LOVE WITH NO SIGHT

 

Tlan hmasa ber nih vang a in chhuang rilru takin ka phit phei fua a, kawng kual a ka tlan lai tak chuan  bike dangin min leh pel hnai tih ka hriat chuan  intithei rilru takin ka sir lam min hnaih tak a tlan ka thianpa chu ka va melh zeuh a ka speed ka tih san belh nghal a.. ka hma lawk a hnai tak a Truck rawn tlan chu ka hmu thut, ka speed a san em avangin ka in rin hma chuan chu Truck chu ka va su ri ta bur, chu chu ka thil hriat tawp a lo ni ta.

.

Ka harh ruai ruai a, ka accident lai vel chu ka ngaihtuah let a ka la dam tih hrilh hranpa ka ngai lo mahse ka sil viau a ka ke chu chet theih loin a awm tih pawh ka hrethiam mai a. Ka nu aw ang tak ka hria a.. koh mai ka tum a mahse a thusawi laklawh lai chuan min ngawih tir ta thung a..

“Hetiang hian lu sawh vangin a awm theih dawn em ni Bawiha pa..” a in hnit fuih fuih bawk a

“Engah nge I tah reng duh a.. doctor te chuan hun enge maw hnu ah an zai mai dawn alawm.. a ke ruh tliak te hi a dam anga, tha takin kan inenkawl  a ngai alawm..” ka pa in dam thlup a a sawi ka hriat chuan ka lu ka han khawih dawn a, mahse ka kut chu a sil em avangin ka kan tha thei lo a.

“Mahse, doctor ten an zai ngam lo chu a nih hi.. a lo harh hunah enge kan sawi ang”

.

“Enge an thil sawi hi awmzia ..” tiin ka in ngaihtuah a. Thil ka ngaihtuah chhuak thut.. Tunah hian ka mit ka chhing reng reng lo, mahse engmah ka hmu thei lo.. mumang anih hi tiin ka in hrilh mahse ka harh tih chu ka chiang si.. ka mit  ka khap a, ka khap nawn leh thin.. ka thil hmuh chhun chu thim mup bak a ni lo.. Enge ka chungah hian thleng..

“AIH… NILO..” tiin ka tawngchhuak phut

.

“Bawiha..” tiin ka banah min chelhtu an awm, min chelhtu lam chu thei leh thei loin ka hawi a, engmah ka hmu lo.. a thim mup!

“Nu.. nangmah ti raw.. Nu ngatinge engmah ka hmuh theih loh!!”

“Bawiha.. a tha vat dawn..” tap pah ti tih chuan a sawi a

“Bawiha che vak suh, I ke hi tuamkhawng mek a nih hi aw..” ka pa chuan ka dar a chelh pah chuan a rawn ti a, a kut chu rang takin ka lo man a..

“Pa ka mit hi ngatinge??..”

“Bawiha.. I accident na ah khan I lu I sawh a, chu chuan I khaw hmuh theihna thazam a ti chhia a ni mahse Doctor ten an zai ngam velah che an zai dawn che lawm..

.

.

Ka rawlthar hun zawng zawng te kha ka duh danin ka chen a, mahse duhtawk chin emaw nin chang ka nei ngai lo. Khawvel nuam ti ber hi thlan chhuah ni ta se, ka tlin lohna chhan tur ka hre lo tih theih hial khawpin ka chen ve a ni. Kum 23 na ka hmang chho mek a, bike race leh games khelh nuam ka ti em em bawk.. Zu hi tui ka ti loa, ruih hi nuam ka ti hran lo mahse rual pawl na tawk chu ka in thei ve tho. Ka lerh vang  em em pawh ni lo in bialnu hlui sawi tur ka ngah hle a, a chhan ni ta ber chu hmeichhia hi ka hne hma hle a ni. Tin, ka hmeichhe kawp ho hi fel ngawih ngawih tih a sawi tur an awm ngai lem lo.. mi hausa fanu duat sual, chhe lo in ti ve tawk mipa be hmasa hreh lem lo ho an ni tlangpui. Ni e, kei hian tu hmeichhia mah hi inngaizawng turin ka la be hmasa lo tlat a ni, kei chuan an zah theih loh lam ka en loa an zei a, an chhiat loh a keimah ang a mi tunlai an nih chuan ka bialnu an ni thei a ni mai.

.

Vawi leh khatah ka nun chu a in thlak dawrh a, tlangval chhelo leh mahni inringtawk tak ni thin kha mitdel ka ni ta mai si a. Khawvel hian eng anchhia nge min lawh tak hi le, ka hlimpui thin ka thiante min lainatna tawngkam te, ka chhungte min hnemna te chuan ka rilru natna hi za a pakhat pawn a hnem eih lo. Ka na a, ka hrethiam lo.. ka khawvel, ka hmalam hun, ka suangtuahna zawng zawng lak bo in a awm tawp a maw?? Chu pawh hriat lawkna tel miah loin.. Ka lehkha zir te, BCA degree ka neih ve te chu vawi leh khat a awmze nei lo an chang ta si

.

“Bawiha inhnuai lamah hian I room tur siam mai ta I la a pawi lo ang chu ti raw..” tiin ka nu chuan in kan thlen velah chuan a ti a

“Ngai lo, ka room ngai ah ka awm dawn..”

“Step kal I harsat dawn a sin bawiha, I ke kha rah that ngam pawh a la nih loh kha..” ka nu chuan a ti leh a

“Ka duh lo ka tih chu..”

“Anih chuan lo kal rawh.. ka kai chho ang che..” tiin ka nu chuan ka room chu min pan pui a, in dap chawp leh ke bai chungin ka kal ve tang tang a, thlan tlak hluam nan chuan a va ho si em!

.

“Nu.. keimah a awm lawk ka duh, min kalsan rawh..”

Ka nu a kal tih ka chian hnu chuan thei leh thei loin kawngka ka va kalh a, ka thu hnawk.. ka a mai dawn in ka hria a ni. Engvang mah a mittui tih tlak tum ngai lo kha mittui sur zawih zawih in ka tap a, au chiam chiam mai te chu ka duh a mahse ka chhungte ka tih thlaphan ka hlauh avangin ka insum hram hram a.

.

