JUST ANOTHER SECRET CRUSH

Ka High School nundan kalsan a, nun thar ang hlak bul tan tura School thar han rah leh meuh chu ka phur rual rualin ka huphurh hle mai. School uniform thar hlak, zirlaibu chhah tak nen ka hriat ngai loh tam tak hre turin ka han inbuatsaih ve a. Kan awmna hmun atanga hnai lem lo tak,darkar khat vel kalah chuan nitin Taxi hmangin ka kal ve ta ngat ngat a, kawng hi a thui thin em avangin thawh hma a ngai thin em em a,mut ka kham ngai meuh lo. Ka luh tirh chuan inhre ngai lo kan ni thum hlawm a kan nungchang pawh a that hmel hlawm viau a ni. Mahse,kan kal rei telh telh anga enge rawn thleng ang tih tuman an hre lo.

Kum chanve kan kal meuh chuan Schoolah leh classah chuan ka tlangnel ve ta viau mai. Nuam ka tiin hmelhriat pawh tam tak ka nei tawh a ni. Chumi zinga pakhat chu ka pawl rualpui tho mahse kan subject lak inan loh avangin kan thutna class erawh a hrang thung. Ani nen hian tum lawk miah lohin vawi nga vel kan haw rual tawh a ka kawm ngeih phian,Henry tiin ka ko mai thin. Kan schoolah hian pre class atangin alo lut tawh a, mi hriat a hlawhin a fel em em bawk a, a lar ve thawkhat hle a ni. A hmai fang chu tha teh ual tih a sawi tur nilo mah se a vun nalhna chuan a kap mawi em em a, a san zawng ft5'9 chuan a pian a nih dan tur diktak a insiam turin a pui in a ti lang nalh hle a ni.

Henry te awmna veng hi kan khua ah pawh khaw tawp lam anih avangin a tan chuan school kalkawng chu a thui lehzual a,ka rilru chuan peih ka ti thei em em a ni. School a kan inbiak bak hi chu fb a kan inbiak hi a ni leh mai thin a,chu tah pawh chuan kan thutak ngai lo a ni ber e, amah hi fiamthu a duhin kawm nuam ka ti thei em em a ni. Zankhat chu SMS ka dawn chu ka han en a
"Miss Taylor.."tih hi number hriat loh atang hian a ni a.. ka chhang let ve vat a.
"Hehe tunge??"
"Keimah.. Henry Lalrempuia"
"Chiang ve.. Tinge ka no.i neih??"
"Mr.Taylora'n min pe.. thil hriat loh ka nei nimaww.."
"Ui a rei tawh lutuk heng tiang..haha"
"Hmm..induh fb ah ka lo bia ang che, bye phot"
"Okk"

Eng teh ualah ka ngai lo "hepa hi chu a polite ve ngawt mai" tih in ka ngaihtuah mai mai a. Kan inbe chho zel a, thu khunkhan tak tak erawh kan sawi ngai lo,mahse kan inkawm ngaih zia kha kan school mi ho chuan anhre fur hlawm a,min ringhlel tawk lah an bo lo. SMS tak chuan min rawn be ngai mang loa, arawn sawi thin tam ber erawh "Naktukah min lo nghak rawh,haw rual ang" tih chauh a ni thin.. Kei chuan ka lo aw ve mai thin bawk a.

Pathian zarah nitin hun hmang thei tura damna neih chuan hun te chu alo liam chak duh angreng khawp mai. School kal tawp lam kan lo hnaih leh ta der mai, final exam pawh kar loah kan thleng leh ta mai a. Exam chhung zawng chuan kan haw rual ziah a, chawlh ka hman dan tur min zawh chuan keyboard class kal ka tum thu ka hrilh chuan a pa a dil ve tur thu chu min hrilh bawk a,kan thiandun a kal kal thei anih chuan tiin kan lo sawi dun nasa a.

School kal hun a zo ta,chhunah dawr ka nghak a tlaiah class ka kal ta ziah a. Kar khat vel ka kal tling ve ta tih ah chuan Henry pawh chuan min lo zawm ve vat a . Amaherawhchu, seat insiamrem dan a fuh theih tak loh avangin kei aiin darkar chanve in a tan hma a a bang hma ziah thung a. Darkar chanve chhung chu ka ban hun nghakin waiting roomah alo thu ve char char zel a,ka zawh chuan dawrah eitur ei dunin a bus chuanna tur thleng ka thlah ta ziah thin a ni. A chang chuan a hma thei ang berah rawn kalin kan dawrah a rawn leng a,meizial min zuk ruk pui thin a nuam hi kan ti ve thei em em a. Vawi engemaw zat class rawn thlen loh chang pawh a nei tho a,"ka tlanbo parkah ka awm lo kal rawh" tih in min rawn hrilh thin a,ani ang fel lutuk tianga a awm chu a inhmeh lo ka tiin ka nuih a ti za thei hle a, ka tan park kal chu kawng a thui em avangin ka lo hnial mai thin.

