AGE IS JUST A NUMBER

 

 

“Sang vawiin chu min bazaar pui rawh aw.. “

“Vawiin ah maw??.. half holiday a nih vangin scholarship dil na tur vel buaipui ka ngai asin”

“Enge buaipui I la ngaih?.. bakah scho dil kher I ngai a mi??.. nikum pawn I dil loh kha”

“Nia ka dil ve duh tawh alawm, nikum kha chuan a pa a la dam a, ka dil thei lo a ni mai a, tun kum ah chuan ka dil thei tawh a lawm”

“A ho ee… keipawh ka dil ngai hleinem”

“Dil ngai lo in in khawsak in a zir miau a”

“I over em mai aw.. nih enge tih la ngai?”

“Bank  Account  siam a ngai a.. SBI ah min kalpui la..”

“Bazar ka chak sin le..”

“Naktukah ka bazaar pui ang che, I duh chen chen.. zan thleng pawh ni se..”

“I nu I hlau leh awm em mai”.

 Ka nui ringawt, ka nu ka hlauh zia hi chu min hre chiang tu a piangin sawi nuam tih ah hian an nei a.  Ka pa hi Deputy Commisioner of Police( (DCP) hna chelh reng thin a ni a, ka nu erawhin a hun awl hnawh khah nan dawr lian vak lo siamin a nghak ve thin a ni. Unau pahnih chiah hmeichhia  ve ve kan ni a, ka u zawk hian ka pa hnung  zuiin Police nih a tum ruh hle a, nikum hmasa atang khan  IPS exam hma chhawn tur in a in puah chah chho a, a kum khatna ah chuan a tling mai bik lo a.. a kum leh a tan theih tawp a chhuah chhunzawm zel a. Mahse, vanduaithlak tak maiin ka pa chu damlohna in a tlak buak hlauh mai a, rei pawh in enkawl  hman lo in nikum kum tawp lam December ni 16 khan min boral san ta a ni. Ka u in buatsaihna chu tih thuanawp leh ni mah se tun kum lamah exam chu pek leh a tum ta tho a ni.

 

Ka pa leh ka u ang a Police ngaisang em em ka ni a, ka tet lai pawh a police nih tum tlat thin ka ni. Mahse, ka pa erawh chuan ka u in a hnung a zui tawh tho a vangin hna dang thawk turin min fuih nasa thei hle a. Nikum khan ani hi chan lo ila chuan ka thil tum ruk chu hlawhtlin ngei tumin a bei ngar ngar ngei ang, mahse ka pa tan a ka tih theih hnuhnung ber tur a nih tak si ah chuan a duh ang ngei a Lawyer nih tum chuan ka rilru ka siam chho mek ta zawk a.

 

Chhungkaw pali chauh ni ta chu pa berin min kalsan chu a tu a mahin kan tuar thiam lo a ni ber e, kei ngei pawh tleirawl hlim em em leh engtik lai pawh a thawveng thin khan ka mize hlui tam tak ka paih a, mahni inkiltawihna in ka khat fo thin. Ka pa ka ngai thin em em a, a hna vang a hmun hran hran a awm tawh ni mahila ani nen a nih phawt chuan kan chhungkua kha kan thla a muang thei em em a ni.

 

“Heiii.. enge I ngaihtuah?” ka phu deuh zawk a

“I hman a mi kal ila”.. kan kal ta nghal a

“Ram.. vawiin ah tih fel tum ang aw, chhuah vel a buaithlak bawk sia”

“Nia kan tum dawn nia.. a U kan be pah nga”

“Tu I U maw??”

“Ihhh.. apa  fa bik a nia, a chal tawh lutuk.. bakah a nelawm vak lo ..hahah”

“A thawk a mi?”

“Aww.. thawk e, thla hmasa khan a lo haw a.. heta a thawh dawn vangin”

“Tih zia hlauh chu..”

 

Kan school chhak lawkah Taxi kan hmu hlauh a, Dawrpui lam pan chuan kan chuang phei ta a. Kan thleng tep tawh tih ah thil ka hrechhuak  zawk, ka bag ka check nghal.. chu tih lai chuan kan lo thleng der, ka mang a van ang em. Bank luhna tur a kalna an dawh phei ah chuan ka thu a ka zawng char char.. Ramdini chuan mak tih hmel takin thil ka theihngilh leh theihngilh loh min zawt a, ka chhang lawk thei lo..

“Sang ngati ngeee?”

“Pawisa…”

“A bo maw..”

“Aih..ka theihngilh aniang”

“Lo kal phawt teh”  ti chuan min kai lawp a a zui ve mai a, Bank chhungah min luhpui a.. inchungah lamah a kal a kal zui ve zel, Bank Manager pindan kawngkhar bulah chuan a ding chat a

“Enge kan tih daww?” ka sawi zo hman lo tep, pindan kawngka a hawng a , a lut ta mai.. luh ve mai loh chu tih theih dang ka nei lo. Manager thutphah ah chuan tlangval smart tak, ngo veng mai leh hmel hmuh nuam tak a lo thu a.

“Ehe.. he tah enge in tih?”

“U ihmaw.. ka thiannu in buaina a tawk a” ka zak ngei mai, ka sa pup pup in ka hria

“Enge aa.. ?” a lehkha puan chhiar lai ni awm tak chu a dah thla a

“Account a hawng dawn a, a pawisa a ken theihngilh a, va lampui lawk ang, I carin” ka zak lutuk chu Sangi ka va kheuh

“Tunah maw.. hna ka va thawk laklawh ve ”

“Mawh.. u ti mai teh, Kulikawnah daih an awm a a buaithlak a lawm”

“Engzat nge ngai a”ti chuan ka thiannu u hmeltha tak chuan min lo en a

“Sangsangi” Ramdini chuan alo ti vat a

“Aw.. sangsang pawisa engzat nge ngai?”

“Ihh  Rs.1000 ania.. mahse a pawi lo, nidang ah a tih theih a lawm”

“Saw lamah sawn account hawn nan a lehkha fill up tur a awm a lo va fill up ta che u, chuan kha hei hi hmang rih mai rawh” tiin a wallet atangin cheng 1000 tlang a rawn phawrh chu mi pe a, in thlahrung tak chuan ka lo la a.

 

“Hei.. min ti zak lutuk, khatiang khan I ti dawn tih tal min hrilh ta che”

“Enge a ho mai mai.. nangmah vangin ka biak phah nih kha…”

“Maww..”

“Engmah.. ti vat vat ang”

“I u kha enge a hming?”

“U Roberta nih kha..”

“A nelawm loh I ti sia”

“In ah chuan maw.. tumah a be ngai lo, a roomah a tawm tlat zel”

“Chu vang a mi in in a ka lo kalin ka hmuh ngai loh?”

“Kum hnih kan in hriat tan na chauh a nih hii… hmun dang ah a pa in a dah char char a lawm , Mba(Banking) a zawh hnu in kum thum chhung hna a thawk leh a chuan he tah a lo haw ve chauh.. kum khatah vawi hnih vel bak a lo haw ngai lo.”

“A van upat tawh hmel”

“1987 ah a piang..”

“Nimaw.. A u feeee a nih chu”

“Kum10  chiahin a upa.. min van zawt chik.. I thinlai deuh mi”

“I hmel anih chu” ka kal hmak.. avan mak em em, khatiang tawngkam sual hmel deuh deuh kha ka hman loh na a rei tawh lutuk

“Haaahaha Lalsangsang.. hmana nangmah kha I ang”.

 

Fill up tur vel kan tih fel hnu chuan ka rin aiin a lo tlai daih tawh mai, hun a ngaih rei dawn leh dawn loh ka zawh lah chuan naktuk lamah pawh ka lak theih tho thu min lo hrilh a. Naktuk lam a kal hman ni I la mualpho tak in mi pawisa ka hman sak pawh a tul kher dawn si lo a. Eng pawh ni se a pawimawh ang ang hi ti phawt teh ang.

 

“Ram.. I u signature a ngai a nia, va la teh nangman.. a tlai tawh si, hmanhmawhin”

“Nangman va ti rawh.. lawmthu hrilh pah nimai”min nawr pawp pawp. Pindan kawngka kik pah chuan ka lut a,

“U Robert, tah hian I signature a ngai a?”

“Aw, khawi maw..” min nuih seng pah chuan a lo la vat a “Ramdini  te nen engtik atangin nge in inkawm a?”

“Ih.. Synod a ka luh atangin.. nikum atangin tihna nih chu”..

“Class 12 ve tho a mi I nih??”

“Aw ni e…” , a sign mial mial a. A sign zawh ka chhuah dawn pah chuan ka hawi let leh a

“U Robert nghah chhung a la rei angem?”

“Midang Account hawn tum an tam ve em?”

“Aw, an awm ve nual a”

“I hmanhmawh viau ami?”

“Umm anu chiah inah a awm dawn a, a u a zin sia”

“Anih chuan I passbook leh I ATM card vel chu ka lo lam sak mai dawn che mi niang”

“A tih buai loh che chuan… chuan I nau lo thawn la naktuk ah, a harsa a ngem?”

“Harsa lo e, ka lo lam sak ang che”

“Ka lawm lutuk aw..”

 

In ka thleng chu ka nu a lo mangang hman ngei mai, min hauh hrep ka ring a nia, mahse min hau miah lo.. mak ka ti zawk lutuk. Bank account hawn ka tum thu chu a hria a, mahse ka scholarship atan a hawng ka ni tih erawh ka hrilh duh lo a ni. Dik tak chuan ka pa hna avang hian nun nuam takin kan nung chho a, retheih awmzia pawh keini unau hian kan hre ngai lo. Mahse, thil kal phung hi ka hre ve vek a, ka pa pension hlawh leh ka nu in dawr a deh chhuah ve hmang hian an kham khawp chu an hmu dawn lutuk tih hi…chuan, a hma ang kha chuan duh duh ka nei thei tawh dawn lo a ni tih pawh ka hria a ni.

 

Ningani zing a ni a, school a kal turin hmanhmawh takin bus stand ka pan a, U Roberta pawisa ka rulh tur chu ka theihnghilh hlau em em in ka uniform kawr ipte ah ka ak a. School ka thlen chuan Ramdini chu a u in ka thil tur a thawn leh thawn loh ka zawh chuan engmah a thawn loh thu min hrilh a, ka rilru a buai ngei mai, mahse a cheng sangkhat a puk chu min lo pek sak mai turin ka ti ta tho a.

