RICHARD

‘Rp “Daisy  Hmangaihna Zun” kha a film in an siam dawn a sin..'  ka thiannu Dini chuan a han ti a

“A lehkhabu kha thla thum kal ta chiah a an tlangzarh a ni lawm ni??” ka lo ti vat a

“Aw ni e.. mahse chumi chhung ringawt pawh chuan 2^nd edition pawh a zo vek a. 3^rd edition an hralh chhuak mek”

“A inchhir dawn loh tawp chu..” ka lo ti hmuk a

“I la chhiar ve miah lo ti raw.. han chhiar ve chhin teh.. thalai mai pawh ni lo, nu leh pa ho pawn ngaihnawm an ti asin.. Mizo  Writer khawvel ah rau rau chuan History thar a siam dawn..”

“Aaa.. duh tawk rawh.. heng tiang romantic thil hian min tihbuai ve ka duh lo, a mood a chen ringawt pawh ka peih lo..” ka tih chuan a ngawi ve mai a.

.

Tunlai Zoram titi chu tlangval graduate lehkhabu ziah ‘Daisy Hmangaihna Zun’ tih ngawt mai chu a ni. Hetiang khawp hian lehkhabu chhuah vang a tu emaw a lar tak em em hi ka ring thei lo, nge Mizo mipui te hi kan harh thar ta thut a, hnampui ho chin dan thin angin thuziakmi te hi kan ngai hlu ta thut zawk le. Lehkhabu chhuah chu ka hrethiam mahse chu a lehkhabu film a siam lam chuan ka nuih a ti za lek lek, hmasawnna kan pan mek lai hian kan zawh lem loh lama kal kan tumna hian kan thiam thil hi a hlut dan tur angin a hlut tir thei lo chu a ni ber e.. nge ka chapona thinlung atanga ka thlir dan choh zawk.. Eng vak ka ni lo, lem ziah nuam ka tiin College ka kal ve nitin mahse mipa thawnthu phuah thin ang hi ka ngaihsan loh zawng tak.

.

Zanriah eikham ah chuan kan chhungkua, ka nu ka pa leh ka nau pahnih te nen chuan TV kan en ho a…

“Mami han hmet sawn lo lawk teh.. khi tlangval khi hmanni a lehkhabu tlangzarh ziaktu kha a ni lawm ni.. khi an kawm dawn a nih khi..” ka nu in a lo tih tak ah chuan TV remote control na chu ka dah a.. peih lo takin ka han en pui ve a..

“Hei.. Richard I lehkhabu ziah,  film a siam lam hi sawi a tam hle a, he mi chungchang ah hian sawi duh te I nei em??” nula chuan a han zawt a

“Nia.. FC Motion lam hian min rawn bia a.. kei chuan pawi tihna ka nei lem loa, mahse Mizo te hi lemchan lamah hian hnu hrut hi kan la ngah teh chiam loa chu chuan min ti zam ve deuh..”

“A ni ngawt mai.. Chuan a changtu tur lam hi in in thlang chho mek tih kan hria a, a changtupa berah nang hi sawi rik a awm deuh a.. min hrilh chiang thei em” ti a zawhna an zawh lai chuan ka tui in hmuam lai chu ka phuh thawt..

“Haha.. tu emaw lar hlim all round tum a va ang ve..” ka han ti ham ham a

“Bengchheng suh..” ka nu chuan min rawn ti vat

“Hehe.. nia, ka lehkhabu chhiartu te hian min fuih phur em a, keichuan a theih chin chin chu hnial ka tum a.. a chhan chu keini thuziakmi te hi landan ah pawh buai em em lo te zing a mi kan nih laiin film star te hi chu an landan hi a pawimawh em a thlirtu te mit ka tlun loh ka hlau a ni..” tiin Richard chuan a chhang a

“Aww.. I hmelthat teh reng nen..” ka nu chuan TV lam hawi chuan a lo ti, ka nuih a za telh telh

“Awi.. Bawiha film chu chang ve lo mai teh.. I standard in a pha lo, hawi her ah pawh I tla..” ka lo ti leh hman hram.. ka nu in min lo melh kawr ka hmuh chuan ka pindan lam ka pan ta a.

.

Class banah chuan ka thiannu Dini nen washroom ah kan kal a, makeup vel kan in hnawih tha a..

“Rp, Apa necktie tur chu min enpui rawh aw..” Dini chuan a ti a

“A piancham apiangin Necktie I lei sak ziah.. thil dang dangdai deuh te tih sak ve la..” ka lo ti a

“Enge ka tih ang??” a han ti a

“Hre bik lo.. enge niang awww… Cake chu I nu in a lei awm sia.. sana lei sak la..”

“Sana chuu.. branded law law lo chu a chhe hma sia.. pawisa ka neih tlem em hi..” a ti nui nui a

“Niaa.. a nih chuan Neck tie chu lei leh mai ang, thildang kan en tel sak ang a man tlawm te”

“Thildang kan en chuan ka treat thei dawn hleinem che..”

“Ho mai mai.. chawm hlawm theuh theuh.. in treat in treat a ngai lo..” ka ti a, kan kal ta a.

.

Bazar kan thlen chuan bazaar pui hmun zau vak lo lai chu restricted area a dah na sign awm in mi enge maw zatin an lo din hual a.. accident a thleng a nih ringin hmanhmawh takin Dini nen kan tlan phei, a tawt em avangin kan in hnawh phei pawp pawp, kan chuh helh thang bawk a hmasa ber kualah kan ding ta. Chutia kan ding fel ta maw tih ah chuan min rawn nek sawk, kal phal lohna chhinchhiahna hrui chu ka nek phah ta vak..

“Heeeiii!!!!”

Pangngai takin ka ding a ka hawi phei… Hrep tak chuan!!! Eng thil nge thleng hi.. Camera leh mihring tam vak lo in shooting an neih lai mek chu keini thian dun hian accident thleng emaw tiin kan lo va in hnawh tawng tawng a nih chu.

“Fimkhur ru.. khawngaihin..”

A rawn ti tu lam chu ka va en, khapa kha maw.. !!

“Rp.. Richarda..” Dini chuan min hrilhru..

“Kal ang Din..” ka lo ti ve bawk

“Aih.. a lehkhabu ziah kha an chang aniang..”

“Vai ka nilo.. mi awmlai mai mai ka en hman lo..” ka tih lai chuan ka bul chiah ah Richarda chu a awm tih reng reng ka hre lo..

“Line hi pel lo hram I la, khawngaihin..” nui pahin a rawn ti, ka thu sawi kha a hria tih ka hre nghal mai.

“Kal ang..” tih pah chuan Dini chu ka kai phei pawp pawp a..

.

Vawikhat chu Dini leh a chas Duhtea ten en  kan bazaar a, Solomon’s Cave ah kan College a mi hian dawr a nghak ve a, Dini lehkhabu a hawh sak lam turin kan va kal peng pah a. Lehkhabu pathum hi a ni a, eng lehkhabu nge a nih ka hre lem lo a kei chuan, a chhan chu zirlaibu pawh hi ka hne ve tawk a zirlai piah lam phei hi chu ka peih lo bur!!