Vawi khat kan class bang chu a hlim loh hmel riau hian ka hria a,kan ngawih dun reng lai chuan a rawn tawng chhuak a..
"Naa.. keichu ka peih loee.."
"Engmaw..??" phawk hra chuan ka lo ti vat a
"Ih... ka pa hi"
"Enge i pa chu"
"Kan school chhaka Professor pakhat in Student Inn a siam kha i hria em?"
"Aww.. hostel ang ve deuh kha maw??.."
"Aw.. next session tangin min awm tir an tum, kal man insenso a nasa em mai anti aa"
"Yesss"phur lutuk chuan ka lo ti vat a
"Enge ilo yes vak?? "
"Keipawh Anu in min awm tir a tum a,awm loh ka lo dil char char lawm"
"Tak tak maw??"rang fahran chuan a rawn ti a
"Umm..."
"I awm loh vaih aw.."
"Awm dawn i awm dawn chuan.."

School kal hun alo thleng leh ta. A tir lamah chuan kan la kal mumal lo a school inrelbawlna leh tih dan thin te chu kalpui zel an ni a. Henry chu break laiin a rawn kal a,"banah min lo nghak rawh kan bang hma dawn" a rawn ti a.. Kan ban velah chuan ka thiannu te pahnih nen chuan kan lo nghak a,kan haw ho ta a. Kawng chhak lam ka han hawi chhoh chuan building hring sang tak chu han kawh zeuh pahin "khi i awmna tur?"ka ti a.. ner nung leh mak tih hmel deuh chuan "i awm ve dawn lo mi??"alo ti vat a.. nuih vak vak pah chuan "dawn eee le.."tiin ka lo chhang a.

Kan ngawih dun vang vang hnu chuan a rawn tawng chhuak a..
"Vawiin ah class representative in thlang em??"
"E.. aw thlang e,hrilh tur che ka nei tak"
"Keipawh... enge sawi teh.."
"Sawi hmasa rawh"
"I ho.. ladies first,sawi rawh"
"Tuai second tih a nih kha tuai nih i duh mi??"
"Hmm.. hnial dan tur i hre thei si.. ihmaw keimah min thlang a.."
"Nimaw... Yess ka lawmpui tuk che"
"I over em mai.. in class ah tunge an thlan??"
"Nunsanga kha i hria em??kha kha"
"Hria ang hmeichhia ah??.."
"Keimah..haha"
"Min van ti zak ee.. sawi ve nghal ta che"
"Duh lo ni ve mai lawm.. khawi high five"
A kut chu a rawn la kang vat a ring takin kan in high five nghal a. Kan tawng tui bawk aniang,ke in haw mahila chau miah loin kan lo thleng thui hman hle mai,kan inthenna thin laiah chuan motor kan chanpui a,reilote ah a hmu a an kalliam ta tihah chuan keini pawh ke in kan in lam kan pan chhunzawm ve leh nghal a.

Kar khat vel kan kal leh hnu chuan fb a kan in biak bak kan in be khat hle mai,school ah chuan kan inhmu zeuh zeuh ang chauh a ni. Ban hma tlai anih loh chuan an veng awm na a hlat bik em vang hian keini rual a haw ziah chi a ni bawk si loa,class kan kal that chuan kan inbe hman mang lo a ni.

Zan khat chu a message hi ka dawng a..
"Naktuk kan bang hma maithei.. min lo nghak rawh aw"
"A tehrenggg mai"...
A tukah chuan zing lama ni asat that tehreng nen school kan ban meuh chuan khua chu a dur tawh khawp mai. Ke a haw tum pawh Henry ho chuan ka thiannu pakhat leh high school a kan kawmngeih thin em em ka thianpa te nen chuan Taxi in kan haw ta zawk a. Kan inthenna hmun kan thlen chuan ruah chu nasa takin a rawn sur a mi in bathlarah kan ding ta ringawt a. Kan pali zingah keimah chiahin nihliap ka pai bawk si, Henry te venga a haw pui tur nghahpui ka lo intiam tawh bawk nen chuan kan ding ho ta reng a. Reilote hnu chuan kan thianpa pakhat chuan phur thut hmel pu hian
"eee..tih tur ka hria" a rawn ti a
"Enge??" Kan lo ti rual tham hlawm a..
"Tiffin ei ang u"
"Tahchuan chi dawn mi?ka lo ti vat a"
Henry chuan" ho lutuk,ei ang u " a rawn ti vat a..
Kan pali a kan tiffin chu kan phawrh sarh sarh lai chuan kawngka pui chu a rawn inhawng aa, patling pakhat hi a rawn chhuak a
"Ee.. ngatinge nichin khan in lo luh daih tawh loh?? Hetah te chawchhun ei in lo tum mai mai.. rawn lut ru" a rawn ti mawlh mawlh a.. Ka zak ngei mai, Henry banah chuan ka hmer vak a,alo nui suk a "lut mai ang u " an tih vang chuan zak chung chungin an chaw ei na dawhkan hmang chuan kan tiffin a kan pai chaw chu kan ei ta a.