Ka khawvel thimna a khat ah chuan hun ka hmang chho a, pawn lam nawmchenna thlakhlelh vang a nu leh pa bula awm ngai  mang lo kha ka nu leh pa puihna tel lo chuan engmah ka ti thei ta lo. Ka pa chuan keimah vangin kan chhungkaw sumdawnna Bakery Industry kan neih pawh chu a ngaihsak tha hman lo tih ka hria a, mahse kum sawmhnih chuang hmingthatna kan neih tawhna chuan ka rilru chu a ti dam ve deuh. Ka khawhar  hnemtu ber chu hla ngaihthlak a ni mai a, mahse chung ang pawh chuan ka nunhlui min hriat chhuah tirin mipa hi mipa angin ka awm hlei thei thin lo. Ka nunhlui chu ngai viau mahila ka thiante bul a awm erawh nuam ka ti chuang lo a ni.

.

“Bawiha hei bawkbawn bai aw.. thenawm ten min rawn suah ve a..” tiin ka nu in ka kut chu la in bowl chu min deh tir a

“Ka nu Zuali te maw..”

“Aih nilo e, nimin piah a rawn awm thar te kha.. saw doctor quarter ah sawn an awm..”

“A nih chu..”

“Mama.. vawiin chu tei chhuak ve la, I thianpa Ruata’n a rawn hruai che nga gym ah va kal rawh u..” ka pa in a rawn ti a

“Ka peih lo..”

“Peih lo ti suh.. I room a tawm reng ringawt chu a ninawm ang..”

.

Ka thianpa Ruata ka zah em avang chuan carin gym ah kan va kal a..  ani chuan min vengin engkim min tihpui a mahse ka rilru lam a phur loh em avangin engah mah ka rilru ka pe thei lo. Ani chuan min hrethiam a niang chu, rei pawh kan awm lo.. min hruai haw ta zawk a. Ka roomah titi in thingpui te kan in duh a…

“Bawiha, hetiang a I hnual mai te chuan I mit a that hunah I inchhir ange… I fit lo hman dawn hle a nia..” Ruata’n a tih chuan za lo takin ka nui hak a

“Chutiang sawi suh ka lu a ti na…” ka lo ti a

“Tunah chuan rilru thar put tum rawh.. e, Jenny khan a lo bia che em??”

“Ngatan maw.. phone call ka chhang ngai lo..”

“Ka khawngaih e, khami hma zan a kan inhauh vang kha a ni lo ti raw te  a rawn ti..”

“Haha.. a va in hope sang ve ngal sei-I chu.. inah chuan a rawn kal fova mahse tumah ka hmuh duh loh thu ka hrilh tir thin a, tun hnaiah chuan alo la lang lo” ka lo ti a

“Hmanni pawn Mami’n I hmuh duh loh thu min hrilh a, hman leh hman loin kan kan ve a a tih che kha.. e khawi I inbox chhiar ang..” tiin ka ipte  rawn dap a

“Whatsapp ka pa ka paih tir daih alawm.. engmah hmuh tur a awm lo ang..” ka lo ti a

“SMS a awm alawm..”

“Tu in nge mitdel chhiar tur a SMS thawn duh ang??” ka ti a, mahse ka phone chu a la ta tho a

“Woooww..

Jenny-Rs, pawi ka ti lutuk.. keimah vang a hetia I awm hi.. ka hmangaih che..

I ex Siamsiami- Duat engkim I paltlang thei tih ka hria

Hei zet chu.. Rini- Rilru natna chu enge a an I hre tawh em??”

“Khawi teh chhiar tawh suh..” tiin ka va ban a, a kal sawn daih thawm chu ka hre zui a

“Ehe.. Bawiha khunu khu tunge??” ka room tukverh awmna lam atang a Ruata aw chuan a rawn ti a

“Tumaw..??” ka lo ti a

“In in opposite a  Doctor quarter  kawtah khuan a awm.. khu, a tawk reuh tiu teu ee!!”

“E, lo awm thar an nih khu.. nang te chuan hmeichhia zawng zawng tawk tiu teu itia lawm..” ka ti a

.

Ka nu in in pawn lam a pangpar ho an tih fai dawn avangin kan inkawt a thutthlengah chuan thu in hla ka ngaithla pah a, rei pawh ka awm lo ang tih hnu chuan ka zun a chhuah avangin ka tiang la in inchhung lam pan ka tum ta a.. ka ear phone ah chuan off in ka beng atangin ka phawi a, a wire chu chhui zelin mp3 player thuthleng a mi chu lak ka tum a, ka la dawn chiah maw tihah chuan ear phone vuah luhna chu ka hmet pit ta daih a, chhar tumin ka kun a, ka dap fuh thei mai lo..

“Nu.. nu.. I awm lo mi??”

“Kha le..” hmeichhe aw chuan a rawn ti a, a perfume rimtui tak chu ka hip kawkin ka hria

“ka lawm e.. ka lawm lutuk..” ka ti a

“Ruatsanga ti raw.. Nunui ka nia..” tiin ka kut chu a la a, ka lo chibai vat a. A kut lum ther ther nem tak chuan enge maw titakin min dek deuh zar..

“Min hria mi??” ka ti a

“Aw.. hria e.. in in kawt chiah a quarter ah hian kan awm..”

“E, lo awm thar te kha maw.. ka nu kha a awm hnai lo a mi.. toiletah ka va kal duh ve, ka zun a chhuak riau..” ka ti zawm zat a..

“Awm lo  anih hmel.. khawi ka lo hruai dawn che mi??” tiin ka ban a chelh vat, min kalpui ta a..

.

“Aw mama chu min lo koh tur che lawm, hei chem kawm ka va zawng lawk a..” ka nu chuan a lo ti a

“Ka ko che a I awm lo a.. Nunu ta tang chuan ka kal thei tawh ang, kan kal ange..” tiin keimahin ka in dap chawp phei ta a. Ka chhuah chuan ka nu leh Nunui te chu an lo la titi a..

“Awmpui I la ngai miah lo  ami??” Nutei chuan a ti a

“Lak ngai pawn ka hre thin loa, ti hian keimahin ka ti vek thei a.. Bawiha kha tan thu rawh..” tiin ka nu chuan min lo kai vat a

“Ruatsanga chu I khua a har thei ngawt ang a..” Nutei’n a rawn tih chuan ka lo nui suk a

“Har thin khawp mai.. nang enge I tih thin a??” ka lo ti vat a

“Tih tur em em ka nei lo kei pawh.. tlai ah hian ka pa clinic ah ka pui a, chhun lamah chuan a tul tul ka ti mai..”

