MEAN WORLD

College library atanga ka chhuah pah chuan ka Novel hawh chu a tir lam en pah in Corridor ah chuan ka kal phei zel a, tun hi College library atang a lehkhabu ka vawikhat hawhna a ni. Pachhunga University College ah English Subject la in ka kum khatna ka tan ve chiah a, kar thum vel chu kan kal tling ve der tawh a, lehkhabu chhiar nuam ka ti in English Novel lamah ngat phei hi chu ka hawi zau ve na lam tak a ni. Lut tan tir choh ka nih avangin thian ka nei lo a, tin Aizawl mi ka nih loh na piah lamah  heng incheina lam a sang tak tak te hi kawm min ti chak lem lo thin a ni.

.

 Chutia ka lehkhabu ken lai bih pah a ka kal lai tak chuan tu emaw hi ka su dawt mai.. ka tawlh  hnung leh deuh a, a hmel en tur chuan chhoh en mai pawh ni lo.. dah ha a ngai. Kei ka san zawng pawh chhuanpui tham loh, zahpui lam kawk mah fit nga boruak lek hip pha tan chuan han sut deuh chawrh a, ka chal in sawhna pawh a awm a ni mai sia.

“Aaa.. Sorry”

“Fresher maw..” ka id awrh lai chu a la kang a.. bang ngeng a a thiante ni awm tak ding ho chu za takin an lo nui bawk a… “Miriam Vanmalsawmi Chhangte…  aha.. a va Calvary ve..”

Ka id chu ka phih thla lawp a, lungawi lohna mitmeng a melh kawr pah chuan ka kalsan ta a.

.

Khang tiang mihring nundan mawi hre lo lutuk ho kha engtinnge an chhungten an enkawl le.. engtin nge khati khan min tih theih zawk?? Mahse kha rawlthar sang tak kha ka hmuh hnu a ang riau a hriatna ka nei..

“Ehe.. class I va nei rei awm ve..??” room a ka luh chiah chuan ka roommate chuan a lo ti vat a

“Englo a nia U Cynthia.. chahbi hi a spare a awm lo  ami.. kawngkhar chung  a I dah khi ka ban pha lo a.. chuvang chuan a nia College ah ka chho leh a library ah ka kal a.. 11 khan class chu dismissed a ni daih tawh..”

“Min U tawh suh.. ka upat hmel ka duh lo.. chuan chahbi chu a dang a awm lo..” darthlalang a in en pah chuan min chhang a

“Anih chuan key a spare awm ka lo lei dawn nia..” tiin ka chhang a

“En teh Miriam.. hei hi Mizoram a nih hi, Mizoram ah I awm lohna a rei tawh pawh a ni thei, chuan English subject I la pawh a ni thei mahse he roomah hi chuan khangtiang ang English hman tih vel kha chu ti vak duh suh..” ti pah chuan min vin hrak a, ngeiawm reuh mang e.. khang te chu mi zawng zawng hman anih kha..

“Sorry.. Oh ka tihpalh..” ka ti lui kher a.

.

Ka inbual zo room a ka luh chuan ka roommate Cynthia chuan a dawnkan hawn theih mai a siam chu a lo hawng a, a poster tar chuan ka mit a la tlat..

“Kha pa kha U Cynthia..”ka va ti a

“Min U tawh suh.. rules tih vel chu ngaipawimawh suh ka tih che kha..”

“Anih leh.. ka tihpalh.. tunge kha pa kha..?? ka han zawt leh a

“Kan college a basketball team a player tha ber a nih khi.. senior most a nih hunah chuan kan college team captian a ni ngei ngei ang.. 3^rd semester a zir mek.. English a core..”

“English ve tho maw..” tiin ka zawt a

“Umm ngatinge min zawh??”

“Vawiinah ka su chawrh a, ngeiawm deuhin min ti a..” ka han ti a

“Hahaa…  chutiang chuan Lalruatthlua hian a lo ti che maw..” tiin a han nui uar uar a

“In van innel hmel em em..”

“Ka duh duh danin ka dah thei..” hmm…

.

Kum nga kal ta atang khan Cambodia ah ka pa mission hna vangin kan chhungkua in kan awm a, u mipa pakhat ka nei a, ani erawh kum thum kan bul a awm hnu ah a United Theological College, Bangalore ah a zirna a chhunzawm a ni. Kei erawh ka pate a PUC a English Professor han chelh mek  chuan ka nu te a rawn angin leh ka zirna man zawng zawng leh Aizawl ka awmchhung a ka mamawhna atan a in sen a in huam angin kum nga hnu a a vawikhatna atan Mizoram ka rawn chuang chhuak ve leh a ni. Missionary chhungkua atang a seilian mah ni ila ka pa te hnung zui lam chu ka tum lo bur a, ka nunah hian enge maw tak nih ka duh a ni.

.

“Khawnge I kal dawn tun ang zing zing ah..??” Cynthia chuan men pawh meng tha thei loin  arawn ti a

“Ka patea bulah.. lehkha min zirpui dawn a..” tiin ka lo chhang a

“Prof. Lawmkima maw..?”

“Aw.. ni e.. i duh chuan lo kal ve la..”

“Hehe.. Saturday chu mut rei zing a alawm.. bye..” 

.

Ka patea, phone a be pah chuan motor channa tur min hrilh lam chu ka pan zel a.. ka kal mek lai chuan ka bulah bike pakhat hi a rawn ding vun.. a khalhtu pa chuan a helmet chu a han la thla a.. he pa bawk chu!!

“Khawnge I kal dawn a..” tiin min zawt a

“Ka pate a te inah..”

“ Tunge I patea chu..”

“I hre lo ang..”

“Ka hre mai thei a sin.. I roommate in engmah a hrilh lo che mi??”

“Enge min hrilh tur awm..??”tiin mak ti takin ka lo zawt a

“I phone number ka dil a.. I phone, I pate a te in a I theihnghilh thu leh vawiin a I lam tur thu min hrilh a, ka lo hruai ang ka tih kha..”

“Huh…” za lo tak chuan ka nui a.. chu mihring mai mai chu!!

“Ka phone chu heii.. khawi ah mah ka theihngilh lo..” tiin ka han hmuh a

“Anih leh i pate ate inah I kal dawn tho sia..”

“Aw.. a hre lawk lo.. a risk fuh nih kha..”

“Van thinchhe reuh e.. khawi ka lo hruai hrim hrim ang che..”

Vawikhat mah mipa, mi hrang hian bike ah min la phur ngai lo.. engtiang chiah in nge a awm pawh ka hrethiam lo. Ka tet te a tang a ka enkawlna dawn chu ka kum rualpui dangte lakah a dang em em a.. ka nun a ka thil tawn leh ka hmuh apiang bang a fanghmir kal lai pawh nise Pathian thu nen a tehkhin a ni thin. Ka vanneih zia min hrilh chang hian heng nula, tlangval Pathian hnaih lo tak tak te hi hlim tak angin an lang ve tho si a.. tu hi nge vannei diktak chu. A chang chuan ka pa thusawi atang pawh a ka rinna ka chian tir theih lohna chuan min tibuai a ka beidawng a, ka nun hi ka hne thei hle a ni.

“Heii.. enge I ngaihtuah..” Chu pa tawng chuan min ti phu zawk a, zei lo takin a bike ah chuan ka lawn kai ta a.

