AS LONG AS YOU LOVE ME

”Ngatinge ka nu I hmuh duh tawh tlat loh a??” tiin Mapuia chuan mak tih hmel takin min en reng a

“Ka duh lo tih engtik laiin nge ka sawi a..??”

“Vawi tam tak hmuh leh a chak thu che min hrilh a, I hnenah ka sawi a,, mahse awmzia a awm lo” a beidawng hmel chuan min tina takzet.. minute sawm  dawn kan ngawih dun hnu chuan..

“Mapui, kha I nu nun ti chhe vek tu pa kha hmu leh la engtin nge I tih ang??” ka ti sep a

“Ka that ang!!” ka thinlung hi chem hriam takin a vih ang mai a ni

“A thi tawh..” ka ti a, ka chil ka lem ri kalh a

“Thusawi lai thlak tum suh..” a rawn ti tuar a

“I duh chuan a fanu hi I that thei ang..”

“Maw..” ka dar leh lam leh lamah a rawn chelh a.. ka mitah tak chuan min en reng a..

>>>>>>>>>>>><<<<<<<<<<< 

.

.

Cabin atanga ka chhuah chuan damdawiin chung lam ka pan ding nghal a...ka insumna  chu dah bo in mittui sur zawih zawihin ka tap a, ka khawvel hi a thim vekin ka hria a ni.

“Lalpa ka ngen a che.. ka pa hi min laksak suh.. khawngaihtakin.. engtin nge kan unau in kan awm ang?? Ka pa tel lo chuan ka nau hi ka enkawl thei lo..”

.

Kum thum liam ta khan ka nu in min boral san a, kan unau hnih chuan kan tuar thiam lo em em a, ka nau ngat phei hi chu rawlthar ve uaih tawh si chung hian a mah a a awm te hian a lo tap keuh keuh zel thin a, chung a tap lai ka hmuh te hian  ka rilru a ti no hmanhmawh leh thin. Ka nu boral atanga kum khat em pawh a tlin hma in ka pa hi a tha lo tan a, luhai a tluk mai te.. mut theih loh, hlauh neih ang te hian a awm ta thin a.. Doctor hrang hrang, Psychiatrists thlengin kan pan a.. a hnu lawkah BP sang leh Lung tha lo a nei tih hmuh chhuah  ani a. Doctor chuan kan pan tlai mah mah thu min hrilh chuan ka beidawng rilru hle a, damdawiin a lut turin thurawn min pe nghal a, kum khat chuang dawn chu kan in enkawl ve tawh a, mahse dam lam aiin that loh lam a la pan reng a ni.

.

Damdawiin a ka pa awm atanga min awmpuitu ber ka nutei chaw ei tur Tiffin ka siam lai mek chuan ka phone a lo ri a,

“Hello.. aw nute”

“Mate.. in unau khan damdawiin lamah in rawn kal vat dawn em niang,, I pa hian a lam reng che u a..” ka nutei chuan hlauthawng tih hriat tak hian a rawn ti a

“Aw.. kan rawn phei nghal…” ka ti a, ka nau a hma zan lawk a ka pa tlaivar a awmpuitu room lam chu ka pan nghal a..”

“Mamm.. mamm.. tho rawh..”

“U tinge.. a pa a tha lo a mi..” tiin a rawn tho chhuak nghal a. A hmel ka han en chiang a, a chau ngawih ngawih tih a hriat hle a.. ka nau neih chhun hi a van khawngaihthlak tak em!!!

“Damdawiin ah kan kal vat a ngai Mama..” ka tih chuan, a tho a, a helmet la in Lunglei Civil  Hospital lam kan pan ta a.

.

Ka pa awmna pindan chu hmanhmawh takin kan pan a, ICU lamah sawn a lo ni a.. ka ngaihbel nge maw ni ka pa chu a chhe zual tlat a hriatna ka nei a ni. Ani chuan thei leh thei loin min lo hui a.. a hmui bulah chuan a sawi duh angte hriat tumin ka beng ka dawh vat a..

“Ka thir thingrem kha in en a ngai  a ni Mambawih” a rawn ti tham chel a

“Umm kan lo en ang pa..”

“Tunah..”

“Maw..”

“Tunah kha thingrem chhung a ka bawm dah kha rawn la rawh u..”

Kan unau chuan kan in en a, kan hrilhhai dun hle tih a hriat a ni.

“U keimah ka va kal ang..” tiin ka nau chu chhuah a tum a, ka pa chuan a lu a rawn thing.. ka van hrethiam lo tak..

“Kan pahnihin kal ang Mama..” tiin kan in zui chhuak ta a

.

Ka pa thingrem hlui tawh tak chu Store room atangin kan unau chuan kan la a, thutkhawmna pindan lamah kan chawi phei ta a..

“U chahbi..” ka nau chuan a rawn ti a

“Mam.. chhu chhe mai ang.. umm”

Ka nau in a kalhna a chhut chhiat hnu chuan chu thingrem chu kan han hawng a, chukchu an rawn tlan chhuak nuai a.. maimawm ril a lo in zam teuh bawk a, thawmhnaw hlui tawh tak sirah chuan bawm hran deuh a awm a lo awm a, ka nau chu ka en zeuh a, ani chuan la chhuak turin min lo pui vat a. Chu bawm hlui tawh tak,ngap em em chu kan hawng a.. lehkha, thlalak, zopa meizial rei tawh em em tih hriat tak te a lo awm a. Thlalak chu ka han en kual a, hmeichhe pakhat thlalak ngawt chu pasarih lai hmuh tur a awm a, ka pa nen a an lak dun pahnih hmuh tur a awm bawk a. Lehkha ho chu ka bih zuai zuai a, thil nih dan chu ka hmu thiam tanin ka hria, ka nau erawh chu ka hrilh duh lo a ni a chhan chu tun a kan buaipui mek hi ka nu ni loin ka pa hmangaih hmasa ber leh ka pa sulhnu a ni tih a hriat vaih chuan ka nu a thikpui na lamah eng engnge a tih ang tih pawh a hriat si loa.

.

Bawm chu damdawiin a ken tur a ka dah fel lai chuan ka nau in call a dawng a,

“U ka pa a tha lo.. damdawiin ah kan kal vat a ngai..”  arawn ti tuar a. bawm pawh ngaihsak hman loin ka nau nen chuan Lunglei Civil Hospital lam chu kan pan ta a. Kan thlen chuan chhungte ho pawh an lo thleng nual tawh a, thla phang takin ka pa awmna  ICU lam chu kan pan a. Ka pa chu men pawh a meng thei tawh loa, tawng phei chu a theih tawh loh bur a ni.