“Anih chuan lo leng thin la ti raw..” ka lo ti a

“Nia a tih chi ngawt ang..”

“Parte khawnge I zir kha??” ka nu chuan a lo a

“Bangalore ah.. thla hnih hnu ah ka chhuk leh ang keipawh..”

.

Ka room kawngka kik ri ka hriat chuan ka lo chhawn vat a..

“Ruatsang.. keimah Nunui, enteh hei hi khawih chhin teh” tiin enge maw hi ka kut la hi min khawih tir a,

“Enge hei hi..”

“Lehkhabu pan te, mahse khaw hmu theilo in an chhiar ve theih tur ania.. khawih la a in ziak pawng kha I hre thei em??

“Mitdel hawrawp ka thiam hleinem” ka lo ti vat a

“Aih.. hawrawp pangngai a nih hi..”

“Khawi atang a I neih nge??”

“Ka pa thianpa clinic a ka hmuh a nia, hawh ka dil a..” tiin min chhang a

Chhiar tumin ka dap a.. “K…a…h…m..u…t…h..e…i…t…I”

“Aw.. aw.. I chhiar thiam..” tiin Nutei chu a nui har har a

“Naa.. a hahthlak ka peih tawh lo..” tiin ka dah hmak a..

“Ka tihpalh, I duhzawng a nih takin ka tia..”

“A pawi lo..” tih chiahin ka chhang a. Diktak chuan ka phurpui lem lo  ani, ka hmuh theih lai zawng pawh khan ka zirlaibu hi ka zir tawp a, a piah lam hi chhiar en ah ka en ngai lo.

“Anih ka chhiar sak ang che aw..”.. ka chhang thei mai lo, hmeichhe dang ka lo ngaihzawnthin te kha chu nise tunah hian ka room atang hian he nu hi kanawr chhuak ngei ang, mahse keimah ah hian engtin maw tak a thawk a, tu lehkha chhiar sak mah hi ka duh lo.. mahse tunah tak hi chuan hnial lam ka pawh thei tlat lo.

“I intibuai mai mai..” ka ti sep a

“Nangman a ni lawm ni leng tur a min sawm kha..” a rawn ti. A mi biak dan vel chu ka duh reuh tlat

“Anih chhiar la..”

“Lo nghak lawk.. kan inah ka va la ang..” a tlan ri chuan a zui nghal bawk a.

.

A hmel leh pian engmah la hmu lo mahila he nu hi hmeichhe hlim thei tak a ni tih ka hria a ni. Mahse ka hmeichhe dang hriat ho nen chuan inan na pakhatmah an nei lo thung.. thil ho tete pawh a nuih chiam chiam thin a, a lehkhabu chhiar ka han ngaihthlak sak a.. tlem a lungngchhiatthlak a awm in a chhiartu zawk chu ka thlem a ngai fo va.. “eng thil atthlak nge ka tih hi le??” tih ka in ngaihtuah a, ka nui leh tawp thin. Thla  khat chu kan inkawm  tling ve der tawh a, a awm lai hian bengchheng thin hle mah se min haw san chiah hi chuan ka khua hi a har ngawih ngawih thin. Zing chaw ei kham atangin kan inkawm chho a, chhunah lehkhabu kan chhiar loh chuan movie min en pui a, keichuan movie a ri lo chhuak leh a ma thusawi chu ka ngaithla a.. en ang mai ka ni thin. A hmasa ber a a tih thin chu a changtu te ruangam a sawi fiah phawt thin..

“Aw khi khi a changtupa ber tur a nih khi..” a han ti a

“A pa em??” ka lo ti vat a

“Aw a chhe lo lutuk..”

“Tu ang vel..??” ka ti a, min chhan dan tur ka hre lawk reng mahse a sawi apiang hian ka hlim tlat zel

“Nangmah ang vel.. mahse a tluk lo lek lek che nih hi..”

“Nih a changtunu ve..”

“Lawkk tu ber nge ka la hre lo..” a han ti a.. “Ehe.. a changtunu khi Mary Mount.. a nih khi, I hre ngai em.. awi a chhe lo tawp..” a tih zawm zat a

“Aw hria e..”

“Ahaha.. dawt I sawi peih e, Mary Mount tih hollywood ah an awm lo, ka sawi chu school hming alawm..” a nui uar uar a

“I van sual ee..” tiin a awmna lamah ka kut ka lek phei a, a biang ni ngei a ka hriat chu ka piai hrep a..

“Hei.. hei.. kha kha ka biang nilo ka ban bul nih kha..”

“Maw..”

“Haha.. tak tak chuan ka biang nih kha.. a na zek..” a nui ker ker ri chu ka lawm takzet

“Tiang hian I nawi reng zel a mi a??”

“Keimah maw..”

“Aww.. nangmah nen bak kan awm a mi??” ka han ti a

“Teuh lo, ka mi nel loh te bulah ka tawng vak ngai lo.. bakah lo awm thar kan nia.. thian ka nei ve a, nuam ka ti ve nih hi..”

.

Tlai khat chu Nunui’n an in a chaw ei a min sawm tlat avangin ka va ei phei a, Nunui te unau hi pathum an ni a, amah chiah hi hmeichhia a ni a.. an upa ber chuan nupui nei tawhin in hrang a chang tawh a, an milai hi Medical College ah a kal mek thung a, amah Nunui pawh hi nikum atangin College a kal ve tan a.. a hma chuan Lunglei ah an awm thin a, hmanni lawk a a pa an sawn vangin an rawn awm phei ta, Nunui lo haw lai nen a lo in nang chiah bawk a ni. Ka chaw ei chu Nunui chuan min buaipui vek a, min hrai lo choh a nuam lo ka ti lek lek zawk. A nu leh pate chu an felin min fuih nasa em em a, zai dam leh na chance a awm avangin beidawng lo tur ten min hrilh mawlh mawlh a.

“Kan in chu a nuam lo I ti bik em.. in in angin a lian loaa” Nunui chuan a ti a

“A ho ee, hmuh pawh ka hmuh theih loh hi

“Tikhan ti ve ziah suh..” a ti deuh hmuk a

.

Kawngka kik ri chu Nunui chuan a chhawn vat a..

“Lo lut rawh..”

