PERFECTLY IMPERFECT

PERFECTLY IMPERFECT

“Happy Birthday Bawihi  ka thiantha ber, khawvel a hmeltha ber leh duhawm ber leh sexy ber leh ngainatawm ber mai te..”

Chu audio ka ngaihthlak chuan min ti hlim kher mai, ka chin dan thin angin nasa takin ka han nui khek leh tuar tuar a.. ka thawn let tur chu ka han record ve a..

“Ka lawm bawn teh tuarrr Bawiha.. ka hmangaih cheee.. muah muah muah..”

“Muaahh.. love you.. hun nuam tak I hmang dawn nia, mahse dawhthlak kher loh tur aw..”

Haha.. he pa han hrat hmel zia hi chu aw..

“Pawhfan a awm alawm..” tiin ka record a ka va thawn let leh a. A nih na takah chuan eng anga pawhfan tam pawh awm se kei hian mimal tak a hman pui tur ka nei lo, ka thiante an ni leh tlawng mai.  

“Ka hria alawm.. khekkk khekkk” tiin text in min rawn reply tawh thung a.  Ka thianpa Jacob, Jc ti a ka koh mai thin  hi School kan kal lai a kan senior thin a ni a, kan inkawm ngai loa biak pawh kan inbe ngai hran lo mahse High School ka pass hnu ah facebook lamah kan inkawm chho ta a, kan mizia a in ang hle…! Kan sawi duh zawng, sawi hreh kan neih loh zia te, kan thawven dun zia leh fiamthu kan duh dun zia te thlengin kan in mil em em a.. hmeichhe thian ang hian min en ngai lo a, a thian mipa dangte ang mai hian min titi pui bawrh bawrh thin.

.

Higher ka kal chuan ani chu Trivandrum ah Engineering a zir tan a,khang hun lai atang khan kan inbe nasa  chho a, a tir chuan ka mil lo tlat zel, mipa atan chuan  a tawng  theiin a over ka ti thei em em a mahse kan han inbe rei ta cheng a, ka ngaina bur!! A rawn haw chang in a lo leng fova Zawlaidi/ Zowine lar tan lai vel kha a ni bawk a kan in dun thin nasa.. kei aiin a in thei loa a rui leh a luak buaipui a la ngai zawk ziah zui.. Ka lakah zep a nei loa keipawn ka nei ngai ta bik lo, a hmeichhe sex hmanpui tawh te thlengin min hrilh vek thin.. keichuan midang bula sawi lo turin ka ti thin, hmeichhia in hetiang ang mipa hi kan hua tih hrilh ngaiin ka hre ve tlatz! A lerhin hmeichhe chhe lo a hre em em a mahse thla hnih kal ta a ka thiannu ngei a duh thu min hrilh a ka tihpuina zar a an inngaihzawn atang kha chuan ka thiannu tan a rinawm zia ka hriatpui. Sex lamah tawn hriat ngah ve hle mah se ka thiannu chu khawih a tum buai lo, a virgin tih ka hrilh miau aa..

.

Tunah chuan Higher ka zo ve tawh a, Shillong lamah College kalin ka awm ve thung a, kum khat chu ka awm tling ve der tawh a ni. Hmun hran ve ve a awm kan nih avangin inhmuh a har tawh em em a mahse phone in kan la inbe pawp reng a, kan mizia pawh a la ngai reng a ni.

“Hmana I thak ve har thin lai kha” tih a message ka dawng a.. hmm.. he thu ringawt pawh hi a sawi zing tawh lutuk

“Engeee ve ziah a..” tiin ka reply

“Engmah ka lo sawi mai mai..” tiin  arawn thawn let leh

“A rei tawh e.. lerh lai a nih kha”

“I lerh peih tawh lo  ami..”

“Umm.. ka retired tawh.. haha”

A sawi ngai hi vawi li vel a sawi phawt loh chuan ka hre lo emaw hi a ti thin a chang phei chuan ninawm duh tak a ni. A chang chuan ka thiannu Puipuii hi ka khawngaih thin, ani chu ni ila ngaihzawng ang hi chuan ka dawh  theih loh fo ka ring a ni. A hmel tha in a pian in mi hip viau mah se amah hrethiamtu tan tak tak tan loh chuan han dawh reng hi a har thin, a ngaihtuahna a awm ang ang hi a sawi  ani mai. Puipuii tan ngat phei chuan kar hla a inngaizawng an la ni zui a, kei ngaihzawng mumal nei ngai lo tan chuan a thei zawk hi ka lo ti ngawih ngawih zel.

.

Zan khat chu Jca chuan  net pack a neih loh avangin thun sak turin min rawn ti a, ka hostel awmna ah zan chuan phal a ni si loh avangin ka hmelhriat dang te ka thun tir ringawt a, a hnu lawkah a audio record a rawn thleng..

“Ka lawm em mai..  lawmthu sawi nan kan zai sak ang che..” tiin ka zaithiam ngaihsan em em Ariana Grande sak “Love me Harder” tih hla chu nalh lo bak sak in a rawn sa.. ka nui nasa lutuk chu ka pum a na vek . Ka roommate chuan lo hria in a chanchin ka sawi fo thin avangin Jc-a a ni tih a hre vat a

“He pa hi ka hmu ve chak ngawt mai..” a ti hial a.. nui vak vak pah chuan text in ka va reply

“Puipuii ka thawn dawn..” ka va ti

“Ani phei chu ka zai sak nasa thei lutuk, a lawm ve theih zia aw..” a rawn la ti zui, chu chuan min ti nui nasa leh zual. Ngaihzawng a neih avang hian inbe tam tawh lo mahila a khat tawkin a message ka dawng ve reng, a rawn thawn thin ho lah chu..

“Muah..”

“Ka hmangaih che..”

“Ka thiantha ber I ni..”

He pa hi thlir lohna lam atanga thlir chi a nih loh zia ka hriat chian em avangin ngaih khatah ka ngai tawp, a rawn thawn ang angin ka reply let tawp zel. Ani pawn ngaihdan dang a neih loh zia hi ka hrechiang a ni. Hmeichhe sihhnip tak ni in mipa laka rilru enge maw pu hma tak ka ni lo hi a vanneihthlak zawk, chu ti ni lo se ngaihdan dang neih na tham hian ka bulah hian thu eng enge maw ni hi a sawi zing em em a mahse la thutak chiah I la chuan ka rilru a nat phah mai mai ang.. ani chuan a na tih pawh a hre lem lo thung ang. Hetiang ang mizia ka neih avang hian min ngainat thu ani hian a sawi fo bawk a ni.