“Mate khawnge in chahbi.. in singsak pui turin I patea te an zuk haw ange..” ka ni in a rawn tih chuan ka bing mup mup a, ka nau ka va en , a kun tlat thung.. a rukin a tap tih ka hre reng. He ventilator hi phawi a nih rual rualin ka pa thlarau hi a taksa atangin a chhuak dawn chu a ni si a le.. Mi tam tak ka lo khawngaih thin nu leh pa nei lo dinhmun ang kha kan unau dinhmun a ni ve tawh dawn a ni tih te ka ngaihtuah a, ka thinlung hi a na ngawih ngawih a ni. Upa tawh in tar tawh tak ni se chuan ka pawm thiam ve deuh tur mahse kum 50 an tling chho awrh choh a, min kalsan mai tur hi hriatthiam a har takzet a ni.

.

“U a pa hi chawlh tir tawh  ang.. ka nu nen awmdun ve tawh rawh se..” ka nau chu a rawn phun sep a, sawi tur pawh hre loin ka pa chu ka en ngar ngar a. Nurse hnenah chuan ka nau chuan ventilator chu ti tawp turin a hrilh chuan nurse chuan min rawn en a..

“Ti rawh..” ka lo ti a

“U pa kan nei tawh lo..” tiin ka nau chuan min rawn kuah a, kan unau chuan kan tap dun a, chhungte dangin min buaipuiin min kal hran pui ta a.

.

“Mam.. tinge I la thawh loh??? Class I tlai dawn a nia..” tiin ka nau chu ka kaitho a, a rawn men chuan  a mit chu a sen ram a, a bui deuh chuk a.. “Ehe.. I tap a mi a Bawiha..”

“Ka mumangah ka pa ka hmu a..” a rawn ti a

“A van nuam awm bik.. Engtin nge I hmuh a..??” ka lo ti a

“A boral hma a a bawm min lak tir a tum kha min lo pe a.. lehkha them ah “THUTIAM” tih inziak nen min lo pe tel a..”

“A van mak em em.. tho phawt rawh, keipawh Ofiice ka tlai dawn.. chaw ei ngei ngei tur aw..” tiin ka nau room chu ka chhuahsan ta a.

.

Ka pa Car chu la chhuakin ka hnathawhna lam ka pan a, kum khat kal ta mai atang khan HDFC bank ah Manager hna ka thawk ve a, ka nau erawh chu J.Buana college ah BA a kum tawpna a zir mek a ni. Ka pa hian sawrkar hna chhete a thawk thin a, mahse a that loh zual atang khan Voluntary pension angin kan kal tir a, ka pa pension hlawh leh ka hlawh hi kan ei bel ber a ni tawh a. Vanneihthlak takin ka nu boral hma lawk khan kan in kan sa tha a, keini unau hnih chiah kan ni bawk nen nu leh pa ten in leh lo tha tak min hnutchhiah bawk a.. midang te ang a neih chuangliam em em nei lo mahila kan nun chu a nuam ve hle a ni.

.

Ka duh vang pawh ni lo in ka nau mumang chuan ka rilru a luah leh veng veng zel thin, ka pa khan kha bawm kha keng turin min ti a mahse a hmu hman ta lo a, enge ka pa hian a duh ber chu le.. Ka hnathawk bang ka haw veleh Bawm chu ka pindan lamah chawiin ka hawng a, engkim chipchiar tak a hriat vek chu ka tum a ni. Ka Pa hmangaih hmasa ber hming chu “Saitluangpuii” a ni tih chu lehkha atang chuan ka hre thei ta a. Ka pa nen a an in ngaihzawn lai vel hi kum 1983, 1984 chho bawr vel a ni tih ka hre chho a.. tin an lehkhathawn te ka chhiar a, an in hmangaih hmel thin hle in a lang. Ka pa hi pa fel thlip thlep a nih na angin lehkhathawn a dawn dan hun ang zelin a rem a, a tawp lam a a dawn ni awm tak chu ka han chhiar chho zel  a, thil kal dan chu ka hrethiam chho ta a.

.

Ka pa hi a hmangaih hmasa berte khua, Champhai ah chawlhkar hnih cham turin a zin a, he tah hian an in tawng a..Ka pa haw hnu chuan duh anga inbe turin telephone tak ngial pawh hman a harsat thin avangin lehkha an in thawn fova, chu chu an inbiak ve theihna awm chhun a ni. Eng eng emaw chhuanlam chuan ka pa chu a va zin ve fo ni tur a ni, a zin haw hnu a a hmangaih hmasa berin a thlakhlelhna lehkhathawn ka chhiar chuan ka hre thei a ni. Kum 1986 a rawn in her chhuah chuan ka pa hmangaih hmasa ber chuan a chhungten Aizawl lam a mi awm thei  ve tak fapa mal neih tir an tum thu ka pa lehkha in a rawn hrilh a, tlan bo pui mai tur a a ngenna nen chuan ka chhiar bawk a..

“Ka pa hian engtin nge a tih le..” tih pah chuan lehkha dang chu ka en nawn leh a.. Chung lehkha ah chuan ka pa hmangaih hmasa ber chhungte chuan ka pa kha an lo haw hle a, a rang thei ang berin inneih chu an kal luih pui ni awm tak a ni. A hnu a ka lehkha hmuh chuan ka mittui a titla hial a..

“Muana,

I rilru ka tih nat avang hian engtik lai mahila ka hlim ngai loa, in thah hial te ka chak rum rum thin a sin. Engtin nge I awm ang le tih ngaihtuah reng reng in nitin nun ka hmang a, ka thil tih engmah ka tui thei lo. Ni e, pasal nei lai chu ka ni ngei a lawm.. mahse he ka pasal hi ka hmangaih lo a ni a ani hian hlimna min pek a tum poh leh ka hua a ni. Ka tawrh chhuah a, ka hlimpui mai ka ring thin a mahse ka thei ngang lo a ni. Hun tlemte chiah min pe la I hnen ah ka lo kir ang tih ka tiam che ka duh.. tun a ka nau pai hi thla leh lamah chuan ka hring mai dawn a, he naute hi ka hrin rual rualin a pa hnenah dahin Lunglei lamah I kianga lo kal ka tum a ni, Chu mi hun atan chuan khawngaihin lo in ring ru deuh la.. naute ka neih velah telephone atangin ka rawn hrilh che anga, nangin ruahmanna lo siam la ka duh ani. Hmeichhe rapthlak, ril a rah fa pawh hmangaih zo lo min ti mahla ka pawi ti lo.. nang nen a hlim tak a awm chiah ka duh a ni. Ka hmangaih che.. Ka thih ni thlengin ka hmangaih ang che.