“E Rs.. he tah I lo awm daih a..” Ruat aw a ni tih ka hre nghal a

“Ruatsanga thianpa maw I ni..” Nunui chuan a ti a

“Aw, Ruata ka nia..” an in chibai ni ngei tur a ni. Ruata lo kal chu ka lungawi lo riau, a hma a Nunui a hmuh a a thusawi vel kha ka ngaihtuah chhuak a.. Nunui hi a hnaih  ka hlau ru tlat, ani zei zia leh lerh zia hrechiang ber tu ka ni si a.

“Kan phei dawn mi Ruat..” tiin ka tho kang a

“Hei, Ruatsang.. a nu ten inkhawm chhung min awmpui turin an tih che kha..” Nunui chuan a rawn ti pang pang a

“Kan awmpui dawn che nia Nunu..” Ruata’n a rawn tih chuan ka lo sa deuh pup

“A tha e.. thingpui kan lum ang che u nge..”

“Hei Bawiha.. enge khanu nen khan in inhria tih I sawi loh??” a rawn ti a, hnek deuh chawrh ka chak ngei mai..

“Bengchheng suh.. I duh zawng a ni lo,tibuai miah suh..” ka lo ti a

“Enge  anih lohna tur.. a chhelo a, a tawk mai lawm..”

“Tibuai lo la nimai..”

.

“Tu  te maw intibuai..??” Nunui chuan kan awmna lam a rawn kal pahin a rawn ti a

“Tumah nilo e.. mipa titi mai mai..” Ruata chuan a rawn ti a. Ka bulah chuan Nunui a rawn thu a, ka kut la in thingpui no chu min ken tir a.. nuam ka tih zia chuh!! Ka thianpa hmeichhe rawpa chuan min lo thlir ngei awm sia..

“Ala sa deuh..” kan ti deuh kher a

“Anih chuan khawi..” tiin ka kut atang chuan thingpui no chu a la ta a

“Nunu.. I va duat deuh ve a..” Ruata chuan arawn ti a

“Ka naute a ni ringawt lawm.. ka chhuk hunah engtinge  a awm ang aww..” tiin Nunui chu a nui har har a

“Chhuk lo mai la..” ka lo ti a

“Chhuk a ngai sia lawm.. mahse keipawn nuam ka ti lo.. ka chhuk peih loee..” tiin ka darah a lu arawn nghat a, ka mur deuh chuai. Ruatan min hmu reng tih ka hriat avang erawh chuan pangngai tak a awm ka tum tang tang a… “I thingpui in tawh rawh..” a rawn tih chuan ka phu zawk a.

Ka tum lawk em em pawh ni lo chuan Nunui chu lang takin ka care vel ta em em a, kan pahnih chiah a kan hriat Ruata hriat ve loh te chu ka sawi chhuak deuh kher zel.. a nuam dangdai riau.

.

 Zanah chuan ka mut hmunah engvang a khati vak a awm kha nge ka nih le tiin ka inngaihtuah a, mak ka in ti hial zawk. Ka nun kal tawh lamah ve thung kha chuan ka biaklai pawh nise ka thianten an duh chuan biak tir duh mai chi ka ni a. Ni e, ka khawhar hnemtu ber a ni a, ka lo hauh deuh pawh a ni mai thei  ani.  Mahse, han hauh vak pawh ni I la, tun thla tawpah a lehkha zirna hmunah a kal leh mai dawn si a, a ngai te bawk a khawhar leh tur chu ka ni lawm.

.

Ka peih lo chung ka thiante pathum Ruata, Davida leh Msa te chuan min chhuahpui a, Gym ah kalin kan va insawizawi a.. khang thla thum chhung khan  Exercise la lo mahila ka rihna a pung em em lo, thil ka ei thei loa Depression ka nei nasa em em bawk a mahse ka fit loh zia chu chiang takin ka hria a ni. Ka thiante chuan min fiam nan tak ka dulsek bo tan chu an hmang a, an hmuh lai chuan ka nui ve bawk a mahse anmahni ang ka ni ve thei lo tih min hriatchhuah tir zawk a ni.

.

Kan in thleng min thlah hnu chuan ka room lamah ka chho a.. Ka thu fel awrh tihah chuan thawmna-I a lo lang nghal

“Ngatinge I chhuak dawn tih min hrilh loh aa??” a rawn ti a, a inhnit deuh fuihin ka hria

“Ngatinge.. I tap elaw..??”

“Aiiihhh.. tap lo..” a sawi zawh hma hma chuan a tap leh a

“Lo thu teh ka bulah.. enge thleng min lo hrilh la..” ka ti a, ka bulah chuan a rawn thu vat a

“Vawiin ah nupui a nei..” a rawn ti sep a..

“Maw.. tu in?? I bialpa maw..??”

“Bialpa ka neih loh hii..”

“Bialpa hlui.. pasal hlui zawk maw..??” ka ti leh hram

“Kum 21 chiah ka nih hi.. pasal nei rual ka ni mi..”

“Min hrilh mai ta chee..”

“Ka high school crush.. ka mipa duh hmasa ber..” a rawn ti a

“A hre lo mi.. I duh tih hrilh ta che..”

“Tinge a hriat ang.. keipawh min hre lo nia..”

“Engaa!!??”

Ka nui hak.. hmeichhe ho thin hi chu aww.. a crush mai maiin nupui a nei a a tap chu ni sia.. Thlem dan vak ka hre lo, ka tawng chhuah dawn apiangin ka nui zel bawk si. Ka ban chuan a darah ka va kuah a, a lu chu ka darah nghatin kan ngawi dun char char a, a chang a a in hnit faih ri bak hriat tur a awm lo.

.

“Rs…” tih rual a kawngka in hawng ri chuan min ti phu zawk a.. “He nu hi tunge..??”

A aw chu ka hriat hnu a ang hle mai..  mahse tu ber kha nge le.. Aww.. ka hrechhuak, Lalpa leh!! Helai thleng thleng a min umzui chu ka ring lo a sin..

“Kawngka kik tache..” ka ti ringawt a

“Ka bul hnai setah a rawn kal a, kaa biang a rawn khawih a.. ka bula thu reng Nunui thawh tum thawm ka hriat velah ka pawt thu a..

“Ngatinge ka call I chhan duh loh??” tap aw tiau chuan a ti a

“Jenny.. ka tha lawm.. min ngaihtuah suh va haw rawh..”

