MISS INDEPENDENT

“Wow.. hotunu I hand bag kha Fendi brand a ni ti raw..” ka hnathawk nula chuan office a ka luh veleh chuan a lo ti a

“Umm ni e.. enge a an??” ka lo ti vat a

“A nalh takzet.. ka awt lutuk..” a han ti a

“Thawkrim la I nei ve vat mai ang..” tiin ka han nuih seih a ka cabin lam ka pan zui nghal a.

.

Kum 30 ral kai tep tawh chungin ka la nula reng a, thenkhat phei chuan nula senior duh khirh tiin min sawi ka hre fo tawh. Mizoram a private Medical  Laboratory changtlung ber neitu ka ni a, thlahtu te atang a ka rochun pawh nilo in ka thawhrim na rah liau liau a ni. He ka thawhrimna phenah hian tu emaw  chu a awm a, mahse tuman min hriatpui lem lo thung.. he Medical Laborator din hi kan pahnih a kan suangtuahna a ni a, tih hlawhtlin ngei pawh kan tum a mahse ani tel loin ka bei a hlawhtlinna pawh ka chang ta a ni.

.

Hnathawk turin lab lam ka pan a.. ka thiannu duhtak Zuali chu a rawn lut chiah..

“Enge he tah  I tih??” ka han ti a

“Damdawiin atangin ka lo haw chiah.. thil hriat I nei  em??”

“Engmaw??”

“Filipino researcher thenkhat rawn kal tur zingah khan Andy a tel..” a han ti a.. min deng deuh zawk mahse ka awmdan hloh phah ka tum lo

“Chung min hrilh tur chuan maw he tah I hna kalsanin I rawn kal??” ka han ti a

“Aw.. nangmah vang a ka rilru hah zia hi I hre lo  ami?? Pasal nei loin I awm ang maw..”

“Mipa ka mamawh lo..”

“Ka hria..”

“Chuti si ngatinge min force..”

“Tunah chuan chhungkua din tawh mahila kan la inhmu thei kan la inkawm thei mahse nakinah tunge enkawl ang che??” a han ti a

“En teh Zual.. mipa dik tak alawm ka nghah.. mipa nihna hming pu satliah ni lo..”

“Andy hi I theihnghilh thei lo..”

“Engvangin nge ka theihnghilh kher a ngaih.. a chung a ka thinrimna vang anih hi tun dinhmun hi ka thlen..” ka ti a

“Anih ka hrethiam e.. va kal rawh hna va thawk rawh..” beidawng tak chuan a ti a

“Nang pawh damdawiin ah let vat zawk rawh aw..” tiin ka kalsan ta a

.

Ka thiannu thusawi chu ka ngaihtuah let.. mahse chak loh phah nan a hman ka tum lo.. engvangin nge ka tan a a theihtawp chanve a chanve leh pawh chhuah loh tan ka rilru ka sen duh ang le.. tiin ka in ngaihtuah. Chutih lai mek chuan ka nau te zingah in leng ka neih thu min rawn hrilhtu an awm a, ka cabin lam ka pan ta vat a.

.

“I tha maw.. Dr.Sindhan..” tiin ka han chibai a

“Tha tehreng mai.. enge I hna lam te in tluang maw..” a han ti a

“Aw tluang a ni mai ang chu.. chuan I damdawiin lamah ka thil rawn thlen kha enge in ngaihdan??” ka han ti a

“Nia tha kan ti tlang a.. mahse tunah hian private hospital pali meuh in deal an neihpui che u a.. in in daih dawn em maw ni le..”

“Chu chu em ni I buai na.. private hospital pali mai bakah mahni thu a rawn kal te leh  doctor sawmthum chuang clinic nei ho refer kan enkawl bawk a.. tih sual a awm kan la hre hauh lo a nia..” tiin ka nui a

“I inrintawkna hi ka duhzawng tak a ni..”

“Ka lawm e..”

“Anih chuan naktukah ka damdawiin lamah rawn leng phei la.. kan confirm dawn nia..” a ti a, min kalsan ta a.

.

A tukah chuan Hospital lam panin ka inkhalh chhuak a.. Dr.Sindhana office ah meeting kan nei a, an hospital laboratory in daih lohna nasa tak mai bakah an khawl a chhe zing bawk nen chuan medical test vel chu kan lab a tih tir ve a ka thurawn chu a pawm ta a. Ka chhuah dawn lai tak chuan kawngkhar ah chuan tu emaw an rawn lut..

“Miss..  mi inhmelhriat tir duh che ka nei a..” tiin cabin a rawn lut pa chua  han hui a.. he  thinlung hi  a deng na leh hle a mahse ani ka hmangaihna ai chuan ka huatna hi chak se ka duh a ka inthunun thei a ni.

“Mr.Andy,  Mindanao Medical Foundation College.. Philipinnes atang a zir chhuak ania.. Chuan Mr.Andy ani hi Dr.Diki hi Amrita Vishwa University atang in a  zir chhuak a.. Ph.D pawh a hmu nghal bawk a chuan Mizoram a Clinical lab no.1 neitu a nih hi.. Girls power..wow..” a han ti a

“Private College a zir thei ngat  maw..” mei nei takin ka ti a kan in chibai a

“I hlawhtling takzet..” a ti a, a vei nuih zeuh a.. A hmel leh a pumrua a han en a, a danglamna hmuh tur awm tho mah se ka tan chuan a ngai rengin ka hria.. a bula awm rei chi ka nih loh zia hria in ka chhuak vat a.. ani  ka hmuh hmasak ber ni kha ka rilru ah arawn lang  a.

.

.

CRUSH AT FIRST SIGHT

(13 YEARS BACK)

.

Seven day tlang chho bing takah chuan ka tlan chho hlawk hlawk a, traffic jamah ka tan rei em avangin ka tlai tawh hle a. Mangan nak alaiin taxi driver chu a la tlan chho duh lo zui. School ka thlen chuan class tan a ni tih ka hre vat a, kan class lam ka pan ding nghal. Ka hlauh ang ngeiin ka classmate te chuan Practical class an tan tawh tih hria in thaw hlawp hlawp in Laboratory lam panin ka tlan nghal a.

“May I come in Sir”

“Come in..”

.

Laboratory a ka luh veleh hmanhmawh takin ka lab coat chu ka han ha vat a. Nidang aiin student kan tam riau in ka hria.. hmelhriat loh ka nei nual..  Ka thiannu chu ka hrilh ru zeuh a..

“Kan van tam..”

“Section leh lam nen combine class kan nei alawm..”

.

“Kha tunge tlai kha lo kal teh..” Sir in a tih chuan ka phu zawk a, ka hah em avangin ka lungphu chu a la reng hle bawk a..