“Duhte ti khan lo awm lawk la, toiletah kan va kal lawk ange..” Dini chuan a ti a,  inthiarna lam kan pan dun ta a. Ka chhuah hmasak zawk avangin toilet pawnah a bag  ken sakin ka lo ding a, naupang lo tlan chuan min rawn nek deuh avangin ka thil ken chu ka thlauh ta vek a, ka chhar mawlh mawlh lai chuan Dini bag a lehkhabu tla chhuak pakhat chu mi pakhat hian lo chhar ve in min rawn pe.. ka en deuh vang vang, ka hre chhuak thut.. lawmthu hrilh tum a ka tawng dawn lai mek chuan..

“Ka lawm e..” Richarda zawk chuan a rawn ti a

“Maw..” mak titakin ka lo ti vat

“He lehkhabu hi maw le..” tiin a lehkhabu ken lai chu  a rawn lek chhuak. ‘Daisy Hmangaihna zun’.. Hmm

“Aw kha kha maw.. kei pawh le..” ka ti zuih ral tawp a

Ka rilru tak chuan “Hmelchhe phak.. I lehkhabu hi ka chhiar peih I ring ami..” ka ti a.. Lak ka tum  lai tak chuan Dini chu rilru hah hmel takin a lo chhuak.. Richarda lam pawh en lo chuan min rawn hrilh ru..

“Uiii.. van thing tak!! I hre lawk lo ami..” ka bul a mi hriat hlau tak chuan ka han ti a

“Aw.. please.. va lei lawk teh!!” … “Eheeee.. Richard a ti raw hei hi..” a rawn ti tuar, a van zahthlak thin tak!

“Richard  Dini ka nia.. I lehkhabu kha ngaihnawm ka ti oooover..” a la tih zawm zat zat

“Ka van lawm ve aw..” tiin an in chibai a..

“Ramdinpui.. engtin nge kan tih ngaaa..” ka va ti, Richarda chu a kal har ka ti hle mai, a la ding tang tang

“Nangmah va kal mai rawh..” Dini chuan a ti hram..

“Enge ni ta.. puih theih na che u ka nei em..??” Richarda chuan a rawn ti a

“AIH” kan thiandun chuan kan ti rual chiah.. chu tih lai tak chuan Duhtea a lo kal, ka pawt hrang a thil awm dan ka hrilh, min la hnial hram..

“Café ah in pahnihin lo awm u la.. ka va lei ang..” tiin ka kal san ta a.

.

Temple lamah ka chhuk thla a dawr lo awm hnai ber ah chuan ka lut a mipa an lo la awm thup zui ka sawi mai dawn a ka zak deuh tlat.. van thing tak, kan veng chu nise ka zak awm tawp si lo..

“Ihh.. Kuva awm em??” ka tita ringawt.. Kuva min rawn pek chuan pawisa min kir let min pek pah an tum a

“Aih.. chuan.. “

“Sanitary pad a awm em..” a sawi tu lam ka va en ka phu zawk…” cotton nge cotton lo..??” tiin min rawn melh leh..

“Aaa.. Cotton aw..”  

Engvang a ti nge maw a nih reuh le.. dawr atang chuan kan inzui chhuak ta a.

“Lawmthu I sawi dawn lo ami??” Richarda chuan a rawn ti a

“Ka lawm e.. chuan I duh na hmunah kal tawh rawh.. I hun iti hek mai mai..”

“Nia.. ka hria lawm.. chuan maw khang ang lei kha zak tawh suh.. tiang hi chu Nature thil ania.. khatiang ang lei thei a I awm kha a lawmawm zawk alawk..”

“Nia.. ka lo zak tawh dawn lo nia..” hehehe polite hle mai a

.

Zanah chuan Dini’n min rawn bia a, a lehkhabu pakhat a kim loh thu min rawn hrilh, ka hrechhuak thut.. Richarda hnen atang khan ka la let miah lo..ngatinge a lo pek let mai loh le mahse ani kha chuan ka ta angah a ngai tak e. Ka hawh sak thu leh ka chhiar ve tur thu chu ka hrilh ringawt.. a pawi lo, a dang ka lei sak mai ang.

.

Kartawp chawlh chhung chu inah ka awm char char avangin Thawhtanah chuan Dini lehkhabu tur zawng chuan ka chhuak ta a. Ka van hah thlawn chiang em.. hralh zawh a nih tawh leh chhut leh mek a nih chu min lo hrilh zel.. “Khawi dawrah emaw hi chuan a awm awm em mai” tiin ka zawng tang tang a ka hmu lo. Ka beidawn em avang chuan Lunglei a kan chhungte ka va call a, Lunglei a lei tur min lo zawn sak turin ka tita ringawt.. rilru chu a nuam deuh huai e. Dini hnenah chuan ka kawl rei dawn tih ka va hrilh a, ani chuan lehkhabu  ka chhiar peih loh zia a hr eve a ni chek ang chu, ka duh duh hun a  ka pekkir theih tur thu min hrilh a.

.

Chhun chawlh lai chuan Dini chuan call a dawng a, a chhan chuan tu emaw a hriat lohin a hmuh duh thu a lo hrilh a..

“Rp ka kal duh angem??”

“I thu thu.. Duhte bak a ni lo ang.. a surprise duh che niang..” ka lo ti a

“Ni hrim hrim.. he pa hi!! Ka hmangaih chiang alawm..” a tih chuan ka lo ner nang..

“I period pawn a buaipui peih lo che nia.,. ka hmangaih chu I la ti zui a.. huh..”

.

Zanriah kan ei dawn lai tak in Dini chuan a rawn call a..

“Hello..”

“Rp, engvangin nge dawt I sawi aa.. nangmah vangin ka mualpho lutuk asin.. ka zak lutuk!” a rawn ti vak vak

“Din.. enge awmzia..??” ka han ti a

“I hre lo maw.. kha pa hnenah khan lehkhabu kha I pe a..”

“Maw.. ka tih a ni lo.. Din please.. engkim ka sawi fiah ang, thinrim suh.. chaw ka ei lawk ang aw..”

Ka chaw ei pawh a tui lo, vawiin lam a thil thleng ngawt chu ka rilru ah a awm.. Engtin chiah nge kha Richarda khan a lo tih le?? Ka ei kham veleh ka pa hnenah ka thiannu Dini te in a note ka lak ngei ngei a ngaih thu ka hrilh a, ani a lo inkhawm dawn si avangin ka cousin kan in bul lawk ami chu min va thlah tir ta a.

“Din..enge thleng min hrilh rawh..”

“Dawrah ka lo nghak a.. chuan ka va thlen chuan “I thiannu I rawn kalpui dawn em ni. Khawnge amah chu??” a lo ti vat a… Dini keimah ka nih thu ka hrilh chuan lehkhabu kha min pe a.. nangmah a hmuh duh thu che a sawi a.. kan bum a ring a, keimah hi Dini ka ni tih a awih tlat lo.. lehkhabu ah khan ka hming leh ka address ka ziak a, chuta tang chuan ka phone number a nei aniang.. va hrilh rawh Dini ka ni tih hi, Duhtea nen kan buai phah ange Rp.. hrilh rawh.. a number ka nei a va text rawh Richarda kha..”

Huizz! Ka rilru a van buai tak em.. Engtin nge ka tih tak ang?? Mahse ka thiantha ber hi rilru hahin ka hmu thei bawk si lo. Richarda ngaisang em em tu ni mah se a bialpa nen a inthen chhan tur em chuan a duh lo tih chiang takin ka hre thiam ve tho si. Richarda number chu ka la ta a, ka haw hun a ka biak tur thu ka hrilh chuan Dini chua ahma ang chiah a hlim hmel a rawn pu ta a.