Chawchhun kan ei zawh chuan ruah chu ala sur ser ser a, a inthlahrunawm em avang chuan lawmthu hrilh mawlh mawlh pahin kan chhuak nghal a. Ka thiannu chuan a thiannu te in a hlat loh thu a sawi hnu chuan tumah haw tum loin an in lam chu kan pa ta zawk a.Ka nihliap chu ka han parh a,pali in zawn len a har em avang chuan ka thiante chu kal hmasa in "Henry nen khan in zawn mai ru" an rawn ti a, nihliap chu aman a keng a ka darah min lo kuah bawk a.. Henry chu a rawn tawng chhuak a
"Engtiknge ilo luh ang?"
"Karleh velah niang.. nangchu thursday ah ti raw..?"
"Umm.. an ti laklawh ting tang lutuk a,hnial peih si loa"
"Ni thum chiah awm tawh nih u.. nangma tan chuan zia ang chu hmelhriat i nei sa a keichu ka nei ve hleinem"
"Ka lo awm sa dawn chuu"

Kan kal tumna in kan thlen chuan kan thu hahdam a, Henry 'n a phone a pai chuan ka online a,kan titi pah bawrh bawrh a. A phone ka pek let pah chuan ka kut chu a hum reng a,ka rilru tak chuak mak ka ti lutuk. Achangin a lo elh leh thin a,a hnungah ka chum leh chawrh zel thin. Ruah a ban tak hnu chuan kan in lam theuh panin kan haw ta theuh a.

Zanah chuan mak tak maiin a rilru a Henry rawn awmdan chu adang tlat. Kan intext theih tawh dawn loh vang mi le tih ten ka ngaihtuah a. A hma a text hmasa ngai miah lo chuan ka va text ta ringawt a..
"Tlaiah khan in thleng har em?"
"Ayh har loee, taxi kan hmu nghal a"
"That chu,i inlei kim vek tawh em?"
"Aw..kim a ni mai.. eitur rawn keng teuh la nimai wink emoticon"
"Haha.. lighter i ken theihngilh nge aw"
"Meizial lam hi chu min mangnghilh loh pui mawle"
"Blehh.. ka nghei tawh"
"Haha.. awihawm loh lutuk aw"
Tinge mawni ka lai tlat,ka chet buai mai ka hlauh vang chuan ka reply tawh lo ta tawp a.

School chu kan kal zawm leh ta.. ahma a a hmel ka hmuh leh hmuh lohah pawh buai peih lo khan a rukin ka zawng ta chhen mai. Kan inhmuh pawn kan inbe em em lo,a tan chuan danglamna a awm lo mahse keimah lamah chuan ka phut thin ngai loh kha ka phut tlat a ni. School kan ban chuan min rawn hmu tih ka hre reng min be loa akal mai chu ka thinrim thut a a lu a ka lehkhabu ken lai a vuak pawp pah chuan "Lalrempui" ka han ti vak a. Rang taka rawn hawi a kal pah chuan "naktuk ka lut dawn " tiin a rawn nui sun sun a,ka nuih ve ta ringawt a.

Zanah chuan min rawn text ka rin tehreng nen a reh hmak bawk si. Ka thin hi a rim tung a,tih ngaihna awm bawk si lo. Ka hnung a nawm loh deuh avang chuan mut pawh ka mu that theih loh mai bakah chu aia ka mut theih lohna chu ka thiana chu a ni. Fb a k luh chuan online list ah alo lang tel kulh a, a online chhung chuan tiin ka out duh bik loa engmah ti lo chuan ka online ve ta reng a. Zing dar khat vel a rik chuan ka inbox ah message pakhat alo lut a..
"Va han meng rei em em.."
Ka mi nghah ngei a ni phur tak chuan
"Ka hnung ana aa.."
"Tinge i tih nat theih a?i tlu mi"
"Ayh,ka pum vang niang"
"Ni mai thei,i thil ei fimkhur la"
"Um.. ka hria lawm,chuan nangpawh.."
"Tehreng mai, ngatinge vawin khan ka hmingpum a min lo koh kher aa?"
"Hehe..ka ko khat tawh dawn che sia"
"Awihawm loh,i vawikhat min lo kohna nih kha"
"Hihi animaww..."
"Umm..mu tawh rh"
"ok muttui nangpawh.."

Inn a awm hnu atang chuan ka khua hi ahar thin takzet. Schoolah in hmuhna chance a tlem em em a, representative meeting hi awm reng mai se tih ten ka ngaihtuah thin. A awmna building chu ka thlir leh dauh dauh thin a,awm ve hun mawlh ka nghakhlel tawh a ni.

Kar khat a liam leh meuh chuan Inn a ka awm ve hun a lo thleng ta. A hmun kan thlen chuan hmeichhe dang awm ve ten min lo buaipui a ka room tur chu min kawh hmuh a ka indah fel ve ta a. Ka rilru ah Henry mawlh chu a awm reng a,ka hmu chak takzet. Zanah chuan ka room bul chiah a mi nen tui in tur fill tura cooler lam kan pan chuan alo fill mek a,ka phu deuh zawk a. Min hmuh velah chuan lo nui sangin
"Ehee.. ilo lut tawh maw??"
"Aw.. i van vang" ka nui lai deuh tet a
"Ka inkhel daih a,i lungleng em?"
"Aih,leng lo.. lehkha tha deuhin zir rawh aw"
"Aw.. naktuk ah school kal turin ka lo sawm ang che"
"Awle bye"

Ka phur tawh kher mai, ka awmchhan ni ngeiin ka hre tlat. Nitinin school kan kal rual a,kan haw dun thin. A mit that loh em avang hian a lu a na thin a chumi ringawt min hrilh tur te chuan ka room kawtah alo ding char char thin a, damdawi ka lo pe vat thin. Ka school uniform kamis min nawh sak a keiin a kekawr ka nawh sak thin. Achang chuan ka rilru put hmang ang tho hi a put ve ring thin mahila thu a hriat tur a awm ngai lo thung. Hrilh tawp chak thin mahila kan inthianna a chhiat mai ka hlau tel tlat si.