.

Inrinni vawikhat chu kan college a lut hnam dang, kan senior chhelo zetin chhuahpui a min sawm avangin kan chhuak dun a, parkah te min hruaiin thil kan ei dun bawk a nuam ka ti ve hle mai mahse ka tan chuan chhuahpui satliah mai mai a ni. Jca’n kan thlalak thawn tur a min hrilh chu hrechhuakin thla kan la dun a ka va thawn a, kan tih dan ve reng a ni, ani pawh date a nei emaw Puipuii nen an awmdun te hian an thlalak min rawn thawn fova, kan thian ho thlalak te pawh ka thawn fo thin a ni. Ani chuan engtin mah a rawn reply lem loa ka lo ngaihsak zui vak lem lo bawk a. Tlai a ka haw ka phone ka en chu Jc-a message leh Puipuii message a lo awm nual a,

“An inhau leh pek tawh a ni maw..” ka ti mai a, reply lem lo chuan ka inbual san daih a. Ka inbual zawh chuan thil awmdan ka va zawt  ve ve a, Puipuii chuan min reply loa, Jacoba erawh chuan min rawn chhang vat a..

“Engmah a ni lo, zanah ka hrilh ang che” a rawn ti mai a

“Hm.. sawi mai teh.. in inhau renggg mai..” ka va ti a

“Kan in hau reng lo.. vawiin chu a nuam em??”

“Umm nuam e.. a chhe lo si, a bucks bawk si..” tiin ka va reply a

“Gold digger”

“Huh.. a gold saw dig ka tum leuh.. chhuahpui neih ve chhun a class lo deuh chhuahpui chu ka ti mai a lawm..” ka va ti a, thinrim en ah pawh ka en chuang lo

“Anih kei ka class em?? Enge ka nih..??” a rawn tih chuan ka nui huk

“Nang chu Engineer zirlai, thawveng deuh..  thiam thei tak mahse zir peih lo..” ka va ti a

“Haha.. min van lo ngai low..”

“Enge aa.. I awmzia hi, in inhauh vang maiin tiang khan awm suh..” ka tih chaun a reh hmak a

.

Zanah chuan Jc-a nen kan awm ho na group, thian ho ang deuh reuh mahse inhmu a inkawm em em lo ho kan awmna ah chuan group member pakhat hian thu a lo post a, ka hman lai a ni bawk a tiin ka va tawng ve a, kan titi chho mai mai.. a hnu lawkah Jc-a a rawn lang..

“Kimi Vai date chu a nuam viau a ni maw..” mawl ka ti angreng hle mai, thian hriat chian mang lo kar a kha tia  a rawn ti ringawt kha.. mahse ka chhang duh lem lo a, ka reh lui deuh hmak. A hnu deuhah chuan kan  thlalak ka thawn zing a mi chu group ah a rawn thawn.. ka sa phat, ka rilru a na vawng vawng..

“Zohmangaih enge I hriat a..” ka va ti a

“Vai date hi a nuam em??” a rawn ti leh

“Uaii.. kimkimi chu date chhe lo ve”

“A nawm dawn khi..wahaha..”

“Keipawn Mizo mipa ai chuan hnam dang ka duh fee Kim congratz”

Ka  group awmpui ho chuan an rawn ti sap sap a, ka thin ti rim zual tu mai a ni.

“Kan indate lo..” tih ringawt chu ka va thawn leh a

“Kimi sum lu tur  anih khi..” Jca chuan a rawn ti hram, ka puak keh lo choh, hetiang hian min hmuhsit hmel takin a la awm ngai lo. Ni e, ka nun hi chhuanpui tham em em tur khawp a nun ze mawi  nei a ni ngai lo, amah Jca sawi ang deuhin  ka thak hma hle a, kum 16 ka nihin ka virginity ka hloh a.. mi pathum sex ka hmanpui tawh a ni. Chung chu ani hian a hria a mahse mak min ti angin a lang ngai loa.. chutiang ang ka mizia chu ka thlah telh telh tih pawh a hrechiang. Min fuih ngai em em lo ani hian, fuihna tawngkam neih a inhmeh lo bawk a, min ngaihsak lutuk ti a sawi theih pawh a ni ngai lo mahse min ti hlim ber tu a ni thin. Mipa tam tak min ngaihtuah hmel deuh a awm thinte ai chuan ka ngaina fe a ni mahse tun a a awmdan hi ka hrethiam lo..

 “I CHAWH!!” ka va ti a group chu ka  leave ta a. Ni dang chu ni se ‘I chawh’ tih tawngkam te chu kan inbiakna pangngai ang mai mai ah kan hmang, tun tum zet chu a dang zar mai, min ti thinrim in ka rilru a tina takzet. A hnu rei lo te ah a message ka dawng..

“Ka lo add leh dawn che..” a rawn ti a

“A tul lo, min lo be rih teh suh..” ka va ti

“Ka ruih vang a nih kha ka tihpalh..”

“Huh.. ruih lai pawn thil pawi tur chu a hriat ve asin..”

“Aww.. mahse ka hmangaih che lawm.. group a awm ho pawn kan in kawm ngeih zia an hria a”

“An hre chiang ngawt a tun ang  kha pic I rawn thawn hnu phei kha chuan..” ka type pah chuan ka mittui a rawn tla a, mipa vang a rilru na tak tak a ka tah vawikhatna a ni tih ka hre chhuak zawk, chu chuan min ti na leh zual.. tah tak meuhin kan tap hliam hliam mai a nih kha. Ka room mate chuan a ngaihna hre lo takin a chhan min zawt, sawi pawh ka sawi thei lo.

“Nichin khan ka hmingpumin min ko ti raw..” tih a rawn thawn, mi nasa takin amah vangin kan tap a , a hming pum a ka koh ngawtah a lo la buai..