.

Ka haw hnu chuan ka ngaihtuah char char, biak mai chu ka hreh a ni mahse ka thian tha ber  hnenah khan ka lo tiam tawh si.. ‘Richard’ tih a number in save chu ka call ta a, a in ring rei hle mai.. a la dawn lo emaw ka tih hnu chuan a rawn pick up hram..

“Hello..” ka lungphu han ran dan chu.. he pa hi ngatan mah ka ti ngai loa ka ngaisang ngai lo a ni lawm ni.. engvangin ka zam tiin ka infuih..

“Richard.. Rengpuii ka nia..” ka ti tham tiak a

“Tu maw.. ka hria che em??”

“Aw.. Dini, Chhinga Veng tih a I hriat kha.. a thiannu kha ka nia..” ka han ti leh a

“A ni maw.. I lehkhabu pe tur ringawt che a hmuh che ka tum a, mahse I thiannu kha I rawn kal tir a..” a nui deuh hak a

“A ni lo.. “

“Hmm.. in sawi fiah a ngai hleinem” ngeiawm tak chuan a rawn ti a, ka dawhtheihna in a tlin ta lo..

“I lehkhabu ziah kha chhiar en ah pawh ka en lo!! Ka thiannu chhiar anih kha  atawk em?? Chuan kei hi Lalrengpuii, Zarkawt a awm  ka nih hi Ramdinpuii, Chhinga Veng a awm ka ni lo..” ka ti hrawk a, phone chu ka dah ta a.

Khangtiang mihring chapo lutukkk…  ka tih dank ha a phu tawk chiah. Chuan ka thiannu lak a ka thutiam ka hlen a a tawk a ni mai.

.

Ka pa hnenah painting class kal zawm ka dil tang tang hnu chuan a phal hram a ka hlim a ka hlim zia chu, Kar khat hnu lamah ka tan tur thu admission ka va tih chuan min hrilh a. Dik tak chuan ka rilru ah kha Richarda leh kan buaina kha a awm reng a min theihnghilh theih tir tu chu he ka nuam tih ber lemziah hi a ni. Class ka tan dawn ni zanah chuan ka u in min rawn call..

“Aw u..”

I thil min chah kha naktukah an rawn phur phei ang aw..” ka u chuan a lo ti a

“Enge ka chah che??” ka lo ti vat

“Aww.. hmanni ah lehkhabu min rawn zawn tir kha..”

“Maw.. kar hnih lai a nih tawh hi.. ka mamawh tawh lo nei rawh..” ka lo ti vat a

“Kan veng a sumo driver hnenah ka dah fel vek tawh.. naktuk zing dar 6:30 chhuakah an lo phei ang.. I class banah Sammy counterah I lam dawn nia..”

“Naa.. aw pawilo, ka lawm e aw..”

.

Tlai dar li ah chiah Painting Class a awm dawn avangin class banah chuan hmanhmawh lo takin Chanmari  tangin Counter lam chu ka pan a, ka kal muang bawk aniang ka lehkhabu ka va lam meuh chuan dar li a ri thuak tawh. Bazar bus stand atangin bus ah ka chuang a.. Ramhlun kan thlen chuan hmanhmawh takin ka chhuk a ka thil ken, ka lehkhabu dahna  chu ka thlauh hram.. chhar ka tum lai tak chuan tu emaw hian min chhar khalh, ka lehkhabu chu plastic bag ah chuan dahin min pe let.. Ka phu zawk heng tiang thil hi Movie ah bak a awm thei lo ang.. mak tih vang chuan ka en reng ringawt..

“He lehkhabu hi I tluan pui vak lo a nih hi ti raw..” a rawn ti a, a nui suk

“I lehkhabu lei tu ten an thlauh palh taka lo chhar hman zel tur hian Aizawl khawpui hi I fang thin am ni a??” ka ti a, ka kalsan ta a.

 

.

Painting class ka zawm leh chu a hma a ka kalpui thin te ho an lo awm nual a nuam ka ti phian.  Middle School leh high school ka kal lai zawng a ka kal thinna a ni a, ka ta bik hliah hliah ah ka ngai a ni. A dan pangngai tak chuan ka zir theih ang chu khang kum nga chhung khan ka zir zo vek tawh a mahse keimah a awm a lem han ziah ngawt ai chuan painting tui ve tho bula lemziah hi nuam ka ti a ni. Kan zirtirtu te pawn hna ka thawh ve theih tur thu min hrilh thin a mahse graduate em pawh graduate  loa awm chu ka ngai ngam bik si lo chu lo rengah ka pa in a phal dawn lo tih ka hre chiang a ni. Chung vel vang chuan kan zirtirte hnen a lemziah dangdai deuh bik Painting school a an zir chiah lo zir pahin junior rawn lut thar ho zirtir hna chu ka thawk ve tan ta a ni.

.

Kar thum dawn college kal ban a Sirius Painting school a ka hun ka hman chuan a hma zawng aiin hah mah ila nuam ka ti takzet a ni. He school a ka graduate hnu a thawh ka tumna rilru chuan lehkha zir lam min ngaihtuah loh tir hle a, ka nu pawn min zilh ngun phah hle a ni. Heng hna te chu part time pawn a thawh theih a, in nghahna tlak a nih loh zia chu a sawi cham chi mai… mahse chu chuan ka rilru a tih danglam phah lo, ka pa ka chhun aniang chu.. hausak ka tum lem lo nghei loh hi ka hmalam hun atan a ka tum ber chu a ni. Ngaihzawng lam lah hi ka ngaihtuah der si loa, ka phone te hi ka chhungte leh ka thian hnai bak biak nan ka hmang lo.. dik tak chuan ngaihzawng hmu zo lo khawp chu ka ni lo mahse min lo duh der ve tut e hi ka ten ngawih ngawih zel.. ka duh zawng ang chi chu cool over tawp mahse chutiang ka star ang te chu hmeichhe be hmasa ngai lo ang tawp hi an ni mai.. ka thian pakhat phei chuan ka star tawh te min zawh chuan “Tuai Collection” min tih sak hial.

.

Painting class ka kal hmasak ber ni a ka hmuh bak kha Richarda chu ka hmu leh ta miah lo, mahse pawi ka ti lo.. mipa hi nel em em lo mahila ani ang a han mil lo tawp kha chu ka nei ngai lo asin mawle.. ni e kan in hnaih loh hi a tha ber. Mahse, hmu ngai lo mahila ka nu atang hian ka hre zel, a fan ruh kawl kha a ni miau a.. kha lehkhabu aziah ah khan a changtupa berah a chang a ni awm e.. a hriat miah loh hian ka van hmusit ngawih ngawih tak kha Richarda kha. Ka nu hi naupang te a pasal nei a nih avang hian milar ngaihsanna hi a la pe na em em a ka lo ning thin kei hian!!

.