“Chuan tunge partner nei lo kha..” Sir chuan a rawn ti leh vat a

“Andy-a..” an  rawn ti sap sap a

“Andy, Hei Didiki hah lai tak hian a blood pressure rawn check rawh le..”

“Maw..” ka lo ti ha a

“Andy-a bulah sawn va kal rawh le..” sirin a tih chuan ka va pan vat a

.

Chu pa chu ka vawikhat hmuhna a ni  hial ang, Helen Lowry ah hian pre class atanga kal ka ni a hriat loh ka nei tlem hle a, ka hriat loh ho chu rawn lut thar ho an ni mai. Class XI Medical Laboratory Technology ka zir mek a, thla khat erh awrh chu kan kal tling ve tawh a mahse school hrang hrang atang a pass chhuak te an rawn luh belh nual avangin hriat ka nei thar tam lo hle a ni.

.

 A hma ah chuan ka ding a, a bul a thutna min kawh hmuh ah chuan ka han  thu a. Blood pressure testna tur chu a han phawrh a, ka ban ka pe vat a.. Sphygmomanometer chuan ka ban a han vet a, ka tlan hahna zawng zawng nen ka lungphu rang a la reh thei lo.. ka khur deuh ti tih..

“Hahdam deuhin awm tum rawh..” a rawn tih chuan ka han melh a, a vei nuih zeuh a..a biangsum chiang vak lo chu a lang kalh bawk a. Chhang lem lo chuan ka ban chu ka en reng a.. Stethoscope a beng a ri ngaihthlakna chu a beng atang chuan a han phawi a..

“120/79” tiin Sir hnenah chuan a sawi a

“Sang ve..” ka lo ti vat a

“I hah vang a nih kha.. kha I check ve hun..” tiin a ban chu min han pe a, ka lo chelh vat a.

.

Theory class neih chhunzawm turin class lamah ka thiannu nen kan let phei a..

“Kha pa kha new comer ti raw..” ka han ti a

“Tu maw Andy maw..”

“Umm..”

“Aw.. a niang, keipawn vawiin khan ka hmu ve chiah..” tiin min chhang a

“A fel hmel reuh..”

“Ehh.. I star chiang..” tiin min han nek deuh a

“Teuh lo..” ti pah chuan kan nui phei uar uar a..

“Eee.. Miss.Nancy a  zin dawn sia Thursday leh Monday a piangin practical combine class kan nei tawh dawn ania..”

“Na.. ka peih loe, kan tam mah mah.. theory chu ni se a zia a” ka lo ti vat a

“Theory pawh kan nei zeuh zeuh dawn.. mahse engmah an sawi lawk lo period hun vel..”

“Peihawm loh e..”

.

Zirtawp tlaiah chuan ka thiannu in Vaivakawnah taxi min chan pui a. Ka thiannu hi Vaivakawn a awm a ni a, kei erawh Chanmari ah kan awm thung, Vaivakawn atangin taxi ka hmang mai thin a, ani chuan taxi min chan pui ziah thin. Midang kan nghah lai chuan Andy-a chu taxi a chang ve niawm takin kan lamah a rawn kal a.. ka thiannu chuan min rawn nghawk sawk..

“Ka be dawn..” tiin min rawn hrilhru zeuh

“Heii.. a ngai..” ka sawi zawh hma hma chuan a ko

“Hei Andy..”

“Um.. enge in tih a??” tiin min rawn din hnaih a

“Taxi kan chang.. nang??” tiin Zuali chuan a chhang leh a

“Keipawh..”

“I taxi chang kan van hmu ngai lo che..”

“Nia.. min lo hruai thin a mahse vawiin chu an hman loa..” a ti a

“Khawilai thleng nge I kal dawn??” ka lo ti vat a

“Zarkawtah kan awm ..”

“Chanmari thleng kan kal dawn a..” ka han ti leh a

“Chho ve nghal la.. I duh leh chanmari tangin Zarkawtah I phei leh nga..” Zuali chuan a rawn ti vat a

“Nia.. pawi chuang lo..”

.

Taxi ah chuan kan lut a nuam tihna ruk riau ka nei mahse ka lai bawn tawp hi a ni mai. Traffic a jam nasa leh em em a sawi tur a vang duh hle.. ani pawn sawi tur a hre vak lo a nih hmel..

“Zarkawt khawi laiah nge in awm a??” ka han ti a

“Mc.Donald  hill lamah khan.. nang??

“Ramhlun nen in rinna bawr velah khan..” tiin ka chhang a,a ngawi leh daih a

“Ke in phei daih ila a that dawn hi traffic jam nasa em mai..” a rawn ti chhuak leh a

“Nia.. a tha lawm.. e ka van hmu ngai lo che..” ka sawi tur hre lo chuan kan ti ringawt a

“Nia thla khat in ka tan tlai a..”

“Tinge??”

“Bangalore a zir tum ka nia.. mahse chhungten an phal leh vak loa..” a han ti a

“Nih chu.. he tah pawh a that ho a lawm..”

.

Kar tawp chawlh hi nuam ka ti thei em em a, engmah ti lem lo mahila school kal ngaih lohna hrim hrim hian min ti hlim. Mahse tum tun chawlh erawh  chu kartawp chawlh dang ang lo takin nuam ka ti em em miah lo. School kal chakna riau ka nei, kha Andya vang kha a ni tih hi ka chiang a ni. Kar hnih chiah ka la hria a combine class vawi thum kan neih tawhah chiah ka la hmu mahse amah hnaih bik riau ah ka in ngai tlat. Combine class a ka partner a nih vangte a nih mahna..

.

Nidang ang lo takin chhungte kaihthawh pawh ngai loin ka tho nalh a, ka inbual nghal a. Kan school ah hian makeup hman an phal lo bur a mahse hman ka chak tlat.. Andya mit lak dan tur chu ka ngaihtuah nasa.. loose powder school kal dawn a ka in hnawih ngai miah loh te chu ka han inhnawih a, lip gloss mawm satliah ka duhtawk mai lo.. a sen tel thei ngat chu tak lo takin ka inhnawih  ngei bawk.. Ka perfume in kah thin pawh duhtawk loin ka u Victoria Secret body mist chu ka han in kap ru ngei bawk a.

.

Morning assembly kan neih chuan kan ding rei hle, ka ke kham zawng zawng ai chuan ka  makeup chu a chhiat ka hlau ber, ka thlan ang tih hlau takin keimah ka han in ti awm hahdam a.. hmelchhiat kha ka hlau a ni tawp mai chu pawh Andy tan.

.