 

Zanah chuan U Roberta’n atukah a lo thawn theihngilh ka hlauh em avang chuan ka thiannu Ramdini chu ka va text a

“Ram.. I U kha tunah ka passbook vel kha min lo dil sak teh, weekend a ni leh mai dawn si.. chuan pawisa kha I pe em??”

“Keiman ka pe lo, kan in a hnathawk ka pek tir… a room ah a tawm tlat a.. nangman lo hrilh mai la”

“A chi loh a lawm.. bakah balance pawh ka nei lo.. I U a nih kha ti mai la”

“Kan inah I awm lo a, I hre lo anih kha, ka be peih lo.. hmanni kha chuan nangmah vang chauhin nih kha ka biak tawp”

“Tun chiah ka tan ti leh mai la”

“Aih!!”

“Ramdinsang!!!!”

“Enge Lawmsangpui”

“I sual khawp mai”

“Min khawngaih zawk laaa.. kha a number, text tawp mai rawh 9615986012”

“Uiiii.. I mak.. MUTTUI!!!!”

“Enge.. ka tihpalh !! naktukah ka hrilh vek ang che”

 

A van ho tak, min biak sak ve mai awm.. mahse a U nen an inkar a tha lo te pawh a niang… ka biak ngei chu a ngai a ni. Mahse a pawi ber mai chu balance ka nei lo, bank manager ve ual va text tawp ka inthlahrung bawk si. A number chu ka save te te a… whatsapp ah ka check chhin a, a last seen a la rei vak lo.. huaisenna zawng zawng sawm khawmin ka va text ta tawp

“U Robert, Sangsangi ka nia… ka document vel kha I theih hram chuan naktuk ah I nau I lo thawn thei a ngem?”

.

.

.

Darkar thum hnu ah pawh min la reply lo, ka phone ka en chhen mai.. ka va be kher kher chu ka va inchhir.. mahse a online leh miah lo tih ka hmuh chuan ka rilru chu a dam ve deuh!! Ka rilru chuan ka zak chem chem., ka inthlahrung em em bawk… ka tihbuai zia a ngaihtuah let a ka zak lutuk chu ka lukham te chu ka tham leh vak thin.. “a van atthlak e aw..” Zan dar 11:30 a pel deuh chiah a, mutthilh tum a ka khumah ka mu kur tawh a, ka phone chu a nghawr der der a, rang takin ka en vat a.. ka awmdan leh em em chu  ngaihzawng message nghakhlel ang ka in ti rilru hle mai..

“Vawiin khan ka office tur ka chhuak hma deuh a, kan in a hnathawk hnenah ka dah a a lo pek theihnghilh a lawm mawle.. naktuk ah a lo keng dawn nia”.. Huizz.. ka reply dawn nge dawn lo, ka awm hmunah hian ka lo zam em em ringawt..lawmthu sawi tal angai ang chu,,

“Aw.. a pawi lo, ka tibuai che sia nuam lo chu ka ti lutuk tho a mahse ka rilru ah a awm reng a.. ka lawm lutuk a nia”

“Ok.. No problem”. Ka rilru a nuam sawt, phone chu dahin mutthilh ka tum leh mek lai chuan a rawn ri leh a, “enge maw ni lee” ti in ka en leh, ka thiante an nih ka rin vang chuan en pawh ka phur lo

“E.. chuan I pawisa rawn thawn kha ka hmu e aw J”.. ka nui suk, a van polite reuh tak. Hmeltha si, pian nalh bawk si, smart si.. mi nazawng thawh theih loh hna a la thawk zui… hmmm… thil tul lo ngaihtuah ai chuan mut hi a thaa.

 

A tuk school ka kal chu Ramdini’n ka document min pek pah chuan

“Awwwiii.. mak lutuk Sang..”

“Engmaw??”

“Nizan khan I text tak tak a mi?”

“Tu?”

“U Roberta”

“Awww…  ngatinge??

“Hahaaa.. I text ngam pawh ka ring lo a”

“Tih theih dang ka nei hleinem.. min pui duh si lo a”

“Hmm.. 11:30 ka mut tawh hnu ah ka room kawngka kik ri in min ti harh a, anu maw ka tia thinrim tawkkkin ka tho a ka va hawng chu U Robert-a kawngka bulah a lo ding kur a..”

“NImaw.. chuan engtin??” eng vang a hlim ta em em nge maw ka nih le..

“I document hi min pe a, I thiannu naktukah lo pe rawh a tia”

“Mahse.. enge a mak vak na??”

“Ihmaw.. Sang, ka U hi a nu in kum 9 anih laiin a boral san tawh a, apa nupui hmasa tih na nih chu.. amah chiah hi fa an nei a.. chuan keima nu leh apa hi an innei a, a U hian a nu kha a ngai thei em em a.. ka nu pawh hi a ngaithei vak lo a, keimah pawh min hua chu ka ti lo.. mahse min ngaina loa.. ka pawh ngam thin lo. Ka nu pawn a khawngaih em avangin a duh dan anga awm tir turin ka pa a hrilh thin a.. chuvang chuan a nia hostel ah leh hmundangah a awm char char”

“Ram.. ka van khawngaih”

“Chuan maw.. Sang, nizan a ka room a a lo luh kha ka hriat theih chinah min pawh hmasak ve awmchhun a ni.. ka room leh  ka nu leh pa te room lamah a kal ngai lo.. inching, a ma roomah a tawm tlat thin a”

 

Nilengin ka rilru ah U Roberta mawlh chu a awm.. kei pawn ka pa neih chhun ka chan tawh a, a nat dan tur hi ka hriatthiampui em em a, ka lainat takzet a ni. Kum 10 a nih atangin a nun chu mal takin a hmang chho chu a nia…kan school bang haw lam chu Ramdini nen bus stand lam panin kan chho a, Ramdini te hi Khatla a an awm avagin e in haw lam hi chu a haw mai thin a, kei chu Kulikawn ah daih kana wm avangin bus a haw ngei ngei a ngai thin a..

“Ram .. I U hi ka khawngaih e..

“Nia ti raw.. keipawn ka lainat.. bialnu lam tal hi ngaihsak ve se a tha tur a nia”

“A nei ve awm e..”

“Teuh lo mai.. apa pawn arrange mai chi a tia..” a nui pah deuh huk a

“Nia .. neih tir vat vat rawh u.. hmeichhe tam tak an awm alawm.. ani te chu perfect e”

“Perfect aa..a nupui nih a hreawm ngawt ang ka ti thin a”

“A milpui an awm ve awm e..”

“Saww.. bus ah sawn a ruak a la awm hmanhmawh rawh..”

“Aw ka kal.. bye..”

 

Zanah chuan U Roberta chu lawmthu hriulh ngei ka duh a mahse ka zak ve tho bawk si.. mahse ka tih loh chuan a mawi bawk si lo.. a online lai ta chuan ka va text ta a..

“U Robert.. a document chu ka hmu e.. ka lawm lutuk aw.. awm lo la chuan ka buai ngawt ang”

“A ho lutuk.. kan hnathawh chhan a lawm..”

Kei aia upa fe anih vang nge ka biak hian ka zam em em zel le aw.. ani nen hian rilru in zawmna kan nei tlat hian ka hre thin.. hmangaih tak chan ve ve a nunphung danglam ta ve ve kan nih vang te a ni mah na.

 

Thla dawn a vei leh ta, exam a hnaih tawh avang in lehkha zir lamah ka rilru ka pe nasa leh zual a. U Roberta nen pawn kan inbe ngai tawh lo a, han inbiakna tur chhuanlam tha chu awm se a ruk tak chuan biak ka chak a ni. Ramdini te inah chuan vawi 2 vel chu ka kal hman a mahse a hma nag bawkin ka hmu ngai chuang lo a ni.

 

Vawikhat ka school bang chu number  save loh atang hian missed call a lo awm nual a, thil pawimawh aniang tiin ka call a..

“Hello”

“E.. tunge aw.. missed call a awm a”

“E.. Sangte.. hei I thiannu Dindini nu ka nia”

“Ehe.. Nu Papuii maw..”

“Aw.. ni e, naktyk tuk leh hi I thiannu birthday a ni tih I hria em..”

“Ehee.. ka lo theihngilh tep a lawm.. min hrilh lo la chu ka hre miah lo ang”

“A pawi hleinem.. hei a cousin te an awm mang si lo a, tlaia in thlakna tur lo keng la min rawn pui thei lawm ni ka tia..”

“Nia chu tia puih in ngaih te chuan ka lo kal ang”

“ Hei I thiannu hian a buai ang a ti tlat che aaa”

“A van ho tak.. a birthday ah te chuan buai mah ila hun insiam tur zawk alawm ka nih”

“Nia.. inriini te a ni tho a.. a nih ka dah ang aw..

“Aw le.. anih leh le”

 

Ramdini piancham ni chuan chawhma dar 11 velah an inah ka phei a.. tlai chaw ei tur vel an lo buaipui tan mek a, Nu Papuii, Ramdini leh an cousin hmeichhe pakhat leh an in a hnthawk te pahnih an lo awm a .. a theih ang ang chuan ka lo pui ve nghal a. U Roberta chu ka zawng ru reng mahse ka hmu miah lo. Chawhnu dar 2 lam a ri tep tih chuan a zualpui chu kan zo fel a, Nu Papuii chuan inbual turin min ti a. Mahse, bathroom kan in daih mai lo.. Ramdini’n a room bathroom a hmang a, an cousin pakhat chuan a nu te bathroom a hmang thung a, Inpui a bathroom ber lah an awmpui ten an hman avangin.. Ramdini chu ka lo nghak mai ang tih ka hrilh a. Chu tih lai tak chuan, an inchung chhohna step a kal pah chuan U Roberta chuan “Ka room bathroom han hmang rawh.. Sangsang” ka phu zawk, Nu Papuii ho ho chuan kan hawi ka hau a.. “Nia nia nia.. a rem chang tak ang, I U Roberta bathroom han hmang rawh Bawihi” ti chuan Nu Papuii chuan a lo ti a.

 

A roomah chuan ka lut a, a fel fai in a nuam hle mai, ka pa ang mai a in vawng fel a ni. Ka thawmhnaw hak lai chu phelhin ka bathrob ka ha a bathroom ah chuan lutin shower ka on a, tui lumin min phuh siau siau chu a nuam dangdai hle mai, nge U Roberta bathroom ka hman vangin nuam angin ka hre zawk?? Ka rilru pawh ka hre thiam lo a nih hi..  A hmeltha in a pian a nalh em em a, a hmel en chuan a kum hi awih a har zawk.. mahse a tih chi loh lutuk, a mizia te nen zawng zawng leh kan kum inthlauh zawng, kum sawm teh meuh inthlauhna te hi ka ngaihven lohna chhan tur chhuanlam tha tak a ni.