.

Ka tleirawl pui leh rawlthar tam tak College vel a zalen tak a an awm ka hmuh hian ka nun nen a inan lohna min chian tir telh telh a, anmahni ang nih ve chu ka chak a ni. Ni e, ka sang lo a pian chhuan tlak ka nei lo.. mahse ka hmelthat zia ha hip a sawi tu chu tam tak ka tawng ve tawh a ni.  Ka hmai bial lampang, mit meng lian bial kalh, ka hnar ngul te tak a invuah bet ve charh leh ka hmui a chhah lam aia pan lam hnai zawk te chu a invuah dan tur dik tak a invuah an ni in ka hria. Ka sam ka kawng thleng vel a hmawr lam in roll chuan min ti nu leh zual a ni.. mahse, ka pian tirh a ta ka mit ka la dum ve ngai lo a, ka hmui pawh ka hnawih sen ngai hek lo.. chung ang tih chu ka rilru ah a awm ngai loa mahse he tlangval sang tak min zar buai reng tu hian a hma aia ka lan nalh min ti chak leh zual a ni.

.

“Call chhang rawh Miriam..” tih message a rawn thleng a

“Ka room mate a awm ve alawm..” ti in ka va reply leh a

“Enge pawi.. ka duh che tih a hria a lawm..”

“Ka duh ve hleinem che..” heng ka thil tih mek hi nula in tlangval a duh ruk tak lak a sihhnip anga a lan loh nan a a invenna anih ngai chuan chung lem chan chu ka ti mek a ni.

“Min duh vangin ka be lo che.. ka duh che lawm..”

“Cynthia be rawh.. a duh duh danina tih theih che kha..” Awii.. he thu hi va thawn hmanhmawh lo tur ka ni asin..

“Enga?? I chiang chiah maw..??”

“Aih.. ka tihpalh midang chungchang khatia sawi tur kha ka ni lo..”

“Engah mah ka tur lui lo che.. “

Reply ngaihna ka hriat tawh loh vang chuan ka phone chu ka dah ta tawp a. Thla hnih chhung chu ti hian min be tawh mahse ka ngaihtuah a, ngaihzawng ka nei ve anih ngai chuan mi zahawm tak leh mi puitling tak a ni tur a ni. Mi rawn be tu ho chu thiam takin ka lo hnial mai teh mahse he tlangval duat sual hi chu hnawl a har, keimah ah hian engtin mawni tak hna a thawk.

.

.

Ni thum min rawn biak tawh loh hnu chuan keipawn ka va be duh bik lo a.. diktak chuan ani chu ka ngai veng veng a ni. Tlai a Cynthia rawn haw chu a hlim hmel hle mai..

“I hria em Hlutea’n vawiin ah min treat a..” min deng deuh zawk

“A van nuam awm ve..”

“Nia.. ngatinge I duh loa Hlutea hi.. mahse keichuan flirt pui atan bak ka duh si loa..” tiin a nui uar uar a

Ka rilru tak chuan ani chuan flirt pui atan pawh a duh lo che.. tiin ka lo ngaihtuah

“Kan inmil lo..” tiin ka chhang a

“Nia.. nang chu missionary fanu I nia ti raw.. mahse lungngai suh kan college ah hian cute larin I lar tawh a nia.. I te reuh sia I hmel a tha veng reuh a..” a rawn ti ham ham a

A rawn sawi dan kher kher chu a lawmawm viau loh!!

“Hlutea chuan Miriamin min duh loa.. a tia..”

Chhan pawh ka chhang peih lo, room atanga chhuakin Champhai khaw pakhat ka hriat thar ve deuh room ah chuan ka leng ta daih a. Champhai hi ka nu leh ka pa te khua a ni a, hriat nei vak tawh lo amhila Champhai khaw mi an nih tawh hi chuan ka nel ve tawp mai zel a.. Angaihi pawh hi ka kawm ngeih phian ani. Chaw ei dawn thleng a bulah ka awm a, chaw ei turin dining hall lam kan chhuk hnu chuan kan inthen ta a.

.

Zanah chuan ka rilru ah Hlutea hlir a awm.. lehkha zir lam pawh a lang hlawl lo, midang ang a hmeichhe pangngai ni I la chuan ani ka duhna hi ka ti lang thei mai tur, mahse keichu midang en dan atang pawh a fanu fel tak ni thin hian college a mipa tunlai berte zing a mi hi ka ngaizawng thei lo ang. Chutiang ang zawng a ka ngaihtuah nasat poh leh amah han chan mai chu ka hlau bawk si.. ka ta anih hma hauh in chan ka hreh chu a ni sia.. tawngtaina ah thlen leh phawt teh ang.

.

Kar khat a liam hnu chuan Angaihi nen kan inkawm deuh chawt a, kan subject lak a in an loh avangin college lamah erawh kan inkawm vak thei lo thung, kan kal rual thin tih mai lo chu. Vawikhat chu Angaihi insiam lai ka nghak a makeup a han hman vel dan chu ka thlir reng a..

“Miriam.. ka lo hnawih ve chhin ang che chu..” a rawn ti a

“Aih ngai lo.. ka inhmeh ve lo ang..”

“Hmeh ang lo kal rawh..”

Ka rilru a ka chak na a rei tawh avangin hnial rei lo chuan ka va thu ta a.. Ka mit chu nasa vak loin a han dum a, biang tih taihna chu a hnawih a.. lipstick sen lar tak chu min han hnawih bawk a.. mascara te hmangin a thiam ang ang in min chei a..

“Han in en teh le..”

Lalpa leh!!! Keimah ka ang lo zawk. Tiang hian maw makeup ka hmanin ka landan ni a.. Ka inhmeh zia chu Angaihi chuan a sawi mawlh mawlh a.. keipawn inhmeh ka in ti hle a ni.

.

College kan thlen chuan mi chuan min en duh riau a hriatna ka nei a, nge ka ngaihbel zawk.. kan class a ka han luh chuan ka hmelhriat sa ho chuan ka landan a dan zia leh ka inhmeh zia min hrilh chuan ka hlim veng veng, inrintawkna nasa tak min pe a ni. Class awl ka neih avangin Library lam panin ka kal a.. ka hma ah tak fit ruk a sang tlangval chu a rawn ding leh vauh mai..

“Kawng min kian rawh..” tiin kal ka tum a

“Inbe lawk ang..”

“Tikhan sawi rawh..”

“Hmundang ah..” tiin thupek awki deuh chuan min han chhang a

“Hun ka nei tlem lutuk..”

College student, min pel kal pel ho lah chuan min chhaih pah kher zel chu ka nin em avang chuan Hlutea chu ka zui ta a..

.

“Ngatinge khatiang khan I hmai kha I hnawih a..??” a rawn ti a

“I sawi tum chu sawi rawh..” vin deuh ti tih chuan ka han ti a

“Ka sawi mek..”

“Heng ka hmel vang hian..”

“Aw.. mipa tam takin I hmelthat zia an sawi luai luai saw ka ngaithla peih lo.. a hma ang khan awm rawh”

“Huh.. ngatinge min tihbuai reng a..ka kal dawn..” tih pah chuan kal ka tum a

“Miriam ka serious tih hi engtinnge ka sawi fiah ang..”

Ka ding deuh chawt..

