannu ka nia?' tihin ka va thawn a
'Tu Muana?' va han mawl tak!
'Hmingmuanaaaaaa'
'Oh.. Hmingmuanaaaaaa maw.. haha' nuih zat ve lem lo tan chuan a ngeiawm ru viau
'Aw..'
'Englo ania.. Shillong ah ka rawn peng chho dawn a.. Mizoram house no.i nei em?' a ti a
'Nei e.. tiin ka thawn ta nghal a...'
'Anih Baptist house no.?'
'Aw..' tiin ka va thawn leh a
'Nih Synod house..'
'A ruala min dil mai tur che lawm.. khaaaa' tiin ka va thawn leh a
'Thanks aw..' a rawn tih pawh chu ka chhang zui peih loa, ka mu ve ta nghal a.
.
Ka mut hnu chuan ka phone message tone a ri leh a, ka han hawng nghal vat a.. chu pa bawk chu!
'Khawi hi nge thlen nan nuam ber ang?'
'KA HRE LO!!'

MIDDLE OF NOWHERE (4)
***RENGPUII GUITE***
.
Ka nu in min lo kaihthawh chuan vawiin ah Muana nen kan inhmu thei tawh dawn tih ka ngaihtuah chhuak nghal a ka tho nui ver ver mai mahse rilru erawh a lawm kim chiah lo a ni, a chhan chu ka nu leh pate hian eng buaina tak nge an neih ka hre lo hi a ni. Ka phone ka en chuan message a lo awm nual a, zan hmasa lama Muana thianpa ka text pawh kha a lo awm bawk a mahse ka chhiar hman lo Muana missed call lo awm ka hmuh chuan ka call let vat zawk a..
.
'Hello..'
'Ka tho chiah..' ka ti a
'Nichin khan lo kaih thawh che ka tum a..'
'Ka phone ka silent daih a lawm.. i thianpa kha a ninawm lutuk a..' ka ti a
'Tha deuhin be rawh.. mi pangai anih kha..' a tih chuan ka nui hak a
'Nia a dilchhut danah'
'A lo nel be che anih kha..'
'Um ka hria lawm..' tihin ka chhang a
'Lo hruai i ngai dawn em?'
'Ngaih loh tenn..'
'Um chu chu nia ka hriat duh.. insiam rawh i tlai ang..' a tih chuan kan inbiakna chu kan ti tawp ta a..
.
Ka nu leh pate'n airport ah min thlah a.. an hmel chu ka ngaihbel nge mawni a ngui riau in ka hria mahse an hmuh a hlim lo anga lan chu ka thil duh loh bur a ni. An bulah chuan ka thiante khuta awm sa te nen a tlang nghal tur angin ka in sawi tak na a Muana te inluah a zan hnih riah chu ka thil tum sa a ni.. ka rilru chu a nuam chiah lo mahse Muana ka ngaih em avangin leh Shillong a min thlah phei theih dawn avangin amah ka nghah a ngai si a ni.
.
.
Muana hmel ka han hmu leh chu ka rilru hahna zawng zawng ka thiehnghilh vek hialin ka inhria a, a kianga awm hi a hahdam ve thlawt a ni.
'Ka room ka kian ang che nga.. U Jerry roomah ka mu ve mai ang..' a ti a
'Room chuang a awm i ti maw ka tia..'
'A hnawk lutuk.. kan tifai hman tawh si loa..' a ti a
'In van awm tawp awm..'
'E chuan U Jerrya bulah ka nau angin ka sawi che nia aw.. a puitling sia a nuam lo ve a' a tih chuan ka lungawi lo ru hle a mahse tih lan ka tum lem lo.
.
In kan thleng a, ka beisei aiin a nuam reuh riau. Ka in dah fel hnu chuan ka inbual a.. ka inbual chhung chuan Muana In luahpui U Jerry pawh a lo thleng a..
'E hei maw i nau chu.. in va inang tak ve..' nui chung chuan min rawn chibai a..
'Shillongah maw i awm?' a rawn ti leh a
'Aw ni e..' tiin ka lo chhang a
'I U hi a ngawichawi lutuk a.. nau a nei tih pawh ka lo hre loa.. a bialnu zawk aniang a rawn hruai a tum ka lo ti rilru a mahse hai rual lohin unau in ni tih a hriat..' a tih chuan ka sa pup pup thei hial a ni..
.
'Mate va inthlak vat la.. ka bazar na ah i rawn kal ve duh em?' Muana chuan a rawn ti a
'Um kan inthlak ange' tiin pindanah chuan ka lut a..
.
Ngati nge mi zawng zawng hian inang min tih em em zel le.. he thu an sawi hian ka hlauthawng tlat thin. Ka inthlak lai chuan ka nu in min rawn call a..
.
'Aw nu..'
'In la chhuak lo a mi? in chhuah dawnah min rawn be rawh ka tih che kha..' ka nu in a tih chuan ka hrechhuak zawk
'Aw.. aa ka theihnghilh daih a.. kan chhuahna a la rei lo kan buai nuai a..' ka sawi bah nawk nawk lai chuan Muana a rawn lut a.. 'I nu mi?' hmui phun in a rawn tih chuan ka lu ka bu nghauh a
'Nu zanah kan inbe dawn nia..' tiin ka phone chu ka hmet tawp a
.
'Ka khur vek!'
'Thudik sawi mai rawh ka tih ka tih kha..' a ti a
'Ka ngam i ring a mi? a mipa zawk pawn i In luahpui hnenah pawh dawt i sawi a nia..' ka ti a
'I duh loh chuan nichin khan sawi mai ta che..' a ti ram hmak a. Helai hmuna ka kal hi ka inchhir tan derin ka hria
'I danglam..'
'Eng thilah?'
'Ka hre lo.. mahse i danglam tih ka hria..'
'Inhauhna zawng rih lo teh ang.. insiam la kan chhuak dawn nia..' a ti a
.
Ka thu hnawk a, thil ka ngaihtuah leh tan tawh.. mi zawng zawng hian min hnawl nimai in ka hria, an tana hnawksak ni a inhriatna ka nei tlat a ni.. Muana tiam in. Kan inhmu hi a hlim phah ve pawn ka hre loa, a nui hmel ka hmuh thin te kha hmuh tur a awm tawh lo. Engkim hi chiang lo vek ni berin a lang, chu chuan hlauhthawnna nasa tak min pe a ni.
.
A ban kaiin ka kal tak na a, a hma kha a ang lo tlata hriatna ka neih chu a kiam thei chuang lo. Ka lakah lungawi lohna a nei emaw ni chu aw ka ti rum rum a. Engti mawni tak kan boruak chu thlak ka duh takzet a ni!
.
'Min thlah ang ti raw..' ka ti a
'Um ka sawi tawh kha..'
'Ni engzat nge i cham ang..' ka ti a
'Weekend chhung chu ka cham thei ang..'
'Mahse, ka bulah i thleng ve thei dawn si loa..'
'Nia.. house ah ka thleng nga nimai..'
'Thlenpui tur che in min duh em?' nui har har pah chuan ka ti a
'Awmna tur i nei lawm..' thutak hmel fe a min en pah chuan a ti a..' ka sawi hmu chu ka ngai rem rem hial a ni..
.
Ka phone ka check chuan a thianpa message ho chu a lo awm nuai a..
'Eh teh mi pangai i tih ve hi..' tiin a han hmuh chuan ka phone a lo la vat a..
"Khawi ber maw nuam i tih?"
"Sawi ve mai la.."
"Van induh reuh ee.."
"Zawt tawh lo tawp ang che mahse ka lo thlen hun chuan min fanpui tal ang.." tih ho a lo thawn nuai a.. Muana chu a nui hak hak ve a..
.
'A uang anih kha.. a fel lutuk alawm..' a rawn ti leh a
'Nia a fel aniang.. i sawi zing em mai..' ka ti a
'Chaw kan ei har dawn sia thil ei ang aw..'
'Umm..' nui vur vur chung chuan ka chhang a..
.
.
Kan thil ei tur kan nghah lai reng chuan Muana chu ka en reng a..
'Muan..'
'Um..'
'Unau kan niin ka hria..' ka ti chhuak a.. ani chuan mak tih hmel takin min en reng a, a rawn nui chhuak phawng a
'I a mi? unau lo ni ta ila i nu leh pate saw ka nu leh pate an ni dawn a sin..' nui chung chuan a ti a
'Fa lak ka nih ka ring..' a kut a chelh pah chuan ka ti a
'Chu chu engtin nge i ngaihtuah theih zawk a..'
'Unau lo ni ta ila.. ka duh lo, a ni thei lo' ka lu thing nawk nawk chung chuan ka ti a
'Fahrah i ni lo chuan tiang khan engmah ngaihtuah tawh suh..'
'Anih chuan ka nu leh pate'n enge an sawi? please in sawi rawh.. an sawi tih ka hria..' tap aw tuau chuan ka ti a
'Anih leh.. in chhungkaw dinhmun hi ka phak lo lutuk a hei vang hi a nih ka ring ber engmah an sawi lo mahse ka hrethiam chuvang chuan khawngaihtakin nangmah puitlin tum rawh.. engpawh tawng tura i paukhauh a ngai a lawm..' a tih zawh chuan thawk a la vak a
'Engvang mahin keichuan ka then dawn lo che.. dinhmun ngat phei chu..' ka ti a
'Kan hmalam hun a hriat loh.. kan zir zo tep a kan puitlin ve ve a ngai a chuan tuman an tih nat che ka phal lo..' a ti a
.
Kan inhmuh leh hnua a danglamna ka hmuh hian enge maw tak dik lo a awm tih ka hria a ni.. khi lam boruak rip tak kalsanin ka chhuk ve a, hetah pawh a hreawmna a dang chuang lo.. ka hah in ka tawt up up hi a ni ber. A nui te leh a tawng te chu lem ngawih ngawihin ka hria a, a ruk hian min lo ning reng emaw ni le tih te chu ka ngaihtuah a.. mahse chutiang em ni turin ka ring phal si lo.
.
.
Zanriah ei khamah chuan a pindanah kan pahnihin kan awm a, U Jerya pawh a pindanah lehkha zir turin a lut nghal a. A pindan ka tih fai lai chuan khumah thu in min lo en reng a..
.
'Enge i ngaihtuah a?' ka ti a
'Nangmah..' tiin min lo chhang vat a
'Thil dang daih ngaihtuah i ang..'
'Teuh lo.. i hmuhnawm lutuk a..' nui chung chuan a ti a
'Engtikah nge i mut dawn?'
'U Jerya lehkha zir zawhah ka phei ang i duh chuan muhil rawh..' a ti a
'Ka mutthilhsan phal teuh lo che..' tiin a bulah ka va thu a.. a dar chu ka nghen ar ar a
'Movie en i duh em? nge mutthilh i duh?
'Mu mai mai zawk ila kan pahnihin..' ka ti a
'Mut mai mai chu a tha lo.. movie en ang..' tiin a laptop chu a la a
'Enge kan en dawn?'
'Ka hre lo.. enge i duh?'
'Hindi movies ka duh a keichu.' ka tih chuan a nui lui vak vak a
'He lai vai chhia mah nin naka laiin..'
'Anih leh funny videos en mai mai ang..' ka tih chuan a lo 'aw' ve mai a.. kan en ta a..
.
Hun danga ka en chu nise ka nui nasa ngawt ang mahse tun tum zet chu a sak talh thung.. ka rilru ah enge awm pawh ka hre lo mahni inkawngaihna chuan ka khat hi a ni ber mai..
'Muan ka mu duh chhuak rawh..' ka ti chhuak tawp a
'Maw?' mak min tih hmel zet chuan min em a
'Ka mu duh.. chhuak rawh..' vin pah ti tih chuan ka ti a
'I tha em?'
'Aw.. chhuak rawh!'
.
A chhuah velah chuan kawngka kalhin khumah ka bawk a, ka tap nghal char char.. heng ka zinga awm te awmdan hi ka hrechiang ve tawk a.. an danglam chhoh dan pawh ka hai lo. Muana pawn min hmuh hnu ah vawikhat pawh min kuahin min fawp loa, inhnaih taka kan awm loh theih dan kawng a zawng char char bawk. Thudik hi ka hriat a ngai takzet a ni. Ka nu number ka dial a, a lo chhan chuan ka lungphu a rang nasa ngei mai..
'Nu in fa ka ni lo ti raw..' tih a zawh mai ka tum lai chuan hmanzan ka pa nen a an inhauhna chu ka hrechhuak a.. ka tina thei lo a ni!
'Nu..'
'Aw bawihte i tap a mi?'
'Aih.. ka mu dawn a.. ka lo hrilh che..' ka ti a
'Aw nih tui deuhin muhil rawh aw..'
'Um.. muttui u..'
'Bawihte..'
'Aw..'
'Anu in a hmangaih che..' chutiang thu ka bul ngeia a sawi ka vawikhat hriatna a nih vang nge min ti lunghnur zual a.. ka awm dawm chuan ka tap nasa zual sauh a, phone chu ka hgmet tawp ta ringawt a..
.
.
Thil tam tak ngaihtuahin ka intap muhil vat a.. zinga ka harh chuan Muana message a lo awm teuh a..
"Kawngka min lo hawn.. i bulah ka riak duh"
"Keimah vang ti raw khatia i awm.."
"Bawihte.. ka tihpalh.."
.
Ka tho a, ka kawngka kalh chu ka va hawng a.. khumah let in ka mu leh a. Dar zat ka en chuan zing dar 5:30 chauh a la nih avangin muthilh lehnghal tum chuan ka phone ka dah a. Ka hmaia khawihtu an awm avangin ka harh ruai ruai a.. ka men chuan khumah Muana a lo thu a.. ka biangah chul in min lo nuih ver ver a..
.
'I muttui em?'
'Umm..' tiin ka han zi taih taih a..
'Ka tihpalh' tiin min rawn kuah a
'Ngatinge?'
'Thil dangah buaina ka nei a.. ka rilru ka pe tak tak hman lo che a..' a ti a
'Chungte chu sawi tur alawm..'
'I awmdan ka ti hreawm tih ka hre loa..' a ti a
'A pawi lo..'
'Vawiin ah khawnge kal i duh? i duh duh na ah ka hruai ang che..' a tih chuan ka hlim kher mai
'Nangman nuam i tihna deuh deuhah..'
'Um mahse tawlh phei phawt la..' tiin a rawn inthawlh ve nghal a..
.
.
'I boss Jerya awm lo mi?' nui chung chuan ka ti a
'A kal daihhhh tawh..'
'Haha..i hlau ve sia a..' ka ti a
'Teuh lo.. a zahawm em alawm.. lapthlak khawpin..'
'Enge lapthlak chu?' nui vak vak chungin ka ti a
'Rapthlak aia rapthlak leh chhawng..' a tih chuan thu chung meuhin ka han nui a
'Heyy lo mu rawh' tiin min pawt let a. A ban lukhamin a hmel en theih turin ka saisir a, hmuh a nuam takzet. Thil ka ngaihtuah tan leh dawna ka hriat avang chuan ka mit ka chhing vak a, 'ka duh lo.. tunah chuan..' tiin ka inngaihtuah a..
'Ngatinge?'
'Ka hre lo..' ka mittui chu a rawn luang nghal ringawt a
'Tinge khatia i awm?' a ti a
'Ka hlau..' ka ti chhuak thei tawk a
'Enge i hlauh ber?' tiin min kuah a
'Ka nu leh pa fa ka nih loh ka hlau.. unau kan nih pawh ka hlau..' ka thaw chu a chham mai dawnin ka hria
'Aih.. teuh lo.. engtin nge unau kan nih theih ang? a hma pawn ka sawi kha September 10 chu hnuchham in a ka luh ni alawm.. ka birthday dik tak kan hre lo..' a ti a
'Unau kan nih ka ring..'
'Kan ni lo..'
'Lo ni ta ila..'
'Amak kan ni lo.. psychiatrist pan ang aw.. i duh em?'
'Enga? ka rilru a buai lo..'
'Anih enge i buaina..?'
'Chan che ka duh lo..' ka ti a
'I van a tak.. kum em pawh kan inngaizawng loa..' a tih chuan ka na zawkin ka hria
'Kum kher ngaiin i hria a mi?'
'Aih.. aih ka tihpalh.. tho ila insiam ang.. kan chhuah dawn kha..' tiin min thawhsan ta daih a
.
.
Rilru ngawng huiin kan inzui chhuak a, enge ka ngaihtuah ber pawh ka hrethiam lo. Ani chuan min tih hlim tum tih hriat takin thil tam tak a sawi a, ka nui tha hleithei lo.. ka rilru hi a buai nuai nuai a ni ber.
'Kan awm dun hun chhung tal chu i hlim thei lo mi?' Muana'n a tih chuan sawi dik ka ti hle a.. keioawh ka inthiam lo a ni
'Ka tihpalh.. ka tum ang..' tiin ka nui a
.
.
Muana theih tawp chhuahna zar vangin pangai takin ni chu kan hmang ral a.. a awmdan nuihzathlak tak tak te chuan min tinui hnem angreng viau. Ka inrin loh laia min fawh zeuhte chu a tih ngai loh a ni a mahse vawiin hian a ching thar reuh a, chuan teddy bear lian zet mai hi min lei bawk a.. tlai lamah phei chuan rilru hahna nei lo ang mai ka ni tawh a ni.
