DUHSAKNA SANG BER

'I tan chauh' ti a thu min tiam thintu, ahmangaih ber nen a pumkhat an nihna tur lawmpuina a tel tur a sawmna lehkha ka mit ngei a ka chhiar chuan ka mittui chuan chu lehkha chu a bual zawih zawih a, mahse hei erawh Khuanu hnena ka lawmthu sawina a ni. A thlânlung, ama hming chuang ngei chhiar a ka awm lo kha.

Khawvel hun leh nì a hman tawh zawng zawnga a hlimnì ber leh chhinchhiahtlak ber hun chu ka tan chuan mit a hmuh tur ruang awm si lo a mithi vuina a tel ang mai ni mahila, ka mi chân hian thinlung na ngawih ngawiha chântu a nei a ni tih pawh hre lo a hlim hmel a pu reng thei chuan lawmpuitlak a nih zia min hriat chhuah tirin, nuihmel ngaihnobei tak ka hmuhtir ve lo thei lo.

Chu kawpchawi inhmeh tak ten 'tiam tlat e' ti adam chhung hun hmang dun tura pumkhat an nih na an puan chhuah lai chuan, he thinlung hi chem a vih ang mai a nâ in awm mahse, hlimna pe ve thei lo kei nilo a, hlimna zawng zawng pe thei tu a bul a ding ka hmuh khan, theihnghilh ngai tawh lo turin he thinlung hian a thlah liam thei ta hram a ni.

Nupa inhmeh tak te, hlim tak leh rilru inpawh taka an lengdun ka hmuh chang chuan he thinlung hi rum vawng vawng thin mah se, hmu leh tawh ngai lo tura thlarau khawvel a thlahliam anih ai chuan kei nen nilo mah se, ahlim hmel ka la hmu thei kha Khuanu hnenah lawmthu awm mawlh rawh se.

A hrai chawi duhawm tak takte ka tawh chang hian itsikna keimah a lo chhuak chuan, kei nen a kan fate ni zawk se aw tiin ngaihtuah fo thin mah ila, a hmangaih miah loh nena kan fate anni tur chu a vanduaithlak tur zia hrechhuakin ka fate vanduaina thlen lo a, chu a hmangaih ber nena an fate vanneihna a thlen ta zawk chuan lungawina kim min pe lo mah se, lungdam ten ka awm ve theih phah thin.

Min hmangaihtu diktak ka tawn a, khiang ka awi ve ni alo thlen khan, ani bak a ngaih leh thlakhlelh ka nei chuang lo. Mahse ka bulah min ngai a min thlahlel em em tu piah lamah,hmangaihna diktak a min hmangaihtu ka nei tih hria in keipawn a tan chauh ka nun hman katum ta zawk a.

A vawikhatna atan keimah ngeiin 'ka fapa' tih a ka koh theih tur naute lo pian ni a, ka pasal hlim hmel ka hmuh khan khawvel mipa awm zawng zawng, ka nunhlui ami tiamin khatiang khawp a an hlimna leh lawmna in min tih hlim kha an awm thei lovang. Fapa ka hrin sak hi kainchhir lo a ni.

A nupui leh a fapa tana inpe zo tak, ka kianga awm reng ka pasal ka en chang hian lungawina kim nei hliah hliah hian ka inhre thin. Ka pasal hi ka hmangaih a, ka nunhlui ami erawh kha chu ka hmangaih thin mai alo ni tawh zawk ani.

Tunah chuan a neih ang zawng zawng chhungkua, hnemtu, hmangaihtu leh hlimna chuka nei ve tawh a, midang nupui atan alo thlang kha a fing ka tiin ka lawm em em tawh zawk ani. Achhan chu pakhat chiahin a hmagaihna thawnthu kha pumkhat ni turin ziah zawm lo nita se min hmangaihtu ka pasal hi ka ta a ni awm silo a. Tunah chuan a vanneihna a ka lawmpui reng a tul tawh lo a, a vanneihna ka hriatpui reng pawh a ngai tawh hek lo. Ka neihah hian ka lungawi a, ka hlim a, ka chhungkua hi ka hmangaih thin ka hmangaihna let tam takin ka hmangaih a ni. A tawpna atan lawmpuina nilo in duhsakna sangber ka hlanzawk e..