Nang hmangaih tlat tu che,

Saitluangpuii”

.

Date ka en chuan 18/9/87 a ni a, kum khat tal tawp  chu he nu hian lehkha a lo thawn lo a nih chu, a van mak ve aw.. fa a pai hma hian ka pa hnenah a let thei  reng si a, hmeichhe mak tak chu a ni e. Lehkha tawp ber chu ka phawrh leh a,

“Hei chu ka pa ziah a ni hi.. enge awmzia..??”

“Tluangpuii,

Tukin zing lam a ka thusawi ah khan min ngaidam hram ang che, kei chuan kum khat tal tawp tawrh chhuah tumin ka bei a, chhungte tan pawh a tha chhawr tlak loh hialin ka bawk sawp a.. I hnen atang erawh chuan eng chanchin mah ka dawng ngai lo thung. I lehkha rawn thawn hnuhnung ber ka rawn chhan let loh che avang khan nang chuan I fai neih thu pawh khan min rawn hrilh ka ring lem loa, mahse I la rawn sawi tho a. Theih se chuan telephone atang a sawi vek theih kha ka chak lutuk amaherawh chu mi phone hmang ka ni si a, nang I nau nei I la chak tha lo nen lehkha ah hian ziakin ka rawn hrilh zawk che a ni. Ka rawn kal dawn loh thu ka sawi a, I dam chhung a min nghah tur thu I sawi khan ka thin a ti rim zual a ni, I pasal neih tur thu min hrilh a I sawi ngai ang chiah kha a ni. I thusawi avang chohin ka rawn kal a mahse hmuhsit leh chak loin ka haw a, nangin eng lehkha thawn mah I rawn thawn lo bawk a, khang kha rilru letna chhan chu a ni ve a sin. Ka lakah beidawng la, I chhungkaw thar nen hlim takin awm tawh rawh u, kei pawh thla leh 17/11/87 hian nupui ka nei dawn a, in pa tal a arawn tel ve theih ngei ka bei sei.. I hnen a ka tiam nang hmuh leh che chu ka thei ta lo a ni, min ngaidam dawn nia.

I hmangaih thin,

Rammuanpuia

.

Ka thaw hak.. ka pa hian hun harsa tak a lo paltlang a nih hi. Mahse, ngatinge he lehkha hi a thawn loh?? Ni e, kha nu rilru kha tih nat a duh loh a vangin ka pa hian a va thawn lo a ni, a awmzia chu khanu lakah khan pangngai takin thu tawp a la siam lo a ni. Ka pa hian eng thil nge ti turin min duh le, he nu hi va zawng chhuak dawn pawh ni ila khawnge a awm tih takngial pawh ka hre loa, a hming hi tun a rintlak ka hriat mai chu a ni si.

.

Kei leh kei lo angin he thil hi ka vei lutuk tlat, hreawm ka ti rilru hle a.. mahse ka nau chu hrilh ka tum chuang lo. Enge maw tak ka tih angai a ka hriat avang chuan ka pa hmangaih hmasa ber Saitluangpuii chu chhui zui tha in ka hre ta a. Champhai lama ka pu unau te ka va bia a, an ni chuan  Aizawl lamah a pasal neih hnu atanga a awm thu min lo hrilh thung a. Ka thla a muang huai mai, a pasal nen an la innei anih dawn chu tiin.

.

Thla tam fe hun a kal leh ta a, ka nau pawh graduate val a ni ve mai tawh a. Ani chuan Mizoram University lam a test tih a duh avangin kan pahnihin Aizawl lam kan pan dun a, Aizawl ka awm lai mek chuan ka thawhna lam atangin hriattirna ka dawng a, min ti hnual rawih thei. Ka nau in Aizawl lam ah University kal thei mah se kei chu Lunglei lamah hna thawkin ka awm reng dawn ni a ka ngaih laiin Aizawl a Chanmari Branch an min sawn thu ka dawng nawlh mai chuan min ti hrilhhai hle a ni. Ka nau ka hrilh chuan kan awmdun theih dawn vang a a lawm thu a sawi daih thung, chutiang zawng a ka ngaihtuah chuan ka hlim tho mai.

.

Ka nutei te chu kan in min en fel sak turin ka han ti rawih a, an ni pawh chu an in hawng hle a. Diktak chuan ka nu leh pa te sulhnu tamna a nih avang chuan han kalsan chu ka hreh ngei mai, mahse ka hna thilah a ni miau si a le. Tih fel ngai zawng zawng kan tih fel hnu chuan Aizawl lamah Vaivakawnah in luah tur tha tak kan hmu a.. ka nau in bike a kawl a, kei lahin ka pa Car ka rochun avangin kan kal ziahna tur lam ngaihtuah lem lo chuan kan luah lut ta a.

.

 “Miss, vawiin kha Standard Life Insuarance  nen a meeting in neih ni tur kha ania..”

“Aw le, ka hria e..”

.

.

“Kei hi  Lalthazuala, HDFC Standard Life Insuarance, North East Branch bik a Asst.Director ka ni e..” tiin tlangval sang veh vuah tak chuan min han chibai a..

“Nunhlupuii, HDFC Branch Manager..” tiin ka lo chibai let vat a

“Manager hlui zawk kha hmuh ka lo in ring deuh a..” tiin a vei nuih seih a

“Nia, Thla thum kal ta mai khan helai hmun ah hian sawn ka ni a..”

“Anih chuan khang Insuarance chung chang a buaina vel kha..”

“Nia.. kei pawn ka lo hria a, mahse a tibuaitu ber Manager kha Suspend a niin transfer a ni nghal bawk a, thu thlukna hi keima siam ringawt tur a ni bawk lo nen..”

“Miss, thla thum ngawt kan nghak a sin, khang avang a kan hmingchhiat hman zia hi” tiin min chhang a

“Kan branch atang a tih theih chu kan ti ve nasa lutuk a lawm sir, main branch lam hian eng information mah min la pek loh vang a ni..”

“Hun engzah nge in mamawh??”

“Kar hnih..”

“Thla thum chhung a chin fel theih loh kha kar hnih chhungin I zo ang maw..” tiin min han zawt lui ngat a

“Aw.. manager hmasa kha ka ni hleinem Sir Thazual..” tiin ka chhang let a

.