.
.
Zingkara chhuah tum kan nih avangin leh chhun lama kan chhuah vangin kan haw hnu chuan kan intifai a, kan mu nghal a.. in khata awm reng si in kan intext char char a.. a nuihzathlak duh viau. Muana text ka dang karah chuan 'Sangtea Delhi' tih message a lo thleng a..
.
'Mu tawh em?' a rawn ti a
'Umm..'
'Ghy chu enge an?
'Khua ang hi nimai..' ka va ti a
'Va nghal reuh e..'
'Huh..'
'Tak takah ka lo uang leh vak zel a.. in tha maw?'
'Um tha alawm..'
'That chu' tia a rawn reply hnu chuan ka chhang zui ta lem lo..
.
.
Kan hostel atang a hnai ber Baptist house ah Muana chu a thleng a.. ka indah fel hnu ah ka va in en fel pui leh a, kan chauh deuh avangin kan hostel ah ka let leh a.. ka va mu hahdam ta zawk a. A tuk atana kan kalna tur vel sawiin zanah chuan kan inbe char char a, ka rilru buai pawh a veng hawkin ka hria. Ka chhungte ka biak pawh chuan a hma anga lunghnur ka ni tawh bik loa.. Muana'n ka hlim a ka hmelthat thu min hrilh vang pawh a ni mahna..
.
Hmun hla a kal a duh loh avangin Golf linkah kan kal dun a, Mizo hmelhriat ka hmuh apiang bulah chuan chhuang takin ani chu inhmelhriattirna ka nei zel a.. keimah ka ang lo hial zawkin ka hria a chhan chu Eddiea kha lerh lara lar thin anih vang khan kan chhuah dun te khan enge maw taka han zahpui na kha ka nei thin a, Muana lakah erawh a dang hlak thung.
.
'I intithei si..' tiin min nuih a
'Engvangin?'
'Mi i inla hre e' a tih chuan ka nui hak a
'Mizo kan tam em lawm.. khawte deuh mipui zat chu kan tling hrim hrim..' ka tih chuan a nui vak vak a
'Mahse hetianga common vak hi a ropui miah lo..'
'Chungte chu nang ai pawn ka hrechiang..' ka tih chun min piai zeuh a
'A tha.. puitlin zir zel tur..'
'I inla puitling bik lutuk hi ka zak tlat zel..'
'Engvangin maw?'
'I mak bik em alawm'
'Haha.. ti ve lo mai teh aw..' tiin ka lu ah a lo nawr vak a
'Heyy..'
'E Sangtea khan chhelo a ti rap che..'
'Naa.. nge min hrilh?' ka ti a
'Aw.. i lawm nan..'
'Tuman an bialnu te hnenah miin chhelo an tih sak thu an hrilh ngai lo..' ner nang chuan ka ti a


MIDDLE OF NOWHERE (5)
***RENGPUII GUITE***
.
Kan haw dawn lamah chuan Ward's Lake ah kan kal dun a innghen rialin dil chakah chuan kan eitur ken te eiin kan thu dun a..
.
'Engtik nge i lo kal leh ang?' ka ti a
'Hun a awm tawh loh hmel e.. exam zawhah chuan haw a ngai leh mai dawn sia..'
'Ihmaw..'
'Umm'
'Delhi ah Master zir ve ve ila..' ka tih chuan min chhang lawk loa 'I duh loh chuan a pawi chuang lo..'
'Nangmah anga duh duh na hmuna kal ve thei ka ni si loa' dam thluam chuan a ti a'
'Ka hrethiam alawm..'
'Thil hrilh che ka duh a..' thutak zet chuan a ti a
'Enge?'
'Exam kan tan chho mai dawn sia..' a tih lai chuan kan thlang atanga ka hminga min ko ri chu ka hria a.
.
Eddie College thiante chu an rawn chho a, amah a tel ve lo hlauh chu ka lawm takzet!
.
'Enge in tih a?' ka han ti ringawt a
'Kan kal vel mai mai.. nangni zawk?'
'Keini pawh.. hei a lo zin a, ka vah kualpui' ka ti a
'Tah khuan Eddie pawh awm..' tih pah chuan an kal ve leh mai a.. keichu ka lo ner nang a..
.
'Haw ang!' bung zet chuan Muana chuan a rawn ti a
'Ngati? ala hma em hi.. hei hi ei zo phawt ang..' ka ti chuan a tho nawlh a
'Ka kal..' tiin a kal ta daih a..
.
A awmdan atang chuan thinrimna a nei tih ka hre mai, a chhan pawh Eddiea hming a hriat vang. Hmanhmawh takin ka zui a, a hnungah chuan ka va bei deuh thlawp a.
.
'Min lo pua, min zo em? tih pahin ka han zuang kanga.. ani chuan ka kuahna chu a phih thla lawp a, leiah chuan ka thu hnawk a. Kan chhak ah mi an awm nual a, ka hawi chho ngam lo.. ka zak lutuk chu ka sa pup pup a.. ka mittui a rawn tling nghal puam a. Ani chuan min rawn en a, ka ban bulah chelhin min rawn kaitho a, tah vak mai kha ka chak a ni. Kal pah chuan min pawt hnai a, ka darah min kuah pahin ka lu ah a rawn fawp zeuh a..
.
'Ka hmangaih che' a rawn ti sep a, a lam hawiin ka han en chuan hmun dang a hawi nghal vat a mahse a mittui a tling ve tih chiang takin ka hmu a ni. Thil dik lo a awm tih ka hria, engvanga mittui tla ve ngawt nge a nih ka hrethiam lo.
.
'I sawi duh chu sawi rawh..' tiin a hma ah ka ding a
'Aih..' a kun tlat bawk a
'Sawi rawh..'
'Inthen ang..' ka nghing lawihin ka hria
'Ngati?' aw chhuak tha thei mang lo chuan ka ti a
'Thla thum em pawh kan la inngaizawng tling loa.. kan inhmu thei dawn bawk si lo..' a ti a
'Dawt!' ka awmna pawh ka hre chang tawh lo.. ka au vak a
'Dawt a ni lo..'
'Min hmangaih thu i sawi zawh chiah kha..' tiin a banah ka chelh chuan ka chelhna chu a paih thla a..
'Ka rualin i let dawn nge i kalsan dawn che?' ka chhang thei lo, a awmdan mak lutuk chuan min ti na ngawih ngawih.. 'Anih ka kal.. inenkawl tha ang che..' tiin min kalsan ta a.
.
.
A kal liam lai chu ka thlir reng a, chet sawn tumna pawh ka nei lo..
'Excuse me.' tih a rawn tawng ri ka hriat chuan min ti phu zawk a.. kawng chu kianin,  a sir deuhah chuan ka ding sawn a. Chutia ngaihtuahna mumal pawh nei loa ka din lai chuan naupang infiam thawm ri te chu ka mang hriat ruai ruai a, ka dinna erawh ka sawn chuang lo. A khat tawka min nek an awm chu ka hria a, mahse chu chuan min tih harh phah eih lo.
.
Min nek deuh dawrh a ka hriat chuan ka harh zawk a, mahse ka balance hlohin inham tang tumin inphar buai viau mah ila a thlang a dilah chuan ka tla thla ta bawrh a. Ka rilru a rawn lang hmasa ber chu
'Tui chen ka thiam lo..' tih a ni. Hleuh kai ve tumin nasa takin ka invai buai ve a.. midang ho tawng thawm leh rawn pung khawm te chu ka hmu phe ruai a, tui te chu ka lem bawrh bawrh bawk a. Ka inham buaina lamah chuan ka chau telh telh a, midang tan chuan hun rei lo te ang ni mahse ka tan ve thung chuan movie ka en a slow motion a thil thleng ang mai chu niin ka hria. Ka ngaihtuahna ah ka nu, ka pa leh Muana an rawn lang a.. ka awmna thawm lam pawh chu ka hlat telh telhin ka hre bawk a..
.
.
Ka meng ruai ruai a, mi tam tak hian min lo hual deuh thup a..
'I harh em?' mizo patling pakhat hian a rawn ti a.. ka beng te chu a ngawng hui a
'Aw..' tih paha inben kan ka tum a, ka thei hlawl lo..
'I thawmhnaw a huh vek sia.. i damlo thei mai ang.. ka lo thlah ang che aw, khilai chhuah thleng khi i kal thei angem?' chu pa chuan a tih chuan ka lu ka bu nghauh a..
.
'Lawk lawk.. a kalpui ka nia..' tih min din hualna hnung lam atanga aw ri  ka hriat chuan ka lungphu hahdam lo zet chu a rawn ran belh leh a..
'E.. hei, a chau riau a.. damdawiin kalpui nghal thei la a zia viau ang, lirthei i kawl em? ka bula ding chuan a lo ti vat a
'Aw car a awm..'
.
Chu pa chu mak ti takin ka en reng a ka hre ngai tlat lo. Ani chuan min rawn en a, vawt ka tih avanga ka khur chu a hmu thiam a ni ngei ang a jacket chu hlipin min hak tir sawk sawk a..
'I kal thei angem?' min ti a
'Ka hre lo..'
'I tum thei hram em? i kawr a huh vek bawk si..' a ti a
'Umm..' tiin ka han inbeng kang a.. min lo pui vat a.
.
Mizo patling, a hma a min puitu leh a nupui ten min zui phei bawk a..
.
'A tlak lai khan khawnge i awm a?' kan kalpui pa chuan min rawn hruaitu chu a ti a
'Aahh.. ka chhuak daih a'
'Helai hi a nia.. kha lung pawh a la khawk rum kha..' tiin a hma lawka ka tlakna lam chu a kawk a. A chhak ka melh chuan a hma lama thil thleng chu ka ngaihtuah ngut ngut a, ka bing mup mup nimai in ka hria. Ka vawt ti lutuk leh chau bawk si chu kal pawh ka kal tha thei lo, gate thlen nan ringawt pawn hun tam fe kan mamawh a ni.
.
Gate thlen dawn chuan tlangval min rawn hruaitu chuan min pheipui nutling hnenah chuan keimah chu kai phei turin min ti a, ani chuan motor a lo va lak tur thu sawiin a kal ta a..
.
'A fel hmel hle mai.. i thianpa aniang maw?' nutling chuan a ti a
'Ka hre lo..' tih chiahin ka chhang a
'Enga?' mak tih hmel tak chuan a ti a
'A hlauthawng a rilru a la mumal lo a nih kha.. be vak vak rih suh..' patling chuan a lo tih chuan min zawt zui ta bik loa..
.
.
Car seat hmalam kawngka chu min lo hawn sak vat a.. ani pawh rawn lutin Mizo nupa te nena kan inthlah fel hnu chuan kan kal ve leh ta a.
'I thawhnaw tur lei lawk mai ang aw.. a huh vek si..' a ti a
'Aih damdawiin' thle nguai chuan ka lo ti a
'Awle.. a vawt viau a mi?' a tih chuan ka tawng pei thlawt lo chu ka lu ka thing ringawt a..
'Um Woodland ah aw..' a rawn tih chuan ani chu ka en a
'Tunge i nih?' ka ti a
'Min hre lomaw?'
'Aw..'
'Ok.. Sangtea..' a ti a
'Tu Sangtea?'
'I u thianpa..'
'Tu ka u?'
'Oh.. i bialpa thianpa..' a tih chuan hepa bulah pawh hian ka ka u angin a lo insawi tih ka hrethiam nghal vat a
'Tinge i lo kal?'
'Hmingmuana'n engmah a sawi lo mi?'
'Um.."
'Kinah kan sawi dawn nia..' a ti a
.
.
Woodland Hospital ah kan luh chuan ka tlun ti tih tawh a. Doctor in min en hnu chuan eng thil serious mah a awm a ring loa, jection min pek nghal bakah test pawh ka ti nual a.. zanin erawh kan riah ngei ngei a ngaih thu a sawi a. Ward pangai a awm mai ka rilruk lai chuan Sangtea chuan Cabin a awm turin thil a lo va tifel thlap a.. zan khat chiah ang a nih avangin ka hnial hran loa. Min han dah lum hnu chuan ka khawsik chu a reh mai dawn emaw kan tih laiin a zual telh telh a, ka tlun nasa hle bawk a.. Sangtea chu a phar buai nasa ngei mai, ani chuan min buaipui char char a.
.
Ka harh chuan sana banga intar chu ka en vat a, zan lai a lo pel tawh a. Ka phone en mai ka tum lai chuan ka bulah a lo awm miah loa; ka han ngaihtuah chiang a, tui atanga ka tlak hnu khan ka kawl tawh miah lo tih ka hrechhuak a. A pawi lo, bo rawh se.. Muana ka biak loh phah zawk ang' tiin ka inngaihtuah a.. ka tah chu a chhuak takzet! Ka mittui a rawn hnam a, ka khum piah thutthlenga Sangtea mu chu ka zuk en a, ka hrechhuak chiah! ani hi Muana'n min biak tir pa kha a ni tih. Chu chuan Muana nasa takin min ngaihtuah zual tir a.. ka na takzet! Ka na tih mai hian a sawifiah phak lo. Ani ka lo tawng kha khawvela ka thil tih sual lian ber a ni a.. engvanga hetia min kalsan hi a ni nge ka hre lo..
.
'I tap elaw?'
'Aih..' tih pah chuan ka inhnit faih faih a
'Muana i ngai a mi?'
'Umm..'
'I duhtawkin tap rawh..' a ti a
'Ngatinge min then?' tap aw tiau chuan ka ti a
'Dik tak chuan ngaihzawng nghet a nei char char alawm..' a tih chuan ka awm chu ka dawm vawng vawng a..
'Enge tih sual ka nei a?'
'Engmah i nei lo.. a pawi a ti lutuk.. chuvang alawm ka rawn kal..' a ti a
'Anu ka be duh..'
'I phone kha.. tui a lut a.. naktukah kan siam tir dawn nia..' a ti a
'I phone ka lo hmang.. khawngaihtakin'
'Tunah chuan a tlai tawh lutuk.. naktukah i be dawn nia..'
'Ka chhuak duh..'
'Aih.. a theih loh.. mut tum rawh..' a ti a
'Anih Muana a tawp nan min biak tir rawh..' ka ti a
'A mu tawh ang..'
'Khawngaihtakin.. sawi duh ka ngah lutuk alawm..'
'A chau viau ang.. vawiin ah Guwahati ah a let nghal sia..'
'Um ka be duh alawm.. khawngaihtakin..' tap chung chuan ka ngen a..
'Anih lo nghak lawk..' tiin a phone chu a  phawrh ta a
.
.
'Khale..' a tih chuan Phone chu ka la a, ka beng bulah ka dah rual rual chuan ka tap ta vak a.. lehlamah erawh thawm engmah hriat tur a awm ve lo thung..
'Enge tih sual ka neih a.. ngatinge hetia min tih? i thutiam kha i hre tawh lo a mi?' tap chung chuan ka ti a
'Mate ka tihpalh tih bak sawi theih ka nei lo.. khawngaihtakin dam vat la nun pangai tak zawh chho hram rawh..' a rawn ti a
'Engtin nge ka chakna berin min kalsan chung hian dam tak leh pangai takin ka nun theih ang? mawhh'
'I duh phawt chuan min mamawh hun apiangah min lo be dawn nia.. i u ang chiahin min en la..'
'I nau nih ka duh lo.. i bialnu nih ka duh alawm' ka thaw chu a chham ti tih a..
.
'Khawi.. kinah in inbe leh mai dawn nia..' tiin Phone chu Sangtea chuan a rawn la a. Khawvar thleng ka tap char char a, ka tawrh atan chuan a na mah mah a ni. Khawvar dawn hnaiah chuan ka muhil ve sek a, mahse nurse te thawmah ka harh leh nghal a. An chhuah hnu chuan Sangtea chuan bang ngheng hian min en reng a..
.
'Enge?' tiin ka va melh a
'I mit kha a bui vek alawm..' a ti a
'Nia.. ka tah vang anih hi..'
'Hostela lut chi pawh ila ni lo.. kan Inah awm rih mai rawh..' a ti a
'Enga? In in nei maw Shillong ah..' ka ti a
'In tihah he lamah Organization kan din dawn a.. chumi hmun chu tunah hian siam fel mek a nia.. a enkawltu tur In pawh peih fel a ni tawh a.. chutah chuan i awm anga..' a ti a
'Khawnge i awm ve?' ka ti a
'Chu lai hmunah chuan ka thawhpuinu nen kan awm..' a ti a
'I bialnu?'
'Teuh lo lutuk..'
'Anih chuan house number min lo zawh vak vak kha..' ka ti a
'Muana'n ti turin min ti nih kha..' nui pah deuh chuan a ti a
'Aizawl ah ka haw dawn..' ka ti a
'Ti chung hian?'
'Um..'
'I nu te tih beidawn i duh a mi?' a ti a
'Keimah ka beidawn chuan an lo beidawn ve leh zel a ngai mi?' ka tih chuan a nui hak a
'Muana aia sanga invawrh tum ta che..'a  ti a
'Khatiang hamikawr vuah kha cho en ah ka en peih lo..' ka ti ram hmak a
'Insiam rawh.. vawiin ah i phone te chu kan siam tir dawn nia..'