Kum tawp lam kan chuang kai chho a, college la kal reng mahila Painting School lam erawh November thla thleng chiah kal turin an rel a. Kan class neih hnuhnung ber ni ah chuan farewell party ang deuhin chawhma atangin program kan nei a.. chaw chhun ei ho na kan nei pah bawk a, Krismas nuam tak a hmang turin leh Kumthar lam a dam taka inhmu turin kan inthlah sap sap hlawm a. Chu tih lai chuan kan junior student zing a mi Ruthi kum 12 naupang te hian a nu in min hmuh duh thu min hrilh chuan kan ban hnu ah a nu in a lo hruai a alo nghah thinna lam chu kan pan dun ta a..

“Nu hei hi ania Miss Rpi chu..” Ruthi chuan a nu chu a han hrilh a

“E Miss, Ruthi nu ka nia.. khawi vengah nge in awm a??”

“Zarkawtah kan awm a.. nang ni zawk.. chuan enge nita a??”

“Keini chu Chanmari West ah kan awm a.. aa eng lo ania, February ah chiah hemi painting class hi kal zawn a ni dawn sia.. bawihi hi I lo zirtir thei angem le ka tia.. I hman hun hun ah..” Ruthi nu chuan a han ti a

“Aaa.. chutiang lam chu maw.. ka chhungte ka lo rawn ve phawt anga bakah in zir belh paha pui mai mai ka nia..” ka han ti a

“Chu mi vang chuan ania ka duh che.. a thiam tawh tak tak hi chuan zirlaite thiam lohna hi an hrethiam thin loa..” a tih chuan ka lo nui suk a. A number la in zan lam a ka confrm theih tur thu ka hrilh a, ka kalsan ta a.

.

December ni 2 tlai dar 2:15 ah chuan kan in atang a chhuakin Painting zirtir turin Ruthi te in lam chu ka pan ta a, enge maw tak a inrintawkna nei riau in ka in hria, a vawikhatna a tan keimah ngeiin thawh chhuah nei turin kawng ka zawh tan ve a ni a, ka hlim zia chu, ka nui deuh reng mai. Door bell ka hmet ri a, kawngka an lo hawng vat..

“Aaa.. Nu Sangtei a awm em??” ka han ti a

“Aw.. lo lut rawh, lo nghak lawk rawh..”

Kar lo ah Nu Sangtei chu rawn kalin Ruthi chu a ko vat a, Ruthi nen chuan a lemziahna pindan lam kan pan phei a kan inzirtir dun ta a..

“Miss nangmah anga painting ka thiam hunah a lehkhabu in ka chhuah thei angem??” Ruthi chuan a han ti a

“Miss ti suh, U Rp ti rawh.. chuan lehkhabu tak a chhuah chu a uihawm awm e, chu ai chuan frame ah kan dah anga kan zuar mai dawn alawm..” ka lo ti a

“Anih ka lar angem??” a rawn tih chuan ka nui deuh hak a..

“Lar I chak a mi Ruthi..??” ka han ti a

“Umm.. a u pawh a lar lutuk a..”

“I u chu enge a nih a.. footballer maw.. nge basketballer..” ka han ti a

“Thu a ziak thin a..” a ti a.. ka nuih za chu ka in sum nasa tawp..

“Ruthi heng thuziakmi ai hian lemziak mi te hi kan ropui daih zawk a lawm..” ka sawi lai tak chuan Nu Sangtei a lo lut a, thingpui in turin min rawn koh takah chuan kan chhuak ta a.

.

Kar hnih vel Ruthi zirtirna ka pek hnu chuan Dec 18 a Vanapa Hall a painting exhibition a ka hruai duh thu Nu Sangtei ka hrilh chuan a lo phal em em a, kal lamah chuan a car in min thlah thlap a, ban hun a min lo lam tur thu min hrilh bawk a. Ruthi nen chuan lemziah ril leh dangdai tak tak te chu kan en a ka theih ang angin ka hrilh fiah a ani pawn nuam a ti hle in ka hria. Dar 3 rik dawn tepah chuan Nu Sangtei call ka dawng a, in lam an tih fel laklawh em avang in Ruthi  U in min lo hruai tur thu min hrilh chuan ka lo nghak a.

“A u…” tiin Ruthi chuan Car ding lam ah chuan a tlan phei a, ka va kal hnai.. ka hmu chiang chiah chu ka ding chiang hle!!

“Engtin nge unau an nih theih zawkk??”

“A u U Rpi ka painting miss..” Ruthi chuan a ti a

“Richard ka nia..” tiin min chibai a, engmah hre lo ang maiin a la awm zui, Carah chuan hrilhhai takin ka lut a.. nu Sangtei chuan min lo call leh a

“Aw hello..”

“E Rp, a rawn thleng tawh em??”

“Aw.. kan lo phei mek..” ka ti vat a

“Rawn phei tlang ang che aw.. zanin chu kan inah zanriah ei ve nghal mai rawh”

“Aih.. a ngai lo, engmah ka chhungte ka hrilh lawk si loa” ka tih chuan min hnial tang tang bawk si, a fapa hnen a min hruai haw tur a a hrilh thu a la sawi zui, nuam ka ti hlawl lo a ni.

.

In a kan luh chuan common room rawng an lo hnawih tha a..

“E in lo thleng maw.. bawihte a nuam em??” Nu Sangtei’n a tih chuan Ruthi chuan a sawi nasa em em a, an chhungkaw li leh rawng hnawih tura an rawih a nih ngei ang, mi pahnih lo awm ve te chuan Ruthi thusawi chu ngaithla in an nuih laih laih a..

“Ka lo pui ang che u chu..” ka ti a

“A ngai lo I hah ang.. lo awm mai mai rawh..” Nu Sangtei te nupa chuan an lo ti a..

“Nu U Rpi hian a thiam lutuk, Class ah pawh hnatlang kan neihin a hnawih a..” Ruthi’n a lo ti a, a nu te chuan min la hnial tang tang a, mahse han awm tawp chu nuam lo ka tih em avangin ka tih luih hnu chuan hnathawh kawr min rawn pe ta a. Ka hnawih hnu rei vak loah Richarda chu ka bulah dingin a rawn hnawih ve a, ka awm a ti nuam lo takzet .. engvang in nge an chhungkaw zing a mi a lo nih le!!

Zanriah chu an chhungkaw li leh kei chuan kan kil ho a..

“U.. nangni aiin kan ropui zawk a sin..” Ruthi chuan a rawn ti chhuak a

“Enga..” nui deuh ti tih chuan Richarda chuan a lo ti a

“Nang ni chuan thil lem ngaihtuahin in ziak chhuak a keini chuan Art ril zia leh nihna diktak kan pho lang…” Ruthi’n a tih chuan ka lo ip chawih

“Chu chu tunge hrilh che..”nelawm tak leh dawhthei tak si chuan a han ti a

“U Rpi’n min hrilh..”

An chhungkua chuan min en deuh thap a, an nui ho ta dar dar a.. kei erawh zah vangin ka sa pap pap thung.

“Ani hi a naupangchhia rei lutuk a, a rualpui ho hi chuan nu te bula awm te hi an ning a.. ani hi chu kan naute neih chhun a ni bawk a.. ka tel lo a chhuah ang te hi a hreh tlat zel..” Nu Sangtei’n a han ti chho a, kan titi chho zel a.. Kan tih fel lai chuan an chhungkaw chanchin min hrilh chho ta a. Richarda hi an fa diktak a ni loa Nu Sangtei u fa a ni a, a pian velah a nu hian vanduaithlaktakin a boralsan a.. chu tih lai chuan Nu Sangtei hian pasal a la nei loa, Richarda hi a fa ang chiahin a enkawl chho ta a.. pasal neih pawh tum loa Richarda a tul pui thak lai chuan Ruthi pa hian a hel nasa hle a, Richarda pawh a fa anga a pawm tur thu a hrilh takah chuan senior hnu ah an innei ve leh ta a ni. Ni e, an unau in upat hleih hi a awm lo loe.. mahse hemi te unau hi enge maw chu an ni ve alawm.