“Mi aaa diktak inih hi.. I thian ka ni tawh lo..” tih ka va thawn chuan ka thutak tih a hre ve deuh a niang, ngaihdam min lo dil leh chuk chuk mahse ka reply duh tawh lo. Groupah chuan min lo add lehin member awm ho chu kha hnamdang ka chhuahpui pa kha ka date a nih loh thu leh ka thian satliah a nih thu te a hrilh hlawm, mahse chu chuan ka lung a ti awi thei chuang lo.

.

Ka harh chuan zan a rei tawh tih leh ka in tap muhil tih ka hrethiam nghal a, ka phone a Whatsapp a message ka dawn ho ka en chuan Jca message deuh hlir..

“Ka tihpalh… a thleng nawn tawh lo ang”

“Ka rilru a buai vang a lawm.. Puipuii nen kan inhau a..”

“Ka hmangaih che..”

“Bawihi..”

“Ka mawl e ti raw.. i thian ni tlak pawh ka ni lo”

“Min ngaidam rawh Kim.. please”

A message engmah ka reply loa, a tuk nilengin a call chu a theih ang angin ka reject zel a.. class awl lai a awm chuan Jca missed call bakah Puipuii missed call a lo awm tel a, Puipuii chu ka call vat a..

“Hello..”

“Pui.. class lak laiin I lo call a, ka hman chiah..”

“Laljacoba’n a hrilh che em??” thinrim hmel takin a rawn ti a

“Engmaw..??” ka lo ti vat a

“Min bum alawm Kim.. niminah zu a in, a in ngai tawh loh tur thu min tiam a..”

“A thu sawi chu I awih reng reng a mi??” ka lo ti hmuk

“Nangman dawt a sawi ngai lo I ti nih kha..”

“Huh.. ka ti maw.. ka sawi sual a nih chu..” ka ti a

“Kim, Jacoba chuan min reply duh miah loa ka tawng khum hrep avangin, min be turin khawngaihtakin min lo hrilh sak thei a ngem??..” a ti a

“Um ka lo be dawn nia.. ka dah aw..” tiin ka dah ta a.

.

Class banah ka phone ka check chuan Jca message a lo awm

“Khawi ber hi nge ka rawn thawn dawn che..” tih a ni a, a hnuai ah pic a awm a.. chu a thlalak rawn thawn chu kan download  a ka nui hak… ka high heel  brand ngaihsan em em Jimmy Choo pheikhawk nalh em em thlalak tam tak a rawn thawn. Pawisa a nei lo tih chu chiang takin ka hria a, engtikah mah min lei dawn lo tih pawh ka hre reng mahse min rawn thlem dan chu ka duhzawng tak a ni, ka thinrimna pawh a ti dai sawng sawng thei..hehe..

“Pupuii be rawh..” tih ka va thawn

“A hrilh che mi??” a rawn ti vat

“Awwwwwwwwwwww”

“Hehe.. yes boss .. muah..”

.

Thla hnih kan hmang ral ve leh reng mai, khang hun chhung zawng khan Jca message ka dawn, a tam zawk chu Puipuii nen an inhauh thu a ni, ka hne hle mai!! Dik tak chuan Jca hi chuan a thiam thu a sawi ngai lo mahse Puipuii hnen atang a ka hriat danah chuan Jca thiamloh zel a nih avang hian ka hau leh hrep zel. A hma ang khan ka awmdan, ka ni hman dan leh ka hlimna leh lungngaihna pawh ka hrilh thei tawh lo, a buaina bak min hrilh hman tawh loa ka buaina ngaihthlak nan hun a nei ve ta lo. A chang chuan ka chhungte ai pawn ka ngai a mahse ani chuan ka thiannu hlimna tur a tih nan khawhar takin min dah a ni. A leh lamah chuan a lawmawm viau mai, ngaihzawng nghet neiin nundan pangngai zawh se ka duhthusam a ni, Puipuii nen an inngaihzawn chhung hi chuan a fel ka ring  ani, ani tluk a hmeichhe fel a tawn hi ka ring lo mahse a thikthu hi a chhia in vawi leh khatah control tlat a tum thin hi Jca, khawvel mi ve tak tan chuan hriat thiam a har thin ang tih ka hria a ni.

.

June thla tawp lamah chuan Jca chuan thla hnih dawn chawlh a nei avangin a haw a, keipawh July ah chuan haw ve thei turah ka in ngai a. Puipuii nen an inhmu chu an hlim hmel kher mai, an thlalak te min rawn thawn a an inhau ngai ta meuh lo chu ka lo thawven phah phian. Zanlai dar 1 pelh hnu ah ka phone a ri a, ka muhil min ti harh zawk..

“Hello..” mut chhuah hmel takin ka ti a

“Zda’n a ti tawh che mi??”

“Huh.. enga tan.. ka muhil tawh ka ning!!!”

“Ngee.. kan lenna ah a sawi a, kan insual phah a..” a ti a

“Nge I insual pui vel.. ngawi mai mai ta che..” ka ti a

“Puipuii’n min lo thelh a, kan inhauh phah hrep  alawm..”

“Puipuii te inah Zda a leng ve maw..” ka ti a

“Aw a leng a nih chu.. Puipuii’n a tan hmel lutuk khan ka rilru a tina  alawm, a thiannu ngawih ngawih  I nia..”

“Hehe.. ani chu  afel a alawm.. a ho lutuk, I rilru tina duh suh Bawiha..”

“Ka ngai lutuk chee a, lo haw ve vat vat la ka ti..”

“Ka lo haw vat dawn alawm.. kan ride dawn em??”

“Dawn chiang e.. zu kan in ang a..”

“Nang chu Puipuii’n a phal lo saa..”

“Nangma bulah chuan a phal sa..”

“Mu tawh rawh.. keipawh naktuk class ka tlai palh ang..” ka ti a

“Um.. muttui aw.. bawihi, ka hmangaih che..” tiin a dah ta a

.