'In van hausak hmel ve.. i pa in a eiru mi?'
'Huh.. aih eiru loe.. ka pawisa ni se i tan ka hamng phal teuh lo..' a ti a
'Enga? khawia pawisa?'
'Ka chhar..'
'A ni lo..'
'I awih leh awih loh chu i thu.. va intifai vat rawh.. helai hmun hi i pa ta a ni lo ania..' ngeiawm zet chuan a ti a
'Ka lawm e..' tiin khum atang chuan ka tho a.. washroom lam chu ka pan ta a.
.
.
Ka inbual lai chuan hostel ah ka let ang nge Sangtea te awmna ah chuan ka awm ang tiin ka inngaihtuah a. Ani bula awm saw ka chak hlawl lo amhse kan hostelah chuan zan chhuah te a theih ve loh anga.. ka rilru a tawt em em lai pawn roomah ka tawm tlat a ngai ngei anga.. chu ai chuan in lamah ka duh duh dana ka tal a, ka duh chang pawh a ka ruih theihna tur chu tha in ka hre ta zawka  ni.
.
Ka inthlak zawha a lo luh chuan ka card ka pe a..
'Pin chu 1209.. bill atanga a chuan tam chuan ka phone chu kan siam tir dawn nia..' ka ti a
'I pawisa ka kawl alawm..' a ti a
'I kawl lo..' ka lo ti ram hmak a
'Ka chhar ka tih kha..'
'Ngeiawm suh aw.. ka mi hriat ngai loh pawisa ka hmang ngai lo' ka ti a
'Keichu min hria alawm..' a ti
'La mai rawh.. kinah a nu ka bia nga min lo thawn belh dawn tho' ka ti a
'Ka tifel vek tawh alawm..' a ti a
'Kinah ka rul mai ang che aw..' tiin ka dah ta a..
.
.
An awmna hmuna kan kal hma in kan hostel ah min kalpui a, kan hostel neitu hnenah chuan ka dam loh thu te sawiin chhuah min dil sak thlap a.. Ka thawmhnaw ka lak hnu chuan an awmna lam panin min hruai ta a..
.
'I nu hnenah engtin nge i sawi ang??' a ti a
'Ka sawi vek dawn mahse ka thiannu te inah ka awm ka ti thung ang..' ka ti a
'Bum hnehsawh maw?'
'Aih..'
'I damdawi kha i hawn kim maw?'
'Umm.. enge i tih thin a?' ka lo ti vat a
'BSW nikum khan ka zo a.. hna ka thawk nghal a.. tunah hian vanneihthlak deuhin sawrkar atangin tanpuina kan dawng a NorthEast lama inzauh nan..' a ti a
'Delhi ah enge i tih?'
'Khutah hna ka zuk thawk a.. mahse hei min rawn sawn anih hi..'
'Khawi khua nge i nih?'
'Champhai..' a tih chuan ka lu ka bu nghuah a..
.
.
A hmun kan thlen chuan tlai ni tla tur in a compound a lo en sen deuh phut nen ka hahdam huaiin ka hria. Building lian tak tak sak thluah hmuh tur a awm a.. a piah a chuan In luah lum bik tih hriat tak a lo awm bawk a, chumi lam chu kan pan nghal a.
.
'A lo la haw lo anih hi Nunui' Sangtea chuan a ti a
'Room hrang ka nei thei ngem?'
'Room pahnih chiah a awm a.. Nunui nen intawm mai ula..' a tia
'Dam lo ka nih hi..' ka ti a
'Anih common roomah ka mu mai ang..' a ti a
'Ka lawm e..'
'Nia.. i polite hle mai..' min melh raw pah chuan a rawn ti a..

MIDDLE OF NOWHERE (6)
***RENGPUII GUITE***
.
Ka pindan turah chuan ka inrem fel ve mawlh mawlh a. Ka chuah em avang chuan ka tha te chu a la khur er er thei a ni. Ka thil tawn ka ngaihtuah a, mumang a ang zawk mahin ka hria a ni. Ni hnih hnu maiah class kan tan mai dawn a, tha takin ka kal thei chiah angem tih chuan ka rilru a luah nasa hle a. A chang leh ka nu leh pa bula chhoh mai te chu ka duh rum rum a ni. Mahse, ka tih sual vanga anni rilru tih buai chu tha in ka hre si lo.
.
'I phone siam tir turin ka chhuak dawn ania..' kawngkhar bula ding pah chuan Sangtea chuan a rawn ti a
'Ka rawn kal ve a ngai em?' aw chau tak chuan ka han ti a
'A ngai lo, lo hahdam rawh, thil ei duh te i nei em?'
'Nei hran lo. E, kha ka card hi keng rawh' tiin ka card chu phawrh tumin ka purse ka ban a
'A ngai lo.. kinah kan insiam rem mai dawn nia..'
'I phone ka lo hmang..'
'Tunge biak i tum?'
'Anu..'
'Ok' tiin a phone chu min pe a
.
.
'Nu..'
'Aw, ngatinge ka call tlang theih miah loh che a nizanah..' a rawn tih chuan tah chhuak insum takin thawk ka la a
'Ka phone a chhia a'
'Engtin?'
'Niminah kan leng chhak a.. tuiah ka tla a' ka tah chhuak lutuk chu nasa takin ka insum a
'Enga? Engtin nge i awm?'
'Ka tha.. mahse ka la hlau deuh a, ka thiannu te inah ka riak tawp a..' ka ti a
'Damdawiin ah in kal nghal em?'
'Um.. jection pawh ka la.. chuan Nu, phone siamna tur..'
'Aw.. i pa ka lo bia anga, a rang lamin kan lo thawn ang..'
'Nih chuan ka dah ang aw.. min biak duh chuan hetah i lo call dawn nia aw ka phone that hma chu..' ka ti a
.
.
'Number hi ka save a, a lo call laia ka awm loh chuan ring ral tir tawp rawh aw..' tiin phone chu ka pe a, ani chuan min chhang lem loin a lu a bu nghuah a.
.
.
Kan awmna in hung chhung vel chu khawhar hnemah ka fang kual vel a, engkim mai chuan ka tah hi a ti chhuak a ni ringawt. Engvanga a bumna thanga awk nge ka nih hi ka hrethiam lo a ni. Ka tawngtai dawn thin, chakna dilin.. sawi tur hi a vang ngawih ngawih a ni ber. Ka thil tawn chu a mah mahin ka hria a mahse ti hian ka ngaihtuah a, ka chhungte khan hnaih lo turin min ti ve ngei a, an thusawi ka ngaithla duh lo zawk a ni. Hetiang ang mi a nih vang hi a ni ngei ang ka nu le pate khan hnaih lo tura min fuih ni.
.
Tlai dar 4 velah chuan nula pakhat la upat hmel lutuk loh hi inah alo lut a, a tlangnel dan atang chuan Nunui a nih ka ring nghal hmiah a. Ani chu a  felin min kawm nghal bawrh bawrh bawk a
.
'I khua a lo har em?'
'Aih har loe..' tih chiahin ka chhang a
'Lalsangtea hi a lo va haw har ve, enge a tih a?' a ti a
'Ka phone siam tir turin a chhuak a'
'I phone a chhia law? i khua a va har dawn ve..'
'Aih.. laptop pawh ka lo keng phei reng alawm..' ka ti a
'Nih chuan a zia chu.. eirawng min bawlpui rawh aw' tiin chawhmeh bawm a chawhmeh ho chu a va la a..
.
'E beer i in ve ngai em? in pah mai mai ang aw' a tih chuan hnial mai ka tum a mahse rui khawpa in chu ka chak thar thut a
'I kawl tam a mi?' ka ti a
'Um.. ka kawl reng alawm.. i in teuh dawn nia i duh chuan' nui chungin a ti a
'Anih chuan ka lo in ang..' ka ti a
.
.
A alu vel lai en pah chuan beer mug ah beer chu thli in ka in kawk kawk a.. rei lo teah can 1 chu ka in zo nghal mai a
'Ka rin ai daihin i in thei.. va inlak leh rawh' a tih chuan ka tho nalh a fridge atang chuan can khat dang leh chu ka va la a, ka in zawm leh mawlh mawlh a. Ka in zawh meuh chuan ka lu chu a rawn hai tan der a.
.
'Khawi ka lo pui ang che..' ka rui deuh tawh nen chuan ka tlangnel sawt viau
'Aih.. aih.. awm hahdam i mamawh lawm.. tikhan kan titi mai mai dawn nia' a ti a
.
'Ti hian in awm reng dawn a mi?' ka ti a
'Kan la hre chiang bik lo.. ti hian a sak vel hi chu an zo a ni mai a.. kan in tih fel zawh hun hunah kan la awm dawn nge min sawn leh ang a hriat loh' a ti a
'Enge hetah hian awm dawn a?'
'Grace foundation hnuaia awm ania tuna kan kalpui hi.. ihh, i hriatthiam thei dan tur chuan zu leh damdawi vanga buaite helai hmunah hian kan enkawl dawn a..'
'In peih e ka ti' nui deuh chung chuan ka ti a
'Peih pawl kan awm a ngai alawm..' a ti a
'I van in ve lo em em' ka ti a
'Ruih tumin ka in ve hleinem..' nui hak hak chung chuan a ti a
.
.
'Ehe.. i lo tho chhuak peih elaw..' Sangtea chuan a rawn ti lut a
'Umm' a hmel ka hmuh hian Muana ka hrechhuak a, chu chuan min na a ni
'Naktukah a lam thei ang aw i phone chu' a tih chuan ka lu ka lo bu nghauh a
'Siam man engzat nge?' ka ti a
'Kinah kha kha chu kan sawi dawn nia..' Nunui beer inchhawp lai chu a lem khalh khalh a
'Lalsangzuala han zah loh zia hi..' Nunui chuan a ti a
'Enge?'
'I u ka nih hi..'
'Ni mahla ka thawhpui ini tho a..' nui pah chuan a ti a
'Thawhpui te in tih.. i boss ka nih ve hi aw..'
'Boss chuan a hnuai a thawk te hetiang hi a treat char char zel..' an inhnial lai en chuan ka lo nui vur vur a..
.
'I u anih chuan tinge i U loh?' an inhnialna karah chuan ka lo ti a..
'Ka U diktak pawh a ni lo.. ka cousin a nia bakah mipa in hmeichhia an u tut tut ngai lo..' a tih chuan ka lo nui hak a
'Kum engzat nge i nih?' ka han ti a
'Kha i u Nunui kha zawt la'
'U Nunu engzat?'
'Han ring chhin la..' tiin ani chuan min lo chhang vat a
'93 a a piang ka ring..'
'Min ngai naupang mah mah' a ti a
'Nih leh 92'
'Um a dik chiah..'
'I inlak puitling ang aiin i naupang' ka ti chuan an in en a an nui vak vak a
'Nih leh a kum zat i ring dik tho sia..' U Nunui chuan a rawn ti a
'BSW nikum ah a chhuah chuan a dik vel alawm ka ti a..
.
.
Ka thil hriat ve lem loh an hna chung chang an sawidun chuan nuam ka ti ta chiah loa, pindan lam ka pan ta zawk a. Ka laptop phawrhin movie en ka tum a mahse ka lo rui deuh nen ka lung ti len zual chu ka chak zawk tlat a ni. Kan hla duh dun em em Taylor Swift hla 'Stay Stay Stay' tih chu ka play a, kan pahnih a thla kan lak dun ka kawl ve te chu ka en a. Chu hla chu inngaizawngte tana hla nalh em em leh an inhmehpui tak, hlimawm bawk si ni mahse ka tan chuan mittui ko chhuaktu a ni thung. Inhnit hlawp hlawpin ka thlalak en lai chu ka en lui ngar ngar a, ka thaw hi a tawp mai dawnin ka hria a ni.
.
'I tha em?' Sangtea awm ka hriat chuan ka mittui chu ka hru mawlh mawlh a
'Kawngka khar rawh..' ka tih chuan a khar ve mai a, ka lam a lo pan a
'Nunui chu engah mah ngai duh suh.. a hrethiam em em ang'
'I phone ka lo hmang khawngaihtakin'
'Ngatan?'
'Muana ka be duh' ka ti a
'Awmzia a awm dawn chuang hleinem' a ti a
'Ngati nge? A bialnu bula a awm i ring a mi?'
'Ka hre lo..'
'Anih text tal ka dah ang.. mawhh! khawngaihtakin sawi tur ka ngah asin, ka a thei mai ang..' ka ti a
'Beer kha i in ve a ni maw?'
'Khatiang sawi a hun mi?' tum miah loh chuan ka vin vak a
'Aw.. hetiang hian tu natna mah a chhawk ngai lo.. i na chhawk nana i ti anih ngat phei chuan in tawh maih suh..' a ti a
'Phone min pe dawn nge dawn lo?'
'Kha..' tiin min pe leh ta mai a..
.
.
Sangtea phone screen a ka mittui far fep fep chu ka hru zeuh a, kut khur chung chuan ka type a..
.
"Ihmaw. i mak tih bak sawi tur ka hre lo.. Tu emaw mipa dangin hetianga na hian min siam ta se ti em em hian ka tuar loang. Mahse, nangmah ngeiin ti hian min kalsan a.. khawvela ka mi rin berte zinga mi i nia sin Muan. Hetiang hian ka dawn tih i hre reng ti raw.. Hetiang hian ka na dawn tih i hre reng a i ti lui ti raw.. Ni e, kar hnih emaw a liam chuan ka tha chhuak maithei mahse he kar hnih ka dam nana ka paltlang tur hi keichuan ka hlau takzet a sin. Chuan, chu kar hnih mai ah chuan dam lo ila engtin nge ka awm ang? Dam chhunga ser min siam sak tur chuan i fel lutuk Muan.. ka phal loa, ka duh lo.. khawngaihtakin vawikhat chiah ngaihtuah leh rawh.."
.
Ka type zawh chuan ka send ta a. Sangtea chuan ding chungin min en reng a, phone ka pek chuan message chu a chhiar a ni tih ka hria, mahse pawi ka ti lo..
.
'A tir chuan mi zawng zawng chu kan tha vek alawm..' a rawn ti a
'Keichu ka danglam miah lo a sin' ka ti a
'Mihring chu mithar kan tawn apiangin kan danglam thin alawm..'
'Ani khan ngaihzawng nghet tak nei rei chungin min ngaizawng a.. a tana mi thar chu ka ni mai lo mi? amah ti danglamtu tur chu ka ni lo a mi?' ka ti a
'Nia.. a danglam phah alawm..' a ti a
'A bialnu chuan kan inkar a hre reng reng em?' ka ti a
'Ka hre lo le..'
'Ngati nge min puih a?'
'Muana'n i chanchin min hrilh a.. puih che ka duh alawm' a tih chuan a hma a Muana'n Sangtea hian chhe lo min tih thu a sawi chu ka hrechhuak a
'Hostelah ka let vat ang'
'Nangmah i inhuam hun hunah nimai kha chu.. i duh duh hunah i lo kal thin dawn nia aw' a ti a
'Um..' lawmthu hrilh ka duh a mahse ka sawi chhuak thei ngang lo
'Chuan beer tih vel in tawh miah suh..'
'Muana'n a lo reply tawh em?' ka ti a
'Aih reply lo.. a reply che chuan ka hrilh ang che' a ti a
.
.
Enge thil awmzia hi ka hrethiam loa, hriatthiam pawh ka duh bawk hek lo. Enge tih sual ka nei a, mi zawng zawng hian remchangah min lak mai hi ka hrethiam lo a ni. Keimah leh keimah in tih chak tumin infuih ve thin mah ila awmze nei lo ang mai a ni. Ti hian ka nun chhoh dan tur chu lehkha zir a ni mai a, mahse en ang ai ngawt chuan a har takzet! rilru a hliam nei reng chung chuan hmalam pen a har a ni.
.
Chaw ei dawhkan chu ka kil ve tak nain ei erawh a har talh thung. Keimah vang nge tumah mah han tawng tum an awm loa boruak chu ka ti chhe vek ni te hian ka hria a. U nunui'n min dang nasa viau nangin thlengsil chu ka chuh lui a. Ka sil zawh chuan ka pindan lamah ka let leh nghal a..
.
'Naktukah checkup turin kal ang aw' Sangtea chuan a rawn ti a
'Ngatan?'
'I nu in kalpui rawh a rawn tia..'
'Ngati nge phone call i lak?' ring zet chuan ka ti a
'Min rawn call miau a'
'Ka thiannu te inah ka awm ka tia sin'
'A thiannu u ka nia ka tia' ti a min chhan chuan ka hahdam huai mai
'A that chu..'
'Phone lam pahin kan chhuak dawn nia aw..' a tih chuan ka lu ka bu ngauh a
.
'Saw lam saw hawi teh ka kekawr ka thlak dawna nia' a ti chuan ka ner nang a
'Bathroom ah ti mai rawh..'
'Ka pindan zawk anih hi'
'Nih ka chhuak mai ang..' tiin khum atang chuan ka tho a
'Ngai lo.. boxer ka ha tho a hnuai ah' a ti a
'I van thing tak!'
'Eng chu?'
'Engmah' tiin pindan chu ka chhuahsan ta a..
.
