LEHKHATHAWN

 Inchhung a luh chuan alo reh thuap a,kawngka lah a inkhar mang bawk si loa,mak ti angreng takin room hrang hrang chu a en kual a hmuh tur tumah an awm lo.A fanu rawn haw hun a pel daih tawh si a ti rilru in room chu a han bih a,a inthlakna school uniform vel chu chhuatah alo darh nuai a. Chung thawmhnaw hnawk nuai chhar pah chuan "he nu han pawlawh dan em em hi chu aw" tiin a phun nua...h nuah a. A thawmhnaw chhar te thlep fela room hnawk zia a phunpui bawrh bawrh lai chuan a fanu khum lama lehkha hlai ve tak lo inpharh chu ava hmu a,kal pheiin a la kang a,a fanu thuziak a ni tih a hre nghal a.Khumah chuan thu in chu lehkha a fanu in a hnutchhiah chu a chhiar tan ta a.

"Nu,
Ilo haw tawh maw? eirawng pawh ka lo bawl si loa ka tihpalh aw. Zanriah ka siam sak thei dawn lo che tih hre lawk ila chuan tukin zing khan uluk leh tui lehzualin rawng ka bawl sak ngei ang che. Nu,thil hrilh tur che ka nei a ngun deuhin he ka kutziak hi lo chhiar rawh aw. Ihmaw nu thla tam vak lo kal ta khan ka nunah mi pakhat alo lut a,chumi chu kan veng thenawm lawk a mi in a rawn mikhual a ni a,ani chu kan awmna atanga hla tak khaw pakhata cheng a ni a,insa in a rawn inhlawh a ni. Ka sikul kal lam leh haw lam hi min lo thlir ziah thin a,a tir chuan mak ka ti lutuk..Mahse,zankhat ka mumanga ani nen hlim taka kan lo awmdun atang kha chuan min lo thlir loang tih hi ka hlau ngawih ngawih tawh zawk ani.Ani chu ka ta turah ka ngai nghet tlat a ka thiam ang tawkin chhaithluk ka han tun tan ta a,Pathian hian inngaizawng tur hi alo ruat lawk anih ngei dawn hi ka ti alo harsa vak lo. A vawikhatna atan min lo thlah haw ni phei kha chuan ka hlim lutuk kha hrilh che ka nghakhlel lutuk mahse pawl sampahnih ve uai tawh si chutiang mai mai a lo hlim tiin min nuih ka hlau a,ka hrilh ngam lo che a ni.Ka thiante takngial pawh ka hrilh tha duh lo achhan chu ka bialpa hmasa ber a ni tih ka phur dan em em atang hian an hriat ka hlau a ni,ngaihzawng tam tak nei tawh angin ka in sawi si a.

Nu,chupa chu maw kei aiin kum nga in a upa a nagmah leh apa inthauh zat chiahin kan inthlau anih chu.Hang lampang a ni a mahse a pa lutuk asin,a han nachhan pawh hi nisa hnuai a hna a thawh nasat vang anih ka ring.A nu leh pa te an boral tawh a,a u mipa nen chiah an awm a,a u chuan zu a zuar thin a ni awm e chuan a rui reng bawk a ti a,mahse ani chu a rui ve ngai miah lo.Nangman min hrilh thin zu that loh zia ka hrilh chuan an huanah thei a rah teuh thu leh chung chu kan zawrh theih tur thu min hrilh a ka lawm dan chu nagpawh i lawm ve tho ti raw.. Mahse,nu ka han ngaihtuah chiang a bul tan nan chuan zu chu han zuar ve naw naw phawt ilangin pawisa kan ngah hunah thei vel chu zuar chhunzawm mai tha in ka hria a,hei tak hi chu ka la sawipui lo na in rem min tinpui ve mai ka ring.Pawisa mamawhna a nasa dawn em a bakah amah hian TB natna a vei a pawisa tlem azawng tal kawl reng kan mamawh dawn a ni.Nu hlauhthawn phah nan lo hmang suh aw..TB damdawi te chu sub-centre tangin a thlawnin an la thin a vanneihthlak ka lo ti khawp ania.

Nu,kan pa chuan khabe hmul a zuah a,a inhmeh lutuk asin i hriat duh chuan Apa kha i zuahtir ve mai dawn nia.Ka han en cheuh cheuh hi chuan khawvela mipa hmelthabera an thlan tawh Johnny Depp nen hian inang riau a hriatna ka nei thin.A pianna hmun phei hi chuan zir se ka chan phak pawh la ring lo.A inla changkang ve loa,bata siliper bal deuh pawh a inhmeh lutuk asin,tiang mipa hi an vang ngawtin ka ring.An in chu maw min hrilh dan chuan dap in ania,inchung pawh a pawp nual a ni awm e.Mahse,chung ang hmun chu ka vawikhat hmuhna tur a nih avangin film chang tur ang maiin ka inngai a ka hmu chak tawh takzet a ni.

An khua chu ke a kal ngaihna te a thui a,motor kawng tawite pawh a chhe lutuk a ti a mahse pawi ka ti lo nang pawn Kristian tha tak te nunkawng hi a awlsam reng bik loa,lawmman erawh ropui tak a ni thin tih i sawi kha ka hrechhuak a ka lawm em em zawk a ni.Chuvang chuan nu ka nghak thei tawh thlawt loa,vawiin sikul ban khan mi jeepa behna tur kan hmu hlauh mai a kawng chhe tak zawh tur leh tumram nuam tak thleng turin kan kal ta mai anih kha.Lo in enkawl tha ula min lo ngaihtuah suh ka hmangaih ber bulah ka cheng dawn alawm..ka hmangaih che u.

Nu i awih tak tak m?ka tihder vek che anih kha,i fanu hi mawlmang tak ni mahila chungtiang chu a thleng ngai lovang.Vawiinah,tlaia mi dawra ka inhlawhna thin la hlawh tlemte ka la a ka lukham hnuaiah khan cheng zanga a awm ang chuan a bang zawngin ih chawhmeh duhber tuihnai taka siam lei turin ka chhuak a ka lo kir leh vat ang.

I fanu"