Practical class kan tan, ka zirlai ai chuan ka partner pa mawlh chuan ka rilru a luah.. ka awmdan lai tak zei luih tum tal bawk si te chu a nawm rual rual in a hahthlak ngei mai. Thisen lak kan zir dawn a, keimahni ngeiin kan ban a thisen chu syringe a kan hip chhuah chu a ngai a ni. Mipa thenkhat phur em em te chuan inla pa fahran in an han in vit a, an hip chhuah tir zal zal hlawm a. Andy pawh chuan a ban chu a han hum ruh te te a, a vein ah a syringe hriau chu a vit lut a.. a thisen chu a hip chhuak a, kei chuan mitt la lek loin ka lo thlir char char..  

“Ti ta che..” a rawn ti a

“Aw..” tiin ka ban chu a han melh a.. ka hreng te te a.. ka in vit dawn a, ka khawr thlawt.. “Mahni hian a van har em em”

“Kha..” tiin Andy chuan a ban lehlam chu min han pe a

“I lak tawh kha..” tiin ka ho in ka lo ti a

“A lehlam alawm..” a tih chuan keipawh chuan ka lo vit a, a thisen chu ka la ta a.. ka thinlung han hlim zia em em chu..

.

“Ehh.. kha lam chu an va inpe zo ve..” Andy a thianpa chuan a rawn ti zeuh a, kan lai dun hle

“Van thing thei tak..” Andy chuan a han ti ringawt a, ka duhna a pung leh ta sawt

.

Practical class kan section chiah a kan neih chuan ka  hne thei hle.. ka partner ka thiannu chuan min chhaih reng bawk a, a in nawm hleih zia hi a hre thiam ve tlat lo a ni. Nidang zawng a he school ah a kal ve tih pawh ka hriat loh kha break tinah chhuakin amah hmuh ka tum tlat a, vawi khat chiah ka hmuh ringawt pawn ka nileng hlimna chu a daih phahin zan mut ti tui tham chu a ni ziah thin.

.

Vawi khat chu ka thiannu Zuali class a lo kal loa keimahin Taxi ka chang a.. rei pawh ka la ding lo ang tih ah chuan Verna Car sen chu ka hma ah hian a lo ding a.. driver seat bul a thu chu  tukverh ah a rawn dak a, ka phu deuh zawk..

“Taxi I chang a mi??” a rawn ti a

“Umm..” tih ringawtin ka lo chhang a

“Lo kal ve daih la kan bulah..” a rawn tih leh phei chuan ka thinphu a rang ngei mai

“Aih ngai lo..” lai tak chuan ka han ti a mahse ka chuang chak takzet..

“Lo lut rawh..” a rawn ti leh a.. ka dinhmun han laih dan chu, motor a tam ropui nen chuan hreh tak leh nuam ti ru viau si chuan car seat hnung lamah chuan ka han thu lut ve ta a.

.

“Hei hi ka cousin U Sawma a nih hi.. chuan kan school a mi ka thiannu Didiki” Andya chuan a han ti a

“Didiki maw.. I hmel a va tha ve..” U Sawma chuan a han ti a

“Heh.. Andya hi ilo hruai ziah thin a mi??” ka han ti a

“Aw.. a pa thupek a nia..” a tih chuan kan nui ho dar dar a

“Didik naktukah ah theory combine class kan neih dawn kha I hria em??” Andy chuan a han ti a

“Aih.. in sectionah Sir in a sawi mi.. keini chu a lo sawi miah loa..”

“Um.. sawi e, chu chu last na niang Miss a rawn haw tawh dawn a..” a tih chuan ka hnual rawih, engtikah mah practical kan ti dun tawh dawn lo tih chu ka ngaihtuah a ka la kham lo takzet.

.

Kan in thleng min thlah a.. lawmthu ka sawi mawlh mawlh bawk a. In a ka luh chiah chuan ka phone la in Zuali ka be nghal, Andy a te car a ka haw thu ka hrilh chuan kei ai aiin a lo phur, ka hlim zia chu tawngkam maiin a sawi fiah phak lo. Zanah chuan a tuk nghahhlelhna  vangin mut pawh ka muhil lawk thei lo, mahse combine class a awm tawh dawn lo tih ka ngaihtuah apiangin ka lungleng lawk a ni.

.

Kan class ah chuan section lehlam ho chu an rawn lut sap sap a, Andya ka zawng ru reng mahse ka hmu mai lo.. a tawp lam an lo lut tawh a, ‘a lo kal lo a mi lee’ tiin ka ngaihtuah a ka beidawng ru takzet. Sir in class a tan dawn tepah chu ka ‘prince charming’ ngei mai chu a rawn lut.. ka hahdam huai.. ka thutna piahah chiah chiah a thu, ka bulah thu lo mahse ka pum a phengphehlep han thlawh kual tir leh ka mawng za vek khawp a awm tir tur chuan min hnaih tawk lutuk tlat.  

.

Class lak lai pakhat mah ka hre lo, ani chu ka en ngam lo en duh deuh bawk si chu ka bul a thu ka thiannu chu.. “ en lawk teh” ka ti deuh chhen.. keimah pawh chu ka che sek bawk..

“Kha Lalhundiki tee.. in va inhlei ve..” Sir in a rawn tih chuan ka zak lutuk ka sen tawn tawn, ka sa pup pup bawk.. min din tir a thil min zawk engmah ka hre lo.. pawnah min chhuah tir ta a, ka zak takzet.. Andya hma ah lehnghal..

“Kha nang pawh chu pawn lam I va hawi nasa ve ding teh..” Sirin a tih ri a hria, Zuali a nih ka ring a ka lo nui tut tut.. “Nang pawh chhuak rawh..” a han ti leh ngat phei chuan ka lo phur bawn tawp.

.

Ke pen thawm in min hnaih zel chuan ka thiannu a nih ringin tih phut tumin position ka lo la, a lo chhuak chiah.. “Haooooo!!!”… a meng phawk hle.. “Andy nang maw..??” ka ti chuai raih

“Aw.. tinge khatia I awm a??”

“Zuali maw ka ti che..” ka ti a kan nui vak vak, Sirin kan nui ri a hriat kan  hlau si.. pum na vek a insum in kan nui a, a hnu ah kan ngawi dun vang vang a..

“Tlaiah kan rualin lo haw leh rawh aw..” a tih chu ka beisei loh tawp a ni

“Aih a ngai lo.. a zahthlak..”

“Enge zah tur awm.. U Sawma pawn sawm leh rawh atia, chhelo a ti che a..”

“Nah.. a ho, nidangah I rualin ka lo haw ang.. ka ti a

“Naktukah maw??” a tih chuan

“Ka hre lo le..” ka lo ti vat a

.

Lunch break ah tiffin kan  ei zawh chuan classroomah ka thu a, ka thiannu Zuali phur tawkin a rawn lut.. a au deuh ti tih..

“D..d…d…d.. I number min dil??”

“Engaaa.. tuuu inn??” ka han ti a

“Inpa in..” a tih chuan ka a lo choh

“Inpa an ti kher a.. I pe mi??” ka lo ti a

“Pe lo, ka vawng hleinem..”