Jca thusawi ka ngaihtuah let chuan ka muhil zui thei tawh lo, Puipuii nen hian inkawm ngeih tak ni mahila duhzawng leh ngainat zawng in ang lo tak kan ni thin a mahse ka thuruk ka hrilh vek thin. Jca hian sex ka hmang tawh tih a hria a mahse tute nen nge tih a hre lo.. Puipuii erawh chuan a hria a ni. Kan tet te atang a in kawm kan ni a, ani hi a dawih emem a kei erawh thil sual tih lam a huai leh kawl hrawng em em ka ni thin, naupanchhiat lai atanga  thil kan tih ruk  te hi a chhungte bulah a sawi ziah a kei min lo puh ziah thin tih te ka hrechhuak uar uar a, a chhungte hian kei min kawm an phal vak loa mahse ani hian fing takin a tih ve ngai loh thu a sawi chuan a chhuag leh viau zel thung. A chhungte min mil vak lohna chu pawi ka ti lem lo an fanu ka kawm theih chhung leh a sual ve loh chhung chuan. Mahse, ani pawh a bialpa hmasa ber Jca nen an inngaihzawn atang hian min be khat hle a ni.

.

Sumo counter a min lo hmuak tu ka hmuh chuan ka va tlan kal a kan in kuah cheng …

“I sam chuh.. pawngsual hlim kaihthawh I ang hle mai..” Jca chuan min nuih vak vak paah chuan a ti a

“Zankhua in motor ah chuang ve la I hmeltha vak bik lo ang..” ka lo ti a

“Niaa.. mahse Sumo nilo in Flight in ka haw thin tlat a..ahaha”

“I hmelchhia nih chua, bungrua khu dahlut vat ta che carah..” ka lo ti a

“I kid emaw min ti mi..”

“Um.. chuvang chuan va dah rawh.. haw vat ang, ka thlan bal ka thak sep sep..”

“Thing thei sia a, ti khan I inbual leh chuang lo ang..” bungrua car hnung lam a dah pah chuan a ti a

“Min lo bihthla la I hre mai ang..”

“Awi.. nang aia nalh bihthlak kher ngai loin ka hmu..”

“Hmuh ringawt chu har loee..” ka lo ti hram

“ Rawn lut rawh, haw kawngah kan sawi chhunzawm dawn nia” a tih chuan Carah chuan ka lut ta a

“Tinge a pa te an lo kal loh aaa??” ka ti a

“Ka va kal a.. keiman ka hruai dawn ka ti..”

“I van zak thei lo..” ka lo tih chuan a hmui a lo ner nawng a. Enge maw ti takin ka hlim veng veng mai..

.

In kan thlen chuan ka nu leh pa leh ka pi leh pute chuan min lo lawm sap sap a, Jca erawh a chhuak nghal daih, Puipuii te in hi kan inbul lawk a nih avangin a kal a ni tih ka hre nghal mai. A hnu rei lo te ah an pahnihin an rawn kal a, ka roomah in dah fel pahin kan pathumin kan awm a Puipuii’n ka thawmhnaw chu min rem fel pui vat a..

“Inbual vat rawwhhh..” Jca chuan a rawn ti a

“I hur e aa.. chance I duh vang anih kha..” ka lo ti vat a, Puipuii chu za takin a lo nui bawk a..

“Ka ril atam alawm..” Jca chuan a ti a

“E.. ila ei na nge.. ka inbual zawhah kan ei dawn nia..” ka ti a, Ka room chhung a bathroom awm ah chuan ka lut ta a. Ka inbual lai chuan Puipuii hmel chu ka ngaihtuah a, hlim lo riauin ka hria.. ka haw hnuhnun ber tum kha chuan ka nu te rualin min lo hmuak turin a rawn kal vel si a. Kha tih lai khan Jca nen an la in hre loa Jca erawh chuan a star deih tawh thung a, kan haw hun a in rual chuan kan in a Puipuii rawn kal hi changin kan inah pawh a rawn tal tam phah ve hle thin anih kha.

.

Ka inbual zo ka kawngka ka hawng chu an thu tha sawk sawk, ka nuih a za ru hlee..

“Lo hawi su.. ka inthlak dawn..” ka ti a, ka inthlak sawk sawk a.. “Pui lo ei ve nghal daih la.. anu ten an ei tawh tho a..” ka ti a

“A buaithlak mai mai.. hei Jca’n a lo ei dawn tho a..” a rawn ti a

“Laljacoba hi chu maw kan haw hun a inan chuan chaw chhum  kep ziah a ngai.. a rawn lang ang thut thut a.. leng peih ropui si.. nileng leng a leng a..” ka ti bawrh bawrh a

“I zak em?? Ka lo kalin chaw ei rawh min ti ziah nih kha..” Jca chuan a rawn ti bui bui a

“Tunah hian ei suh ka ti dawn che mi le..” ka tih chuan a la na rap, haw te  atum kan inthlem leh rih a.

.

Kan inhmuh ve theih laia kan tih dan thin ziah a ni a, an inah hian a awm hman ngai mang lo, mahse tun tum ka haw chu a in ang lo hle mai ka thiannu Puipuii hian a hauh deuh bur,  arawn kal hlekin a rawn call chhen a, mi hi dik lo tak a ka ngaihtuah ngai loh nen mak ka ti ve ta telh telh a Jca lah hian min ngai tih hriat tak hian a rawn kal peih hle lehnghal a, ka tum loh pui te hian kalo vin hrep thin.  Sunday chawhnu vawi khat  chu kan inah Jca leh a thianpa Dika an lo kal a.. ka nu leh pa an inkhawm a, ka pi leh pu chu ka nite inah kartawp an zuk hmang ve a..

“Innu a awm lo  ami??” ka lo ti vat a

“Chawhnu inkhawm a kal.. thingpui lum la..”

“Yesss..” tih pah chuan choka lamah ka phei a thingpui chu ka lum a, a so hun ka nghak pah a. Jca chu a vei chhen, a chang leh a rawn kal a, a thianpa bulah a va thu leh thin. Thingpui no a, thingpui ka leih zawh a chini ka chawh lai chuan ka hnung atang in Jca chuan min rawn kuah thut, ka phu zawk a tal hran ka tum a mahse a tha ka hnen loh em avang ka ding ta reng ringawt.. engvang a he pa hi he tia awm nge a nih le??

“Jc.. kal rawh” zawi te chuan ka ti a

“Aih.. rei lo te chiah..” a rawn ti a

“Tinge hetia I awm a?? I rui a mi..”