 

Ka inbual zo chu brazier leh panty ka in bel hnu chuan ka thawmhnaw hak ka tum a, ka keng lut lo tih ka hrechhuak.. a van atthlak tak em.. kawngka hawngin roomah U Roberta a awm leh awm loh chu ka en te te a ka chhuak ta a. Hmanhmawh lutuk in Ka vest chu ka ha a.. skin tite ka ha leh dawn chiah tih chuan kawngkhar in hawng ri ka hre ta mai..Lalpa leh!!! Engtin nge ka tih ang.. ka lungphu rang nen ka  khur nasa lutuk chu ka ha tha thei lo, ka ke la huh nen chuan vaw leh khatah chhuat marble ah chuan tukhum sawh dawt in ka tlu ta thuai a.

 

“I na em.. engtin nge I awm”. Lalpa ka zak lutuk.. ka meng ngam dawn lo in ka hria.. mahse mitchhing reng  chi lah a ni si lo.. mahni a thawh tum pah chuan

“Aw ka tha lutuk”

“Khawi ,ka lo pui ang che”.. ka tha khur nasa lutuk chu thu nun ka tum nasa ngei mai mahse a har a ni. K thu thei hram…  U Roberta chuan ka bathrob chuan min lo khuh a

“I tha em?? Inthlak rawh aw ti khan ka lo va chhuak ang..”

“Aw.. ka tha..  “

Kawngkhar lam pan chuan a phei a, a chhuak tep tih chuan a ding a, rawn hawi let lem lo chuan   ““Sangsang engmah thleng lo ang ah ngai rawh”. Chhang mai lo chuan a chhuak lai chu ka en reng ringawt a, ka zah chu a hlau ve hle mai.. mahse chu chuan ka zahna a ti tawp ringawt thei si lo. Ngatinge a bulah hian ka chet fuh ngai reng reng loh lee..??!!

 

Mi sawm ho an lo thleng sap sap a, kei pawh a nalh thei ang berin ka inchei a. Ka sam hi a kir sa a nih avangin hmanhmawh thil thu ah chuan chei ngaihna vak a wm loa, mahse midang chuan nalh min tih pui ve em em thin. Kan class a inkawm ngeih zual ho in kan rel tlang angin kawr fual rawng pawl tak hak theuh kan tum ang chuan keipawn ka ha a, ka pian ti lang chiang em em tur a tite a ni a, sandal 2 inch vel a chhah a sang euh chuan a hma zawng aiin min ti lang sang bawk a, keima tawkah nlh ka in ti ve hle a ni.

 

Thiante an lo thleng a nuam an ti ngei mai tlai dar 4 ah hunserh kan hmang a, zan riah eiin a zui nghal a..  Ramdini chu a pa in a duh berte a han sawi tir a, a hlim ngei mai.. Ka pa ka hrechhuak a, ka ngai takzet a ni. Ani chu awm se ka piancham ah tiang hian a ti ve awm si a.. insum fe lo ila chuan ka tap thei hrim hrim. Mahse, ka in ti thawveng lui hram hram a.. dik tak chuan engkim hi kalsan vek ka chak takzet a ni.

 

Ka thiante bulah chuan ka zia chho ve mai a. U Roberta pawh a rawn lang ve zeuh zeuh, ka thian dang ten an han star mai mai khawp a, Ramdini hnenah a number an dil thul, mahse a pe duh thak lo.. ka lo lawm rilru ve em em ringawt. Zan lamah chuan an inhnuai ruak a party neih tumin kan inbuatsaih a, kan phur tlang hle. Mahse, thil thleng kha ka hrechhuak leh thin. Ka thiante chu lam hah hah pahin an lo kal a Vodka a bur a kengin an in ang pawp pawp a.. music lah duh ang thangin a bengchheng tawh

 “In ve rawhh”

“Ka duh rih lo..”

“Engee..kha in pawp pawp rawh

“Heii.. a kha lutuk.. shot glass min lo pe rawh”

“Haha.. min lo nghak lawk Sangbawiihh”

“I rui lutuk nge.. fimkhur rawh..

 

Kimi rawn let chuan Vodka leh Shot glass a rawn la a, dawhkan ah a nghat a min thlit sak thlap.. tam ka in thei lo

“Kim a kha lutuk.. ka in lohna a rei tawh lutuk a.. beer emaw port wine ka in zawk mai ang “

“I tih tlat te chuan.. zanin chu waitress ah ka tang mai ang aw.. beer in rawh I inhmeh ber.. I in theih thin em kha”

“Haha.. lo la la..”  Ka pa boral hnu hian hetiang a ka awm leh vawikhatna a ni.. A hma chuan Party leh he heu lawm ve tak.. thian ho a awm nuam ti tak ka ni ve thin a, mahse a lo danglam theih em a ni. Midang pawn mak min tih ve em em na chu bialpa ka la nei miah lo hi a ni, star chu ka nei nual biak pawh kan in be nasa mahse ngaihzawng tak taka tan hi chuan ka ti thei leh tak tak thin lo a ni. “Zanin chu hlim thei ang berin hun ka hmang ang”

 

Beer bottle leh glassa arawn la leh..

“Wowww.. my favourite..”

“Huhu.. Sang nikum a nangmah chiah chiah kha I ni..in vek rawh”.

Ka thli a ka in nghal pawp pawp.. ka thiante’n min koh fiam nan a “Beer Master” min tih thin hi a lo dik a nih hi.. ka la in thei reng.. a hma angin.. Bottle khat in zawh chhung a rei lo hle mai.. a dang min hawn sak leh. ka in laklawh lai chuan midang an lo kal

“Mate a pangngai hi in tel rawh.. I zunah a kal rai vek palh ang”. Ka thiante hian min lo van hmangaih em em ve.. a tha lo lamah hian.. haha.

 “The thrianzzz ho khaa.. lo kal ru lam turr..” an rawn au chel chul mai, min lo kai a lam tualah kan phei nghal, zahna awm tawh lo kan lam ta vak vak a.. ka loin theh nasa mah mah a niang, ka lu a hai lutuk..  bathroom  ka thleng zo dawn lo.. tukverh ka kan thawk a balcony lamah chuan ka luak hrep a.. ka harh hawk, ka pa ka hrechhuak a, a fanu hi hetia ka awm hi min hmu angem le?? A zak ngawt ang ka pa chu.. “Pa min ngaidam rawh aw” tiin ka phun char char a, chhuatah chuan ka thu hnawk a. Ramdini leh a cousin Mawitea an lo chhuak a

“Sang,.. I tha em?”

“Um.. Ram haw mai ka duh.. ka zawi vek”

“Nia .. a pawi lo.. thlah tu tur che ka va zawng ang”

“Keiman ka lo thlah mai ang” Mawitea chuan a lo ti vat a

“Na.. I ruih ve tho kha, tlem a fim deuh hlek ka va zawng ang..” Ramdini chuan a ti a

“Ngai lo.. nuam an tih tlan em saw.. haw hma ka duh ve tho a”

“Ok.. Sang I hreh em” Ramdini chuan min lo melh zeuh pah chuan a rawn ti a

“Aih.. kal I la” tiin kan chhuak ta a..

 

Pawn boruak chu a vawt reuh phian mai, mahse ka harh sawng sawngin ka hria. Mawitea bike va la  chu ka lo nghak a, rei lo te ah a rawn tlan phei a.. ka lam a rawn hnaih tep tih ah ko bang chu a su thuai a, ka hlauthawng lutuk chu ka lo au vak a. Khawngkharpui lam atangin mi pakhat a rawn chhuak a, a rawn pui vat a.. a thim deuh avangin tunge a nih ka hre thei mai lo..

“I tha em.. Mawia ?” a aw atang chuan U Roberta a ni tih ka hre nghal a

“Lawk aw.. ka ban hi”

Inchung lam a awm ho chuan an rawn pui hlawm a, inhnuai lamah chuan music ri nen engmah an hre lo a ang khawp mai. U Roberta chuan “Sangsang in thlah in tum a mi”

“Aw..”

“Lo kal rawh ka lo thlah mai ang che”

“Aih ngai lo.. thian dang te pawh an awm a lawm”

“Ni e.. Sangsang I U Roberta chu va in thlah tir mai rawh” Nu Papuii chuan a lo ti a.. inthlahrung tak chuan ka awm ve ta a. Car rawn la chhuakin U Roberta nen chuan kan in lam panin kan in khalh chhuak ta a.

“I ti ve thin elaw??”

“Maw…”

“I Rui ve thin a mi?” ka zak ngei mai.. chhan lawk na chang ka hre lo

“Aw… ngatinge??”

“Ngati vak mah.. “

“Engtin nge I lo chhuah hman zawk a??”

“I bag I theihngilh a.. rawn pek che ka tum a”

“Ehe.. ka inthlakna lo kenna kha maw.. ka theihngilh daih”

“Seat hnung lamah khian a awm”

“Ka lawm lutuk aw.. mahse, engtinnge ka haw dawn tih I hriat??”

“Hehe..” min nin hmel deuh chuan a ti a, zawhna ka ngah thin lutuk hi chu aw..

“Ka…” ka sawi zawh hma chuan a rawn tawng leh a

“Ka room verandah ah ka awm char char lawm..”

 

Ngawih reng hi ka tan a tha ber tih hria in ka ngawi ta reng a. U Roberta pawh chuan a motor khalh lai chiah a ngaihsak tih hriat takin a hma lam chiah a melh a. Vawikhat ka va mit sir deuh chu min lo melh ve tho a, kan in hmu chiang ngei mai.. hmun dang kan hawi sawn dun vat a.

“Rui ve tawh suh aw..”

“Maw..??”

“I inhmeh lo ka tia..” ka rilru chu eng tin maw ni tak hian a hlim riau, min ngaihsak a ang a a lan vang pawh a ni mah na.