“Naa.. I vawn kha..” ka ti nui nui a

“Haha.. tihder che nih kha.. ka pe lawm.. a nuam em?? Tinge I awm??”

“Flyyyyiinnnn..” kan nui dun leh uar uar a, ka van hlim chiang em!

.

In ka thlen atangin ka phone ka hum char char.. min lo text ka ring ve tawp.. tlai ah chuan a text ka dawng miah lo. Zan 8:10 velah chuan number save loh atangin text ka dawng..

“Naktuk chu aw..” ka hrethiam chiah lo mahse Andya a nih beisei vang chuan ka reply a

“Enge naktuk??”

“Kan rualin I haw dawn kha..” a rawn tih chuan ka au thawt.. a van nuam tak em!!

“A nuam lo lawm.. a inthlahrunawm..” kan ti vat a

“Enge inthlahrunawmna.. I lo kal ang ti raw..”

“Kan in ngaihtuah phawt.. hehe”

“Please…!!”

.

Ka hlim lutuk chu awm ngaihna ka hre lo tep ka u chuan a chhan min zawh chuan ka hrilh ve a, kan thusawi lai ka nau mipa in a lo hria a..

“Ka sawi dawn a nu bulah..” ti leh a kal nal nal..

“I sawi chuan ka beng ang che..” ka han ti tawk tawk bawk a.. Ka awm mai mai thei lo Zuali ka va hrilh a ni pawn min phurpui leh pek lutuk.

.

A tukah chuan an rualin ka haw ta ngei a, lai viau e ti lo chuan kan inbe ve nasa hle a. Chumi ni atang chuan zantin kan intext a, a rual a haw turin min sawm fova mahse nuam lo ka tih avangin ka hnial  luih a tam zawk . Chutia kan inbiak a kan in zui ve fo hnu chuan ani chuan min bem a, ka van chhang chiang em.. Kan nih hnu atang chuan a cousin pawn a lo hruai khat tawh hle a, kan pahnihin ke in kan haw ngat ngat zel, haw chhung lek pawh kan inthlahlel ve em em a ni.

.

“A pa hnenah bike lei ka dil a” Andy chuan a ti a

“Ngatan.. a la hun loe..” ka lo ti vat a

“Ka lo hruaina tur che leh kan haw na tur..”

“Haw rual nuam I ti zawk lo mi??” ka ti a

“Ti ee mahse kan leng dun thin dawn lawm..”

“Nia I thu thu..”

.

Thla li  teh meuh kan inngaihzawng ve tawh a, inhauh chang pawh kan ngah betu a ngah em em te hi a man chhang lem lo mahse ka thik ngawih ngawih zel. Mipa dang hriat em em nei lo mahila Andya hi chu a zei loh zia ka hrechiang chho zel a ni. A chang chuan a lak a ka phut a hrethiam miah lo thin hian ka thin a ti rim fova, mahse then tumna ka nei lem lo ani pawn sawi chhuah ringawt pawh a phal lo thin. Zanah  lehkha ka zir laiin Zualin min lo call.. kan school a History la pakhat leh Andya an inbiak thin thu a rawn sawi a, ka sa phat mai.. ka va text nghal..

“Andy..”

“Umm duat..”

“Midang biak I nei ti raw..” ka va ti ringawt

“Enge awmzia..??”

“History la a mi kha..”

“Teuh lo.. text chu ka dawng mahse ka reply ngai lo.. tak tak”

“Engtinnge ka awih ang??”

“Ka phone I kawl dawn a mi.. ka lo kal dawn..” ka inthiam lo leh thut

“Aih ngai lo duat.. ka ring che lawm..”

“Anih leh.. naktukah chawhnu ah leng ang..”

“Kan bunk dawn maw..??”

“I duh lo mi.. naktuk chiah chu duat..”

“Nih kan kal dawn nia..”

“Nia zingah ka lo sawm ang che..”

.

Zingah schoolah kan kal dun a.. kan school a vengva chin deuh chuan kan inngaizawng tih an hre thup tawh.. a nuam thei hle, a chhan chu ka bialpa hi a lar in a chhelo em em a.. mi hausa tak fapa a nih mai bakah a hma hun hi a thim lo hle tih ka hre tlat a ni. Tlanbo tum ru ranin class ah kan awm a, lunch break dar a rik veleh ka chhuak a, kan inhmuhna hmun turah chuan ka lo nghak a, a bike chuan hmundang a kal tumin kan in khalh chhuak a, tlem a hmun fal ve deuh ah a ding a. kan ei tur ken te chu kan han ei a..

“Khawi I phone..” ka ti nghal a

“Kha.. duhtawkin check rawh..” tiin min rawn pe a

“I delete vek tawh ka ring” ka tih chuan en pawh min en tha duh lo.. “Tinge bunk I duh aa??” ka ti leh a

“I bulah ka awm chak alawm..”

“Keipawn ka chak..” ka ti a, ani chuan min rawn kuah ka hmui ah chuan duhthawh zetin a rawn fawp a.

.

Kumthar kan  chuangkai a, kei leh Andy pawh kan la in zui reng mahse inthen chang chu kan ngah ve thin tho.. on/off relationship hi a hreawm hmel ka ti em em thin a mahse ka tem ve mek chu a ni sia. Engah mah hian min hrethiam lo ni te hian ka hre thin, hmeichhe betu a ngah em em a.. chu chu kan inhauh phahna ti tam tu ber a ni. A chang chuan ka han in ngaihtuah a keimah zawk hi ka dik lo aniang a tih ten mahse a ni theiin ka hre si lo.

.

Ka piancham lawmna turah chuan mi an rawn kal sap sap a, Andya lo thleng har lutuk chuan ka awm a ti nuam chiah lo.. biak tumin ka phone ka la a.. a text message a lo awm sa

“Duat tihpalh ka lo kal lo mai ang.. ka lu na deuh a..” a ngai te bawk maw.. tiin ka inngaihtuah a, ka tah a chhuak takzet. A lu a na lo tih ka hria ka thiante leh ka chhungte hmuh a hreh vang a ni. A chang chuan mipa a ni lo aniang te ka ti ringawt thin mahse a awmdan maksak tak leh rilru nghet lo lutuk vang hian ka duhna a tawp thei si lo.

.

Ka rilru a nat em avangin ka be lo.. a call pawh ka chhang loa a, a message pawh ka reply ngai lo. School kan la chawlh avangin kan inhmu ve dawn a nih pawn pawnlam ah kan inhmu thin. Ni thum kan inbiak tawh loh hnu chuan vawikhat chu kan inkawtah a bike ah thu in min lo nghak reng, ka va hmu thut.. inchhungah ka lut lehnghal, ka phone ka en a, a message leh call pawh engmah a awm lo. A khat tawkin ka va en leh thin a awmna ngaiah a la awm reng.. tlai thim dawn hnaih pawh a la awm reng avangin ka va kal a..