“Hetiang a thla hnih chuang min ning em em tu zui chawt hi ka ti ngai lo..” a rawn ti leh a

“Anih chuan min zui tawh suh…” chu thu ka sawi lai chuan ka na zawk thei. Dik tak chuan huaisenna ka nei lo a ni, heng ang thil ti tur hian huaisenna ka nei lo.. ka dinhmun in a zir lo bawk nen.

.

Kha mi ni atang khan ani chuan min hlat a tum a ni tih hriat theih khawpin a awm a, a thiante nen ka hmuh a hlim hmel pu thin pawh khan a pu tawh ngai lo. Kei pawn ka khawvel tharah chuan hmelhriat tam tak ka tawng chho a, thian lah ka ngah phah hle bawk a ni. Chu mi zingah chuan Student Union member zing a mi pakhat  Freddie-a a ni a, min rawn biak danah pawh a puitling in a zahawm em em a ka mize milpui a min kawm a thiam em em a keipawn ka ngaina in Hlutea ka ngaihtuahna atang a ka paih theih nan ka be chho ve leh ta a.

.

.

Vawikhat chu U Freddie-a chuan S.U hoin chaw ei khawm an buatsaih thu leh eirawng lo bawk pui turin min sawm a, ka han hnial dawn takngial a sual a ni lem lo bawk a tiin ka kal ve ta a. Hmeichhe pathum kan awm a, kan senior te an ni hlawm vek a.. eirawng kan bawl zawh chuan hunserh kan hmang ang chu ka tih laiin zu um an phawrh ta sarh sarh hlawm mai.. an in ta hlawm a .. kan zing a hmeichhe pahnih te lah chu an bang bik lo an in ve ta hlawm a, keichu in ve tur a min tih chuan ka lo hnial a mahse beer chu min han pe a.. min tur sek hlawm avang chuan ka in ve ta ringawt a, tam pawh ka in lo mahse ka lu a hai lutuk tlat chu chu remchang ah la in U Freddie-a chu ka bulah rawn thu in min rawh kuah a min chul vel ta thuak thuak a..room lama min hruai phei a tum lai chuan  ka hlau takzet, ka zung dawn tiin ka tho a pawnah ka chhuak ta a.. keimah a haw mai ka tum a, mahse a hla si bakah engtinnge ti hian hostelah ka haw thei ang?? Ka chhungte inah ngat phei chuan.. chu lo reng ah taxi pawh la dawn I la ka purse ka keng si lo, kawng thim lai deuh ah chuan ka thu a ka tap ta ringawt.. bike head light in min rawn chhun a.. a rawn hnai tial tial

“Miriam..” chu aw chu Hlutea aw a ni.. ka ding a bike atang a a chhuk rawn ding chu kuahin ka tap ta tawp.

“Heng thil hi a thleng dawn tih ka hria alawm..” tiin min kuah a

“Haw vat ang..”

“A ngai lo.. tih tur ka nei..” tiin chaw ei khawmna kan neihna tur in ah chuan min luh pui a

“Tikhan lo awm rawh”

A va kal hnai a, U Freddie-a chu a va rek nawk nawk, midang ho chuan thelh an tum mahse rui vek an nih avangin an thelh thei lo a ni ber e..

“Zawnga tenawm pa.. hmaikawr vuah hi sim rawh!!”

A khawih nasat tawh em avang chuan keiman ka va dang a, a kalsan ta a.. kawngka kan chhuah dawn chuan hmeichhe pahnih zing a pakhat chuan..

“Thingtlang lam tel lo ang u ka tih kha, mawl vang a in la fel”

Hlutea chu a ding a let leh a tum a mahse kei chuan ka lo chelh a pawnah chuan kan chhuak ta a.

.

“Zanin chu kan inah riak mai rawh.. chuan vawi khatmah mi thilpek che in ringawt tawh suh I beer in tur ah khan zu an pawlh anih kha..” a ti a

“Engtinnge he tah ka awm tih I hriat??”

“Hmeichhe pakhat kha ka cousin thiannu ania.. in thlalak a rawn thawn vak vak alawm..”

“Eng thlalak??” hlauthawng takin ka han ti a

“A tam mai.. in chawhmeh siam lai te, chuan Freddiea’n a kuahna che pakhat a awm bawk..”

“Maw.. ngatinge chutia a tih..??”

“In zing a pakhat nen khan an in date a nuam a tih ve nihkha.. hlau suh ka awm hi.. lut ang”

“A nuam lo ee.. hotel ah ka riak mai ang..” ka han ti a

“A ngai lo.. ka roomah I mu ang a, keichu mikhual roomah ka mu mai ang”

An inah chuan kan lut a, mi hausa an ni tih hai rual a ni lo.. a chhungte chuan TV an lo en a..

“Nu hei ka thiannu Miriami a nih hi..” a han ti a, ka rim an hriat ka hlauh em avang chuan ka pawh ngam vak lo a kan in chibai a..

“Mama chaw ei kha han siam la.. I tha em Miriam??”

“Umm.. ka tha alawm..” ka aw atang chuan ka tah a chhuak tih a hrethiam ngei ang

“Mama’n min hrilh vek a alawm.. landan hi a ni lo em asin, nang chuan sualna I hre ngai loa I tan chuan rin sual chu a awl lutuk ang.. nakin ah I hrethiam  chho mai ang..”

Chhan na chang pawh ka hre lo.. hetiang hi ka chung ah a thlen ka ring ngai lo. Lalpa min ngaidam rawh thil sual lian tak ka ti a ni. Hlutea nen chaw kan ei a, ka zak si, rilru na bawk si chu ei pawh ka ei tha thei lo, ani chuan hreawm ka tih hlau in fiamthu te a thawh a, ka tan hetiang a ti hi a mak ka ti. Zanah chuan an mikhual room a ka mut theih thu ka sawi chuan inchung ber a room pakhat te  awm anih avangin ka hlauh a hlauh thu a sawi chuan ka lo hnial ta bik lo a.

.

Ka khum  mutna turah min hruai a tui min chhawp sak thlap bawk a, min kalsan ta a. Ka muhil thei lo zanlai  dar 12 a pelh hnu pawn ka harh telh telh.. whatsapp ah ka lut a group message tam tak a lo awm a, en lem lo chuan Hlutea profile vel ka en a a lo la online ka hmuh chuan a bula kal tur chuan ka chho ta a. Ka rin ang ngeiin meizial zu in pawn verandah ah alo la awm a.. min hmuh velah chuan a meizial chu a ti hlum nghal a..

“Tinge a tih hlum kher??” ka han ti a

“Hreawm I ti nga si.. ngatinge group a thil vel kha I hmu a mi??”

“Engmaw..”tiin ka phone en ka tum a.. min lo dang vat a

“En suh.. hre lo law law rawh.. chuan I bulah ka awm ang a tuman an tina lo ang che..”

“Enge.. ka hriat ve angai alawm..” tiin ka en ta a, U Freddiea’n min kuah lai a meng pawh meng tha thei lo a ka awm lai te chu English department  group ah chuan an lo post a. Ka hriat ngai miah lo ten group ah min lo add a ka chungchang nasa tak a ansawina chu ka hmuh nghei theih nan an lo ti lang bawk a.. ka hrilhhai lutuk chu Hlutea ka phone ka pe tawp.. ani chuan ka whatsapp account chu deactivate rih tur a min rawn chuan ka lu a bu nghauh a, ani chuan min rawn kuah a..