In ka thlen chuan ka nu room chu zawi te in ka hawng a, eng tlemte hnuai ah thil a lo chhiar a, Bible a chhiar a ni tih ka hre nghal mai a.. va biak chu ka duh mah se ka rim a hriat ka hlauh avangin ka room lam ka pan pah chuan “Nu ka lo haw aw” ka ti a. Khum ah chuan ka thu a, ka rilru ah ka pa a lo lang a, zanin a ka awm dan kha a dik lo takzet.. ka pa lakah ka in thiam lo lutuk, mi lak tlak loh tak ka ni.

 

 Ka mu fel chiah tih chuan ka thil theihngilh ka hrechhuak.. ka bag!! U Roberta car atang khan ka la reng reng lo.. Enge maw ka ngaihtuah thin le, ka cell phone a rawn nghawr der der, ka en chuan ka phu zawk, U Roberta call a lo ni..

“Hello”

“Sangsang.. I mu tawh em?”

“Aih mu chiah lo…eng lo, bag kha”

“Nia.. ka lo tlan let ringawt.. I lo chhuak lawk hman em.. a tlai tawh sia lo luh a nuam chiah lo” sana ka en a, dar 11:47 a lo ri chiah a

“Aw le, ka lo chhuak dawn nia”

Thawm dim thei ang berin ka tho a, ka nu room chu  ka en a, a lo thim thiap tawh a..  a la muthilh chu ka ring chiah lo, mahse ka chhuak tih a hre tur a ni lo. Pawn ka va chhuak chu kan in kawt ah U Roberta chu  a car bulah a lo ding a, ka bag a lo keng bawk a..

“Ka van tibuai zing tak che.. I thleng thui hman em?”

“Aih thui lo e.. a ho lutuk” ka bag chu min pe a, ka lo la vat a

“Lo lut ve hrim hrim la” ka rilru chuan a lo luh chu ka hlau lutuk ringawt

“Ka lo luh I hlauh em kha” a nui suk a.. a fiamthu thawh ve ka vawikhat hriat na. A mizia hi Ramdini sawi ang a hmuh ka tum lutuk nge ka lakah hian a danglam riau a ka hriat

“Ihh.. vawt iti em” kan ti ringawt a.. kan lai dun tih kan in hre ve ve a niang chu.. kan nui dun leh ringawt

“Ka kal tawh mai ang aw..va mu tawh rawh.. I mutna bulah tui in chhawp la.. I tui in a hal ngei ngei ang” a nui leh suk, a van hmeltha tak

“Pentawng khawp khawp in ka in lo..heheh”

“Lut tawh rawh”

“Aih.. hei kan in a hnaih bik em hi.. kal hmasa rawh”

“Anih leh aw..” ti chuan carah a lut a, alo dak chhuak leh hram “Lut rawh”

“Naa.. van ho tak..anih ka kal.. muttui aw” ti chuan ka phei a… ani pawn a car a start nghal a. Lut mai lo chuan kawngkhar bulah ka ding a, a tlan liam dawn chuan a kut vaiin min lo bye bye a, nui vur vur pahin ka bye bye let nghal a.. in chhungah ka lut ta a.

 

Huizz.. ka za cheng mai, hetiang em em a hlim leh phur hian ka lo awm thei a ni tih ka hre chiah.. Ka mut hmunah te hian ka khi leh vur vur thin. “Hetiang hi em ni kan mipa duh tak te kan tawn a kan awmdan chu??”.. a ni ngei ang, ka rilru a keimah ka in rinhlelhna awm chu paih bo in kei aia kum 10 a upa tlangval hmeltha tak hi ka duh tih ka pawm thlap a ni. Ka ngaihtuah nasat pauh leh ka phur telh telh, ka muhil thei dawn lo takngial in ka hria.. zing dar 2 ah pawh ka la mu khi vur vur chu a nia.

 

Ka room khawngkhar chum ri dawt dawt ri chuan min ti harh zawk a.. phak tawkin ka tho a, ka va hawng a ka nu chu a lo lut a

“A tlai tawh lutuk.. inkhawm I tum lo mi?”

“Tum e..”

“Nizan khan I lo haw hnu khan I chhuak leh a mi?”

“Enga..?”

“I thawm ka hria lawm”

“Ka bag ka theihngilh a, Ramdini U in min lo pe a..”

“Inchhungah luh tir ta che.. mipa pawn a in koh chhuah tir hi thil zahawm a ni ngai lo..in ti fai la chaw ei ang inkhawm kan tlai ange”

Ka nu chhuah velah chuan ka phone ka en nghal a.. Lalpa leh!! Hei chu ka beisei piah lam a ni, U Roberta message a lo awm

“Morning.. hangover em aww :D” .. ka au tuar..

“Lawmsangpui” ka nu in choka lam atangin alo ti ve bawk.. 

“Enge ka hmingpumin min ko ziah suhhh”…. Thinrim ang tak chuan ka awm a mahse ka hlim ani, ka reply nghal

“Morning… hangover khawpin ka in lo ka tih kha :p”

Ka chaw ei te chu a reply chhiar chakin ka hmanhmawh ngang mai.. ka nu chuan min en hrek hrek. Ka nu nen hi chuan kan in mil lo ve hrim hrim a, kei hi ka pa fa, ka u hi ka nu fa tih te hial hian kan chhung dangte hian min fiam thin. Ka hlimna avang hian ka mize hlui harh tak kha a rawn kir leh ni berin ka hria.. mahse ka insum fe chu a ngai ang, ka nu in min hauh tum a min chhan tur ka pa a awm tawh si lo va.

 

Chaw ei kham chuan phone ka en..

“Inkhawm nuam aw..” nui vur vurin ka type a

“Nangpawh leee..”

Chu chawlhni chu chawlhni a zawng a nuam ber a la ni ang, khatiang em em a ka thil tih a ka phur kha ka hre ngai lo. U Roberta nen inbe zawm lo mahila a hma a kan intext dan khan rei tak a daih a ni.

 

Zanah chuan ka lehkha zir tur chu ka in chhawp ve tak na a ka zir thei vak lo… Dar 8 velah chuan Mawitea text a dawng a..

“Hei.. luliannn!!”

“Engee?”

“Nizan ka accident kha I la hre thei em..?” Awiii..!!! ka hre chhuak thut, keimah vang a la ni zui

“Ui leh Mawi… tunah enge I an tawh  a..  tihpalh lutuk aw”

“Hmmmm… ei thlawtt lo”

“Enge??? Engtin nge I awm sawi teh”

“Ka ban ruh a tliak”

“Enga??.. engtin nge I awm, voin ah I inentir nghal em?”

“Chawlhni anih hiiiiiiiii”

“Casualty ah te”

“Naktukah kan kal ang.. tuam khawng a ngai a.. min kalpui la”

“School kal ngai lawm”

“Rami pawh a lo kal dawn”

“Chu in pahnihin in kal theih chu..”

“U Roberta kan inhruai tir dawn” ka danglam deuh zawk mai… ka rilru chuan “a kalpui awm lo em mai” ka ti a

“Chu in unau thum thum in..”

“Rawn kal la nimai.. tu vang nge ka tluk khaaa”

“I ruih vang..”

“Lalsangsang I nghal em mai… ti hian ti rawh, chawhma kal la, chawhnu ah leave dil la..”

“Anihhh.. anu ka dil phawt ang”

“OK.. I phone lo keng la aw”

“KK”

 

U Roberta chuan a hruai tak tak angem le.. A hruai chu ka ring chiah lo mahse Mawitea a awm chuan a hruai mai thei bawk. Huizz.. ka rilru a buai.. Mahse, kalpui chu a tha hrim hrim, keimah vang a tlu a ni pakhat ve bawk nen. Ka nu chu chawhnu chawlh ka dil a, a chhan vel ka sawi chuan a lo phal ve mai a, chawhma chiah kal tur chuan ka inbuatsaih ta a.

 

A tuk chuan Ramdini chu school a lo kal loa.. chawhma kan kal zawh chuan keimahin ka chho a, Sikulpuikawn atang a bus lak mai ka tum a, bus stand ka thleng tep tawh tihah ka phone a lo ri a, U Roberta call a lo ni a.. a kal ve dawn a nih chu ka ring nghal deuh bur a..

“Hello”

“Sangsang.. Mawitea te bulah I awm em?”

“Aih school atangin ka lo chho mekk”

“Ke in maw..”

“Umm”

“Ti khan lo awm rawh ka lo phei nghal ang..”

“Bus stand ka thleng tawh lawm”

“Lo awm mai rawh” a vin deuh lek lekin ka hria

“Aw le..”

 

U Roberta a lo thlen chuan Hospital road lam panin kan in khalh phei nghal a,

“I kal ve nghal dawn an ti maw ka tia..” U Roberta chuan a lo ti a

“Chawhnu lam a chhuak vek tur kan ni lo mi??”

“Nia min hrilh dan chu a nia..”

“Mawitea hi ka call a chhang thei miah loa”

“I nau call mai la”

“A number ka nei loa” tim deuh tak chuan a rawn ti a. Ramdini’n a sawi an inkar vel kha a dik a nih hmel e.

“Tunge hruai tur che a ti a..” ka zawhna chu a awm ang lo em le?? tih ka rilru ah a lo lang nghal

“Mawia’n nizanah a lo sawi a.. hei office ka haw hma phah ringawt

“Kan kalpui thei reng sia.. a van ti ho tak”

“Nia.. Ramdini a kal dawn tih a sawi lo a”… Ramdini kal tur thu a hre loa, ka kal tur thu chua hria a nichin pawn min lo call a.. amah hmuh ka chak ang hian a chak ve tho a mi le.. hei hi a tak tak a nih vaih chuan ka beisei piah lam a ni..

“I phone a rik kha” ka harh chhuak zawk

“E … aw”… “Hello”

“Sang.. khawnge in awm”

“I u nen kan lo kal mek.. Mawitea nen in awmdun em??”

“Aw kan tifel zo chiah”

“Engaaa!!!!” U Roberta’n min lo en zeuh

“A ho lutuk lo kal tho ru.. MC kawtah kan lo nghak ang che u”

“Form nen ka la awm… ala dah daih zui”

U Roberta chuan thil awmzia chu min zawt vat a

“An inentir zo daih tawh lawm “ tiin ka lo chhang a

“I lungawi vak lo a mi.. ka thlah haw daih ang che I duh em??’

“AIh.. aih .. aih.. min nghak alawm saw tah MC kawtah kan lo awm ang an ti”

“An va che naupang chhia ve maw le.. thil duan lawk ang a kalpui mai a tha asin le”.. a tawngkam hmandan atang chuan ka pa ka hrechhuak zawk a.