.

Chaw ei kham ah chuan Richarda’n min thlah haw a, sawi tur avang duh hle mai..

“Rawng hnawih I thiam hle mai..” Richarda chuan a ti a

“Chuti mi” tih chiahin ka chhang a

“Umm.. ni e, ila naupan nen.. thiam thil ropui tak I nei a ni..” min til el nan a tawng a ang mah zawk, mahse a hmel ka en chuan a thutak hle si

“Nangpawh.. ila naupangin thu I thiam a, lehkhabu I chhuah tawh a..” kan ti ve ngawt a

“Heh.. I chhiar peih ve tawh mi aa..”

“Hehe.. peih lo mahila ngaisangtu I ngah danah a hriat mai alawm..bakah acting lam pawh..” tiin ka ngawi ta daih a

“Hehe.. engtak an gang maw.. ni e”

“A hlawhtling ang..” ka rilru ang lo takin ka tawng chhuak phawng

“Nia hlawhtling turah ngai ang.. nang ang a frank pawn a hlawhtlin I ring a..” a rawn tih chuan ka lo nui ringawt.

In ka thlen chuan ka chauh deuh avangin ka mu nghal a, ka rilru ah kha Richarda kha a awm veng veng, a hma a ka ei loh ang kha chu a ni lo, a nau a en dan te leh a dawhtheih hmel em em na khan engtin mawni tak min hneh. Vawiin lam a thil thleng kha mak ka tih em avang chuan Dini ka va hrilh mahse ani chuan ahma thil thleng vel vang kha emaw ni min lo sawi phur pui lem lo.

.

December ni 21 thleng tum kum chhung a pe tur anga kan rel angin ka va kal ziah a, Richarda chuan a awm chang apiangin min thlah a, ani hi ka ngaina telh telh.. zan lamah pawh kan inbe fova, shooting an neih vang hian a chau thei em em a, chu mi avang chuan kan in text ngai meuh lo mahse call tu erawh amah a ni ziah thung. Krismas boruak kan hip chho a, Richarda nen chuan kan in nel sawt khawp mai len pawh a rawn leng fova, a mizia hi ka ngaina telh telh, a kum a naupan en in a puitling ru hle a mahse puitling tak ni si hian naupanchhiatna leh duhawmna riau hi a nei. A buai theih em avangin kan inbe khat hle a, a ruk tak chuan ka thinrim thin.. mahse ti lang turin a bialnu ka ni si lo. Inngaihzawn chungchang chu a sawi fova mahse ti khawp a buai hi ka bialpa atan a theih loh!!

.

Kumthar kan chuang kai a kar loah Ruthi pawh ka zirtir chho leh vat a, in lamah Richarda hmuh tur a awm mang ngai lo, an film chan buaipuiin a buai nileng ziah. Tlai khat chu kei leh Ruthi kan in zirtir a, Nu Sangtei bazaar turin a chhuak a Ruthi pa erawh a hna kal a la haw loa.. choka lamah an in a hnathawk te an awm a.. tui taka lem kan ziah lai chuan.. tawng lawng lawng ri kan hria a kan va kal chhuak a..

“First aid box!!! Hmanhmawh ta che!!”

“Ehe.. Richard, enge awmzi??” tiin ka tlan

“Ruthi kha rawn kal tir suh.. thisuk a nei” tiin a chal thisen kai luai chu a dawm a

“Ruthi.. lo va ziah zawm rawh.. I u saw ka va buai pui ange..” tiin ka phei a

“First aid box nen ka room ah lo chho rawh” tiin inchung lam a pan a, an in ahnathawk in first aid box min pek chu ka la vat a, inchung lam ka pan ta a. A thisen kai chu ka hru fai a, a ni chuan a lo dawh ve mai a.. damdawi ka hnawih pah chuan..

“Ngatinge aa?? I tlu ami.. nge thildang..” ka ti a

“Kan insual..”

“Maw..”

“Engmah ni lo.. i phone a ri..”

“Kha lo dawm rawh lapua hi..” tih pah chuan call chu ka chhang a

“Hello.. aw Din..”

“Rp.. thil kha I hria em??” dini chuan alo ti

“Enge hriat tur..??”

“Film an shoot na ah.. Richarda Daisy leh abialpa a va kal a, an insual..”

“Maw… enge Daisy tih vel chu??” ka ti a

“A lehkhabu ziah a mi kha..” a rawn ti vak

“Maw..  a tak tak tih na maw..a la duh tih na maw..” ka hnuai rawih, min bem lai te kha ka ngaihtuah.. ka mood a off vek. A room Verandah atang a a room a ka luh chuan chauh hmel deuhin a lo mu, ka melh kawr a kawngka lam ka pan ta a..

“Heii.. khawnge I kal dawn..??” tiin min rawn chelh

“Ka haw dawn..” tiin ka kal lui, kawr pawh ha loin min lo zui..

“Ka lo thlah ang che..”

“A ngai lo.. Ruthi kha chawl tawh turin lo hrilh rawh..” tiin ka kawngkharpui atangin ka chhuak chiah a Nu Sangtei leh nula chhelo tak pakhat a lo lut chiah

“Rp.. I haw dawn chiah elaw..” Nu Sangtei chuan a ti a

“Awi khawi teh..” chu nula chuan Richarda chal chu a khawih sak, ka nghing lawih .. inchungah a chhoh pui a kan in lam ka pan ta a.

.

Richarda chuan a rawn call char char, vawikhat chu ka chhang hram.. a bialnu ka nih loh thu leh a duh duh dana a awm theih zia ka hrilh mahse ka na a ni. Ani chuan a danglam tawh thu min hrilh, a danglamna hre tur hian a tun hma nun engmah ka hre lo, mahse ka na a ni.Nu Sangtei hnenah chuan ka kal zawm theih loh thu leh February a class pangngai a kan zawm mai theih tur thu ka hrilh a, kha Richarda ka neih hma hauh a ka chan tak kha hmuh leh hi ka duh tawh lo bur a ni. Article tam tak a rawn chhuak kha lehkhabu kha Richarda’n a bialnu a hmangaih em em neih let leh a tum nan a a chhuah thu te, a film hial a chan a hreh lohna chhan pawh kha a Daisy-I vang kha a lo ni.. he nu hi mi tam tak chuan an hre lo mahse a hming pawh hi phuah chawp mai a ni a mahse Richarda vang hian a lar takzet a ni.

.

Thla khat chuang hna pangngai nei anga awm hnu a han awl tawp chu khau a har duh kher mai, rilru lam a lo dam lo nen tih tur hi  avang ngawi ngawih.. internet lamah lut ila inla thu thiam thenkhat in Richarda leh Daisy te thawnthu chu a lungchhiat thlak zawngin an lo phuah belh, a thenin a tak emaw an lo ti thul.. chu chuan min ti aa lo chauh! Richarda chuan a khat tawkin min rawn call reng mahse chhan ka tum lo bur!! Vawikhat ka room ka ti fel chu Richarda lehkhabu ka U in min rawn thawn chu ka hmu chhuak nawlh.. thil awmze diktak ka hriat chak vang chuan ka chhiar ta a, min van vel tap nasa em.. a thawnthu khan a ni lo.. Richarda hmangaih ka nih lohna chuan min vel tap a ni, he tiang khawp hian a ni maw Richarda hmangaih nih hi ka lo chak.

