PURI

 Kum tam alo vei ve ta reng mai,hun tam liamin hriatrengna dang tam takin khuh bo ve teh thin mah se kha hun leh kum te kha ka theihnghilh thei lo. "Nu,hmana i damloh vak kum khan class engzat nge ka nih kha??" ti a ka zawh chang apiang hian nui seih chung hian "Ka van chiang tawh love, doctor nih i tum kum kha" tih ringawt in min chhang thin. Ni e, khang hun lai khan doctor nih kha ka thil t...um ber a ni thin,a chhan chu ka nu na tuar hmel leh bawksawp thlir reng kha ka tan chuan veltu awm loa mittui far tir tu tam ber a ni.

Ka la te viau na in engkim a bo tur khawp a mawl mang erawh ka ni lo. Ka sen tet atanga i hnathawhna hmuna min kalsan thin avang khan kartawp chawlh ah chiah kan inhmu thin kha a ni a,ka thlahlel em em thin che a mahse keimah chiah a hun ka hman kha a tul fo thin. Kha kum kha chuan kan inhmu zing hle ti raw.. chhan dang vang ni se i bula ka awm kha a nawm dawn tehreng nen mahse natna khum a mu chung chuan i bula awm kha a nuam lo takzet a ni.

Zirtawp tlai kha ka nghakhlel thei em em a,achhan chu kartawp chawlh kan hman dun theih dawn avangin. Phur em em in ka school bang ka lo haw a nang chuan eitur min lo siam ziah a,kei aia in i thleng har chang erawh kha chuan min lo kaihthawh hun nghakin khumah ka lo muhil der ziah thin anih kha. Mahse kha kum duhawm lo takah erawh kha chuan thawhtan atanga zirtawp thleng khan ka school bang hi khumah chau takin ilo mu bem a. Roomah ka rawn lut a chau takin "i ril a tam em?"i rawn ti a, thawh mai i tum ka hlauh avangin "Ayh" tih chiah a chhang che in bathroomah ka lut a,ka va tap thin. Chawlhni tlaiah kantu i nei ve nak nak a,in thusawi i damlohna chungchang in sawi tak hlauhin i bulah ka zirlaibu keu in,in thusawi ah chuan hlauthawng em em chung si in ka beng ka chhi kar thin.

I doctor fanu kan class a awm khan i chanchin a hriatpui mahna tiin ka zawt fova,mahse engmah a hre teuh si lo. Kalsan che ka duh ngai loa,ka school kal chhung ringawt pawh khan thlamuangin class ah ka awm ngai lo a,rawn haw pawh ka phur em em ngai chuang lo. Khang hun lai khan ka chhungkua te lakah khan ka tang hru a,i chanchin an sawi em??i natna chungchang sawi an nei em?? tih ngaihtiah reng rengin ka rilru ka seng thin. Zanah ka thang harhin i thaw ri a dik nge dik lo ka ngaithla ziah a,a dik loa ka hriat chuan ka sawi vak vak che a "Bawihte enge?"i rawn ti a,kuah vat che in "Ka hlau" tih ringawt in ka chhang thin che. Ka muthilh theih loh chang apianga i ban ka kham a ka muthilh nghal zel thin chu hre rengin i ban min kham tir vat thin a,thlamuang takin ka muhil nghal suk suk thin.

I damdawi i ei bakah thildang i ei tha thei ngai lo chung pawh a i chak nan chaw i ei lui tlat thin khan i tumruh zia min hmuh nawn tir fo thin. Vawikhat ka school bang ka thil duh em em Puri ka rawn hawn a kan pahnihin kan ei dun a i eitui ve zia kha. Khami ni atang khan Puri lo lei haw rawh aw iti ziah a keichuan phur takin ka lo hawn ziah thin a. "Tunge Puri hi siam chhuak le,a tha ee ti raw.." tih a ka sawi apiang in i nui suk hmel kha ka theihngilh ngai lo. School chawlh ni chuan ka rawn hawn theih si loh avangin kan in atanga an zawrhna hmun chu keimah te in i Puri ei tur leiin ka kal vang vang thin a, "Puri vang hian anu a dam thei angem le.." tih in ka ngaihtuah fo thin.

Mi te tan chuan Puri chu an in hrai puarna chi khat mai ani a,mahse nu keini pahnih tan chuan i dam leh nan a beiseina min petu zinga pakhat a ni tlat a ni ti raw.. Ahma ang em em in ei nasa tawh lo mahila a hming hian ka tan awmze thuk tak a nei a, eitur man to leh tunlai tak tak te aiin ka tan chuan a hlu bikin a ropui bik a ni. A tuina te chuan eitur dang tuina tluk lo mah se ka nu in chaklo leh bawrhsawm em em chung pawh a a ei duh kha a,ka tan chuan he eitur aia eitur hlu hi a awm chuang lo.

Lalpa'n ka tawngtaina leh mi hmangaihtu te tawngtaina chhangin ka nu chu a ti dam a,kan pahnih in Puri siam na hmun ngeiah vawi tam tak Puri kan eidun theih phah a,ka va hlim em. Khuma kan pahnih a mawlhtu nei reng a ei ai chuan boruak thiang tak kara dam taka kan pahnih a kan eidun khan dam hlutzia min hriatchhuah tir ziah thin. Ka pa vana mi in vawiin thlengin ka nu chu min enkawl sak a, a piancham thleng leh thei tura a venna hi keimah mai chuan lawmthu sawi ngaihna ka hre lo. Lalpa ka lawm e tih mai loh chu.