'I la zo lo mi i va rei ve' tiin khawngka chu ka kik dat dat a
'Zo tawh lo lu rawh..' a tih chuan ka lut a..
'Enge i zawn a?'
'Ka pendrive' tiin khum hnuai vel chu a lo bih duk duk a, a awmdan vel chu a nuihzathlak ka ti rilru lutul tlat
'Khawi ka lo zawnpui ang che' tiin khum hnuai chu ka bih ve a.. 'I phone in en teh' ka tih chuan a phone chuan a en a
'E! saw' kan ti rual chiah.. a ka che khut chu kan chalah kan intauh chiang hle!
'Ana lutuk!!!' tiin ka chal chu ka dawm vawng vawng a
'Khawi saw nge i tih ve a' a pendrive va ban pah chuan a ti a
'Saw ta mi saw a ni lo mi?' tiin khum hnuaiah chuan ka lut a.. ka thi hmuh chuan ka nuih a ti za lutuk a.. ka bawk deuh thlawp a, ka nui zui uar uar bawk a
'Engee?' tiin a rawn bih ve a
'Saw saw pendrive maw ka ti lawm' nui vak vak pah chuan ka ti a
'Bengek kherna nih hi..' tiin a rawn la chhuak a, ka lo nui uar sauh a
'I nuih a van ho tak..' tiin min rawn en chuan ka lo tum hmuk a
'Enge?' nelawm loh hmel tak chuan ka ti a
'Tikhan nui reng rawh' tiin a tho nawlh a.. ka lu ah chuan a rawn tuai zeuh a, a chhuak ta a.
.
.
Zanah chuan ka tum aia hmain ka muhil ve thei hlauh a, zanlai ah erawh ka harh leh ta tho a. Thil tam tak chu ka ngaihtuah lo leh thei ta lo. Mittui nen ka natna chu ka chhiar kir leh a, hetiang tak hian a ni maw ka lo nat theih tiin ka inngaihtuah hial a ni. A chang chuan ani ang chiah khan ka hlim ve thei alawm tiin ka infuih a mahse ka hlimna ah te nen lam chuan ani chu ka ngaihtuah tel lo thei si lo.
.
.
Zinga ka harh chuan ka lo intap muhil a ni tih ka hrechhuak vat a. Engmah ngaihtuah hman loa awm tum takin khum atang chuan ka tho nghal vat a. Kawngkhar atanga ka chhuah chuan Sangtea a lo ding chiah, ka phu chiang hle a ni!
.
'Engeee?' ka han ti vat a
'Rawn kaih thawh che ka tum chiah a.. i muttui em?' a ti a
'Um tui lutuk'
'Chaw ei hmasa ila.. kan insiam dawn nia'
'Incheina engmah ka keng lo.. hostela kan kal kual a ngai ang' ka ti a
'Nih chuan hetah i inbual anga saw tah i inthlak tha dawn nia..' a ti a
.
.
Hostel kan thlen chuan Sangtea chuan summer house ah min lo nghak a, keichu ka room lam panin ka chho nghal a. Darkar chanve dawn ka insiam chuan ka zo thei hram a ni. Ka chhuk a min hmuh chuan min rawn pana..
'I van rei emm emm' a rawn ti a
'Ka insiam rei thei em alawm..'
'I makeup chuan i mit bui te a khuh vek thei a nih kha' nui chung chuan a ti a
'A nasa viau a mi?' ka ti a
'Aih i lang tha lutuk'
'I hre em? tlaivar thakin makeup tuitorial ka en thin mawle..' ka tih chuan za takin a nui a
'Chuti chu in makeup thiam lo chi i ni lo anih chu..' a ti a
.
.
Damdawiin a kan kal chuan nghah a lo ngaih avangin clinic lam kan pan ta zawk a. Doctor chuan vitamin leh taksa chakna lam hlir min chawh a, keimah ah engmah tha lo a awm loh thu a sawi bawk a. Clinic atanga kan chhuah hnu chuan Police Bazar lamah ka phone siam lam turin kan inkhalh phei leh nghal a. A carah kan chuan lai chuan ka ngaihtuah a, ani hi awm lose engtin chiah nge ka awm ang le. Ward's Lake atang khan ani khan min hruai haw in damdawiin ah khan min kalpui lose, ti hian ka phone chhia zawng zawng hi buaipui lose tih sak tu tur dang ka nei dawn miah si loa. Min hmangaihtu a ka hriat, ka hmangaih em em ai chuan inlaichinna ka neihpui hauh lo ka hriat ngai pawh ni lo hi ka tan vantirkoh a lo ni reng anih dawn hi.
.
Phone lamna tur kan thleng a, rang takin a wallet a phawrh nghal a..
'Hey.. nuam lo nia..' tiin ka purse chu ka phawrh a
'A ho mai mai.. kha kha lo phawrh ve chhen chu..' nui chung chuan a ti a
'Ka pe tho ang che..' ner nang chuan ka ti a
.
'A thar a ang rap' nui chung chuan ka phone chu ka han hmuh zeuh a
'A ni maw? a bo nual ang an tia thil awm sa.. han en chiang teh'
'Chuvang lawm a thar tirh a ang ka tih.. a front camera hi a paw deuhin i hria em?' tiin ka han hmuh a
'Pawt pawh ka hre lo..' ti a a bih lai chuan ka captur thut a, a thlalak rawn lan dan chu a duh lo hmel hle a.. kei erawh chuan ka lo nuih vak vak thung a.


MIDDLE OF NOWHERE (7)
***RENGPUII GUITE***
.
Sangtea leh U Nunui bulah ni hnih ka awm tling ve der tawh mai. Anni min puihna leh fuihna zarah a lang chinah chuan ka tha ve viau, chhungril erawh sawi fiah thiam phak baka hliamin a la awm thung. Ka rilru a na em em a, awm ngaihna ka hre lo a ni ber zawk. Chumi piah lamah chuan Muana'n ka biakpawhtheihna zawng zawngah min block tih ka hre leh zel nen tah pawh hi a chhuak thei tawh lo a ni ber.
.
Kumin atana class kan tan ni hmasa ber chu ka kal loa, a tuk lama hostel a phei erawh ka tum tawh a. Sangtea te pahnih hna lama an kal avangin keimah chiahin inah ka awm a, inngaihtuah lungpuam duh lo teh mah ila mittui hi a rawn tla leh ringawt thin. Ka nu te chuan min ngaihtuah em em a, Muana nena kan inkar te hi hrilh duh viau mah ila an rilru tih hreawm ka duh loh avangin ka sawi duh rih lo a ni.
.
'Thla thum pawh tling lo inlaichinna vang maia tlachhe tur ka ni lo.. ka dam dawn alawm' tihin ka infuih a, chu chu Sangtea min fuih dan pawh a ni. He khawvel hi chu inthenna ram a ni a, inngaizawngte pawh an inthen a.. chutiang bawkin damchhung kawppui atana Pathian hma a intiam te ngei nupa te pawh an inthen fova, innei tluan ta te pawh thihna in a pawt then anih si chuan inthen turin inlaichinna hi kan siam mai mai a lo nih hi. Mahse, ngaihzawng ngah duah lerh tak anga an sawi thin te pawn an tana theihnghilh theih loh khawpa hlu pakhat tal an nei thin an tih ang hian ani chu ka tan a special bik em em a, a chhan ka hre bik lo.. a tir atang khan ka tana a bik liau liau a ni tih ka thinlung hian a hria a ni.
.
.
Ka bag ka siam fel lai chuan ka phone a rawn ri a, hmanhmawh takin ka chhang vat a.. Sangtea a lo ni a...
.
'Hello..'
'Zanin inthlah dan chaw ei chhuak ila..' a rawn ti a
'U Nunui te nen a mi?'
'Aih.. a tir chuan rawn kal ve chu a tum a, hna thilah an ei chhuak ve dawn tho a..'
'Tel ve se a nawm dawn nen'
'Nia.. insiamna tur i kawl awm si loa, taxi in lo va phei mai la.. hostel ah ka lo lam dawn che mi niang' a rawn ti a
'Umm nimai.. ka phei nghal hman reng, ina mahni chauh a awm ai chuan phei vat ka duh' ka tih chuan a rawn nui a
'Awle.. anih ka dah aw.. inthuam lum la..'
'OK'
.
.
Ka insiam zawh chuan hostel lama phei tumin taxi ka chang a. Harsa lo takin taxi hmu mah ila traffic a jam nasat em avangin ka tum aia tlaiah ka thleng a. Ka insiam lai velin Sangtea'n min rawn call a, office atanga a rawn chhuah dawn chiah thu min rawn hrilh chuan keipawh ka inpeih vat tur thu ka lo hrilh a, kan inbiakna chu kan ti tawp leh ta nghal a.
.
.
'Khawi lai hmuna ei nge i duh?' a cara ka thut fel velah chuan a ti a
'I ti fel tawh maw ka tia..'
'Fel chuang nang i duh i thlang ang chu ka tia..' ka ti a
'Nih chuan Deja Vu ah nimai' nui chung chuan ka ti a
'Ok.. i thu thu le..'
'Mi an tam rap mai mawle vawiin hi.. traffic pawh a jam nasa tawp..'
'Vawiin eng ni nge i hre lo mi?'
'Aih..'
'Anih date en la..' a tih chuan ka phone ka phawrh a date ka en pah chuan 'Feb 14.. Ehe vawiin Valentines Day maw?' ka han ti deuh hluai a
'Aw.. i hriat ka ring ania' nui pah chuan a ti a
'Teuh lo.. class kal loh chuan eng ni nge ka hre ngai lo..'
'Pawi hleinem..' a tih chuan ka nui seih a
'Nikumah engtin nge i hman?' ka ti a
'Aaa.. nikum chu inah kan tawm nileng.. kei leh Jerry leh Muana' a ti a
'An inluahah khan i awm ve thin maw?'
'Umm.. i hria maw ka tia.. Muana te hi kan junior an nia..' a tih chuan ka ngawi reng a.. nuam lo a ti leh deuh a nih hmel amah chu a rawn tawng leh a..
.
'Nang ve.. nikum Valentines day engtin nge i hman?'
'Ihh.. Eddie nen..' nui chung chuan ka lo ti a
'I bialpa maw?'
'Ka ex a ni tawh..'
'Oh.. Deja Vu ah tho mi?' a ti a
'Aih.. hmundangah.. mahse Shillongah tho'
'Heta awm ve tihna mi?' a ti a
'Umm.. awm ve.. mahse kan College kalna inang loa'
'A nawm dawn chu.. tinge tunah i duh tawh lo mi?'
'Ui chiahin an luak hnu an ei thin' ka tih chuan a rawn nui chhuak hak a..
'Chutia nih chuan Muana pawn lo pan leh che se i duh tawh dawn lo tihna mi?'
'Aman alawm min luak chhuah.. ka luak chhuak ve hleinem..' ka lo ti a
'Anih nangma then ni ta se..'
'Ka hre lo..' tiin ka lo chhang a
'A tan chuan ui nih pawh i hreh lo nimaw..' nui hak hak chung chuan a ti a
.
.
Kan thlen chuan inngaizawng kaldun an lo tam ngang mai. A then kan lo inkuah ngen ngen a, a then kut an lo inchelh rial a.. a laih thlak ve det. Dawhkan awl awmah chuan thawktu zinga pakhat chuan min hruai vat a, ka inchei dan te chu ka zak hnuhnawh.. chaw ei chhuak tur pangai ang chauhin ka chhuak a, mi nalh tak takin an rawn kal teuh dawn tih hre hek lo. Mahse, indate pawh kan ni chuang loa tiin ka inhnem mawlh mawlh mai a ni.
.
.
'An inngaizawng hlawm tawp' ka han ti a
'Hnamdang chu an heti tlat zel..'
'Nia.. mahse an zalen a, nuam ang Mizoram ah han inkeih ve ngawng ngawng mai ila lungin min vawm duh ang..' nui vak vak chung chuan ka ti a
'Nia ti raw.. Ehe.. a mak tawp' a rawn ti a
'Enge?'
'Tun anga ka awmdan ang hian ka awm tawh tlatin ka hria.. i awm ve ngai em? a rawn ti a
'Umm ngai e.. tiang kha Deja Vu an ti' ka lo ti vat a
'Nimaw..'
'Umm tak tak alawm.. ka thil chhiarah ka hmu tawh'
'Chumi vang chu ni ngei ngei ang Deja Vu Restaurant a kan kal' a tih chuan ka nui a
.
.
Eitur rawn thleng chu kan ei dun melh melh a, ei tui lo mah ila Sangtea ka zah em avangin ka ei lui ve tang tang a ni.
.
'Weekend ah inhmu ziah ila i lut tawh dawn sia..' a rawn ti a
'Saturday ah hna in nei ngai lo mi?'
'Um neih ngai loh kha.. i hre ve reng sia'
'Nih chuan nuam viau ang.. chuan Sunday ah inkhawm rual thin ila' ka ti a
'Um.. i duh te chuan'
'Ka taxi fare ka save leh ta..' nui har har chung chuan ka ti a
'Hm.. van phakar ee'
'Nge?'
'I taxi fare i save duh vang mai maiin min sawm a'
'Chutia i ngaih tlat chuan taxi rate in ka lo hamng thin mai ang che' ngeiawm deuh chuan ka ti a
'Hmm.. ngeiawm hi chu i thiam ve ngawt mai'
'Haha.. ka til thenna a nia' ka tih chuan a nui ring thut a, midang ho chu an rawn hawi thup bawk a.
'Nangmah vang'
'Engeee?'
'Min rawn en thup kha'
'Nge i nuih vak??'
'Engmah' tiin mi a chhiatkhum zeuh chuan ka nuih a ti za lutuk tlat.
.
.
Resataurant atanga kan chhuan pawh chuan mi hmuh tur an la tam khawp mai. A vawh em avng chuan keichuan haw vat vat ka duh a. Sangtea chuan kalna tur a neih thu sawiin ke in kan thil eina bul lawkah chuan kan kal a. Archies Gallery ah kan lut dun a, enge maw a tih dawn ni tihin ka ngaihtuah a.. ani hian bialnu a lo nei ru reng anih dawn hi! Dawr a thawk zinga pakhat chu a be mawlh mawlh a, anni pahnih chuan dawr chung lamah an inzui chho a, keipawh chuan ka zui ve tawp a..
.
'Enge i lei dawn?' ka ti a
'Table Lamb.. min thlanpui rawn aw..'
'I bialnu ta tur maw?'
'Teuh lo mai..'
'U Nunui ta tuir maw?'
'Aih..' tih chiah in min chhang a..
.
.
Table Lamp nalh tak tak ka hma a a intlar thut ka en chuan Guwahati a Muana nen kan bazar lai, Teddy Bear min lei sak ni kha ka hre chhuak a. Kha ni ni khan Table Lamp nalh tih deuh mai ka hmu a, ka awt em em a mahse kawngah ka tih chhiat a hlauh avangin Shillong a min leisak tur thu min hrilh a, Teddy Bear min lei ta zawk anih kha.
.
'Khawi hi nge nalh?' ka phu zawk..
'Maw?'
'Eng hi nge nalh i tih ber? a rawn ti leh a. Ka en kual dan dan a, Guwahati a kan hmuh ang chiah chiah nalh ka tih em em ah chuan ka kut zungtang chu a tawp chat a..
'Hei maw?'
'Umm.. hei hi a nalh..' ka ti chuan dawr a thawktu hnenah chuan pack sak turin a ti ta a.
.
Muana hriatchhuah theihna thil ka hmuh vang a ni ngei ang ka mood chu a off chiang ngei mai. Dawr atanga kan chhuah chuan tawng pawh ka tawng tha thei tawh lo. Carah kan lut a, Sangtea chuan thil dik lo a awm a ring a ni ngei ang mi a en reng a..
.
'I tha em? a rawn ti a
'Umm..'
'Vawiin hian thil pek i dawng em? nui deuh chung chuan a rawn ti a
'I hriat ve reng hi' lungawi hmel chiah lo chuan ka ti a
'Anih kha lem.. Happy Valentines Day.. ngaih loh lamah ngai lo la.. Valentines Day pawh ni lo mahse lei sak che ka tum tho a nia' a tih chuan ka hrilhhai takzet! He thil hi Muana'n a tih tir chiang a ni.
'Hei hi tu tih nge?' ka ti zawi sep a
'Aw.. keimah'
'A ni lo..'
'Tu tih nge i rin a?'
'Muana..' ka tih chuan thawk a la vak a..
'Enge a tih anga i ngaih ringawt theih? Biak pawh kan inbe ngai mang hleinem..' a ti a
'Tak tak a mi?'
'Um.. a lungawithlak teh chiam lo a nia aw..' a rawn ti a
'Anih Sorry.. mahse ka la thei loang' ka ti a
'Keipawn..' tiin a motor khalh laia rilru pe daih niawm takin hmalam en in a dak a..
.
In thlen thlengin kan inbe ta miah lo. Ka rilru tak chuan nuam lo ka ti a ni. Ama rem hriatna a min pek a lo nih tak tak phei chuan midang min pek anga lo ngaih kha a lawmawm vak lo reng ang. Roomah lutin Table Lamp chu ka khai a, plugah ka fit a.. a eng te chu a mawi takzet. Sangtea hnena sawi ka tum lai chuan ka inthlahrung leh hnuhnawh a. In kan thlenna  arei tawh viau a, inthlak tur pawn a la rawn lut leh ta miah lo a, biak dan tur chhuanlam ka ngaihtuah ta char char a..