“Hlau suh.. tuman an tina dawn lo che..”

.

A tukah chuan hostel thleng Hlutea’n min thlah a, class tur a min rawn sawm leh tur thu min hrilh a.. Hostel ka luh chuan ka hosteller pui te chuan min en hrek hrek a, monitor chuan vin fahranin a room a lut turin min ti a..

“I lar tawh vet vet hle mai..”

“Maw..”

“Nizan khan I rui hle  ani awm a.. tu phalna in nge I riah chhuah a..”

“Ka tihpalh U Rinpui.. a thleng leh tawh ngai lo ang..”

“First year ini a.. I vawikhat na a ni bawk a, warden ka hriattir lo mai ang.. chuan fimkhur tawh rawh Freddie-a kha hmeichhe rawp lutuk a nih kha.. “

“Um.. ka hria  alawm..” ka tap leh dawn ta mai.. ka chhuak tur chu U Rinpuii chu a rawn tawng leh a

“Miriam.. min hrilh duh thil I nei em.. mahse thudik chiah..”

“Aw..”

U Rinpuii engkim ka hrilh hnu chuan ka dam huai mai.. ani chuan min khawngaih hmel hle a, a theih ang ang a an ni lak a inthiar fihlim turin min fuih bawk a. Class kal tur a ka chhuah chuan kan hostel kawtah Hlutea bike a lo awm reng tawh aa..

“Class I nei na nge..??” ka han ti a

“Ka lo hruai ang che ka tih kha..chuang vat rawh..”

“Aw le..”

.

College kan luh chuan min en hrek hrek tawk lah an bo lo, ka zak tak zet.. Missionary ah pawh hunpum tak meuh meuh petu nupa kar a piang ka ni a, ka nu leh pa te hming an hriat ataang ringawt pawh a fel tur a ka ngaih ka ni, thlalak an hmuh atang khan eng eng emaw titi a kal zel ang a tuman ka awmdan diktak an hre si lo. Hlutea’n min lo hruai a hostelah ka haw lo tih hria an awm chho leh anga engtiang takin nge min sawi dawn ni..

 .

Class ah ka lut a, ka ngaihbel nge maw ni.. min sawi sep sep hlawm in ka hria, mahse tumah be lem lo chuan class inzirtirna lam chu ka ngaihsak lui tlat thung a. Class a zawh chuan ka chhuak a, kawngka bulah ka roommate Cynthia leh nizan lama chaw ei khawmna lam a lo tel ve hmeichhe pakhat chu an lo ding a

“Heyy Roomie.. khawnge nizanah I riah a??” ring leng lawng tak chuan Cynthia chaun a rawn ti a, sawi tur ber pawh hre lo chuan ka en reng ringawt, kan class a mi te ho chu an rawn hawi thup bawk a.. chu tih lai tak chuan Hlutea a rawn thleng a, min rawn kai sawn daih.. ka tah chhuak lutuk chu ka insum nasa ngei mai mahse ka in dang thei thlawt lo. Canteen sir a hmun biru lai deuhkan thlen chuan ka tap ta tawp.. ngawi rengin Hlutea chu a ding a..

“He lai hmun ka lo kal hi ka ti dik lo a ni..” ka ti thiam tiak a

“Tiang hian awm suh.. hetia I awm hi a lawm sawng ho duh ber chu..” a rawn ti a

“Ka tuar ve thei lo..”

“I thei a I tuar mek a lawm..chuan I bulah ka awm tlat ang…”

“Sawng ho sawn engmah an hre lo..”

“Ni e, an hriat pawh a ngai lo chuvang chuan in ti pa chang rawh..”

“Ka lawm e aw..”

.

Kar thum a ral dawn leh mai chuan titi leng vel pawh a zia tawh a mahse keimah ah hian inkiltawihna a awm tlat thung, College lamah chuan Hlutea ka tan a awm reng avangin ka thla a muang a mahse hostel lamah ve thung hian senior ho lakah ka mark a chhiat laklawh em avangin anuam tak tak thei lo, ka roommate lah chu kan pahnih a kan awmdun chuan Hlutea nen kan chungchang ngawt min sawipui a, min dawp kual vel ni berin ka hria mahse kan monitor ber in min ring tih ka hriat chuan rilru a nuam ve deuh.

.

“Inrinni ah I patea bulah lehkha ka lo zir ve thei angem??” mak ti tak chuan Hlutea chu ka en ha a..” Enge kha ti vak a min en??” a rawn ti leh a

“I duh phawt chuan.. ka patea pawn I thiante rawn sawm rawh min tia mahse tuman an duh lo a nih hmel..  a tir phei chuan min kawm duh loh vangah ka ngai a..hehe”

“An kawm duh loh vang che a ni lo.. in chhungkaw background en in an zah nghal ringawt che a, kherhkhiap deuh turah an ngai nghal ringawt che a nih hi..”

“Haha,, I sawi thiam e..ngatinge missionary fanu ka nih vang a an tih ang ti thei thei lo a min ngaih tlat le..” ka ti bui bui a

“I ti ve chak a mi..??”

“A zawng zawng chuan ni lo e, mahse hlim tak a nuih uar uar te ka chak ve alawm.. hmeichhe thawveng tak anga lan te ka chak a”

“I thei reng alawm”

“Ka thei lo chu a nih tawh ber hi..”

“Ihmaw.. Miriam??”

“Umm..”

“Ka rilru put dan a la ngai reng..”

“Ihmaw.. mipa pakhat ka zui chhuah ringawt pawn ti khan ka mualpho a, ngaihzawng ni lo in unaupa ka mamawh zawkin ka hria..”…. ka thusawi hi keipawn ka hre chiang lo, diktak chuan ani hi ka duh a.. mahse a nundan zia en hian ka duh lo a ni. Pawnlam landan ka en avangin thil ka ti sual tawh a ngatinge ka la tan luih tlat le nge a tan a duhthusam ka tih hlawhtlin loh ka hlau zawk.

“Hehe.. hun ala ngai deuh ani maw.. he tia min hnial tlat na hian a lawm ka bialnu ni vat vat tur a aduh zual cheee..” tiin min piai vak  a

“Heii a na lawm.. I van aa tak..” ka ti vak a

“Ka nau ini tawh lawm.. I hmel hi a nautelem ve sia.. naute angin ka en ang che..” a la ti ham ham zui

.

Zirtawp tlaiah chuan ka patea hnenah a tuk ah thian ka hruai tur thu ka hrilh chuan a lo lawm phian a mahse han hmu chiah se mak a ti ve ngawt ang lehkha zir ngaihsak lo lutuk a ni ve sia. A tuk zingah chuan Hlutea’n a bike in min rawn hruai a ka pate-a te in lam chu kan pan ta a..

“Pate kan lo thleng..”

A lehkha chhiarna pindan atang a rawn chhuak in a tarmit phelh pah chuan a rawn hawi ka hau a

“E hee.. hei chu Street boya kha elaw..” a rawn ti mai chu, ka insum thei lo ka nui vak vak a.. Hlutea hmel ka en lahin a lo hrilh hai hmel em em lehnghal a, vanlal inringtawka zak hmel ka vawi khat hmuh na a ni. A hnu rei vak loah lehkha zir turin kan lut ta a..

“Sir, enge in zir ber thin.??” Hlutea chuan a han ti a

“I suangtuahna a zir..”