Buaina hlir, buaina hlir.. Kha Asst.Director kha NE meuh a bial a, heng thil te ching fel turin a rawn kal chu  ania.  Manager hmasa kha ka hmuh phakah hian awm se chuan ka ben vawikhat chu a phu mawle, main branch lam hian min puih tumna pawh an nei lo a nih hi. Company pakhat hnuai a hna hrang mai a ni a, engah nge an buaina hi an lak vung viau le.. Manager ka hma chiah a awm khan Industry lian ve tawk tak ten an Insuarance claim tawh chu kan branch kaltlang a pek tur a nih laiin a lo khawih chingpen a, Insuarance Office lama chin fel ngaiin chu claimer te chu a lo hrilh bawk a.. hei hi kan buaina chu a ni. Main office lam atangin kha insuarance pawisa kha a tuartu te pe mai se, thil ti sual tu chuan eng property emaw in rul mai se engkim hi a fel dawn tih kan hria, mahse eng chhanna mah kan dawng thei sin lo. Company lawyer hi keimah ngeiin ka biak a ngai dawn a ni.

.

Hlim rilru tak leh chau tak siin ka car chuan ka inkhalh haw a, in ka thlen chuan ka nau in eirawng a lo bawl mek a, ka inbual zawh chuan ka phone ka en a, missed call vawi hnih number hriat loh atangin a ni a, ka call let vat a

“Hello..”

“Hello.. tunge aw.. I missed call ka hmu a..” ka ti vat a

“Insuarance  branch atangin..hehe..”

“Hmm.. Asst.Director  Thazuala maw..”

“Hnathawhna hmunah lo chuan Mapui tiin min ko zawk la..” a rawn ti a

“Aw.. Mapui, enge ni teh mial..”

“Lawmpuina hlan che ka tum a, I hna I thawk tha khawp mai.. keini lam leh nangni lam tan pawn a lawmawm riau a..” a rawn ti a

“A lawmawm viau a nia nge.. personal takin I rawn sawi a..hehe”

“Official tak a lawmthu rawn sawi chu ka duh a, mahse ka zin chhuah a ngaih dawn avangin ka rawn kal thei dawn lo alawm mawle..” a rawn ti dam dem a

“A ni maw.. ka pawm alawm, keipawh ka lawm lutuk tlat Asst Director..”

.

Mapuia nen chuan hna thilah emaw hna thil lem loah pawh kan inbe chho ta fova, Ani chuan main branch Shillong lamah a awm tam thung a, mahse thla khatah vawikhat tal Branch dang fangin Aizawl lamah pawh a rawn kal fo thin. Ani hi  anu nen chiah a cheng an ni a, mahse hmun hran a a awm dawn tak avangin a cousin in a nu chu  a awmpui tih min hrilh bawk a. Ani hi ka ngaina in a bulah awm tam lo mahila a mizia chu ka hre ve tawkin ka hria a ni. Thla hnih chuang kan inbiak tak fo hnu chuan ani chuan inngaihzawn lam a sawi chho a, keipawh chuan ka nau ka rawn a.. ani in min lo duhpui ve viau avang chuan kan inngaizawng ve ta a.

.

Kan inngaihzawn chhoh hnu chuan an chhungkaw chanchin tam tak min hrilh a, kan inneih ve hnu ah pawh a nu leh pa te ang a kan awm a duh loh thu min hrilh thin. A pa rui in  a nu a nghaisak nasat thin zia te, chu pawh a nu in  ahmangaih hmasa ber a theihnghilh theih loh vang leh a pa nen a thehkhin fo thin thu a sawi chuan ka rilru a lo nat pui thin.. Vawi tam tak a nu chuan tap chungin a hmangaih diktakin a rawn hruai tur thu a fapa a hrilh thin tih a sawi chuan a nu chu ka dem ve hle a, mahse an thil tawn dik tak kan hre si loa. Ni e, Mapuia nu tan khan pasal zurui reng awmpui kha thil awl ai tak a ni ngai lo ang, hmangaih dang a la neih zui ngat phei chuan.

.

“Bawihi, Guwahati lam ka pan dawn chiah..” tih message ka dawng a

“Enge awmzia.. hna thawh hun pawh ala zawh loh hi..” tiin ka va reply a

“Naktuk 4^th Saturday a nih hi, I bulah ka awm dawn alawm.. chawlh a awm te chuan”

“Anih dar engzah nge I flight hun ni a..??” ka ti a

“Dar thumah”

“Rawn hmuah I ngai em??”

“Ngai loe.. naktuk tlaia kan in a chaw ei turin ka rawn hruai dawn che nia, chawhnu lamah ka rawn kal ang..”

“Tinge I van ti teh thut ve”

“Ka nu ka hrilh vek tawh.. ka rawn thleng vat ang..”

“Awle.. Tluang deuhin aw..”

“OK.. muah..”

.

An ina kan luh chuan nu upa lam lek lek hian min lo chhawn vat a..

“Nu hei hi ka thiannu  Nunhlupuii a nih hi, Puii tiin I ko mai dawn nia.. chuan hei hi ka nu anih hi, Nu Tluangpui tih a pawi angem Nu..” kan nui hak a

“Aww.,. Mama thin hi a, Ka nu tih a tawk mai alawm..” Mapuia nu chuan a rawn ti vat a

“I duh em ??” tiin Mapuia chuan min rawn melh zeuh a

“Nute tiin ka ko zawk ang che aw..” tiin nui pahin ka han ti a

“A tha khawp ang chu

.

Chaw ei hma chuan Mapuia room lamah kan awm a, a theih ang ang a thawmhnaw te chu ka thleh fel sak a, ka thleh mek lai chuan ka hnungah min rawn kuah a

“Uluk vak duh suh, Thawhtan a ka ken leh mai tur anih kha..” a rawn ti a

“Chu pawh ni se a ngai alawm..”

“I nau chu a khua a har ngawt ang a.. a rawn kal ve mai loa..”

“Har lo ang, mahni in a awm thang alawm..” ka lo ti vat a

“Engtiknge kan inneih ang??”

“Engtiknge I duh??” ka lo ti vat a

“Tunah..” tiin a lam ka hawi a, ani chuan lungchim takin min lo fawp a, tha thei ang berin ka lo chhang let a..

“A tawk.. midang an lo lut ang..” tiin ka inla hrang a

“Kan kalh dawn mi??”

“Umm va kalh a..”