.
.
'Sangte..' tiin ka han au lang lang a
'Ummm..' zawite chuan a ti a
'Lo kal lawk teh a mak rap..' ka tih chuan a lo phei thawm ka hre nghal a
'Enge a?'
'Kan test khan a tha reng sia.. a eng miah lo' tiin dawt ka sawi a
'Khawimaw?' tiin a han en a
'Hei ka fit a, plug ah ka on thlap a' ka ti a
'Amah ah i on lo anih hi..' tiin Table Lamb ah chuan  a hmet a.. a rawn eng ta a
'Nih hi.. a mawi ti raw..' ka ti a
'Umm..' ti a thawh leh mai a tum a
'Zankhua in ka on char char dawn' nui chung chuan ka ti a..
'I on chuan i duh duh ka pe ang che..' a rawn tih chuan ka hahdam huai.. a lungawi lo tawh lo tih ka hria
'I duh duh min pe turin lo inring rawh'
'Engah i muhil thei lo..' a tih chuan ka nui hak a
'Sangte, beer in mai mai ila.. naktuk ah ka phei tawh dawn sia
'I tah dawn loh chuan..'
'Enga?'
'Hmeichhe rui tap ka ngai thei lo..'
'Nih chuan a hma khan ka tap sia.'
'Kha kha chu tap lo la a mak zawk amithei a' tih pah chuan a chhuak a. Beer can hnih a rawn la a, khumah chuan kan pahnih a in in kan thu dun ta a.
.
U Nunui ngah pahin Beer kan in a, kan titi tui ngei mai. Ani nen chuan kan duhthusam te, kan nun kal tawh te kan inhrilh dun a. A sawi dan atang chuan chhungkaw awm thei tak fa a nih hmel a, nasa takin Muana pawh a lo pui thin a.. Muana seilenna fahrah In pawh naklin lamah chuan pangai taka din chhohpui a tum anih hmel. Chu mai nilo in ama pualin UNICEF kal tlanga Organization din a tum thu te a sawi tel bawk a.
.
Keipawh chuan kan chhungkaw sumdawnna enkawl a zauh zel ka tum thu te ka sawi a. Ani bulah chuan Muana nena kan inkar intan chhoh dan te, ka nu leh pa in hnaih lo tura min tih dan te leh an mize inthlak danglam avanga fa lak anga ka inngaih te chu ka sawi a.
'Anih tunah ila in ringhlel em?'
'Teuh lo.. anu te khan a nihna dik tak an lo hria a niang..' ka ti a
'Chu chiah ti raw.. nu leh pate hian kan tana tha an hre ber..'
'Ka hrechhuak har a ka vannei zawk ti raw..' ka tih chuan a nui suk a, a lu a bu nghauh a.
.
.
Kum hmasa ang chiah a ka nunphung pangai ang zawh tumin hostelah ka lut leh ta a. Nitin class kalin zanah lehkha tlem tlem ka zir bawk a. A hma chu ka ang thei lo alawm mahse tluk erawh ka tlu chhe em lo. Esi te chuan bialpa ka neih vanga induh ah te min puh a, kan chanchin ka thlen thlak hnu a ka hrilh leh tak miah loh te chu vui nan an hmang a, engkim hi hria se min khawngaih zawk ngei ang tih ka hria a ni.
.
Zan khat kan titi ho na ah chuan sex lam kan sawi kai a. Keichu enge a an tih te min zawt ta vak vak hlawm a, an fiamthu emaw tiin ka lo fiamthupui a mahse an sawi tak zelah chuan Sangtea bula ka awm char char chhung khan Muana nena riak dunah min lo ngai a lo ni a. Ngaihtuah chian chuan a awm ve reng. Ka ngaihtuah a.. an ni chu hrilh ka duh a mahse bul tan dan ka hre lo, ka mittui in hma a hruai leh zawk tlat si a. Thei leh thei loin ka thil tawn chhoh chu ka han sawi meuh chuan ka kiang a awm hmeichhe lungno thah te ka vel tap vek a ni ta ber a. An ni chuan sawi mai tur an hre lo, mahse min khawngaih a ni tih ka hre thei a ni.
.
Ka sawi lan leh vang a ni ngei ang, mut theih loh phah nan ka hmang leh ta. Kan pindanah theuh awmin mu vek tawh mah ila kan hostel a thian kawm bik te nen a group kan siam ah chuan min ngaihtuah vangin thu nawi tak tak sawiin min tih hlim an la tum reng hlawm a. Chutia ka pnline reng lai chuan Sangtea message ka dawng a..
.
'Dar 1 a rik tawh hi' a rawn ti a
'Nia.. ka muhil thei loa'
'Ngati nge? i dam lo mi?'
'Ka ngai' ka va ti leh tawp a
'Amah vang bawk maw?'
'Umm.. a har em a ni..'
'Ka lo call ang che aw..'
'Umm'
.
.
'I tap leh em?' a rawn ti a
'Aw.. ka thiante ka hrilh a.. ka tap lo thei lo..' ka ti a
'I ti tha lutuk ania.. i chak sawt lutuk.. chuan i pal tlang vek thei ang'
'Nia.. ka tum alawm..'
'Thian kawm tam deuh la.. mahni a awm ngut ngut a tha lo.. i duh duh hunah i lo phei thei aw, Nunui pawn a ngai lutuk che nia' a rawn ti a
'Um ka hria lawm.. in bula ka awm khan ka pangchang zawkin ka hria a..' ka ti a
'Pangchan theihna neih loh ai chuan a tha zawk..'
'Sangte..'
'Umm..'
'Awm lo la chu ka inthat daih ang' ka ti a
'I a mai mai e aw.. mipa pakhat vang mai maia inthah i tum a?'
'Ka hre lo..'
'Ihmaw.. na viau angah i inngai maithei a ti raw.. mahse nangmah in en let ka engvanga duh tlat nge i nih? I hmangaih anih chuan thu hran mahse i chapo vang leh hnawl nih i hraitthiam loh vang pawh a ni thei tho a nia..' a tih chuan sawi dik ka ti rilru hle a
'Nia ti raw.. bakah lo hmangaih pawh ni ila.. ka chapona vangin ka kalsan thei ang..' ka ti a
'Kha kha nimai lawm.. engkim hian thatna leh that lohna  anei vek ania chapona chen hian' a ti a.
.
.
Kan inbiakna kan tih tawp hnu chuan Sangtea thu min hrilh te chu ka ngaihtuah let a. Ni e, ka lo hmangaih emaw hmangaih lo emaw ani kha ka kalsan thei ang. Ka hriatrengna a cham ve mai pakhat a ni tawh anga.. ka tun hun leh la hmalam hun erawh a tibuai pha ve tur a ni lo thung ang.


MIDDLE OF NOWHERE (8)
***RENGPUII GUITE***
.
Muana nen kan inthenna pawh thla hnih lai a liam ve ta reng mai. Nunphung pangai zawh chho in nitin class ka kal a, weekend apiangin Sangtea nen kan chhuak harh thin a ni. Ka hostel thiante pawn min pui nasa em em a, a tir lamah ngat phei kha chuan keimaha awm an phal lo tawp thin. Hah ngawih ngawih chang leh inthlah dul duhna rilru ka put chang te hian heng kei min ngaihtuah em em tu te ka ngaihtuah a, anni vang tal hian chak ka tum tang tang thin.
.
Class tum loh deuha kan ban hma avangin Sangtea te inah insuk ka tum a. Sangtea ka call a a lak theih loh avangin U Nunui ka call a, ani chuan Sangtea thianpa, mikhual an neih avangin kawngka an kalh loh thu min rawh hrilh a. Insu tur chuan ka insiam a, an in lam ka pan ta a.
.
.
Ka va thlen phei chuan U Nunui sawi angin kawngka chu tala in an kalh loa, mahse hawlh kalhin a lo awm thung a. An mikhual chu khawi ah emaw a kal anih ringin kawngka chu ka hawng a, ka lut nghal mai a. Engmah dang ti hmasa loin washing machine ah chuan ka thawmhnaw ho chu ka dah lut a, khawl chu ka nuai tir ta a. A hnu rei vak loah  choka lamah thawm ka hria a, en tumin bathroom atang chuan ka chhuak a. Ka hma a ding chuan min ti phu chiang kher mai. Chetna chang ka hre loa, ka khur vek bawk. Chuan, ka na em em bawk. Ka tha tawh emaw tih lai hian ani ka hmuh leh chiah chuan ka lo la theihnghilh miah lo a ni tih ka hrechhuak thar a ni.
.
'Enge i tih?' mak tih hmel tak chuan a ti a. A hmelthat ngaiin a lo la hmeltha reng a nih hi
'Ih.. ka insu..'
'Oh.. nih chu.. va insu rawh..' tiin mut pindan lamah min luhsan nghal daih a.
.
Khatiang khawp a mihring inpawh thin kha hetiang khawp hian a nimaw a lo inhlat theih! Ani ka hmu leh hi ka lawm nge lawm lo pawh ka hre lo. Mahse, ka na thar takzet a ni. Nichin khan Sangtea'n ka call chu chhang se kal lo turin min ti awm si a, engvangin nge U Nunui kha ka call leh kher! Chutia ka inngaih vak vak lai chuan ka phone a rawn ri a, Sangtea a lo ni a..
.
'I missed call ka hmu chiah' a rawn ti a
'Ihmaw in inah insu turin ka phei a...' ka ti chuai raih a
'Enga? I tha em?'
'Umm..' tih pah chuan ka mittui a rawn tla lek lek a
'Ka lo haw nga in hostelah ka va dah ang che. A tha em?'
'Um tha..' ka ti tham tiak a
.
.
Ka insuk lam reng reng ka ngaihtuah thei tawh lo. Tah vak mai chu ka duh a, mahse chutianga min hmuh ka duh bawk si lo. Shillongah hian enge a rawn tih le? tih ngawt chu ka buaina a ni. Chuan, min hmuh hian a danglamna pakhat mah a nei lo tih ka hre thei a ni. Chu chuan ka natna chu thinrimna in a rawn thlak lek lek a, min ngaihsak tur a ka duh vanga thinrim erawh ka ni lo. Ti khawpa min tih nat hnu pawh a zahna pawkhat mah a nei lo leh inthiam loh hmel pawh a awm loh avang chuan ka dem takzet!
.
Ka inngaihtuah thinrim chu ka insum zo lo mai dawnin ka hre hial a ni. Mahse, ka ngaihtuah tawp mai thei lo! Ka hriat loh hlan chuan machine ka chum leh dawt thin a, keimah leh keimah ka insehruh a ka au chhuak vak hial a ni.
.
'Enge ni ta?' ka hnung lama tawng thawm chuan ka thinrimna a rawn tih sosan belh chiang teh e
'ENGMAH!'
'OK' tiin a let leh thawm ka hria a..
'Hmingmuan!' hawi let miah loh chuan ka ko a
'Awih..' zang vaha a tih chuan thawk ka la vak a
'Eng angah nge i inngaih a?'
'Enge awmzia?'
'I hria.. engkim i hria' tiin ka hawi let a, ka au vak bawk a
'Tikhan awm teh suh..'
'Huh.. ka awmdan tur leh zel ah lo buai suh..'
'Anih chuan' a tih lai mek chuan  Sangtea a rawn lut a
.
'In tha em?' mak tih hmel zeta min en chhawk pah chuan a rawn ti a
'Hei.. a that vak loh hmel' Muana chuan a rawn ti a
'I insu zo tawh em?'
'Aih..' Sangtea ka han hmu chu ka tah a chhuak takzet!
'Khawi su dun lawk ila.. nge naktukah ka lo dah zawk mai ang' tih pah chuan min rawn pan hnai a.. chhan mai dan ka hre lo
.
'Sang, lehkha chu i rawn hawn em?' Muana chuan a lo ti a
'Aw hawn..'
'Khawi maw?'
'Aww.. nakin ah pawh kan inpe thei reng alawm.. vawiin a tih fel tur pawh a nih loh kha' thinrim aw ki lek lek chuan Sangtea chuan a ti a, keimah min ngaihtuah vangin a thinrim tih ka hrethiam nghal vat a
'OK' tiin luh a tum a
'Sangte va pe rawh.. ani chu amah chiah a inngaihtuah thin alawm.. chu lehkha ringawt chu a rilru ah a awm leh reng tho anga.. nakin lawkah a rawn dil leh tho ang che!' chang fak chuan ka ti a
'Khawngaihin i lo ngawi thei em?' ani pawh a thinrim ve tho niin a lang
'Puih che ka tum mai a nia..' ka lo ti vat a
.
'Muana lut rawh.. hmeichhia a nih hi..' Sangtea chuan a ti a
'Hrethiam rawh Sangte.. nangmah ang anih loh saw.. a rawn chawrchhuahna atanga chhut chuan a pangai zawk khawp alawm' ka sawi rual chuan keimah zawk chu ka na vawng vawng thei hial a ni. Che miah loin Muana chuan min en reng a, awm ngaihna ka hre lo! Chhuatah chuan ka thu tung a maimichhingin ka hmai ka hup ngar ngar a, ka insum thei lo chu ka tap chhuak hawk a!
.
'A tha vek.. i tihpalh anih kha.. i tihpalh' tiin Sangtea chuan min rawn kuah a. Muana chuan min rawn pana a, ka hma ah chuan a khup pakhat chiah ringin a rawn thingthi a.  En pawh en tha ngam lo chuan ka mit ka chhing a, ka mittui hru a a kut a rawn dah chhuah chuan ka phu deuh ti tih a..
.
'I sawi dik chiah alawm mate.. inthiam lo duh miah suh.. chawrchhuahna hian a hril thui lutuk alawm. Chuan keimah ang fahrah in atanga seilian vang chuan heng ang mittui hi tla tawh suh se aw.. i hmel a ti chhe vek. I hmel ti chhe turin engmah ka nih loh hi..' a rawn ti a. Pindanah min luhsan ta a..
.
'Ka tihpalh tak tak..' tiin ka phun char char a
'Um i tihpalh alawm.. tho rawh.. khawi ah emaw chhuak ang..' tiin min kai tho a
'Hostel ah ka let duh..'
'Aih ngai lo.. i hmai kha khawi phih lawk ang..' tiin min kai phei a, a kut chu ti huh in min phih sak mai chu a tum a
'Hey.. ka phih mai ang' tiin ka lo dang a
'Ka phih ve duh hrim hrim alawm..'
'Aih.. ka  duh lo' ka lo ti a
'Anih ka ti huh sa tal..' tiin ka hmai chu a rawn phih a "puaakkk ah..' a han ti pah kher a, a nuih loh theih loh!
'Khawi ka phih zawm mai ang..' tiin nui vun vun pah chuan tap chu ka on a..
.
.
'Insum ve deuh tawh tur aw.. in inhmuh leh hunah chuan engatan mah ngai lo angin i awm tawh dawn nia..' a ti a
'A awmdan ngeiawm zia i hre lo anih kha..' ka ti tham tiak a
'A duh tawkin ngeiawm ang hmiang..'
'I thinrim deuh nimaw..' ka tih chuan kan inpawh tawh zia ka ngaihtuah chhuak a
'Rim lohna chi a nih loh kha.. in pahnih awm dam ve ve kha a mawi lo lutuk.. naupangchhia ang mai..' a ti a
'A chapo em anih kha!'
'Nangpawh i chapo!'
'Chapo turin min tih kha..'
'Khatiangah ka ti lo..' a ti ram hmak a
'Mi rilru nat laiin min vak a..' ka ti a
'Min thik deuhin ka hria inpa hlui khan' a tih chuan thil ka ngaihtuah vang vang a
'I ti ve tho mi?'
'I ti ve tho zawk a mi?'
'Umm..'
'Tih thik zel i duh em?' nui vur vur pah chuan a ti a
'Ka hre lo.. i thianpa nih kha..' ka ti a
'Hmangaihna leh indona ah chuan a thiang vek..' a rawn ti a
'Tunge inhmangaih a? tunge indo?' ka han ti a
'In pahnihin..'
'I bialnu khal deuh kha i hlau lo mi?'
'Ka bialnu a ni ve ziah lo..'
'Haha.. atang na theii'
'A ni lo miau a..' a ti a
'Ka lawm e.. ka zia leh hawk tawh.. i awm loang tih ka hlau..' ka ti a
'Ka thu sawi chu ngaihtuah tha rawh aw..'
'Eng chu?'
'Inngaihzawn..'
'Muana rilru ka tina thei lo..' ka ti a
'A na loang.. a thian hnaih tak ka ni a... a na loang!'
'Anih chuan engvanga inngaihzawn duh nge i nih.. tih thik tur berin a thik dawn loh chuan..'
'A chhan chu ka duh vangin.. lo inngaihtuah ang che..' a tih chuan ka ngawi reng a..
.
.