“Hlute.. tun a kan zirlai hi kan zir vak lo.. I ambition a zir a ni mai..” ka lo ti vat a

“Anih enge I zir a??” tiin zawhna min lo zawt vat a

“Thil tam tak..”

“Heh enge nih I tum a??”

“India Today news reader ni turin nge min duh DD News..haha”

“Chutiang chu I chak amaw..”

“Lutuk.. nang ve..??”

“Chetan Bhagat Jr”

“Haha.. I inhmeh lo lutuk.. English language novelist nih maw.. Hlute a ropui dangdai ngawt ang..”

“A chhan chu I ngaisang a, I mi ngaihsan nih ve ka duh alawm..” tiin min chhang leh a

Chu tih lai tak chuan ka patea a lo lut..

“Pate.. Hlutea nih tum chu maw English language novelist.. chuan Chetan Bhagat a ngaisang..” ka lo ti vat a

“Chung te chu in sawi dun ngai lo ami.. hei hian a chhiar nuam a ti fu sia” tiin min melh pahin a lo sawi a

“Aih..” kan ti rual a, kan inen a kan nui ringawt.

.

Kei hi ka upat lam fa ka ni a, ka patea fate chu putling hna nei thiau tawh an ni a.. tuman nupui, pasal an la nei em lo thung a. Ka patea hi ka nun a ka chak zawng leh ka suangtuahna ka hrilh ber a ni a, ani chu khawvel lama hawi zau tih takah min tuipuiin min fuih phur thiam em em a.. hei hian mahni inrintawkna nasa tak min siam a ni. Kan zirlai chu Hlutea pawn nuam a tih hmel hle mai.. dar kua a rik meuh chuan chaw ei turin min ko a, Hlutea chu a inthlahrung viau tak na in ka u te chuan nau enin an en a a tlangnel ve thuai pawh ka ring a ni.

.

“Nuam I ti em??” ka han ti a

“Ti lutuk tlat.. tiang hian ka hriatna hi a pun ka ring lo reng reng..”

“Lo kal ziah la nuam I ti ngawt ang..”

“Um.. e khawnge krismas I hman dawn??”

“Hetah nimai.. ka nu te chu ngai viau mahila a in tlawh ve zung zung theih si lo a..”

“Yesss..” a rawn ti vak

“Hei.. au suh.. nge kha tia I tih vak..”

“Hmeichhia krismas ka hmanpui vawikhatna tur ania..”

“Hmm.. kan hmang dun dawn ka ti mi”

“Umm.. I u ka nia.. ka veng dawn che lawm ka naute lem hi midangin an ru daih palh ang”

Chu tih lai tak chuan ka patea fanu a lo lut..

“Mate hei thingpui in ru..”

“A u chu.. min lo koh mai tur alawm..”

“A ho lutuk.. kha in zir tha em?? In titi reng maiin ka hria..”

“Min be buai zel a” ka lo ti vat, Hlutea chuan rum tawkin min lo melh a

.

“Miriam.. thil ka ngaihtuah a ka nui vak vak a nizan ah..??” Hlutea,n College a min hmuh velah chuan a lo ti a

“Engmaw..??”

“I u nen in inang em..? tiin min zawt leh..”

“Um inang lutuk.. ngatinge??”

“Hahaha…….”

“Enge a Hlute.. amak e”

“Mipa a ni sia.. I hmel ang a naute lem hmel deuh a neih chuan a hmel a pa awm lo ee..” a rawn ti chhuak a

“Engaa?? I van aa tak!! A inhmeh danin keimah ang deuh si in Siamtu in a siam alawm..” ka han ti a

“Nia.. I nu leh pa kaltlangin..haha”

“Lalruathlu..”

“Aw.. kal rawh class I neih a hun tawh..” tiin min nawr phei pawp pawp a.. he pa tak hi chu aw!!

.

Tun kum atan a class kal tawp ber ni ah chuan phur takin College lam ka pan a, kan class kawtah Hlutea chuan a tih dan thin ngai bawkin min lo nghak leh a, midang mit hmuh ah chuan inngaizawng ang mai kan ni mahse u ka mamawh tih ka hrilh ni atang khan inngaihzawn lam hi a sawi ri leh tawh ngai lo chu chuan mak tak maiin ka awm a ti nuam lo hle a ni.

“Banah min bazaar pui rawh aw..” alo ti nghal

“11 thleng bak kan kal dawn lo asin..”

“I hman hun hunah ka hman a ni mai..”

“Ok..”

.

Bazaar chu ka rin ai daihin a tawt mai.. Hlutea chuan a guitar string thlakna tur kan lei a, thil ei turin High Five lam kan pan ta a.. rei vak lo kan thut hnu chuan hmeichhe sang tak pahnih changkang hmel zet te hi an lo lut a

“Ehe.. Lalruathlu..” pakhat zawk chuan a rawn ti a

“Eee.. Spi ni reng a.. I rawh haw lai a mi..min rawn zawm ve ru” an ni chu an lo thu nghal a

“Krismas hmangin ka lo haw a.. hei hi ka thiannu Zuali a nih hi..”

“A ni maw.. hei hi ka nau Miriam-I a nih hi..” hmm.. ka nau min ti a nih chu!!

“I cousin maw.. in inah a rawn awm a mi..” a lo ti a

“Aih.. hostel ah a awm a..”

“Khawi school ah nge I luh a Miriam??” nelawm tak a min nuih pah chuan han zawt a

Huh.. school maw?? Mi mah in lak college kal nak a laiin

“College” tih ringawtin ka lo chhang a..

“Kan college ah a kal..” nuih za insum tawng in Hlutea chuan a lo ti a

“Aw.. ka tihpalh lutuk.. I hmel a naupang  lutuk a, high school kal lai emaw ka ti che alawm..” Nia ka te bawk a!

Thil kan ei chhung zawngin an titi a, hmeichhe pakhat awm ve nen chuan kan ngawi kur thung a, an in nel hmel fu lehnghal ka lo ning ngawih ngawih.. haw vat vat ka chak.. thil lah chu an ei muang sia, ka insum thei thlawt lo

“Hlute hostel atangin ka in la chhuak dawn sia.. a u in min lo hruai dawn a,bungrua  ka ngah sia ka hmanhmawh deuh..”ka han ti a

“I u te inah I awm dawn lo a mi Miriam..??” a van buai peih tak

“Aaa.. a pate-a te inah a awm ang..  in veng a in ang.. Prof.Lawma te.. zanah ka rawn kal ang hei an in a kal pah hian..” Hlutea chuan a rawn ti a, a va tul duah lo thin tak!!

“Hm.. Lalhlute I nau a ni chiah maw..” no tak a melh pah chuan Spi chuan  an ti a

“Aw a ni lawmm.. zawt la”

.

Zanah chuan ka in dah fel hnu chuan ka u te bulah TV ka en a, Hlutea chu ka nghak rilru reng a mahse dar 9 rik dawnah pawh a la rawn thleng lo. Vawiin a a nula hmuh te inah khan a leng tih ka hre nghal mai, kha nu kha ka ngaina lo takzet.. an titi dun lai ka ngaihtuah ringawt pawn ka awm a nuam thei lo, Dar 9 pelh hnu ah door bell a rawn ri a, ka va hawng a.. ka ngei em avang chuan ring leng lawng tak in

“Kan mu dawn chiah asin..” sawi tur hre loin min en reng

“Hlute lo kal rawh.. hei kan la meng dawn choh”  ka U te pahnih in an lotih chuan min ngei hmel takin thutna lam pin pan san ta a. Ka U te chuan rei pawh min thutpui loin an room lam v eve an pan dun ta a, keini  chuan inbiak pawh kan tum hran lo..