 

Motor kan park hnu chuan Ramdini te awmna lam chu kan pan ta a.. Mawitea chuan inthiam lo deuh takin Damdawiin pangngai a an tih tir mai thu chu a lo sawi nghal a..

“In ril a tam em??” Ramdini chuan a lo ti a

“Aih tam lo” kan sawi rual chiah chu kan in en nghal.. kan nui ho leh te te a.. Ramdini chuan min kai hrang lawp a

“A U nui kha I lo hmu emm?? Anu ka hrilh chak lutuk..”

“Engee.. a nui ve thei lo a mi??”

“Aw… bakah Mawitea’n a sawm a alo kal ve duh mai te hi mak ka ti lutuk”

“A ho.. kinah kan sawi tha dawn nia”

 MC ah chuan  kan thiandunin thawmhnaw kan en kual a, kan hma ah U Roberta leh Mawitea an kal a, keini thian dun an hnungah kan kal thung a.. 5d theater kan kal pel tep tihaha chuan U Roberta chu rawn hawi letin

“In en duh em?” Mak kan ti hlawm ngang mai.. ring lenglawng tak chuan

“Awww.. duh” kan ti rual vak a, U Roberta chu a nui vur vur a, Ramdini’n min lo nghawk sawk hman pek!!

Kan en hun tur a nih velah chuan kan lut sap sap a, a kil berah U Roberta a thu a, keiin ka dawta.. Ramdini leh Mawitea’n min dawt leh chiah a. Kawnghren ka tih ngheh thiam loh avang chuan U Roberta chuan min tih sak a, ka lo ip chawih chawih.. kan en tan ta, Ralte thisen kai tih takah ka au ring thei fia fia khawp mai. Hmun sang hlau mi tak ka ni a, kham sang tak a tang a kan tlak thlak vawng vawng lai chuan ka theih tawp a ringin ka au ka hlau lutuk ringawt.. chu tih lai chuan U Roberta chuan ka 5d glass chu min lo phelh sak daih ka lam ka va hawi a ani pawn a lo phelh ve tho.. kan in en lai chuan kan nghing leh lawih.. tarmit vuah lo pawh chuan au na tham chu a awm tho mai, ka sir lam ka en chuan U Roberta chuan za takin min lo nuih.. za mang lo in ka nuih ve ringawt. Tarmit chu min pe letin ka vuah leh nghal a, ka au chhunzawm leh a ni ber e.

 

A pangngai deuh lai kan en chuan thlamuang takin kan thu ve hle hle a.. vawilehkhatah kankang leh dawrh chu U Roberta leh Ramdini kut ka hmer vakk, Ramdini chuan au vak pahin min lo hmer let.. a lehlam tak chuan a van nuihzathlak tak.. a hlimawm phian mai.. kan en zawh chuan kan chhuak ta a..

“Awi ka zawi vek”Ramdini chuan a rawn ti chhuak a

“Keipawhh.. ka hrawk a na vek” ka lo ti vat a

“Min ti mualpho hle mai.. en pui chi pawh in ni tawh lo”Mawitea chuan a lo ti bui bui a. U Roberta lam ka en chuan nuihza tak hmel a la pu reng, keimah min nuih anih ringin ka zak rilru viau mai.

 

Karleh leh pek mai exam a nih avangin zanah chuan lehkha zir turin ka inpuah chah a.. ka chhiar laklawh lai te chuan ka nui leh thut thin, ka van hlim tak em, keimah leh keimah pawh ka inringhlel tep tep zawk. Ka mut dawnah chuan ka phone chu ka en a, ka beisei ruk ang ngeiin U Roberta messange a lo awm

“Chau em vawiin kha?” darkar khat kal ta a a lo thawn daih tawh a ni

“Chau vak lo.. nangzawk??”

“Keichu ka au ve hleinem chau turin” ka rin aiin a rawn reply rang..

“Min nuihzat em?”

“Aih.. I lawmawm” hei bak bak a thu chhiar nuam a awm lo ang

“Naa.. ka ninawm zawk ngawt ang”

“Teuh lo, enge zanin I tih a??”

“Lehkha tlem ka zir ve a”

“I van fel ve..”

“Fel lam pawh a ni lo.. exam a hnai tawh em a”

“Engtik??”

“Karleh lehpek”

“Hnai tawh nih chu.. thiam tam tawh em?”

“Aih.. I nau in a zir em??”

“Ka hre lo, roomah ka tawm deuh chawt a keichu”

“Mahni a awm nuam I ti mi?”

“Aw.. ti e.. nichin khan lo call che ka tum a, ka lo call lo chu a fuh zawk nih kha.. lehkha I zir daih sia”

“A ho ee.. min lo call tur a lawm.. thil pawimawh ah te chuan in tihbuai a awm hleinem”

“A pawimawh em em lo mai thei a I tan chuan”

“Eng chu??”

“Exam tha deuhin ti phawt la.. ka lo la call ang che.. J”

“A pawimawh lo awm ve.. kar thum  hnu vel daih a call a inhrihlh tur chu”

“Ka nghah theih vang zawk alawm..”

Awi.. enge niang le.. ka beisei mek hi a tih tum a nih vaih chuan a lawmawm dan hi a rapthlak zawk hial ang. Zawh chhuah mai ka chak mahse a chi si loh, ka rualpui chu ni se ka zawt cheng ang mahse a ni teuh si lo.

“Ka hre chak tawh.. hihi”

“Thil ka zawt ang che aw..”

“Um”

“Bialpa I nei em??”

“Ka nei ngai lo”

“Keipawh..”

“Tak tak em??”

“Aw tak tak” ka hlim lutuk hi zuan tawr tawr mai ka chak..

“Kan van inang..”

“Chu ti maw.. mu tawh la a tlai tawh sia” la text reng ka chak nen, ka awmdan a mawi loh ka hlauh avang chuan ka mangtha ta a.

 

 Chu mi tuk atang chuan min rawn text ta vak lo a, mahse zantin “Lehkha zir tui aw” tih a lo thawn ziah a, “Awlee” tih bak a han reply vak ngaihna a vang thin. Diktak chuan zan tin biak a hriat chian ka chak em em a mahse kan exam dawn vang a min tinbuai a duh loh zia lah hriathiam loh chi rual a ni si lo. Lehkha chu theihtawp chhuahin ka zir ve reng a, exam zawh a a thil min hrilh tur ngawt chu ka nghakhlel a ni.

 

Kan in exam nan ni hnih chiah a ngai tawh a, dar 11 velah ka zir zo va ka muhil thei mai lo.. apa thlalak leh a video te ka en kual a ka mittui chu a tla nasa ngei mai.. Chu tih lai chuan whatsapp ah message ka dawng a ka thiante  an lo ni a, ka reply zawh chuan U Roberta nen a kan inbiakna vel chhiar mai mai tumin ka en chu a lo online reng.. ka zak viau na a, ka biak chak em avangin ka text ta a..

“Mengrei ve..”

“Nangpawh I muthilh suk suk tawh ka ring a”

“Ka muhil thei lo”

“Engah maw.. exam tension ami?”

“Teuh lo.. chutiang ka nei ngai lo”

“Anih chuan ngatinge??”

“A pa ka ngai L”

“Khawnge a awm a mate..” min rawn koh dan chuan alak a pangchan min ti chak leh zual”

“Vanram ah”

“A ni maw.. ka nu pawh vanram ah a awm tawh a”

“I ngai ve em??”

“Um.. zep lo chuan..”

He mi zan hian ka pa leh a nu chanchin sawiin dar 1 vel thleng kan inbia a, kan inbiakna chuan min ti tap nasa hle mah se alak ah hian thlamuan ruk riau na ka nei a ni. Chu zawng aia ka hlim lehna chu tu ma hnen a asawi ngai loh a khawharna te chu min hrilh a, ka theih anga ka lo thlamuan ve kha a ni.

 

In exam kan tan ta a, exam kan neih hun tur leh kan subject neih dan chu U Roberta chuan min rawn zawt thlap a, ka pa ang chiah a ni. Ani pawh khan a phone ah hian a save thlap thin. Kan neih dawn ni apiangin duhsakna min hlan a, kan neih dawn loh ni ah erawh chuan tha tak a zir turin min rawn fuih thin. A thil min hrilh zing a min fuih tlat tu pakhat chu a lehkha zir dawn a piangin a nu a ngaihtuah thin thu leh ama tan ni lo a anu tan a zir tur ang a a in ngaih thu min hrilh chu a ni. Keipawh chutiang a ti ve tur chuan min hrilh a.. ka zirlai a ka nin em em lai te hian ka pa tan a zir angah ka in ngai a chu chuan chakna thar min pe thin.

 

Half yearly exam kan zawh ni chuan thian ho in khawi maw laiah kan kal kual a, ka haw hnu chuan U Roberta chu phur takin ka ve text a..

“Exam kan zo tawh bik bik”

“Nuam awm.. mate I nu number min thawn thei lawk angem??”

“Maw.. ngatan??”

“I hre mai ang”

“Anu hi angainat awm loh nia.. a hau ang che nge..”

“Min hau turin thil sual ka ti hleinem”

“I ti tak tak e law U Robert”

“Aw.. min pe dawn lo mi??”

“Anih ka lo thawn  ang che..”

Enge ni ta ang le tih hriat chakna in ka khat.. enge maw sawi a tum chiah le, minute sawm hnu velah  phone call ka dawng, U Robert call a lo ni a.. ka zam lutuk

“Hello”

“Dar nga vel a chaw ei chhuak turin lo in siam rawh”

“Maw…”

“I nu ka dil tawh”

“Kan in date dawn mi??” hussshhh!! Ka frank mah mah thin.. a rawn la nui huk zui

“Umm I duh chuan”

“Min lo lam dawn a mi??”

“Umm.. hahdam rawh”.. ka zak chem  chem.

“Ka dah aw”

 

Enge ka thil hriat khaaa???? Ka au chiam chiam mai.. Enge ka hak ang??? Ka rilru a buai!! Midang chu ni se Ramdini ka zawt mai tur, mahse a tih chi ni si loh. Kimi ka call nghal, date ka neih dawn thu leh ka hak tur velah chuan ka han rawn a “Tunge??” a lo ti chel chul mai, sawi chhuak lo turin ka intiam tir leh rih.. Kawrfual nainawk rawng ka nghal chen vel tite lampang, ahnung lam  a kak chu ka ha a, sandals heel chhah ve euh chu ka bun bawk a, ka sam ka awm chen vel, kir deuh chiat chu ka thlah bawk a.. nalh ka in ti ve hle mai.