Ka rilru a han nat tak tak a, hreawm nasa tak ka tawrh lai kha chuan a mi hnaih takte hmanga tih nat let kha ka chak thin. Vawi duai lo Sangtea pawh inngaihzawn derpui a sawm ka tum a, mahse ka thulh leh ziah anih kha. A hmelchhe loa, a pian a thing hek lo. Amaha thiamna hmang hian hlawhtling dawn lo pawh nise a chhungte pawisa hmangin a hlawhtling ngei dawn tih ka hria a ni. Chung ang a hlawhtlinna ni a hmuh thleng chuan kan inngaizawng lo pawh a ni thei, mahse miin tunge ka bialpa tiha min zawh chuan a hming piah lamah hei hi ka sawi a ngai ang, a hna dinhmun leh a hmalam huna a tih tur thlengin a tul phawt chuan! Muana erawh chuan sangtea puihna a rawn la mamawh dawn chauh si a!
.
.
'A hma pawn inbem tir rawh ka tih ziah kha.. ngaihtuah vak tur a awm lo..' Esi'n a tih chuan ka ngawi reng a
'Muana a beiseiawm loh zia i hriat kha..' a rawn ti leh a
'Ka hria lawm.. bialpa neih kher ka duh tawh lo a' ka ti a
'Engvangin nge i neih loh ang.. bakah i rilru ah Muana ang khan i dah tawh loang.. intih hlimna pakhat ve mai leh i khawhar hnemtu atan chauh i hmang dawn alawm..' a ti a
'Nia ti raw.. mahse amah hi ka duh in i hria em?'
'Um duh lo mahla i ngaina a.. ngainat chuan in duh chu a hla tawh lo..'
'Anih chuan ka chhang dawn mahse min zawh loh chuan ka sawi loang..'
'Um a zawt leh ngei ngei ang che..' a ti a
.
.
Ka mut hmunah chuan ka inngaih nasa hle a, Sangtea chhang tura rilru ka siam chuan hmalam panna tak tak rilru min siam thar hi a ni berin ka hria. Chu chuan a hma a hmalam ka pan emaw ka tih lai khan ka lo pan reng reng loa, ka awm mawl ve tawp tih te nen lam min hriatchhuah tir a ni. Thil tam tak suangtuahin, he ti khawpa a thian mai ka ni chunga min ngaihsak anih chuan a bialnu ka ni anih chuan engtiang taka innghah ngamna ni tak ang maw? Ka hriat loh hlan chuan ka lo suangtuah nasa hle mai, thim hnuaiah mu chungin ka nui mu ver ver mai.
.
Duhna rilru insiam chawp ngai loin ka duh chho ve mai chuan ka hria a, a chang chuan ka inthiam lo lek lek zawk a ni. Mahse, Muana pawn khatianga min kalsan thei anih chuan kalsan ka nih vang hian hmalam tal ka pan ve thei alawm. Inngaihzawnna tak tak a kan luh hma in kar khat chhung nghah phawt ka duh thu ka hrilh a. A chhan min zawh chuan inhriatchian ka duh phawt thu ka hrilh ve a, chu chuan a nuih a ti za kher mai! Ni e, a nuihzathlak viau lah tak a mahse mipa zawng zawng dawl zawh loh mizia ka nei tih hi a hriat ka duh a ni. Ka thin a chhia in ka rilru a no em em a, ka thik thu a chhe hle bawk. Ka nuih ring tluk zetin tah rin ka hreh loa mahse chung chu ka ta a ka ngaih nghet te lakah chuah ka ti lang thin.
.
'Vawi tam tak min tah khum tawh alawm..' tih a text ka dawn chu a chhan letna ka type vat a
'Anih nangmah vangin lo tap ta ila midang bula ka tah i duh em?'
'Aih.. chu chu ka duh loh ber a ni'
'Keipawn chu chu ka duh lo..' ka ti a
'Tih tah che ka duh ngai lo.. mahse engvang pawn tapin i rilru na rawh se chu chu min hrilh la ka duh' a ti a
'A zavaiin maw?'
'Um.. Muana vang anih pawn..'
'Chutiang chu a thlen ka duh tawh lo..'
'A thlen loh nan kan pahnih a theih tawp kan chhuah ve ve a tul dawn anih chu..' a ti a
'Ni e, a dik chiah alawm..'
.
.
Vawi tam tak kalsan ka ni avangin ka tap a, mahse ka bula awm reng thian ka nei thin. Chu ka thian chuan min hrethiam a, min hnem a, chak taka awm turin min fuih reng thin. Mahse, chu ka thian chu ka ngiahzawng a lo ni ta a.. hei hi ka tisual anih chuan a hma aiin ka na ngei dawn tih ka hria. Chung ka hlauhna chu a thleng ngei dawn em ka hre loa.. ka tana tha tur pawh a lo ni thei tho bawk. Chung hlauhna vang chuan hmalam panna kawng ka zawh theih reng a inhawng hi pan loin ka awmna ngaiah hian ding reng ila ka theih chen chen na ka tuar anga, ka tuar theih loh chinah ka tlusawp mai dawn si a. Vawi tam tak Sangtea min hrilh ngei chu ka ngiahtuah thin 'Hmangaihna vanga natna chu hmangaihna vek lo chuan a tuam dam thei ngai lo, mahse hmangaihtu ngai tuam dam tir kher tum erawh thil atthlak a ni fo thin' tih hi. Ani hi tuam dam tura ka beisei awmchhun a ni bawk!
.
.
Min hriatchian ang bawkin ka hre chiang a, kan hlim chho viau bawk. Ka lawm zawng leh duh loh zawng a hre em em a, chu chuan bialpa tha a nihna nitin a hlen thin. 'Mihring chuan mithar kan tawn apiangin kan ngiahtuahna suk thlek a dang thin' tiha an sawi fo thin hi ani anga bialpa tha nei tan chuan a danglam hial thei ang, a chhan chu a theih tawp tak meuh a chhuah si a. Keima finna chuan atana tha ber ni thei tura tumna leh beihna phak thin lo mahse ka tana a that zia ka hmuh nasat pauh leh ka theih anga fela awm tumin ka bei ve thin. Ni e, hmangaihtu dik tak neih tluka hlu a lo awm lo anih hi.
.
.
Final exam nan thla khat chiahin min dang tawh a, kei ai pawn a tang emaw tih mai tur a ni. A hna ah an buai chho viau a, Centre pawh luah luh a ni tawh a kan inbia in kan inhmu hman em em tawh lo. Mahse, a buai viau karah pawh min rawn call ziah a, minute khat pawh inbe tling lo mah ila a thil tihte min rawn hrilh a, tha taka inenkawl tur tea min rawn tih chuan ka lung hi a ti awi tawk em em a ni. Zanah kan inbiak theih hunah chuan lehkha zir turin min fuih tang tang a, rilru a zir chakna a awm loh chang chuan a ninawm lek lek thin. Mahse ti hian ka ngaihtuah a, ani nen hian inngaizawngin a ta ni lo ta ila kha Muana ah khan la nghet tlat ta ila tun ang hian lehkha pawh ka zir tha thei awm si loa, ka tan chuan malsawmna dik tak a ni.
.
.
'Min sawn chhuak dawn a..' call a kan inbiak a a tih chuan ka huphurh lutuk chu ka ngawi reng phawt a.. "'Tawng ta che..' a tih chuan ka han rum nghulh a
'Khawi ah?'
'University kal i tumna ah..'
'Nahh.. ka kalna tur pawh i hre lo..' ka han tia
'Delhi ah kal i tum kha..'
'A chiang hleinem..'
'I kal a ngai nimai.. nangmah vangin khuta awm theih nan ka bei tang tang' a tih chuan ka nui hak a
'Nge ilo beih ve ringawt..'
'I awmna a ka awm i peih tawh chiah lo a ni maw..' a rawn ti a
'Tuna i chhuk daih te chuan..'
'Tun tut tut a ni lo.. in exam zawh chawlh lai vel anih ka ring' a tih chuan ka hlim ru veng veng
'Anih chuan a tha nih chu..'
.
.
Exam ka nei chho a, ka zirlai piah lamah ka hriselna nen lam a ngaihtuah em em a. A tlai bangin hostelah a lo peng thin a, thei hrisel hmel tak tak min rawn ken fo thin a ni. Ka thiante chuan fiamthu in mi an thik em em a, 'in inneih hunah phei chuan tenawm khawpin a duat ang che' te hi an ti fova.. ka inchhuang rilru thin hle. Chuan, min zawh leh tam ber chu 'I ning thin em a ngaihtuah che sia.. over tep?' te an han ti a. Keichuan a awmdan tawk tak hian ani min ngaih tie veng veng thin tih hi an hre lo a ni ka ti thin. A ngaihzawm tawk lekin a ninawm tih hian a fun kim berin ka hria.
.
Exam kan zawh zan chuan zanah min hruai chhuak a, a bulah hlim takin hun ka hmang ani. A tuk tuk leh maia haw ka tumvang erawh chuan a nguai bur a.. a khat tawkin a titau deuh reng mai, a titau rei thei miah lo erawh chuan a ti duhawm zual viau. A chang chuan ani hi ka pa a ang lek lek thin, hamngaih tak chunga mi a enkawl thiam lutuk hian ka ngaihsan a ti zual. Mak tak maiin tihtauh, thinrim leh han vin vak te chu ka ti ngai ta vak loa, a awmdan in a zir vang chu ni tho mahse keimah ka danglam tel anga ka hriatna ringawt pawh hi thil hlu tak chu a ni ve chiang a ni.

MIDDLE OF NOWHERE (9)
***RENGPUII GUITE***
.
Kan haw dawn ni chuan Sumo chhuahna thleng Sangtea chuan min thlah a. A awmdan atang chuan a huphurh tih ka hre reng, mahse a hlim hmel chu ka hmu loang tih hlau ni awm fahranin a nui reng reuh a, a hlim lem lo tih chu ka hre chiang a ni.
.
Kan haw hnuhnun ber tuma ka hawpui te tho Engi leh Esi te ten kan haw ho leh dawn a ni a, haw hmasak tum a hriat chhuah loh theih loh. An ni pawh chuan fiamthu thawh nan tak 'kan hnungah hian a lo thu kur mai anga..' te an han ti chhen a. Sangtea'n a hriatthiam ka hlau deuh si chu mitmeiin ka khap reng hlawm a, tawp mai lo chuan nui uar uar chung an han phuah belh leh ta nghal a.
.
Kan thutna tura ka luh dawn chuan ka kut a chelh reng a..
.
'Fel deuhin lo awm ang che.. hre em?' nui pah deuh chuan ka han ti a
'Hm.. ka fel lo ngai lo. Nangpawh i hnungah lo thu leh pawh nise buai phah kher lo la..'
'Naah!!'
'Enge?'
'Tunge thu se i tih a?' ka han ti a
'I ngaihtuahna mi kha..'
'Ka ngaihtuahna mi chu nangmah..'
'Anih chuan ka lo thu daih dawn mawni..'
'I lo haw dawn kha chhuk hma in' ka ti a
'A chiang lo lawm..' a tih lai chuan ka thiante chuan min lo ko a.. 'Lut tawh rawh le..' tiin ka dar a chelh chung chuan min nawr kal a..
.
.
Sumo ah chuan kan haw hmasak tum sawiin kan nui uar uar a. Kan chuanpuite en chuan a hma anga thil a thlen kha chu a beiseiawm chiah lo a ni.
.
'Rpi hi a hnung a hawi zing riau..' Esi'n zawi tea a rawn sawi chuan kan nui vak vak hlawm a
'Mi beidawng khat tih takah beiseina hi ka nei thei riau a' ka lo ti ve bawk a
'Tu emaw ber hi love story chu siampui leh mai la..' tiin kan inchhaih vak vak hlawm a, a hlimawm phian.
.
Kan ngawih tak thiap hnu chuan thil tam tak ka ngaihtuah a. A hmasa nen chuan inanna pakhat mah a nei lo alawm. Mahse, khang hun chhung reilo te lek pawh khan suangtuahna thui tak min neih tir hman tho si a. Tun ang kan haw hun te nen lam hian ka lo thlir lawk ve diam a, kan pahnih a hawdun ngei ka lo rilruk ve rawih thin anih kha. Mahse, tum ang hian engkim a kal thei si lo alawm le. Chutih rual erawh chuan ka thinlungah tu emaw dik tak zawk dahin a awm thung a, chu tluka vanneihna chu a awm dawn chuang em ni?
.
.
.
Kan inchhunga ka luh te chuan khang kum tam tak chhung kha Muana hre loa ka lo chenna ni mahse ni tlemte chhunga ani a lo len luh ve na hmun anih vang chuan engkim chuan ani chu min hriatchhuah tir a. Ka rilru tak chuan Sangtea lakah ka inthiam lo ru hle a ni. Ani chuan ka theihnghilh a la rin loh zia a tawngkam leh a che zia atangin ka hrethiam vek a, mahse a tan a hreawm ka hlauh vangin a bulah engmah ani nena inngaihbel theihna thu ka sawi lang ngai lo.
.
'Nu, kan inthen tawh..' chaw ei laia ka sawi chuan ka nu leh pate chu an inmelh zeuh a
'I tan a tha zawk alawm..' ka nu in a rawn tih chuan mak tih hmel zetin ka en a
'In hre tawh maw?'
'Engtin nge kan hriat ngawt ang ni..' ka pa chuan a lo ti vat a.
.
"I tha em?" tih zawhna dawn ka phut ve na chuan an hria angah mi an ngaihtir nghal ngawt ang. Midang tan chuan khang inngaihzawnna rei lo lutuk kha chu a ho tham a ni ngei ang. Midang inkar ni tase kei ngei pawh hian ka ngaih ho viau ka ring mahse engvanga han la na bik em em nge maw ka ni le, ka hrethiam lo a ni. Ka bialpa thar chanchin hrilh ka duh viau laiin midang nen kan inthen tih hrilh hnu lawka han sawi chu mawiin ka hre si loa. Kan inthen hun kha hria se awm lo an ti bik hauh loang mahse eng zawhna dang mah min zawt si lo a ni.
.
A hma anga in a tawm chawt chawt loin dawrah kan nute chu ka pui ve a. Midang an buai nuai nuai laia phone lo hum reng bik chu nuam ka ti bik si loa, dawra awm chhung chuan Phone ka khawih hman ngai meuh lo. Mahse, a lehlam takah chuan Sangtea a buai ve tho avangin a zia ka ti rilru hle a, pakhat buai a pakhat lo hman em em bik thin hi chu a nuam vak thin lo reng a ni. Zan lamah erawh zanlai thleng thleng call a kan inbiak loh leh kan intext a, kan la tha tluang zel chu a ni e.
.
.
Ni thum hnu maia Sangtea a rawn hawng ve dawn avangin ka hlim ru veng veng a. Mahse, ni li chiah a cham anga Delhi lamah a chhuk leh dawn a ni. Kei ve thung chuan chawlh thla chanve chauang ka la nei thung a. Khang kan awm hran hun chhung zawng khan inhnial deuh leh pangchan vanga han in tihtauh san te chu nei ve mah ila rilru na khawpa han inhauh kan nei miah lo a, amah ah hian ka nghet telh telhin ka hria a ni.
.
.
Dawra ka puih loh avangin in ka ti fel a. Ka pa call ka dawn chuan an room a Safe Almirah chahbi, a hnathawk pakhat a rawn ken tir thu leh receipt pakhat chu pe turin min rawn ti a. Call kan tih tawp atanga rei vak loah an hnathawk pawh chu a lo thleng ve mai a. Chahbi chu la in an room ah ka lut a. Safe ka hawn hnu chuan lehkha pawimawh ho chu phawrhin an mamawh ang chu ka la ta a. Ka dah luh leh chuan paper pakhat hlui zet tawh mai chuan ka mit a la hle a, ka en chian chuan'HLIMNA CHHUNGKUA' tih hi a chungah a lo inziak kalh a.. a thu intype pawh chu computer a chhut nilo in typewriter hmang a ni a. Chu tih lai chuan Common room lama min nghaktu chu ka hrechhuak zawk a, hmanhmawh taka tho in lehkha chu ka va pe ta a.
.
Ka nu te roomah lutin ka paper phawrh ho chu ka han en leh te te a. Eng em em chu a inziak lo mahse ka hming, ka pa hming leh kan awmna veng bakah Date-Septerber ni 15, 1995 tih a lo inziak a. Engvanga he lehkha hi helai hmuna awm thei nge anih ka hrethiam lo a ni. Chutia ka ngaihtuah kual chiam chiam lai chuan Muana ka hrechhuak a, a hma a ka hlauhthawnna chuan min rawn man leh tlat! Muana nena unau ni anga inngaihna tlat ka neih lai te kha!! Mahse an Home hming chu a dang daih thung si, CARE ORPHANAGE HOME tih a ni daih si.
.
Engmah ngaihtuah hleithei loin ka awm a, ka chhungte ka zawt ngam si lo. Diktak chuan thudik hriat hi ka ngai tawh takzet in ka hria. A hma anga hlauhthawnna ka nei tawh miah lohna erawh chuan tlemin min ti huaisen ve deuh. Ka rindan chuan fahrah In hming saw thlak a ni anga, thlak anih hma in ka awm aniang.. ka ring ngam chiah si lo. He thil hi Muana nu leh pa zawt ila a fuh ber ka ring a ni.
.
.