“Aih.. ka tihpalh alawm.. keimah vangin I rilru a buai a, I accident phah ani lawm ni..”

He nu hi engtia tih chi nge le.. amah vang emaw a ti tlat

“Nangmah vang a ni lo..” ka ti leh a

“Ka haw mai ang aw Ruatsang..” tiin Nunui chu a tho a,

“Ngai lo” tiin a banah ka chelh ding a..

“Tunge hei hi.. in awmpuinu mi??”

“Jenny hei hi ka bialnu thar Nunui a nih hi.. chuan Nunu hei hi ka bialnu hlui Jenny..”

“MAW!!” an rawn ti rual chiah..

“Jenny lo va haw mai rawh.. ka nuam sam lo em mai..” ka ti a

“I mak lutuk Lalruatsang…” tiin a chhuak a, kawngka chu a khar ri bur a!

.

“Tinge I bialnu anga min saw..”

“Ka tihpalh.. duhthlan tur danga  awm lo anih kha..” ka ti a

“Awmpuinu mi min la ti zui..” a ti nuah nuah a

“Heh.. Jenny pa hlawh kha I pa hlawh aiin a hniam zawk.. a inla changkang ve mai mai nih kha..” ka ti a

.

Nunui chhuk hun a hnai telh telh a ka thlahlel telh telh, ani tello a nitin hun ka hmang tur ka ngaihtuah ringaw pawh hian hreawm ka ti. Amah vang tak meuh meuh hian ka thian ni thin te pawh ka ngaipawimawh lo fova.. a mizia leh ka thiante mizia a inan loh em avang hian amah Nunui hian inkawm ho hreawm a tih ka hlauh vang hian ka thiante pawh be tam loin Nunui hi ka kawm deuh chawt a, ka ngaina a, ka nun a tih hlim dan hi ka thinlung tak tak a hlimin min siam thin a ni.

.

A Novel pawh a min chhiar sak tawh “The Longest Ride” movie kan en dun a, an awmdan vel chu min hrilh zel a…

“Lukea’n Sophia. sakawr chung chuan a zirtir mekk.. Luke khi a mitmeng a nalh.. chuan in a inah an kal a.. bathroom ah a pawt lut..hahaaaiii.. an in phelh mek.. I en ve chak em??” nui har har  pah chuan a rawn ti a

“Chak lo.. khitiang te mai mai.. mipa tan a ho lutuk..”

“Luke khumah Sophia a mu mai mai a, chuan Luke a lo chhuak .. Aaaa!!!!”

“Enge??”

“Luke khian a towel a phelh a, a mawng a lang..hahaaaa..” a rawn ti a

“I thil lawm hi a van ho thei tak..”

“An mu mai mai an pahnihin.. ui nawm hmel e..”

“Enge an tih??” ka han ti a

“Engmah.. an kut an in suih ringawt.. chuan an tawng khi.. an titi nih khi..”

“Chutia I chak ve viau chuan  chuan ka khumah sawn va mu ve ila..” ka han tih chuan a nui vak vak a

“Luke khi lawm ka mutpui chak..”

“Tribal I nih chhung chuan I mutpui lo ang..” tiin ka lo nuihsawh vak vak a..

.

Ni thum chiah Nunui chhuk hma in a awm tawh, zingkar boruak in min tih harh apiangin chu thil chu ka hrechhuak fo, engtin nge a tello in ka awm ang le.. ka mit chu tha in thil hmu ve thei ila chuan ani hi ka be zui zel thei awm si a, tun a ka mittui tla hi ka vanduaina vang nge Nunui kal tur ka huphurh vang zawk pawh ka hrethiam lo..

“Bawiha.. chaw ei ang..” ka nu chuan ka room kik pahin alo ti a

“Nu.. ka ei peih lo, kinah ka ei mai ang..”

“I tha maw Bawiha..”

“Aw ka tha lawm nu..”

Ka tha lo, ka tha lo takzet.. a hreawm ka ti, Nunui vang hian ngatinge hetia ka awm le.. ka duh tih na chu a ni ngei a, mahse ngatinge ka duh?? Hmeltha, pian nalh , zei leh mahni inringtawk hmeichhia hi ka hmeichhe kawp thin an ni a mahse chung ang chu Nunui ah hian ka hmu ve ngai loa.. a ni ngei em tih pawh ka hre lo..

.

“Hei.. tho rawh.. tho rawh..”

“Naa.. engee..??” tiin peihlo takin ka thu a

“Hei hi en rawh.. hmet teh..” tiin phone ni ngei a ka rin chu min hmeh tir a.. “One..” tih ri a lo chhuak a.. a dang min hmeh tir zel a..

“Speed dial one hi.. keimah.. min biak duh apiangin rei deuh I hmet anga a lo in call mai ang..” a ti a, a in call chhin vel a.. “I nu leh pate dah tel i duh em?? Kan siam ange aw..” a tawng chhunzawm char char a, kei chu ka ngawi reng thung, alamah ka kut chu ka lek a ka dap a nghet thei ang berin ka kuah ta tlat a.. engkim chu a reh tlawk tlawk a

“Ih.. Ruatsang..” a rawn ti zawi sep a

“Che suh, reilote chiah ti hian awm ang..”

“Ngatinge hetia I awm??”

“Kal suh..” tiin ka han tawng leh a

“Kal loh theih se ka ti.. mahse a ngai si alawm.. kan inbe reng anga chuan ka lo haw leh dawn alawm..”

“Ka ngai dawn che..”

“Kei deuhin.. min lo call ang ti raw..” a ti a

“Umm.. nangpawn min lo call la..”

“Aih.. call I chhan ngai loh kha.. chuan chhang lo zel rawh..” a tih chuan min ti nui suk a

“Ngatinge.. midang ka biak I hlau mi??” ka ti a

“Aw.. ka thik” a rawn tih chuan, a hmui ka khawih a.. ka kut chu ani chuan rawn la thla in  ka hmuiah min rawn fawp zeuh a, chutiang mai mai ah ka lungawi lo.. a hmui ah chuan uar thei ang berin ka va fawp ta a.

.