.

A thawnthu a Daisy nen chuan tet tea tang a in kawm an ni a.. college an kal dun a engkim an ti dun a ni. Richarda  hi writer nih tum ruh tak a ni a mahse thuziah lamah talent a dawn loh avangin thuziakmi te hi a thik thei hle a ni. Daisy erawh tum lawk leh a duh vang pawh ni lo in thuziah a thiam em em thung a, vawi tam tak Richarda tan hian hla pawh a phuah thin a ni. Richarda leh Daisy te chu an zir chhuah hun a innei mai tur an nih laiin Daisy chuan phai lam a lehkha zir a duh ta tlat a, Richarda chuan a phal lo ngei mai mahse innei tur tho an nih avangin tha takin a thlah liam a.. Daisy chu akal hnu chuan a danglam ta telh telh Richarda erawh chuan a hmangaih telh telh thung. Vawikhat chu Daisy chuan thu thinthawng tak a hrilh ta a, bialpa a neih thu.. mi hausa tak leh hlawhtling tak a nih thu a hrilh chuan Richarda chu a na ngawih ngawih a.. amah a neih let theih nan enge a tih theih a zawh chuan Lehkhabu hlawhtling tak a ziah theih chuan a neih let theih tur thu a hrilh ta a.. Richarda chuan Daisy’n chung chu a beidawn nan a sawi tih a hre reng mahse a neih let leh nan chuan theih tawp chhuahin ziak tan a.. chu thawnthu a ziah chhoh lai chuan Daisy chuan vanduaithlak takin accident a tawk a, a zeng ta a.. chu ti chung chuan Richarda chuan a tawp thlengin a enkawl a tum ta a .. chu tah tak chuan Daisy chuan Richarda hmangaihna chu a hmu thiam a, mahse nupui tlak a nih tawh loh thu a hrilh chuan ani chuan kalsan duh  loin nupui hial a nei ta a..

“A tawp a la thleng lo, a tawpna kha a diklo..” ka lehkhabu chhiar lai chu khupin aw lo chhuahna lam chu ka hawi vat a

“Richard..”

“Rp.. a tawpna kha adik lo, khawngaihin ka thusawi ngaithla rawh..” Richarda chuan a ti a

“Ka ngaithla tam tawk tawh lo ami..??” ka lo thawp sap a

“Lehkhabu cu tikhan ka chhuah a, I chhiar ngei alawm..”

“Chuan a lo let chuang loa, film ah hial I chan tir a ni lawm ni??” tap aw tiau chuan ka ti a

“I duh phawt chuan kha film kha chhuah a ni lo ang..”

“A ngai lo.. khawngaihin chhuak rawh..”

“Min ngaithla phawt rawh..” tiin min rawn pan hnaih a “Bazaar a ka hmuh ni che a “Vai ka ni lo.. mi awm mai mai ka thlir hman lo” tih tawngkam I hman kha I la hria em?? Tah khan ka insit ru lutuk a sin.. nang chuan mi awm mai mai I en hman loa kei chuan ka ta tur ni lo pui tiin thil atthlak tak, ka ngaihsan ngai loh ka lo ti mek a.. tum lawk miah loin vawi tam tam ka hmu che a, kha mi I thiannu nen a kan inhmuh ni khan nang nen hian lo in hmu ila lo in hrechiang hma ila chuan kha lemchan kha ka chhunzawm lo ang.. mahse nang ka hnaih theih ni che a thlen chuan kha film kha puitlin lam pan a ni chho zel si.. mi chuan Tetei  kha ka la hmangaih viau turah an ngai a.. sawi pawh a tam mahse ka rilru ah nang chauh I awm.. khawngaihin Rp.. kha mi ni a kan insual na chhan kha chu Tetei  lam kha ka rilru ah a awm tawh ngai loa mahse an ni pahnih, Tetei leh a bialpa ang a in sawi khan kha thawnthu kha thudik beh chhan anih thu an rawn sawi chhuak a ni.. Ka awm lai leh kha film kan shoot mek lai khan.. mahse kha pa kha a ngaihzawng a ni lo, rawn in tih lar an tumna a nih kha chu chuan engkim a thlak danglam ta a, nang nen a kan inkar leh kan hmalam hun kan awmdunna thlengin a thlak danglam a ni, kha mi ni a ka nu nen a rawn lut kha a ni chu a ni… khami ni ngei khan ngaihdam min dil mahse ka pawm thei lo mahse keichuan unaunu angin ka en mai a ni. Dik tak chuan a zar in min zar tun thleng hian mahse min hmangaih vang a ni lo, lansarh a chakna mai a ni chu aia pawimawh chu nang hi ka hmangaih che..”

Ka bing mup mup,sawi tur pawh ka hre lo.. Richarda hi ka duh alawm.. mahse ani nen a inngaihzawn chu ka mualphona kawngka hawng ang mai ka ni dawn a ni..

“Chance vawi khat chiah min pe rawh.. kha film trailer kha karleh ah chhuah a ni dawn chuan engkim mipuiin an hria ang..” a rawn ti leh a

“Nang ni ang a mi hriat hlawh nih ka duh hleinem” ka lo ti hrawk a

“Mahse min telpui rawh aw..”

“Ka lo in ngaihtuah ang..”

.

“ Rp kal rawh.. I kal a tha.. Kha Daisy khan a duh leh tawh phei chuan I kal a ngai..” Dini chuan ati a

“Daisy ti suh.. Tetei lawm..” ka lo ti a

“A enga pawh chu ni se.. kha hmeichhia kha eng ang mi nge le.. lehkhabu chhuah hlim khan Richarda hnenah rawn let se chuan ka hrethiam..”

“Nia ka kal ang..”

.

Trailer chhuah  anih dawn ni chuan film a inlan ho leh chhungkaw mi ho bik ten en Hotel lam a zanriah ei an ti a, kal ka hreh hle a mahse Richarda’n min ngen nasat em avang chuan kal tur chuan ka rilru ka siam fel ta a. Richarda’n min rawn lam a Hotel Ritz lam kan pan ta a. Kan va thlen chuan an lo awm deuh thup tawh, chung zingah chuan Tetei pawh ka hmu ve a, Nu sangtei nen chuan innel hmel takin an awmdun deuh reng a, an in ngaihnat hmel khawp mai, inhmelhriat tir nah un min hmanpui a, chibai ka sem kual dan dan chuan Tetei nen kan in chibai a

“Tetei.. chuan hei hi Rpi..” Richarda’n  atih veleh chuan

“aka Daisy..” Tetei chuan a rawn ti sep, za lo takin ka nui seih a, thutna lam min kawh hmuh ta a. Vawiin hi a ni a, Richarda’n hunka pek leh nan a chance tawp ber  neih kha, engtak chu ti dawn maw.. engkim titi hlekah Tetei chuan fiamthu thawhin nelawm takin a awm kual vel a, midang ho chuan an lawm in an ngaihnat hmel hle a ka tan chuan ani saw chaw ei tui lohna tham a ni.