Kalh tur a Mapuia a va kal velah chuan..

“Oh.. Nu, enge ilo tih dawn??”

Ka nuih a za angreng hlee.. a ui hmel hle mai ka bialpa hmeltha tak sawn

“Enteh Puii hei hi kan chhungkaw album anih hi, en rawh..” tiin album min rawn pe a

“Aw Nu.. a van ho thin tak, en na hun ala tam nen..” tiin Mapuia chuan a lo ti vat a

“Inneih hma a kan chhungkua a hriat angai alawm.. kum 30 I tlin hma in nupui nei turin ka hrilh che kha” ti a Mapuia nu in a tih chuan Mapuia hmel, a nu thusawi haw lutuk chu ka lo nuih char char a

“Ka chhuk dawn ania.. ti khan en rawh u..” tiin Mapuia nu chuan  min kalsan ta a

.

“Ui tah hian I cute lutuk..” tiin thlalak chu ka en a, ka bula thu pah chuan ka sam a chul thung a

“Dah tehhh..”

“Aih ka la en zawh loh hi..”

“Hei hi I pa tlangval lai a mi??” tiin a thusawi pawh ngaihsak lo chuan ka han ti a

“Aw nih kha..”

“I chhun anih hi..”… “Ehe!!!”

“Enge aa??” tiin ka thil en lai chu a rawn en vat a “ Ka nu nulat lai a nih kha..”

Ka lungphu chu a rawn rang nghal a, ka bing nghal mup mupin ka hria.. chu thlalak chu ka en nawn a, ani thei lo!!! Ka bialpa nu hi ka pa hmangaih hmasa ber maw ni.. engtinnge ka tih tak ang.. Mapuia thil min hrilh ho ka ngaihtuah let a, a nu khan ka pa kha Mapuia kum 13 mi a nih a, a pa a boral thleng khan ala beisei a nih kha.. Mapuia chuan a hunlaiin hrethiam lo mah se a tetlai nun a hriatreng theih ho chuan  anu leh pa inkar ti chhe tu ka pa kha a haw tlat a, ani hian engangin nge min ngaih ang le, thudik hi hre ta se..

“Mapui ka nu leh pa hming I hria em??” ka ti chhuak phawng a

“Aih.. ehe kum khat chuang kan in ngaizawng ve tawh a ka la zawt miah lo che, min han hrilh teh..” a ti a

“Ngai lo.. chaw ei na ah I nu in min zawt dawn tho lawm..”

“Engtinnge I hriat??”

“Puitling ho tih dan alawm..” tiin ka chhang a

.

Chaw ei na ah chuan ka rin ang ngeiin Mapuia nu chuan kan chhungkaw chanchin min zawt a, ka nu leh pa hming chu phuahchawpin dawt ka sawi ta ringawt a, ka nu leh pa thlarau ka zah takzet a ni. Engatinge ka pa in bawm min en tir hnu khan he Mapuia nu hi ka va hmuh mai loh le.. Mapuia nen hian kan inngaihzawn loh phah mai thei si a, mahse ka ngaihtuah chian chuan ani ka nun a a lih loh hi ka phal bik si lo.

.

“A chang chuan ka nu hnenah hian engvang a min thlang thut zawk nge a nih tih zawh tawp ka chak thin” tiin Mapui chuan a rawn ti a

“Eng nen maw Duat..”

“Kha a hmangaih hmasa ber kha.. I hria em duat.. vawi tam tak ka pa awm loh lai hian chhuak turin a inseam a.. min kalsan a tum fo thin asin..”

“Mahse I bulah a awm tlat tawh hi..” ka lo ti a

“Ka pa boral vangin min enkawl mai mai alawm..”

“A ni lo Duat, I pa khan zu a in nasa em em a hreawm a ti ve anih chu I nu in”

“ Ka pa khan a um a, a rawn hruai let fova.. ka pa ala chhuahsan ngei ngei tur thu a sawi ziah”

“Hmeichhia chuan kan hahdamna mipa kan mamawh alawm.. nangmah a ka hahdam ang chiah hian, I nu khan I pa leh a hmangaih hmasa ber kha a duh vang a tehkhin a ni lo.. ipa khan hahdamna a pek loh vang pawh a ni thei a..” ka lo ti a

“Ka pa khan pe duh tehreng pawh nise a duh ka ring lo, ka tet lai chuan ka pa kha ka hua a.. mahse ka thanglian telh telh a thil hi ka hrethiam ve a sin, ka nu khan min hruai vet al tum thin se tunah hian ka rilru pawh a dam ve tur..”

“I pa in a phal I ring a mi??”

“Aih.. ring lo..”

“Duat in ngaihtuah lung puam tawh suh.. a tlai dawn haw tawh rawh naktuk ah I chhuk hma a ngai si a” ka ti a

“Riak turin min sawm mai lah..” tiin min kuah vawng vawng a

“Sawm dawn si loa..”

“Nih.. pawn thleng saw min thlah rawh..”

.

Ka mut hmunah chuan ka ngaihtuah ngut ngut a, he thil hi hriatchhuah loin ka thup thei a ngem.. a theih loh!! Inneih lam an sawi chho tan a, kei hian tih tur ber pawh ka hre lo. Mapuia nu chu ka hmin thei mai ang a, mahse amah Mapuia hi engtinnge ni ve ta nag, ka pa kha a haw ngawih ngawih a ni si. A tawrh ngaihtuah chuan ka dem lo mahse ka pa khan eng thil mah a ti lo asin, chu chu hrilh I la min awih mai angem?? A teuh lo, ani hian ka bum a ni tih ahre chhuak vat dawn si a.

.

Nitin nunphung pangngai zawh mahila keimah ah hian dawt nunpui ang tlat a inngaihna hian min chhuahsan ngai lo. Mapuia pawn a chin dang thanin pangpar min la rawn thawn reng a, ani tluk a ka tan a mipa tha hi chu an awm lo maw le mahse a tan hian hmeichhe tha ka ni ve thei si lo. A lang lam thlir chuan hmeichhe zahawm tak leh tum ruh tak, hmelah leh pianah pawh iaiawm loh chu ka ni ve ngei a mahse  ka hmangaih tan hian ka tling mawlh lo  ani.

.

“U, ka nu thih chamah chuan kan phei ve thei ang chu ti raw..” ka nau chuan a rawn ti a

“Shillong ah NE branch ho meeting kan neih angai dawn a, kal ka duh nen aw..”