Sangtea rawn thlen ni a ni a, zing 8 velah In a rawn thleng a ni awm e. Zan lama a lo phei tur thu a sawi avang chuan keimaha program in siamin Muana te in lama a nu leh pate hmuh tumin rilru ka siam a. Ka bagah chuan paper hlui zet tawh chu ka dah a, taxi la in an In lam ka pana. An in thlen hma kawnah chuan din tirin fare ka pe a, ke in an In lam chu ka pan leh ta hnak hnak a.
.
Ka thlen dawn tepah chuan Sangtea an inkawta Phone bia ka va hmu a, ka phu chiang kher mai. Min hmuh lo tih ka hriat chuan a hmuh theih loh turin kawng sirah ka ding a. Sana ka en chuan dar 11:30 a ni a, engvanga phei nge a ni tih chu ka ngaihtuah a. Thian chu an ni ngei alawm mahse Aizawlah Muana a awm tih a sawi loh mai bakah a mut hahdam tur thu min hrilh si a. Ka phone chu la in whatsapp ah ka text a..
.
'Duat i mu mi?' tiin ka va thawn a, a hnu rei vak loah a chhanna ka dawng nghal a
'Um.. ka chau deuh a, nakin ah Airport ah kal ka ngai a..' a rawn ti a
'Engatan?'
'Kan chhungte an rawn thleng dawn a ka va lam ang..'
'Tu in chhungte..'
'Nakin ah ka hrilh ang che, kan insiam ange' a tih chuan ka reply tawh loa. Ka dinna ngaiah chuan ka ding renga, reilo te hnuah motor start ri ka hria a, min hmuh ka hlauh avang chuan ka dinna bula inhnuai chhukthlakna tur stepah chuan ka chhuk ta ringawt a.
.
Engmah ti thei loin kan In lamah ka let leh a, vawiin lama thil thleng kha ka hrethiam lo takzet a ni! Mi zawng zawng hian min bum nimaiin ka hria a, chu chuan awm ngaihna min hriat tir thei lo. Ngatinge min zawng zawng pawh nise Sangtea a tel ve kher tih zawhna chu ka inzawt a. A chang leh keimah ka indem a, mi ka rin hma em thin avanga buaina ngai bawk a ni. A thil tih hi sawi ila engtin tak insawithiam ang maw..? Mahse ka sawi thei loang, engvanga an In lam pan nge ka nih min zawt se eng chhanna nge ka pek ang? Engkim ka finfiah hma chu engmah ka sawi thei lo, heng mi ho zingah hian rin tur pakhat mah an awm lo ka nu leh pa chenin.
.
.
Zanah a rawn kal dawn chiah thu a text ka dawn pawh chu ka chhang duh loa. Hetianga ka lungawi lohna ka tih lam hi a tul lo tiin inhrilh ve mawlh mawlh mah ila han ngawih bopui mai hi thil har tak a ni si. Engvanga thudik inthup awm anga tlata hria a, zawn chhuah tum tal nge ka nih ka inhrethiam loa, lo ni pawh ni ila engtin nge ka tih ang tih ka hre hauh si loa..
.
'Ngatinge i mood a van off hmel em em?' tiin min han ngawk deuh a
'Awihawm loh e..'
'A ni lawm.. min ngaih loh hmel..' a ti a
'Hm.. i ngaihdan nih chu..'
'Tikhan awm suh Lalrengpui..'
'Engee Lalnunsang..'
'Engmah!'
'Naktukah enge i tih dawn?' ka ti a
'Damdawiin a kal ka ngai a..'
'Tunge awm?'
'Kan chhungte vawiin a lo kal kha..' a ti a
'An damlo law?'
'Um.. dam tha loa..'
'Ka lo kal ve..'
'Uang uang lo mai teh..' a tih chuan ka ner nang a
'Ka uang lo aw..'
'Sunday ah kan kal zawk dawn nia.. inkhawm banah' a tih chuan ka lungawi chiah loa
'Khawi damdawiin?'
'Ka sawi dawn lo min zui ru palh ang..'
'Awii.. sawi pawh nila ka lo kal loang..'
'Haha.. nih ka hrilh ang che aw..'
'AIH!!'
.
.
A rawn haw atangin ka beisei angin a awm lo viau, nge ka beisei sang lutuk zawk? Engtik lai pawn damdawiin a chhuanlam reng a, ka rilru tak chuan an chhungte chu haw vat se ka ti hle a ni. Ka ngaihtuahna mawlmang tak te, tul loa thil ni lo lo ka ngaihtuah chhen te chu a bula ka awm chuan ka tawp ve tawh mahna tiin ka lo inngaihtuah ve a, mahse min kawm hlimna hun takngial pawh a nei si lo.
.
Ka pa a zin avangin ka nu nen dawr kan nghak a, Sangtea hnen tangin vawiin ah text ka la dawng miah loa, a last seen ka check chuan zan hmasa a kan inbiak tawpna dar zat ang ala ni a. A la mut ka ring avang chuan keipawh chuan biak ka va tum lem loa. Dawr lamah kan buai ve nak nak avang chuan chaw chhun ei hun thleng pawn phone ka ngaihsak hman meuh lo. Kan ei tur chah a rawn thlen chuan ka nu nen chuan kan ei a, chu tih lai chuan chhungkaw pakhat hian washing machine an rawn en a. A hma lama lo en lawk an nih avangin an la nghal dawn a, kan deliver thinna motor a hlang kai tur chuan kan dawra thawk chuan a pui vat a. Ka nu chu an hlan kai lai chuan a va enpui a, an kal liam ta maw tihah chuan a rawn let leh chu a tlusual hlauh pek a. Ani chu a au thawt a, va kaih thawh a tum chuan a tho mai thei lo.. a ke a bilh sual ni ngei tur a ni..
.
'Midang ka va ko ang aw..' ka ti a
'Aw.. awi a na zek..' a mittui chu a hnam deuh tiam a.. ka khawngaih lutuk chu ka hamhaih vekin ka hria
'Nu ambulance ko mai ang..'
'Hetiang  lekah ambulance tuman an ko ngai lo..' a tih lai chuan kan mechanic a lo lang hlauh a. Ani chuan damdawiin a ka mai a that a rin thu a sawi chuan keipawn ka lo 'aw' nghal hmiah a. Ani chuan taxi min koh sakin New Life Hospital lam kan pan ta nghal a.
.
'Nu purse i keng em?' kan tlan lai chuan ka han ti a
'Aih.. lak ngaihna a awm hleinem ka tan..' a ti a
'Ka keng hleinem..' ka ti a
'Kan thlen chhoh hunah dawrah in let leh mai dawn nia.. khitah ka lo nghak ang che..' a tih chuan ka bu nghauh a
.
.
Casualty ah kan inkuah lut a, nurse pakhat chu lo buaipui hram turin ka ngen a, driver nen chuan dawra pawisa la tura inkhalh phei tumin kan inzui chhuak leh a. Ka pen hlawk hlawk hi a ni ber, tumah ka hmuh awm pawh ka hre lo.
.
'Chho ila.. I jection lak a hun tawh..' tih ri ka hriat aw chu ka hre thang hle tih hrilh nawn ka ngai lo.. Ka ding chawt a, ka hawi let leh a. Ka thil hmuh chuan en chian tumin a hnung zawngin ka tawlh leh a, ka lungphu hi a zuang chhuak dawn emaw tih mai tur a ni. Sangtea chiah kha hmu ila mak ka ti loang mahse a bula ka hmuh pa kha!! A hmel a dang vek a, a mitmeng atanga en chuan mi pangai pawh a ang lo..
.
'Enge awmzia?' ti tham tiakin an bulah ka va ding a.. Sangtea chuan phawk lutuk in min en reng a
'Kal rawh heta tang hian..'
'Aih.. ngati nge hei hi..' tiin Muana biangah chuan ka khawih a, a melh ngai a melh reng.. min en miah lo! 'Tinge a Sangte? Muana hi ngatinge?' bah nuai chuan ka ti a.
'Mami kan kal dawn lo mi?' driver chuan a rawn ti a
'Sangte pawisa lo pe rawh..' ka ti a. Driver nen chuan eng eng emaw an sawi a, an inpe ta a..
.
'Khawnge i nu a awm Rp..'
'Saw tah.. sawi rawh ngatinge?' midang awm ve thup pawh zah zo lo chuan ka tap pur a
'Nakinah aw.. tunah chuan fel deuhin awm rawh'
'He mi vang hi a mi?' ka ti a
'A ni lo.. kan hriatchhuahna  ala rei lo..' a tih chuan keimah inthiam lohna tur chu ka inzawn chawp leh a, ka thaw te chu a tawp lo chuah!
'I nu va buaipui rawh.. a pindan a hruai a ngai a..' a ti a
'Khawiah mah lo kal suh aw..' ka ti a
'I nu i hawpui a ngai alawm..' a tih chuan ka ngawi vang vang a
'Anih ka lo kal leh ang aw..'
'Aw.. kha hei hi la rawh..' tiin a wallet chu min pe a.
.
.
Ka let leh chuan ka nu chuan min lo zawng nasa viau anih hmel, mahse a bulah chuan kan dawra thawk chu ak hmu hlauh!
.
'Nu..'
'Khawnge i kal daih?' a lo ti vat a
'Pawisa engzat nge ngai?' tiin Sangtea wallet chu ka han hawng a
'A ngai lo.. hei Zuala'n purse a rawn keng alawm..' a ti a
'Nu Muana a damlo tih i hria em?'
'Aih. a na viau a mi?' a lo ti sam et a
'Min hre tawh lo..' tap pah ti tih chuan ka ti a..
'Khawi.. i haw phawt ang u..'
'Aih.. U Zual, anu hi inah lo dah rawh aw..' tih leh tlan chu ka rual nghal a. Sangtea min hrilh a room no.chu ka zawng ta ngat ngat a.
.
Rooma ka luh dawn chuan ka inngaihtuah harh zawk a. Ka awmdan hi a mawi lo em? Sangtea bialnu ka ni a, Muana bialnu ka ni lo.. Ngatinge hetia ka awm? Mahse a hmel hmuh khan insum a har a ni. A hawi a vek te, awmze nei loa a phun bul bul te kha.. hmuh reng atana rapthlak khawp a tling ani.
.
Kawngka ka kik dat dat hnu chuan ka va lut a, inchhungah chuan Muana nu leh pa leh Sangtea an lo awm bawk a..
'I lo kal elaw.. i va fel ve..' Muana nu in a lo ti vat a
'Umm..' ka ka ka an leh chuan ka tap a ni mai. Sangtea bulah chuan ka thu a, a wallet chu ka pe a
'I nu chu enge a an? thlah rawh ka tih che kha..' a lo ti a. Han chhan mai ka tum a, ka tawng thei lo. Ka hmui pet chung chuan ka lu ka thing ringawt a, ani chuan ka darah a rawn chul a..
.
Tumah kan tawng loa, a muhil lai chu kan thlir deuh thap a, kan ngaihtuahna theuh kan kawm anih hmel. Ama en reng chuan thil tam tak ka ngaihtuah a, amah vanga nasa taka tap thin ni mah ila hetia hmuh meuh chuan a tawrh atan a na mah mah a ni. Ka thin chu a tawt up up a, thawk ka han la vak a, ka insum thei ta lo.. vawi leh khatah ka tap chhuak hawk a.. Sangtea chuan min rawn kuah vat a, ka samah a chul a. Muana nu pawh chu a inhnit ve faih faih a..
.
'February thla tawp lam khan a lu na ka entir dawn' tiin min rawn hrilh a, keini chuan lu na satliah ah kan lo ngai a. Ani pawn engmah a rawn sawi tawh loa. Mahse vawi khat chu lu hai a a tluk thu min rawn hrilh a khulama a thianten ani pawn doctor a pan leh nghal vat a. Khata tang khan luna satliah nilo angin a na ta vak vak thin anih hmel, a awm hlei thei ta tlat loa, keini pawh kan zuk chhuk nghe nghe a. Khata tang khan doctor te chuan lehkha chhiar leh Phone khawih vel kha an khap deuh bur tawh a ni. April thla khan Neigrihms a doctor pakhat thiam deuh an tih a rawn pan ve a, chutah chuan CT Scan leh test eng eng emaw an ti a, a thluakah tumor a awm a ni tih hriatchhuah a ni ta. Hmanhmawh takin Delhi lam kan pan a, zai vawi hnih teh meuh a tawk a, a lu na chu a awm tawh loa mahse pangai takin a tha chhuak thei ta loa mahse hei min la dampui ringawt pawh hi a hlu khawp alawm. Tunah hian a taksa a chak loh em avangin damdawiin ah hian kan indah lut a, a taksa a fit hunah kan inla chhuak ang...' a pa in a tih chuan Sangtea chu ka hmer ngar ngar a..
.
'Tinge min hrilh loh? Tinge engmah i sawi loh?' ka ti a
'Tuma hriat a duh lo..' Muana nu chuan a lo ti a
'A bialnu in a hria em?' ka lo ti hmanhmawh a
'Tu a bialnu maw?' Muana nu leh pate chu an in en ho a..
'Hria eng..' Sangtea chuan a rawn ti a
'In vaiin dawt min hrilh a..'  ka ngawi rih ta daih a.. Ni e, engvangin nge dawta nung te bulah hian thudik hriat ka tum kher.. A tul lo!
.
.
'Min beng vak vak dawn lo a mi?' Sangtea'n a tih chuan ka ngawi reng a
'Mawh Duat..'
'Tinge mi zawng zawng hian min bum a? Hmingmuana'n bialnu a nei lo..' ka ti a
'Thudik hrilh tur che in min duh em?' a tih chuan ka bu nghauh a
'Hre turin ila chak tawk lo..' a rawn ti leh a
'Ka lo hre lawk vek tawh maithei asin..'
'Anih chuan chak takin awm phawt rawh.. khawngaihtakin..'
'Ka awm alawm.. fa lak ka ni ti raw..' ka ti chuan mak tih hmel zetin min en a
'Engmaw?'
'Hei hi..' tiin lehkha them chu ka pe a..
'Ihmaw.. i vanneih zia i inhria em?'
'Ka hria alawm.. ka hrechiang lutuk..'
'Ka tihpalh' tiin nghet takin min kuah a..
'Naktukah lehkhabu pakhat ka pe ang che.. chutah chuan engkim a inziak vek..' tiin min hrilh a..


MIDDLE OF NOWHERE (10/LAST)
***RENGPUII GUITE***
.
.
(A hmasa in he Story a tir atanga tawp thleng min chhiar saktu te zawng zawng chungah lawmthu ka sawi a. Nangni vang liau liau a tun hun thleng thei hi ka ni a, in lakah lawmthu sawi sen loh ka ba a ni. Nakin zelah pawh min support leh zel ka beisei a, engtik lai pawn fuihna thu dawn ka inring reng tih min hriat sak vek dawn nia. February thla laihawl velah Turkish M&B nen ka rawn let leh ang. Chhiar tawh ru lem)
.
.
Damdawiin atangin Sangtea nen kan haw a, ani chuan kan in kan thlen chuan lehkhabu min pe a,
'I pindanah va chhiar rawh.. hetah ka lo awm ang' a ti a
'Ngati?'
'Ka awm a ngai alawm.. va lut rawh' a tih chuan a thil min pek chu ka hrethiam nghal a.
.
Lehkhabu, diary ang lek lek keng chuan ka pindan ah ka lut a, kawngkhar inkalh hnanin khuma thu chung chuan ka han bih a. Phek enge maw zat Muana hawrawp ngei a inziak hian a lo awm a. Chhiar chak si, hlauthawng bawk si nen chuan ka han thaw halh a. Ka rilru chuan ka tawngtai te te a, chu thuziak chu ka han chhiar tan a.
.
'Mate,
He thil hi ka ziah lai hian i chhiar ngei ang nge chhiar loang tih ka chiang bik loa.. i chhiar mek anih erawh chuan ka dinhmun hi a tha lo hle a ni ang. Mihring hi khawvela kan lo pian hian dinhmun tur hrang theuh a duan sa vekin kan piang chu a ni ngei anga, a then chu vannei tak tura duan an ni a, a then erawh vanduai ngawih ngawih tur a duan an ni thung. Chung vanduaina kara leng tur zingah chuan kei hi ka tel ve in ka hre thin. Mahse, thu pakhat Bill Gates a sawi 'Retheihna nen i piang anih chuan i thiam loh a awm lo. Mahse, rethei taka i thi anih erawh chuan i thiam loh a ni' a tih kha ka hre reng thin. Ka rilru chuan hausa taka thih a tum ve ngar ngar a, ka hausak tumna erawh ka lo seilenna hlatah ka dah ngai lo thung.
.
Theih tawp tak meuh chhuahin nun ka sual ve a. He khawvelah hian ka thisen zawmpui pakhat mah an awm lo angin ka ngai thin. Ka lo seilenna fahrah In atang chuan a zir chhuah theih ang ang chu ka zir ve a, mahse ka vanneihna hi ka vanduaipui ni ber thin a. Rualawhna chang hre tawkin rual ka pawl ve a, mi te neih ang neih ve duhin ka awt a, mahse ka awh rual rualin ka beidawng lehnghal fo thin. Mahse, ti hian ka inhnem ve a, 'Ka seilenna hmun atang hian kei anga vannei hi an awm miah loang' tiin.
.