Ni hnih chhung chu a hma anga thian inkawm ang khan kan awm lo a mahse kan awm dun reng tho, a changin  kan in kuah ngawih ngawih a… a chang in kan in fawp bawk a. A bengchheng tawh loa mahse min thlakhlelh zia erawh ka thinlungin a hria a ni. Ka tan a a rinawm reng tur thu min tiam chuan min ti hlim viau mah se hlauhthawnna a awm lo thei lo, keichuan tih theih ka nei lo ka ngaih chang a call tawp mai loh chu, a thinlung hi ka lak ata ruk a nih loh nan mipa dangin an hmangaihte an venghim ang hian venhim nan tih theih ka nei lo.. ka mitdel hnu pawh a tawngtai duh hauh lo khan ka Nunui hi ka lak ata lak hran anih loh nan ka tawngtai hial a.

.

Hun a liam ve zel a mahse Nunui ka thlakhlelhna chuan a liam pui ve lo.. nitinin a hunawl neih hunah ka call cham chi a, min nig  hial ta ve ang.. mahse ka ngai thin em a ni. Ani chuan ka damdawi ei huna ei tur ten, chaw ei hun dik tak a ei tur te in min hrilh thin a, ka zawm ve viau chuan ka hria. Kan inbiak a kan sawi tam ber chu kan pahnih a kan awmdun hunlai te kha a ni a.. ani pawn min thlahlel ve takzet tih chu hai rual a ni lo.

“Tinge hmanah khan kan lo inhriat loh le…??” ka tih chuan a nui hak a

“Inhria pawh ni ila tiang hi kan ni kher lo ang..” a rawn ti a

“Engvangin maw..??”

“I hre lo mi duat.. kan dinhmun chu kan thil tawn a zir zel alawm..” a rawn ti a. Ni e, kei hi ka mit del loin Nunui puihna hi mamawh lo ila ani hi ka thian atan a ka duh pawh ka ring lo. Doctor fanu niin a nun chu duh se midang ang a changkang leh sang takah a hmang thei mahse chu chu a duh ngai lo, engkim a simple tak a nun chu a thil duh ber a ni a.. a nung mek bawk a ni. Changkanna hi neihah leh kan inbel a nih loh zia amah atang hian ka inzir chhuak a ni.  Ka thiante chuan min fiam nan te hmangin ka hmuh theih loh hnu a nula sang ka biak ngam tawh loh thu te chu an sawi a mahse an hre lo a ni, thil ho te te a hlimpuiin a tahpui a.. a nelawm hle a, a hmel hmuh theih ka chak rual rualin a bula awm tluk a chak dang ka nei lo.

.

Thla thum chuang chu kan hmang ral ve leh ta a, ka pa te chuan inentir tur a phai lama kal mai te chu tha in an hria a, mahse kei chuan tulin ka hre vak lo a ni a chhan chu ka mit that lehna chance hi 30% bak a awm lo tih Doctor in a sawi miau si a, chu pawh in zai a nih chiahin ala ni zui. Mahse, lehlam zawng takin ka ngaihtuah a, ka mit hi tha ta se Nunui ka hmu thei anga.. ka hmangaihna pawh ka lan tir thei dawn a, chu chu ka suangtuahna a ni.

.

Hun enge maw ti lai atang chuan Nunui chu call chhan loh a hrat ta zeuh zeuh a, a chhan ka zawh lahin a buai thu mai a sawi thin a, ka lung chu a awi vak loa mahse thlaleh lama a lo haw dawn avang chuan ka inbengdai rih hram hram a. Tlai khat chu a pa thiante doctor tho in a chaw a ei tur thu min rawn hrilh a keichuan ka lo aw ve mai a.. mahse chumi a ei zan.. zan rei thleng a ka call chuan eng chhanna mah ka dawng lo. Ka nu hnen a a chhungte min va zawh sak tur a tih mai chu ka duh a mahse kan inkar hi hre awmin an awm bawk si lo.. ka zam takzet.  A tukah chuan aman min rawn call a, a phone battery a low thu min hrilh a, kei chuan ka lungawi loh em avangin ka be tha duh lo.. ka thinrim lam erawh engmah ka sawi lang lo thung.

.

 Vawi khat chu ka call a chhan loh nilen leh avangin ka rilru a buai hle a, ka thinrim tel bawk nen tumah pawh ka be thei lo. Chutia in seh  ruh teuh a ka awm lai chuan ka nu in doctor inleng ka neih thu a sawi a thutkhawmna pindan lam ka pan ta a..

“I chanchin hi Nunui te pafa hnen atangin kan lo hria a.. ka fapa hi doctor a nihna hi kum hnih em pawh a la ni lo nangin hetiang ang zai hi Foreign atangin a zir chhuak a..” ka inlengpa in a tih chuan beiseina sang tak min pe a

“I fapa chu he tah a awm em??” ka ti a

“Aw.. awm .. Dr.Fela a ni e..” tiin min chhang a

“Inzaina chu ka ti thei anga mahse Mizoram ah chuan kan ti thei lo ang.. Bangalore lam a ka thawhna damdawiin a kan tih angai ang..” tlangval la naupan hmel tak aw chuan a rawn ti a

“Bangalore maw..”  Nunui min hriatchhuah tir zawk a

“Um ni e, Nunui’n min ngen nasat em avangin nangmah hmu turin kan lo chho vang vang a nih hi..” a rawn ti leh a. He pa chanchin hi Nunui hian min hrilh ngai miah lo.. tunge maw a nih le..

.

An haw hnu chuan ka nu eirawngbawl na bulah ka awm a..

“Nunui chu a vannei ngawt  mai.. an chhungkua saw malsawm tlak in an fel em a ni..” a tih chu ka hrethiam chiah loa

“Engah chuan maw..”

“Aw.. tuna  Dr.Fela nen khan a graduate velah an innei dawn a lawm..”

Ka mit a del thu ka hriat ai pawh khan min deng na zawk.. ka thu hnawk..

“Nu..” ka ti thawp sap a

“Bawiha ngatinge..??” a rawn ti a, ka mittui chu ka dang zo hlawl lo..

“Ka tha, ka roomah ka chho dawn..” tiin ka kal pawp pawp, ka tiang chu ka nghat sual a ni ngei ang, a pial zawk a keipawh stepah chuan ka lum thla deuh ti tih a, ka chal chu ka sawh chwrh a, ka nu mangang chuan thenawm te a va ko a, ka lu hai em avang chuan ka mit ka chhing a, ka muhil nghai siai siai a.

.