Zingah hian exercise la tur hian a tho hma ziah a,kan Inn bula field zau lutuk lo ah hian ala ziah a. Chulai a chetla vel chu ka room tukverh atang hian a hmuh theih thin a,ka harh velah hian meng pawh meng tha thei lo hian ka tukverh lam ka bih vat a,ka thlir ziah thin.

Vawikhat chu thil ka thui thiam leh thiamloh min zawt a,puih ka chak em avang chuan ka lo aw ve hmiah a. Diktak chuan kut  hriau hmang hian vawikhat mah thil ka la thui lo. A kekawr nen chuan ka roomah a rawnlut ringawt a,hriau leh khawlla a keng bawk a. Mipa leh hmeichhia room inlen pawh phal anih loh lam reng ka ngaihtuah tawh lo,ka khumah chuan thu dunin a kekawr chu ka han en vel ta a. Ka nu thil thui a hmuh fo tawh avang chuan mawi lemlo chuan ka thui sak ve thei mai a. Chutia ka thui lai chuan ka thil thui en chuan a rawn kun ve a,ka hmai hi a rawn hnaih lutuk,a thaw ri pawhka hre thei a ni. Ka lungphu chu a rang ve det mai,in fawh ka rilru ah a rawn lang nghal a ,a mitah tak ka en a min lo melh zawk lai tak chuan ka thiannu hian ka room kawngka a rawn hawng thut a,a meng phawk ngang mai. Henry chuan "ka lawm e aw" tiin a chhuak nghal a.

Hun rei tak inpawh tak akan awm reng hnu chuan engemaw danglamna a nei tlat. School kal turin min rawn ko tawh ngai loa,kal hma angaih thu min hrilh thin. Representative meeting a awm reng rengin ka bula thutna rawn chuh vat thin kha min hlat thei ang berah a thu tawh thung. Ka rilru a hah em em a,min hua anih ka ring hial a mahse a chhan sawi tur engmah a awm si lo. Ka biak lahin pangai takin min chhang a,a sawi tur a sawi zawh velah min kalsan daih thin thung.

 

Inrinni vawikhat chu a tuk chawlhni a ka thawmhnaw hak tur nawh tumin inchung lam ka pan a, mipa common room atang a a lo chhuak nen chuan kan in tawk chiah a. A kutah chuan a kamis, chawlni a a hak tur ni awm tak chu a keng bawk a, a kawr chu ka kawr rawng nen chuan a lo in ang chiah chiah a, ka laih phah leh ringawt..

“Min van ngaisang…” hetiang a min fiam lohna chin pawh hi ka hre tawh lo, ani tan chuan a rei lo mai thei ka tan chuan hun harsa tak paltlang ang mai a ni.

“I nawt dawn a mi I kawr hak tur??”

“Umm nawt dawn e, min nawh sak peih em?? A nui deuh seih e

“I nawh thiam reng kha, ka sikul kamis pawh min nawh sak thin kha..”

“Ka nawh phir nasat theih em kha”

“Nia ka thiante pawn min nuih thin” fiamthu ti tak deuh chuan ka lo ti a

“Chuvang ni maw min nawh tir duh tawh loh?”

“Mawww?” amah ani reng sia min pawh duhlo thin tu chu tih ka rilru ah a lo lang nghal a “khawi kinah lo la rawh” tiin a kawr chu ka la a, ka kalsan ta a.

 

Ka rilru chu a hlim veng veng, a kawr ka nawh sak lai te chuan” naktukah a ha tak tak angem le, khua hi vawt lo hram se aww.. a “ tiin keimah leh keimah chu ka in be mawlh mawlh a. A kawr ka nawh zawh chuan ka thawmhnaw khaina ah uluk takin ka khai a, alo lam hun ka nghak reng a. Tlai lam chaw ei a la hun lo deuh a, kan junior pakhat chuan ring tak hian

“U Rp inpa in a ko cheeee!!!!” ka phu zawk, rang takin ka va chhuak a Henry chu hmeichhe common room kawtah alo ding reng a, a kawr chu va la in ka pe ta a

“A ban thlep hi I phelh kher duh anih kha”

“I phelh dawn tho maw ka tia, bak ah naktuk ah khua vawt vak ta se..”

“Vawt mah se ka ha dawn tho” tiin a nui sen sen a, a chhuk ta a..

 

A tuk inkhawm ka phur zia kha, engdang mah ka rilru ah hian a awm thei lo. Mahse, ka hlauh ang ngei chuan zingkar atangin ruah a tla cher cher a,. a vawt reuh zek lehnghal. “A ha angem le” tih bak ka ka ngaihtuah leh thei lo, ka kawr pawh a ban half anih avangin min ti lum zo lo, mahse kawr rawng inang hak kha ka chak tlat a ni. Inkhawm tur chuan kan kal hmasa a, an lo luh hun mawlh chu a ni ka nghahhlelh. Innmate mipa dang an lo lut sap sap a, a hnung lamah a lo lut ve a mahse nimin a ka kawr nawh ha khan ka hmu miah lo chu aiah chuan Sweater smart tak a lo ha zawk a. Ni e, a vawt em alawm ma le, en pawh ka en zui lem lo. Ka thiannu in min rawn nghawk sawk, ama lam en turin min mitmei nghal a, ka va en chuan ka va hlim leh si ve, nimin lam a ka kamis nawh sak ngei kha a hnuai ah a lo ha a. a ngawng chu a lo dah chhuah chu ka lo hmu lawk lo zawk a ni.