“Min nin chuan sawi mai ta che.. kha tia min tih zah kual a ngai ami??”  a rawn ti a

“Midang a hlimna I hmuh vang khan ka chungah lungawi lohna zawng suh..”

“Enge I sawi awmzia??”

“Ka sawi kher a ngai lo..”

“Spi maw..”

“Huh…” engvanga thinrim em em nge maw ka nih le.. a bialnu ka ni loa duh duh dan a awm thei a ni alawm..

“Ka tihpalh..” a rawn ti sep a

“Engvangin??”

“Nang aia ngaih pawimawh nei anga ka lo lang anih chuan ka tihpalh..” tiin a tho a, kawngkapui lam a pan ta a.

.

Eng vang a khatia awm thut nge maw a nih le.. ka ngaihtuahna a kawi lak lawh, keimah min nin vangah ka ngai leh tlat. Ani ka nun a a lo luh hi ka tan thatna a nei em ni tih ngaihtuahna hial ka nei, keimah leh keimah chu ka in haw zawk.. midang lak a engmah beisei ngam ngai lek lo hian ngatinge Hlutea hi famkim tur a ka duh tlat mai le. Zanlai a pelh thleng pawn ka muhil thei lo, vawiin a kan hmuh hmeichhe pakhat ka ngaihtuah tel leh ngat phei chuan hlauhthawnna leh thikna in ka khat.

.

“Tho rawh!... hei..”

Tunge maw ni chu le ka mut tui tehreng nen, ka mit chu ka nuai a theileh thei loin ka han meng a..

“Hlute.. enge I lo tih??” mak ti takin ka han ti a

“Inrinni anih hi.. lehkha zir ni..”

“Pate-a a awm lo tih I hre ve reng sia..” ner nang chuan ka ti a

“Kan kal dawn tho lo ami..” a hmel ka en chuan ka nuih a za thut.. a khawngthlak hmel kha!! “Enge??” a rawn ti leh

“Nizan khan I peng leh em Spi te inah??”

“Peng zuai.. helmet ka theihnghilh a..”

“Chuan lehkha kan zir dawn si lo a.. va leng leh mai la..” ngeiawm tak chuan ka han ti a

“I mak e Miriam.. kawm lo turin min duh a mi??”

“Ka thu a ni mi..??”

“Sawi tawh lo ang kha nu chung chang kha, I dik lo ziah.. chuan biak pawh ka tum hran lo” a rawn ti a

“Engvang..?”

“Timah..” tiin pangngai takin min lo nuih suk a.

.

Krismas hun duhawm tak kan thleng leh ta a, ka lunglen dan chu sawi hian a siak lo. Ka chhungten min lo biak chuan ka tap leh nge nge thin, ka patea nupui nu Mapuii mangang chuan  ka nu te bul a haw leh mai tur ten min ti a mahse a in thlahrunawm em avangin tawrh tlang chu ka tum ve tang tang ani. Hlutea chu Krismas pual a Charity Concert neih tur ah an band chu tel ve an tum a chung lam chu an zir ve nasa in kei nen pawn kan inhmuh khat phah hle a ni.

.

Ni 23 tlaiah Hlutea chu a rawn leng ve hlawl a, 24 a an zaina a kal ve turin min sawm tang tang.. thian ka neih loh avangin ka hnial nasa hle a mahse  a sawi chhen hnu chuan kal ka tum thu ka hrilh ta a. Chu mi ni chuan bike a lo ken loh avangin kawn thleng thlah tur a min tih chuan kan chhuak duh ta a,

“Hei.. Ruathlu..” kan hawi rual chiah Spi a lo ni a..  “I va rawn leng duh lo ve..” a ti zawm nghal zat

“Nia..” tih ringawtin a chhang a.. ka hrilh a lo hai zawk lutuk ringawt..

“Hmm..”

“Kan kal mai aw..” tiin ka darah min rawn kuah a min kal pui ta a

“Chhang tha ve ta che.. a polite loh thlak lutuk..” ka lo ti vat a

“Biak I phal loh kha!!”

Ka van dang chiang tak.. ngawi rengin kan kal dun zel a Taxi a lak hnu chuan in lam ka pan ta nghal a. Keimah vang a Spi a biak that loh vang chuan nuam lo ka tih hle rualin ka hlim veng veng, ani ang luck lutuk kei ve mai min ngaihpawimawhna a han ti lang te hi ka ngaihtuah chian chuan lawmawm tak a ni.

.

Ni 24 ni ah chuan chawhnu dar 1 velah MC lam ka pan a, tumah thian nei hek lo ka thlen chuan mi an lo zi hut hut tawh a. Hlutea’n min hrilh angin ka thlen tawh thu ka va hrilh a, minute sawm hnu vel chuan min rawnn zawng nghal a..

“Hemi zawh hian kan zai dawn a, hla pahnih chiah aniang.. chuan I bulah ka awm thei nghal ang..” a rawn ti a

“Aw le.. tha deuhin  aw..” tiin ka thlah ta a

An hla pakhatna tur an sak lai chuan en ve tumin ka dak nasa mai mahse ka tet em avangin ka hmu thei lo a ni ber a, Hlutea erawh a san fal bike m avangin a guitar perh chu ka va hmu thei zuai zuai a..

“Va dak nasa ve..” ka phu zawk, ka en vat a

“Ehee… David.. enge he tah I tih aa??”

“Kan chhungin Krismas kan lo hmang a..”

“Ipa kha khawnge an awm tak??”

“Tripura ah… enge he tah I tih ve a..?”

“Mi ka nghak a.. khi en ve rawh keichuan ka hmu pha lo a..” ka han tih chuan za takin a nui a. Hlutea te pawn an hla sak tur an sak zawh chuan rei vak lo hnu ah a rawn kal a..

“Ka rei em..??”

“Aih rei lo.. ih.. hei hi David a nih hi, ka pa thawhpui thin fapa ani Cambodia ah khan kum khat chu kan awm ho hman a, chuan David, hei hi ka thianpa Hlutea a nih hi..”

“Engtinnge in lo inhmuh theih teh nawlh a..” Hlutea chuan Davida chibai pah chuan a han ti a

“Nia.. hei ka bazaar a, a ang deuh khan ka hria a ka rawn kal hnaih a.. Miriam I hmel a tha reng tho tak na in I tha lehzual makeup I hmang ve deuh tawh a ni maw..” Davida chuan a han tia ka nui ringawt

“Ka ril a tam..” ka ti a

“Miriam ka kal hma in I number min lo pe la, tun a I hman hi ka neih loh hmel em mai” Davida chuan a han ti a, kei chuan ka lo pe a.. chumi hnu chuan thil ei turin High Five lam kan pan ta a

“Naktukah kan biakin lamah lo inkhawm t ache..” thi ei pah chuan Hlutea chuan a han ti a

“Ka patea te veng lam a ka inkhawm loh chuan a tih chi lo ang, tukin pawn pastor a rawn leng a..”