“Ka rui lo.. mahse ka ngai che, ka ngai lutuk che..” tiin  alam ah min kuai her a, kei chuan ka lo chho en ha a.. “Ka tihpalh aw.. I thian ni mahila.. enge awmzia ka hre lo.. ka mamawh zawk chu…”

“Kim..” thut khawmna pindan lam atang a Puipuii aw kan hriat chuan kan in thlah chiang hle mai, ani chu a ngaihna hre lo takin a ding reng a ka thingpui chawh lai chu ka chawh chhunzawm a.

“Ehe.. he tah enge I tih a..” Kimi chuan a rawn ti a, ka van haw reuh tak a rawn tih dan kher kher chu..

“Thingpui ka chawi phei dawn..” tiin ka chawh lai leh thingpui pakhat zawk chu tray ah dahiin thutkhawmna pindan lam a pan pui a.. ka va chhuak a engmah em em sawi lo chuan ka thu a

“Hei hi  a hang..” Dika chuan  arawn ti a

“A hang kha ka ta tur..” tiin Jca chuan a la vat a, Puipuii chuan a melh rum hlee!!

“I inkhawm dawn emaw ka tia..” Jca chuan a ti a

“Pathian in thu emaw zui tur a hriat tirna min pe a..” tiin Puipuii’n a chhan chuan Jca chu a dang chiang hle, ka lo thinrimpui tak zet.. mahse engmah sawi loin ka phone ka khawih ta char char a. An haw hnu chuan ka rilru ah Jca awmdan mawlh kha a awm, keini pahnih hian inngaihzawn lam kan sawi ngai lo ka tum lo bur, ka thiantha ber tih chuan ka chhal ngam chiah lo nangin Jca hi ka thian hlu ber  ani. Hmanah kan ruih laiin vawi hnih vel chu kan inkiss tawh mahse engah teh ula kan ngai lo ve ve a ni. Ka thian angin hmangaih hle mahila ka ngaihzawng atan chuan ka duh ngai lo.. ka hriat chian em vang te hi a ni mai thei, sex ah a fihlim lo em em a, ruih a hrat tel bawk chutiang ang mize nei mipa chu ka nunlhui kalsan a puitlin ka tum mek karah hian ka ngaizawng thei lo. Ani ngaih ah pawh kei nun pawlawh lutuk hi a nun siam thatna kawng a pui tur awm reng chung si in min duh lo ang.. ka chuang!! Nichin a  awmdan kha chu a ngaihtuahn kal dik lo mai mai a ni ang..

.

“Chhuak lawk ang..” tih message ka dawng

“Khawiah.. bakah zan a nih hi..”

“Chuvang reng, whiskey ka nei..”

“Ka in peih lo.. ka in lohna a rei tawh tih I hriat vek kha..”

“Reilote please..”

A replyna tur ka type lai mek chuan inchhungah a rawn lut a..

“Nu Zampui Kimkimi nen hian kan chhuak lawk dawn.. I phal em?? Thil lam ngei ngei a ngai a, a hmelhriat te an nia..” a rawn ti lut nghal a

“Zan chhuah a tul lo..” ka nu in alo ti hmuk, ka nuih zat zia chu

“Mawhhh.. Nu Zampui, tuman an tibuai loang..” a ti leh hram

“Rei lo ula..” ka nu in a rawn tih takah chuan a bike chuan kan chhuak dun ta a. Hmun fal ve deuh reh thiap kan thlen chuan a ding a, a zu um a phawrh a a in char char.. a hma a ka duh loh thu ka hrilh avangin min zawt nawn tawh lo..

“In tawh suh.. I in hnem lutuk..” ka ti a lak sak ka tum

“Ka in zo vek dawn..” a la rawn ti chhah chhah

“Zu I in lai en turin  ami min hruai chhuh??” ka ti hmuk a

“In ve la…”

“AIH..”

A reh vang vang hnu chuan..

“Bawihi..” a rawn ti a, a kai hmel tawh tawp..

“Um..”

“Vawiin kha ka tihpalh.. Puipuii bulah hian ka hlim lo, I bulaha ka hlim..”

“I ruih vang mai mai nih kha..”

“A ni lo.. “ a sawi lai chuan a phone ari a, Puipuii call, a hmet tawp hmak hmak..

“La ta che..” ka lo ti tuar..

“Aw enge… Ka leng, Aww.. kimi bulah ka awm..” a dah hmak

“Ka zung dawn..” tih leh thawh a rual a, a phone ah chu leiah ka thloh a, ka lo chhar vat.. Chutih lai tak chuan a message tur a lo thleng a, en ka tum lo.. mahse pop up ah adah avangin ka hmu thei ta vek..

“Khangtiang ang hmeichhe awm herh lutuk bula awm kha a nuam viau a mi?? In inang bawk a, in hlim dun ngawt ang..” tih Puipuii’n a rawn thawn ka chhiar chuan ka mak ti lutuk chu phone chu ka en reng a. Jca rawn let thawm ka hriat chuan a message dawn chu ka delete daih a.

“Puipuii hi ka then dawn..”

“Enga?? I aa mi..”

“Aw aa.. ka peih tawh lo..”

“Eng chu..?” ka lo ti a, a ngawi reng.. “Bawiha Puipuii’n I bulah min sawi chhiat thin vangin I hua ti raw..” ka tih chuan min en reng a..

“Chutiang piah lamah chuan maw a in ngai famkim em a ka thei tawh lo a ni.. kei chu min hriat chian kha.. ka fel lo mahse I bula ka awm chuan ka fel in ka hria..” a han ti a

“Ka sual vang mai a..” ka lo ti a

“A ni lo.. nang chuan min hrethiam em em a lawm..”

.

Facebook ah ka online mai mai a, message hlui ho ka en vel a, Jca nen kan inbiakna ka en chuan min block tih ka hre nghal a, ka thin a rim hlurr.. nizan hmasa lawkah tha takin kan la inkawm si a

“Engvang a min block nge I nih??” ka va ti a

“Ka block lo che engah mah.. fb ah em ni I tih aa??”

“Aw..”

“Lawks aw..”…………… “ka tihpalh Puipuii a niang nizan a an in a ka lenin ka phone a khawih..”