“Haw raw..” ka va ti

“In inah min luh tir dawn na nge??” a han ti a

“Kan in a luh I duh ngai loh kha.. I zah kha..” ka ti hmak

“Ka tihpalh duat.. tiang lamah hian ka zahzum zia chu I hriat kha..”

“Ka birthday ah pawh ti khan I awm thei a nia..”

“Ka gift pek tur che ka lo keng” a tih a min pek rual chuan ka phih thla lawp a…

“Inthen rih ang Andy.. ka tuar peih tawh rih lo..” tiin inchhungah ka lut a. Kha thil kha sawi ka tum lo mahse a hmel ka hmuh khan ka na ngawih ngawih. Mipa in a ngaihzawng tan a a tih tur a ka ngaih chu a ti ngai lo. A ngaihsakna ka phut te hi a hmu thiam lo niin ka hria. A zei lo tih chu ka hai lo mahse a tum china tal hmuh sak ka chak thin.. chu chuan min ti beidawng hle bawk.

.

.

GRADUATION

.

School kan kal tan leh tawh a, thenkhat chuan Andy nen kan inthen chu an sawih lo.. ‘an ni leh awm em mai’ min ti fo,an sawi sual lo.. keima rindan chiah pawh a ni. Mahse school ah chuan amah ang lo takin a induh thiam riau chu chuan ka rilru a ti na, inbe tawh lo tawp chu kan ni lo mahse min rawn be khat em em thung. A lakah tu hriat loh hian ka beidawng ru em em a, hmalam pan san tumna rilru ka put apiang hian min be tha em em thung thin chu mak ti hial zawk thin.

.

Thla khat chuang kan kal tlin hnu chuan ka tuar thei tawh thlawt lo.. inngaizawng ang chiah a inbia chuan kan inngaizawng si lo.. ka thiannu ka rawn a, ka kalsan dawn nge hma ka la ang tiin.. ti chuan a ma min rawn angin kei a hmeichhia zawk chuan ka renew leh ta a. A hma ang chiahin kan awm chho a, kan inkar ti chhe tu zawk nih chu kan duh lo ve ve a ni. Kan buaina pawh ngawih bo pui mai loin kan sawi thin a, chhungkaw chanchin kan in hrilh tawn ngai loh pawh kan sawi dun ta fo ve.

.

Ani hi ka hriat sa angin Aizawl sumdawng hausa tak fapa mal a ni a, a pi duh dan zawmin Lab technician nih tumin kan school ah a rawn lut ve a ni. A pa duhdan chuan sumdawnna zirin hmun hran a zirtir a ni a, mahse Andy hian a pi duh dan hi a ngaipawimawh zawk niin a lang.

.

“Duat kan inneih hunah tih tur ka hria..” Andy chuan a rawn ti a

“Engmaw..??”

“Kan pahnihin Clinical Lab lian tak kan din ang a..”

“Nia ti raw.. mahse nang chuan I pa sumdawnna hi I enkawl zui ka ring..” ka han ti a

“Teuh lo mai ka pa sumdawnna chu kan fapa in a enkawl ang..”

“I ngaihtuah lawk vek a mi..” ka ti a

“Umm.. chuan maw..”

“Aw..”

“A hma khan ka ngaihsak tawk lo che ti raw.. a nuam lo ka ti, hmeichhia min ti hmasatu hi ka ngainep ngai lo tih I hriat kha..” a ti a

“Engtin pawn awm la tlawm zawk ah ka tang tawh lo ang” ka lo ti hmuk

“Hehe.. hei vang hi alawm ka duh em em che..” a rawn ti a min rawn fawp zeuh a

“Khawnge college I kal dawn??” ka han ti a

“I kal na na ah..”

“I pa in a phal lo ang.. entrance pek ka tum asin..” ka ti a

“Ka pe ve anga.. ka tlin loh a I tlin chuan ka bei leh tang tang ang a chuan I junior ka ni mai ang..”

“Chiah???”

“Umm.. promise..” a han ti a

“Engmah min promise suh..”

“Ka ti tak tak”

“Aw ka ring che..”

.

Board exam tur a inpuahchah na kan nei chho a, Andy nen pawn lehkha te kan zir dun fo va. A pa in an inah Medical laboratory ang deuh a in zir na atan a a dah ah chuan kan zir thin a nuam kan ti thei hle. A chhungte hi diktak chuan ka ngaina hran lo.. an khirh hmel in an chapo hmel thlawt.. a pa hi chu a mood a fuh chuan fiamthu thawh chu a ching ve zeuh a mahse  lum lam tak a min biak awm ka  la hre miah lo. Ka chhungte lam erawh chuan Andy chu ka thiante dang an duat ang bawkin an duat a, a chang chuan a inthlahrun phah ve thin in ka hria mahse mi hausa boruak hip leh mi pangai boruak hip a inang lo em a ni.

.

Vawi khat chu an in a project work kan tih laiin a pa chu a rawn lut ve a..

“Diki enge zir zawm I tum??” min rawn ti a

“BSc Mlt aniang.. entrance ka pek a ka tlin chuan..” ka lo ti vat a

“Khawiah??”

“Ka chiang lo ka result a zir Mizoramah chuan a ni lo ang..” ka ti a

“Vairam a niang maw..”

“Um   aniang.. anih Andy hi..” ka han ti a

“Ani chu entrance pek buai ngai loin a duh chuan private in foreign ah  zir rawh se” a tih chuan Andy chuan ka ho in a pa a rawn melh..

“Pa..” a rawn ti

“Private a foreign a zir chu a tha lawm.. mahse India a rawn thawh leh a duh chuan test paltlang harsa tak a paltlang a ngai dawn a sin” ka lo ti a

“A in zir anga, a thiam mai ang..” tiin min kalsan ta a

.

Andy chu a kun tlat a..

“Ka future tak tak a thlir lo ti raw.. kawng awlsam chiah min zawnpui..” a rawn ti a

“Mahse duat I nawr lui thei alawm..”

“Pawisa chiah a hria..”

“Engmah a ni lo ang.. entrance pe turin in buatsaih la tih dank an ngaihtuah dawn nia..”

“Umm.. kan thei ang ti raw a rual a college kal..” a tih chuan ka khawngaih hle a

“Kan tum ang” tiin ka va kuah a…

.

Exam tan hma chuan pawl sawmpahnih chhuak tur ho chu graduation day program min siam sak a, nuam kan ti tlang hle. Nilengin Andy nen kan in zui a.. hlim hmel pu lui mah se a chhungril chu a hah tih ka hre thei a ni. Ka khawngaih em avang chuan ka kal hran pui a..

“Duat..”

“Umm..”