“Zanriah ei kham hian theatre lamah lemchan  chu kan en anga chuan keini lamin press  conference kan ko a .. chumi chhung chu nangmahin I awm hreh em??” Richarda chuan min han zawt a

“Aih.. hre lo ka lo nghak ang..”

“Nuam I ti chiah lo ti raw..”

“Umm.. “

“Ka tihpalh engkim a fel tep tawh a nia aw..” tih pahin ka kut chu a fawp zeuh a

.

Uluk takin chu film chu ka en a, Richarda erawh chuan keimah min en zeuh zeuh tih chu ka hria a ni, kan piaha Tetei thu ka va hmuh chuan nuam a tih hmel ang reng viau a ni.. hmuhnawm ka ti lo, hreawm ka ti mah zawk. Richarda chuan min hrethiam tih hriat takin ka kut chu a hum a a chul deuh chhen. Ka rin aiin lemchan lamah pawh a lo duai loe, a hmelthatna chu mi tam takin an hmu vat dawn chu a ni si a.. Trailer show a zawh chuan press mi ho hnung lamah thu in an  thu sawi chu ka lo thlir ve reng a, mi pathum thusawi a zawh chuan Richarda thu sawi hun a lo thleng ve ta a..

“Media mi leh sa, leh mi hrang hrang min tawiawm tur a lo kal khawm  te in zavaiin chibai ka buk a che u, tun a tang a ni rei lo te ah kan film chan chu midang hmuh a pholan a ni dawn a, he film phenah hian thil tam tak inhnialna a thleng a. he tah hian thil sawi duh ka nei a ni.. kha lehkhabu ka ziah chhan te leh kan ziah a te kha thudik beh chhan a ziah chu a ni ngei a, mahse tunlai titi mek a he ka Daisy anga sawi thawm a awm ah hi chuan thil hriat chian loh a awm in ka hria a ni. He lehkhabu ka ziak hi ka inchhir loa, film lam ka luhchilh pawh hi ka inchhir lo a chhan chu he thil ka tih hi ti lo ila ka Daisy dik tak hi ka tawng awm si loa, chuan mipui lamin in hriat a ka duh chu kha lehkhabu leh he film a Daisy kha chu ka tan chuan ka career in siam chhohna mai a ni.. ka lawm e”

.

Woowww, khing tiang khian Richarda’n a ti thei amaw..  ka hlim lutuk hi ka a lo chauh..!!

“Haii.. Daisy..” Dini text ka dawn ka chhiar pah chuan ka nui suk a

“Enge a an.. Tv ah ilo thlir ami.. :D”

“Umm.. milar bialnu nih chu enge a an..” tiin arawn thawn leh..

“Sawi thiam luaaa..haha”

Chu tih lai mek chuan Nu Sangtei a rawn phei a, kan chhuak dun ta a. Pawn lamah Richarda kan lo nghak a..

“Rp. Tetei hi chu a tet lai atang a kan inah pawh che tla nasa a ni a.. Bawiha bialnu ang pawn kan en lo, dik tak chuan Bawiha nun hi a ti danglam em em a, nu nihna zawn atang a thlir chuan keipawh hian pawh vak hi ka duh lem lo, mahse nu ang hian min en a.. thlir dan tawk I thiam angai a ni.” Nu Sangtei chuan ahan ti a

“Ka rilru a nuam sawt..” tiin ka nui suk a

.

Class kan kal chho leh tan ta a, Richarda chuan a film vel tih lar chhoh nan hna a thawk a, ka bulah a awm hman tlem hle a, subtitle tawng  chi thum an dah tel avangin Mizo zing ah mai pawh ni lo in hnam dang thlengin an lo en ve hlawm a,, beisei aiin a hlawhtling chho hle a. A buai theih em avangin ka tan hun a nei thei mang lo mahse kan inkar erawh a ti buai lem lo thung a ni. Class kan kal leh chuan Dini chuan kei leh Richarda kan in ngaihzawn thu  chu mi zawng zawng hrilh a tum tih mai tur hian sawi chhuah nuam a ti em em a, min hlimpui vang tih chu hretho mahila mi hriat a inngaihzawn chu ka duh vak lo a ni.

.

Thla thum lai kan nih tlin ve hnu chuan Richarda chhungte lam nen pawh kan in pawh hle a, ani pawh kan chhungkaw lamah a tla tlum khawp mai.. ka nu hian a ngaisang ve hran pa hrim hrim bawk a. Vawikhat chu Painting competition awm torah Ruthi chu a chhuak ve dawn a, kan tang tlang hle mai. An neih dawn hma ni chuan nilengin class thulh thakin ka zirtir a, an inah chaw ka ei nghal bawk a, zanah chaun Richarda’n min thlah haw a, he pa hi ka duh telh telh.. ka hmangaih dawn hialin ka hria. Keima chhawn tur tawk te in a zei a, engkim ah min rawn der ve zel a, kan inngaihzawnna thup tum ruh ve tak chung hian a hlawhtlinna phen a ka awm thu chu mi zingah a sawi cham chi thin, mahse chung pawh chu min ti hlimtu bawk a ni. Vanneihthlak takin chu lemziah intihsiakna ah chuan Ruthi pakhatna a ni a, nuam lo ti viau mah ila Richarda nu chuan clutch nalh tak min present a ka lawm hle a ni.

.

Vawikhat chu Richarda’n hiking neih a rawt avangin a thiante leh ka thiante kan sawm a, Reiek tlang lam a zan khat riak lek a kal turin kan inbuatsaih a, Dini leh a bialpa Duhtea an tel ve bawk a abak chu Richarda thiante an ni hlawm a.. Tetei a rawn kal ve tur thu min hrilh chuan ka phur na chanve hmawk chu phur lohna in thlak  chiang hle mai. He nu han zah loh zia hi chu aww!! Car pahnih in kan kal a, Richarda awmna lam apiang ah Tetei chu a rawn awm ve zel na chuan ka huat a ti zual. Kan thlen fel kim hnu ah kan riahna tur vel kan siam a, tlang lamah chuan kan chho ho ta a, nuam kan ti tlang hle mai kei tiam loin, Tetei  awm ve chuan min ti phur lo vek!

.

Tlai lamah kan camp awmna lamah kan let a, hmeichhe pali Richarda cousin tiam chuan rawng kan bawl ho a..

“Enteh mate ka thi awrh hi I u Richarda min pek a nih hi..” Tetei chuan Richarda cousin Mate tih a kan koh hnenah chuan a han ti a

“A van mawi em em..” tiin a lo chhang a

“Rp.. Valentines Day khan Richarda khan enge a pek che??” Dini chuan min melh zeuh pah chuan a rawn ti ve ngat a

“Ka bun lai hi..” tiin  ka sil ver zungbun bun lai chu kan hmuh kual vel a, Dini chuan over tak maiin min han fak sak a, a ruk tak chuan ka nuih a za..

.

“Duat nuam I ti em??” zan thim hnuaiah in nghen riar a kan thut lai chuan Richarda chu a han ti a

“Nuam tep..” tiin ka chhang ringawt

“Ka nu in a lo sawi a.. a rawn kal ve ringawt alawm.. mahse min ring rawh, nau ang bakin ka en lo.. ani pawh a la naupang a zahna chang pawh a hre lo anih saw..” a han ti a

“Kan inrual reng sia.. mahse kei chuan zahna chang ka hre sia..” kan ti lui ngat a

“Nang chu I danglam a I duhawm bik alawm..” tiin min rawn fawp zeuh a

“I bialnu hlui a awm ve reng chu a ni sia..” ka ti leh hram

“Min ring turin ka tih che kha..”