“A tha nih chu.. chuan inbe tawh lo ang, ka thian I ni tawh lo..”

“Enge awmzia hii.. engtiklai pawh a ka thian inih thin kha..”

“Thian I mamawh tawh lo..” tih in ka reply a, a number chu ka block ta vek a. Puipuii chu huat loh ka duh teh lul nen, dik tak chuan ka thian hlu ber lakah pawh hian ka thikthu a chhia a, kan pathum a inkawm ho thei ni ila pawi ka ti lo mahse amah Puipuii hian min be ngai ta mang loa, Jca takngial pawh ka lak atangin a la hrang tawh si. A tir chuan Jca chuan hrethiam loin kan in lamah pawh a rawn lang tam hle a, mahse haw turin ka lo ti ziah.. a haw hnu chuan ka duh vang pawh ni loin ka tap ta fova, ka ngai ngawih ngawih a ni.

.

Shillong lamah ka chhuk leh ta a, Jca awmdan pawh engmah hriat ka nei ta lo amah hriatchhuah theihna ang chu a theih ang ang ka paih bo a mahse engtik lai mahin ka rilru atangin a bo ngai lo. Ka khawvel hi a reh tlawk tlawkin ka hria a, mi tumah ka hnaih peih lo. Tih tur dang awm hek lo, thiante bulah ka tal tam ta lo bawk nen lehkha ka zir ngut ngut reng mai. Ka thiannu hlui Puipuii chuan ka nunhlui vangin min hmusit em em a, ka thian hluber min chhuhsak bawk a  mahse ani ka hneh theih dan kawng pakhat ka hria a chu chu ka zirlai tha tak a zir a ni. Ka roommate in chhuahpui a min sawm tih loah chuan College ka kal hi ka chhuah chu a ni tawp zel, in ti hlim tur a chhuah hrat em em khan ka sim hmak bawk a.

.

Ka zirlai ah ka in sawrbing nasa bawk a ka ti tha leh zual kher mai, chu chuan phurna nasa tak min pe a ni. Ka nunah hian kan class a ka kawm ve deuh tih loah chuan thian ka nei tawh lo, neih pawh ka duh tawh lo a ni. Kum a tawp dawn a chawlh hmang a haw chu ka hreh lutuk mahse haw loh chi a ni si lo. A hma kha chuan Jca emaw Puipuii’n min rawn hmuak ziah a, vawiin ve thungah chuan ka nu leh pa ten min rawn hmuak si. Engkim chuan Jca min hriat chhuah tir a, ka ngai lutuk chu ka mittui a tla hial thei. Rilru na tak a tah hi ani ka hmelhriat atang hian ka van hre chho nasa em!

.

Puipuii chuan ka haw tih pawh a hre lo aniang mahse kha nu kha ka hmu peih lo. Vawi khat chu Krismas bazaar turin ka cousin Mapuii nen kan chhuak dun a, restaurant a thil ei tur a kan lut.. kan thu fel deuh chiah tihah chuan kan piah lawkah Jca leh Puipuii thu chu ka hmu a, ka na zawk. Ka lungphu chuan min nghawr dawt dawt, ka awmdan ka hloh lo choh.. min hmuh kla hlauh em avangin an mahni hnung chhawn zawng chuan ka thu ta a. Ka tui in zo chu dawhkan hmawr te ah no ka lo dah avangin a tla ri ta tlawng, an lo hawi thup a.. chiang takin Jca nen pawh kan in en a, ka mittui chu ka hriat miah loin a rawn luang leh..  Mapuii chu ka pawt nawk nawk a kan chhuak dun ta a.

.

Ka rilru ah chuan vawiin lam a ka hmuh Jacob a te pahnih ringawt chu an awm a, ka rilru a tina takzet.. Jca hi ka chan meuh chuan thian mai ni lo in ka lo en tihna em ni.. a nundan ngaihzawn atan a ka iai thin na zawng zawng te khan ka rilru an luah tawh lo mahse an ni pahnih saw ka pawt then thei lo a, chutiang ti mi pawh ka ni bawk hek lo..

“Bawihi hei I thianpa a lo kal..” ka nu in a tih velah chuan ka room atangin ka va chhuak vat a, Jca a lo ni a

“Ka roomah lo kal daih rawh.. a pa te an committee dawn a” ka tih chuan ka roomah kan in zui lut ta a

“Ngatinge ka biak tlang theih ngai loh che..” a ti a, ka ngawi reng.. “Mawhh.. Bawihi, tiang hian awm suh.. I tel lo a nun hreawm  zia I hre lo a mi??”

“Nuam ka ti bik a mi??” ka ti a

“Thian ni leh ang aw..” ka rilru chuan thian mai hian min na a sin tiin ka sawi a..

“Puipuii nen hlim deuhin awm  ru.. ngaihzawng nei chungin thian a neih tak tak theih loh Bawiha..”

“Anih min lo mamawh tak tak lo anih hi.. min mamawh chuan maw Bawihi Lean on me aw..” tiin a kal ta a. A vawikhat na atan amah a ka in nghah theih thu min hrilh a nih chu mahse a tlai tawh si.

“Mangtha Jc..” tiin ka rilru chuan ka thlah ta a.

.

KUM HNIH HNU AH:                              

.

Ka result chhuah zanah chuan inleng kan nei ve sap sap a, Meghalaya Board a B.Sc (Micro biology) ah pathumna ka ni ve a, ka nu leh pa chu an lawm em em a kei ngei pawh hi ka hlim hle a ni. He ka result neih that hi tudang vang a ni lo, ka thiante pahnih vang chiah an ni. Kan inkawt a Puipuii lo kal phei ka hmuh chuan ka ko vak a..

“Lalnunpui..”

“Awii.. Kim, ka rawn kal hman mang loa ka buai lutuk a..” a ti a

“Lo leng rawh ka result kha I hria em??”

“Aw hria e.. ka lawmpui lutuk che aw..”

“Keipawhh.. Jacoba nen enge in chanchin??” ka han ti a

“Naa.. kan ni tawh lo, englo ania inleng ka nei ve a..”