“Keimah a phei chu ka peih loe..” a ti a

“I thiante kal duh an awm lawm ni, Carin in phei anga.. bike ai chuan a nuam deuh nga”

“Mary nimai..”

“Hmeichhia te chu.. a chhungten an phal lo ang..” ka lo ti vat a

“A nu ten min rin em hi..”

“Anih an rin ang che in I awm em??” ka ti a

“Awm ee..”

“I hruai pawn room khatah mu reng reng suh u..” ka ti a

“U I van thing tak..”

“Tiam rawh”

“Aih..” tiin a tho daih

“Lalvensang..!!!”

“I mawl e mai U..”

“Sawn I thlak dawn miah lo ania.. I nei ngei ngei ang hre rawh.. chuan a rai lo anih pawn in tlin tawh lo anih ngat chuan dan puitlingin in innei chuang lo ang..” ka ti pang pang a, ka nuih a za thut, ka tawngkam hman reng reng chu.

.

Hotel atang a ka chhuah chuan Mapuia Carin min lo nghak reng tawh a..

“Ka nau ka be tlang thei loa, ka buai vek alawm..” ka ti a

“Inlengte an awm ve anga a buai aniang chu..”

“Ni ve tho.. Meeting zawhah chuan min hruai haw kher duh suh aw.. ka bazaar zuai duh a..”

“Ka bula I awm theih laia induh hi nuam iti riau..” a rawn ti a

“Induh lam a ni lo, hna I nei lawm..”

“Aizawl lamah Insuarance sub branch rawn din lam kha vawiin ah confirm a ni dawn a..” a ti a

“Ngatinge ka hriat ve loh??” Ka lo ti vat a

“Engvangin nge Bank lamin Insurance lam thu hla in hriat ve kher angaih ang..”

“Haha.. I sual kher kher ee..”

.

Shillong atang a Aizawl lama ka haw hnu chuan chawlh reilote hmangin Lunglei lamah ka phei a, kan in leh a chheh vel, ka nu leh pa thlante ka hmuh chuan lung a ti leng thar em em a, han tah keuh keuh chang a tam hle a ni. Ka pindan ka tihfel ni chuan ka pa bawm chu ka hmu chhuak leh nawlh a, rilru a kal thui duh ngei mai.. he thil hian in hriatthiam lohna ata min chhan thei se chuan Mapuia leh a nu hi ka pe taw pang maw le. Ni lo, he dawt hi ka kal tlangpui reng thei lo ang.. bawm hi Aizawl lamah ka keng phei tur  ani.

.

Mapuia te chuan Sub branch din lam hna chu an thawk tan a, a buaiin a hma zawng aiin a hah a ni. Shilliong lam a a awm aiin Aizawl lama a awm hian a buaiin min ngaihsak lo zawk niin ka hria. Nileng a min rawn biak miah loh avang chuan ka thinur ru hle a, kha bawm ka pek tur lam pawh kha ka ngaihtuah hman meuh lo.

“U kha.. I birthday present advance in nimai.. naktukah hiking in kan kal daih dawn si.. kan chhuak hma dawn a..” tiin ka nau in thil tuam min pe a, nuih hmel pu lem lo chuan ka phih thla lawp

“Thankz..”

“I van lawm loh hmel ve..”

“Ka lawm alawm Bawiha..” ka ti hmuk

“I thi a hul dawn aniang.. I senior tawh sia.. U Mapuia nen hian inneih vat vat ru..”

Chhan pawh ka chhang peih lo, naktuk ka piancham a ni tih ka lo theihnghilh daih a.. mahse ka hriatchhuah rual rual khan ka thinrim a zual.  Thi hul maw.. kum 27 ah thi a hul ngai emaw ni le.. mahse naktuk ah 28 ka tling anga, pasal neih chu ka hun ve tawh reng, a hun mah mah tawh zawk.. mahse ka bialpa hiii!! Ka nau lah chuan min hmanpui pawh tum loin a kal daih dawn si.

.

Ka phone ri in min ti harh..

“Hello..”

“Ka duat Happy Birthday..”

“E..” tiin ka dah hmak. A rawn call leh..

“Engeee???” ka ti tuar

“Kawngka min lo hawn rawh..” ka thawh lai pawh ka hre lo, ka va hawng.. a hmel ka hmu chiah chu ka thinrim tih ka hre chhuak

“Enge I rawn tih dawn??”

“Ka hmangaih ber birthday leh thi enge maw te te kan lawm dawn..” tiin sofa ah chuan min thut phei pui a

“Kha le ei tur ho.. Chuan hei I cake ngainat ber Caramel Cake”

“Zanlai dar 12 a cake ei te chu..” ka ti a

“I birthday nih hii Duat..”

“I upat tawh tawh nen I inla naupangchhe thar leh emaw ni..”

“Ngatinge Duat I period a mi??” tiin min rawn kuah

“AIH”

“Kha hei hi en la..” tiin bawm te pakhat chu min pe a, ka hawng chu ka ka hauu!

“Platinum maw.. a lem a mi?? ka ti hram

“Inhualna zungbun ah a lem ka pek duh che I ring  ami??”

“Kan inhual maw..”

“Aww.. duat ka hna kal lai hi han zo fel I la kan innei dawn alawm..”tiin ka chalah a fawp zeuh a. Chu veleh kha bawm ka pa thuruk awmna kha ka hrechhuak, ti khawp hian ka kal thui tawh a.. vanneihna in min hmuak mek a, ka kaltir thei lo a ni.

.

Kan inkar chu ka duh ang ngeiin a tha chho zel a, vawi tam tak Mapuia chuan an in a kalah min sawm fova mahse a nu hmuh ka hreh em avang chuan eng eng amaw chhuanlam siamin ka hnial zel thung a. He thil tih hi nuam ka ti bik lo mahse a nu ka hmuh khan ka inthiam loh mai bakah ka pa ka hrechhuak a ni..

“Naktuk kan in lamah rawn phei la..”

“Mapui.. kan innei vat dawn tho a, bakah ka hna ah ka buai nen chhungte inhmuhpui vak lam chu ti tawh rih lo ang..” ka ti a

“ka nu I ngainat thu I sawi sia..”

“Ka ngaina alawm..” tiiin ka chhang a

“Anih ka bula I awm ang hun tlem hi a tan ka lo lei sak ang, a khua a har ve lutuk a sin..” a tih chuan chhan dan pawh ka hre lo

“Mapui..” min chhang miah lo.. “Naktukah ka va kal ang..”

“Tak tak aw..” ti chuan min kuah a, min fawp zeuh a.

.