Ka chal thip zawk zawk chuan min ti harh a.. ka harh rual rual chuan tu emaw rim ka hriat than tak, rimtui tak ka hre nghal a.. ka rilru chuan ‘amah a ni lo..’ ka ti a

“I tha em Ruatsang..??” chu aw chuan ka lungphu a ti rang ngei mai, thinurna leh nantna in min rawn tuam nghal a

“Hetah enge ilo tih dawn Zorinzual..”

“A tawpna atan rawn hmuh che ka tum a..” a aw ah chuan zamna pakhatmah a awm lo

“Ka lawm e, I chhuak thei tawh ang..”

“Pasal ka neih hma chuan kan la inbe reng thei alawm..” tiin ka kut a lo chelh a

“Tenawm nu chhuak rawh..  ka hma ah rawn inlan tawh suh..”

Ka tliak hnawp in ka hria.. nat namen loin ka na a ni. Saw nu saw hmangaih tlak loh a ni, chuan hmangaih tlak loh ka lo hmangaih a ni. Enge saw nu saw tluk chhiat pui nan a a that vak bikna??  Thian, ka tet tea tang leh ka nun zawng zawng min hriatpuitu ka nei alawm. Mahse, heng inhnemna hian  min ti chak reng thei angem?? Ka hre lo le..

.

In zai turin ka inbuatsaih chho a, ka hmangaih pasal hualin min zai dawn tih ka hriatchhuah chang apiangin thulh leh te ka duh rum rum.. mahse ka tan vek a ni tih ka hriatthiam a ngai..

“Bawiha inzai na ah chuan kan lo kal vek ang lungngai suh..”

“Nia kan lo kal dawn sa, chuan club ah te kan kal anga.. “

“Lo sawi phur vak su.. thil a kal tluan leh tluan loh tur a hriat loh..” ka lo ti vat a

“Kal tluang tur a ni..”

.

In zai la ngaih hun hma kar khat la awmah Bangalore kan pan ta a, khua a har duh khawp mai. Mahni in lamah chuan I chhungah ka la vei kual thei a mahse heath chuan hriat engmah ka nei silo.. Min zai dawn hma zan chuan ka nu in min hmu turin Nonoi a rawn kal tih min hrilh a, hmuh chu ka duh hlawl lo.. mahse min rawn pan si avangin chak lem lo takin ka bula lo kal tur chuan ka hrilh tir ta a..

“Ka thusawi kha I hrethiam emaw ka tia..” ka ti a

“Nia.. ka tihpalh mahse duhsakna rawn hlan tur che in ka lo kal a”

“I tap elaw..?”

“Aih tap lo.. ngatinge ka tah ang??” a nui lui har har a

“Kum khat dawn chu I tap te, I nui te ka hre ve tawh alawm..”

“Tunah chuan maw ka nui..” a rawn ti a

“Dawt sawi suh.. min ngai ti raw..”

“Maw.. aw diktak chuan..”

“Ngatinge hetia I awm..”

“Ih.. I tan vek a ni.. chuan engmah min zawt suh.. hmalam pan rawh aw, khawngaihtakin..” tiin min kalsan ta a

.

 Zankhua in ka mu lo, ka phone la in speed dial a 1-na chu ka call cham chi a mahse switch off a inti zel bawk si, Nunui hian buaina a tawk em ni tiin ka inngaihtuah, a chang leh min bumna mai mai a ni ang tih ten, ka rilru buai zia leh tih theih ka neih loh zia lah a inhen reng si a. Zaina room a min hruai luh leh hnimhlum ka ruih a, nikhua ka hriat loh thlengin ani khan ka rilru a luah a ni.

.

Chiang mang loin ka han meng a, eng nasa lutuk hian min chhun niin ka hria.. ni lo, he thil hi khaw eng a ni. Kum khat dawn thimah ka cheng a, ka tan chuan he thil hi a eng mah mah zawk a ni. Ka chhungte, ka thiante, doctor thlengin an hlim zia chu an hmelah ka hmu a ni… Dr.Fela tan pawh a enchhinna ka ni nachungin ka lawm takzet, kan pahnihin kan suangtuahna a hlawhtling a ni, mahse ka suangtuahna zawng zawng chu a dik thei ta lo a ni.

.

Ka mit in eng pangngai en thei tur a a fit hnu chuan ka nu chu ka phone ka dil nghal vat a, speed dial no.1 bawk chu ka dial leh a, mahse chhanna ngai bawk Switch off!!

“Ruatsang.. ka be lawk thei che ngem??”

“Oh.. doctor lo lut rawh..”

“Nunui biak I tum em ni??” a han ti a, chhan vak ngaihna ka hre lo.. mahse ka tlawm ngawih ngawih tih erawh ka hria.. “Kan tet te atangin kan inkawm chho a, aa a u nen kan inkawm zawk mah, a kawlhrawn em avang hian min zui thin a, a hnu chuan kei nen kan inkawm ngeih ta thung a. Ani hi ka duh thei em em a, chu pawh a hria.. mahse hre angin a awm lo. Vawikhat chu ka thil duh ber min zawt a, amah a nih thu ka hrilh chuan nangma chung chang hi  arawn sawi a….”

Huizz.. sawi tur ber pawh ka hre lo..

“Diktak chuan amah vang chohin India ah Mizoramah  hian ka rawn kal a, he hospital pawh hi ka pa thawhna mai a ni..  medical college, foreign a ka kal atang khan katheihnghilh emaw ka ti a mahse hmanni atang a min rawn biak leh atang khan …” a rawn ti leh a

“Chuan keimah vangin maw a lo biak che..”

“Aw..”

Mimawlnu ngatinge hetiang hi I tih.. ka duhthusam chu hmuh leh theih ni mahse I tel lo a nung chung a hmuh theih ka duh chuang miah lo asin..

“A hmel tal ka hmu thei angem??” ka ti a, ani chu a ngawi reng thung a.. a phone khawih pahin a chhuak ta a.

.

Ka mit chu a thip deuh avangin ka mit ka chhing a kar loah ka lo muhil a.. ka biang a chultu kut nem tak chu ka mumang ni ngei chuan ka hria a mahse a tak ang maiin ka taksa in a tem si.. ka meng riai riai a, ka hma a hmeichhe pakhat ngo ving veng, hmai bial.. mitmeng lian lam lek lek, hmui sen no hiam mai chu a lo ding a, a meng phawk ngang mai.. kal nghal a tum a mahse a ban ah ka chelh hman hram..