“Maww.. tinge min lo hrilh ve loh” ka han ti tak na a, kan inbe ngai ta lo tih ka hre reng. Tun tum na na na chu ka hlim em a ka huatna te pawh a bo thak a nih hi..

“Nia.. a fel ang reng lutuk a.. kan la inzui reng lo nangin hna tha tak a nei a.. aw lam kan pawh deuh..” a han tih chuan ka rilru ah Jacoba a awm nghal, heng thil hi a hre ve angem le..

.

Ni thum ngawt Jacoba ka biak dawn leh dawn loh  in ngaihtuahin ka rilru  abuai kher mai. Ani chu Trivandrum ah a awm mek tih chu ka hria a, ka buaina ber Puipuii nen an inngaizawng tawh lo bawk nen zankhat chu ka zuk call a..

“Hello..”

“Jk..”

“Kimi.. I dam maw??” a lo ti a

“Um ka dam  alawm..”

“I result ka lo hria a, I van titha ve aw..”

“Nia.. I dam em??”

“Um ka dam alawm.. engtia awm zel nge I tum??”

“MZU lamah ka kal zawm ang ka lo tia..” tiin ka chhang a

“Keipawh kar leh lamah ka lo haw ang.. thla leh lamah inneih na a kal a ngaih hmel sia..” a nui deuh hak a

“Hehe.. I hria maw..”

“Hria ang chu.. kan nih lai atang in ka hriatpui a lawm..”  a tih chuan ka khawngaih ang reng hle a

“I rilru  ana em??” ka ti a

“Na hran loee..” ti a min chhan chu ka awih lo hleee..

Kan inbiak zawh chuan text message a rawn thawn a..

“Dik tak chuan maw Bawihi ani kha thenna chhan tur ka hmu tam in ka hmu zing a, mahse ka thiantha ber ka chan chhanna anih na hian tawp mai tur hian ka duh thin lo a ni, enge maw ti tak a ka tan a thatna  a neih ka ring tlat a mahse a lo ni lo a nih hi.. min ngaihtuah suh ka tha lutuk..”

.

Jca rawn haw hnu chuan kan inah a rawn lang ve ta zeuh zeuh a, a hma kha kan ang tawh lo hle mai, hmana Jca leh Kimi.. Bawihi leh Bawiha tih a in ko ngat thin te, thawveng dun leh tawngkam nuihzathlak tak hmang thin te kha kan ni tawh loa. Hun a liam a kan lo puitling ve ta te pawh a ni mahna, ani pawh keimah ang chiah a ngaihzawng ngaihsak ve peih lo a ni ve tawh a ni.

“Kim hei hi khawi lai nge aa??” Ka laptop a ka thlalak ho chu en pahin a rawn ti a, ka va thut hnaih a, a lo tawlh ve hrut a, a dang en tir tum a mouse hmang a ka tih sawn chuan ka kut a rawn hum a..

“Hmana frank deuh ang kha I ni tawh lo reng reng..” ka han ti ngawt a

“Nang pawh..  I danglam tawh lutuk..”

“A hun ve tawh lawm..” ka ti a

“Keichu a hun vang a ni lo, dinhmun vang ania..” a rawn ti sep a

“Eng dinhmun??”

“Ka hmangaih ber ka neih theih loh vangin..” a rawn ti a

“Puipuii maw..?” ka lo ti vat

“Teuh lo , ani chu hmangaih tur pawn a awm ngai hleinem.. bakah hmangaihna hi eng tia lan chhuah tir tur nge ka hre lo aniang.. ka mawl ti raw..”

“Aih.. I tih lan thiam loh chuan hrilh tawp la..” ka lo ti a

“Ka hrilh zing thin lutuk alawm..” enge a sawi tum chu hre chiah lo mahila ka chung chang asawi tih ka hrethiam mai a..

“Aman a hrilh ve ngai che em??” ka ti leh hram a

“Aw.. vawi tam tak.. mahse ani chu a tel loa ka hlim angah a ngai tlat aa..”

“Bawiha..”

“Um..”

“Ka hmangaih che lawm.. mahse ka huang chin ka pelh ka hlau thin em a ni” ka ti a

“Ka lakah huang chin engmah I tan siam a ni lo..”

“A ni.. ngaihzawng I nei a..”

“Kha kha ka nun a ka tih sual lian ber leh tha ber si a nih kha.. ka hmangaih che tih min hriat chhuah tir a, ka hmangaih chu ka chan bawk a..” a ti a

“In hlim dun viau ah ka ngai a sin..”

“Teuh lo.. mipa zawng zawng duhthusam hi hmeichhe fel leh zahawm an duh ka lo ring thin a kei ngei pawn ka duh emaw ka in ti thin mahse a lo ni lo.. hmeichhe fel a I chuan ka felna mi chu  alawm ka mamawh zawk..” a ti a

“Ka nun hi chu bialnu a tan a nun awhawm a ni ngai lo alawm.. nupui  atan ngat phei chuan” ka ti a

“A ni lo.. ka nunhlui a buai loa ka hmalam hun min thlir pui tu leh ka tun hun min hrethiam tak a min hmanpui thei alawm ka duh kei chuan.. nang chuan nunhlui duhawm loh tak I nei a ni mai thei keipawn ka nei mahse kan inkar ah buaina a thlen ngai a mi..??” a ti a

“Thlen ngai lo.. a chhan chu thian atan chuan chung chu  apawi lo alawm..” ka ti a

“Anih I ngaihzawng nita ila buaina a awm angem??” a ti a

“Aih.. buai turin eng nunhlui chhiar tlak mah ka nei hleinem..” ka ti a

“Puipuii, nula fel tak leh pawn lam nun dan mawi em em nen a awmdun a, mi zah nih ai chuan keimah ang chiah a nunhlui tha sawi tur nei lo, lan mawi tum lem lo leh min hrethiam em em tu hi ka mamawh zawk a lawm..” a ti a..

“Mahse hmalam pan kan tum ti raw..” ka ti a, ka nui suk a

“Um.. chuan I pawm tawh em??” a ti a min kuah a..

“Ka nghak reng thin alawm..”

.

Puipuii te inneih dawn ni zan chuan man ei ho chaw ei na lamah ka va pui ve a.. zana riak tur a min tih ve avangin kan mu dun ta a..