“Ka pa in Philippines a Private College pakhat ah ka admission tur a buaipui mek..” a ti chuai raih a

“Ngatinge I pa hi I hlauh em em ka hrethiam lo.. I duh zawng leh zawng  loh chu sawi ngam tur I ni a sin kum 17 I ni ve tawh a..” ka han ti ringawt a

“A sawt dawn lo tih ka hriat vang alawm..”

“Kal rawh.. tunah hian kal rawh.. kan inhmu leh kher angem tih pawh a hriat tawh miah lo a sin..” tap aw tiau chuan ka sawi a

“Please.. tikhan awm suh.. kan in exam lai ten.. college tan hma zawng kan in hmu thei alawm..” tiin ka banah a chelh a

“Chung lek ka duh lo.. min tiam anih kha.. college pakhatah.. lab khatah kan awmdun zel ang tiin I sawi kha.. I sawi ti raw..” ka mittui chu ka dang zo thlawt lo

“Ka tihpalh.. kei aia inpe zo zawk leh fel zawk I phu a ni ti raw..”

“Duat I pa hian I theihna a hre lo.. entrance a I tlin loh a rinpui che.. chuvang chuan entrance chu pe la, I tling anga a tha vek dawn alawm..”

“Duat nangmah ang a lehkha thiam ka nih loh hi.. ka pa hian sum ngah lo se chuan engmah ka ni lo ang” a rawn ti a

“I pa hian sum ngah lo se I theihna kha nangmah ngeiin I hai chhuak thei ang..” ka ti a

“Lut phawt ang.. kan sawi fel thei chuang lo ang..”

.

Board exam hma chawlh awm tam takah chuan lehkha zir ka ngai tih ka in hria mahse engine emaw min mawlh.. Andya chuan lehkha zir a phur tawh lo tih ka hriatpui chuvang chaun keimah ngeiin ka fuih phur a ngai tih ka hre bawk. Ka theih an gang in ka fuih a.. kan duhthusam Medical Lab ka nupa pual a hawn kan tum te chu sawi pui in tih hlim ka tum hram hram a ani pawn hlim chu a duh ngei mai mahse thil thleng tur kan hre lawk dun reng si.

.

Andya ka ngaihna chuan in exam kan neih ni chu min thlakhlelh tir em em a, ka thiam leh thiam loh lam aim ah chuan ani chu hmuh ka chak zek zek thin. Exam kan neih ni chuan a rawn leng kawi ziah a.. kan pahnih chiah a in a awm in, inthlahlel tih hriat takin kan in kal hlat ngai lo. Kum hnih kan la inngaizawng tling lo na chung hian en mai pawh a mood in hriat tawn sak theih tur chuan kan in pawh tawh hle a ni.

.

Exam zawh ni chuan Andy nen dawrah kan chawl haw a, entrance pek theih hun tur ni chu ka hrilh a, a lo kal ngei tur thu min hrilh chuan ka lawm takzet. Keini pahnih tan chuan lehkha zir hun a la in tan choh a ni thung si. Zantin ka zir a, ani pawna  zir ve chuan ka hria.. kar tawpah a rawn leng ziah a hlim takin kan awmdun thin, a pa chungchang leh a awmna tur emaw a college luhna tur engmah ka sawipui duh lo a chhan chu a hahchawlhna awm chhun ka nih chhung hian a natna ka thlen hi ka hlauh ber a ni.

.

.

FIRST GOODBYE

.

Entrance pek na hmun tur lam ka pan a, Andy chu ka call char char a ka call pawh a pic up thei lo.. a hma zan kha chuan lo kal a in tiam reng si a.. tiin ka ngaihtuah a, ka beidawnna leh beiseina chua  in chen chiah chiah a ni. Tan hun a nih thlengin pawnah ka nghak mahse zan hmasa lam a min tiamtu hmel reng reng ka hmu lo. Midang chu an chhungten an hruai a, kei chu Andy nen kan nih dawn tho avangin tiin ka pa pawh ka in hruai tir duh loa.. a ruk a ka mittui rawn hnam hrun pah chuan class room chhungah chuan ka lut ta a.

.

Exam ka pek zawh chuan pawnah ka chhuak rualin ka phone ka en nghal.. mi zing pawh sawi thei loin thu hnawkin chu message chu ka chhiar a..

“Duat ka tihpalh.. I rilru tih nat a exam I tih that theih loh ka hlauh avangin ka hrilh thei lo che a ni. Tunkin zing dar 10:00 hi kan board hun a ni a.. ka pa nen Philipinnes kan pan ang.. ka tihpalh aw, mahse hei hi hre reng rawh I tan chiah ka rinawm ang ka tiam a che.. min lo nghak rawh aw.. ka hmangaih che..”

.

“Ngatinge..?.. ngatinge??.. ngatinge??” he thinlung hi na tak a hliamin a awm a.. a suangtuahna chanve hmawk chu tih chhiat sak in a  awm a ni. Andya pa hian a ti dik lo hul hual a ni.. ngatinge ka bulah a awm tir ve mai loh le?? Ani chuan private a a fapa zirtir  zir chu awlsam a ti ngei ang an neih in a tlin miau a mahse a beih a ngai ve tho a sin le..

.

A kal atang a kar khat ah pawh min la be lo,  ani hi ka tan ka thih tir mai dawn em niang tih a ka ngaihtuah nasat poh leh a message ka dawn hnuhnung ber chu ka hrechhuak zel a. Ni e, a duh vang a kal pawh a ni loa keichuan ka nghak thei tur alawm.. a chan tha zawk ka ni a, ka nghak thei dawn lawm ni tiin ka ngaihtuah a tlemin chu chuan min inbengdaih tir ve a.

.

Ka nun a hun chhinchhiahthlak tak chu ka tawng chho a.. college ka rap ve tan ta, ka nun a ka tan a awm reng Zuali nen chuan chu college ah pawh chuan kan la inkawm reng a, kan awmdun hi chuan thian dang kan mamawh lo ve tawk a ni. Mahse, thinglung chhungril hliam tawh ni tlat a ka inhriatna chuan nuam lo tihna min siam sak fo thin. Ka nun hi ka hne thin mahse ka hmalam hunah hlawhtlinna in min hmuak tih ka hriatna chuan min bei tauh tauh tir thin.

.

Zan khat chu khumah mu pahin phone ka khawih mai mai a.. ka laptop a mail ka dawng ri chuan min thawh tir vat a, ka laptop chu ka han en a.. ka lungphu han ran dan chu..

“Andy” tiin ka phun sep a.. video call kan ti ta a

“I kal tawh mi??” a rawn ti zawi sep a

“Aw kal tawh..” ka han ti a.. ka mittui chu a rawn luang a

“Tap suh khawngaihtakin.. I tha em??”