 

Khami ni atang khan ka beidawn ruk em em chu beiseina tharin a lo thlak leh a , amah ah pawh min hmuh hrehna ang kha a awm tawh pawn ka hre lo, nge ka ngaihbel zawk. Keimah ah thung thin hi chuan min tih beidawn nan fiahna tam tak hmuh ka duh a, a chhan chu chan ka hreh em a ni. A lehlamah vett hung chuan ka beiseina min siam sak tur hian thil ropui leh lian tham a mamawh leh si lo anih hi. Ka inmate thenkhat te hi chuan ka lakah zep an nei hian ka hre thin, mahse an zep miau chuan zawh erawh ka tum lo.

Vawikhat chu ka thiannu nen ground a thutthleng a kan thut lai hian a thianpa nen an rawn kal a. A thianpa chuan min rawn fiam bawrh bawrh a. Henry hnenah chuan "bye bye rawh"a ti a..a bye bye ve mai a, kan zawn a class room a hmeichhe pakhat chuan a rawn bye bye let a. Henry chas anih saw arawn ti a. A hmel ka en vat a en pawh min en ngam lo. Keichu ka lo nui lui hram hram a, “hei hi ni maw ka thiante thil zep reng kha”tiin ka ngaihtuah a

Khami ni atang khan mi hrang kan lo ni ta a,ka haw lo mahse ka hnaih duh lo a ni. Ani pawhin min hlat kha a duh a ni ngei ang. Vanduaithlak tak nge vanneihthlak takin ka nu chuan Inn chhuahsan tura min duh thu chanchin ka hre leh ta. He pa nena kan inhriatrengna chu a thamral mai dawn tih ka hre reng,mahse tih theih dang engmah ka nei lo.

Ka nu in min rawn lak chhuah ni chuan thla ruk ngawt ka lo chenpui tawh ka Innmate te chuan pawn thleng min lo thlah liam liam a. Chutia inthlahna thu kan sawi lai mek chuan Inn building bula Henry min en renga lo ding chu ka va hmu a. Thla hnih ngawt chutianga chiang chuan ka hmu lo tawh a ni. Ani chuan a ban lo vaiin inthlahna ni awm takin a rawn nui suk a. Keipawh chuan ka ban vaih a nui suk pah chuan "Mangtha le" tiin in hre ngai lo ang mai a awm turin ka thlah ta a.

 

 

A ngai te bawk in School chu in atangin ka kal leh tan ta, mahse engkim a danglam tawh a ni. School kal phurna ka nei tawh loa ka hreh ngawih ngawih zawk  a ni, lehlam ah lah exam dawn a ruai a Inn chhuahsan  ka nih avangin Inn a ka awm chhung ai a ka tih that loh hlauh zawngin kan zirtirtu te leh ka zirlaipuite min hmuh dan a dang vek dawn tih ka hre kar bawk si. Lehkha zir lah a hma ai a nasa in a har talh bawk a, ani ka lo hmelhriat kher kher kha ka in chhir rum rum thin.

 

School a ka thiante leh mi zawng zawng deuh thaw chuan Henry bialnu neih chu sawi nuam an ti em em bawk a, “Engtin nge he ti khawp a midangin an hriat a an sawi nasat em em hi ka lo hriat har bik em em le” tiin zawhna ka in zawh phah fo a ni. Amah ka duh tih min hriat pui tu tlemte bulah chuan ka duh tawh loh thu leh an nin a ruk a star an neih a,a ruk bawk a an ban leh mai ang lek a nih thu te ka sawi leh ringawt thin mahse keima thinlung leh rilru put hmang chu keimah bawk hian ka hre chiang, ka ngaihtuah lo tawp thei bik lo a ni.

School ah pawh kan inhmu khat vang vang hle mai, floor awm na in an loh mai bak ah “Haw rual ang aw” ti turin min rawn pan tawh ngai tlat lo a ni. Mahse, vanduaithlak tak nge vanneihthlak tak ka ti dawn zawk, school inrelbawl dan an thlak tlat mai. Chu an thil thlak zingah chuan Henry te floor awmna a hnuai ber leh keini awmna chung ber chu kan in thleng  a ngai a. Henry te a hnuai ber a an awm avang hian tun dinhmunah chuan zunin a kal tur pawn ka chhuk ngam ngai lo a ni a, ani hian ka hmuh hreh zia hrethiamin a rawn chhuk duh lo ve thin angem tih chu ka tan buaina tham a ni.