 

Zan boruak thiang tak a duh ruk thin em em nen a chhuah dun hi a lo nuam hle a nih hi.. hetiang hi ka movie en tawh ah chuan ka hmu fova mahse ka chungah a thlen ve hi ka ring pha ngai lo. Zanin hian U Roberta hi ka hmu hmeltha leh zual, a mitmeng lian lampang, leh a pian nalh em em te chu chiang takin ka hmu a ni. Kei mizo hmeichhia ah pawh 5’5 tling pha ve, sang ve viau a in hria pawh ani ft 5’11 a sang lakah chuan ka lang te rat mai. A inhmehpui em em smart takin a inchei  in a bula kal hi a zahpui awm loh hliah hliah a ni.

 

Hotel nuam takah min hruaiin, ei tur tui tak tak min chah sak a.. ka chet chhiat loh nan rilru tawngtaina ka bei char char a. Ka zam a hlauh em vang nge fiamthu a thawh ve zeuh zeuh a.. ka exam lam pang te min zawtin a hun hman dan te min sawipui a.. pangngai takin kan inbia a, mahse ka zam em em tho. Zan riah kan ei zawh chuan in tur lam kan lam a, kan ngawih dun vang vang lai chuan a rawn tawng ta a

“Kan in date hi nuam I ti em??”a nui vur vur

“Um.. nuam lutuk.. mi ka vawikhat date na a nia”

“Keichu tam tawh mai..” sawi tur a van vang deuh ve.. a rawn tawng chhuak leh a

“Mahse serious tak leh ka duh thu chu hei hi ka vawikhatna”

“I duh miah loin I kal thin maw..” thikthu ka pe chhe tan der

“Aww.. thiante lam hi an advance thei mah mah zel a”

“Tuman min ti lui thei lo kei chu”

“Chuti keimah hi I duh vang liau liau a mi…?? ka mitah tak a en, ka zam lutuk Lalpa!!

“Aw.. aniang…  “ straw chuan ka thil in lai chu ka chawk kual neuh neuh a

“Nuam I ti tak tak em??”

“Aw.. ka ti tak tak”

“Anih min duh tak tak em?” mak teh tawp e.. ka nui ringawt

“Anih nangin??”

“Tunge zawt hmasa zawk??”

“Nangmah chu I nia.. mahse”

“Enge mahse??”

“Sawi rual ang..” a van nui nasa reuh tak, a nui mawi si

“Nih 1,2,3 ah aw..”

“Umm”

“123… Ka duh che” “ ka duh lo lo che”

“Enga? Sawi nawn leh teh..” a rawn ti vak..

 Nui vak vak pah chuan “Ka duh lo lo che chu ka duh che tih na” ka lo ti a.. a rawn nui deuh suk, a hlim ve tak tak nge chu ka hre lo mahse kan hlim dun a ni.

 

Kha mi zan atang khan kei aia kum 10 a upa zunah ka uai nghet tlat tawh. A chang chuan ka ngaihzawng ai mahin ka pa a ang zawk a ni.. ka pa leh ka ngaihzawng mai a ni lo, ka unaupa leh ka thian tha ber nih a fawm a ni. Mahse, ka rilru ti hah ber tu chu Ramdini engmah ka hrilh lo hi ani, Kimi erawh chuan min hriatpui a thian dang te lakah pawh min la thup pui zel a ni.

 

Ka U pawh a rawn haw tawh a, kan chhungte Serchhip ami U Mabiaki pawh ka nu dawr a pui turin a rawn thleng ve tawh bawk a, tunlai tak chuan ka nun pawh a hlim hle mai. Ka nu dawr a innghat kan nih tawh zawk mah avangin ka nu dawr pawh theih ang angin kan ti lian a.. ka U leh U Masiam te tanna zarah dawr lian tak ka nu pawn a nghak ve tawh a ni.

 

U Roberta nen chuan inhmuh hun kan nei tam lo hle a, mahse kan inhauh phah ngai lem lo. Inriini chawhnu lam ah chawlh an neih avangin min chhuahpui ziah a, zanah chaw min ei chhuah pui ziah bawk thin. Ka nu pawn ka rin ai daihin a ngaina a ka U pawn fel a ti hle a… alo len chang a kan awmkim lai a nih chuan keimah ai mah hian mi puitling thiau tih takah an titi tui thin hle. A chang chuan keimah aia ka chhungte a titi pui nasat te chu ka tihtauh khum fo va,mi thlem hi thiam lo tak si hian a thiam em em lawi si a, ka hlim thin takzet a ni.

 

Thla thum lai kan lo inngaizawng tling ve tar eng mai.. school pawh exam kan neih zawh atangin thla hnih dawn chu kan  kal regular leh tawh a Ramdini nen pawh ahma ang bawkin kan in kawm leh chawt a. Mahse, ka awmdan danglam thin hi a hmuh hmaih bik lo va, min zawh chang erawhin engmah ka sawi duh ngai lo… Mahse, vawikhat school kan kal chu thu mak deuh min zawt a..

“Sang, a U hi I duh tak tak em??”

“Engmaw..”

“Thil hi ka hriat loh I ring a mi?? ahma atang daih tawh khan a U in a hmuh ni che  atang a a danglam chak zia atang hian ka man thiam vek alawm.  Thla thum vel liam ta atang khan zana chhuah te ahrat a, ahma a chaw ei a chhuak ngai mang lo kha a chhuak fova chuan I fel leh fel loh te min zawt fo thin a lawm ”

“Chutiang a ni lo Ram..”

“Tinge engmah I sawi duh loh a, nawr luih che ka tum lo.. mahse ka hrilh na chhan che chu ka pa ten tunlai hian hmeichhe pakhat biak sak deuh an nei ania.. nula a kum rualpui Proffesor ni lai mek” ka phu zawk hlauhna in ka khat a ni.. ka tah a chhuak lutuk..

“Ram..” tiin ka kuah tawp a.. ani chuan ka sam chul pah chuan

“Hlauthawng suh.. tun a in tih theih awm chhun chu ka nu leh pa hrilh ani”

“Engtin nge ka ngam ang.. engtin nge I nu ka hmuh ngam ang..”

“Ka awm a lawm.. harsatna a awm lo ang, ka U hi chu a hlauhthawnawm loh”

“Mahse, ka hlauthawng.. class 12 naupang mai ka nih hi.. chu nu chu Proffesor.. Ram ka hlau takzet..” ka mittui ka dang thei thawt lo. Ramdini chuan a theih ang angin min hnem a, mahse chu chuan ka rilru hahna a chhawk thei si lo.

Ka school bang chu ka tih thin ang lo takin U Roberta chu ka va call a

“Hello..”

“Office ah I la awm a mi??”

“Aw.. mate ka buai deuh a ka hman hunah ka lo bia ang che..” a dah nghal hmak

Ka awm mai mai thei lo.. message ka va thawn hram

“Nupui I nei dawn a mi??” reply engmah ka dawng lo.. tlai dar 5 thleng pawn, ka rilru hah zia chu ka pum hian ka sa pup pup, a chang leh ka tap.. achang leh then mai rilru ka pu mahse ka thei lo ang, ka chiang a ni.

 

Zan dar 7 velah a call ka dawng hram..

“Mate”

“Umm” tap aw deuh tuau chuan ka chhang a

“Vawiin ah keipawn ka hre chiah, ka pa in a rawn sawi a”

“Chuan..”

“Ih maw,.. chiang deuhin ka hrilh ang che.. nang pawh ni la, a tu a pawh ni se nupui ka la nei dawn lo.. ka nupui nen a kan chenna tur In ka la nei hleinem, foundation rintlak lutuk ka din hma chu nupui ka nei dawn lo.. chuan chu aia chiang chu nupui ka nei dawn anih chuan nangmah chiah ini ang..”

“In chu I neih kha..”

“Hei chu ka nau in tur a lawm.. he inchhungah hian ka ta engmah a awm lo..”

“Kha tiang khan I chhungte chung chang sawi suh”

“Anih.. I thiannu ta tur saw chhuh sak vek I duh ami.. ka ta anih chuan I ta a ni vek dawn asin..”

“Aih.. chuntiang in ka ngaihtuah ngai lo”

“Hmanah chuan ti hian ka ngaituah thin..  I thiannu saw ka neih zawng zawng dal tu a nih avangin an nufa hian ka haw em em a, mahse nang nen kan in tawn hnu chuan chutiang chu a bo vek tawh.. nangmah mai ni lo in I tan a mi pawimawh te thleng hian tih nat ka duh lo a ni”

“Duat”

“Umm.. I la tap em??”

“Aw.. mahse.. ka hlauthawng”

“Hlau miah suh.. kum 20 chuang pawn in thlau mahila.. chu chuan min ti buai ngai lo ang.. chuan kartawp ah ka nu leh pa hmu turin lo in buatsaih rawh aw”

“Maw.. engtin nge ka tih ngaa..”

“I thiannu nen kana wm alawm.. nangmah hmangaih em em tu che”

“Umm ka hria e..”

“Ka hmangaih che duat”

“Keipawn ka hmangaih che”

 

 

 

Rei tak U Roberta nen phone a kan inbiak hnu chuan a lo len dawn leh dawn loh ka zawt a, a theih loh thu leh a pa thil sawi pui tur a neih thu min hrilh a phone call kan ti tawp ta a. Chu mi zan chuan ka mu mang lo U Roberta ka ngai em em a mahse ani chuan min lo be miah lo thung. Kan pahnih tan ruahmanna a neih ngei ringin ka thla chu ka in muan chawp a mahse hlauhthawn rukna chu ka nei tel tho a ni.

 

A tukah chuan phone call ka dawng a.. U Roberta call a lo ni a

“Umm..” mut chhuak tak chuan ka chhang a

“Nizan kha ka hman har lutuk a.. ka chau deuh bawk nen ka muhil nghal a”

“Pawi lo..”

“Tho tawh la.. school I tlai a nge”

“Ka kal peih lo..”

“I titau mi.. ka thlah ang che, tho rawh.. dar 8:30 ah inpeih hman tum la”

“Ka kal dawn lo ka tih chu”

“Engvangin.. I dam lo a mi??”

“Um..”

“Anih chuan check up turin lo insiam rawh.. tunah zingkarah specialist hmu ang..”

“Ka duh lo..”

“School kal nge inentir I thlan zawk..”