“Krista lam ah hi chuan hmelhriat hi I ngah maw le..” a han ti a

“Nang in khawvel lamah I ngah thung a..”

“Angel and demon..einchh!!” nui tut tut pah chuan a rawn ti

“Hmm.. I uar ee.. “

“Nih sunday ah lo inkhawm rawh aw..”

“Patea ka lo dil ang aw…”

“Chuan zanah ka lo kal dawn em??”

“Ngai lo.. ka inkhawm zawhah ka zaikhawm nghal ang..”

“Awle.. pawh ka inkhawm ang…”

.

Krismas ni kan han hmang ral leh a, mahni ram ni mah suh se Cambodia lam a ngaihawm hle a, tapbelh tih takah a rukin ka tap fep fep reng mai. Ruai theh ni chuan Hlutea’n an thian ho len ho na ah min sawm ve a, chhuah harh ka chak em avangin ka kal ve ta a. Hmun fal angreng deuh ah kan kal a inkawp te te in an awm a nuam an ti hlawm khawp mai, in tur an phawrh dawn chuan nuam lo tih hmel deuhin min en hrek hrek hlawk a, engah mah min ngai lo tur a ka hrilh chuan nui dar dar pahin anh han thli a, Hlutea erawh chuan a in ve hauh lo. Hlutea thianpa chuan “theitui mai mai Miriam..” tiin min rawn pe a, ka lo la ve mai.. chu veleh Hlutea’n min chhuhsak hmak..

“Aw thianpa.. theitui a nih kha..” a thianpa chuan a han ti a

“Nih chuan kha..” tiin min pe leh mai, ka lo nui ringawt

 

“Tinge I in ve thin sia I in ve duh loh??” ka han ti a

“Ka bulah missionary fanu a awm sia..”

“Hm.. keimah vangin.. Pathian vang te han ni zawk se..”

“Hehe.. a in zah loh thlak ve alawm tak tak ah.. ka in ngai lo ang ka bul a I awm chuan..”

“Tunah hian awm lo ta I la..” ka ti a

“In mai thei..” tiin a nui suk a.. “E naktuk I rawn inkhawm dawn kha aw..”

“Aw.. ni tak ka lo theihngilh tep alawm.. Davida kha kan veng lamah a rawn inkhawm dawn a ka lo chiau au ve deuh loh chuan..” ka han ti a

“Davida vang maw..” a lungawi vak lo tih chu a hriat mai

“Umm.. ka tihpalh Hlute.. “

“A pawi lo.. mahse ka chhungte ka lo hrilh vek tawh a..”

“Ngaihdam min lo dil sak dawn nia aw..”

“Midang beiseina siam a tih thlawn hi nuam I ti ngawt mai.. ka chau mut ka duh haw mai ang..” a rawn ti chuai raih a..

Ka hrilh hai dan chu.. tih theih dang a awm si lo, ka zui a a bike ah chuan ka lawn kai ta a. Kan tlan chhung zawgin a tawng eih lo, nuam lo ka ti ngawih ngawih.. ka kut hik vawt thler chuan tim takin a kawngah ka va kuah a, ka kut leh lam lehlam chu a dulah chuan ka kutsuih a, ani chuan a kut lehlam chuan a rawn hum vawng vawng a, ka harh chhuak thut ka kut chu ka la let rang hle mai! Ka zak lutuk chu ka in sik lo chauh!

.

Kan in bulah chuan bike chu a ti ding a kal nghal ka tum lai chuan min pawt let nawk, hnaih setah a rawn kun in a rawn thaw lum ham ham a, hetiang a hnaihah hian mipa ka awmpui ngai lo, ka lungphu chuan min nghawr dawt dawtin ka hria..  ka biangah chuan a chul a ka hmai a rawn si tial tial ka lo maimichhing tawp.. ka hmui ah chuan dim te in a fawp a, a uar telh telh.. ka harh chhuak thut, ka lo dingdihlip ve tawng tawng chu lo niin, ka tawlh sawn vat a, hawi let lo chuan in chhungah ka lut ta a. Roomah ka lut, ka a vekin ka hria.. ka dingdihlip tih kha a hria angem le.. chu ai mah chuan engangin nge min ngaih ang a bialnu pawh ni lo a fawp thei a.. message tone a rik velah ka phone ka en vat..

“Ka ngai che..”

Hmmph.. in kiss hian kan inngaizawng tih na maw ni le ka ti hial, chhan ngaihna vak ka hriat loh avang chuan ka reply lo ringawt, mahse a text ka dawng leh..

“Naktuk I lo inkhawm dawn ti raw..”

“Ka sawi fiah chian em kha..”

“I lo inkhawm dawn lo maw..”

“I rui ami..?”

“I hriat kha..”

“Ka hriat  piah lamah..”

“Engkim I hria ka chungchang chu..”

“A that chu..

“Lo inkhawm rawh aw..”

“A van mak tak..”

“Ka fiamthu nih kha..”

.

Ka rilru chu a nuam chiah lo ka lo intiam tawh bawk si, ka thawh chuan a morning wish pawh a awm lo a thawh hma theih tehreng nen… ka call char char, a chhang thei bawk si lo ka mangang chuan a nu ka call ringawt, “inkhawm ka tum lo a tia  a mu tlat..” ti a min hrilh chuan ka inthiam lo lutuk ringawt, ka tho lawk a ka chhungte hnenah veng danga ka inkhawm tur thu leh Davida lo hruai mai turin ka ti a taxi la in an in lam chu ka pan ta a. Ka va thlen chuan a mut thawmhnaw nen chaw a lo ei mek a midang chu an lo insiam mek hlawm a..

“Ehee.. Miriam”

“Ei vat vat la in siam rawh..”

“I lo inkhawm dawn ami…”

Chu tih lai tak chuan Hlutea nu a rawn chhuak

“Ruathlua, zahpuiawm lutuk, thiante nawr kal ngai khawp a inkhawm peih lo..”

Amah ka va en chuan a la nui vur vur zui

.

“I puan hi a te bik em??” a rawn ti heu

“Engaa??”

“Ih.. I te sia.. I bih tawk chiah chiah sia..”

“Van aa tak.. chuan khi reng suh..”

“Naah..”

Hlutea hlim hmel ka hmuh chuan min ti hlim veng veng, vawiin hian inkhawmpui lo ila chuan nilengin a lungawi lo awm sia.. vawiin ngat phei hi chuan ka hmu hmeltha leh zual mahse zan hmasa lam a thil thleng ka ngaihtuah chuan ka tim chawih zel. Inkhawm banah an in a kan titi hnu chuan kan in lamah a pa carin min thlah phei a,

“Nizan kha ..” a rawn ti chiah

“In biakin a inkhawm chu a nuam khawp mai” ka lo ti vat a

Ka sawi duh lo tih hrethiam takin a nui suk a thil dang min sawi pui ta a.

.

Kum thar kan kai chho a, class pawh kar lo ah kan tan leh mai dawn a.. ka rilru ah hian danglamna riau a awm a awm. Hlutea hi ka duh tih chu ka in hria mahse min fawh zan atang khan a vei hian ka vei a ni ber, ka ngai ngawih ngawih zel mahse han biak lum lam dan ka thiam si lo.. vawi khat chu a lo lenin kan titi a..