“Kim.. Jacoba hian a hmangaih che tih I hria em??” a ti a

“Um ka hria alawm..” ka ti ringawt a

“Kum khat chu kan in zui tling ve a, min hmangaih thu min hrilh ngai miah lo a sin..”

“Thian angin min hmangaih thin  alawm Pui..” ka ti a

“Ani nen khan kan inhau reng thin a, engkimah ka lo dem thin a mahse ka lo a ee.. min ngaihsak loa nang a ngaihsak em em lai che khan lo hriatthiam tur a nia..” a tih chuan nuam lo ka ti hle a

“Pui.. keimah zawk alawm.. a ngaihsak zia che ka hmuh khan ka kim lo riau in ka hre thin a, inkawm ah pawh inkawm tak meuh meuh kan nih vang a niang mahse maw ka tan ang kha chuan ka duh ngai lo, hmeichhe zahawm deuh nei se ka lo ti thin a..”

“A hma I sial sak na kawng a nia.. I hmangaih em vang anih chu..”

“Hehe.. a ni mai thei ni.. mahse Pathian hi  atha e ti raw engkim hi  aruat fel vek a..  atlai ngai lo reng reng..” ka ti a.

.

Biakin lam panin kei leh Jca nen chuan kan kal a, inneih lawmpuina a kal tur pawh an lo thleng ve sap sap a. Smart tak a inchei a inhmeh dan chu.. a nuih pah a a biangsum lang chang chang hian  a ti hmeltha leh zual.. Monu lo luh chuan kan ding a, chu tih lai tak chuan Jca chu ka kheuh zeuh a, a kutah cheng hnih thir ka pe a..

“Inralna..” tiin ka phun sep a

“Enga??”

“Dam lai lusun..”

“Hmeli.. ka hnek dawn che..”

“Haha..” a mize hlui kha a rawn lang tan leh tawh dawn alang hle mai.. Monu leh mopa chu kan va chibai a, Jca chuan ka cheng hnih thir pek chu a han pe a

“Nangmah vang a min pek..” tiin min lo melh zeuh a

“Hei.. tah chuan in mizia ve ve kha thup hram hram ru aw..” Puipuii chuan a rawn ti a, ka lo nui vak vak.

.

“An nalh ti raw..” ka ti a

“Tiang sawn kan la ding dun dawn alawm..” tiin min rawn nuih zeuh a

“A la rei dawn ee..”

“Ka tan chuan a rei a awm tawh lo, kha chen ka tuar tawh..”

“Ka tuar lo bik  ami??” lungawi loh hmel fe chuan ka han ti a

“Sawi ve mai la..” a rawn ti a

“Keini chuan ngawi rengin kan tuar mai a..”

“Ngawi mai teh ka fawp chawrh palh ang che”

“Kha ti la” tih pahin ka hmui ka va ti zum. Ani chuan min rawn fawp zeuh tak tak.., ka hawi kual nghal vat kan bula hmeichhe naupang awm ho chuan zak takin min lo nuih har har.. keipawh chu ka nui ve ringawt a.

.

“Keini pawh hi inneih ve  angai a ni..” Puipuii te inneih thlalak kan en lai chuan Jca chuan a rawn ti chhuak a

“Haha.. engtik chhung nge kan inngaihzawn tawh??” ka ti a

“Kar thum..”

“Kar thum lek inngaizawng innei I hre nghal a mi??” ka ti a

“Vai ho pawh vawi khat chiah inhmu ten an innei lawm le..”

“Vai kan nih loh hi..”

“Vai pawh I date thin kha..”  a rawn ti a

“I hmelchhia.. sawi tawh suh” ka tia ka chum pawp chuan ka ban a chelh a min rawn fawp vawng vawng a, ka lo dawh hle hle a.

“Ka awm bo chhung a I lerh vaih chuan aw.. kum khat chiah a ngai tawh..” a ti a

“Kum khat hnu ah.. Engineer  tur tla chhia hi I lo ni mai nga..”

“Ti khan min ti ziah suh.. mi tawngkam hian ka hmalam hun a khawih pawi thei teh mai nia..”

“Haha.. mi ka ni mi..”

“Ka bialnu..”

“Heh..”

.

A chhuk dawn zan chuan ka room verandah lamah kan thu dun a, min kuah nghet hle a..

“Lerh suh aw..”  arawn ti chhuak leh thin

“Kum li ngaihzawng ka neih loh hnu a ka neih lehna chiah a nih hi, ka ler I ring a mi??”

“Nih chuan zanin chu hriatreng tlak a awm ka chak a rawn ti a..”

“Kan thianghlim tawh lo ve ve a mahse kan pahnih lakah chuan inzahna lantir I la..”

“Ka sawi mai mai a nih kha.. ka tum hleinem duat..” a rawn ti a

“Ka ngaisang che..” tiin ka fawp zeuh a, ani chuan uar zetin a rawn che chhunzawmnghal a, mahse a chet thui hma chuan a inla hrang vat a choka lamah thingpui in turin kan phei ta a.

.

A chhuk hnu chuan a hman chang changing kan inbe deuh reng a, keipawh ni rei lo te ah University ka rap ve tan dawn a ni a, ka phur hle mai. Kum khat a liam meuh chuan ka hmangaih ber Jacob chu rawn haw in ka bulah ngei a awm thei tawh dawn tih ka hriatchhuah chang apiang hian ka thil tihah ka phur zual sauh thin. Mihring hi hlimna hmu tur hian midang ngaih a famkim a lo ngaih loh zia ka zir chho telh telh a, famkim lo tak pahnih hian hlimna famkim kan inpek tawn chhung chu kei hi ka lungawi tawk a ni.

 Ka nunhlui hria chuan hetiang ang dinhmun a ka din theih hi tuman an ring ngai lo mahse hmalam hun siam tur hian nunhlui hian tangkaina a nei loa.. tun hun erawh hmalam hun siam tu  ani thung a , chutih rualin tun hun liam tur hi hriatrengna hlimawm ermaw inchhirna siamtu a ni thung, Inchhirna avang a tlu chhe loa a dinhmun tawn a zir a hmalam pan te hi mi puitling dik tak zawk chu an ni.

>>>>>>>THE END<<<<<<<<<<<