Mapuia te in ka va thlen chuan a nau chiah alo awm a

“Nute I ni a awm nage??”

“Huanah khuan a kal zawk a.. a lo chho vat ang lo nghak rawh..” a ti a

“Aih ngai lo, hei theitui leh thei ka lo keng a.. ka lo kal tih lo hrilh mai rawh aw..” tiin ka chhuah san ta a

Ka car ka start chuan Mapuia nu chu a huan kal rawn chho chu side glass atangin ka hmu a, mahse hmu lo der in ka kal san ta a.

.

Mapuia pa thih chamah chuan an in a chaw ei phei turin min sawm a mahse chhuanlam siamin ka thiante kan in a chaw an lo ei tur thu ka hrilh chuan a thinrim hle tih a hriat a..

“Ka pa thihcham pawh I hria a..aw a tawk e!!”

Huizz engkim hi sawi thei I la aw.. Diktak chuan Champhai lam a an chhungte an rawn kal nual tih ka hriat avangin ka hmu chak vak hlawm lo a ni, ka pa tan pawh khan a na ve tho si a ni lawm ni. Ka thiante chaw ei ah ka sawm chuk chuk a, Mapui a pa thi cham chuan kan in lamah ka thiante nen chaw kan ei khawm ta a. Zan a ka thiante ka thlah chu pawnah Mapuia a lo ding reng

”Ngatinge ka nu I hmuh duh tawh tlat loh a??” tiin Mapuia chuan mak tih hmel takin min en reng a

“Ka duh lo tih engtik laiin nge ka sawi a..??”

“Vawi tam tak hmuh leh a chak thu che min hrilh a, I hnenah ka sawi a,, mahse awmzia a awm lo” a beidawng hmel chuan min tina takzet.. minute sawm  dawn kan ngawih dun hnu chuan..

“Mapui, kha I nu nun ti chhe vek tu pa kha hmu leh la engtin nge I tih ang??” ka ti sep a

“Ka that ang!!” ka thinlung hi chem hriam takin a vih ang mai a ni

“A thi tawh..” ka ti a, ka chil ka lem ri kalh a

“Thusawi lai thlak tum suh..” a rawn ti tuar a

“I duh chuan a fanu hi I that thei ang..”

“Maw..” ka dar leh lam leh lamah a rawn chelh a.. ka mitah tak chuan min en reng a..

“Mapui.. I nun hreawm a dahtu I nu hmangaih hmasa ber kha ka pa a ni..”

“Dawt..!!!! a ni lo ti raw..” tiin min thing nawk nawk a, ka nau lo chhuak chuan min rawn pawt sawn vak..

“Duhtawk rawh..” tiin ka nau chu a rawn au tuar

“Mam lut ang..” tiin kan lut dun ta a

.

Kha mi ni atang khan Mapuia call leh text engmah ka dawng loa, kei chuan biak tumna leh ngamna ka neih loh avangin biak ka tum hran loa, mahse ka ngai hle tih chu zep rual a ni lo. Ka nau chu engkim a bul atangin ka hrilh a, tih ngaihna a hre bik lo mahse Mapuia ngaihdan chu a diklo tih hrilh tur erawh chuan min fuih a, kei hian a hmel hi ka hmu ngam ngang lo ani.

.

HDFC Standard Life Insuarance sub branch thar hawnna a kal tur in ka thawhpui te nen chuan kan chhuak phei a, Floria Glamour ah zanriah ei turin kan inzui chho a.. Mapuia ka hmuh chuan ka na zawk thei, ka awmdan hloh loh erawh ka tum tang tang thung. Zanriah ei hma chuan inhmelhriattirna kan nei tlang hlawm a, Internship ti tur pakhat nula la naupang deuh nen chuan ka hmehbel nge ni an in kawmbik riau a hriatna ka nei. Chaw ei kham chuan an kal hrang lai chu chiang takin ka va hmu a.. ka rilru han nat dan chu ka khur vek thei, ka nawm sam loh thu ka sawi zawh rual rual chuan ka kal nghal a, step a ka chhuk chu ka ban a min pawt lettu an awm..

“Thlah rawh.. I hmer na ania..”

“Ka ngai lutuk che..” a rawn ti tham tiak a

“Ka hmu alawm..” tiin a kut chu thlahin ka kalsan ta a.

Ka hawng kawng leh zankhua in ka tap char char.. Ka pa chu ka dem lek lek thin, a fanu hian amah vangin a hmangaih ber a chan si a. Hetiang ang reng a awm chu ka la tlu sawp thuai dawn a nih hi.

.

Ka nau te chawlh lai a ni bawk nen hmun hran a awm ka ngai  a ka hriat avangin kar hnih chhung chawlh ka dil a, pek ka ni ve mai a. Ka phei hma chuan tih tur nei tlat a ka inhriat avangin Mapuia te in lam ka pan a..

“Ehe Puii.. I va rawn kal khat em em ve..”

“Nia ka tihpalh nute..” ka ti a

“A pawi lo.. lo thu rawh, khakha enge ni??” tiin ka bawm ken chu a kawk a

“Mapuia’n engmah a hrilh lo che mi??” ka ti a

“In inthen thu chiah ka hria a..”

“Nute, Rammuanpuia fanu ka ni..” ka ti a

“Maw.. enge awmzia Bawihi..”

“Nute I hmangaih hmasa ber Rammuanpuia, I fapa in a huat em em  fanu kha ka ni..” tiin ka kuah a, ka tap ta ta vak vak a, ka tap ka insum theih takah chuan “Nute hei hi kawl rawh, Lunglei ah ka phei dawn a..  naktukah”

.

Zankhua in chhin khat pawh ka chhing lo, Mapuia kha a nu khan a hrilh ngei anga min rawn be miah lo a chhan chu khang khan a rilru a ti danglam lo tih na  ani. Hetiang bak bak a beidawnna hi a awm thei dawn em ni?? Engah nge Mapuia lakah hian ka beisei ka tih san tlat le, kan khua ngeiah ka phei ang a nun bul ka tan dawn a lawm..

.

Bungrua vel kan in dah fel hnu chuan carah ka lut dawn a, ka ding thut!! Chu Car ri chu ka hre tawh tlatin ka hria.. nge ka ngaihbel zawk, kei hi ka van che naupangchhia tak.. ka hnung atangin min rawn kuahtu an awm, ka phu zawk!!