“Enge I new year resolution??” tiin min zawt a

“Tha deuh a lehkha zir, bible chhiar tam leh tawngtai tam..nang??”

“Keichu maw.. hmalam pan..”

“Enge I sawi awmzia??”

“A tul hun a beidawnna chang hriat” tih chiahin min chhang a

“Keimah ah maw..” tih in ka zawt phawng..

“Beidawng turin min duh em??”

Chhan mai dan tur ka hre lo, ka duh lutuk a ni tih hi engtin nge ka sawi ang.. ka care zia chu a hrechiang a duh ve ang pawn ka awm fo mahse ka tawngka ngeiin ka duh loh thu vawi tam tak ka hrilh a chu chuan ka che zia avanga ka rilru put hmang atan a rinhlehawm zia ka hriatthiampui a ni

“Min nghak rawh..” tiin ka phun sep a

“Ka nghak rei tawh fu lo che maw” tiin min chhang a, ka sawi mai dawn a ka sawi thei tlat si lo a ni.

.

Tlaiah hostel ka luh dawn avangin ka insiam melh melh a, chu tih lai chuan ka nu in min rawn call a thil hrang hrang kan sawi a ka rilru a ka thil pai chu ka nu hrilh mai tha in ka hria a..

“Nu.. Hlutea kha I hria ti raw..”

“Aw.. I thianpa fel deuh kha a ni lawm ni..”

“Um.. ihmaw ka lakah beidawn a tum a..”

“Enge awmzia mampui..”

“A tir atang khan min duh a mahse ka hnial zel a..” tiin ka chhang a

“Anih chuan I duh ve tih na a mi..??”

“Umm zep lo chuan.. mahse nu a awmdan chu mipa zahawm tak ang kha a ni ve lo”

“Aw.. landan ah hian I buai thei lutuk a nih kha.. khawvel ah hian vuina tur engmah a awm ngai lo.. mi dik lo kan tawn palh chuan zirtirna min petu an ni a, mi sual tak kan tawn palh pawn chu chuan zirtirna min pe in kan fimkhur phah tur a ni bawk a.. mi tha kan tawng hlauh anih pawn kan nun a hriatreng tur tha tak min siam sak zawk a lawm..”

“Nia.. mahse engtin nge ka hriat tir thei ang..”

“Sawi mai la.. tawngtaina ah te I thlen thin em??”

“Umm.. engtik lai pawn.. mahse min zawh loh chuan ka sawi thei ringawt lo..”

“A zawh hun che han nghak la.. chutiang a thlen loh chuan I tan a ruat a ni lo aniang..”

“Min zawh leh pawh ka ring tawh lo.. a beidawn hmel lutuk a” tih pah chuan room kawngka lam ka va melh zeuh.. Lalpa leh!! Ka sa pup thei

“Nu ka dah mai ang aw.. ka insiam dawn..” tiin ka dah vat a

“Anih tunah zawt che I la” tiin Hlutea chuan min rawn pan hnai a

“I hre vek maw..” aw khur lek lek chuan ka han ti a

“Um.. Miriam min duh em??”

Ka zak lutuk chu puah darh mai ka duh, ka lungphu chu a pangngai thei lo ni maiin ka hria

“Tun chiah ka zawt ang che Miriam min duh em..” tiin min chhuk en char char a

“Um..” meng pawh meng ngam lo chuan ka han ti a, min fawp turin a rawn kun hniam a, a tan a awlsam zawk nan tiin ka lo dingdihlip ve leh a.

.

A ngai ang chiah in hun kan hmang chho leh a, Hlutea chuan hostel ah min rawn lam ziah a, tuma lakah zep loin kan inngaihzawnna chu kan ti lang a, mahse mi mitkhamna ni lo turin ka fimkhur ve le hem em thung a. A thiante pawh ka kawm ngeih chho em em a, ka nu bulah ka hlim thin zia ka hrilh chuan min lo hlimpui ve em em thin a. Keimah vangin zu in thin khan a nghei phah hloh a, a nun pawh a dang chho in kan pahnihin kan lehkha zir lamah hma pawh kan sawn chho em em a ni.

.

Session thar kan kai a, senior ka ni ve ta der mai.. kan college ah chuan ka tlangnel zualin nuam ka ti hle a. Hlutea pawh kan College Basketball team captain ah ruat a ni a, a hma zawng aiin a luck.. function awm ni khua ah an band chuan hun an hmang bawk a.. a hmeltha in a pian a nalh a a bialnu ka ni tih hre lo hian an lo bia ang tih ka hlau ru thei hle a, ngaihzawng a nei tih hre reng chung a be tu lah an awm nuk a.

“He nu hi tunge..” tiin a phone a message dawn chu ka en a

“Ka hre lo..”

“Ka awih lo..”

“A mak en tawh suh.. thinrimna azawn in I zawng a, I hmu zel tho ang.. dah la hei hi bun rawh..” tiin zungbun bawm chu min pe a hmun dang a hawi sawn daih

“Hei hi enge??” tiin ka han en a “Zungbun maw.. eng zungbun??”

“Kan inhualna..”

“Na.. tiang te chu romantic deuhin tita che..”

“Nih ka thinthi ang aw.. tih leh thingthit a rual

“Heii tho rawh.. college a nih hi.. ti hian min bun tir rawh..”

Min bun tir a, a rawn nui suk.. ka van hlim tak em.. midangin chu zungbun chu an hmu lo ang tih hlau takin ka sam ka tuai deuh chhen thin a.

.

Hlutea class ban hun nghakin college kawt a thutna siamah ka thu a, first year hmeichhe pahnih hi ka bulah rawn thu in an inhnial char char..

“Lalruathlua a sin..” pakhatin a ti

“A ni lo.. Lalnunhlua..”

“En rawh Hlutea Sailo tih ah khan en la.. a hming pum a dah tel..”

Fb ah ka bialpa an zawng ni ngei tur a ni, ka nuih a za hle mai..

“Hei a rawn lang.. en rawh khu Lalruathlua Sailo..” tiin intithei takin hmeichhe pakhat zawk chuan a han ti a

“Lawkkk.. saw saw a lo kal.. a chhiat loh zia saw..”

“Bengchheng suh!!”

Hlutea chuan ka bul a lo thlen chuan Pen bawm thar hi min pe a, kan bula hmeichhe pahnih te chu an zak tih hriat takin an in sik nawk nawk a

“Hei.. enge??” ka lo ti a

“Poetry competition kan class ah pakhatna ka ni..”

“Nimaw.. ka lawmpui chee.. enge heading..”

“Angel and Demon..” a nui suk a.. chu tih lai tak chuan kan bula hmeichhe pahnih te chu an kal sawn a

“ Kha mi te khan an star che an sawi char char che a.. a rukin ka nui char char..” ka han ti a

“Hm lo hria I la.. an hmuh lai che khan ka chuks zeuh tur che nia”

“I ti ang lo e aa.. naktuk ah..” ka tih lai tak chuan ka biangah a rawn fawp zeuh a, hmeichhe pahnih la kal hla vak lo te chu an au tuar bawk a, kan pahnih chuan kan in en a kan nui ta ringawt a.

Hlutea chuan a nih chak em em thuziakmi bultanna a nei der tawh a keipawn ka nih chak em em hi ka ni ve thei tih lantir nan theih tawp ka chhuah zel ang.

 

      >>>>>>>>>>>>THE END<<<<<<<