 

Kar hnih dawn chu dan thar zawmin kan kal ve leh ta, Henry chu a lo chhuk kanla hmu ngai miah lo. Ngati nge hmu hreh em em chung hian ka zawn ruk tlat tho le, mi a tak zawng ka nih hi. Mahse vawikhat chu a thianpa nen kan class room lamah lo pheiin zunin lam pan mek a, chu tih lai chuan ka thian nu nen kan classroom kawtah kan lo ding mai mai a. He mi ni hi School jersy hak ni a ni a, keiin rawng eng ka ha a, ka thiannu erawh chuan a sen a ha a. In thiar fihlim chu ka tum takngial a mahse ka thiannu in min hriatthiam ka hlauh avangin kawtthler lam hawi chuan ka ka ding ta zawk a.

“Kawr sen ha hi a van chhe lo ve, chhe lo I ti ve em?” Henry aw ngei a ni. Ka ngaihdanah chuan ka rilru tina tur a rawn tawng a ni. “Kawr eng ha hi chhe lo ka ti fe zawk” a thianpa sawi chu ka hre leh ta. Duh thlan tur dang ka nei lo, ka thiannu an lam a hawi tawh bawk nen ka hawi let ve ta a, tawi te in ka nuih suk a

“Rp ngati nge Inn atang a I chhuah daih a” a thianpa chuan a rawn ti vat a. Henry chuan min en reng tih ka hre bawk

“Lehkha ka zir tha thei lo a, tution lak ka duh a maw le”

 

Lalpa leh, ka lungphu han ran dan em em kha… Henry erawh chuan tawngkam khat pawn min be lo. Nileng zankhua, a tuk, a tuk leh thleng pawn thil enge maw dang thlen leh hma chu vawiin hi ka ngaihtuah leh reng dawn a nih hi. Ka ngaihtuahna atang a paih bo ka duh, ka lehkha zir a ti buai em em a, tunah chuan ka ngaihtuahna te thleng hian a khawih buai zo vek tawh a nih hi. Lalrempui, engmah I hre lo tak tak nge I haider??

 

Inrinni vawikhat chu ka thiannu call ka dawng a, vawiin hi Inn a awm tan chuan an chhuah ni a ni a, bazaar pui turin min rawn sawm a. Inn awm na hi a han fal em avangin motor hman mai tur a awm loh thin avangin keiman motor han hman chhoh a hruai thlak chu ka tum a. Inn kawtah chuan ka thiannu chuan min lo nghak reng tawh a, “kal ang” tiin Taxi ka in nghah tir na lam chu pan pui ka tum nghal mai a

“Lawk, rei lo te nghak ang”tiin min hnial a, kan mi nghah chu a bialpa a nih ka ring mai a, Reilo te hnu ah ka thiannu bialpa Dina pawh chu a lo chhuak a mahse a hnung ah rawn zuitu an awm tlat mai, tu dang an ni lo Henry ngei a ni.

“Rp, taxi mi I rawn hman” Fela chuan a rawn ti chhuak a

“Aw, ngatinge??”

“Pa nga chuan a phal ngem aw..driver hian”

“Hre nang.. midang nghah kan nei mi?

“Aw, Henry thian pakhat, ti khan han sawm u la , taxi driver saw kan lo bia ang, khi tah a nghak che ni lawm ni Henry..”

“Aw…” a ban deuh chhap.. “Rp han kal lawk ila..” Ka tan hnial chi a ni tawh lo “Aw le” ti chuan ka zui ta a

Lalpa leh!!!! Tun a ka thil tih lai mek chu ka thianpa hlui, a ruk a ka duh em em mai, a bialnu hruai turin ka kalpui!!

“Ti khan han kal rawh, ka lo nghak ang che” thinrimna leh rilru natna a in pawlh tawh

“A ngai lo, a pa a strict si, nangmah nen min hmuh chuan a zia dawn alawm”

“Pawnah a nghak che nilawmni”

“AWwww.. tih dam aiin inven a tha zawk” tiin min kai lawp a

“HENRY!!!!” ka insum thei tawh thlawt lo a ni. Ka ban a chelhna ka paih thla a rang takin ka let nghal a, ka kal pawp pawp a ni ber mai”

 

Taxi awm na ka va thleng a, a hma lam seat ah ka thu hmak, ka thiante pawn ka lungawi lo hmel  kha an hria a ni ngei ang, min be lui lem lo. Ka thiannu tawng ri “Ngati nge Henry saw..” a tih ri chuan min ti phu zawk, kan bul a lo thleng a hah hmel tak chuan “Ka lo chhuk ve lo mai ang” a rawn ti a. Ka thiannu leh a bialpa chuan an han sawm ngial a, a hnial fithla thak a. Ka lawmna leh lungaihna chu a in chen reng a ni.

 

Kum tawp lam kan chuang kai ta, school kan chawl tawh a, lehkha zir lam a in sawrbing a hun telh telh tawh a. Henry te pawh an chhuak tih ka hriat avangin nitin in a Fb profileleh Whatsapp  ka check ziah a, a nun ah hian hriat chhuah ka ni ve ngai lo tih hi ka chiang telh telh a, chu chuan min ti na a, mahse theihngilh duh thin na thinlung ka put thin ang kha a bo tial tial thung. Inn a a awm tawh loh na hian kan pahnih a a hma ang chiah a kan awm dun leh beiseina hi ka nei zawk ami le te ka in ti hial thin.