“I rim atang khan ka hriat loh che I ring  ami??” ka ti zawi sep a

“ Ka tihpalh Ruatsang..” a tap hlawp hlawp a..

“Lo kal rawh..” tiin ka pawt hnai a nghet takin ka kuah a

“Ka duhthusam chu I bula a awm alawm.. hmuh theih ai chuan chu chu..” ka ti a

“Mahse.. mitdel inih chhung chuan kan innei thei dawn lo a sin.. ka pa te sawn mitdel pasal a min neih tir I ring  ami??”

“I van aa tak.. kum 21 chiah ini a ngatinge pasal neih hlir I ngaihtuah aa.. mahse I nei tep tawh tho ti raw..” ka ti a

“Umm.. ka nei dawn..” tiin nghet takin min kuah leh a “Ka thutiam ka tih hlawhtlin angai a lawm..”

“Duat ka hmangaih che..” tiin ka kuah a, thil dang sawi tur ka hre hlawl lo  ani.

.

MCA zir zawm turin ka inbuatsaih a, kum khat teh meuh ina ka awm awl hnu ah Delhi lam panin ka thlawk thla ta vang vang a.. Nunui nen chuan kan inbe ngai loa mahse ka mit hi ka mit anih chhung chuan ka theihnghilh ngai lo ang. Hmana Ruatsanga khawvel mi tak kha a bo tawh a, zirna a insawrbing em em a lo ni tawh zawk ani. Chumi tan ti a zir chhan tur ka nei loa, mahse chumi vang chu tiin Nunui vang liau liau in ka zir nasa thung.. chu chu ka nu leh pa lawmah a tla a, chu chu ka zir chhan te chu an ni mai.

.

Kum khat ngawt ka University ka rap ve tawh a mahse ngaihzawng lam reng reng ka rilru ah a lang thei lo thung.. Nunui chuan pasal a neih tep tawh ka ring a ni, a nei tawh mai thei zawk.. a pasal han vanneih zia chu aw.. tiin ka ngaihtuah fo thin. Hmeichhia chu han be ve dawn mahila ka thei hlawl lo a ni e, thian atan thlengin hmeichhia hi ka hnaih thei lo zel.. Nunui nen ka tehkhin  tlat thin.

.

Ka mut a chhuah loh em avangin ka online a.. North East News chu ka chhiar ta a.. min ti phu zawk thei thil ka hmu .. A vawikhatna leh awm chhun ni turin mizo tlangval in Harvard Medical Center  ah Super Specialist zir turin Scholarship a hmu. A hmutu hming chu Dr.Lalnunfela S/O Dr.Rokhuma Fanai (Corporation  Hospial, Bangalore Sub-Director). Ani hian a nupui neih tur cancel in he hmunah hian a zir dawn a ni..

.

“Nu… ka thiannu hlui Nunui number kha min lo thawn vat teh..” tiin phone ah chuan ka au lang lang a

“Nimin ah I number ,in lo dil a, a rawn be lo che em ni??”

“Aih..”

“Aw.. message in ka rawn thawn ang che..”

Ka number a dil a nih chu.. ka number ka nu hnenah a dil.. a van nuam em.. ka call ta..

“Na.. ngatinge busy zel..”

Vawi nga ka try hnu ah tlang hram.. a pick up chiah tihah

“NGATINGE A BUSY CHAR CHAR..” kan sawi rual

“Maw…” a rawn ti

“Ka rawn call char char alawm..” ka ti a

“Keipawh..”

“Nge ka call lai a ilo call kher..??”

“Ninawm.. inhnial lo ang..” a ti a

“I tap em??” ka ti a

“Engvang..??”

“In inneihna an cancel sia…”

“Ka lam nasat zia I hre lo nih kha.. hlim vangin” a tih chuan ka nui deuh tut

“Ka awih hran loee.. engtik nge inneih in sawn??” ka ti a

“Posponed a ni loa cancel alawm mate.. ka nei dawn lo!!..”

“Keimah chiah min nei dawn ti raw..”

“Um.. mahse chas I nei lo mi??” a ti a

“Kan then anga nimai lawm I tan te chuan..”

“Nahh.. kum khat chhungin I nei leh hman a..??” a rawn ti nui nui a

“Ka tifiam nih kha”

“Ka tan ilo haw dawn ti raw..” a rawn ti a

“Aw.. MCA ka pass chhuah hunah..”

“Maw.. I rapthlak..” a rawn ti tuar a

“I pasal hual kha a bawn em kha..  amah ang chanve tal ka ni angai lawm..”

“Ka tan chuan I tha ber..”

.

Beisei loh lutuk a thil thleng hian min thawng reng mai a nih hi, mahse tun ang em em a hlim hi ka neih lohna a rei tawh lutuk. Tha takin ka zirlai ka zir chho a, vawikhat chiah ka la hmuh nula khan min fuih phur em a ni. Dr.Fela hnen atang mail ka dawng a, Nunui nen duhsakna min hlanna leh kei minzai vang choh a kha scholarship kha hmu a ni tih min hrilh chuan ka rilru a dam huai a.

.

Inngaizawng zawng zawngah kan hlim ber a tih hial awm kan ni, kan inhau ngai loa thu inhmuh loh chang kan nei ngai lo.. chan mai tur a in ngai kan in ngaihzawn leh vang pawh a ni mahna.. Exam zawh ni ah chuan a rang thei ang berin airpot lam ka pan a.. ka phur lutuk hi ka khi reng, ka bialnu lah chuan darker chanve danah min lo call chhen bawk.. a sawi ngai a rawn sawi reng ka nuih a za zawk..

.

 Movie kan en dun a, hrilhfiah sak ka ngai tawh bik lo..  lehkhabu erawh  kei in ka chhiar sak thung a.. kan hlim dun a, a hmel ka hmuh apiang hian ka vanneih zia ka inhre fo thin. A chhungte chuan ka haw chu an lawm em em a, a chhan chu an fanu hian hnawl a nih tak si avangin rilru na tak a a awm an hlau a.. ka awm chuan a khawhar loh deuh an ring anih chu..

“Engmah lah hi in hre si lo a awwww…” tih mai te hi a chakawm thin..

.

>>>>>>>>>>A TAWP TA<<<<<<<<<<<<<