“Amak ee.. nangchu”

“I nu in a kai tho lo che mi.. dar 7 a ri tawh sia”

“Ka tho tawh a.. ka mu leh, dawr ah a kal tawh”

“Ka lo phei dawn ania .. tho rawh.. ka dah”

Nizan ka mu lo tih chu hria se tho turin min ti miah awm si lo a.. a lo kal leh tak tak ang.. mahse ka zawi vek, ka van tho peih lo tak em……..

Ka chalah tu emaw kutin a khawih tih chu ka mang hriat ruai ruai a.. ka harh telh telh, Lalpa leh!! Ka lo muhil leh daih a nih hi, ka khum bul a U Roberta thu chu ka hmu a, ka chal a khawihna a kut chu la thla in a kut chu ka chelh reng a..

“I lo harh tawh maw..”

“Umm engtin nge I lo luh theih ka room ah?”

“I U a lo chhuak chiah a.. I thawh duh loh thu min hrilh a, I damlo tih an hre lo a mi??”

“Umm..”

“A luhlul lutuk, school a kal peih loh hian ti sawn a awm ve ziah a ti che a..”

“A ti mai mai anih chu..”

“Ti mai mai lo ang.. I nu in a kaih thawh che chuan I dam loh thu hrilh ta che”

“Ka peih lo lawm.. tinge office I kal dawn lo a mi??”

“Ka naute a dam si lo a, kal lo mai ang..”

“School kal lui turin min tih kha..”

“Inentir ag  pawh ka ti tho a”

“I phakar..” tiin a awm lohna lam hawi zawngin ka in let daih a

“I titau a mi duat..” tiin ka hnung lam atang in min lo kuah a.. a ke chiah chhuatah awm in a taksa erawh ka bulah, ka khumah a awm ve reng a..

“I lo mu chak a nih kha lo mu chho law law rawh..”

“I bula ka mut I chak lutuk a mi..” a ke rawn hlang pah chuan a ti a

“Teuh lo..” tih pah chuan ka nghawk sawk a, a kuahna atang chuan ka tal chhuak tur chu min pawt let in a lam ka hawi vat a.. kan biang a duat tak a chul chung chuan..

“Duat in ti chak hram hram rawh, a bul tanna a tang a hetiang a I chauh mai chuan tunge min dinpui ang..”

“Enge I pa in a sawi..??”

“Engmah rilru hahna tur a la awm lo.. mahse nangmah an hmuh hunah che thil hi  khirh khan mai thei a.. mahse mai thei chiah..”

“Ih maw.. ka upa ve chak..”

“Ti hian ka duh zawk che a lawm.. engkim a tha vek ang” a ban lehlam chu ka lukham a a ban lehlamin min kuah tlat thung..a lam ka han hawi a, min kuahna akut rawn la kang in ka hmai chu a chul leh a, ka hmui leh a hmui chu rawn chuktuah in min fawp a, ka thiam ang angin ka lo chhang let ve bawk a.. Chu tih lai chuan a pum a rawn ri a, kan nui dun huk..

“I ril tam mi??”

“Aihhh..” a zah hmel reuh lutuk kha a cute thlawt..

“Tho rawh.. chaw ei ang..”

“Aih ka la ui, hetiang a awm hi a nuam a lawm”

“Ka ril a tam ve tho lawm.. nang phei chu kei aiin a tam I pum thlengin an tap” tiin ka in beng kang a, ani pawh a lo tho ve nghal a.

 

Chaw kan ei dun lai chuan ka U bazaar a lo haw a..

“Kha in in kai tho thei maw..??”

“A lo dam tha lo a, ka va in check up pui dawn ami aw ka tia” U Roberta chuan a lo ti vat a

“Sawi ve mai ta che Lawmi.. a hun ah hian I ngawi kur a” ka hmui ka lo ti pawrh hman hram.. U Roberta chuan min lo en a a nui ringawt.. A U bawk chu a rawn tawng leh hram..

“Ka nu in a kaih thawh pawn engmah sawi buai lo in a tho a, a inbual vek a.. ka nu kal velah a mu leh daih a nih kha”

“Tiang chuan I ti maw..” U Roberta chuan min lo en a

“Ka sawi khaa..”

“I nu in ahau dawn che nih kha..”

“Nangmah nen kan inentir dawn ni..”

“Phakar suh hauh dal ah min hman I tum ni maw..”

“Pawi lo min hau mai rawh se..”

 

Ka in siam zo chu kan chhuak a, a car ah kan luh hnu chuan..

“Inentir ka peih lo..”

“Hett..!!”

“Awm hmun in anih kha I awm..”

“Min zah pui a mi..??”

“Aih!!!! Ka dam tawh a lawm.. I bulah ka awm a”

“Nih in ah awm rawh”

“Aih… hmun dangah kal ang”

“Khawi ah??”

“Nuam deuh ah..”

 

Hmar lam panin kan tlan char char a, Aizawl khaw chhung kan chhuah san deuh ti tih tawh a.. kan kal na tur ka zawh lahin “I hre mai ang” tih chiahin min chhang zel a, thlen ka chak tawh lutuk!!

Hmun reh tak pakhat ah chuan a car chu a ding a, chu lai hmun chu Thingkung lian tak tak leh mawi em em in a hual vek a.. in lian lem lo tak, chei that mamawh tak pakhat hi a lo ding a. Car atang chuan kan chhuak a, U Roberta kalna lam chu ka zui ve zel a, chu in lam pan chuan kan kal zel a.. Chu In, tala a in kalh chu U Roberta chuan a hawng a..

“Hei hi khawi hmun nge..??”

“Ka nu in a nih hi..”

“Maww..”

In chhung kan lut chu pawn lam lan dan aiin a mawiin a fel fai khawp mai, bang ah chuan nu pakhat hmeltha tak mai thlalak a in tar duah a.. U Roberta nu a ni tih ka hre nghal mai a, uluk tak a thlalak pakhat ka en lai chuan U Roberta chuan ka dar ah lo kuahin ti hian min hrilh a..

“Ka nu leh pa kum sawm  an inneihna champha phak lo thleng tur pualin ka nu in he lai hmun hi a lei a.. kan chhungkaw chawlh in atan a siam a tum a ni. Ka nu hian ka pa hnenah engmah a la hrilh lo a, engkim a peih fel vek tawh hnu ah surprise a tum a. Mahse, a hnu lawkah ka nu chu pumpui Cancer last stage a ni tih hriat chhuah a ni a, kum 1 pawh kan in enkawl hman lo tih ah ka nu chuan min boral san ta a.. engmah pawh khawih zui a ni ta lo a. Hei lai hmun hi tu ta nge a ni tih pawh an hre ngai lo.

 

Kum hnih hnu ah ka pa in nupui dang a nei a, a hmeichhe kawp chu a rai vang a innei an ni ber. Chu tih lai chuan kum 11 ka la tling lo deuh a.. Vawi khat chu in ah kei leh ka nu hrawn kan awm laiin mi pakhat, zo pa ve deuh mai hi a lo leng a, ka nu hming lamin a awm leh awm loh a zawt a, ka nuhrawn chuan a thih tawh hnu  alo sawi a chu pa pawh chu a kal ve leh nghal a. Kha tih lai khan ka nu ka ngaih em avang khan ka nu chanchin sawi an ni tih ka hriat chuan chu pa, kan inleng pa chu ka um ta a. Chu pa hnenah chuan ka nu awmna a min hruai turin ka ti a.. min khawngaih tih hriat tak a min en lai kha ka la hre reng a. Ka kum zat leh ka pian cham min zawt a March 13, 1987 a ka pian thu ka hrilh a.. ani chuan ka pian cham kum 16 ni ah min hrilh tur thu min hrilh a. Chu mi kum atang chuan hostel ah ka pa in min dah tan ta a, mahse thu pakhat ka in tiam tir a ka piancham ni 13 March a kan inah ka awm ziah theih nan.. Ka nu chhungte lam chuan min enkawl an dil thin a mahse ka pa hian a phal ngai lo thung, kei erawh chuan a khawi lam lam pawh nuam ka ti chuang lo.

 

Hun a liam zel a.. ka lo fing chho ve zel a, ka nu pawh boralna pawh ka pawm chho ve zel a, ka kum 16 pian cham pawh nghahhlelhna ka nei tawh ngai lo. Mhase, ka pa in college ka kal atang a phai a ka awm tur thu min hrilh chuan, ka kum 16 piancham chu Mizoram a ka awm theih hun tawp ber a ni tih ka hria a, chu pa ka nu chanchin min hrilh tum tu pa chu ka ring lo phal leh ta chiah lo a ni.

 

Ka kum 16 piancham ah chuan k a lawmna Hotel a min tih sak an tum a, mahse in a lawm chu ka thlang ta zawk a.. pawnah chuan mi nghah neiin ka thu reng a, chawhnu lam ah chuan ka mi nghah pa chu a lo thleng ta a. He In chanchin leh ka nu in inhmun a tih fel na lehkha pawimawh zawng zawng chu min pe ta a.. chu lai hmunah chuan min hruai theih tho bawk thu min hrilh a, ka zui ta ringawt a.. he lai hmun ka kal ni hmasa ber chuan ka tap nasa hle a, chu lai a awm mai chu ka chak a ni. Chu pa chu Ka Pu tiin ka ko mai a, ani chuan khang kum 5 chhung zawng khan min lo en fel sak thin a lo ni a.. Chu mi ni chuan ka pa ten min lo zawng nasa hle a, Police hial an lo hrilh a.. mahse Ka Pu chuan kan in thleng min thlah in, chu In chanchin chu thup ve ve turin kan intiam bawk a.

 

Chu mi ni atang chuan ka nu thil pawimawh te ka theih ang ang in ka thiar phei thin a, in te chu ka ti fai thin a. Hmundang a ka awm dawn takah chuan ka pu chu hrilhin min lo enkawl sak turin ka ngen ta ringawt a.. ani chuan min khawngaihin a nih dan tur ang takin a lo enkawl thin a. Hna ka neih ve hnu chuan a chhung lam chei ka tan ta a, ti hian ka chhuah chho ve ta a…”

 

A mit ka han en chu a tah a chhuak tih ka hmu thiam mai a, a kutah chelhin

“I nu I chhun a nih hi.. in hmeltha dun lutuk” ka ti a

“Ihmaw.. ti hian ka tan a I pawimawh zia I hrethiam tawh mai em.. nangmah bak hi hahchawlhna ka nei lo, chuvang chuan nang chuan ka rilru tibuai lo hram la.. enge maw hlek ah I rilru ti no suh aw..”