 

Zan khat chu kan cousin ho in Krismas boruak nuam tak hip a, leng khawthawng mai mai turin ka pa Car in kan chhuak a, kan haw dawn hnaih lamah chuan kan khaw mipui, thalai leh chhungkua ang zawng pawh a tlawh hlawh ber thin Park ah chuan kan tlan thleng ve leh zuai a. Chu lai hmunah chuan ka rin loh lutuk mai thil ka hmu a. Rawlthar rual thu khawm laih, a lai a zu leh a in na hmanrua vel ka hmu a, chu mi  zingah chuan ka beisei loh em em in Henry pawh a awm ve anih chu. Va kal hnaih chu kan duh miah lo, mahse ka u chuan an zingah hmelhriat a lo nei ve a, an lo ko lauh lauh a. Tih thei dang ka nei lo, ka u te ho chu ka zui ve ta a.

 

Henry chuan min en miah lo, zum takin ka ding ngawi reng , ka hnung lam atang a ka hming lam pah a min kuah tu an awm tih ka hriat vel ah chuan ka hawi sawn vat a, Henry thian kawm ngeih em em, an class a mi min lo be fo tu Joseph-a a lo ni a. Henry chu a lo ding hluai a, ahma a min biak pawh tum miah lo khan min be leh hnuhnawh a

“I zir tam tawh em lehkha?” ka chhan dawn lai tak chuan Henry thian a thu zing a mi ruih hmel tak chu a rawn tawng chhuak a

“Ehee.. hei hi maw Rpi chu Hen-a leh Laljoseph-a sawi reng thin kha… Hen-a I sawi fel tawh em??

“Maww”

“Engmah ni lo” Henry chuan a lo ti vat a, ka bulah lo kalin ka phone a rawn la ringawt, password a type nghal a

“Ala ngai” tih pahin min nuih vur vur a, Phone number a dial a, a call nghal a, ama number a in dial danah ka no.a nei tawh lo tih ka hre mai. A chet dan chu a mak takzet, min nel hmel em em lkehnghal, hetiang a a awm lohna a rei tawh si a.

Zanrei ah a ka message dawn ka en chuan, min ti hrilh hai lek lek

“Rp”

“Umm..”

“ Tihpalh nichin kha”

“Engvang.. I rui ami?”

“Zu ka in lo”

“Awih lo”

“dawt ka hrilh ngai che mi?”

“Tam tak”

“Eng chu”

“Ka hre lo”

“Nia, ka hrilh che.. mahse ngawi rengin”

“Eng??” ka hlauthawng lutuk.. enge niang le..

“Kan in hriat tan tirh kha ila hria em?”

“Umm”

“Nih ka thianpa Josepha kha I hria ti raw..”

“Umm hriat loh ten” ka dawh theihna in a tlin tawh lo tep…

“Kan in hriat hma tangin a duh che”

“Maww.??.” Min reply tawh miah lo

“Henry…”

 

Huiz, enge heng thil hi awmzia le, ngati nge khang tiang te a sawi le… A tuk atang chuan Henry chu a reh hmak, whatsapp ah amah en ka tum a, a number zawnah “Invite” tih a lo awm kuau si, number dang a hmang nge, a whatsapp hi a paih tak tak?? Fb ah ka en leh, min ti hrilh hai tu bawk ka hmu leh, nilo engmah ka hmu lo zawk mawle.. min block nge a deactivate, call mai ka duh, ka ngam si lo. Tih dan tur pakhat chu ka la hria, a thianpa Josepha biak a ni, mahse Henry thu sawi kha hriatpui ta se, va beisei angah  min ngaih ka hlau si. Tih theih nei lo ang der chu ka nil eh ta.

 

Kum thar kan chuang kai leh ta, Revision exam nei turin February thla lai hawl lam la vawt tak hnuai ah chuan school kan kal leh ta a. Harsatna tam tak kar a ka zir ve hram hram na chu, ka beisei ang chiah chiah in pek let ka ni a, ka zir dan en chuan ka phu tawk chiahin chhanna pawh ka ziakin ka hria. Exam hi ni hnih danah kan nei avang leh exam zawh a kan haw leh nghal mai thin avangin thiante pawh inhmuh a har em em a, kan in hmu ngai meuh lo zawk.

 

Subject thum-na kan tih ni chuan ka zawh veleh Taxi chang turin kawnah ka phei nghal a, a vang phian mai. Minute sawmpanga vel ka chan hnu chuan pakhat a lo tlan a, ka phar ding thei  hram. Ka thil hmuh chuan min ti phu zawk, Henry chu Taxi chhung ah alo thu a, luh mai na chang pawh ka hre lawk lo… ngawi reng a kan thut dun hnu chuan

“Tinge Inn ah I awm tawh lo mi??”

“Aw, nikum khan ka in la chhuak nghal vek alawm”

“Ngati nge exam dawn dawn ah, board exam thleng awm ta che”

“Lehkha ka zir thei loa……………..E, Joseph-a nen chuan in tha zel maw..”

“Maw.. tu Josepha, I thianpa maw..??”