“kal suh, khawiah mah min kalsan suh.. engtin nge nang hmu loin ka awm theih ang Duat..”.. min kuahna phelh pah chuan ka hawi let a

“Kal suh khawngaihtakin duat” a rawn ti leh a

“Kar hnih chiah alawm ka cham dawn”

“Maww” ka hnung tawlh dawrh a.. “Ka nu mai mai chuh!!”

“Van mawl dun tak, upat dun tawh tehreng nen..” ka nau in a lo tih chuan ka nui chhuak phut

“I nu in enge a sawi a??” ka ti a

“Lungleiah I awm dawn a ti a.. a chak lo ngawt ang..”

“I rawn kal dawn nge dawn lo..” ka nau in a tih chuan Mapuia hmel ka han en a, min kal tir a duh lo tih ka hrethiam nghal a

“Naktukah ka rawn phei pui mai ang..” Mapuia’n a ti a

“Palai tur te nen lo phei u la.. a thi a hul tepa..”

“Lalvensang kal mai mai rawh”

“Ka kal dawn reng” tih pah chuan ka bag a rawn paih a, min kal san ta a.

.

Inah lutin kan inkuah vawng vawng a, ani chuan ngaihdam min dilin a thil tih kha a dik loh zia a sawi a, kei chuan ka lawm takin ka lo pawm a. Bawm chhung a mi chu a nu nen an chhiar thu leh zan rei thleng an ti ti thu a sawi a.. keipawh min titi pui a duh thu a sawi chuan an in lam kan pan dun ta a,

“Enga tinge a hma khan min hrilh loh le, Mapuia hian hriat thiam loh a ngah lutuk a.. angihtuah lo emaw ka lo ti a, heti khawp hian a vei tih hria ila ka insawi fiah tur ania..” a ti siam siam a

“A hun diktak zawk alawm..”

“Mapuia pa nen kan inneih atang khan tharum hmang hian min nawr bet a ni ringawt a, ka tan khan zalenna kawng a zim em a ni. Mapuia hruai a tlanbo ka tum lahin a hlawhtling thei si lo a ni..”

“Ka pa thiam loh a nia lawm.. lo hruai tur che a nia..” ka ti a

“Aw.. min hruai se, engtin nge niang.. ka fapa nen in intawng dawn lo asin..”

“A ni viau ti raw..”

.

Lunglei a Mapuia nen kan phei hnu atang a ni hnihah palai ho pawh an rawn thlen phei thu Mapuia nu in min rawn hrilh a, ka hlim veng veng hle mai. Ka nutei leh ka pate ate nupa kan in lamah an rawn phei a, keini chu ka pi te in lamah len kan tum thung a. Kan chhuak tur chu ka nau chuan min chhaih leh hram..

“U awm ve mai mai la.. I senior tawh tho a, a zahthlak hleinem..”

“Awi hepa hi a nghal telh telh..”

“Haha..”

.

Ka nutei te chuan karleh lam a kal leh turin an tih avang chuan palai lam chu an la cham a.. Mapuia nen in kan nghak a

“U.. u.. u thu lawmawm leh lawmawm loh..” Ka nau chuan a rawn ti lut

“Enge nge..” ka lo ti vat

“1^st ah ka pass..”

“Maww.. Mam iti tha lutukk!! MA I chhuak tawh..” tiin ka phi cheng “Lawkk…!! Enge thil lawmawm loh chu??”

“U hrilhruk a ngai..”

“Sawi mai teh..”

“Khawi hrilhru ang che..” tiin ka beng bulah a rawn phun sep sep a.. Awi ka sa pup!

“Enga?? Lalvensang??”

“Enge aa??” Mapuia chuan a rawn ti vak

“Ka nutei, ka ni, ka pate ate,ka pi, ka put e call nghal vek rawh.. tunah, rawn kal turin hrilh vek rawh” ka ti tuar

“Enge duat??”

“A bialnu a rai..”tiin ka phun sep a

“Engaa??”

.

Ka chhungte chuan ro an han rel leh a.. ka thinrimna hi a so bulh bulh theiin ka hria, Mapuia chuan min hnen vak ngaihna a hre loa..

“U innei rual mai ila..”

“Ka duh lo.. keini chuan tih loh tur kan la ti ve lo..” ka lo ti hmuk!!

“Hotelah te kan innei rual thei tho alawm..”

“Zak rawh!! Hna pawh ila neih loh kha zak ngawih ngawih rawh” ka lo ti a, Mapuia chuan inbengdai turin min lo hrilh vat a

“Aww.. mate I nau te chawhma lamah inkutsuih se, nangni chawhnu lamah.. mo thian hranpa pawh ngai loin in ti thei alawm..” ka niin a rawn ti a

“In van aa tak.. hmeichhia ka nih hii Aizawlah lawm kan inneih dawn, ka nau te Lungleiah” ka tih chuan an ngaihtuah chhuak thut a ni ang, an nui ta dar dar a..

.

Ka nite tha tih dan berin ka nau te chu an innei hmasa phawt a, an puklawk avangin inneih lam kan hmanhmawh pui ta deuh a ni a.. ka nau lakah chuan ka lungawi thei mai lo, ka beisei loh lutuk a an awm vangte an ni deuh ber mai. Ka nau te inneih vel vang chuan ka chawl rei deuh hlek a, aizawl a ka phei chuan Mapuia nu chuan an in lama awm phei turin min tih tlat avangin ka in suan phei ta rih a, ka nau te chuan  kan bungraw ho chu rawn la bawk a, thla leh lama Mapuia nen innei turin thu kan ti thlu bawk a.

.

“Duat naktuk zanah chuan ka bulah I mu tawh awm sia..”

“Ka chak tawh.. Lalvensanga phei hi chu ti hian awm lo se..” ka tih lai chuan

“A ti leh tan ta.. min thlahlel tih chu ka hria alawm.. mahse ti khan inau ti tawh suh..” tiin min piai zeuh a

“Haw tawh rawh.. in lamah in buai ang..”

“Umm.. ka kal dawn..” tiin min rawn fawp zeuh a.

.

Biakin a mipui ho an ding thup lai chuan ka nau in min kai lut a.. ka tha chu a khur nasa mai.. tiaang hian a ni maw a lo zam theih.. Inneih hun serh a zawh a kan chhuak lam chu chiang takin Mapuia nu ka zuk hmu a, a mit a mittui tla kha.. ni e, a suangtuahna puitlin lo a awm ta kha a fapa leh a hmangaih hmasaber fanu in an ti thei ta si a. Nu, pa in fanu hi min lo thlir em, kei chuan ka hmangaih tak pasal ah ka nei ta a sin..