“Umm fel deuhin ka awm ang” nghet takin ka kuah a, ka mittui chu a hriat hlau takin ka hru a.

 

Zanah chuan Ramdini’n min lo call a, a theih ang ang in ruahmanna te min siampui a, ka rilru hah hi a hlau ve takzet a ni… ka tan hian a hlut zia hi ka sawi fiah thiam lo, kei lahin ka thuruk takngial pawh ka hrilh duh loh laiin eng buaina pawh tawk dawn ila min puih a inpeih reng thu a sawi thung a. He mi te unau hi chu ka tan an hlu ngawih ngawih, pakhat ka hmangaih em em a ni a.. pakhat ka thian tha tak ka tan a hlu chung chuang a ni.

 

Kartawp lo thlen nan ni hnih chiah a ngai tawh a,ka rilru a buai telh telh mai.. Ramdini leh U Roberta chuan min be reng in min thlamuan reng mah se ka rilru hi hlauhthawnna in a khat a ni. Ka tih ngaihna hre lo chuan ka U ka hrilh ta tawp a.. kan inngeih loh thin teh reng nen min khawngaih ve hle a mahse kan tih theih awm chhun a ni tih ani pawn min hrilh tho a.

 

Inrinni chawhnu dar 1 a ri tep a, ka hmangaih a chu min lo hruai hun nghakin ka thu reng a, ka mong te chu aza vekin ka hria.. ka huphurh takzet a ni. Ka roomah lutin ka va tawngtai leh thul.. Ramdini chuan min lo call a, in ah awm ve lo tur in ka hrilh a, ani pawh chuan a lo aw ve mai a. Ka U in dawr atang in min lo call bawk a, zam miah lo tur ten min rawn fuih bawk a.

 

Inchhungah chuan kan lut a, tumah hmuh tur an lo awm lo a.. U Roberta chuan lo thu rih turin min ti a, a pa te a va ko a. A chhungte rawn chhuak chu an phawk ngang mai, thil thleng lawk tur a ni tih ka hre reng na a ka lungphu chu a ti rang ngei mai. Nu Papuii chuan min be nghal luam a, Pa Thana erawh a tawng hauh lo..

“Sangsang.. I va rawn leng khat ve..i thiannu lah chu a lo chhuak hman daih a”

“Nia.. school kan tan tawh sia”

“Ti khan lo thu ru thingpui ka va siam ange”…

“Ka pa hei hi ania ka sawi chu.. Lawmsangpuii, Kulikawn a cheng” U Roberta chuan a ti a.. ka hlau takzet

“Nia,, ka hria e, Sangi kum engzat nge I nih kha.. Dindini te nen in in rual em??”

“Um.. tunah kum 18 ka la tling lo deuh”

“Anih Roberta kum zat I hria em??”

“Aw.. kum 28..”

“Ka pa………..” chutih lai tak chuan Nu Papuii a lo lut a

“Sangte lo kal rawh.. eirawng min va bawl pui rawh, kartawp ah chuan hnathawk ho an haw ve duh thin a.. I pa Thanga te kh lo titi rawh se, sa lamah I thingpui pawh ka dah” U Roberta lam chu ka va en a, kal tur a mit mei takah chuan ka tho ta a.

 

Nu Papuii chuan maian hik tur rawn  la in ka hik pui a..

“Sangte.. hei hi I thiannu in a hriatpui che u em??”

“Umm hriatpui e..” ka inthlahrung ang reng khawp mai

“I pa Thanga saw chu a nelawm vak lo hrim hrim a, a thin pawh a thawng ve deuh bawk nen.. a hrim hrim ah mi hrang pawh kan ni chuang lo a ti raw.. “nelawm tak a nui chung chuan  a han ti a. Ka rilru ah chuan U Roberta te mawlh chu an awm reng a.  A hnu minute sawm pelh hun awm ang velah chuan U Roberta pawh chu a rawn phei a, min thlah haw ta a. Kan haw lam kawng ah chuan kan ngawi dun reng a, engmah a sawi duh lo chuan ka rilru a ti hah ngei mai.. ka zawt ta tawp a

“Enge a sawi..??”

“Thil tam tak kan sawi a..”

“Min hrilh ve thei lo a mi??”

“Duat..”

“Umm.. min hmangaih tak zet em??”

“Aw.. ngatinge??”

“Min hmangaih tak tak a.. a tawp min thlen pui thei dawn anih chuan a tha vek a, naktuk tlaiah chaw I lo ei dawn nia aw.. ka pa in a titi pui duh che a”

“Ummm” hnial ngam chi pawh a ni lo

 

Ka thlen hnu awm velah chuan Ramdini’n min lo text a

“Mate..”

“Umm..”

“Naktukah chaw chu lo ei rawh aw..”

“Nia.. ka lo tum ang aw..i nu ten sawi an nei em??”

“Ka nu chuan a ngaina che tih I hriat kha.. ka pa chuan a hlauhthawnpui mai a lawm..”

“Ni tak tak se.. ka rilru hah Ram..”

“A ho lutuk.. ka awm ka tih kha..”

“Ka lawm e aw.. awm lo la chuan..”

“Awm lo ila a U I hre lo anga, buaina pawh I tawk nang..”

“Mahse, Ka hlimpui viau sia..”

“Haha.. chu chiah, Hmangaihna kawngah hi chu a ngil ringawt thei hleinem..”

“Uiii I ril tawp”

“Fimkhur hleeeee rawh.. kan monu I ni dawn sia”

“Hei.. tikhan ti suh, beiseina min siam..hehe”

“Haha.. inla emotional vell lutuk”

 

A U hnenah thil thlen dan zawng zawng ka hrilh hnu chuan a harsat vak loh hmel thu min hrilh a, ka dam deuh huai mai. Ka vannei nge ka vanduai le.. kum 18 tling ve dawn chauhin bialpa ka nei ve  a, mi puitling buaina ah ka in tat lut der chu a nia . Mahse, bul ka tan tawh a lawm, then leh mai mai tur a inngaizawng kan ni lo.. a tawp thleng ka din pui tur a ni, a chanchin zawng zawng ka hriatpui a.. ka bansan ngai lo ang.

 

A tuk chawlhni ah chuan U Roberta’n chawhnu dar 2 velah min lo lam a kan phei ta a, ahma ni ang lo takin Pa Thanga pawn hlim hmel min hmuh ve deuh a, ka awm pawh a nuam ve ta deuh a. Kan thlen hnu rei vak lo ah chuan a office a titi pui tur a min sawm takah chuan kan lut phei ta a..

“Sangi.. kum 18 I la tling lo deuh ti raw..”

“Umm..”

“Roberta hi chu tawng lo la hetiang a I buai hi  angai lo tur a nia ti raw..”

“Pawi ka ti hleinem Pa Thang”

“Ka ngaihdanah chuan tunah hian in inngaizawng a, a ni hi nupui nei rual a ni bawk a.. nang lahin I tleirawl nun I la hmang dawn chauh a, ka fapa hi I ti khawtlai mai mai lo maw..”

“Ihh.. chu tiang lam chu ka ngaihtuah ngai lo..”

“Ni e..  hei I thiannu pawh ka zawt a.. hetiang lamah hi chuan ani ang lo tak hian I fel viau a nih hmel a” a nui ve huah huah a.. ka nui ve ringawt. Kan inkawm chho zel a, ka pa chanchin te min zawt a.. ka rin ai daihin a nelawm a a hma a ka hlauhthawnna ang kha a bo ta vek a. Kan titi lai chuan kawngka rawn hawngin Ramdini chuan min lo ko a

“Pa.. lo chhuk tir rawh, kan chhungkaw video kan en dawn a U te nen”

“Aw.. hei alo chhuk dawn e”

 

Kan chaw ei te chu min duhsak hlawm hle a, ka beisei piah aiin ka hlim a ni. Tin, ka hlim leh na em em pawh an chhungkua an in pawh tak a ka hmuh kha a ni. Nu Papuii pawn a hlim zia leh U Roberta pawh an kiang a a nuih tam ber tum a ni tih te min hrilh a, ka lo hlimpui ve em em a. Kan chaw ei kham chu Nu Papuii chuan thingpui lum turin min tir a, Pa Thanga chuan fiam thu ti tak deuh hian

“Aw.. monu ang mai a I chei tak mai, Dini rualpui mai anih hi“ a lo ti a

“Lo in lawk ve te a chakawm a lawm, nei tur awm reng in kan kawl har dawn em a..”Nu Papuii chuan a lo ti a

“Khawi va lum I la” tiin U Roberta chuan min lo ko a, ka zak ang reng..

“Nia va lum ru” Nu Papuii’n a lo tih tak ah chuan ka zui ta a

“A U hi chance a zawng ve nasa..” Ramdini’n a lo ti hmanhmawh

“I chak ve..” tiin U Roberta chuan min phei pui ta a.

 

Kan haw lam chu nuih tur ber awm lo in kan in khih chhawk reng mai

“Lawyer nih I tum ti raw..”

“Um.. ngatinge..??

“Kum 5 chiah hun I nei.. chu vang chuan lehkha zir tha hle ang che”

“Enga??”

“A zir theih hun chhung a nih chu.. bahlah miah lo in I zir ang chuan tun atanga kum 6 na ah kan innei ang”

“Lo zo hman lo ta I la, zawh  phet tum tho I la”

“Kan inthen nimai lawmm..”

“Lalhmangaihkim..!!!”

“Enge.. ka hming pum a min koh le.. ka kum ngaihtuah ve ta che” ka nui nasa lutuk chu min ngei hmel takin min lo en a, a van duhawm take m!!

“Lawyer pasal nih I chak tawh em??”

“Aih, in a hahdam tak a min lo nghak thin pasal nih ka duh zawk..”

“Lawyer min nih tir I duh si..”

“Ka nu I zah ang bawkin I pa ka zah ve lohin duat”

“Naa.. tinge hmanah khan kan in tawn loh”

“I zak lo e aa.. naupang te ka duh I ring ami..??”

“Hahaaaa.. ka upa tawh em mai.. kum 5 hnu ah pasal ka nei dawn..”

“Kei ni lo ila I nei dawn tho em??”

“Tunge ka neih chuang angaa”

“Duhawm vak suh aw”

 Innei tur a in puah chahna hun kum nga ka nei a nih chu