“Aw ni e, in inbe thin maw ka tia”

“Teuh lo, ka reply ngai lo.. bakah kan exam zawh hma chu anu nin phone min kawl sak dawn alawm”

“Eng exam..?Tun revision nge board”

“Board”

“Engaa???” a mak ti hmel kha mak ka lo ti ve leh chhawng

“Timah” ala nui vur vur zui. Hman kha chu ni se ka beiseina zawng zawng nen keimah vang a hlim ah ka ngai leh ngawt awm si a. Mahse ani zirtirna min pek atang khan engmah beisei ngam chi ka ni tawh lo a ni. Ka chhukna hmunn tur ka thlen chuan driver hnenah fare ka han pe a

“Aww.. bawihi, a nawi I nei lo maw, ka nei miah lo aa”

“Aaa ka nei miah lo pu..

“Chhuk rawh.. ka lo pek kep mai ang” Henry chuan a lo ti vat a

“Angai lo”

“Chhuk rawh, chhuk rawh..” ti chuan min nawr chhuak nawk nawk a, “Nih ka lawm e aw, ka rul leh ang che” ti chuan ka kalsan ta a

 

Zanah chuan ka hlim ver ver khawp mai, lehkha zir lam ka ngaihsak thei lo. He pa hi chuan min ti buai ve ngawt mai, ka rilru a tih natin lehkha ka zir theih loh phah a, min tih hlim pauh leh ka zir thei lo leh zual anih hi. Ka nu mut hnu chuan a rukin Laptop ka la a, fb ah ka hmu  mial mahna tiin fb ah ka online a. a hma khan min block ni lo in, a account alo deactivate tih ka homepage a astatus update ka hmuh chuan ka hrethiam nghal a, a status chuan ahma aia hlimin min nuih tir vur vur mai

“Today was a fairytale” tih hi a lo update a, ka online tih a hriat ka duh loh avangin like pawh ka like ta lem lo va, comments ho chu ka en nghal a

“***-Khawi lam a fairytale ?”

Henry Chawhte- CAB :v

****-Tunge le CAB a love story I lo siampui chu

Henry Chawhte-JUST ANOTHER SECRET CRUSH

****- I lerh I chas ka hrilh dawn

Henry Chawhte-Hrilh tur I nei lo, ka single chiang em.. tu emaw nghak in :p”

 

A single maw.. huiiiii ka van hlim ve, ani vang a beiseina nei tawh miah lo tur a ka intiamna chu tunah hian keimah ngeiin ka bawhchhe mek a ni. Mahse, ka biak arem lo a ka be thei rih bawk si lo. A pawi lo, nghak rih phawt mai ang, thil hlimawm tak thleng tur a beiseina nen.

 

Kar loah board exam hun chu a lo thleng ta, kan in lam tang lahin tumah ka be thei rih si lo. Laptop lam a a ruk a online tum pawm ka nu strict tak hian wifi thlengin a off vek bawk si, Henry ka ngaih zia hi sawi fiah thiam chi pawh a ni lo. Exam a ka rilru pek chu ka tum tang tang a, harsa hle mah se ka ti chho thei ve zel. Rilru lam a natna neih lem loh hi chuan dam hi a lo hlu anih hi. Exam zawh a Henry biakm mawlh ka chak. School lamah chuan ka hmu f ova, mahse schoolkal dan pangngai a kal kan ni si lo. Kan inhmuh chang chuan min be ziah a, ka phone kawl hun tur min la zawt ziah a, chu chuan exam  zawh a phone kawl hun min ti nghakhlel leh zual thin.

 

Ka nghahhlelh em em kan exam zawh hun chu a lo thleng ta. Exam ka chhan zawh chuan ka thiante leng kual pawh zui lo in ka haw nghal a, ka phone ka en nghal vat. Mahse, ka beisei ang a lo awm miah lo Joseph-a message tam tak chiah!!!” Min ti beidawng leh dawn ani maw” ti a ka ngaihtuah lai mek chuan number in save  loh atangin call alo kal, vawi khat chiah a ring tih ah chuan ka pick up nghal

“Hello”

“I kawl tawh maw..”

“Henry”

“Awih..”

“I aw avan dang”

“A awihawm loh ee”

“Hehe ni lawm”

“Chhanna chu..”

“Engmaw..? Ka lungphu ran zia chu”

“Aww.. Joseph-a tan a chhanna chu”

“Heiiiiiii…………”

“Enga ti nui nui nge”

“A ma tan a ka chhanna chu I hriat a tangkai viau a mi”

“Tangkai teh reng mai, keimah lam  a I chhanna tur a hril sia”

“Maww..”

“I hrethiam lo mi??”

“I sawi chiang lo e lawm”

“Nih sawi chiang tur a ka lo len I phal em?”

“Engtik lai pawn” ka ti mah mah em le.. ka zak leh hnuhnawh

“Tunah pawh maw”

“Ngati”

“In in bulah ka ding mek a” rang mang khengin ka tlan chhuak nghal a, kan in bula ding reng rawlthar hmeltha em em, school form a inhmeh tak nen a nui vur vur a ding ka hmu a, ka hlim lutuk chu va kuah cheng chu ka chak a, mahse ka insum thei hram. “Lut turin min sawm dawn na nge” ka harh chhuak zawkin ka hria, “Lo lut rawh ti chuan a banah ka chelh a, a ban a ka chelhna chu la thla in ka kut phah chu a hum a, in ah chuan min kai lut a. Enge kan sawi ang tih chu in lo ngaihtuah zui ve tawh mai dawn nia..