Tuna ka thil sawi tum hi ka hrilh ang che nge hrilh loang che tih ringawt pawh hi vawi duai lo ka inngaihtuah a mahse nang chauh hi ka innghahna awmchhun leh ka ngaihtuahna a ka ai awh thei i ni si a. Hei hi i chhiar anih chuan khawvelah hian ka awm tawh lo maithei a, ka awm anih pawn ka dinhmun a chhe hle ang ka tih tawh kha.  A hmasa berah chuan puitling turin ka duh che. Engkim tuar a sual chhuak thei turin ka duh che Bawihi. Ka duh dan ang tawka chak i ni tih ka hria a ni, chu ti ni lo se he thil hi i chhiar ngai loang.
.
Ka hmuh hmasak ber zan che khan keimaha i thawh dan kha a mak ka ti. I hmel a tha in hmuh i nuam tih chu sawi kher ngai loin i hria ang. Mahse, keimaha i thawh dan kha rei tak ka mi lo nghah tawh, ka thinlung ruak ngawih ngawih luah khat theih khawpa zun i nei ni berin keichuan ka hria a ni. Chu chuan inngaihzawnna ah ka luhpui che a, kha kha ka nunah ka thil tih tawh a hlimawm ber leh sual ber a ni. Pian tirh atang hre tawh ang mai che in ka pawh nghal che a, i thil tih engkim ka hlimpuiin ka nuihpui a. Kha tih hun chhunga ka hlim zia kha i hrethiam lo zawk ang.
.
Mi tam takin inang min tih thu an sawi fo te kha ka hlimpui thei em em a. Tin, kan pian kum, thla leh ni chena inang te khan ka ta tur ngei inih min rin nghet tir tlat thin. Mahse, a lehlam thlirna chang hre miah loin ka duhthusam ah chuan rinna ka lo nghat a. Nikum December ni 31 zan kha i la hre reng em? i nu leh pate'n an hauh vang che a i tihtauh kha! Khami zan khan i chhungte leh ka chhungte chuan engkim an lo hre vek tawh. Chu engkim chu i hlauhthawn ngei kha a ni tih keimah ngeiin ka hrilh ngai che hi pawi ka ti. Chu zawng aia pawi ka tih leh zual chu maw.. tap chungin i chhiar mek a, i kianga kuah tur che a ka awm lo hi na ka ti takzet! Bialpa tha ka nih theih loh laia unaupa tha ka nih theihna chance ka han nang thei lo leh ta hi ka vui takzet asin.
.
I kianga dinga then mai lo che a 'Unau kan ni asin' tih kha ka tan a harsa miah lo. Mahse thil harsa lo tak chuan thil harsa tak a hril miau si. Inringtawk leh ta neih taka i lo chen ve na inchhunga fa lak mai i ni tih kha i hriat ka phal si loa. Keimah aiin i nu khan a phal lo zawk asin. Tap chungin i chhungten min ngen a, 'Khawngaihtakin ani hi kalsan rawh.. in inthen anih chuan a fel vek ang..' tiin. Keichuan kha mi zan atang khan ka bialnu angin ka en tawh lo che a, ka nau i nihna angin U in nau a en angin ka en tlat che a ni. Mahse, i chhungte thusawi chu harsa ti takin ka pawm a. Ka unaunu hlim nan anih phawt chuan ka unaunu neih chhun ka phirpui anih na hi ka theihnghilh thei mai ang tiin.
.
I rilru tih nat ka hlauh avangin vawi leh khat maia then che kha ka duh loa, tih dan pawh ka ngaihtuah ve nasa asin. I tana awm reng tur tu emaw an awm loh chuan ka kalsan thei si lo che a. Ka zirna hmuna ka awmpui thin, kan senior ni bawk Sangtea, Shillonga a awm tur thu ka hriat chuan ani chu ka be ta tawp a. A hma chuan kan inkawm ngeih bik miah lo mahse a puihna ka mamawh vangin engkim ka hrilh ta a, ani chuan min puih chu a inhuam ta a.
.
Ka then ni che khan ka mittui tla kha i hmu ti raw.. ka tih hreh ber ka ti tur kha ka hreawm em a ni. Mahse ka hmangaih thu che sawi loa kalsan che kha ka thei tlat si lo a ni. Kan tum sa angin Sangtea chu ka kal velah hruai haw tur che in a rawn kal a mahse nangchu tui ah ilo tla a. Kha thil ka hriat khan ka inthiam lo lutuk kha awmngaihna pawh ka hre lo asin! Rawn kal a, i kianga awm kha ka duh a mahse khatih hunlaia ka kalsan lo che anih chuan engtik emaw ah i nihna dik tak hria in a hma aia na zawkin i awm ngei dawn si a. Bawihte, a bul atang khan i tan unaupa nangmah ti na tu mai che ka ni ti raw..
.
Damdawiin ah ka rawn tlan nghal a, i awmna cabin kawngkhar bulah ka thu zankhua zak a. A chang zeuh a i thawm ka hriat theih chu ka hming lama i tap ri te kha a ni a. Ngatinge heng thil hi kan chungah a thlen le? Sangtea hnenah i mizia engkim leh i duhzawng ka hrilh a, Valentines Day a Table Lamp pe ngei ngei tur che in ka hrilh bawk a. A hnenah chuan a hnial loh chuan ngaizawng tur che in ka ngen reng a, mahse ani chuan min hnial fithla thak thin. Mahse, ngaihzawng dang nei loa midang i tawn hma chu i tana thian tha a nih reng tur thu min tiam chuan ka rilru chu a hahdam huai mai.
.
Guwahati a ka let leh hnu rei lote atang chuan lu na, na satliah mai pawh ni lo ka nei tan ta a. Nachhawkna hi engtik lai pawn ka kawl a ngai te reng a. Vawi tam tak Doctor ka pan a, an ni chuan luna benvawn anih thu min hrilh zel a, tih ngaihna vak an hre hlawm lo. Chu tih karah chuan i message te ka hmu fo thin a, i na a la reh lo tih hriat kha thil nuam a ni ngai miah lo. Medical treatment thar ka han la chho a, Doctor chuan phone hman a phal loh mai bakah lehkha chhiar takngial pawh a phal lo a, a hreawm takzet a ni. Nitin mai a ka tih thin social media a i profile check te chu ka thei tawh dawn si lo, hreawm ti tak chungin engkima ka block che a tul ta si a.
.
Ka natna in zia lam a pan theih si loah chuan Shillong ah rawn kalin Neigrihms hospital ah ka rawn inentir a, Doctor chuan thluak lam a nih a ring a, test hrang hrang min tih tir a. Nang hmu tur che a a ruk tala rawn kal te chu ka chak zek zek a mahse khatih hunlai pawh khan ka pangai lo chu a ni tawh ber. Pawn ka chhuah a thawm ring deuh ka hriat ringawt pawn ka buai der tawh a ni. Insu tura i lo phei ni khan Sangtea chuan ka test result a rawn lam haw a, kha thil kha a ni kan inhauhna kha. I tap hmel leh na hmel ka hmuh khan kan inhaw thar a, dam ve tlak lo ang hialin ka inhmu a sin. I tawngkam vanga inthiam loa i tap hmel ka hmuh ngat phei che kha chuan ka insum thei loa, vawi khat chu i mittui ka rawn hruk sak che anih kha.
.
Sangtea'n ka result a hriat avangin ani chuan inngaihzawnpui ah a sawm che a, ilo pawm thu min hrilh chuan ka natna vanga ka rilru hahna a hnem takzet a ni. Ka chhungte rawn chhuk nghal in Delhi lam kan pan a, naktuk hian zai ka tawk dawn a nia Naute. He operation hian na tur loa ka dam khua chu a pawt se maithei mahse mi pangai ka lo nih thinna erawh a chhan thei a ngem ka hre loa.. Heng ka lu na te hi a awm reng anih chuan a na tuar loin ka la thi ngei dawn a chu ai chuan mi ang lo ni chunga ka la nun ve pawh ka pa duh dan a ni miau si a.
.
He lehkha hi i chhiar anih chuan nakin ah khawiah emaw pawh min hmu la, i hmuh thin Hmingmuana kha ka lo ni tawh awm si loa. Hriatna pangai ka neih lai ngei a 'Ka nau duatte' tiha vawikhat chauh kuah che ka chak a mahse a rem si lo. I tan ka thei tawk a tlem em a ni ti raw.. Ti khawpa ka velh tah avang che hian min ngaidam la. He thil ka hrilh chhan che chu maw.. nangmah a thudik awm i hriat loh te kha hrilh lo che a a atbopui mai chuan unaupa tha ka ni thei lo dawn si loa. Chuvang chuan ka tih theih hnuhnung ber i u ka ni tih hi hrilh che ka duh a ni.
.
Bawihte, tunah khan i tap a, i na ti raw.. i duhtawkin tap rawh. Mahse, mal angin inngai lo la.. fahrah angin vawikhatmah ngaihtuahna hmang ngai suh aw. I nu leh pate tan fanu tha ni la, i u tan nau duhawm leh chhuantlak ni hram ang che aw. Ka lo tih nat na zawng zawngah che khan min ngaidam la, i lakah thudik ka lo thup te kha khawngaihin hriatthiam tum hram ang che aw. Ka naute, i beidawng dawn lo ti raw.. i beidawn ka phal miah lo tih hre reng rawh aw Bawihte khawngaihtakin. Sangtea nen a in bul tan dan kha a lemah i ngai maithei, in inkar kha chhut chhiat i duh anih pawn i thu a ni mahse hei hi hre reng ang che ani tello a i awm hunah a kianga i awm laia hlimin i awm thei tur a ni. Ani chuan hmangaih tur che in a inpeih reng ania, nang i inhawn phawt chuan. Keipawn ka hmangaih che ka naute..
.
I u,
Hmingmuana'
.
Ngaihtuahna mumal pawh pu thei loin ka en ngai ka en ngawt ngawt a.. a mak a ni. Ka muttui ka hrukna ka hmai te chu a thip sep sep hian ka hria a. Kawngkhar in kik ri dat dat chuan min ti phu zawk a..
'Aww..' ka han ti tham tiak a
'Ka lo lut duh' a tih chuan ka ding a.. kal pawh ka kal tha thei lo.. ka khur vek. Kawngka ka hawn rual rual chuan nasa thei ang berin ka tap chhuak a, Sangtea chuan min lo kuah vat a.. 'I nu pawh common room ah a awm.. ipa a rawn haw mek..' tiin min kai phei a. Ka nu ka hmuh chuan ka tah a chhuak zua, ani chu zuk kuahin ka tap a..
.
'Kan tihpalh a ni Bawihte..' a ti a, ka lu chu ka thing a
'Engmah in hre lo a mi?' ka ti tap tuau a
'Aw.. i u chanchin engmah kan hre lo.. hrilh ngam turin kan lo inhawng lo em a ni..' a ti a
'Nu.. tumah a hre tawh lo asin..' ka ti a
.
Ka pa a lo thlen chuan ani pawn ka hria tih a lo hre ve vek a. Ani chuan puitling taka awm turin min ti a, an awmdan ah chuan ka lakah chuan danglamna pakhat mah an nei lo tih ka hmu a ni, kei erawh ka inngaihtuah lungpuam zel a, ka tap tawp hlei thei lo. Sangtea te nen a an titina pawh chu awm ve reng mah ila engmah hi hre mumal lo a ni. Sangtea a haw dawn chuan zana damdawiin kalpui ah ka sawm a..
.
'Naktukah kan chhungkua in kan phei dawn nia..' ka pa chuan a lo ti a
'Zanin ah pawh ka kal duh alawm..' ka ti a
'I kal duh chuan tha deuha i awm a ngai ania.. khi ta i han tah chuan a chhungte i ti lungno vek thei tih hria la..' ka nu chuan a lo ti ve bawk a
'Ni e, in tih pachan i mamawh anih kha.. zanah ka lo lam phei ang che' tiin Sangtea chuan min haw san ta a.
.
.
Muana awmna cabina kan luh chuan a nu nen chauh an lo awm a, ani chuan chaw a lo ei mek thung a. A chaw ei chu ka en reng a, a ti baw nuai a.. a changin a rawn phun leh nuah nuah thin a..
.
'Khawi ka hrai ang che..' tiin a chaw chu ka hmeh sawm sak a, reng mang khengin ka kut chu a rawn vai a..
'I kut i sil lo..' a rawn ti a..
'Ni tak.. ka va sil ang aw..' tiin ka tho a. Ka kut ka sil lai chuan tap lo turin ka insum nasa hle a ni..
.
Ka va let leh chuan ani chuan min en lo en reng a..
'Min hria em?' ka ti a.. a lu chu a thing a.. 'Nau-i.. nangma naute..' ka ti a, ani chuan min chhang lo..
'Fiana ei a duh loa..' a nu chuan a lo ti a
'Nih chuan kutin ka barh ang che aw..' tiin ka kut chuan chaw chu ka han la a, ka barh ta a. A kam sir vel a a chaw eina nawi kai ka tih fai chuan ka indsum zo tawh lo, ka mittui a rawn far a. Ka mittui tla a hmuh ka hlauh avang chuan ka kun ta tlat a. Ani chuan min rawn kheuh zeuh a, ka mittui chu ka hru a, ka han hawi chhuak a.. a chaw chu ka barh leh a.
'Ngatinge i van ei tlai em em?' ka tih pawh chu min chhanna chang a hre lo.
.
.
'Doctor chuan a inenkawl that dana zirin hei ai hian hma a la sawn thei a tia..' a nu chuan a ti a
'Engtia hmasawnin?' ka lo ti vat a
'A ngai chu a awh thei dawn chuang lo anga.. mi a hriat mumal loh ang te hi mahse enkawl that dan a zirin ala biak tlak thei ang a ti a'
'Anih chuan in lamah pawh theih tawp chhuah a ngai dawn anih chu..' a muhil lai en reng pah chuan ka ti a
'Ni e.. a ngai takzet..'
'Kan in lamah pawh in buai chang chuan a awm thei a lawm..' ka lo ti vat a..
.
.
Muana chhuah hnu chuan an in lamah an inenkawl a. A pu chuan a bula awm turin duh viau mahse a nu leh pate'n an in lama awm turin an duh zawk avangin an awm a. Kei leh Sangtea inkarah chuan inngaizawng ang pawn kan awm tawh meuh lo, thian kan ang zawk mahin ka hria. Dik tak chuan ngaihzawng buaipuinhman pawn ka khawsa hman lo a ni. Ka duh dan chuan ka u duhthusam leh a thil tum chhunzawm a ni a, mahse bul han tan a han sawi mai dan ka hre si lo a ni.
.
Sangtea hnenah chuan ka u awmna fahrah In chu enkawl zui ka duh thu ka hrilh chuan an kal dan a hriat ang ang te min hrilh ve a..
.
'I u kha puih ka lo intiam thin alawm.. kei pawn ka la ngaihtuah reng..' a ti a
'Awm lo la kan unau hian engtin nge kan awm ang le?'
'Tiang kha sawi ziah suh..'
'Ania lawm.. a mamawh hunah che i lo awm zel a, ka tan pawh..'
'Lehkha kha i chhiar kim ti raw..' a rawn ti a
'Um ka chhiar kim vek..'
'Anih chuan i inpeih em?' a tih chuan ka ngawi reng a. 'Hei hi a tir atanga ka tum dan a ni lo.. mahse bialnu ni tura ka sawm che kha i u taba ka tih piah lamah duhna che rilru ka pu daih tawh..' a ti a
'Kan inhmang tawn hlawm mai mai in ka hria kan vai hian..' ka ti a
'Anih chuan khang ang kha paih bo vekin a tharin bul tan ang..'
'Kei chuan tih tur ka nei alawm.. ka chhungte chu ka la dil lo na in ka zirna chawlhsan in fahrah In saw a theih ang anga enkawlpui ka tum tawh..' ka ti a
'Pui tur che in min duh em?'
'I tih tur ti tawh rawh.. kan tibuai rei tawh lutuk che..'
'A ni lo.. tunah hian tawp vek ta se.. kalsan i nih a i nat ai khan ka natna hi a nep bik chuang loang.. mahse min lo duh ngai miah lo a nih chuan ka nawrlui lo che..' a ti a. Ani hi ka duh ngei alawm engin nge min mawlh ka hre lo.
'Anih... bul tan tha ang..' ka tih chuan ka kut chu la in a hum vang vang a..
.
.
Kar tawp chawlh lai anih avangin ka u a rawn riak phei a, kan pahnih a inkawm in kan tlei dun phian. Thutphah sei a kan thut dun reng lai chuan banga ka kum khat pian champha kan lawm tum a ka thlalak chu a han kawk va a. A rawn len ni hmasa ber tum kha ka hrechhuak zawk mai..
.
'U i en duh em?' ka ti a, a lu a bu nghauh a
'Kha en rawh.. ka birthday a ka lak anih hi..' tiin ka pe a, ani chuan ngun deuhin a en a.. a kut chuan a chul kual vel a.. Chutah chiang takin mit khap kiah loin min en reng a..
'Enge u..' ka ti a
'Mate..' chiang fak chuan a rawn ti a, a mitmeng te chu ka ngaihbel nge a dik vek!
'U.. thil hriat i nei a mi?
'Mate..' tiin min rawn en leh tlawk tlawk a..
.
.
A TAWP DAIH MAI LE!!