“Mi rinawmin ring turin tumah an ngen ngai lo..”

“Nih leh min ring suh..” lehlam a hawi hmak

“Hei.. ka fiamthu anih kha” tiin ka lam hawi tir tumin a khabe chu ka han chelh a, a lo hawi duh thaklo “Lo hawi teh..” ka inrin loh lai chuan uar takin min lo fawp a, keipawn ka lo chhang let ve zel a, ka kawr chu hlimin ka awm lam ah a zut chho zel a, kan thaw rang dun telh telh.. phone a rawn ri..

“Van hun lo ve..” tiin Richarda chuan a phone chu a phawrh a

Tetei Calling… hmmm!!

“Loud speaker ah dah rawh” ka lo ti vat. Ala a adah ve mai

“Richard..”

“Um.. enge nit a??”

“Tunah Rpi bulah I awm em??”

“Aw awm e..”

“Mutna tura  I kal dawn ah min lo hrilh a inhmu lawk ang aw..”

Ka lo sa pup…

“Ngatan..??” Richarda’n a tih chuan

“Ka khua ahar alawm.. I ngai ve lo mi khawhar kan inhnem thin dan kha..” Richarda lam ka en vat, ani chuan phone chu a dah ta a

“In lo va che na thin awm ve..” tiin ka kalsan a, ani chuan min rawn zui nghal.. hmeichhe ho mutna tur hmun ka pan a

“Din.. haw ang u, Duhtea motor la chhuak turin hrilh rawh..” ka va ti nghal.. Matei leh Dini chuan mak titakin thil awmzia min zawt a, Matei chuan kan bula a haw ve duh thu a sawi bawk a.. Duhtea chu Dini’n a call hnu reilo te ah alo thleng vat..

“kal ang u..”

“Enge thil awmzia hi.. zan a thim tawh si..

“Kal suh Lalrengpui..” Richarda chuan a rawn ti.. ka hming pum ngatin min koh chu!!!! Chu tih lai tak chuan Tetei a rawn kal, ka sa pup ka insum zo lo chuan ka va beng thuai..

“Rp.. insum rawh..” tiin Duhtea’n min rawn pawt let

“Duhte min hruai haw dawn nge keimahin ka kal dawn..” ka ti a

“Duhte kal ang u.. Mate rawn kal rawh.. nuam ka ti em em bik lo, ka thiannu nuam tih lohna ah hian nuam ka ti bik lo..” tiin Dini chu a rawn tawng chhuak..

“Chard kan kal mai ang aw.. naktuk lamah titi pui tum zawk mai rawh, a thinrim em anih hi” tiin Duhtea chu a rawn tawng a

“Nia.. tih theih a awm lo, mahse Mate nang chu awm rawh I u Tetei’n riahpui tur a neih loh kha..” ti a Richarda rawn tawng chhuak ka  hriat chuan min tin a zawkk .. a van la care em!

“Ka duh lo U Rpi te an awm loh chuan..” Matei chuan a lo ti veleh

“Riak dun ru in pahnih khan.. in tan thilthar anih loh kha..” ka ti tuar

“I tawngkam fimkhur rawh..” Richarda chuan a rawn ti tuar

“Min hmuh leh hi in ring ngai suh..” ka ti a ka kal ta a, ka hnungah  Matei te chuan min rawn zui bawk a.

.

Motor ah chuan thil awmdan ka sawi zawng chuan ka tap char char a, Dini leh Matei chuan min hnem char char. Kan chhungte ho bulah riak tur anga kan in sawi avangin Duhtea in luahah riah kan tum a, a in lam kan pan ta a. Duhtea  hi Aizawl khaw mi an nih loh avangin in a luah a, mahse a in luah ai mah chuan a putea te inah a awm tam zawk a, vawiin kan chhuahna ah pawh   hian a pute car hman a dil a ni.

“Duhte zu min pe rawh..” tap aw tiau chuan ka han ti a

“Ngai lo.. nangmah I in ti tlawm mai mai Rp..” Dini chuan a lo ti a

“Ngai lo.. ka duh” ka dil tang tang hnu chuan min pe a, ka in ta teuh.. ka ruih chu tah lamah a kal.. tap deuh char char .. Zing dar 2 velah chuan ka luak hrep a.. ka chatthla nghal deuh hmak..

.

Zingah chuan lu na tawkin ka harh.. ka tui in ahal huam huam, thawh ka tum lai tak chuan min lo dawm vat..

“I tui in a hal ami??” Richarda aw a ni…

“Hetah enge I tih?? Haw rawh”, ka tap leh ta vak!!

“Tap tawh suh duat, ka tihpalh a thleng nawn tawh lo ang..” tiin min kuah. Dini  rawn lut a, Richarda chuan tui lak chuan lamin room atang chuan min chhuahsan ta a

“Nizan khan kan hnungah an lo haw ve nghal a alawm..” Dini chuan  ati a

“Ka awih lo.. Car pakhatah an leng lo..” ka lo ti vat

“An in hnawh a lawm.. I luak vel a buaipui che kha I hre lo a mi..” a rawn ti leh

“Duhtea leh nangman..”

“Kan buaipui lai che khan a lo thleng a.. a inthiam lo lutuk a sin.. “ a han ti a

“Enteh Din, a virgin tawh lo.. kan inngaihzawn tirh khan ka la thianghlim leh thianghlim loh min zawt a ka thianghlim thu ka hrilh a, keichuan ka zawt ve lem lo.. mahse ngatinge Mipa te hian in vawn thianghlim lam ngaihtuah miah loa hmeichhia te hi virgin tur a min beisei..” ka han ti a

“Mipa leh hmeichhia hi chu a in an tak tak theih hleinem..”

“Mahse a ti tawh a, nizan pawh khan awm ve lo ila Tetei nen khan an awmdun mai thei a sin.. a tan sim a har dawn sin.., ka tan pawn a tha lo..” ka tih rual chuan Richarda a lo lut a

“Tikhan lo titi ru..” tiin Dini chu a chhuak ta a

“Duat ka tihpalh a ni.. engkim kha lo hrilh tur che ka nia.. I hlauh ang khan ka awm dawn lo, hmeichhia hian an zir chhung chu mipa pangngai chuan sex hmanpui kan tum bik lo asin, chuan ka tiam che tuma lakah ka rinawm loh san loang che.. I diklohna chu I mualphona alawm..” a rawn ti a

“Tetei nen unau ang chiahin in la inen a, in pahnih chiah a I awm chang lo awm ta se..”

“Nang nen kan inkar a buai ai chuan Tetei saw ka hmelhriat lo ang ah ka ngai tawh ang..”

“Chutiang a ngai lo.. I rinawm a tawk..” ka ti a. Ani chuan min rawn kuah a..”Ka hmangaih che” tiin a phun sep a.

“I hmangaihna hi hmangaihna dik anih leh nih loh hunin ala hril ang chu” tiin ka lo kuah let a.

>>>>>>>>>>>THE END<<<<<<<<<<<