“Aw.. ka tha.. ngatinge min lo biak loh??” ka ti a

“Kan buai lutuk a.. bakah ka chungah I thinrim ka ring a..”

“Awmzia a awm lo..” ka han ti a

“Min ngai em??” a rawn tih chuan a ni pawh tah a insum tih ka hre mai a

“Nasa takin..” ka ti a, ka na ngawih ngawih..

“Kan tha ti raw..” a rawn tih chuan ka bu ngauh a.. a rawn veih nuih leh seih a..

.

Hun kan neih apiangin kan inbia a, a harsat viau ka rin laiin kan pangai chho ve zel a.. kan hlim chhoh ve zel chu ka ring a nuih pawh ka nui tam leh tawh khawp mai. Kan college thar ve ve te, class thlalak te kan awmna hmun te thla la in kan inhmuh a.. kan khawvel thar chu nuam kan ti dun hle niin a lang mahse he thinlung hi chuan a kiang a awm tluk a thlakhlelh a nei chuang lo.

.

Class kan kal regular chho a, mahni tawkah kan buai ve ta hle a, kan inbe tam thei leh ta lo.. a chang chuan keimah zawk hian han biak hamsak inthlahrunna riau ka nei tlat a.. a lakah hian hrang riau a in ngaihna ka nei tlat thin. Kar hnih ngawt kan inbe ta loa, biak chu ka chak mahse zahna riau ka nei tlat, ka inhmeh lo zawk.

.

Vawikhat chu Andya message ka dawng ve nawlh.. mak ti takin ka han hawng a..

“Distance never work out.. tunah hian in thlah rih mai ang, beiseina leh beidawnna in pek tawn reng hi ka hne a ni kei chuan.. mahse I hriat kha tih nat che ka duh ngai lo..”

Ngatinge maw ni engtinmah ka awm lo.. ka rilru hi a na loa, ka tah a chhuak hek lo.. ka tuar nasa tawh lutuk hi na leh tur chuang ka lo awm tawh lo tih na em niang..

“I rilru a let a nih kha.. I tih tur bak zawng chu hmalam pan..” ka thiannu thusawi chu dik riau in ka hria, beih pawn awmzia a neih loh chu engah nge ka kalsan mai loh le.. tunah hian Andya vawi thum thu min tiamtu leh vawithum a thutiam hlen lo tu tel lo in hmalam ka pan mek a ni.

.

Ka lehkha zirah nasa takin ka in sawrbing a, thinrimna in chakna min pe ni mai te hian ka hre thin.. chhungte pawisa hmanga nei leh nei loa zir chho ka nih avangin haw mai mai tumna ka nei loa college ka kal chhung zawngin ka la haw loa.. ka final year ka zawh veleh choh keipawn haw chu ka tum a ni.

.

Hun a  liam ve zel a.. ka zirlai pawh ka zo ve tep tawh a mahse khang hun chhung zawng khan mipa tumah ka kawm ngai lo.. mipa tel lo in ka nung thei tih in ka inhrilh fo thin. Diktak chuan enge maw hlek ah ka emotional feelings a chhuak a, ka tlu lut hma mahse ahma ang khan ka awm l;eh ka hlau tak zet a ni. Vawi khat chu Andya message ka dawng a..

“Hlimna hi tu ah pawh a lo awm anih hi”

Awmzia ka hre lo hle a, ka chhang lem lo mahse a ngaihzawng emaw a nih chu ka ring lo.. ka thiannu ka hrilh chuan chas a neih a rin thu a sawi a.. chu tah tak chuan ka na ngut ngut in ka hria..hmalam ka pan tawh emaw ka ti a mahse amah ah ka lo la bet reng em ni?? Zankhua khua ten ka tap ta fo a mahse ani chu biak ka tum lem lo.. ‘a tha vek mai ang’ tih chu ka inhnemna a ni.

.

Kum thum hnu ah Mizoramah ka haw ve dawn ta, ka phur zia chu sawi hian a siak lo.. him dam takin kan thleng a, kan chhungkua leh ka thian hnai deuh ten min lo hmuak a.. hetiang em em ka beisei miah lo. An ni chuan ka dan hman zia leh ka chhiat lo zia min hrilh sap sap hlawm a.. ka chhia nge chhe lo tih hriat tum ringawt a darthlalang hma a ka din khat tawh zia chu min ti hre chhuak zawk mai.

.

Thla hnih erh awrh ka cham chhung khan eng vak ka ti lo mahse hun chu a liam chak em em thung. Andy ate inbul emaw an dawr bula ka kal change chuan enge maw tak hian min mawlh thin. Mi thenkhat hnen atang a ka hriat dan chuan ani chu kumtin a haw a nih hmel.. min lo va mamawh lo bik ve tih chuan ka ngaihtuah a.. ni e, hlawhtlinna kawng a zawh chho ve anga kei a rilru hahna chhawktu chu a mamawh tawp nang.

.

University kal na tur ka buaipui leh char char a, ka buai ve hle a.. ka rilru chuan tum anei a ni.. kha mi hausa fapa mal ai khan ka hlawhtling ngei ngei tur a ni tih in. Ka theihtawp tak meuh meuh ka chhuah a, ka chhungten min puih bawm tha em em bawk a.. Degree tha tawk tak neih a mahni a bul tan ve chu ka tum bur a ni. Vanneihthlak takin University ka duhna ah tak chuan seat ka hmu ve hloh a, lehlam ah harsatna tam tak tawk mahila ka pathian hian ka beidawn hi a phal ngai lo a ni tih ka hria.

.

.

LAST GOODBYE

.

Ka zirna hmun tur lam pan turin kan chhungkua in airport lam kan pan a.. ka lungleng lawk viau e ti lo chuan rahbi thar ka han rap tur chu enge maw phurna riau hian min thuam a. Airport kan thlen atang a rei vak lo ah ka kal a ngai ta a ka chhungte chu ka kut vain ka han mangtha a, chutia ka let leh tur chiah chu Airport chhuahsan tur lam pan a luggage nawr pa chuan ka mit a la tlat.. ka han thlek hnai leh deuh a, ka lungphu hian Andy hi a van hre em! Mahse, ka en reng lai chuan a hma a ding nula chhelo tak leh Andy a nu leh pate chuan in tawh khawm lehna ropui tak lawm ni awm takin hlim takin an nui dar dar a, chu nula kawngah chuan ani chuan a kuah a airport chu an chhuah san a.  

.

Vanduai ve tur reng a piang a ka in ngaih laiin kei aia vanduai an tam tih ka hria a, dinhmun hian engtiang chiahin nge mi a dah hran theih tih ka ngaihtuah chang hian a na ka ti thin. Nun pangai duhtawkna rilru ka put te kha ka hmangaih khan min paih bo sak a ni. Mahse, a tawp ka thleng tep tawh a ni.. kha pa ai khan ka thluak ka hmang thiam a lehkha ka thiam.. sum a lei theih loh thiamna tak tak chu ka nei chu thil hma chuan bak chu phuba lak ve na kawng ka nei lo.

.

Thian nei maih loin ka lehkha zir chu ka chhunzawm a.. ka hlawhtlinna dal thei tu chu engkim ka dah bo vek tawh.. mi satliah nih ka duh loa tu emaw in ka pi a tih theih khawp a sang nih ka duh a ni. Mahse, hringnun hi duhna maiin a khalh thleng zo thin si lo.. ka bei a, ka bei tauh tauh a.. ka kal thui poh leh a har a ni. Mahse, heng ka thil tih tum hi keimah ngeiin ka tih loh chuan tuman min tih sak thei dawn si lo. Eng pawh ni se, a tha ber ni thei lo mah ila ka tum tur a ni dawn lawm ni..

.

Ka zir sang telh telh a, a har telh telh bawk.. ka rilru ka pek a ngai tih ka hria mahse ngaihtuahna hian a tan a tangkai chiah ngaihtuah tur em hian a in thunun zo bik thin si lo a ni. Mahse, ka tawngtaina leh ka bei ve tauh tauhna rah chhuah chu a ti tha pawl ka nih ve zelna chu a ni.Master degree ka neih hnu chuan ka duhtawk mai lo.. ka hming bul a doctor tih awm chu ka duh tlat. Ka tum lawk ang ngeiin ka bei tan leh ta a, Prefessor thenkhat te puihna zarah harsa lem loin thesis pawh ka ziak ve thei a.. ka phur takzet.

.

Ka thiannu in min rawn bia a karleh lamah Andya’n nupui a neih tur thu min rawn hrilh.. lawmpuina min lo hlan sak turin ka han ti ringawt a.. rilru pawh a lo puitling chho ve tawh a nih dawn hi eng thu thinthawng mahin min tin a peih tawh lo mahse ani kha ka ring leh tawh ngai dawn lo tih hi ka hrechiang thaw khat hle a ni.. tin, tu mipa mahin an thlak thei lo ang tih pawh hi

.

.

MISS INDEPENDENT

.

Kum li pumhlum  chu he lab hi kalpui a lo ni tawh a, ram dang a damdawiin a kum thum ka thawh nen  khang hun chhung zawng khan ka hna ah chiah ka rilru ka pe a, ka chhungte pawh ngaihsak thei lo khawp khan hlawhtlinna hmuh ka duh thin, tunah chuan ka beisei angin thil a thleng chho a, chu chuan min ti phur a hma sawn zel chu ka tum a ni. Kawppui ka mamawh loh zia chu ka inhre chiang thawkhat hle mahse ka chhungte leh thiante hian min nawr reng hi chuan anmahni vang choh a han ngaihsak deuh pawh chu ka duh ve thin.

Ka cabin kawngkhar kik ri ka hriat veleh chuan ka chhawn vat a

“Didik..”

“Doctor emaw Miss tihin min ko thei ang..” ka han ti let sak a

“I danglam tawh takzet..” Andy chuan a han ti a

“I nupui leh I fate an dam maw..”

“Kan inthen tawh.. kum khat bak kan in kawl hleinem..” a han ti a

“Pawi ve..” ka ti ringawt a

“He lab hi kum engzat nge a din tawh??” a han ti a

“Kum li..”

“A changtlung hle mai..”

“Ka duh dan ania lawm.. eng hna nge I thawh??’ ka han ti a

“India ah permit ka nei thei loa.. chuvang chuan ka pa sumdawnna lam a ka thlak leh tho a ngai a” a tih chuan ka nuih a za viauu

“A har alawm.. system a inang loa..”

“Min pui thei angem??”

“Enteh Andy ka danglam tawh.. I mamawh apiang a awm thin ang kha ka ni tawh lo..” ka ti a

“Ni e.. ka tihpalh a ni.. ka inthiam lo takzet”

“Mi pangai inih chuan in thiam lo tur chu inia lawm..”

.

Ka sualthiam mah mahin ka hria mahse ka thinrimna leh ka tawrhna te ngaihtuah chuan nepte a ni. Thu ka tiam mai mai ngai loa tuman thu min tiam mai mai ngai lo bawk. Ani hian vawi thum min tiam a mahse tih hlawhtlin pakhat mah a nei lo.. he thinlung hian ala duh tih chu ka hai lo mahse a duh vang ringawt hian a mamawh kher lo tih pawh ka chiang a ni.

.

Mi then khat chuan ka hma hun min gaihtuah puiin “Pasal nei ve tawh rawh” tih tawngkam ka tawk fo va, mahse thil awlai tak a ni miah lo. He khawvelah ka ta tur an awm ve anih ngai chuan chhungkaw din chu ka duhthusam a ni mahse ka la tawng lo mai a ni. Pasal nei a chhungkaw din a tlai ai chuan mi pakhat vang a ka nun a chhiat a ka hlawhtlin loh kha ka hlau zawk tlat a ni.

.

Ka phone call dawn chu ka chhang vat a, ka thiannu Zuali a lo ni a

“Hello..”

“Dik.. mi date la tha ka ti e..”

“A teh ngawt thin chuan.. ka duh vang ringawt in mi ka date thei hleinem”

“Nilo.. kha College kan kal laia kan senior Msa kha I hria em??” a han ti a

“U Msa maw.. aw hria e.. ngatinge??”

“A duhna che a rei ve tawh em hi.. a hmeltha a, a hlawhtling bawk a.. hmeichhe ngaihsak lo lutuk chung a a rawn la sawi fo che hi ka khawngaih..” a tih chuan ka nuih a za lek lek

“Ka hnenah a sawi ve ngai lo..”

“Mipa biak ngamin I awm ngai reng reng em ni??”

“Chutiang chuan ka lo awm a maw??”

“Awm tehreng ee.. kan pa nen pawn an in hre tha a, a phurpui che u a nia..”

“Anih chuan kan tum chhin dawn nia..”

“I ti takzet em??”

“Aw.. nang pawn I star theih em kha.. a laktlak a niang chu ka tia..” fiamthu ti tak deuh chuan ka han ti a

“Kha thil kha chu sawi chhuah chi lo ang aw..” nui uar uar pah chuan a rawn ti a

“A lo tha phian a nih te chuan ka chan phal bik nang.. kum 30 ka nih tawh mai dawn hi..”

“Nia.. kum ral kai dawnah tunlai thalai ho tih dan in date I nei dawn chu a nia..”

“Ka zam miah lo ania.. zah kan pel tawh tlat..” ka han ti a

.

Enge ka mipa hriat thar tur chu  a an I han en dawn teh ang hmiang.. a hma ang kha a nih loh beisei phawt ila”

.

>>>>>>THE END<<<<<